੧੦. ਦੁਤਿਯਨਵਕਂ [ਇਦਂ ਨਵਕਂ ਪੋਰਾਣਪੋਤ੍ਥਕੇਸੁ ਅਵਿਸੁਦ੍ਧਿਵਸੇਨੇਵ ਆਗਤਂ, ਵੁਚ੍ਚਮਾਨਤਤਿਯਨਵਕੇਨ ਚ ਸਂਸਟ੍ਠਂ. ਤਂ ਪਟਿਵਿਸੋਧਕੇਹਿ ਅਸਂਸਟ੍ਠਂ ਕਤ੍ਵਾ ਵਿਸੁਂ ਪਤਿਟ੍ਠਾਪਿਤਂ. ਸੀਹਲ਼ਸ੍ਯਾਮਪੋਤ੍ਥਕੇਸੁ ਪਨ ਤਂ ਵਿਸੁਦ੍ਧਿਵਸੇਨੇਵ ਆਗਤਂ. ਤਂ ਪਨੇਵਂ ਵੇਦਿਤਬ੍ਬਂ –§੧੦- ਮੂਲਾਯਵਿਸੁਦ੍ਧਿਨਵਕ (ਸੀ. ਸ੍ਯਾ.)§੧੮੩. ਇਧ ਪਨ ਭਿਕ੍ਖਵੇ ਭਿਕ੍ਖੁ ਸਮ੍ਬਹੁਲਾ ਸਂਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਮ੍ਪਿ ਅਪਰਿਮਾਣਮ੍ਪਿ…ਪੇ… ਵਵਤ੍ਥਿਤਮ੍ਪਿ ਸਮ੍ਭਿਨ੍ਨਮ੍ਪਿ. ਸੋ ਸਂਘਂ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਯਾਚਤਿ, ਤਸ੍ਸ ਤਸ੍ਸ ਸਂਘੋ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਦੇਤਿ, ਸੋ ਪਰਿਵਸਨ੍ਤੋ ਅਨ੍ਤਰਾ ਸਮ੍ਬਹੁਲਾ ਸਂਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਾਯੋ ਅਪ੍ਪਟਿਚ੍ਛਨ੍ਨਾਯੋ…ਪੇ… ਪਰਿਮਾਣਾਯੋ ਪਟਿਚ੍ਛਨ੍ਨਾਯੋ…ਪੇ… ਪਰਿਮਾਣਾਯੋ ਪਟਿਚ੍ਛਨ੍ਨਾਯੋਪਿ ਅਪ੍ਪਟਿਚ੍ਛਨ੍ਨਾਯੋਪਿ. ਸੋ ਸਂਘਂ ਅਨ੍ਤਰਾਆਪਤ੍ਤੀਨਂ ਮੂਲਾਯਪਟਿਕਸ੍ਸਨਂ ਯਾਚਤਿ, ਤਂ ਸਂਘੋ ਅਨ੍ਤਰਾਆਪਤ੍ਤੀਨਂ ਮੂਲਾਯ ਪਟਿਕਸ੍ਸਤਿ ਧਮ੍ਮਿਕੇਨ ਕਮ੍ਮੇਨ ਅਕੁਪ੍ਪੇਨ ਠਾਨਾਰਹੇਨ, ਧਮ੍ਮੇਨ ਸਮੋਧਾਨਪਰਿਵਾਸਂ ਦੇਤਿ, ਧਮ੍ਮੇਨ ਮਾਨਤ੍ਤਂ ਦੇਤਿ, ਧਮ੍ਮੇਨ ਅਬ੍ਭੇਤਿ. ਸੋ ਭਿਕ੍ਖਵੇ ਭਿਕ੍ਖੁ ਵਿਸੁਦ੍ਧੋ ਤਾਹਿ ਆਪਤ੍ਤੀਹਿ. (੧-੩)§ਇਧ ਪਨ ਭਿਕ੍ਖਵੇ ਭਿਕ੍ਖੁ ਸਮ੍ਬਹੁਲਾ ਸਂਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਮ੍ਪਿ ਅਪਰਿਮਾਣਮ੍ਪਿ…ਪੇ… ਵਵਤ੍ਥਿਤਮ੍ਪਿ ਸਮ੍ਭਿਨ੍ਨਮ੍ਪਿ. ਸੋ ਸਂਘਂ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਯਾਚਤਿ, ਤਸ੍ਸ ਸਂਘੋ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਦੇਤਿ, ਸੋ ਪਰਿਵਸਨ੍ਤੋ ਅਨ੍ਤਰਾ ਸਮ੍ਬਹੁਲਾ ਸਂਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਅਪਰਿਮਾਣਾਯੋ ਅਪ੍ਪਟਿਚ੍ਛਨ੍ਨਾਯੋ…ਪੇ… ਅਪਰਿਮਾਣਾਯੋ ਪਟਿਚ੍ਛਨ੍ਨਾਯੋ…ਪੇ… ਅਪਰਿਮਾਣਾਯੋ ਪਟਿਚ੍ਛਨ੍ਨਾਯੋਪਿ ਅਪ੍ਪਟਿਚ੍ਛਨ੍ਨਾਯੋਪਿ. ਸੋ ਸਂਘਂ ਅਨ੍ਤਰਾਆਪਤ੍ਤੀਨਂ ਮੂਲਾਯਪਟਿਕਸ੍ਸਨਂ ਯਾਚਤਿ, ਤਂ ਸਂਘੋ ਅਨ੍ਤਰਾਆਪਤ੍ਤੀਨਂ ਮੂਲਾਯ ਪਟਿਕਸ੍ਸਤਿ ਧਮ੍ਮਿਕੇਨ ਕਮ੍ਮੇਨ ਅਕੁਪ੍ਪੇਨ ਠਾਨਾਰਹੇਨ, ਧਮ੍ਮੇਨ ਸਮੋਧਾਨਪਰਿਵਾਸਂ ਦੇਤਿ, ਧਮ੍ਮੇਨ ਮਾਨਤ੍ਤਂ ਦੇਤਿ, ਧਮ੍ਮੇਨ ਅਬ੍ਭੇਤਿ. ਸੋ ਭਿਕ੍ਖਵੇ ਭਿਕ੍ਖੁ ਵਿਸੁਦ੍ਧੋ ਤਾਹਿ ਆਪਤ੍ਤੀਤਿ. (੪-੬)§ਇਧ ਪਨ ਭਿਕ੍ਖਵੇ ਭਿਕ੍ਖੁ ਸਮ੍ਬਹੁਲਾ ਸਂਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤੀ ਪਰਿਮਾਣਮ੍ਪਿ ਅਪਰਿਮਾਣਮ੍ਪਿ…ਪੇ… ਵਵਤ੍ਥਿਤਮ੍ਪਿ ਸਮ੍ਭਿਨ੍ਨਮ੍ਪਿ. ਸੋ ਸਂਘਂ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਯਾਚਤਿ, ਤਸ੍ਸ ਸਂਘੋ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਦੇਤਿ, ਸੋ ਪਰਿਵਸਨ੍ਤੋ ਅਨ੍ਤਰਾ ਸਮ੍ਬਹੁਲਾ ਸਂਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਾਯੋਪਿ ਅਪਰਿਮਾਣਾਯੋਪਿ ਅਪ੍ਪਟਿਚ੍ਛਨ੍ਨਾਯੋ…ਪੇ… ਪਰਿਮਾਣਾਯੋਪਿ ਅਪਰਿਮਾਣਾਯੋਪਿ ਪਟਿਚ੍ਛਨ੍ਨਾਯੋ…ਪੇ… ਪਰਿਮਾਣਾਯੋਪਿ ਅਪਰਿਮਾਣਾਯੋਪਿ ਪਟਿਚ੍ਛਨ੍ਨਾਯੋਪਿ ਅਪ੍ਪਟਿਚ੍ਛਨ੍ਨਾਯੋਪਿ. ਸੋ ਸਂਘਂ ਅਨ੍ਤਰਾਆਪਤ੍ਤੀਨਂ ਮੂਲਾਯਪਟਿਕਸ੍ਸਨਂ ਯਾਚਤਿ, ਤਂ ਸਂਘੋ ਅਨ੍ਤਰਾਆਪਤ੍ਤੀਨਂ ਮੂਲਾਯ ਪਟਿਕਸ੍ਸਤਿ ਧਮ੍ਮਿਕੇਨ ਕਮ੍ਮੇਨ ਅਕੁਪ੍ਪੇਨ ਠਾਨਾਰਹੇਨ, ਧਮ੍ਮੇਨ ਸਮੋਧਾਨਪਰਿਵਾਸਂ ਦੇਤਿ, ਧਮ੍ਮੇਨ ਮਾਨਤ੍ਤਂ ਦੇਤਿ, ਧਮ੍ਮੇਨ ਅਬ੍ਭੇਤਿ. ਸੋ ਭਿਕ੍ਖਵੇ ਭਿਕ੍ਖੁ ਵਿਸੁਦ੍ਧੋ ਤਾਹਿ ਆਪਤ੍ਤੀਹਿ. (੭-੯)§ਮੂਲਾਯ ਵਿਸੁਦ੍ਧਿਨਵਕਂ ਨਿਟ੍ਠਿਤਂ.]

੧੮੩. ‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਮ੍ਪਿ ਅਪਰਿਮਾਣਮ੍ਪਿ…ਪੇ… ਵਵਤ੍ਥਿਤਮ੍ਪਿ ਸਮ੍ਭਿਨ੍ਨਮ੍ਪਿ. ਸੋ ਸਙ੍ਘਂ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਯਾਚਤਿ. ਤਸ੍ਸ ਸਙ੍ਘੋ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਦੇਤਿ. ਸੋ ਪਰਿਵਸਨ੍ਤੋ ਅਨ੍ਤਰਾ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਾ ਅਪ੍ਪਟਿਚ੍ਛਨ੍ਨਾਯੋ. ਸੋ ਸਙ੍ਘਂ ਅਨ੍ਤਰਾਆਪਤ੍ਤੀਨਂ ਮੂਲਾਯਪਟਿਕਸ੍ਸਨਂ ਯਾਚਤਿ. ਤਂ ਸਙ੍ਘੋ ਅਨ੍ਤਰਾਆਪਤ੍ਤੀਨਂ ਮੂਲਾਯ ਪਟਿਕਸ੍ਸਤਿ ਅਧਮ੍ਮਿਕੇਨ ਕਮ੍ਮੇਨ ਕੁਪ੍ਪੇਨ ਅਟ੍ਠਾਨਾਰਹੇਨ, ਅਧਮ੍ਮੇਨ ਸਮੋਧਾਨਪਰਿਵਾਸਂ ਦੇਤਿ; ਧਮ੍ਮੇਨ ਮਾਨਤ੍ਤਂ ਦੇਤਿ, ਧਮ੍ਮੇਨ ਅਬ੍ਭੇਤਿ. ਸੋ, ਭਿਕ੍ਖਵੇ, ਭਿਕ੍ਖੁ ਅਵਿਸੁਦ੍ਧੋ ਤਾਹਿ ਆਪਤ੍ਤੀਹਿ. (੧)

ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਮ੍ਪਿ ਅਪਰਿਮਾਣਮ੍ਪਿ…ਪੇ… ਵਵਤ੍ਥਿਤਮ੍ਪਿ ਸਮ੍ਭਿਨ੍ਨਮ੍ਪਿ. ਸੋ ਸਙ੍ਘਂ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਯਾਚਤਿ. ਤਸ੍ਸ ਸਙ੍ਘੋ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਦੇਤਿ. ਸੋ ਪਰਿਵਸਨ੍ਤੋ ਅਨ੍ਤਰਾ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਾ ਪਟਿਚ੍ਛਨ੍ਨਾਯੋ. ਸੋ ਸਙ੍ਘਂ ਅਨ੍ਤਰਾਆਪਤ੍ਤੀਨਂ ਮੂਲਾਯਪਟਿਕਸ੍ਸਨਂ ਯਾਚਤਿ. ਤਂ ਸਙ੍ਘੋ ਅਨ੍ਤਰਾਆਪਤ੍ਤੀਨਂ ਮੂਲਾਯ ਪਟਿਕਸ੍ਸਤਿ ਅਧਮ੍ਮਿਕੇਨ ਕਮ੍ਮੇਨ ਕੁਪ੍ਪੇਨ ਅਟ੍ਠਾਨਾਰਹੇਨ, ਅਧਮ੍ਮੇਨ ਸਮੋਧਾਨਪਰਿਵਾਸਂ ਦੇਤਿ; ਧਮ੍ਮੇਨ ਮਾਨਤ੍ਤਂ ਦੇਤਿ, ਧਮ੍ਮੇਨ ਅਬ੍ਭੇਤਿ. ਸੋ, ਭਿਕ੍ਖਵੇ, ਭਿਕ੍ਖੁ ਅਵਿਸੁਦ੍ਧੋ ਤਾਹਿ ਆਪਤ੍ਤੀਹਿ. (੨)

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਮ੍ਪਿ ਅਪਰਿਮਾਣਮ੍ਪਿ…ਪੇ… ਵਵਤ੍ਥਿਤਮ੍ਪਿ ਸਮ੍ਭਿਨ੍ਨਮ੍ਪਿ. ਸੋ ਸਙ੍ਘਂ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਯਾਚਤਿ. ਤਸ੍ਸ ਸਙ੍ਘੋ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਦੇਤਿ. ਸੋ ਪਰਿਵਸਨ੍ਤੋ ਅਨ੍ਤਰਾ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਾ ਪਟਿਚ੍ਛਨ੍ਨਾਯੋਪਿ ਅਪ੍ਪਟਿਚ੍ਛਨ੍ਨਾਯੋਪਿ. ਸੋ ਸਙ੍ਘਂ ਅਨ੍ਤਰਾਆਪਤ੍ਤੀਨਂ ਮੂਲਾਯਪਟਿਕਸ੍ਸਨਂ ਯਾਚਤਿ. ਤਂ ਸਙ੍ਘੋ ਅਨ੍ਤਰਾਆਪਤ੍ਤੀਨਂ ਮੂਲਾਯ ਪਟਿਕਸ੍ਸਤਿ ਅਧਮ੍ਮਿਕੇਨ ਕਮ੍ਮੇਨ ਕੁਪ੍ਪੇਨ ਅਟ੍ਠਾਨਾਰਹੇਨ, ਅਧਮ੍ਮੇਨ ਸਮੋਧਾਨਪਰਿਵਾਸਂ ਦੇਤਿ; ਧਮ੍ਮੇਨ ਮਾਨਤ੍ਤਂ ਦੇਤਿ, ਧਮ੍ਮੇਨ ਅਬ੍ਭੇਤਿ. ਸੋ ਭਿਕ੍ਖਵੇ, ਭਿਕ੍ਖੁ ਅਵਿਸੁਦ੍ਧੋ ਤਾਹਿ ਆਪਤ੍ਤੀਹਿ. (੩)

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਮ੍ਪਿ ਅਪਰਿਮਾਣਮ੍ਪਿ, ਏਕਨਾਮਮ੍ਪਿ ਨਾਨਾਨਾਮਮ੍ਪਿ, ਸਭਾਗਮ੍ਪਿ ਵਿਸਭਾਗਮ੍ਪਿ, ਵਵਤ੍ਥਿਤਮ੍ਪਿ ਸਮ੍ਭਿਨ੍ਨਮ੍ਪਿ. ਸੋ ਸਙ੍ਘਂ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਯਾਚਤਿ. ਤਸ੍ਸ ਸਙ੍ਘੋ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਦੇਤਿ. ਸੋ ਪਰਿਵਸਨ੍ਤੋ ਅਨ੍ਤਰਾ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਅਪਰਿਮਾਣਾ ਅਪ੍ਪਟਿਚ੍ਛਨ੍ਨਾਯੋ…ਪੇ… ਅਪਰਿਮਾਣਾ ਪਟਿਚ੍ਛਨ੍ਨਾਯੋ…ਪੇ… ਅਪਰਿਮਾਣਾ ਪਟਿਚ੍ਛਨ੍ਨਾਯੋਪਿ ਅਪ੍ਪਟਿਚ੍ਛਨ੍ਨਾਯੋਪਿ…ਪੇ… ਪਰਿਮਾਣਾਯੋਪਿ ਅਪਰਿਮਾਣਾਯੋਪਿ ਅਪ੍ਪਟਿਚ੍ਛਨ੍ਨਾਯੋ. ਸੋ ਸਙ੍ਘਂ ਅਨ੍ਤਰਾਆਪਤ੍ਤੀਨਂ ਮੂਲਾਯਪਟਿਕਸ੍ਸਨਂ ਯਾਚਤਿ. ਤਂ ਸਙ੍ਘੋ ਅਨ੍ਤਰਾਆਪਤ੍ਤੀਨਂ ਮੂਲਾਯ ਪਟਿਕਸ੍ਸਤਿ ਅਧਮ੍ਮਿਕੇਨ ਕਮ੍ਮੇਨ ਕੁਪ੍ਪੇਨ ਅਟ੍ਠਾਨਾਰਹੇਨ, ਅਧਮ੍ਮੇਨ ਸਮੋਧਾਨਪਰਿਵਾਸਂ ਦੇਤਿ; ਧਮ੍ਮੇਨ ਮਾਨਤ੍ਤਂ ਦੇਤਿ, ਧਮ੍ਮੇਨ ਅਬ੍ਭੇਤਿ. ਸੋ, ਭਿਕ੍ਖਵੇ, ਭਿਕ੍ਖੁ ਅਵਿਸੁਦ੍ਧੋ ਤਾਹਿ ਆਪਤ੍ਤੀਹਿ. (੪-੭)

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਮ੍ਪਿ ਅਪਰਿਮਾਣਮ੍ਪਿ…ਪੇ… ਵਵਤ੍ਥਿਤਮ੍ਪਿ ਸਮ੍ਭਿਨ੍ਨਮ੍ਪਿ. ਸੋ ਸਙ੍ਘਂ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਯਾਚਤਿ. ਤਸ੍ਸ ਸਙ੍ਘੋ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਦੇਤਿ. ਸੋ ਪਰਿਵਸਨ੍ਤੋ ਅਨ੍ਤਰਾ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਾਯੋਪਿ ਅਪਰਿਮਾਣਾਯੋਪਿ ਪਟਿਚ੍ਛਨ੍ਨਾਯੋ. ਸੋ ਸਙ੍ਘਂ ਅਨ੍ਤਰਾਆਪਤ੍ਤੀਨਂ ਮੂਲਾਯਪਟਿਕਸ੍ਸਨਂ ਯਾਚਤਿ. ਤਂ ਸਙ੍ਘੋ ਅਨ੍ਤਰਾਆਪਤ੍ਤੀਨਂ ਮੂਲਾਯ ਪਟਿਕਸ੍ਸਤਿ ਅਧਮ੍ਮਿਕੇਨ ਕਮ੍ਮੇਨ ਕੁਪ੍ਪੇਨ ਅਟ੍ਠਾਨਾਰਹੇਨ, ਅਧਮ੍ਮੇਨ ਸਮੋਧਾਨਪਰਿਵਾਸਂ ਦੇਤਿ, ਧਮ੍ਮੇਨ ਮਾਨਤ੍ਤਂ ਦੇਤਿ, ਧਮ੍ਮੇਨ ਅਬ੍ਭੇਤਿ. ਸੋ, ਭਿਕ੍ਖਵੇ, ਭਿਕ੍ਖੁ ਅਵਿਸੁਦ੍ਧੋ ਤਾਹਿ ਆਪਤ੍ਤੀਹਿ. (੮)

‘‘ਇਧ ਪਨ, ਭਿਕ੍ਖਵੇ, ਭਿਕ੍ਖੁ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਮ੍ਪਿ ਅਪਰਿਮਾਣਮ੍ਪਿ…ਪੇ… ਵਵਤ੍ਥਿਤਮ੍ਪਿ ਸਮ੍ਭਿਨ੍ਨਮ੍ਪਿ. ਸੋ ਸਙ੍ਘਂ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਯਾਚਤਿ. ਤਸ੍ਸ ਸਙ੍ਘੋ ਤਾਸਂ ਆਪਤ੍ਤੀਨਂ ਸਮੋਧਾਨਪਰਿਵਾਸਂ ਦੇਤਿ. ਸੋ ਪਰਿਵਸਨ੍ਤੋ ਅਨ੍ਤਰਾ ਸਮ੍ਬਹੁਲਾ ਸਙ੍ਘਾਦਿਸੇਸਾ ਆਪਤ੍ਤਿਯੋ ਆਪਜ੍ਜਤਿ ਪਰਿਮਾਣਾਯੋਪਿ ਅਪਰਿਮਾਣਾਯੋਪਿ ਪਟਿਚ੍ਛਨ੍ਨਾਯੋਪਿ ਅਪ੍ਪਟਿਚ੍ਛਨ੍ਨਾਯੋਪਿ. ਸੋ ਸਙ੍ਘਂ ਅਨ੍ਤਰਾਆਪਤ੍ਤੀਨਂ ਮੂਲਾਯਪਟਿਕਸ੍ਸਨਂ ਯਾਚਤਿ. ਤਂ ਸਙ੍ਘੋ ਅਨ੍ਤਰਾਆਪਤ੍ਤੀਨਂ ਮੂਲਾਯ ਪਟਿਕਸ੍ਸਤਿ ਅਧਮ੍ਮਿਕੇਨ ਕਮ੍ਮੇਨ ਕੁਪ੍ਪੇਨ ਅਟ੍ਠਾਨਾਰਹੇਨ, ਅਧਮ੍ਮੇਨ ਸਮੋਧਾਨਪਰਿਵਾਸਂ ਦੇਤਿ; ਧਮ੍ਮੇਨ ਮਾਨਤ੍ਤਂ ਦੇਤਿ, ਧਮ੍ਮੇਨ ਅਬ੍ਭੇਤਿ. ਸੋ, ਭਿਕ੍ਖਵੇ, ਭਿਕ੍ਖੁ ਅਵਿਸੁਦ੍ਧੋ ਤਾਹਿ ਆਪਤ੍ਤੀਹਿ. (੯)

ਦੁਤਿਯਨਵਕਂ ਨਿਟ੍ਠਿਤਂ.