੨. ਸਙ੍ਘਾਦਿਸੇਸਕਣ੍ਡਂ (ਭਿਕ੍ਖੁਨੀਵਿਭਙ੍ਗਵਣ੍ਣਨਾ)

੧. ਪਠਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੭੯. ਸਙ੍ਘਾਦਿਸੇਸਕਣ੍ਡਸ੍ਸ ਪਠਮਸਿਕ੍ਖਾਪਦੇ ਦ੍ਵੀਸੁ ਜਨੇਸੂਤਿ ਅਡ੍ਡਕਾਰਕੇਸੁ ਦ੍ਵੀਸੁ ਜਨੇਸੁ. ਯੋ ਕੋਚੀਤਿ ਤੇਸੁਯੇਵ ਦ੍ਵੀਸੁ ਯੋ ਕੋਚਿ, ਅਞ੍ਞੋ ਵਾ ਤੇਹਿ ਆਣਤ੍ਤੋ. ਦੁਤਿਯਸ੍ਸ ਆਰੋਚੇਤੀਤਿ ਏਤ੍ਥਾਪਿ ਦ੍ਵੀਸੁ ਜਨੇਸੁ ਯਸ੍ਸ ਕਸ੍ਸਚਿ ਦੁਤਿਯਸ੍ਸ ਕਥਂ ਯੋ ਕੋਚਿ ਆਰੋਚੇਤੀਤਿ ਏਵਮਤ੍ਥੋ ਗਹੇਤਬ੍ਬੋਤਿ ਆਹ ‘‘ਦੁਤਿਯਸ੍ਸ ਆਰੋਚੇਤੀਤਿ ਏਤ੍ਥਾਪਿ ਏਸੇਵ ਨਯੋ’’ਤਿ. ਗਤਿਗਤਨ੍ਤਿ ਚਿਰਕਾਲਪਵਤ੍ਤਂ.

ਆਪਤ੍ਤੀਤਿ ਆਪਜ੍ਜਨਂ. ਸਹ ਵਤ੍ਥੁਜ੍ਝਾਚਾਰਾਤਿ ਵਤ੍ਥੁਵੀਤਿਕ੍ਕਮੇਨ ਸਹ. ਸਹਯੋਗੇ ਕਰਣਵਚਨਪ੍ਪਸਙ੍ਗੇ ਇਦਂ ਨਿਸ੍ਸਕ੍ਕਵਚਨਂ. ਯਨ੍ਤਿ ਯਂ ਧਮ੍ਮਂ. ਨਿਸ੍ਸਾਰੇਤੀਤਿ ਆਪਨ੍ਨਂ ਭਿਕ੍ਖੁਨਿਸਙ੍ਘਮ੍ਹਾ ਨਿਸ੍ਸਾਰੇਤਿ. ਹੇਤੁਮ੍ਹਿ ਚਾਯਂ ਕਤ੍ਤੁਵੋਹਾਰੋ. ਨਿਸ੍ਸਾਰਣਹੇਤੁਭੂਤੋ ਹਿ ਧਮ੍ਮੋ ਨਿਸ੍ਸਾਰਣੀਯੋਤਿ ਵੁਤ੍ਤੋ. ਗੀਵਾਯੇਵ ਹੋਤਿ, ਨ ਪਾਰਾਜਿਕਂ ਅਨਾਣਤ੍ਤਿਯਾ ਗਹਿਤਤ੍ਤਾ. ਯਥਾ ਦਾਸਦਾਸੀਵਾਪੀਆਦੀਨਿ ਸਮ੍ਪਟਿਚ੍ਛਿਤੁਂ ਨ ਵਟ੍ਟਤਿ, ਏਵਂ ਤੇਸਂ ਅਤ੍ਥਾਯ ਅਡ੍ਡਕਰਣਮ੍ਪਿ ਨ ਵਟ੍ਟਤੀਤਿ ਆਹ ‘‘ਅਯਂ ਅਕਪ੍ਪਿਯਅਡ੍ਡੋ ਨਾਮ, ਨ ਵਟ੍ਟਤੀ’’ਤਿ.

ਏਤ੍ਥ ਚ ਸਚੇ ਅਧਿਕਰਣਟ੍ਠਾਨਂ ਗਨ੍ਤ੍ਵਾ ‘‘ਅਮ੍ਹਾਕਂ ਏਸੋ ਦਾਸੋ, ਦਾਸੀ, ਵਾਪੀ, ਖੇਤ੍ਤਂ, ਆਰਾਮੋ, ਆਰਾਮਵਤ੍ਥੁ, ਗਾਵੋ, ਅਜਾ, ਕੁਕ੍ਕੁਟਾ’’ਤਿਆਦਿਨਾ ਵੋਹਰਤਿ, ਅਕਪ੍ਪਿਯਂ. ‘‘ਅਯਂ ਅਮ੍ਹਾਕਂ ਆਰਾਮਿਕੋ, ਅਯਂ ਵਾਪੀ ਇਤ੍ਥਨ੍ਨਾਮੇਨ ਸਙ੍ਘਸ੍ਸ ਭਣ੍ਡਧੋਵਨਤ੍ਥਾਯ ਦਿਨ੍ਨਾ, ਇਤੋ ਖੇਤ੍ਤਤੋ ਆਰਾਮਤੋ ਉਪ੍ਪਜ੍ਜਨਕਚਤੁਪਚ੍ਚਯਾ ਇਤੋ ਗਾਵਿਤੋ ਮਹਿਂਸਿਤੋ ਅਜਾਤੋ ਉਪ੍ਪਜ੍ਜਨਕਗੋਰਸਾ ਇਤ੍ਥਨ੍ਨਾਮੇਨ ਸਙ੍ਘਸ੍ਸ ਦਿਨ੍ਨਾਤਿ ਪੁਚ੍ਛਿਤੇ ਵਾ ਅਪੁਚ੍ਛਿਤੇ ਵਾ ਵਤ੍ਤੁਂ ਵਟ੍ਟਤੀ’’ਤਿ ਵਦਨ੍ਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਅਨਾਕਡ੍ਢਿਤਾਯ ਅਡ੍ਡਕਰਣਂ, ਅਡ੍ਡਪਰਿਯੋਸਾਨਨ੍ਤਿ ਇਮਾਨਿ ਪਨੇਤ੍ਥ ਦ੍ਵੇ ਅਙ੍ਗਾਨਿ.

ਪਠਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੮੩. ਦੁਤਿਯੇ ਮਲ੍ਲਗਣਭਟਿਪੁਤ੍ਤਗਣਾਦਿਕਨ੍ਤਿਆਦੀਸੁ ਮਲ੍ਲਗਣੋ ਨਾਮ ਨਾਰਾਯਨਭਤ੍ਤਿਕੋ ਤਤ੍ਥ ਤਤ੍ਥ ਪਾਨੀਯਟ੍ਠਪਨਪੋਕ੍ਖਰਣੀਖਣਨਾਦਿਪੁਞ੍ਞਕਮ੍ਮਕਾਰਕੋ ਗਣੋ, ਭਟਿਪੁਤ੍ਤਗਣੋ ਨਾਮ ਕੁਮਾਰਭਤ੍ਤਿਕਗਣੋ. ਧਮ੍ਮਗਣੋਤਿ ਸਾਸਨਭਤ੍ਤਿਗਣੋ ਅਨੇਕਪ੍ਪਕਾਰਪੁਞ੍ਞਕਮ੍ਮਕਾਰਕਗਣੋ ਵੁਚ੍ਚਤਿ. ਗਨ੍ਧਿਕਸੇਣੀਤਿ ਅਨੇਕਪ੍ਪਕਾਰਸੁਗਨ੍ਧਿਵਿਕਤਿਕਾਰਕੋ ਗਣੋ. ਦੁਸ੍ਸਿਕਸੇਣੀਤਿ ਪੇਸਕਾਰਕਗਣੋ. ਕਪ੍ਪਗਤਿਕਨ੍ਤਿ ਕਪ੍ਪਿਯਭਾਵਂ ਗਤਂ.

ਵੁਟ੍ਠਾਪੇਨ੍ਤਿਯਾਤਿ ਉਪਸਮ੍ਪਾਦੇਨ੍ਤਿਯਾ. ‘‘ਚੋਰਿਂ ਵੁਤ੍ਤਨਯੇਨ ਅਨਾਪੁਚ੍ਛਾ ਪਬ੍ਬਾਜੇਨ੍ਤਿਯਾ ਦੁਕ੍ਕਟ’’ਨ੍ਤਿ ਵਦਨ੍ਤਿ. ਪਣ੍ਣਤ੍ਤਿਂ ਅਜਾਨਨ੍ਤਾ ਅਰਿਯਾਪਿ ਵੁਟ੍ਠਾਪੇਨ੍ਤੀਤਿ ਵਾ ਕਮ੍ਮਵਾਚਾਪਰਿਯੋਸਾਨੇ ਆਪਤ੍ਤਿਕ੍ਖਣੇ ਵਿਪਾਕਾਬ੍ਯਾਕਤਸਮਙ੍ਗਿਤਾਵਸੇਨ ਵਾ ‘‘ਤਿਚਿਤ੍ਤ’’ਨ੍ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਸੇਸਮੇਤ੍ਥ ਉਤ੍ਤਾਨਮੇਵ. ਚੋਰਿਤਾ, ਚੋਰਿਸਞ੍ਞਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਵੁਟ੍ਠਾਪਨਨ੍ਤਿ ਇਮਾਨਿ ਪਨੇਤ੍ਥ ਤੀਣਿ ਅਙ੍ਗਾਨਿ.

ਦੁਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੩. ਤਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੯੨. ਤਤਿਯੇ ਪਰਿਕ੍ਖੇਪਂ ਅਤਿਕ੍ਕਾਮੇਨ੍ਤਿਯਾਤਿ ਸਕਗਾਮਤੋ ਅਞ੍ਞਸ੍ਸ ਗਾਮਸ੍ਸ ਪਰਿਕ੍ਖੇਪਂ ਅਤਿਕ੍ਕਾਮੇਨ੍ਤਿਯਾ. ‘‘ਗਾਮਨ੍ਤਰਂ ਗਚ੍ਛੇਯ੍ਯਾ’’ਤਿ ਹਿ ਵਚਨਤੋ ਅਞ੍ਞਸ੍ਸ ਗਾਮਸ੍ਸ ਪਰਿਕ੍ਖੇਪਂ ਅਤਿਕ੍ਕਾਮੇਨ੍ਤਿਯਾ ਏਵ ਆਪਤ੍ਤਿ, ਨ ਸਕਗਾਮਸ੍ਸ. ਅਞ੍ਞੋ ਹਿ ਗਾਮੋ ਗਾਮਨ੍ਤਰਂ. ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰਨ੍ਤਿ ਏਤ੍ਥ ਉਪਚਾਰ-ਸਦ੍ਦੇਨ ਘਰੂਪਚਾਰਤੋ ਪਠਮਲੇਡ੍ਡੁਪਾਤਸਙ੍ਖਾਤਂ ਪਰਿਕ੍ਖੇਪਾਰਹਟ੍ਠਾਨਂ ਗਹਿਤਂ, ਨ ਤਤੋ ਦੁਤਿਯਲੇਡ੍ਡੁਪਾਤਸਙ੍ਖਾਤੋ ਉਪਚਾਰੋਤਿ ਆਹ ‘‘ਪਰਿਕ੍ਖੇਪਾਰਹਟ੍ਠਾਨ’’ਨ੍ਤਿ. ਤੇਨੇਵ ਪਾਲ਼ਿਯਂ ‘‘ਉਪਚਾਰਂ ਅਤਿਕ੍ਕਾਮੇਨ੍ਤਿਯਾ’’ਤਿ ਵੁਤ੍ਤਂ. ਅਞ੍ਞਥਾ ਯਥਾ ਵਿਕਾਲਗਾਮਪ੍ਪਵਿਸਨਸਿਕ੍ਖਾਪਦੇ ‘‘ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪਂ ਅਤਿਕ੍ਕਮਨ੍ਤਸ੍ਸ, ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰਂ ਓਕ੍ਕਮਨ੍ਤਸ੍ਸਾ’’ਤਿ (ਪਾਚਿ. ੫੧੩) ਵੁਤ੍ਤਂ, ਏਵਮਿਧਾਪਿ ‘‘ਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਪਰਿਕ੍ਖੇਪਂ ਅਤਿਕ੍ਕਾਮੇਨ੍ਤਿਯਾ ਅਪਰਿਕ੍ਖਿਤ੍ਤਸ੍ਸ ਗਾਮਸ੍ਸ ਉਪਚਾਰਂ ਓਕ੍ਕਮਨ੍ਤਿਯਾ’’ਤਿ ਵਦੇਯ੍ਯ. ਸਙ੍ਖੇਪਤੋ ਵੁਤ੍ਤਮਤ੍ਥਂ ਵਿਭਜਿਤ੍ਵਾ ਦਸ੍ਸੇਨ੍ਤੋ ‘‘ਅਪਿਚੇਤ੍ਥਾ’’ਤਿਆਦਿਮਾਹ. ਵਿਹਾਰਸ੍ਸ ਚਤੁਗਾਮਸਾਧਾਰਣਤ੍ਤਾਤਿ ਇਮਿਨਾ ‘‘ਵਿਹਾਰਤੋ ਏਕਂ ਗਾਮਂ ਗਨ੍ਤੁਂ ਵਟ੍ਟਤੀ’’ਤਿ ਏਤ੍ਥ ਕਾਰਣਮਾਹ. ਵਿਹਾਰਸ੍ਸ ਚਤੁਗਾਮਸਾਧਾਰਣਤ੍ਤਾਯੇਵ ਹਿ ਚਤੂਸੁ ਗਾਮੇਸੁ ਯਂਕਿਞ੍ਚਿ ਏਕਂ ਗਾਮਂ ਗਨ੍ਤੁਂ ਵਟ੍ਟਤਿ.

ਯਤ੍ਥਾਤਿ ਯਸ੍ਸਂ ਨਦਿਯਂ. ‘‘ਪਠਮਂ ਪਾਦਂ ਉਤ੍ਤਾਰੇਨ੍ਤਿਯਾ ਆਪਤ੍ਤਿ ਥੁਲ੍ਲਚ੍ਚਯਸ੍ਸ, ਦੁਤਿਯਂ ਪਾਦਂ ਉਤ੍ਤਾਰੇਨ੍ਤਿਯਾ ਆਪਤ੍ਤਿ ਸਙ੍ਘਾਦਿਸੇਸਸ੍ਸਾ’’ਤਿ ਵਚਨਤੋ ਨਦਿਂ ਓਤਰਿਤ੍ਵਾ ਪਦਸਾ ਉਤ੍ਤਰਨ੍ਤਿਯਾ ਏਵ ਆਪਤ੍ਤੀਤਿ ਆਹ ‘‘ਸੇਤੁਨਾ ਗਚ੍ਛਤਿ, ਅਨਾਪਤ੍ਤੀ’’ਤਿਆਦਿ. ਪਰਤੀਰਮੇਵ ਅਕ੍ਕਮਨ੍ਤਿਯਾ ਅਨਾਪਤ੍ਤੀਤਿ ਨਦਿਂ ਅਨੋਤਰਿਤ੍ਵਾ ਯਾਨਨਾਵਾਦੀਸੁ ਅਞ੍ਞਤਰੇਨ ਗਨ੍ਤ੍ਵਾ ਪਰਤੀਰਮੇਵ ਅਕ੍ਕਮਨ੍ਤਿਯਾ ਅਨਾਪਤ੍ਤਿ. ਉਭਯਤੀਰੇਸੁ ਵਿਚਰਨ੍ਤਿ, ਵਟ੍ਟਤੀਤਿ ਇਦਂ ਅਸਤਿਪਿ ਨਦੀਪਾਰਗਮਨੇ ਉਪਰਿ ਵਕ੍ਖਮਾਨਸ੍ਸ ਵਿਨਿਚ੍ਛਯਸ੍ਸ ਫਲਮਤ੍ਤਦਸ੍ਸਨਤ੍ਥਂ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਓਰਿਮਤੀਰਮੇਵ ਆਗਚ੍ਛਤਿ, ਆਪਤ੍ਤੀਤਿ ਪਰਤੀਰਂ ਗਨ੍ਤੁਕਾਮਤਾਯ ਓਤਿਣ੍ਣਤ੍ਤਾ ਵੁਤ੍ਤਂ. ਤਮੇਵ ਤੀਰਨ੍ਤਿ ਤਮੇਵ ਓਰਿਮਤੀਰਂ. ਅਨਾਪਤ੍ਤੀਤਿ ਪਰਤੀਰਂ ਗਨ੍ਤੁਕਾਮਤਾਯ ਅਭਾਵਤੋ ਅਨਾਪਤ੍ਤਿ.

ਤਾਦਿਸੇ ਅਰਞ੍ਞੇਤਿ ‘‘ਬਹਿਇਨ੍ਦਖੀਲਾ ਸਬ੍ਬਮੇਤਂ ਅਰਞ੍ਞ’’ਨ੍ਤਿ (ਵਿਭ. ੫੨੯) ਏਵਂ ਵੁਤ੍ਤਲਕ੍ਖਣੇ ਅਰਞ੍ਞੇ. ਅਥ ਤਾਦਿਸਸ੍ਸੇਵ ਅਰਞ੍ਞਸ੍ਸ ਗਹਿਤਭਾਵੋ ਕਥਂ ਵਿਞ੍ਞਾਯਤੀਤਿ ਆਹ ‘‘ਤੇਨੇਵਾ’’ਤਿਆਦਿ. ਇਮਿਨਾ ਹਿ ਅਟ੍ਠਕਥਾਵਚਨੇਨ ਈਦਿਸੇਪਿ ਗਾਮਸਮੀਪੇ ਦਸ੍ਸਨੂਪਚਾਰੇ ਵਿਜਹਿਤੇ ਸਤਿਪਿ ਸਵਨੂਪਚਾਰੇ ਆਪਤ੍ਤਿ ਹੋਤੀਤਿ ਵਿਞ੍ਞਾਯਤਿ. ਮਗ੍ਗਮੂਲ਼੍ਹਾ ਉਚ੍ਚਾਸਦ੍ਦਂ ਕਰੋਨ੍ਤੀਤਿ ਆਹ ‘‘ਮਗ੍ਗਮੂਲ਼੍ਹਸਦ੍ਦੇਨ ਵਿਯਾ’’ਤਿ. ਸਦ੍ਦਾਯਨ੍ਤਿਯਾਤਿ ਸਦ੍ਦਂ ਕਰੋਨ੍ਤਿਯਾ. ਪੁਰਿਮਾਯੋਤਿ ਪੁਰੇਤਰਂ ਗਚ੍ਛਨ੍ਤਿਯੋ. ਅਞ੍ਞਂ ਮਗ੍ਗਂ ਗਣ੍ਹਾਤੀਤਿ ਮਗ੍ਗਮੂਲ਼੍ਹਤ੍ਤਾ, ਨ ਓਹਾਤੁਂ, ਤਸ੍ਮਾ ਦ੍ਵਿਨ੍ਨਮ੍ਪਿ ਅਨਾਪਤ੍ਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਅਨਨ੍ਤਰਾਯੇਨ ਏਕਭਾਵੋ, ਗਾਮਨ੍ਤਰਗਮਨਾਦੀਸੁ ਅਞ੍ਞਤਰਤਾਪਜ੍ਜਨਂ, ਆਪਦਾਯ ਅਭਾਵੋਤਿ ਇਮਾਨਿ ਪਨੇਤ੍ਥ ਤੀਣਿ ਅਙ੍ਗਾਨਿ.

ਤਤਿਯਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੪. ਚਤੁਤ੍ਥਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੬੯੪. ਚਤੁਤ੍ਥੇ ਕਾਰਕਗਣਸ੍ਸਾਤਿ ਉਕ੍ਖੇਪਨੀਯਕਮ੍ਮਕਾਰਕਗਣਸ੍ਸ. ਤੇਚਤ੍ਤਾਲੀਸਪ੍ਪਭੇਦਂ ਵਤ੍ਤਂ ਖਨ੍ਧਕੇ ਆਵਿ ਭਵਿਸ੍ਸਤਿ. ਨੇਤ੍ਥਾਰਵਤ੍ਤੇਤਿ ਨਿਤ੍ਥਰਣਹੇਤੁਮ੍ਹਿ ਵਤ੍ਤੇ. ਸੇਸਂ ਉਤ੍ਤਾਨਮੇਵ. ਧਮ੍ਮੇਨ ਕਮ੍ਮੇਨ ਉਕ੍ਖਿਤ੍ਤਤਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਓਸਾਰਣਨ੍ਤਿ ਇਮਾਨਿ ਪਨੇਤ੍ਥ ਦ੍ਵੇ ਅਙ੍ਗਾਨਿ.

ਚਤੁਤ੍ਥਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੫. ਪਞ੍ਚਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੦੧. ਪਞ੍ਚਮੇ ਏਤਂ ਨ ਵੁਤ੍ਤਨ੍ਤਿ ‘‘ਭਿਕ੍ਖੁਨਿਯਾ ਅਵਸ੍ਸੁਤਭਾਵੋ ਦਟ੍ਠਬ੍ਬੋ’’ਤਿ ਏਤਂ ਨਿਯਮਨਂ ਨ ਵੁਤ੍ਤਂ. ਤਨ੍ਤਿ ਤਂ ਨਿਯਮੇਤ੍ਵਾ ਅਵਚਨਂ. ਪਾਲ਼ਿਯਾ ਸਮੇਤੀਤਿ ‘‘ਏਕਤੋ ਅਵਸ੍ਸੁਤੇ’’ਤਿ ਅਵਿਸੇਸੇਤ੍ਵਾ ਵੁਤ੍ਤਪਾਲ਼ਿਯਾ ‘‘ਅਨਵਸ੍ਸੁਤੋਤਿ ਜਾਨਨ੍ਤੀ ਪਟਿਗ੍ਗਣ੍ਹਾਤੀ’’ਤਿ ਇਮਾਯ ਚ ਪਾਲ਼ਿਯਾ ਸਮੇਤਿ. ਯਦਿ ਹਿ ਪੁਗ੍ਗਲਸ੍ਸ ਅਵਸ੍ਸੁਤਭਾਵੋ ਨਪ੍ਪਮਾਣਂ, ਕਿਂ ‘‘ਅਨਵਸ੍ਸੁਤੋਤਿ ਜਾਨਨ੍ਤੀ’’ਤਿ ਇਮਿਨਾ ਵਚਨੇਨ, ‘‘ਅਨਾਪਤ੍ਤਿ ਉਭਤੋਅਨਵਸ੍ਸੁਤਾ ਹੋਨ੍ਤਿ, ਅਨਵਸ੍ਸੁਤਾ ਪਟਿਗ੍ਗਣ੍ਹਾਤੀ’’ਤਿ ਏਤ੍ਤਕਮੇਵ ਵਤ੍ਤਬ੍ਬਂ ਸਿਯਾ. ‘‘ਉਭਤੋਅਨਵਸ੍ਸੁਤਾ ਹੋਨ੍ਤਿ, ਅਨਵਸ੍ਸੁਤੋਤਿ ਜਾਨਨ੍ਤੀ ਪਟਿਗ੍ਗਣ੍ਹਾਤੀ’’ਤਿ ਇਮਸ੍ਸ ਚ ਅਨਾਪਤ੍ਤਿਵਾਰਸ੍ਸ ਅਯਮਤ੍ਥੋ. ਉਭੋ ਚੇ ਅਨਵਸ੍ਸੁਤਾ, ਸਬ੍ਬਥਾਪਿ ਅਨਾਪਤ੍ਤਿ. ਅਥ ਭਿਕ੍ਖੁਨੀ ਅਨਵਸ੍ਸੁਤਾ ਸਮਾਨਾ ਅਵਸ੍ਸੁਤਮ੍ਪਿ ‘‘ਅਨਵਸ੍ਸੁਤੋ’’ਤਿ ਸਞ੍ਞਾਯ ਤਸ੍ਸ ਹਤ੍ਥਤੋ ਪਟਿਗ੍ਗਣ੍ਹਾਤਿ, ਏਵਮ੍ਪਿ ਅਨਾਪਤ੍ਤਿ. ਅਥ ਸਯਂ ਅਨਵਸ੍ਸੁਤਾਪਿ ਅਞ੍ਞਂ ਅਨਵਸ੍ਸੁਤਂ ਵਾ ਅਵਸ੍ਸੁਤਂ ਵਾ ‘‘ਅਵਸ੍ਸੁਤੋ’’ਤਿ ਜਾਨਾਤਿ, ਦੁਕ੍ਕਟਮੇਵ. ਵੁਤ੍ਤਞ੍ਹੇਤਂ ਅਨਨ੍ਤਰਸਿਕ੍ਖਾਪਦੇ ‘‘ਕਿਸ੍ਸ ਤ੍ਵਂ ਅਯ੍ਯੇ ਨ ਪਟਿਗ੍ਗਣ੍ਹਾਸੀਤਿ. ਅਵਸ੍ਸੁਤਾ ਅਯ੍ਯੇਤਿ. ਤ੍ਵਂ ਪਨ ਅਯ੍ਯੇ ਅਵਸ੍ਸੁਤਾਤਿ. ਨਾਹਂ ਅਯ੍ਯੇ ਅਵਸ੍ਸੁਤਾ’’ਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਉਦਕਦਨ੍ਤਪੋਨਤੋ ਅਞ੍ਞਂ ਅਜ੍ਝੋਹਰਣੀਯਂ, ਉਭਤੋਅਵਸ੍ਸੁਤਤਾ, ਸਹਤ੍ਥਾ ਗਹਣਂ, ਅਜ੍ਝੋਹਰਣਨ੍ਤਿ ਇਮਾਨਿ ਪਨੇਤ੍ਥ ਚਤ੍ਤਾਰਿ ਅਙ੍ਗਾਨਿ.

ਪਞ੍ਚਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੬. ਛਟ੍ਠਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੦੫. ਛਟ੍ਠੇ ਪਰਿਵਾਰਗਾਥਾਯ ਅਯਮਤ੍ਥੋ. ਨ ਦੇਤਿ ਨ ਪਟਿਗ੍ਗਣ੍ਹਾਤੀਤਿ (ਪਰਿ. ਅਟ੍ਠ. ੪੮੧) ਨ ਉਯ੍ਯੋਜਿਕਾ ਦੇਤਿ, ਨਾਪਿ ਉਯ੍ਯੋਜਿਤਾ ਤਸ੍ਸਾ ਹਤ੍ਥਤੋ ਗਣ੍ਹਾਤਿ. ਪਟਿਗ੍ਗਹੋ ਤੇਨ ਨ ਵਿਜ੍ਜਤੀਤਿ ਤੇਨੇਵ ਕਾਰਣੇਨ ਉਯ੍ਯੋਜਿਕਾਯ ਹਤ੍ਥਤੋ ਉਯ੍ਯੋਜਿਤਾਯ ਪਟਿਗ੍ਗਹੋ ਨ ਵਿਜ੍ਜਤਿ. ਆਪਜ੍ਜਤਿ ਗਰੁਕਨ੍ਤਿ ਏਵਂ ਸਨ੍ਤੇਪਿ ਅਵਸ੍ਸੁਤਸ੍ਸ ਹਤ੍ਥਤੋ ਪਿਣ੍ਡਗ੍ਗਹਣੇ ਉਯ੍ਯੋਜੇਨ੍ਤੀ ਸਙ੍ਘਾਦਿਸੇਸਾਪਤ੍ਤਿਂ ਆਪਜ੍ਜਤਿ. ਤਞ੍ਚ ਪਰਿਭੋਗਪਚ੍ਚਯਾਤਿ ਤਞ੍ਚ ਪਨ ਆਪਤ੍ਤਿਂ ਆਪਜ੍ਜਮਾਨਾ ਤਸ੍ਸਾ ਉਯ੍ਯੋਜਿਤਾਯ ਪਰਿਭੋਗਪਚ੍ਚਯਾ ਆਪਜ੍ਜਤਿ. ਤਸ੍ਸਾ ਹਿ ਭੋਜਨਪਰਿਯੋਸਾਨੇ ਉਯ੍ਯੋਜਿਕਾਯ ਸਙ੍ਘਾਦਿਸੇਸੋ ਹੋਤਿ. ਸੇਸਮੇਤ੍ਥ ਉਤ੍ਤਾਨਮੇਵ. ਮਨੁਸ੍ਸਪੁਰਿਸਤਾ, ਅਞ੍ਞਤ੍ਰ ਅਨੁਞ੍ਞਾਤਕਾਰਣਾ ਖਾਦਨੀਯਂ ਭੋਜਨੀਯਂ ਗਹੇਤ੍ਵਾ ਭੁਞ੍ਜਾਤਿ ਉਯ੍ਯੋਜਨਾ, ਤੇਨ ਵਚਨੇਨ ਗਹੇਤ੍ਵਾ ਇਤਰਿਸ੍ਸਾ ਭੋਜਨਪਰਿਯੋਸਾਨਨ੍ਤਿ ਇਮਾਨਿ ਪਨੇਤ੍ਥ ਤੀਣਿ ਅਙ੍ਗਾਨਿ.

ਛਟ੍ਠਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭. ਸਤ੍ਤਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੦੯. ਸਤ੍ਤਮੇ ਕਿਨ੍ਨੁਮਾਵ ਸਮਣਿਯੋਤਿ ਕਿਂ ਨੁ ਇਮਾ ਏਵ ਸਮਣਿਯੋ. ਤਾਸਾਹਨ੍ਤਿ ਤਾਸਂ ਅਹਂ. ਸੇਸਂ ਉਤ੍ਤਾਨਮੇਵ.

ਸਤ੍ਤਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭੧੫. ਅਟ੍ਠਮਂ ਉਤ੍ਤਾਨਤ੍ਥਮੇਵ.

੯. ਨਵਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ

੭੨੧. ਨਵਮੇ ਵਜ੍ਜਪ੍ਪਟਿਚ੍ਛਾਦਿਕਾਤਿ ਖੁਦ੍ਦਾਨੁਖੁਦ੍ਦਕਵਜ੍ਜਸ੍ਸ ਪਟਿਚ੍ਛਾਦਿਕਾ. ਸਮਨੁਭਾਸਨਕਮ੍ਮਕਾਲੇ ਚੇਤ੍ਥ ਦ੍ਵੇ ਤਿਸ੍ਸੋ ਏਕਤੋ ਸਮਨੁਭਾਸਿਤਬ੍ਬਾ.

ਨਵਮਸਙ੍ਘਾਦਿਸੇਸਸਿਕ੍ਖਾਪਦਵਣ੍ਣਨਾ ਨਿਟ੍ਠਿਤਾ.

੭੨੭. ਦਸਮਂ ਉਤ੍ਤਾਨਤ੍ਥਮੇਵ.

ਭਿਕ੍ਖੁਨੀਵਿਭਙ੍ਗੇ ਸਙ੍ਘਾਦਿਸੇਸਵਣ੍ਣਨਾ ਨਿਟ੍ਠਿਤਾ.

ਸਙ੍ਘਾਦਿਸੇਸਕਣ੍ਡਂ ਨਿਟ੍ਠਿਤਂ.