੧੨. ਸਤ੍ਤਸਤਿਕਕ੍ਖਨ੍ਧਕਂ

੧. ਪਠਮਭਾਣਵਾਰੋ

੪੪੬. ਤੇਨ ਖੋ ਪਨ ਸਮਯੇਨ ਵਸ੍ਸਸਤਪਰਿਨਿਬ੍ਬੁਤੇ ਭਗਵਤਿ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਵੇਸਾਲਿਯਂ ਦਸ ਵਤ੍ਥੂਨਿ ਦੀਪੇਨ੍ਤਿ – ਕਪ੍ਪਤਿ ਸਿਙ੍ਗਿਲੋਣਕਪ੍ਪੋ, ਕਪ੍ਪਤਿ ਦ੍ਵਙ੍ਗੁਲਕਪ੍ਪੋ, ਕਪ੍ਪਤਿ ਗਾਮਨ੍ਤਰਕਪ੍ਪੋ, ਕਪ੍ਪਤਿ ਆਵਾਸਕਪ੍ਪੋ, ਕਪ੍ਪਤਿ ਅਨੁਮਤਿਕਪ੍ਪੋ, ਕਪ੍ਪਤਿ ਆਚਿਣ੍ਣਕਪ੍ਪੋ, ਕਪ੍ਪਤਿ ਅਮਥਿਤਕਪ੍ਪੋ, ਕਪ੍ਪਤਿ ਜਲ਼ੋਗਿਂ ਪਾਤੁਂ, ਕਪ੍ਪਤਿ ਅਦਸਕਂ ਨਿਸੀਦਨਂ, ਕਪ੍ਪਤਿ ਜਾਤਰੂਪਰਜਤਨ੍ਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਵਜ੍ਜੀਸੁ ਚਾਰਿਕਂ ਚਰਮਾਨੋ ਯੇਨ ਵੇਸਾਲੀ ਤਦਵਸਰਿ. ਤਤ੍ਰ ਸੁਦਂ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਵੇਸਾਲਿਯਂ ਵਿਹਰਤਿ ਮਹਾਵਨੇ ਕੂਟਾਗਾਰਸਾਲਾਯਂ. ਤੇਨ ਖੋ ਪਨ ਸਮਯੇਨ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਤਦਹੁਪੋਸਥੇ ਕਂਸਪਾਤਿਂ [ਕਂਸਚਾਟਿਂ (ਸ੍ਯਾ.)] ਉਦਕੇਨ ਪੂਰੇਤ੍ਵਾ ਮਜ੍ਝੇ ਭਿਕ੍ਖੁਸਙ੍ਘਸ੍ਸ ਠਪੇਤ੍ਵਾ ਆਗਤਾਗਤੇ ਵੇਸਾਲਿਕੇ ਉਪਾਸਕੇ ਏਵਂ ਵਦਨ੍ਤਿ – ‘‘ਦੇਥਾਵੁਸੋ, ਸਙ੍ਘਸ੍ਸ ਕਹਾਪਣਮ੍ਪਿ ਅਡ੍ਢਮ੍ਪਿ ਪਾਦਮ੍ਪਿ ਮਾਸਕਰੂਪਮ੍ਪਿ. ਭਵਿਸ੍ਸਤਿ ਸਙ੍ਘਸ੍ਸ ਪਰਿਕ੍ਖਾਰੇਨ ਕਰਣੀਯ’’ਨ੍ਤਿ. ਏਵਂ ਵੁਤ੍ਤੇ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਵੇਸਾਲਿਕੇ ਉਪਾਸਕੇ ਏਤਦਵੋਚ – ‘‘ਮਾਵੁਸੋ, ਅਦਤ੍ਥ ਸਙ੍ਘਸ੍ਸ ਕਹਾਪਣਮ੍ਪਿ ਅਡ੍ਢਮ੍ਪਿ ਪਾਦਮ੍ਪਿ ਮਾਸਕਰੂਪਮ੍ਪਿ. ਨ ਕਪ੍ਪਤਿ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਜਾਤਰੂਪਰਜਤਂ; ਨ ਸਾਦਿਯਨ੍ਤਿ ਸਮਣਾ ਸਕ੍ਯਪੁਤ੍ਤਿਯਾ ਜਾਤਰੂਪਰਜਤਂ; ਨ ਪਟਿਗ੍ਗਣ੍ਹਨ੍ਤਿ ਸਮਣਾ ਸਕ੍ਯਪੁਤ੍ਤਿਯਾ ਜਾਤਰੂਪਰਜਤਂ; ਨਿਕ੍ਖਿਤ੍ਤਮਣਿਸੁਵਣ੍ਣਾ ਸਮਣਾ ਸਕ੍ਯਪੁਤ੍ਤਿਯਾ ਅਪੇਤਜਾਤਰੂਪਰਜਤਾ’’ਤਿ. ਏਵਮ੍ਪਿ ਖੋ ਵੇਸਾਲਿਕਾ ਉਪਾਸਕਾ ਆਯਸ੍ਮਤਾ ਯਸੇਨ ਕਾਕਣ੍ਡਕਪੁਤ੍ਤੇਨ ਵੁਚ੍ਚਮਾਨਾ ਅਦਂਸੁਯੇਵ ਸਙ੍ਘਸ੍ਸ ਕਹਾਪਣਮ੍ਪਿ ਅਡ੍ਢਮ੍ਪਿ ਪਾਦਮ੍ਪਿ ਮਾਸਕਰੂਪਮ੍ਪਿ.

ਅਥ ਖੋ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਤਸ੍ਸਾ ਰਤ੍ਤਿਯਾ ਅਚ੍ਚਯੇਨ ਤਂ ਹਿਰਞ੍ਞਂ ਭਿਕ੍ਖਗ੍ਗੇਨ [ਭਿਕ੍ਖੁਗ੍ਗੇਨ (ਸ੍ਯਾ.)] ਪਟਿਵੀਸਂ [ਪਟਿਵਿਂਸਂ (ਸੀ.), ਪਟਿਵਿਸਂ (ਸ੍ਯਾ.)] ਠਪੇਤ੍ਵਾ ਭਾਜੇਸੁਂ. ਅਥ ਖੋ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਆਯਸ੍ਮਨ੍ਤਂ ਯਸਂ ਕਾਕਣ੍ਡਕਪੁਤ੍ਤਂ ਏਤਦਵੋਚੁਂ – ‘‘ਏਸੋ ਤੇ, ਆਵੁਸੋ ਯਸ, ਹਿਰਞ੍ਞਸ੍ਸ ਪਟਿਵੀਸੋ’’ਤਿ. ‘‘ਨਤ੍ਥਿ, ਮੇ ਆਵੁਸੋ, ਹਿਰਞ੍ਞਸ੍ਸ ਪਟਿਵੀਸੋ, ਨਾਹਂ ਹਿਰਞ੍ਞਂ ਸਾਦਿਯਾਮੀ’’ਤਿ. ਅਥ ਖੋ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ – ‘‘ਅਯਂ ਆਵੁਸੋ ਯਸੋ ਕਾਕਣ੍ਡਕਪੁਤ੍ਤੋ ਉਪਾਸਕੇ ਸਦ੍ਧੇ ਪਸਨ੍ਨੇ ਅਕ੍ਕੋਸਤਿ, ਪਰਿਭਾਸਤਿ, ਅਪ੍ਪਸਾਦਂ ਕਰੋਤਿ; ਹਨ੍ਦਸ੍ਸ ਮਯਂ ਪਟਿਸਾਰਣੀਯਕਮ੍ਮਂ ਕਰੋਮਾ’’ਤਿ ਤੇ. ਤਸ੍ਸ ਪਟਿਸਾਰਣੀਯਕਮ੍ਮਂ ਅਕਂਸੁ. ਅਥ ਖੋ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਵੇਸਾਲਿਕੇ ਵਜ੍ਜਿਪੁਤ੍ਤਕੇ ਭਿਕ੍ਖੂ ਏਤਦਵੋਚ – ‘‘ਭਗਵਤਾ, ਆਵੁਸੋ, ਪਞ੍ਞਤ੍ਤਂ – ‘ਪਟਿਸਾਰਣੀਯਕਮ੍ਮਕਤਸ੍ਸ ਭਿਕ੍ਖੁਨੋ ਅਨੁਦੂਤੋ ਦਾਤਬ੍ਬੋ’ਤਿ. ਦੇਥ ਮੇ, ਆਵੁਸੋ, ਅਨੁਦੂਤਂ ਭਿਕ੍ਖੁ’’ਨ੍ਤਿ.

ਅਥ ਖੋ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਏਕਂ ਭਿਕ੍ਖੁਂ ਸਮ੍ਮਨ੍ਨਿਤ੍ਵਾ ਆਯਸ੍ਮਤੋ ਯਸਸ੍ਸ ਕਾਕਣ੍ਡਕਪੁਤ੍ਤਸ੍ਸ ਅਨੁਦੂਤਂ ਅਦਂਸੁ. ਅਥ ਖੋ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਅਨੁਦੂਤੇਨ ਭਿਕ੍ਖੁਨਾ ਸਦ੍ਧਿਂ ਵੇਸਾਲਿਂ ਪਵਿਸਿਤ੍ਵਾ ਵੇਸਾਲਿਕੇ ਉਪਾਸਕੇ ਏਤਦਵੋਚ – ‘‘ਅਹਂ ਕਿਰਾਯਸ੍ਮਨ੍ਤੇ ਉਪਾਸਕੇ ਸਦ੍ਧੇ ਪਸਨ੍ਨੇ ਅਕ੍ਕੋਸਾਮਿ, ਪਰਿਭਾਸਾਮਿ, ਅਪ੍ਪਸਾਦਂ ਕਰੋਮਿ; ਯੋਹਂ ਅਧਮ੍ਮਂ ਅਧਮ੍ਮੋਤਿ ਵਦਾਮਿ, ਧਮ੍ਮਂ ਧਮ੍ਮੋਤਿ ਵਦਾਮਿ, ਅਵਿਨਯਂ ਅਵਿਨਯੋਤਿ ਵਦਾਮਿ, ਵਿਨਯਂ ਵਿਨਯੋਤਿ ਵਦਾਮਿ.

੪੪੭. ‘‘ਏਕਮਿਦਂ, ਆਵੁਸੋ, ਸਮਯਂ ਭਗਵਾ ਸਾਵਤ੍ਥਿਯਂ ਵਿਹਰਤਿ ਜੇਤਵਨੇ ਅਨਾਥਪਿਣ੍ਡਿਕਸ੍ਸ ਆਰਾਮੇ. ਤਤ੍ਰ ਖੋ, ਆਵੁਸੋ, ਭਗਵਾ ਭਿਕ੍ਖੂ ਆਮਨ੍ਤੇਸਿ – [ਅ. ਨਿ. ੪.੫੦] ‘ਚਤ੍ਤਾਰੋਮੇ, ਭਿਕ੍ਖਵੇ, ਚਨ੍ਦਿਮਸੂਰਿਯਾਨਂ ਉਪਕ੍ਕਿਲੇਸਾ, ਯੇਹਿ ਉਪਕ੍ਕਿਲੇਸੇਹਿ ਉਪਕ੍ਕਿਲਿਟ੍ਠਾ ਚਨ੍ਦਿਮਸੂਰਿਯਾ ਨ ਤਪਨ੍ਤਿ, ਨ ਭਾਸਨ੍ਤਿ, ਨ ਵਿਰੋਚਨ੍ਤਿ. ਕਤਮੇ ਚਤ੍ਤਾਰੋ? ਅਬ੍ਭਂ, ਭਿਕ੍ਖਵੇ, ਚਨ੍ਦਿਮਸੂਰਿਯਾਨਂ ਉਪਕ੍ਕਿਲੇਸੋ, ਯੇਨ ਉਪਕ੍ਕਿਲੇਸੇਨ ਉਪਕ੍ਕਿਲਿਟ੍ਠਾ ਚਨ੍ਦਿਮਸੂਰਿਯਾ ਨ ਤਪਨ੍ਤਿ, ਨ ਭਾਸਨ੍ਤਿ ਨ ਵਿਰੋਚਨ੍ਤਿ. ਮਹਿਕਾ, ਭਿਕ੍ਖਵੇ, ਚਨ੍ਦਿਮਸੂਰਿਯਾਨਂ ਉਪਕ੍ਕਿਲੇਸੋ, ਯੇਨ ਉਪਕ੍ਕਿਲੇਸੇਨ ਉਪਕ੍ਕਿਲਿਟ੍ਠਾ ਚਨ੍ਦਿਮਸੂਰਿਯਾ ਨ ਤਪਨ੍ਤਿ, ਨ ਭਾਸਨ੍ਤਿ, ਨ ਵਿਰੋਚਨ੍ਤਿ, ਧੂਮਰਜੋ, ਭਿਕ੍ਖਵੇ, ਚਨ੍ਦਿਮਸੂਰਿਯਾਨਂ ਉਪਕ੍ਕਿਲੇਸੋ, ਯੇਨ ਉਪਕ੍ਕਿਲੇਸੇਨ ਉਪਕ੍ਕਿਲਿਟ੍ਠਾ ਚਨ੍ਦਿਮਸੂਰਿਯਾ ਨ ਤਪਨ੍ਤਿ, ਨ ਭਾਸਨ੍ਤਿ, ਨ ਵਿਰੋਚਨ੍ਤਿ. ਰਾਹੁ, ਭਿਕ੍ਖਵੇ, ਅਸੁਰਿਨ੍ਦੋ ਚਨ੍ਦਿਮਸੂਰਿਯਾਨਂ ਉਪਕ੍ਕਿਲੇਸੋ, ਯੇਨ ਉਪਕ੍ਕਿਲੇਸੇਨ ਉਪਕ੍ਕਿਲਿਟ੍ਠਾ ਚਨ੍ਦਿਮਸੂਰਿਯਾ ਨ ਤਪਨ੍ਤਿ, ਨ ਭਾਸਨ੍ਤਿ, ਨ ਵਿਰੋਚਨ੍ਤਿ. ਇਮੇ ਖੋ, ਭਿਕ੍ਖਵੇ, ਚਤ੍ਤਾਰੋ ਚਨ੍ਦਿਮਸੂਰਿਯਾਨਂ ਉਪਕ੍ਕਿਲੇਸਾ, ਯੇਹਿ ਉਪਕ੍ਕਿਲੇਸੇਹਿ ਉਪਕ੍ਕਿਲਿਟ੍ਠਾ ਚਨ੍ਦਿਮਸੂਰਿਯਾ ਨ ਤਪਨ੍ਤਿ, ਨ ਭਾਸਨ੍ਤਿ, ਨ ਵਿਰੋਚਨ੍ਤਿ. ਏਵਮੇਵ ਖੋ, ਭਿਕ੍ਖਵੇ, ਚਤ੍ਤਾਰੋਮੇ ਸਮਣਬ੍ਰਾਹ੍ਮਣਾਨਂ ਉਪਕ੍ਕਿਲੇਸਾ, ਯੇਹਿ ਉਪਕ੍ਕਿਲੇਸੇਹਿ ਉਪਕ੍ਕਿਲਿਟ੍ਠਾ ਏਕੇ ਸਮਣਬ੍ਰਾਹ੍ਮਣਾ ਨ ਤਪਨ੍ਤਿ, ਨ ਭਾਸਨ੍ਤਿ, ਨ ਵਿਰੋਚਨ੍ਤਿ. ਕਤਮੇ ਚਤ੍ਤਾਰੋ? ਸਨ੍ਤਿ, ਭਿਕ੍ਖਵੇ, ਏਕੇ ਸਮਣਬ੍ਰਾਹ੍ਮਣਾ ਸੁਰਂ ਪਿਵਨ੍ਤਿ, ਮੇਰਯਂ ਪਿਵਨ੍ਤਿ, ਸੁਰਾਮੇਰਯਪਾਨਾ ਅਪ੍ਪਟਿਵਿਰਤਾ – ਅਯਂ, ਭਿਕ੍ਖਵੇ, ਪਠਮੋ ਸਮਣਬ੍ਰਾਹ੍ਮਣਾਨਂ ਉਪਕ੍ਕਿਲੇਸੋ, ਯੇਨ ਉਪਕ੍ਕਿਲੇਸੇਨ ਉਪਕ੍ਕਿਲਿਟ੍ਠਾ ਏਕੇ ਸਮਣਬ੍ਰਾਹ੍ਮਣਾ ਨ ਤਪਨ੍ਤਿ, ਨ ਭਾਸਨ੍ਤਿ, ਨ ਵਿਰੋਚਨ੍ਤਿ. ਪੁਨ ਚਪਰਂ, ਭਿਕ੍ਖਵੇ, ਏਕੇ ਸਮਣਬ੍ਰਾਹ੍ਮਣਾ ਮੇਥੁਨਂ ਧਮ੍ਮਂ ਪਟਿਸੇਵਨ੍ਤਿ, ਮੇਥੁਨਧਮ੍ਮਾ ਅਪ੍ਪਟਿਵਿਰਤਾ – ਅਯਂ, ਭਿਕ੍ਖਵੇ, ਦੁਤਿਯੋ ਸਮਣਬ੍ਰਾਹ੍ਮਣਾਨਂ ਉਪਕ੍ਕਿਲੇਸੋ, ਯੇਨ ਉਪਕ੍ਕਿਲੇਸੇਨ ਉਪਕ੍ਕਿਲਿਟ੍ਠਾ ਏਕੇ ਸਮਣਬ੍ਰਾਹ੍ਮਣਾ ਨ ਤਪਨ੍ਤਿ, ਨ ਭਾਸਨ੍ਤਿ, ਨ ਵਿਰੋਚਨ੍ਤਿ. ਪੁਨ ਚਪਰਂ, ਭਿਕ੍ਖਵੇ, ਏਕੇ ਸਮਣਬ੍ਰਾਹ੍ਮਣਾ ਜਾਤਰੂਪਰਜਤਂ ਸਾਦਿਯਨ੍ਤਿ, ਜਾਤਰੂਪਰਜਤਪ੍ਪਟਿਗ੍ਗਹਣਾ ਅਪ੍ਪਟਿਵਿਰਤਾ – ਅਯਂ, ਭਿਕ੍ਖਵੇ, ਤਤਿਯੋ ਸਮਣਬ੍ਰਾਹ੍ਮਣਾਨਂ ਉਪਕ੍ਕਿਲੇਸੋ, ਯੇਨ ਉਪਕ੍ਕਿਲੇਸੇਨ ਉਪਕ੍ਕਿਲਿਟ੍ਠਾ ਏਕੇ ਸਮਣਬ੍ਰਾਹ੍ਮਣਾ ਨ ਤਪਨ੍ਤਿ, ਨ ਭਾਸਨ੍ਤਿ, ਨ ਵਿਰੋਚਨ੍ਤਿ. ਪੁਨ ਚਪਰਂ, ਭਿਕ੍ਖਵੇ, ਏਕੇ ਸਮਣਬ੍ਰਾਹ੍ਮਣਾ ਮਿਚ੍ਛਾਜੀਵੇਨ ਜੀਵਿਤਂ ਕਪ੍ਪੇਨ੍ਤਿ; ਮਿਚ੍ਛਾਜੀਵਾ ਅਪ੍ਪਟਿਵਿਰਤਾ – ਅਯਂ, ਭਿਕ੍ਖਵੇ, ਚਤੁਤ੍ਥੋ ਸਮਣਬ੍ਰਾਹ੍ਮਣਾਨਂ ਉਪਕ੍ਕਿਲੇਸੋ, ਯੇਨ ਉਪਕ੍ਕਿਲੇਸੇਨ ਉਪਕ੍ਕਿਲਿਟ੍ਠਾ ਏਕੇ ਸਮਣਬ੍ਰਾਹ੍ਮਣਾ ਨ ਤਪਨ੍ਤਿ, ਨ ਭਾਸਨ੍ਤਿ, ਨ ਵਿਰੋਚਨ੍ਤਿ. ਇਮੇ ਖੋ, ਭਿਕ੍ਖਵੇ, ਚਤ੍ਤਾਰੋ ਸਮਣਬ੍ਰਾਹ੍ਮਣਾਨਂ ਉਪਕ੍ਕਿਲੇਸਾ, ਯੇਹਿ ਉਪਕ੍ਕਿਲੇਸੇਹਿ ਉਪਕ੍ਕਿਲਿਟ੍ਠਾ ਏਕੇ ਸਮਣਬ੍ਰਾਹ੍ਮਣਾ ਨ ਤਪਨ੍ਤਿ, ਨ ਭਾਸਨ੍ਤਿ, ਨ ਵਿਰੋਚਨ੍ਤਿ’. ‘‘ਇਦਮਵੋਚਾਵੁਸੋ, ਭਗਵਾ. ਇਦਂ ਵਤ੍ਵਾਨ ਸੁਗਤੋ ਅਥਾਪਰਂ ਏਤਦਵੋਚ ਸਤ੍ਥਾ –

‘‘ਰਾਗਦੋਸਪਰਿਕ੍ਲਿਟ੍ਠਾ, ਏਕੇ ਸਮਣਬ੍ਰਾਹ੍ਮਣਾ;

ਅਵਿਜ੍ਜਾਨਿਵੁਟਾ [ਅਵਿਜ੍ਜਾਨੀਵੁਤਾ (ਸ੍ਯਾ.)] ਪੋਸਾ, ਪਿਯਰੂਪਾਭਿਨਨ੍ਦਿਨੋ.

‘‘ਸੁਰਂ ਪਿਵਨ੍ਤਿ ਮੇਰਯਂ, ਪਟਿਸੇਵਨ੍ਤਿ ਮੇਥੁਨਂ;

ਰਜਤਂ ਜਾਤਰੂਪਞ੍ਚ, ਸਾਦਿਯਨ੍ਤਿ ਅਵਿਦ੍ਦਸੂ.

‘‘ਮਿਚ੍ਛਾਜੀਵੇਨ ਜੀਵਨ੍ਤਿ, ਏਕੇ ਸਮਣਬ੍ਰਾਹ੍ਮਣਾ;

ਏਤੇ ਉਪਕ੍ਕਿਲੇਸਾ ਵੁਤ੍ਤਾ, ਬੁਦ੍ਧੇਨਾਦਿਚ੍ਚਬਨ੍ਧੁਨਾ.

‘‘ਯੇਹਿ ਉਪਕ੍ਕਿਲੇਸੇਹਿ ਉਪਕ੍ਕਿਲਿਟ੍ਠਾ, ਏਕੇ ਸਮਣਬ੍ਰਾਹ੍ਮਣਾ;

ਨ ਤਪਨ੍ਤਿ ਨ ਭਾਸਨ੍ਤਿ, ਅਸੁਦ੍ਧਾ ਸਰਜਾ ਮਗਾ.

‘‘ਅਨ੍ਧਕਾਰੇਨ ਓਨਦ੍ਧਾ, ਤਣ੍ਹਾਦਾਸਾ ਸਨੇਤ੍ਤਿਕਾ;

ਵਡ੍ਢੇਨ੍ਤਿ ਕਟਸਿਂ ਘੋਰਂ, ਆਦਿਯਨ੍ਤਿ ਪੁਨਬ੍ਭਵਨ੍ਤਿ.

‘‘ਏਵਂਵਾਦੀ ਕਿਰਾਹਂ ਆਯਸ੍ਮਨ੍ਤੇ ਉਪਾਸਕੇ ਸਦ੍ਧੇ ਪਸਨ੍ਨੇ ਅਕ੍ਕੋਸਾਮਿ, ਪਰਿਭਾਸਾਮਿ, ਅਪ੍ਪਸਾਦਂ ਕਰੋਮਿ; ਯੋਹਂ ਅਧਮ੍ਮਂ ਅਧਮ੍ਮੋਤਿ ਵਦਾਮਿ, ਧਮ੍ਮਂ ਧਮ੍ਮੋਤਿ ਵਦਾਮਿ, ਅਵਿਨਯਂ ਅਵਿਨਯੋਤਿ ਵਦਾਮਿ, ਵਿਨਯਂ ਵਿਨਯੋਤਿ ਵਦਾਮਿ.

੪੪੮. [ਸਂ. ਨਿ. ੪.੩੬੨ ਇਦਂ ਵਤ੍ਥੁ ਆਗਤਂ] ‘‘ਏਕਮਿਦਂ, ਆਵੁਸੋ, ਸਮਯਂ ਭਗਵਾ ਰਾਜਗਹੇ ਵਿਹਰਤਿ ਵੇਲ਼ੁਵਨੇ ਕਲਨ੍ਦਕਨਿਵਾਪੇ. ਤੇਨ ਖੋ ਪਨ ਸਮਯੇਨ ਰਾਜਨ੍ਤੇਪੁਰੇ ਰਾਜਪਰਿਸਾਯਂ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਅਯਮਨ੍ਤਰਕਥਾ ਉਦਪਾਦਿ – ‘ਕਪ੍ਪਤਿ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਜਾਤਰੂਪਰਜਤਂ; ਸਾਦਿਯਨ੍ਤਿ ਸਮਣਾ ਸਕ੍ਯਪੁਤ੍ਤਿਯਾ ਜਾਤਰੂਪਰਜਤਂ; ਪਟਿਗ੍ਗਣ੍ਹਨ੍ਤਿ ਸਮਣਾ ਸਕ੍ਯਪੁਤ੍ਤਿਯਾ ਜਾਤਰੂਪਰਜਤ’ਨ੍ਤਿ. ਤੇਨ ਖੋ ਪਨਾਵੁਸੋ ਸਮਯੇਨ, ਮਣਿਚੂਲ਼ਕੋ ਗਾਮਣੀ ਤਸ੍ਸਂ ਪਰਿਸਾਯਂ ਨਿਸਿਨ੍ਨੋ ਹੋਤਿ. ਅਥ ਖੋ, ਆਵੁਸੋ, ਮਣਿਚੂਲ਼ਕੋ ਗਾਮਣੀ ਤਂ ਪਰਿਸਂ ਏਤਦਵੋਚ – ‘ਮਾ ਅਯ੍ਯਾ ਏਵਂ ਅਵਚੁਤ੍ਥ. ਨ ਕਪ੍ਪਤਿ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਜਾਤਰੂਪਰਜਤਂ; ਨ ਸਾਦਿਯਨ੍ਤਿ ਸਮਣਾ ਸਕ੍ਯਪੁਤ੍ਤਿਯਾ ਜਾਤਰੂਪਰਜਤਂ; ਨ ਪਟਿਗ੍ਗਣ੍ਹਨ੍ਤਿ ਸਮਣਾ ਸਕ੍ਯਪੁਤ੍ਤਿਯਾ ਜਾਤਰੂਪਰਜਤਂ; ਨਿਕ੍ਖਿਤ੍ਤਮਣਿਸੁਵਣ੍ਣਾ ਸਮਣਾ ਸਕ੍ਯਪੁਤ੍ਤਿਯਾ ਅਪੇਤਜਾਤਰੂਪਰਜਤਾ’ਤਿ. ਅਸਕ੍ਖਿ ਖੋ, ਆਵੁਸੋ, ਮਣਿਚੂਲ਼ਕੋ ਗਾਮਣੀ ਤਂ ਪਰਿਸਂ ਸਞ੍ਞਾਪੇਤੁਂ.

‘‘ਅਥ ਖੋ, ਆਵੁਸੋ, ਮਣਿਚੂਲ਼ਕੋ ਗਾਮਣੀ ਤਂ ਪਰਿਸਂ ਸਞ੍ਞਾਪੇਤ੍ਵਾ ਯੇਨ ਭਗਵਾ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਭਗਵਨ੍ਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ, ਆਵੁਸੋ, ਮਣਿਚੂਲ਼ਕੋ ਗਾਮਣੀ ਭਗਵਨ੍ਤਂ ਏਤਦਵੋਚ – ‘ਇਧ, ਭਨ੍ਤੇ, ਰਾਜਨ੍ਤੇਪੁਰੇ ਰਾਜਪਰਿਸਾਯਂ ਸਨ੍ਨਿਸਿਨ੍ਨਾਨਂ ਸਨ੍ਨਿਪਤਿਤਾਨਂ ਅਯਮਨ੍ਤਰਕਥਾ ਉਦਪਾਦਿ – ਕਪ੍ਪਤਿ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਜਾਤਰੂਪਰਜਤਂ; ਸਾਦਿਯਨ੍ਤਿ ਸਮਣਾ ਸਕ੍ਯਪੁਤ੍ਤਿਯਾ ਜਾਤਰੂਪਰਜਤਂ; ਪਟਿਗ੍ਗਣ੍ਹਨ੍ਤਿ ਸਮਣਾ ਸਕ੍ਯਪੁਤ੍ਤਿਯਾ ਜਾਤਰੂਪਰਜਤਨ੍ਤਿ. ਏਵਂ ਵੁਤ੍ਤੇ ਅਹਂ ਭਨ੍ਤੇ, ਤਂ ਪਰਿਸਂ ਏਤਦਵੋਚਂ – ਮਾ ਅਯ੍ਯਾ ਏਵਂ ਅਵਚੁਤ੍ਥ. ਨ ਕਪ੍ਪਤਿ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਜਾਤਰੂਪਰਜਤਂ; ਨ ਸਾਦਿਯਨ੍ਤਿ ਸਮਣਾ ਸਕ੍ਯਪੁਤ੍ਤਿਯਾ ਜਾਤਰੂਪਰਜਤਂ; ਨ ਪਟਿਗ੍ਗਣ੍ਹਨ੍ਤਿ ਸਮਣਾ ਸਕ੍ਯਪੁਤ੍ਤਿਯਾ ਜਾਤਰੂਪਰਜਤਂ; ਨਿਕ੍ਖਿਤ੍ਤਮਣਿਸੁਵਣ੍ਣਾ ਸਮਣਾ ਸਕ੍ਯਪੁਤ੍ਤਿਯਾ ਅਪੇਤਜਾਤਰੂਪਰਜਤਾਤਿ. ਅਸਕ੍ਖਿਂ ਖੋ ਅਹਂ, ਭਨ੍ਤੇ, ਤਂ ਪਰਿਸਂ ਸਞ੍ਞਾਪੇਤੁਂ. ਕਚ੍ਚਾਹਂ, ਭਨ੍ਤੇ, ਏਵਂ ਬ੍ਯਾਕਰਮਾਨੋ ਵੁਤ੍ਤਵਾਦੀ ਚੇਵ ਭਗਵਤੋ ਹੋਮਿ, ਨ ਚ ਭਗਵਨ੍ਤਂ ਅਭੂਤੇਨ ਅਬ੍ਭਾਚਿਕ੍ਖਾਮਿ, ਧਮ੍ਮਸ੍ਸ ਚਾਨੁਧਮ੍ਮਂ ਬ੍ਯਾਕਰੋਮਿ, ਨ ਚ ਕੋਚਿ ਸਹਧਮ੍ਮਿਕੋ ਵਾਦਾਨੁਵਾਦੋ ਗਾਰਯ੍ਹਂ ਠਾਨਂ ਆਗਚ੍ਛਤੀ’ਤਿ? ‘ਤਗ੍ਘ ਤ੍ਵਂ, ਗਾਮਣਿ, ਏਵਂ ਬ੍ਯਾਕਰਮਾਨੋ ਵੁਤ੍ਤਵਾਦੀ ਚੇਵ ਮੇ ਹੋਸਿ; ਨ ਚ ਮਂ ਅਭੂਤੇਨ ਅਬ੍ਭਾਚਿਕ੍ਖਸਿ [ਪਾਰਾ. ੫੮੨], ਧਮ੍ਮਸ੍ਸ ਚਾਨੁਧਮ੍ਮਂ ਬ੍ਯਾਕਰੋਸਿ, ਨ ਚ ਕੋਚਿ ਸਹਧਮ੍ਮਿਕੋ ਵਾਦਾਨੁਵਾਦੋ ਗਾਰਯ੍ਹਂ ਠਾਨਂ ਆਗਚ੍ਛਤਿ. ਨ ਹਿ, ਗਾਮਣਿ, ਕਪ੍ਪਤਿ ਸਮਣਾਨਂ ਸਕ੍ਯਪੁਤ੍ਤਿਯਾਨਂ ਜਾਤਰੂਪਰਜਤਂ; ਨ ਸਾਦਿਯਨ੍ਤਿ ਸਮਣਾ ਸਕ੍ਯਪੁਤ੍ਤਿਯਾ ਜਾਤਰੂਪਰਜਤਂ; ਨ ਪਟਿਗ੍ਗਣ੍ਹਨ੍ਤਿ ਸਮਣਾ ਸਕ੍ਯਪੁਤ੍ਤਿਯਾ ਜਾਤਰੂਪਰਜਤਂ; ਨਿਕ੍ਖਿਤ੍ਤਮਣਿਸੁਵਣ੍ਣਾ ਸਮਣਾ ਸਕ੍ਯਪੁਤ੍ਤਿਯਾ ਅਪੇਤਜਾਤਰੂਪਰਜਤਾ. ਯਸ੍ਸ ਖੋ, ਗਾਮਣਿ, ਜਾਤਰੂਪਰਜਤਂ ਕਪ੍ਪਤਿ, ਪਞ੍ਚਪਿ ਤਸ੍ਸ ਕਾਮਗੁਣਾ ਕਪ੍ਪਨ੍ਤਿ. ਯਸ੍ਸ ਪਞ੍ਚ ਕਾਮਗੁਣਾ ਕਪ੍ਪਨ੍ਤਿ ਏਕਂਸੇਨੇਤਂ, ਗਾਮਣਿ, ਧਾਰੇਯ੍ਯਾਸਿ – ਅਸ੍ਸਮਣਧਮ੍ਮੋ ਅਸਕ੍ਯਪੁਤ੍ਤਿਯਧਮ੍ਮੋਤਿ. ਅਪਿ ਚਾਹਂ, ਗਾਮਣਿ, ਏਵਂ ਵਦਾਮਿ ਤਿਣਂ ਤਿਣਤ੍ਥਿਕੇਨ ਪਰਿਯੇਸਿਤਬ੍ਬਂ; ਦਾਰੁ ਦਾਰੁਤ੍ਥਿਕੇਨ ਪਰਿਯੇਸਿਤਬ੍ਬਂ; ਸਕਟਂ ਸਕਟਤ੍ਥਿਕੇਨ ਪਰਿਯੇਸਿਤਬ੍ਬਂ; ਪੁਰਿਸੋ ਪੁਰਿਸਤ੍ਥਿਕੇਨ ਪਰਿਯੇਸਿਤਬ੍ਬੋ. ਨ ਤ੍ਵੇਵਾਹਂ, ਗਾਮਣਿ, ਕੇਨਚਿ ਪਰਿਯਾਯੇਨ ਜਾਤਰੂਪਰਜਤਂ ਸਾਦਿਤਬ੍ਬਂ ਪਰਿਯੇਸਿਤਬ੍ਬਨ੍ਤਿ ਵਦਾਮੀ’ਤਿ.

‘‘ਏਵਂਵਾਦੀ ਕਿਰਾਹਂ ਆਯਸ੍ਮਨ੍ਤੇ ਉਪਾਸਕੇ ਸਦ੍ਧੇ ਪਸਨ੍ਨੇ ਅਕ੍ਕੋਸਾਮਿ, ਪਰਿਭਾਸਾਮਿ, ਅਪ੍ਪਸਾਦਂ ਕਰੋਮਿ; ਯੋਹਂ ਅਧਮ੍ਮਂ ਅਧਮ੍ਮੋਤਿ ਵਦਾਮਿ, ਧਮ੍ਮਂ ਧਮ੍ਮੋਤਿ ਵਦਾਮਿ, ਅਵਿਨਯਂ ਅਵਿਨਯੋਤਿ ਵਦਾਮਿ, ਵਿਨਯਂ ਵਿਨਯੋਤਿ ਵਦਾਮਿ.

੪੪੯. ‘‘ਏਕਮਿਦਂ, ਆਵੁਸੋ, ਸਮਯਂ ਭਗਵਾ ਰਾਜਗਹੇ ਆਯਸ੍ਮਨ੍ਤਂ ਉਪਨਨ੍ਦਂ ਸਕ੍ਯਪੁਤ੍ਤਂ ਆਰਬ੍ਭ ਜਾਤਰੂਪਰਜਤਂ ਪਟਿਕ੍ਖਿਪਿ, ਸਿਕ੍ਖਾਪਦਞ੍ਚ ਪਞ੍ਞਪੇਸਿ. ਏਵਂਵਾਦੀ ਕਿਰਾਹਂ ਆਯਸ੍ਮਨ੍ਤੇ ਉਪਾਸਕੇ ਸਦ੍ਧੇ ਪਸਨ੍ਨੇ ਅਕ੍ਕੋਸਾਮਿ, ਪਰਿਭਾਸਾਮਿ, ਅਪ੍ਪਸਾਦਂ ਕਰੋਮਿ; ਯੋਹਂ ਅਧਮ੍ਮਂ ਅਧਮ੍ਮੋਤਿ ਵਦਾਮਿ, ਧਮ੍ਮਂ ਧਮ੍ਮੋਤਿ ਵਦਾਮਿ, ਅਵਿਨਯਂ ਅਵਿਨਯੋਤਿ ਵਦਾਮਿ, ਵਿਨਯਂ ਵਿਨਯੋਤਿ ਵਦਾਮੀ’’ਤਿ.

ਏਵਂ ਵੁਤ੍ਤੇ ਵੇਸਾਲਿਕਾ ਉਪਾਸਕਾ ਆਯਸ੍ਮਨ੍ਤਂ ਯਸਂ ਕਾਕਣ੍ਡਕਪੁਤ੍ਤਂ ਏਤਦਵੋਚੁਂ – ‘‘ਏਕੋਵ ਭਨ੍ਤੇ, ਅਯ੍ਯੋ ਯਸੋ ਕਾਕਣ੍ਡਕਪੁਤ੍ਤੋ ਸਮਣੋ ਸਕ੍ਯਪੁਤ੍ਤਿਯੋ. ਸਬ੍ਬੇਵਿਮੇ ਅਸ੍ਸਮਣਾ ਅਸਕ੍ਯਪੁਤ੍ਤਿਯਾ. ਵਸਤੁ, ਭਨ੍ਤੇ, ਅਯ੍ਯੋ ਯਸੋ ਕਾਕਣ੍ਡਕਪੁਤ੍ਤੋ ਵੇਸਾਲਿਯਂ. ਮਯਂ ਅਯ੍ਯਸ੍ਸ ਯਸਸ੍ਸ ਕਾਕਣ੍ਡਕਪੁਤ੍ਤਸ੍ਸ ਉਸ੍ਸੁਕ੍ਕਂ ਕਰਿਸ੍ਸਾਮ ਚੀਵਰਪਿਣ੍ਡਪਾਤਸੇਨਾਸਨਗਿਲਾਨਪ੍ਪਚ੍ਚਯਭੇਸਜ੍ਜਪਰਿਕ੍ਖਾਰਾਨ’’ਨ੍ਤਿ. ਅਥ ਖੋ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਵੇਸਾਲਿਕੇ ਉਪਾਸਕੇ ਸਞ੍ਞਾਪੇਤ੍ਵਾ ਅਨੁਦੂਤੇਨ ਭਿਕ੍ਖੁਨਾ ਸਦ੍ਧਿਂ ਆਰਾਮਂ ਅਗਮਾਸਿ.

ਅਥ ਖੋ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਅਨੁਦੂਤਂ ਭਿਕ੍ਖੁਂ ਪੁਚ੍ਛਿਂਸੁ – ‘‘ਖਮਾਪਿਤਾਵੁਸੋ, ਯਸੇਨ ਕਾਕਣ੍ਡਕਪੁਤ੍ਤੇਨ ਵੇਸਾਲਿਕਾ ਉਪਾਸਕਾ’’ਤਿ? ‘‘ਉਪਾਸਕੇਹਿ ਪਾਪਿਕਂ ਨੋ, ਆਵੁਸੋ, ਕਤਂ. ਏਕੋਵ ਯਸੋ ਕਾਕਣ੍ਡਕਪੁਤ੍ਤੋ ਸਮਣੋ ਸਕ੍ਯਪੁਤ੍ਤਿਯੋ ਕਤੋ. ਸਬ੍ਬੇਵ ਮਯਂ ਅਸ੍ਸਮਣਾ ਅਸਕ੍ਯਪੁਤ੍ਤਿਯਾ ਕਤਾ’’ਤਿ. ਅਥ ਖੋ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ – ‘‘ਅਯਂ, ਆਵੁਸੋ, ਯਸੋ ਕਾਕਣ੍ਡਕਪੁਤ੍ਤੋ ਅਮ੍ਹੇਹਿ ਅਸਮ੍ਮਤੋ ਗਿਹੀਨਂ ਪਕਾਸੇਸਿ; ਹਨ੍ਦਸ੍ਸ ਮਯਂ ਉਕ੍ਖੇਪਨੀਯਕਮ੍ਮਂ ਕਰੋਮਾ’’ਤਿ. ਤੇ ਤਸ੍ਸ ਉਕ੍ਖੇਪਨੀਯਕਮ੍ਮਂ ਕਤ੍ਤੁਕਾਮਾ ਸਨ੍ਨਿਪਤਿਂਸੁ. ਅਥ ਖੋ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਵੇਹਾਸਂ ਅਬ੍ਭੁਗ੍ਗਨ੍ਤ੍ਵਾ ਕੋਸਮ੍ਬਿਯਂ ਪਚ੍ਚੁਟ੍ਠਾਸਿ.

੪੫੦. ਅਥ ਖੋ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਪਾਵੇਯ੍ਯਕਾਨਞ੍ਚ [ਪਾਠੇਯ੍ਯਕਾਨਞ੍ਚ (ਸ੍ਯਾ.)] ਅਵਨ੍ਤਿਦਕ੍ਖਿਣਾਪਥਕਾਨਞ੍ਚ ਭਿਕ੍ਖੂਨਂ ਸਨ੍ਤਿਕੇ ਦੂਤਂ ਪਾਹੇਸਿ – ‘‘ਆਗਚ੍ਛਨ੍ਤੁ ਆਯਸ੍ਮਨ੍ਤਾ; ਇਮਂ ਅਧਿਕਰਣਂ ਆਦਿਯਿਸ੍ਸਾਮ. ਪੁਰੇ ਅਧਮ੍ਮੋ ਦਿਪ੍ਪਤਿ, ਧਮ੍ਮੋ ਪਟਿਬਾਹਿਯ੍ਯਤਿ; ਅਵਿਨਯੋ ਦਿਪ੍ਪਤਿ, ਵਿਨਯੋ ਪਟਿਬਾਹਿਯ੍ਯਤਿ; ਪੁਰੇ ਅਧਮ੍ਮਵਾਦਿਨੋ ਬਲਵਨ੍ਤੋ ਹੋਨ੍ਤਿ, ਧਮ੍ਮਵਾਦਿਨੋ ਦੁਬ੍ਬਲਾ ਹੋਨ੍ਤਿ; ਅਵਿਨਯਵਾਦਿਨੋ ਬਲਵਨ੍ਤੋ ਹੋਨ੍ਤਿ, ਵਿਨਯਵਾਦਿਨੋ ਦੁਬ੍ਬਲਾ ਹੋਨ੍ਤੀ’’ਤਿ.

ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਸਮ੍ਭੂਤੋ ਸਾਣਵਾਸੀ ਅਹੋਗਙ੍ਗੇ ਪਬ੍ਬਤੇ ਪਟਿਵਸਤਿ. ਅਥ ਖੋ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਯੇਨ ਅਹੋਗਙ੍ਗੋ ਪਬ੍ਬਤੋ, ਯੇਨਾਯਸ੍ਮਾ ਸਮ੍ਭੂਤੋ ਸਾਣਵਾਸੀ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਸਮ੍ਭੂਤਂ ਸਾਣਵਾਸਿਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਆਯਸ੍ਮਨ੍ਤਂ ਸਮ੍ਭੂਤਂ ਸਾਣਵਾਸਿਂ ਏਤਦਵੋਚ – ‘‘ਇਮੇ, ਭਨ੍ਤੇ, ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਵੇਸਾਲਿਯਂ ਦਸ ਵਤ੍ਥੂਨਿ ਦੀਪੇਨ੍ਤਿ – ਕਪ੍ਪਤਿ ਸਿਙ੍ਗਿਲੋਣਕਪ੍ਪੋ, ਕਪ੍ਪਤਿ ਦ੍ਵਙ੍ਗੁਲਕਪ੍ਪੋ, ਕਪ੍ਪਤਿ ਗਾਮਨ੍ਤਰਕਪ੍ਪੋ, ਕਪ੍ਪਤਿ ਆਵਾਸਕਪ੍ਪੋ, ਕਪ੍ਪਤਿ ਅਨੁਮਤਿਕਪ੍ਪੋ, ਕਪ੍ਪਤਿ ਆਚਿਣ੍ਣਕਪ੍ਪੋ, ਕਪ੍ਪਤਿ ਅਮਥਿਤਕਪ੍ਪੋ, ਕਪ੍ਪਤਿ ਜਲ਼ੋਗਿਂ ਪਾਤੁਂ, ਕਪ੍ਪਤਿ ਅਦਸਕਂ ਨਿਸੀਦਨਂ, ਕਪ੍ਪਤਿ ਜਾਤਰੂਪਰਜਤਨ੍ਤਿ. ਹਨ੍ਦ ਮਯਂ, ਭਨ੍ਤੇ, ਇਮਂ ਅਧਿਕਰਣਂ ਆਦਿਯਿਸ੍ਸਾਮ. ਪੁਰੇ ਅਧਮ੍ਮੋ ਦਿਪ੍ਪਤਿ, ਧਮ੍ਮੋ ਪਟਿਬਾਹਿਯ੍ਯਤਿ; ਅਵਿਨਯੋ ਦਿਪ੍ਪਤਿ, ਵਿਨਯੋ ਪਟਿਬਾਹਿਯ੍ਯਤਿ; ਪੁਰੇ ਅਧਮ੍ਮਵਾਦਿਨੋ ਬਲਵਨ੍ਤੋ ਹੋਨ੍ਤਿ, ਧਮ੍ਮਵਾਦਿਨੋ ਦੁਬ੍ਬਲਾ ਹੋਨ੍ਤਿ; ਅਵਿਨਯਵਾਦਿਨੋ ਬਲਵਨ੍ਤੋ ਹੋਨ੍ਤਿ, ਵਿਨਯਵਾਦਿਨੋ ਦੁਬ੍ਬਲਾ ਹੋਨ੍ਤੀ’’ਤਿ. ‘‘ਏਵਮਾਵੁਸੋ’’ਤਿ ਖੋ ਆਯਸ੍ਮਾ ਸਮ੍ਭੂਤੋ ਸਾਣਵਾਸੀ ਆਯਸ੍ਮਤੋ ਯਸਸ੍ਸ ਕਾਕਣ੍ਡਕਪੁਤ੍ਤਸ੍ਸ ਪਚ੍ਚਸ੍ਸੋਸਿ. ਅਥ ਖੋ ਸਟ੍ਠਿਮਤ੍ਤਾ ਪਾਵੇਯ੍ਯਕਾ ਭਿਕ੍ਖੂ – ਸਬ੍ਬੇ ਆਰਞ੍ਞਿਕਾ, ਸਬ੍ਬੇ ਪਿਣ੍ਡਪਾਤਿਕਾ, ਸਬ੍ਬੇ ਪਂਸੁਕੂਲਿਕਾ, ਸਬ੍ਬੇ ਤੇਚੀਵਰਿਕਾ, ਸਬ੍ਬੇਵ ਅਰਹਨ੍ਤੋ – ਅਹੋਗਙ੍ਗੇ ਪਬ੍ਬਤੇ ਸਨ੍ਨਿਪਤਿਂਸੁ. ਅਟ੍ਠਾਸੀਤਿਮਤ੍ਤਾ ਅਵਨ੍ਤਿਦਕ੍ਖਿਣਾਪਥਕਾ ਭਿਕ੍ਖੂ – ਅਪ੍ਪੇਕਚ੍ਚੇ ਆਰਞ੍ਞਿਕਾ, ਅਪ੍ਪੇਕਚ੍ਚੇ ਪਿਣ੍ਡਪਾਤਿਕਾ, ਅਪ੍ਪੇਕਚ੍ਚੇ ਪਂਸੁਕੂਲਿਕਾ, ਅਪ੍ਪੇਕਚ੍ਚੇ ਤੇਚੀਵਰਿਕਾ, ਸਬ੍ਬੇਵ ਅਰਹਨ੍ਤੋ – ਅਹੋਗਙ੍ਗੇ ਪਬ੍ਬਤੇ ਸਨ੍ਨਿਪਤਿਂਸੁ. ਅਥ ਖੋ ਥੇਰਾਨਂ ਭਿਕ੍ਖੂਨਂ ਮਨ੍ਤਯਮਾਨਾਨਂ ਏਤਦਹੋਸਿ – ‘‘ਇਦਂ ਖੋ ਅਧਿਕਰਣਂ ਕਕ੍ਖਲ਼ਞ੍ਚ, ਵਾਲ਼ਞ੍ਚ; ਕਂ ਨੁ ਖੋ ਮਯਂ ਪਕ੍ਖਂ ਲਭੇਯ੍ਯਾਮ, ਯੇਨ ਮਯਂ ਇਮਸ੍ਮਿਂ ਅਧਿਕਰਣੇ ਬਲਵਨ੍ਤਤਰਾ ਅਸ੍ਸਾਮਾ’’ਤਿ.

੪੫੧. ਤੇਨ ਖੋ ਪਨ ਸਮਯੇਨ ਆਯਸ੍ਮਾ ਰੇਵਤੋ ਸੋਰੇਯ੍ਯੇ ਪਟਿਵਸਤਿ – ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਵਿਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਅਥ ਖੋ ਥੇਰਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਅਯਂ ਖੋ ਆਯਸ੍ਮਾ ਰੇਵਤੋ ਸੋਰੇਯ੍ਯੇ ਪਟਿਵਸਤਿ – ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਵਿਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਸਚੇ ਮਯਂ ਆਯਸ੍ਮਨ੍ਤਂ ਰੇਵਤਂ ਪਕ੍ਖਂ ਲਭਿਸ੍ਸਾਮ, ਏਵਂ ਮਯਂ ਇਮਸ੍ਮਿਂ ਅਧਿਕਰਣੇ ਬਲਵਨ੍ਤਤਰਾ ਅਸ੍ਸਾਮਾ’’ਤਿ. ਅਸ੍ਸੋਸਿ ਖੋ ਆਯਸ੍ਮਾ ਰੇਵਤੋ – ਦਿਬ੍ਬਾਯ ਸੋਤਧਾਤੁਯਾ ਵਿਸੁਦ੍ਧਾਯ ਅਤਿਕ੍ਕਨ੍ਤਮਾਨੁਸਿਕਾਯ – ਥੇਰਾਨਂ ਭਿਕ੍ਖੂਨਂ ਮਨ੍ਤਯਮਾਨਾਨਂ. ਸੁਤ੍ਵਾਨਸ੍ਸ ਏਤਦਹੋਸਿ – ‘‘ਇਦਂ ਖੋ ਅਧਿਕਰਣਂ ਕਕ੍ਖਲ਼ਞ੍ਚ ਵਾਲ਼ਞ੍ਚ. ਨ ਖੋ ਮੇਤਂ ਪਤਿਰੂਪਂ ਯੋਹਂ ਏਵਰੂਪੇ ਅਧਿਕਰਣੇ ਓਸਕ੍ਕੇਯ੍ਯਂ. ਇਦਾਨਿ ਚ ਪਨ ਤੇ ਭਿਕ੍ਖੂ ਆਗਚ੍ਛਿਸ੍ਸਨ੍ਤਿ. ਸੋਹਂ ਤੇਹਿ ਆਕਿਣ੍ਣੋ ਨ ਫਾਸੁ ਗਮਿਸ੍ਸਾਮਿ. ਯਂਨੂਨਾਹਂ ਪਟਿਕਚ੍ਚੇਵ ਗਚ੍ਛੇਯ੍ਯ’’ਨ੍ਤਿ. ਅਥ ਖੋ ਆਯਸ੍ਮਾ ਰੇਵਤੋ ਸੋਰੇਯ੍ਯਾ ਸਙ੍ਕਸ੍ਸਂ ਅਗਮਾਸਿ.

ਅਥ ਖੋ ਥੇਰਾ ਭਿਕ੍ਖੂ ਸੋਰੇਯ੍ਯਂ ਗਨ੍ਤ੍ਵਾ ਪੁਚ੍ਛਿਂਸੁ – ‘‘ਕਹਂ ਆਯਸ੍ਮਾ ਰੇਵਤੋ’’ਤਿ? ਤੇ ਏਵਮਾਹਂਸੁ – ‘‘ਏਸਾਯਸ੍ਮਾ ਰੇਵਤੋ ਸਙ੍ਕਸ੍ਸਂ ਗਤੋ’’ਤਿ. ਅਥ ਖੋ ਆਯਸ੍ਮਾ ਰੇਵਤੋ ਸਙ੍ਕਸ੍ਸਾ ਕਣ੍ਣਕੁਜ੍ਜਂ [ਕਨ੍ਨਕੁਜ੍ਜਂ (ਸੀ.)] ਅਗਮਾਸਿ. ਅਥ ਖੋ ਥੇਰਾ ਭਿਕ੍ਖੂ ਸਙ੍ਕਸ੍ਸਂ ਗਨ੍ਤ੍ਵਾ ਪੁਚ੍ਛਿਂਸੁ – ‘‘ਕਹਂ ਆਯਸ੍ਮਾ ਰੇਵਤੋ’’ਤਿ? ਤੇ ਏਵਮਾਹਂਸੁ – ‘‘ਏਸਾਯਸ੍ਮਾ ਰੇਵਤੋ ਕਣ੍ਣਕੁਜ੍ਜਂ ਗਤੋ’’ਤਿ. ਅਥ ਖੋ ਆਯਸ੍ਮਾ ਰੇਵਤੋ ਕਣ੍ਣਕੁਜ੍ਜਾ ਉਦੁਮ੍ਬਰਂ ਅਗਮਾਸਿ. ਅਥ ਖੋ ਥੇਰਾ ਭਿਕ੍ਖੂ ਕਣ੍ਣਕੁਜ੍ਜਂ ਗਨ੍ਤ੍ਵਾ ਪੁਚ੍ਛਿਂਸੁ – ‘‘ਕਹਂ ਆਯਸ੍ਮਾ ਰੇਵਤੋ’’ਤਿ? ਤੇ ਏਵਮਾਹਂਸੁ – ‘‘ਏਸਾਯਸ੍ਮਾ ਰੇਵਤੋ ਉਦੁਮ੍ਬਰਂ ਗਤੋ’’ਤਿ. ਅਥ ਖੋ ਆਯਸ੍ਮਾ ਰੇਵਤੋ ਉਦੁਮ੍ਬਰਾ ਅਗ੍ਗਲ਼ਪੁਰਂ ਅਗਮਾਸਿ. ਅਥ ਖੋ ਥੇਰਾ ਭਿਕ੍ਖੂ ਉਦੁਮ੍ਬਰਂ ਗਨ੍ਤ੍ਵਾ ਪੁਚ੍ਛਿਂਸੁ – ‘‘ਕਹਂ ਆਯਸ੍ਮਾ ਰੇਵਤੋ’’ਤਿ? ਤੇ ਏਵਮਾਹਂਸੁ – ‘‘ਏਸਾਯਸ੍ਮਾ ਰੇਵਤੋ ਅਗ੍ਗਲ਼ਪੁਰਂ ਗਤੋ’’ਤਿ. ਅਥ ਖੋ ਆਯਸ੍ਮਾ ਰੇਵਤੋ ਅਗ੍ਗਲ਼ਪੁਰਾ ਸਹਜਾਤਿਂ [ਸਹਂਜਾਤਿਂ (ਕ.)] ਅਗਮਾਸਿ. ਅਥ ਖੋ ਥੇਰਾ ਭਿਕ੍ਖੂ ਅਗ੍ਗਲ਼ਪੁਰਂ ਗਨ੍ਤ੍ਵਾ ਪੁਚ੍ਛਿਂਸੁ – ‘‘ਕਹਂ ਆਯਸ੍ਮਾ ਰੇਵਤੋ’’ਤਿ? ਤੇ ਏਵਮਾਹਂਸੁ – ‘‘ਏਸਾਯਸ੍ਮਾ ਰੇਵਤੋ ਸਹਜਾਤਿਂ ਗਤੋ’’ਤਿ. ਅਥ ਖੋ ਥੇਰਾ ਭਿਕ੍ਖੂ ਆਯਸ੍ਮਨ੍ਤਂ ਰੇਵਤਂ ਸਹਜਾਤਿਯਂ ਸਮ੍ਭਾਵੇਸੁਂ.

੪੫੨. ਅਥ ਖੋ ਆਯਸ੍ਮਾ ਸਮ੍ਭੂਤੋ ਸਾਣਵਾਸੀ ਆਯਸ੍ਮਨ੍ਤਂ ਯਸਂ ਕਾਕਣ੍ਡਕਪੁਤ੍ਤਂ ਏਤਦਵੋਚ – ‘‘ਅਯਂ, ਆਵੁਸੋ, ਆਯਸ੍ਮਾ ਰੇਵਤੋ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਵਿਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਸਚੇ ਮਯਂ ਆਯਸ੍ਮਨ੍ਤਂ ਰੇਵਤਂ ਪਞ੍ਹਂ ਪੁਚ੍ਛਿਸ੍ਸਾਮ, ਪਟਿਬਲੋ ਆਯਸ੍ਮਾ ਰੇਵਤੋ ਏਕੇਨੇਵ ਪਞ੍ਹੇਨ ਸਕਲਮ੍ਪਿ ਰਤ੍ਤਿਂ ਵੀਤਿਨਾਮੇਤੁਂ. ਇਦਾਨਿ ਚ ਪਨਾਯਸ੍ਮਾ ਰੇਵਤੋ ਅਨ੍ਤੇਵਾਸਿਕਂ [ਅਨ੍ਤੇਵਾਸਿਂ (ਸ੍ਯਾ.)] ਸਰਭਾਣਕਂ ਭਿਕ੍ਖੁਂ ਅਜ੍ਝੇਸਿਸ੍ਸਤਿ. ਸੋ ਤ੍ਵਂ ਤਸ੍ਸ ਭਿਕ੍ਖੁਨੋ ਸਰਭਞ੍ਞਪਰਿਯੋਸਾਨੇ ਆਯਸ੍ਮਨ੍ਤਂ ਰੇਵਤਂ ਉਪਸਙ੍ਕਮਿਤ੍ਵਾ ਇਮਾਨਿ ਦਸ ਵਤ੍ਥੂਨਿ ਪੁਚ੍ਛੇਯ੍ਯਾਸੀ’’ਤਿ. ‘‘ਏਵਂ ਭਨ੍ਤੇ’’ਤਿ ਖੋ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਆਯਸ੍ਮਤੋ ਸਮ੍ਭੂਤਸ੍ਸ ਸਾਣਵਾਸਿਸ੍ਸ ਪਚ੍ਚਸ੍ਸੋਸਿ. ਅਥ ਖੋ ਆਯਸ੍ਮਾ ਰੇਵਤੋ ਅਨ੍ਤੇਵਾਸਿਕਂ ਸਰਭਾਣਕਂ ਭਿਕ੍ਖੁਂ ਅਜ੍ਝੇਸਿ. ਅਥ ਖੋ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਤਸ੍ਸ ਭਿਕ੍ਖੁਨੋ ਸਰਭਞ੍ਞਪਰਿਯੋਸਾਨੇ ਯੇਨਾਯਸ੍ਮਾ ਰੇਵਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਰੇਵਤਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਯਸੋ ਕਾਕਣ੍ਡਕਪੁਤ੍ਤੋ ਆਯਸ੍ਮਨ੍ਤਂ ਰੇਵਤਂ ਏਤਦਵੋਚ – ‘‘ਕਪ੍ਪਤਿ, ਭਨ੍ਤੇ, ਸਿਙ੍ਗਿਲੋਣਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਸਿਙ੍ਗਿਲੋਣਕਪ੍ਪੋ’’ਤਿ? ‘‘ਕਪ੍ਪਤਿ, ਭਨ੍ਤੇ, ਸਿਙ੍ਗਿਨਾ ਲੋਣਂ ਪਰਿਹਰਿਤੁਂ – ਯਤ੍ਥ ਅਲੋਣਕਂ ਭਵਿਸ੍ਸਤਿ ਤਤ੍ਥ ਪਰਿਭੁਞ੍ਜਿਸ੍ਸਾਮੀ’’ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ. ‘‘ਕਪ੍ਪਤਿ, ਭਨ੍ਤੇ, ਦ੍ਵਙ੍ਗੁਲਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਦ੍ਵਙ੍ਗੁਲਕਪ੍ਪੋ’’ਤਿ? ‘‘ਕਪ੍ਪਤਿ, ਭਨ੍ਤੇ, ਦ੍ਵਙ੍ਗੁਲਾਯ ਛਾਯਾਯ ਵੀਤਿਵਤ੍ਤਾਯ, ਵਿਕਾਲੇ ਭੋਜਨਂ ਭੁਞ੍ਜਿਤੁ’’ਨ੍ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ. ‘‘ਕਪ੍ਪਤਿ, ਭਨ੍ਤੇ, ਗਾਮਨ੍ਤਰਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਗਾਮਨ੍ਤਰਕਪ੍ਪੋ’’ਤਿ? ‘‘ਕਪ੍ਪਤਿ, ਭਨ੍ਤੇ – ਇਦਾਨਿ ਗਾਮਨ੍ਤਰਂ ਗਮਿਸ੍ਸਾਮੀਤਿ – ਭੁਤ੍ਤਾਵਿਨਾ ਪਵਾਰਿਤੇਨ ਅਨਤਿਰਿਤ੍ਤਂ ਭੋਜਨਂ ਭੁਞ੍ਜਿਤੁ’’ਨ੍ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ. ‘‘ਕਪ੍ਪਤਿ, ਭਨ੍ਤੇ, ਆਵਾਸਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਆਵਾਸਕਪ੍ਪੋ’’ਤਿ? ‘‘ਕਪ੍ਪਤਿ, ਭਨ੍ਤੇ, ਸਮ੍ਬਹੁਲਾ ਆਵਾਸਾ ਸਮਾਨਸੀਮਾ ਨਾਨੁਪੋਸਥਂ ਕਾਤੁ’’ਨ੍ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ. ‘‘ਕਪ੍ਪਤਿ, ਭਨ੍ਤੇ, ਅਨੁਮਤਿਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਅਨੁਮਤਿਕਪ੍ਪੋ’’ਤਿ? ‘‘ਕਪ੍ਪਤਿ, ਭਨ੍ਤੇ, ਵਗ੍ਗੇਨ ਸਙ੍ਘੇਨ ਕਮ੍ਮਂ ਕਾਤੁਂ – ਆਗਤੇ ਭਿਕ੍ਖੂ ਅਨੁਮਾਨੇਸ੍ਸਾਮਾ’’ਤਿ [ਅਨੁਜਾਨਿਸ੍ਸਾਮਾਤਿ, ਅਨੁਜਾਨੇਸ੍ਸਾਮਾਤਿ, ਅਨੁਮਤਿਂ ਆਨੇਸ੍ਸਾਮਾਤਿ (ਕ.)]? ‘‘ਨਾਵੁਸੋ, ਕਪ੍ਪਤੀ’’ਤਿ. ‘‘ਕਪ੍ਪਤਿ, ਭਨ੍ਤੇ, ਆਚਿਣ੍ਣਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਆਚਿਣ੍ਣਕਪ੍ਪੋ’’ਤਿ? ‘‘ਕਪ੍ਪਤਿ, ਭਨ੍ਤੇ, ਇਦਂ ਮੇ ਉਪਜ੍ਝਾਯੇਨ ਅਜ੍ਝਾਚਿਣ੍ਣਂ, ਇਦਂ ਮੇ ਆਚਰਿਯੇਨ ਅਜ੍ਝਾਚਿਣ੍ਣਂ, ਤਂ ਅਜ੍ਝਾਚਰਿਤੁ’’ਨ੍ਤਿ? ‘‘ਆਚਿਣ੍ਣਕਪ੍ਪੋ ਖੋ, ਆਵੁਸੋ, ਏਕਚ੍ਚੋ ਕਪ੍ਪਤਿ, ਏਕਚ੍ਚੋ ਨ ਕਪ੍ਪਤੀ’’ਤਿ. ‘‘ਕਪ੍ਪਤਿ, ਭਨ੍ਤੇ, ਅਮਥਿਤਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਅਮਥਿਤਕਪ੍ਪੋ’’ਤਿ? ‘‘ਕਪ੍ਪਤਿ, ਭਨ੍ਤੇ, ਯਂ ਤਂ ਖੀਰਂ ਖੀਰਭਾਵਂ ਵਿਜਹਿਤਂ, ਅਸਮ੍ਪਤ੍ਤਂ ਦਧਿਭਾਵਂ, ਤਂ ਭੁਤ੍ਤਾਵਿਨਾ ਪਵਾਰਿਤੇਨ ਅਨਤਿਰਿਤ੍ਤਂ ਪਾਤੁ’’ਨ੍ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ? ‘‘ਕਪ੍ਪਤਿ, ਭਨ੍ਤੇ, ਜਲ਼ੋਗਿਂ ਪਾਤੁ’’ਨ੍ਤਿ? ‘‘ਕਾ ਸਾ, ਆਵੁਸੋ, ਜਲ਼ੋਗੀ’’ਤਿ? ‘‘ਕਪ੍ਪਤਿ, ਭਨ੍ਤੇ, ਯਾ ਸਾ ਸੁਰਾ ਆਸੁਤਾ, ਅਸਮ੍ਪਤ੍ਤਾ ਮਜ੍ਜਭਾਵਂ, ਸਾ ਪਾਤੁ’’ਨ੍ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ. ‘‘ਕਪ੍ਪਤਿ, ਭਨ੍ਤੇ, ਅਦਸਕਂ ਨਿਸੀਦਨ’’ਨ੍ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ. ‘‘ਕਪ੍ਪਤਿ, ਭਨ੍ਤੇ, ਜਾਤਰੂਪਰਜਤ’’ਨ੍ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ. ‘‘ਇਮੇ, ਭਨ੍ਤੇ, ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਵੇਸਾਲਿਯਂ ਇਮਾਨਿ ਦਸ ਵਤ੍ਥੂਨਿ ਦੀਪੇਨ੍ਤਿ. ਹਨ੍ਦ ਮਯਂ, ਭਨ੍ਤੇ, ਇਮਂ ਅਧਿਕਰਣਂ ਆਦਿਯਿਸ੍ਸਾਮ. ਪੁਰੇ ਅਧਮ੍ਮੋ ਦਿਪ੍ਪਤਿ, ਧਮ੍ਮੋ ਪਟਿਬਾਹਿਯ੍ਯਤਿ; ਅਵਿਨਯੋ ਦਿਪ੍ਪਤਿ, ਵਿਨਯੋ ਪਟਿਬਾਹਿਯ੍ਯਤਿ; ਪੁਰੇ ਅਧਮ੍ਮਵਾਦਿਨੋ ਬਲਵਨ੍ਤੋ ਹੋਨ੍ਤਿ, ਧਮ੍ਮਵਾਦਿਨੋ ਦੁਬ੍ਬਲਾ ਹੋਨ੍ਤਿ; ਅਵਿਨਯਵਾਦਿਨੋ ਬਲਵਨ੍ਤੋ ਹੋਨ੍ਤਿ, ਵਿਨਯਵਾਦਿਨੋ ਦੁਬ੍ਬਲਾ ਹੋਨ੍ਤੀ’’ਤਿ. ‘‘ਏਵਮਾਵੁਸੋ’’ਤਿ ਖੋ ਆਯਸ੍ਮਾ ਰੇਵਤੋ ਆਯਸ੍ਮਤੋ ਯਸਸ੍ਸ ਕਾਕਣ੍ਡਕਪੁਤ੍ਤਸ੍ਸ ਪਚ੍ਚਸ੍ਸੋਸਿ.

ਪਠਮਭਾਣਵਾਰੋ ਨਿਟ੍ਠਿਤੋ.

੨. ਦੁਤਿਯਭਾਣਵਾਰੋ

੪੫੩. ਅਸ੍ਸੋਸੁਂ ਖੋ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ – ‘‘ਯਸੋ ਕਿਰ ਕਾਕਣ੍ਡਕਪੁਤ੍ਤੋ ਇਦਂ ਅਧਿਕਰਣਂ ਆਦਿਯਿਤੁਕਾਮੋ ਪਕ੍ਖਂ ਪਰਿਯੇਸਤਿ, ਲਭਤਿ ਚ ਕਿਰ ਪਕ੍ਖ’’ਨ੍ਤਿ. ਅਥ ਖੋ ਵੇਸਾਲਿਕਾਨਂ ਵਜ੍ਜਿਪੁਤ੍ਤਕਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਇਦਂ ਖੋ ਅਧਿਕਰਣਂ ਕਕ੍ਖਲ਼ਞ੍ਚ ਵਾਲ਼ਞ੍ਚ. ਕਂ ਨੁ ਖੋ ਮਯਂ ਪਕ੍ਖਂ ਲਭੇਯ੍ਯਾਮ, ਯੇਨ ਮਯਂ ਇਮਸ੍ਮਿਂ ਅਧਿਕਰਣੇ ਬਲਵਨ੍ਤਤਰਾ ਅਸ੍ਸਾਮਾ’’ਤਿ.

ਅਥ ਖੋ ਵੇਸਾਲਿਕਾਨਂ ਵਜ੍ਜਿਪੁਤ੍ਤਕਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਅਯਂ ਖੋ ਆਯਸ੍ਮਾ ਰੇਵਤੋ ਬਹੁਸ੍ਸੁਤੋ ਆਗਤਾਗਮੋ ਧਮ੍ਮਧਰੋ ਵਿਨਯਧਰੋ ਮਾਤਿਕਾਧਰੋ ਪਣ੍ਡਿਤੋ ਵਿਯਤ੍ਤੋ ਮੇਧਾਵੀ ਲਜ੍ਜੀ ਕੁਕ੍ਕੁਚ੍ਚਕੋ ਸਿਕ੍ਖਾਕਾਮੋ. ਸਚੇ ਮਯਂ ਆਯਸ੍ਮਨ੍ਤਂ ਰੇਵਤਂ ਪਕ੍ਖਂ ਲਭੇਯ੍ਯਾਮ, ਏਵਂ ਮਯਂ ਇਮਸ੍ਮਿਂ ਅਧਿਕਰਣੇ ਬਲਵਨ੍ਤਤਰਾ ਅਸ੍ਸਾਮਾ’’ਤਿ.

ਅਥ ਖੋ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਪਹੂਤਂ ਸਾਮਣਕਂ ਪਰਿਕ੍ਖਾਰਂ ਪਟਿਯਾਦੇਸੁਂ – ਪਤ੍ਤਮ੍ਪਿ, ਚੀਵਰਮ੍ਪਿ, ਨਿਸੀਦਨਮ੍ਪਿ, ਸੂਚਿਘਰਮ੍ਪਿ, ਕਾਯਬਨ੍ਧਨਮ੍ਪਿ, ਪਰਿਸ੍ਸਾਵਨਮ੍ਪਿ, ਧਮ੍ਮਕਰਣਮ੍ਪਿ. ਅਥ ਖੋ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਤਂ ਸਾਮਣਕਂ ਪਰਿਕ੍ਖਾਰਂ ਆਦਾਯ ਨਾਵਾਯ ਸਹਜਾਤਿਂ ਉਜ੍ਜਵਿਂਸੁ; ਨਾਵਾਯ ਪਚ੍ਚੋਰੋਹਿਤ੍ਵਾ ਅਞ੍ਞਤਰਸ੍ਮਿਂ ਰੁਕ੍ਖਮੂਲੇ ਭਤ੍ਤਵਿਸ੍ਸਗ੍ਗਂ ਕਰੋਨ੍ਤਿ. ਅਥ ਖੋ ਆਯਸ੍ਮਤੋ ਸਾਲ਼੍ਹਸ੍ਸ ਰਹੋਗਤਸ੍ਸ ਪਟਿਸਲ੍ਲੀਨਸ੍ਸ ਏਵਂ ਚੇਤਸੋ ਪਰਿਵਿਤਕ੍ਕੋ ਉਦਪਾਦਿ – ‘‘ਕੇ ਨੁ ਖੋ ਧਮ੍ਮਵਾਦਿਨੋ – ਪਾਚੀਨਕਾ ਵਾ ਭਿਕ੍ਖੂ, ਪਾਵੇਯ੍ਯਕਾ ਵਾ’’ਤਿ? ਅਥ ਖੋ ਆਯਸ੍ਮਤੋ ਸਾਲ਼੍ਹਸ੍ਸ, ਧਮ੍ਮਞ੍ਚ ਵਿਨਯਞ੍ਚ ਚੇਤਸਾ ਪਚ੍ਚਵੇਕ੍ਖਨ੍ਤਸ੍ਸ, ਏਤਦਹੋਸਿ – ‘‘ਅਧਮ੍ਮਵਾਦਿਨੋ ਪਾਚੀਨਕਾ ਭਿਕ੍ਖੂ, ਧਮ੍ਮਵਾਦਿਨੋ ਪਾਵੇਯ੍ਯਕਾ [ਪਾਠੇਯ੍ਯਕਾ (ਸ੍ਯਾ.)] ਭਿਕ੍ਖੂ’’ਤਿ.

ਅਥ ਖੋ ਅਞ੍ਞਤਰਾ ਸੁਦ੍ਧਾਵਾਸਕਾਯਿਕਾ ਦੇਵਤਾ ਆਯਸ੍ਮਤੋ ਸਾਲ਼੍ਹਸ੍ਸ ਚੇਤਸਾ ਚੇਤੋਪਰਿਵਿਤਕ੍ਕਮਞ੍ਞਾਯ – ਸੇਯ੍ਯਥਾਪਿ ਨਾਮ ਬਲਵਾ ਪੁਰਿਸੋ ਸਮਿਞ੍ਜਿਤਂ ਵਾ ਬਾਹਂ ਪਸਾਰੇਯ੍ਯ, ਪਸਾਰਿਤਂ ਵਾ ਬਾਹਂ ਸਮ੍ਮਿਞ੍ਜੇਯ੍ਯ, ਏਵਮੇਵ ਸੁਦ੍ਧਾਵਾਸੇਸੁ ਦੇਵੇਸੁ ਅਨ੍ਤਰਹਿਤਾ – ਆਯਸ੍ਮਤੋ ਸਾਲ਼੍ਹਸ੍ਸ ਸਮ੍ਮੁਖੇ ਪਾਤੁਰਹੋਸਿ. ਅਥ ਖੋ ਸਾ ਦੇਵਤਾ ਆਯਸ੍ਮਨ੍ਤਂ ਸਾਲ਼੍ਹਂ ਏਤਦਵੋਚ – ‘‘ਸਾਧੁ, ਭਨ੍ਤੇ ਸਾਲ਼੍ਹ, ਅਧਮ੍ਮਵਾਦੀ ਪਾਚੀਨਕਾ ਭਿਕ੍ਖੂ, ਧਮ੍ਮਵਾਦੀ ਪਾਵੇਯ੍ਯਕਾ ਭਿਕ੍ਖੂ. ਤੇਨ ਹਿ, ਭਨ੍ਤੇ ਸਾਲ਼੍ਹ, ਯਥਾਧਮ੍ਮੋ ਤਥਾ ਤਿਟ੍ਠਾਹੀ’’ਤਿ. ‘‘ਪੁਬ੍ਬੇਪਿ ਚਾਹਂ, ਦੇਵਤੇ, ਏਤਰਹਿ ਚ ਯਥਾਧਮ੍ਮੋ ਤਥਾ ਠਿਤੋ; ਅਪਿ ਚਾਹਂ ਨ ਤਾਵ ਦਿਟ੍ਠਿਂ ਆਵਿ ਕਰੋਮਿ, ਅਪ੍ਪੇਵ ਨਾਮ ਮਂ ਇਮਸ੍ਮਿਂ ਅਧਿਕਰਣੇ ਸਮ੍ਮਨ੍ਨੇਯ੍ਯਾ’’ਤਿ.

੪੫੪. ਅਥ ਖੋ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਤਂ ਸਾਮਣਕਂ ਪਰਿਕ੍ਖਾਰਂ ਆਦਾਯ ਯੇਨਾਯਸ੍ਮਾ ਰੇਵਤੋ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਰੇਵਤਂ ਏਤਦਵੋਚੁਂ – ‘‘ਪਟਿਗ੍ਗਣ੍ਹਾਤੁ, ਭਨ੍ਤੇ, ਥੇਰੋ ਸਾਮਣਕਂ ਪਰਿਕ੍ਖਾਰਂ – ਪਤ੍ਤਮ੍ਪਿ, ਚੀਵਰਮ੍ਪਿ, ਨਿਸੀਦਨਮ੍ਪਿ, ਸੂਚਿਘਰਮ੍ਪਿ, ਕਾਯਬਨ੍ਧਨਮ੍ਪਿ, ਪਰਿਸ੍ਸਾਵਨਮ੍ਪਿ, ਧਮ੍ਮਕਰਣਮ੍ਪੀ’’ਤਿ. ‘‘ਅਲਂ, ਆਵੁਸੋ, ਪਰਿਪੁਣ੍ਣਂ ਮੇ ਪਤ੍ਤਚੀਵਰ’’ਨ੍ਤਿ ਨ ਇਚ੍ਛਿ ਪਟਿਗ੍ਗਹੇਤੁਂ.

ਤੇਨ ਖੋ ਪਨ ਸਮਯੇਨ ਉਤ੍ਤਰੋ ਨਾਮ ਭਿਕ੍ਖੁ ਵੀਸਤਿਵਸ੍ਸੋ ਆਯਸ੍ਮਤੋ ਰੇਵਤਸ੍ਸ ਉਪਟ੍ਠਾਕੋ ਹੋਤਿ. ਅਥ ਖੋ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਯੇਨਾਯਸ੍ਮਾ ਉਤ੍ਤਰੋ ਤੇਨੁਪਸਙ੍ਕਮਿਂਸੁ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਉਤ੍ਤਰਂ ਏਤਦਵੋਚੁਂ – ‘‘ਪਟਿਗ੍ਗਣ੍ਹਾਤੁ ਆਯਸ੍ਮਾ ਉਤ੍ਤਰੋ ਸਾਮਣਕਂ ਪਰਿਕ੍ਖਾਰਂ – ਪਤ੍ਤਮ੍ਪਿ, ਚੀਵਰਮ੍ਪਿ, ਨਿਸੀਦਨਮ੍ਪਿ, ਸੂਚਿਘਰਮ੍ਪਿ, ਕਾਯਬਨ੍ਧਨਮ੍ਪਿ, ਪਰਿਸ੍ਸਾਵਨਮ੍ਪਿ, ਧਮ੍ਮਕਰਣਮ੍ਪੀ’’ਤਿ. ‘‘ਅਲਂ, ਆਵੁਸੋ, ਪਰਿਪੁਣ੍ਣਂ ਮੇ ਪਤ੍ਤਚੀਵਰ’’ਨ੍ਤਿ ਨ ਇਚ੍ਛਿ ਪਟਿਗ੍ਗਹੇਤੁਂ. ‘‘ਮਨੁਸ੍ਸਾ ਖੋ, ਆਵੁਸੋ ਉਤ੍ਤਰ, ਭਗਵਤੋ ਸਾਮਣਕਂ ਪਰਿਕ੍ਖਾਰਂ ਉਪਨਾਮੇਨ੍ਤਿ. ਸਚੇ ਭਗਵਾ ਪਟਿਗ੍ਗਣ੍ਹਾਤਿ, ਤੇਨੇਵ ਤੇ ਅਤ੍ਤਮਨਾ ਹੋਨ੍ਤਿ. ਨੋ ਚੇ ਭਗਵਾ ਪਟਿਗ੍ਗਣ੍ਹਾਤਿ, ਆਯਸ੍ਮਤੋ [ਆਯਸ੍ਮਤੋ ਚ (ਸ੍ਯਾ.)] ਆਨਨ੍ਦਸ੍ਸ ਉਪਨਾਮੇਨ੍ਤਿ – ਪਟਿਗ੍ਗਣ੍ਹਾਤੁ, ਭਨ੍ਤੇ, ਥੇਰੋ ਸਾਮਣਕਂ ਪਰਿਕ੍ਖਾਰਂ. ਯਥਾ ਭਗਵਤਾ ਪਟਿਗ੍ਗਹਿਤੋ, ਏਵਮੇਵ ਸੋ ਭਵਿਸ੍ਸਤੀਤਿ. ਪਟਿਗ੍ਗਣ੍ਹਾਤੁ ਆਯਸ੍ਮਾ ਉਤ੍ਤਰੋ ਸਾਮਣਕਂ ਪਰਿਕ੍ਖਾਰਂ. ਯਥਾ ਥੇਰੇਨ ਪਟਿਗ੍ਗਹਿਤੋ, ਏਵਮੇਵ ਸੋ ਭਵਿਸ੍ਸਤੀ’’ਤਿ. ਅਥ ਖੋ ਆਯਸ੍ਮਾ ਉਤ੍ਤਰੋ ਵੇਸਾਲਿਕੇਹਿ ਵਜ੍ਜਿਪੁਤ੍ਤੇਹਿ ਭਿਕ੍ਖੂਹਿ ਨਿਪ੍ਪੀਲ਼ਿਯਮਾਨੋ ਏਕਂ ਚੀਵਰਂ ਅਗ੍ਗਹੇਸਿ. ‘‘ਵਦੇਯ੍ਯਾਥ, ਆਵੁਸੋ, ਯੇਨ ਅਤ੍ਥੋ’’ਤਿ. ‘‘ਏਤ੍ਤਕਂ ਆਯਸ੍ਮਾ ਉਤ੍ਤਰੋ ਥੇਰਂ ਵਦੇਤੁ; ਏਤ੍ਤਕਞ੍ਚ, ਭਨ੍ਤੇ, ਥੇਰੋ ਸਙ੍ਘਮਜ੍ਝੇ ਵਦੇਤੁ – ‘ਪੁਰਤ੍ਥਿਮੇਸੁ ਜਨਪਦੇਸੁ ਬੁਦ੍ਧਾ ਭਗਵਨ੍ਤੋ ਉਪ੍ਪਜ੍ਜਨ੍ਤਿ. ਧਮ੍ਮਵਾਦੀ ਪਾਚੀਨਕਾ ਭਿਕ੍ਖੂ, ਅਧਮ੍ਮਵਾਦੀ ਪਾਵੇਯ੍ਯਕਾ ਭਿਕ੍ਖੂ’’’ਤਿ. ‘‘ਏਵਮਾਵੁਸੋ’’ਤਿ ਖੋ ਆਯਸ੍ਮਾ ਉਤ੍ਤਰੋ ਵੇਸਾਲਿਕਾਨਂ ਵਜ੍ਜਿਪੁਤ੍ਤਕਾਨਂ ਭਿਕ੍ਖੂਨਂ ਪਟਿਸ੍ਸੁਤ੍ਵਾ ਯੇਨਾਯਸ੍ਮਾ ਰੇਵਤੋ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਰੇਵਤਂ ਏਤਦਵੋਚ – ‘‘ਏਤ੍ਤਕਂ, ਭਨ੍ਤੇ, ਥੇਰੋ ਸਙ੍ਘਮਜ੍ਝੇ ਵਦੇਤੁ – ‘ਪੁਰਤ੍ਥਿਮੇਸੁ ਜਨਪਦੇਸੁ ਬੁਦ੍ਧਾ ਭਗਵਨ੍ਤੋ ਉਪ੍ਪਜ੍ਜਨ੍ਤਿ. ਧਮ੍ਮਵਾਦੀ ਪਾਚੀਨਕਾ ਭਿਕ੍ਖੂ, ਅਧਮ੍ਮਵਾਦੀ ਪਾਵੇਯ੍ਯਕਾ ਭਿਕ੍ਖੂ’’’ਤਿ. ‘‘ਅਧਮ੍ਮੇ ਮਂ ਤ੍ਵਂ, ਭਿਕ੍ਖੁ, ਨਿਯੋਜੇਸੀ’’ਤਿ ਥੇਰੋ ਆਯਸ੍ਮਨ੍ਤਂ ਉਤ੍ਤਰਂ ਪਣਾਮੇਸਿ.

ਅਥ ਖੋ ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਆਯਸ੍ਮਨ੍ਤਂ ਉਤ੍ਤਰਂ ਏਤਦਵੋਚੁਂ – ‘‘ਕਿਂ, ਆਵੁਸੋ ਉਤ੍ਤਰ, ਥੇਰੋ ਆਹਾ’’ਤਿ? ‘‘ਪਾਪਿਕਂ ਨੋ, ਆਵੁਸੋ, ਕਤਂ. ‘ਅਧਮ੍ਮੇ ਮਂ ਤ੍ਵਂ, ਭਿਕ੍ਖੁ, ਨਿਯੋਜੇਸੀ’’’ਤਿ ਥੇਰੋ ਮਂ ਪਣਾਮੇਸੀਤਿ. ‘‘ਨਨੁ ਤ੍ਵਂ, ਆਵੁਸੋ [ਆਵੁਸੋ ਉਤ੍ਤਰ (ਸ੍ਯਾ. ਕਂ.)], ਵੁਡ੍ਢੋ ਵੀਸਤਿਵਸ੍ਸੋਸੀ’’ਤਿ? ‘‘ਆਮਾਵੁਸੋ, ਅਪਿ ਚ ਮਯਂ ਗਰੁਨਿਸ੍ਸਯਂ ਗਣ੍ਹਾਮਾ’’ਤਿ.

੪੫੫. ਅਥ ਖੋ ਸਙ੍ਘੋ ਤਂ ਅਧਿਕਰਣਂ ਵਿਨਿਚ੍ਛਿਨਿਤੁਕਾਮੋ ਸਨ੍ਨਿਪਤਿ. ਅਥ ਖੋ ਆਯਸ੍ਮਾ ਰੇਵਤੋ ਸਙ੍ਘਂ ਞਾਪੇਸਿ –

‘‘ਸੁਣਾਤੁ ਮੇ, ਆਵੁਸੋ, ਸਙ੍ਘੋ. ਸਚੇ ਮਯਂ ਇਮਂ ਅਧਿਕਰਣਂ ਇਧ ਵੂਪਸਮੇਸ੍ਸਾਮ, ਸਿਯਾਪਿ ਮੂਲਾਦਾਯਕਾ [ਮੂਲਦਾਯਕਾ (ਸੀ.)] ਭਿਕ੍ਖੂ ਪੁਨਕਮ੍ਮਾਯ ਉਕ੍ਕੋਟੇਯ੍ਯੁਂ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਯਤ੍ਥੇਵਿਮਂ ਅਧਿਕਰਣਂ ਸਮੁਪ੍ਪਨ੍ਨਂ, ਸਙ੍ਘੋ ਤਤ੍ਥੇਵਿਮਂ ਅਧਿਕਰਣਂ ਵੂਪਸਮੇਯ੍ਯਾ’’ਤਿ.

ਅਥ ਖੋ ਥੇਰਾ ਭਿਕ੍ਖੂ ਵੇਸਾਲਿਂ ਅਗਮਂਸੁ – ਤਂ ਅਧਿਕਰਣਂ ਵਿਨਿਚ੍ਛਿਨਿਤੁਕਾਮਾ.

ਤੇਨ ਖੋ ਪਨ ਸਮਯੇਨ ਸਬ੍ਬਕਾਮੀ ਨਾਮ ਪਥਬ੍ਯਾ ਸਙ੍ਘਤ੍ਥੇਰੋ ਵੀਸਵਸ੍ਸਸਤਿਕੋ ਉਪਸਮ੍ਪਦਾਯ, ਆਯਸ੍ਮਤੋ ਆਨਨ੍ਦਸ੍ਸ ਸਦ੍ਧਿਵਿਹਾਰਿਕੋ, ਵੇਸਾਲਿਯਂ ਪਟਿਵਸਤਿ. ਅਥ ਖੋ ਆਯਸ੍ਮਾ ਰੇਵਤੋ ਆਯਸ੍ਮਨ੍ਤਂ ਸਮ੍ਭੂਤਂ ਸਾਣਵਾਸਿਂ ਏਤਦਵੋਚ – ‘‘ਅਹਂ, ਆਵੁਸੋ, ਯਸ੍ਮਿਂ ਵਿਹਾਰੇ ਸਬ੍ਬਕਾਮੀ ਥੇਰੋ ਵਿਹਰਤਿ, ਤਂ ਵਿਹਾਰਂ ਉਪਗਚ੍ਛਾਮਿ. ਸੋ ਤ੍ਵਂ ਕਾਲਸ੍ਸੇਵ ਆਯਸ੍ਮਨ੍ਤਂ ਸਬ੍ਬਕਾਮਿਂ ਉਪਸਙ੍ਕਮਿਤ੍ਵਾ ਇਮਾਨਿ ਦਸ ਵਤ੍ਥੂਨਿ ਪੁਚ੍ਛੇਯ੍ਯਾਸੀ’’ਤਿ.

‘‘ਏਵਂ ਭਨ੍ਤੇ’’ਤਿ ਖੋ ਆਯਸ੍ਮਾ ਸਮ੍ਭੂਤੋ ਸਾਣਵਾਸੀ ਆਯਸ੍ਮਤੋ ਰੇਵਤਸ੍ਸ ਪਚ੍ਚਸ੍ਸੋਸਿ. ਅਥ ਖੋ ਆਯਸ੍ਮਾ ਰੇਵਤੋ, ਯਸ੍ਮਿਂ ਵਿਹਾਰੇ ਸਬ੍ਬਕਾਮੀ ਥੇਰੋ ਵਿਹਰਤਿ, ਤਂ ਵਿਹਾਰਂ ਉਪਗਚ੍ਛਿ. ਗਬ੍ਭੇ ਆਯਸ੍ਮਤੋ ਸਬ੍ਬਕਾਮਿਸ੍ਸ ਸੇਨਾਸਨਂ ਪਞ੍ਞਤ੍ਤਂ ਹੋਤਿ, ਗਬ੍ਭਪ੍ਪਮੁਖੇ ਆਯਸ੍ਮਤੋ ਰੇਵਤਸ੍ਸ. ਅਥ ਖੋ ਆਯਸ੍ਮਾ ਰੇਵਤੋ – ਅਯਂ ਥੇਰੋ ਮਹਲ੍ਲਕੋ ਨ ਨਿਪਜ੍ਜਤੀਤਿ – ਨ ਸੇਯ੍ਯਂ ਕਪ੍ਪੇਸਿ. ਆਯਸ੍ਮਾ ਸਬ੍ਬਕਾਮੀ – ਅਯਂ ਭਿਕ੍ਖੁ ਆਗਨ੍ਤੁਕੋ ਕਿਲਨ੍ਤੋ ਨ ਨਿਪਜ੍ਜਤੀਤਿ – ਨ ਸੇਯ੍ਯਂ ਕਪ੍ਪੇਸਿ. ਅਥ ਖੋ ਆਯਸ੍ਮਾ ਸਬ੍ਬਕਾਮੀ ਰਤ੍ਤਿਯਾ ਪਚ੍ਚੂਸਸਮਯਂ ਪਚ੍ਚੁਟ੍ਠਾਯ ਆਯਸ੍ਮਨ੍ਤਂ ਰੇਵਤਂ ਏਤਦਵੋਚ – ‘‘ਕਤਮੇਨ ਤ੍ਵਂ ਭੂਮਿ ਵਿਹਾਰੇਨ ਏਤਰਹਿ ਬਹੁਲਂ ਵਿਹਰਸੀ’’ਤਿ? ‘‘ਮੇਤ੍ਤਾਵਿਹਾਰੇਨ ਖੋ ਅਹਂ, ਭਨ੍ਤੇ, ਏਤਰਹਿ ਬਹੁਲਂ ਵਿਹਰਾਮੀ’’ਤਿ. ‘‘ਕੁਲ੍ਲਕਵਿਹਾਰੇਨ ਕਿਰ ਤ੍ਵਂ ਭੂਮਿ ਏਤਰਹਿ ਬਹੁਲਂ ਵਿਹਰਸਿ. ਕੁਲ੍ਲਕਵਿਹਾਰੋ ਏਸੋ [ਹੇਸੋ (ਸ੍ਯਾ.)] ਭੂਮਿ ਯਦਿਦਂ ਮੇਤ੍ਤਾ’’ਤਿ. ‘‘ਪੁਬ੍ਬੇਪਿ ਮੇ, ਭਨ੍ਤੇ, ਗਿਹਿਭੂਤਸ੍ਸ ਆਚਿਣ੍ਣਾ ਮੇਤ੍ਤਾ. ਤੇਨਾਹਂ ਏਤਰਹਿਪਿ ਮੇਤ੍ਤਾਵਿਹਾਰੇਨ ਬਹੁਲਂ ਵਿਹਰਾਮਿ, ਅਪਿ ਚ ਖੋ ਮਯਾ ਚਿਰਪ੍ਪਤ੍ਤਂ ਅਰਹਤ੍ਤ’’ਨ੍ਤਿ. ‘‘ਥੇਰੋ ਪਨ, ਭਨ੍ਤੇ, ਕਤਮੇਨ ਵਿਹਾਰੇਨ ਏਤਰਹਿ ਬਹੁਲਂ ਵਿਹਰਤੀ’’ਤਿ? ‘‘ਸੁਞ੍ਞਤਾਵਿਹਾਰੇਨ ਖੋ ਅਹਂ ਭੂਮਿ ਏਤਰਹਿ ਬਹੁਲਂ ਵਿਹਰਾਮੀ’’ਤਿ. ‘‘ਮਹਾਪੁਰਿਸਵਿਹਾਰੇਨ ਕਿਰ, ਭਨ੍ਤੇ, ਥੇਰੋ ਏਤਰਹਿ ਬਹੁਲਂ ਵਿਹਰਤਿ. ਮਹਾਪੁਰਿਸਵਿਹਾਰੋ ਏਸੋ, ਭਨ੍ਤੇ, ਯਦਿਦਂ ਸੁਞ੍ਞਤਾ’’ਤਿ. ‘‘ਪੁਬ੍ਬੇਪਿ ਮੇ ਭੂਮਿ ਗਿਹਿਭੂਤਸ੍ਸ ਆਚਿਣ੍ਣਾ ਸੁਞ੍ਞਤਾ. ਤੇਨਾਹਂ ਏਤਰਹਿਪਿ ਸੁਞ੍ਞਤਾਵਿਹਾਰੇਨ ਬਹੁਲਂ ਵਿਹਰਾਮਿ, ਅਪਿ ਚ ਮਯਾ ਚਿਰਪ੍ਪਤ੍ਤਂ ਅਰਹਤ੍ਤ’’ਨ੍ਤਿ. ਅਯਞ੍ਚਰਹਿ ਥੇਰਾਨਂ ਭਿਕ੍ਖੂਨਂ ਅਨ੍ਤਰਾਕਥਾ ਵਿਪ੍ਪਕਤਾ, ਅਥਾਯਸ੍ਮਾ ਸਮ੍ਭੂਤੋ ਸਾਣਵਾਸੀ ਤਸ੍ਮਿਂ ਅਨੁਪ੍ਪਤ੍ਤੋ ਹੋਤਿ. ਅਥ ਖੋ ਆਯਸ੍ਮਾ ਸਮ੍ਭੂਤੋ ਸਾਣਵਾਸੀ ਯੇਨਾਯਸ੍ਮਾ ਸਬ੍ਬਕਾਮੀ ਤੇਨੁਪਸਙ੍ਕਮਿ, ਉਪਸਙ੍ਕਮਿਤ੍ਵਾ ਆਯਸ੍ਮਨ੍ਤਂ ਸਬ੍ਬਕਾਮਿਂ ਅਭਿਵਾਦੇਤ੍ਵਾ ਏਕਮਨ੍ਤਂ ਨਿਸੀਦਿ. ਏਕਮਨ੍ਤਂ ਨਿਸਿਨ੍ਨੋ ਖੋ ਆਯਸ੍ਮਾ ਸਮ੍ਭੂਤੋ ਸਾਣਵਾਸੀ ਆਯਸ੍ਮਨ੍ਤਂ ਸਬ੍ਬਕਾਮਿਂ ਏਤਦਵੋਚ – ‘‘ਇਮੇ, ਭਨ੍ਤੇ, ਵੇਸਾਲਿਕਾ ਵਜ੍ਜਿਪੁਤ੍ਤਕਾ ਭਿਕ੍ਖੂ ਵੇਸਾਲਿਯਂ ਦਸ ਵਤ੍ਥੂਨਿ ਦੀਪੇਨ੍ਤਿ – ਕਪ੍ਪਤਿ ਸਿਙ੍ਗਿਲੋਣਕਪ੍ਪੋ, ਕਪ੍ਪਤਿ ਦ੍ਵਙ੍ਗੁਲਕਪ੍ਪੋ, ਕਪ੍ਪਤਿ ਗਾਮਨ੍ਤਰਕਪ੍ਪੋ, ਕਪ੍ਪਤਿ ਆਵਾਸਕਪ੍ਪੋ, ਕਪ੍ਪਤਿ ਅਨੁਮਤਿਕਪ੍ਪੋ, ਕਪ੍ਪਤਿ ਆਚਿਣ੍ਣਕਪ੍ਪੋ, ਕਪ੍ਪਤਿ ਅਮਥਿਤਕਪ੍ਪੋ, ਕਪ੍ਪਤਿ ਜਲ਼ੋਗਿਂ, ਪਾਤੁਂ ਕਪ੍ਪਤਿ ਅਦਸਕਂ ਨਿਸੀਦਨਂ, ਕਪ੍ਪਤਿ ਜਾਤਰੂਪਰਜਤਨ੍ਤਿ. ਥੇਰੇਨ, ਭਨ੍ਤੇ, ਉਪਜ੍ਝਾਯਸ੍ਸ ਮੂਲੇ ਬਹੁਧਮ੍ਮੋ ਚ ਵਿਨਯੋ ਚ ਪਰਿਯਤ੍ਤੋ. ਥੇਰਸ੍ਸ ਭਨ੍ਤੇ, ਧਮ੍ਮਞ੍ਚ ਵਿਨਯਞ੍ਚ ਪਚ੍ਚਵੇਕ੍ਖਨ੍ਤਸ੍ਸ ਕਥਂ ਹੋਤਿ? ਕੇ ਨੁ ਖੋ ਧਮ੍ਮਵਾਦਿਨੋ – ਪਾਚੀਨਕਾ ਵਾ ਭਿਕ੍ਖੂ, ਪਾਵੇਯ੍ਯਕਾ ਵਾ’’ਤਿ? ‘‘ਤਯਾਪਿ ਖੋ, ਆਵੁਸੋ, ਉਪਜ੍ਝਾਯਸ੍ਸ ਮੂਲੇ ਬਹੁ ਧਮ੍ਮੋ ਚ ਵਿਨਯੋ ਚ ਪਰਿਯਤ੍ਤੋ. ਤੁਯ੍ਹਂ ਪਨ, ਆਵੁਸੋ, ਧਮ੍ਮਞ੍ਚ ਵਿਨਯਞ੍ਚ ਪਚ੍ਚਵੇਕ੍ਖਨ੍ਤਸ੍ਸ ਕਥਂ ਹੋਤਿ? ਕੇ ਨੁ ਖੋ ਧਮ੍ਮਵਾਦਿਨੋ – ਪਾਚੀਨਕਾ ਵਾ ਭਿਕ੍ਖੂ, ਪਾਵੇਯ੍ਯਕਾ ਵਾ’’ਤਿ? ‘‘ਮਯ੍ਹਂ ਖੋ, ਭਨ੍ਤੇ, ਧਮ੍ਮਞ੍ਚ ਵਿਨਯਞ੍ਚ ਪਚ੍ਚਵੇਕ੍ਖਨ੍ਤਸ੍ਸ ਏਵਂ ਹੋਤਿ – ਅਧਮ੍ਮਵਾਦੀ ਪਾਚੀਨਕਾ ਭਿਕ੍ਖੂ, ਧਮ੍ਮਵਾਦੀ ਪਾਵੇਯ੍ਯਕਾ ਭਿਕ੍ਖੂਤਿ; ਅਪਿ ਚਾਹਂ ਨ ਤਾਵ ਦਿਟ੍ਠਿਂ ਆਵਿ ਕਰੋਮਿ, ਅਪ੍ਪੇਵ ਨਾਮ ਮਂ ਇਮਸ੍ਮਿਂ ਅਧਿਕਰਣੇ ਸਮ੍ਮਨ੍ਨੇਯ੍ਯਾ’’ਤਿ. ‘‘ਮਯ੍ਹਮ੍ਪਿ ਖੋ, ਆਵੁਸੋ, ਧਮ੍ਮਞ੍ਚ ਵਿਨਯਞ੍ਚ ਪਚ੍ਚਵੇਕ੍ਖਨ੍ਤਸ੍ਸ ਏਵਂ ਹੋਤਿ – ਅਧਮ੍ਮਵਾਦੀ ਪਾਚੀਨਕਾ ਭਿਕ੍ਖੂ, ਧਮ੍ਮਵਾਦੀ ਪਾਵੇਯ੍ਯਕਾ ਭਿਕ੍ਖੂਤਿ; ਅਪਿ ਚਾਹਂ ਨ ਤਾਵ ਦਿਟ੍ਠਿਂ ਆਵਿ ਕਰੋਮਿ, ਅਪ੍ਪੇਵ ਨਾਮ ਮਂ ਇਮਸ੍ਮਿਂ ਅਧਿਕਰਣੇ ਸਮ੍ਮਨ੍ਨੇਯ੍ਯਾ’’ਤਿ.

੪੫੬. ਅਥ ਖੋ ਸਙ੍ਘੋ ਤਂ ਅਧਿਕਰਣਂ ਵਿਨਿਚ੍ਛਿਨਿਤੁਕਾਮੋ ਸਨ੍ਨਿਪਤਿ. ਤਸ੍ਮਿਂ ਖੋ ਪਨ ਅਧਿਕਰਣੇ ਵਿਨਿਚ੍ਛਿਯਮਾਨੇ ਅਨਗ੍ਗਾਨਿ ਚੇਵ ਭਸ੍ਸਾਨਿ ਜਾਯਨ੍ਤਿ, ਨ ਚੇਕਸ੍ਸ ਭਾਸਿਤਸ੍ਸ ਅਤ੍ਥੋ ਵਿਞ੍ਞਾਯਤਿ. ਅਥ ਖੋ ਆਯਸ੍ਮਾ ਰੇਵਤੋ ਸਙ੍ਘਂ ਞਾਪੇਸਿ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਮ੍ਹਾਕਂ ਇਮਸ੍ਮਿਂ ਅਧਿਕਰਣੇ ਵਿਨਿਚ੍ਛਿਯਮਾਨੇ ਅਨਗ੍ਗਾਨਿ ਚੇਵ ਭਸ੍ਸਾਨਿ ਜਾਯਨ੍ਤਿ, ਨ ਚੇਕਸ੍ਸ ਭਾਸਿਤਸ੍ਸ ਅਤ੍ਥੋ ਵਿਞ੍ਞਾਯਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਇਮਂ ਅਧਿਕਰਣਂ ਉਬ੍ਬਾਹਿਕਾਯ ਵੂਪਸਮੇਯ੍ਯਾ’’ਤਿ. ਸਙ੍ਘੋ ਚਤ੍ਤਾਰੋ ਪਾਚੀਨਕੇ ਭਿਕ੍ਖੂ, ਚਤ੍ਤਾਰੋ ਪਾਵੇਯ੍ਯਕੇ ਭਿਕ੍ਖੂ ਉਚ੍ਚਿਨਿ. ਪਾਚੀਨਕਾਨਂ ਭਿਕ੍ਖੂਨਂ – ਆਯਸ੍ਮਨ੍ਤਞ੍ਚ ਸਬ੍ਬਕਾਮਿਂ, ਆਯਸ੍ਮਨ੍ਤਞ੍ਚ ਸਾਲ਼੍ਹਂ, ਆਯਸ੍ਮਨ੍ਤਞ੍ਚ ਖੁਜ੍ਜਸੋਭਿਤਂ, ਆਯਸ੍ਮਨ੍ਤਞ੍ਚ ਵਾਸਭਗਾਮਿਕਂ; ਪਾਵੇਯ੍ਯਕਾਨਂ ਭਿਕ੍ਖੂਨਂ – ਆਯਸ੍ਮਨ੍ਤਞ੍ਚ ਰੇਵਤਂ, ਆਯਸ੍ਮਨ੍ਤਞ੍ਚ ਸਮ੍ਭੂਤਂ ਸਾਣਵਾਸਿਂ, ਆਯਸ੍ਮਨ੍ਤਞ੍ਚ ਯਸਂ ਕਾਕਣ੍ਡਕਪੁਤ੍ਤਂ, ਆਯਸ੍ਮਨ੍ਤਞ੍ਚ ਸੁਮਨਨ੍ਤਿ. ਅਥ ਖੋ ਆਯਸ੍ਮਾ ਰੇਵਤੋ ਸਙ੍ਘਂ ਞਾਪੇਸਿ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਮ੍ਹਾਕਂ ਇਮਸ੍ਮਿਂ ਅਧਿਕਰਣੇ ਵਿਨਿਚ੍ਛਿਯਮਾਨੇ ਅਨਗ੍ਗਾਨਿ ਚੇਵ ਭਸ੍ਸਾਨਿ ਜਾਯਨ੍ਤਿ, ਨ ਚੇਕਸ੍ਸ ਭਾਸਿਤਸ੍ਸ ਅਤ੍ਥੋ ਵਿਞ੍ਞਾਯਤਿ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਸਙ੍ਘੋ ਚਤ੍ਤਾਰੋ ਪਾਚੀਨਕੇ ਭਿਕ੍ਖੂ, ਚਤ੍ਤਾਰੋ ਪਾਵੇਯ੍ਯਕੇ ਭਿਕ੍ਖੂ ਸਮ੍ਮਨ੍ਨੇਯ੍ਯ ਉਬ੍ਬਾਹਿਕਾਯ ਇਮਂ ਅਧਿਕਰਣਂ ਵੂਪਸਮੇਤੁਂ. ਏਸਾ ਞਤ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਅਮ੍ਹਾਕਂ ਇਮਸ੍ਮਿਂ ਅਧਿਕਰਣੇ ਵਿਨਿਚ੍ਛਿਯਮਾਨੇ ਅਨਗ੍ਗਾਨਿ ਚੇਵ ਭਸ੍ਸਾਨਿ ਜਾਯਨ੍ਤਿ, ਨ ਚੇਕਸ੍ਸ ਭਾਸਿਤਸ੍ਸ ਅਤ੍ਥੋ ਵਿਞ੍ਞਾਯਤਿ. ਸਙ੍ਘੋ ਚਤ੍ਤਾਰੋ ਪਾਚੀਨਕੇ ਭਿਕ੍ਖੂ, ਚਤ੍ਤਾਰੋ ਪਾਵੇਯ੍ਯਕੇ ਭਿਕ੍ਖੂ ਸਮ੍ਮਨ੍ਨਤਿ ਉਬ੍ਬਾਹਿਕਾਯ ਇਮਂ ਅਧਿਕਰਣਂ ਵੂਪਸਮੇਤੁਂ. ਯਸ੍ਸਾਯਸ੍ਮਤੋ ਖਮਤਿ ਚਤੁਨ੍ਨਂ ਪਾਚੀਨਕਾਨਂ ਭਿਕ੍ਖੂਨਂ, ਚਤੁਨ੍ਨਂ ਪਾਵੇਯ੍ਯਕਾਨਂ ਭਿਕ੍ਖੂਨਂ ਸਮ੍ਮੁਤਿ, ਉਬ੍ਬਾਹਿਕਾਯ ਇਮਂ ਅਧਿਕਰਣਂ ਵੂਪਸਮੇਤੁਂ, ਸੋ ਤੁਣ੍ਹਸ੍ਸ; ਯਸ੍ਸ ਨਕ੍ਖਮਤਿ, ਸੋ ਭਾਸੇਯ੍ਯ.

‘‘ਸਮ੍ਮਤਾ ਸਙ੍ਘੇਨ ਚਤ੍ਤਾਰੋ ਪਾਚੀਨਕਾ ਭਿਕ੍ਖੂ, ਚਤ੍ਤਾਰੋ ਪਾਵੇਯ੍ਯਕਾ ਭਿਕ੍ਖੂ, ਉਬ੍ਬਾਹਿਕਾਯ ਇਮਂ ਅਧਿਕਰਣਂ ਵੂਪਸਮੇਤੁਂ. ਖਮਤਿ ਸਙ੍ਘਸ੍ਸ, ਤਸ੍ਮਾ ਤੁਣ੍ਹੀ, ਏਵਮੇਤਂ ਧਾਰਯਾਮੀ’’ਤਿ.

ਤੇਨ ਖੋ ਪਨ ਸਮਯੇਨ ਅਜਿਤੋ ਨਾਮ ਭਿਕ੍ਖੁ ਦਸਵਸ੍ਸੋ ਸਙ੍ਘਸ੍ਸ ਪਾਤਿਮੋਕ੍ਖੁਦ੍ਦੇਸਕੋ ਹੋਤਿ. ਅਥ ਖੋ ਸਙ੍ਘੋ ਆਯਸ੍ਮਨ੍ਤਮ੍ਪਿ ਅਜਿਤਂ ਸਮ੍ਮਨ੍ਨਤਿ – ਥੇਰਾਨਂ ਭਿਕ੍ਖੂਨਂ ਆਸਨਪਞ੍ਞਾਪਕਂ. ਅਥ ਖੋ ਥੇਰਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਕਤ੍ਥ ਨੁ ਖੋ ਮਯਂ ਇਮਂ ਅਧਿਕਰਣਂ ਵੂਪਸਮੇਯ੍ਯਾਮਾ’’ਤਿ? ਅਥ ਖੋ ਥੇਰਾਨਂ ਭਿਕ੍ਖੂਨਂ ਏਤਦਹੋਸਿ – ‘‘ਅਯਂ ਖੋ ਵਾਲਿਕਾਰਾਮੋ ਰਮਣੀਯੋ ਅਪ੍ਪਸਦ੍ਦੋ ਅਪ੍ਪਨਿਗ੍ਘੋਸੋ. ਯਂਨੂਨ ਮਯਂ ਵਾਲਿਕਾਰਾਮੇ ਇਮਂ ਅਧਿਕਰਣਂ ਵੂਪਸਮੇਯ੍ਯਾਮਾ’’ਤਿ.

੪੫੭. ਅਥ ਖੋ ਥੇਰਾ ਭਿਕ੍ਖੂ ਵਾਲਿਕਾਰਾਮਂ ਅਗਮਂਸੁ – ਤਂ ਅਧਿਕਰਣਂ ਵਿਨਿਚ੍ਛਿਨਿਤੁਕਾਮਾ. ਅਥ ਖੋ ਆਯਸ੍ਮਾ ਰੇਵਤੋ ਸਙ੍ਘਂ ਞਾਪੇਸਿ –

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਆਯਸ੍ਮਨ੍ਤਂ ਸਬ੍ਬਕਾਮਿਂ ਵਿਨਯਂ ਪੁਚ੍ਛੇਯ੍ਯ’’ਨ੍ਤਿ.

ਆਯਸ੍ਮਾ ਸਬ੍ਬਕਾਮੀ ਸਙ੍ਘਂ ਞਾਪੇਸਿ –

‘‘ਸੁਣਾਤੁ ਮੇ, ਆਵੁਸੋ, ਸਙ੍ਘੋ. ਯਦਿ ਸਙ੍ਘਸ੍ਸ ਪਤ੍ਤਕਲ੍ਲਂ, ਅਹਂ ਰੇਵਤੇਨ ਵਿਨਯਂ ਪੁਟ੍ਠੋ ਵਿਸ੍ਸਜ੍ਜੇਯ੍ਯ’’ਨ੍ਤਿ.

ਅਥ ਖੋ ਆਯਸ੍ਮਾ ਰੇਵਤੋ ਆਯਸ੍ਮਨ੍ਤਂ ਸਬ੍ਬਕਾਮਿਂ ਏਤਦਵੋਚ – ‘‘ਕਪ੍ਪਤਿ, ਭਨ੍ਤੇ, ਸਿਙ੍ਗਿਲੋਣਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਸਿਙ੍ਗਿਲੋਣਕਪ੍ਪੋ’’ਤਿ? ‘‘ਕਪ੍ਪਤਿ, ਭਨ੍ਤੇ, ਸਿਙ੍ਗਿਨਾ ਲੋਣਂ ਪਰਿਹਰਿਤੁਂ – ਯਤ੍ਥ ਅਲੋਣਕਂ ਭਵਿਸ੍ਸਤਿ ਤਤ੍ਥ ਪਰਿਭੁਞ੍ਜਿਸ੍ਸਾਮਾ’’ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ. [ਪਾਚਿ. ੨੫੪ ਆਦਯੋ] ‘‘ਕਤ੍ਥ ਪਟਿਕ੍ਖਿਤ੍ਤ’’ਨ੍ਤਿ? ‘‘ਸਾਵਤ੍ਥਿਯਂ, ਸੁਤ੍ਤਵਿਭਙ੍ਗੇ’’ਤਿ. ‘‘ਕਿਂ ਆਪਜ੍ਜਤੀ’’ਤਿ? ‘‘ਸਨ੍ਨਿਧਿਕਾਰਕਭੋਜਨੇ ਪਾਚਿਤ੍ਤਿਯ’’ਨ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਪਠਮਂ ਵਤ੍ਥੁ ਸਙ੍ਘੇਨ ਵਿਨਿਚ੍ਛਿਤਂ. ਇਤਿਪਿਦਂ ਵਤ੍ਥੁ ਉਦ੍ਧਮ੍ਮਂ, ਉਬ੍ਬਿਨਯਂ, ਅਪਗਤਸਤ੍ਥੁਸਾਸਨਂ. ਇਦਂ ਪਠਮਂ ਸਲਾਕਂ ਨਿਕ੍ਖਿਪਾਮਿ’’.

‘‘ਕਪ੍ਪਤਿ, ਭਨ੍ਤੇ, ਦ੍ਵਙ੍ਗੁਲਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਦ੍ਵਙ੍ਗੁਲਕਪ੍ਪੋ’’ਤਿ? ‘‘ਕਪ੍ਪਤਿ, ਭਨ੍ਤੇ, ਦ੍ਵਙ੍ਗੁਲਾਯ ਛਾਯਾਯ ਵੀਤਿਵਤ੍ਤਾਯ ਵਿਕਾਲੇ ਭੋਜਨਂ ਭੁਞ੍ਜਿਤੁ’’ਨ੍ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ [ਪਾਚਿ. ੨੪੫]. ‘‘ਕਤ੍ਥ ਪਟਿਕ੍ਖਿਤ੍ਤ’’ਨ੍ਤਿ? ‘‘ਰਾਜਗਹੇ, ਸੁਤ੍ਤਵਿਭਙ੍ਗੇ’’ਤਿ. ‘‘ਕਿਂ ਆਪਜ੍ਜਤੀ’’ਤਿ? ਵਿਕਾਲਭੋਜਨੇ ਪਾਚਿਤ੍ਤਿਯ’’ਨ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਦੁਤਿਯਂ ਵਤ੍ਥੁ ਸਙ੍ਘੇਨ ਵਿਨਿਚ੍ਛਿਤਂ. ਇਤਿਪਿਦਂ ਵਤ੍ਥੁ ਉਦ੍ਧਮ੍ਮਂ, ਉਬ੍ਬਿਨਯਂ, ਅਪਗਤਸਤ੍ਥੁਸਾਸਨਂ. ਇਦਂ ਦੁਤਿਯਂ ਸਲਾਕਂ ਨਿਕ੍ਖਿਪਾਮਿ’’.

‘‘ਕਪ੍ਪਤਿ, ਭਨ੍ਤੇ, ਗਾਮਨ੍ਤਰਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਗਾਮਨ੍ਤਰਕਪ੍ਪੋ’’ਤਿ? ‘‘ਕਪ੍ਪਤਿ, ਭਨ੍ਤੇ – ਇਦਾਨਿ ਗਾਮਨ੍ਤਰਂ ਗਮਿਸ੍ਸਾਮੀਤਿ – ਭੁਤ੍ਤਾਵਿਨਾ ਪਵਾਰਿਤੇਨ ਅਨਤਿਰਿਤ੍ਤਂ ਭੋਜਨਂ ਭੁਞ੍ਜਿਤੁ’’ਨ੍ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ [ਪਾਚਿ. ੨੩੪]. ‘‘ਕਤ੍ਥ ਪਟਿਕ੍ਖਿਤ੍ਤ’’ਨ੍ਤਿ? ‘‘ਸਾਵਤ੍ਥਿਯਂ, ਸੁਤ੍ਤਵਿਭਙ੍ਗੇ’’ਤਿ. ‘‘ਕਿਂ ਆਪਜ੍ਜਤੀ’’ਤਿ? ‘‘ਅਨਤਿਰਿਤ੍ਤਭੋਜਨੇ ਪਾਚਿਤ੍ਤਿਯ’’ਨ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਤਤਿਯਂ ਵਤ੍ਥੁ ਸਙ੍ਘੇਨ ਵਿਨਿਚ੍ਛਿਤਂ. ਇਤਿਪਿਦਂ ਵਤ੍ਥੁ ਉਦ੍ਧਮ੍ਮਂ, ਉਬ੍ਬਿਨਯਂ, ਅਪਗਤਸਤ੍ਥੁਸਾਸਨਂ. ਇਦਂ ਤਤਿਯਂ ਸਲਾਕਂ ਨਿਕ੍ਖਿਪਾਮਿ’’.

‘‘ਕਪ੍ਪਤਿ, ਭਨ੍ਤੇ, ਆਵਾਸਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਆਵਾਸਕਪ੍ਪੋ’’ਤਿ? ‘‘ਕਪ੍ਪਤਿ ਭਨ੍ਤੇ, ਸਮ੍ਬਹੁਲਾ ਆਵਾਸਾ ਸਮਾਨਸੀਮਾ ਨਾਨੁਪੋਸਥਂ ਕਾਤੁ’’ਨ੍ਤਿ. ‘‘ਨਾਵੁਸੋ, ਕਪ੍ਪਤੀ’’ਤਿ [ਮਹਾਵ. ੧੪੧ ਆਦਯੋ]. ‘‘ਕਤ੍ਥ ਪਟਿਕ੍ਖਿਤ੍ਤ’’ਨ੍ਤਿ? ‘‘ਰਾਜਗਹੇ, ਉਪੋਸਥਸਂਯੁਤ੍ਤੇ’’ਤਿ. ‘‘ਕਿਂ ਆਪਜ੍ਜਤੀ’’ਤਿ? ‘‘ਵਿਨਯਾਤਿਸਾਰੇ ਦੁਕ੍ਕਟ’’ਨ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਚਤੁਤ੍ਥਂ ਵਤ੍ਥੁ ਸਙ੍ਘੇਨ ਵਿਨਿਚ੍ਛਿਤਂ. ਇਤਿਪਿਦਂ ਵਤ੍ਥੁ ਉਦ੍ਧਮ੍ਮਂ, ਉਬ੍ਬਿਨਯਂ, ਅਪਗਤਸਤ੍ਥੁਸਾਸਨਂ. ਇਦਂ ਚਤੁਤ੍ਥਂ ਸਲਾਕਂ ਨਿਕ੍ਖਿਪਾਮਿ’’.

‘‘ਕਪ੍ਪਤਿ, ਭਨ੍ਤੇ, ਅਨੁਮਤਿਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਅਨੁਮਤਿਕਪ੍ਪੋ’’ਤਿ? ‘‘ਕਪ੍ਪਤਿ, ਭਨ੍ਤੇ, ਵਗ੍ਗੇਨ ਸਙ੍ਘੇਨ ਕਮ੍ਮਂ ਕਾਤੁਂ – ਆਗਤੇ ਭਿਕ੍ਖੂ ਅਨੁਮਾਨੇਸ੍ਸਾਮਾ’’ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ [ਮਹਾਵ. ੩੮੩ ਆਦਯੋ]. ‘‘ਕਤ੍ਥ ਪਟਿਕ੍ਖਿਤ੍ਤ’’ਨ੍ਤਿ? ‘‘ਚਮ੍ਪੇਯ੍ਯਕੇ, ਵਿਨਯਵਤ੍ਥੁਸ੍ਮਿ’’ਨ੍ਤਿ. ‘‘ਕਿਂ ਆਪਜ੍ਜਤੀ’’ਤਿ? ‘‘ਵਿਨਯਾਤਿਸਾਰੇ ਦੁਕ੍ਕਟ’’ਨ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਪਞ੍ਚਮਂ ਵਤ੍ਥੁ ਸਙ੍ਘੇਨ ਵਿਨਿਚ੍ਛਿਤਂ. ਇਤਿਪਿਦਂ ਵਤ੍ਥੁ ਉਦ੍ਧਮ੍ਮਂ, ਉਬ੍ਬਿਨਯਂ, ਅਪਗਤਸਤ੍ਥੁਸਾਸਨਂ. ਇਦਂ ਪਞ੍ਚਮਂ ਸਲਾਕਂ ਨਿਕ੍ਖਿਪਾਮਿ’’.

‘‘ਕਪ੍ਪਤਿ, ਭਨ੍ਤੇ, ਆਚਿਣ੍ਣਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਆਚਿਣ੍ਣਕਪ੍ਪੋ’’ਤਿ? ‘‘ਕਪ੍ਪਤਿ, ਭਨ੍ਤੇ – ਇਦਂ ਮੇ ਉਪਜ੍ਝਾਯੇਨ ਅਜ੍ਝਾਚਿਣ੍ਣਂ, ਇਦਂ ਮੇ ਆਚਰਿਯੇਨ ਅਜ੍ਝਾਚਿਣ੍ਣਂ – ਤਂ ਅਜ੍ਝਾਚਰਿਤੁ’’ਨ੍ਤਿ? ‘‘ਆਚਿਣ੍ਣਕਪ੍ਪੋ ਖੋ, ਆਵੁਸੋ, ਏਕਚ੍ਚੋ ਕਪ੍ਪਤਿ, ਏਕਚ੍ਚੋ ਨ ਕਪ੍ਪਤੀ’’ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਛਟ੍ਠਂ ਵਤ੍ਥੁ ਸਙ੍ਘੇਨ ਵਿਨਿਚ੍ਛਿਤਂ. ਇਤਿਪਿਦਂ ਵਤ੍ਥੁ ਉਦ੍ਧਮ੍ਮਂ, ਉਬ੍ਬਿਨਯਂ, ਅਪਗਤਸਤ੍ਥੁਸਾਸਨਂ. ਇਦਂ ਛਟ੍ਠਂ ਸਲਾਕਂ ਨਿਕ੍ਖਿਪਾਮਿ’’.

‘‘ਕਪ੍ਪਤਿ, ਭਨ੍ਤੇ, ਅਮਥਿਤਕਪ੍ਪੋ’’ਤਿ? ‘‘ਕੋ ਸੋ, ਆਵੁਸੋ, ਅਮਥਿਤਕਪ੍ਪੋ’’ਤਿ? ‘‘ਕਪ੍ਪਤਿ, ਭਨ੍ਤੇ, ਯਂ ਤਂ ਖੀਰਂ ਖੀਰਭਾਵਂ ਵਿਜਹਿਤਂ, ਅਸਮ੍ਪਤ੍ਤਂ ਦਧਿਭਾਵਂ, ਤਂ ਭੁਤ੍ਤਾਵਿਨਾ ਪਵਾਰਿਤੇਨ ਅਨਤਿਰਿਤ੍ਤਂ ਪਾਤੁ’’ਨ੍ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ [ਪਾਚਿ. ੨੩੪]. ‘‘ਕਤ੍ਥ ਪਟਿਕ੍ਖਿਤ੍ਤ’’ਨ੍ਤਿ? ‘‘ਸਾਵਤ੍ਥਿਯਂ, ਸੁਤ੍ਤਵਿਭਙ੍ਗੇ’’ਤਿ. ‘‘ਕਿਂ ਆਪਜ੍ਜਤੀ’’ਤਿ? ‘‘ਅਨਤਿਰਿਤ੍ਤਭੋਜਨੇ ਪਾਚਿਤ੍ਤਿਯ’’ਨ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਸਤ੍ਤਮਂ ਵਤ੍ਥੁ ਸਙ੍ਘੇਨ ਵਿਨਿਚ੍ਛਿਤਂ. ਇਤਿਪਿਦਂ ਵਤ੍ਥੁ ਉਦ੍ਧਮ੍ਮਂ, ਉਬ੍ਬਿਨਯਂ, ਅਪਗਤਸਤ੍ਥੁਸਾਸਨਂ. ਇਦਂ ਸਤ੍ਤਮਂ ਸਲਾਕਂ ਨਿਕ੍ਖਿਪਾਮਿ’’.

‘‘ਕਪ੍ਪਤਿ, ਭਨ੍ਤੇ, ਜਲ਼ੋਗਿਂ ਪਾਤੁ’’ਨ੍ਤਿ? ‘‘ਕਾ ਸਾ, ਆਵੁਸੋ, ਜਲ਼ੋਗੀ’’ਤਿ? ‘‘ਕਪ੍ਪਤਿ, ਭਨ੍ਤੇ, ਯਾ ਸਾ ਸੁਰਾ ਆਸੁਤਾ ਅਸਮ੍ਪਤ੍ਤਾ ਮਜ੍ਜਭਾਵਂ, ਸਾ ਪਾਤੁ’’ਨ੍ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ [ਪਾਚਿ. ੩੨੬]. ‘‘ਕਤ੍ਥ ਪਟਿਕ੍ਖਿਤ੍ਤ’’ਨ੍ਤਿ? ‘‘ਕੋਸਮ੍ਬਿਯਂ, ਸੁਤ੍ਤਵਿਭਙ੍ਗੇ’’ਤਿ. ‘‘ਕਿਂ ਆਪਜ੍ਜਤੀ’’ਤਿ. ‘‘ਸੁਰਾਮੇਰਯਪਾਨੇ ਪਾਚਿਤ੍ਤਿਯ’’ਨ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਅਟ੍ਠਮਂ ਵਤ੍ਥੁ ਸਙ੍ਘੇਨ ਵਿਨਿਚ੍ਛਿਤਂ. ਇਤਿਪਿਦਂ ਵਤ੍ਥੁ ਉਦ੍ਧਮ੍ਮਂ, ਉਬ੍ਬਿਨਯਂ, ਅਪਗਤਸਤ੍ਥੁਸਾਸਨਂ. ਇਦਂ ਅਟ੍ਠਮਂ ਸਲਾਕਂ ਨਿਕ੍ਖਿਪਾਮਿ’’.

‘‘ਕਪ੍ਪਤਿ, ਭਨ੍ਤੇ, ਅਦਸਕਂ ਨਿਸੀਦਨ’’ਨ੍ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ [ਪਾਚਿ. ੫੩੧ ਆਦਯੋ]. ‘‘ਕਤ੍ਥ ਪਟਿਕ੍ਖਿਤ੍ਤ’’ਨ੍ਤਿ? ‘‘ਸਾਵਤ੍ਥਿਯਂ, ਸੁਤ੍ਤਵਿਭਙ੍ਗੇ’’ਤਿ. ‘‘ਕਿਂ ਆਪਜ੍ਜਤੀ’’ਤਿ? ‘‘ਛੇਦਨਕੇ ਪਾਚਿਤ੍ਤਿਯ’’ਨ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਨਵਮਂ ਵਤ੍ਥੁ ਸਙ੍ਘੇਨ ਵਿਨਿਚ੍ਛਿਤਂ. ਇਤਿਪਿਦਂ ਵਤ੍ਥੁ ਉਦ੍ਧਮ੍ਮਂ, ਉਬ੍ਬਿਨਯਂ, ਅਪਗਤਸਤ੍ਥੁਸਾਸਨਂ. ਇਦਂ ਨਵਮਂ ਸਲਾਕਂ ਨਿਕ੍ਖਿਪਾਮਿ’’.

‘‘ਕਪ੍ਪਤਿ, ਭਨ੍ਤੇ, ਜਾਤਰੂਪਰਜਤ’’ਨ੍ਤਿ? ‘‘ਨਾਵੁਸੋ, ਕਪ੍ਪਤੀ’’ਤਿ [ਪਾਰਾ. ੫੮੦ ਆਦਯੋ]. ‘‘ਕਤ੍ਥ ਪਟਿਕ੍ਖਿਤ੍ਤ’’ਨ੍ਤਿ. ‘‘ਰਾਜਗਹੇ, ਸੁਤ੍ਤਵਿਭਙ੍ਗੇ’’ਤਿ. ‘‘ਕਿਂ ਆਪਜ੍ਜਤੀ’’ਤਿ? ‘‘ਜਾਤਰੂਪਰਜਤਪਟਿਗ੍ਗਹਣੇ ਪਾਚਿਤ੍ਤਿਯ’’ਨ੍ਤਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਦਂ ਦਸਮਂ ਵਤ੍ਥੁ ਸਙ੍ਘੇਨ ਵਿਨਿਚ੍ਛਿਤਂ. ਇਤਿਪਿਦਂ ਵਤ੍ਥੁ ਉਦ੍ਧਮ੍ਮਂ, ਉਬ੍ਬਿਨਯਂ, ਅਪਗਤਸਤ੍ਥੁਸਾਸਨਂ. ਇਦਂ ਦਸਮਂ ਸਲਾਕਂ ਨਿਕ੍ਖਿਪਾਮਿ.

‘‘ਸੁਣਾਤੁ ਮੇ, ਭਨ੍ਤੇ, ਸਙ੍ਘੋ. ਇਮਾਨਿ ਦਸ ਵਤ੍ਥੂਨਿ ਸਙ੍ਘੇਨ ਵਿਨਿਚ੍ਛਿਤਾਨਿ. ਇਤਿਪਿਮਾਨਿ ਦਸਵਤ੍ਥੂਨਿ ਉਦ੍ਧਮ੍ਮਾਨਿ, ਉਬ੍ਬਿਨਯਾਨਿ, ਅਪਗਤਸਤ੍ਥੁਸਾਸਨਾਨੀ’’ਤਿ.

੪੫੮. ‘‘ਨਿਹਤਮੇਤਂ, ਆਵੁਸੋ, ਅਧਿਕਰਣਂ, ਸਨ੍ਤਂ ਵੂਪਸਨ੍ਤਂ ਸੁਵੂਪਸਨ੍ਤਂ. ਅਪਿ ਚ ਮਂ ਤ੍ਵਂ, ਆਵੁਸੋ, ਸਙ੍ਘਮਜ੍ਝੇਪਿ ਇਮਾਨਿ ਦਸ ਵਤ੍ਥੂਨਿ ਪੁਚ੍ਛੇਯ੍ਯਾਸਿ – ਤੇਸਂ ਭਿਕ੍ਖੂਨਂ ਸਞ੍ਞਤ੍ਤਿਯਾ’’ਤਿ. ਅਥ ਖੋ ਆਯਸ੍ਮਾ ਰੇਵਤੋ ਆਯਸ੍ਮਨ੍ਤਂ ਸਬ੍ਬਕਾਮਿਂ ਸਙ੍ਘਮਜ੍ਝੇਪਿ ਇਮਾਨਿ ਦਸ ਵਤ੍ਥੂਨਿ ਪੁਚ੍ਛਿ. ਪੁਟ੍ਠੋ ਪੁਟ੍ਠੋ ਆਯਸ੍ਮਾ ਸਬ੍ਬਕਾਮੀ ਵਿਸ੍ਸਜ੍ਜੇਸਿ. ਇਮਾਯ ਖੋ ਪਨ ਵਿਨਯਸਙ੍ਗੀਤਿਯਾ ਸਤ੍ਤ ਭਿਕ੍ਖੁਸਤਾਨਿ ਅਨੂਨਾਨਿ ਅਨਧਿਕਾਨਿ ਅਹੇਸੁਂ, ਤਸ੍ਮਾਯਂ ਵਿਨਯਸਙ੍ਗੀਤਿ ‘‘ਸਤ੍ਤਸਤਿਕਾ’’ਤਿ ਵੁਚ੍ਚਤੀਤਿ.

ਦੁਤਿਯਭਾਣਵਾਰੋ ਨਿਟ੍ਠਿਤੋ.

ਸਤ੍ਤਸਤਿਕਕ੍ਖਨ੍ਧਕੋ ਦ੍ਵਾਦਸਮੋ.

ਇਮਮ੍ਹਿ ਖਨ੍ਧਕੇ ਵਤ੍ਥੂ ਪਞ੍ਚਵੀਸਤਿ.

ਤਸ੍ਸੁਦ੍ਦਾਨਂ –

ਦਸ ਵਤ੍ਥੂਨਿ ਪੂਰੇਤ੍ਵਾ, ਕਮ੍ਮਂ ਦੂਤੇਨ ਪਾਵਿਸਿ;

ਚਤ੍ਤਾਰੋ ਪੁਨ ਰੂਪਞ੍ਚ, ਕੋਸਮ੍ਬਿ ਚ ਪਾਵੇਯ੍ਯਕੋ.

ਮਗ੍ਗੋ ਸੋਰੇਯ੍ਯਂ ਸਙ੍ਕਸ੍ਸਂ, ਕਣ੍ਣਕੁਜ੍ਜਂ ਉਦੁਮ੍ਬਰਂ;

ਸਹਜਾਤਿ ਚ ਮਜ੍ਝੇਸਿ, ਅਸ੍ਸੋਸਿ ਕਂ ਨੁ ਖੋ ਮਯਂ.

ਪਤ੍ਤਨਾਵਾਯ ਉਜ੍ਜਵਿ, ਰਹੋਸਿ ਉਪਨਾਮਯਂ [ਦੂਰਤੋਪਿ ਉਦਪਾਦਿ (ਕ.)];

ਗਰੁ [ਦਾਰੁਣਂ (ਸ੍ਯਾ.)] ਸਙ੍ਘੋ ਚ ਵੇਸਾਲਿਂ, ਮੇਤ੍ਤਾ ਸਙ੍ਘੋ ਉਬ੍ਬਾਹਿਕਾਤਿ.

ਸਤ੍ਤਸਤਿਕਕ੍ਖਨ੍ਧਕੋ ਨਿਟ੍ਠਿਤੋ.