ਪਞ੍ਚਵਗ੍ਗੋ

ਕਮ੍ਮਵਗ੍ਗਵਣ੍ਣਨਾ

੪੮੩. ਕਮ੍ਮਵਗ੍ਗੇ ਉਮ੍ਮਤ੍ਤਕਸ੍ਸ ਭਿਕ੍ਖੁਨੋ ਉਮ੍ਮਤ੍ਤਕਸਮ੍ਮੁਤਿ ਉਮ੍ਮਤ੍ਤਕੇ ਯਾਚਿਤ੍ਵਾ ਗਤੇ ਅਸਮ੍ਮੁਖਾਪਿ ਦਾਤੁਂ ਵਟ੍ਟਤਿ, ਤਤ੍ਥ ਨਿਸਿਨ੍ਨੇਪਿ ਨ ਕੁਪ੍ਪਤਿ ਨਿਯਮਾਭਾਵਤੋ. ਅਸਮ੍ਮੁਖਾ ਕਤੇ ਪਨ ਦੋਸਾਭਾਵਂ ਦਸ੍ਸੇਤੁਂ ‘‘ਅਸਮ੍ਮੁਖਾਕਤਂ ਸੁਕਤਂ ਹੋਤੀ’’ਤਿ ਵੁਤ੍ਤਂ. ਦੂਤੇਨ ਉਪਸਮ੍ਪਦਾ ਪਨ ਸਮ੍ਮੁਖਾ ਕਾਤੁਂ ਨ ਸਕ੍ਕਾ ਕਮ੍ਮਵਾਚਾਨਾਨਤ੍ਤਸਮ੍ਭਵਤੋ. ਪਤ੍ਤਨਿਕ੍ਕੁਜ੍ਜਨਾਦਯੋ ਹਤ੍ਥਪਾਸਤੋ ਅਪਨੀਤਮਤ੍ਤੇਪਿ ਕਾਤੁਂ ਵਟ੍ਟਨ੍ਤਿ. ਸਙ੍ਘਸਮ੍ਮੁਖਤਾਤਿਆਦੀਸੁ ਯਾਵਤਿਕਾ ਭਿਕ੍ਖੂ ਕਮ੍ਮਪ੍ਪਤ੍ਤਾ, ਤੇ ਆਗਤਾ ਹੋਨ੍ਤਿ, ਛਨ੍ਦਾਰਹਾਨਂ ਛਨ੍ਦੋ ਆਹਟੋ ਹੋਤਿ, ਸਮ੍ਮੁਖੀਭੂਤਾ ਨ ਪਟਿਕ੍ਕੋਸਨ੍ਤਿ, ਅਯਂ ਸਙ੍ਘਸਮ੍ਮੁਖਤਾ. ਯੇਨ ਧਮ੍ਮੇਨ ਯੇਨ ਵਿਨਯੇਨ ਯੇਨ ਸਤ੍ਥੁਸਾਸਨੇਨ ਸਙ੍ਘੋ ਕਮ੍ਮਂ ਕਰੋਤਿ, ਅਯਂ ਧਮ੍ਮਸਮ੍ਮੁਖਤਾ. ਤਤ੍ਥ ਧਮ੍ਮੋਤਿ ਭੂਤਂ ਵਤ੍ਥੁ. ਵਿਨਯੋਤਿ ਚੋਦਨਾ ਚੇਵ ਸਾਰਣਾ ਚ. ਸਤ੍ਥੁਸਾਸਨਂ ਨਾਮ ਞਤ੍ਤਿਸਮ੍ਪਦਾ ਚੇਵ ਅਨੁਸ੍ਸਾਵਨਸਮ੍ਪਦਾ ਚ. ਯਸ੍ਸ ਸਙ੍ਘੋ ਕਮ੍ਮਂ ਕਰੋਤਿ, ਤਸ੍ਸ ਸਮ੍ਮੁਖਭਾਵੋ ਪੁਗ੍ਗਲਸਮ੍ਮੁਖਤਾ. ਕਤ੍ਤਿਕਮਾਸਸ੍ਸ ਪਵਾਰਣਮਾਸਤ੍ਤਾ ‘‘ਠਪੇਤ੍ਵਾ ਕਤ੍ਤਿਕਮਾਸ’’ਨ੍ਤਿ ਵੁਤ੍ਤਂ. ਪਚ੍ਚੁਕ੍ਕਡ੍ਢਿਤ੍ਵਾ ਠਪਿਤਦਿਵਸੋ ਚਾਤਿ ਕਾਲ਼ਪਕ੍ਖੇ ਚਾਤੁਦ੍ਦਸਿਂ ਵਾ ਪਨ੍ਨਰਸਿਂ ਵਾ ਸਨ੍ਧਾਯ ਵੁਤ੍ਤਂ. ਦ੍ਵੇ ਚ ਪੁਣ੍ਣਮਾਸਿਯੋਤਿ ਪਠਮਪਚ੍ਛਿਮਵਸ੍ਸੂਪਗਤਾਨਂ ਵਸੇਨ ਵੁਤ੍ਤਂ.

੪੮੫. ਠਾਨਕਰਣਾਨਿ ਸਿਥਿਲਾਨਿ ਕਤ੍ਵਾ ਉਚ੍ਚਾਰੇਤਬ੍ਬਂ ਅਕ੍ਖਰਂ ਸਿਥਿਲਂ, ਤਾਨਿਯੇਵ ਧਨਿਤਾਨਿ ਅਸਿਥਿਲਾਨਿ ਕਤ੍ਵਾ ਉਚ੍ਚਾਰੇਤਬ੍ਬਂ ਅਕ੍ਖਰਂ ਧਨਿਤਂ. ਦ੍ਵਿਮਤ੍ਤਕਾਲਂ ਦੀਘਂ, ਏਕਮਤ੍ਤਕਾਲਂ ਰਸ੍ਸਂ. ਦਸਧਾ ਬ੍ਯਞ੍ਜਨਬੁਦ੍ਧਿਯਾ ਪਭੇਦੋਤਿ ਏਵਂ ਸਿਥਿਲਾਦਿਵਸੇਨ ਬ੍ਯਞ੍ਜਨਬੁਦ੍ਧਿਯਾ ਅਕ੍ਖਰੁਪ੍ਪਾਦਕਚਿਤ੍ਤਸ੍ਸ ਦਸਪ੍ਪਕਾਰੇਨ ਪਭੇਦੋ. ਸਬ੍ਬਾਨਿ ਹਿ ਅਕ੍ਖਰਾਨਿ ਚਿਤ੍ਤਸਮੁਟ੍ਠਾਨਾਨਿ ਯਥਾਧਿਪ੍ਪੇਤਤ੍ਥਬ੍ਯਞ੍ਜਨਤੋ ਬ੍ਯਞ੍ਜਨਾਨਿ ਚ. ਸਂਯੋਗੋ ਪਰੋ ਏਤਸ੍ਮਾਤਿ ਸਂਯੋਗਪਰੋ, ਨ ਸਂਯੋਗਪਰੋ ਅਸਂਯੋਗਪਰੋ. ਆਯਸ੍ਮਤੋ ਬੁਦ੍ਧਰਕ੍ਖਿਤਥੇਰਸ੍ਸ ਯਸ੍ਸ ਨ ਖਮਤੀਤਿ ਏਤ੍ਥ ਤ-ਕਾਰ ਨ-ਕਾਰਸਹਿਤਾਕਾਰੋ ਅਸਂਯੋਗਪਰੋ. ਕਰਣਾਨੀਤਿ ਕਣ੍ਠਾਦੀਨਿ.

੪੮੮. ਅਨੁਕ੍ਖਿਤ੍ਤਾ ਪਾਰਾਜਿਕਂ ਅਨਾਪਨ੍ਨਾ ਚ ਪਕਤਤ੍ਤਾਤਿ ਆਹ ‘‘ਪਕਤਤ੍ਤਾ ਅਨੁਕ੍ਖਿਤ੍ਤਾ’’ਤਿਆਦਿ. ਤਤ੍ਥ ਅਨਿਸ੍ਸਾਰਿਤਾਤਿ ਪੁਰਿਮਪਦਸ੍ਸੇਵ ਵੇਵਚਨਂ. ਪਰਿਸੁਦ੍ਧਸੀਲਾਤਿ ਪਾਰਾਜਿਕਂ ਅਨਾਪਨ੍ਨਾ. ਨ ਤੇਸਂ ਛਨ੍ਦੋ ਵਾ ਪਾਰਿਸੁਦ੍ਧਿ ਵਾ ਏਤੀਤਿ ਤੀਸੁ ਦ੍ਵੀਸੁ ਵਾ ਨਿਸਿਨ੍ਨੇਸੁ ਏਕਸ੍ਸ ਵਾ ਦ੍ਵਿਨ੍ਨਂ ਵਾ ਛਨ੍ਦਪਾਰਿਸੁਦ੍ਧਿ ਆਹਟਾਪਿ ਅਨਾਹਟਾਵ ਹੋਤੀਤਿ ਅਧਿਪ੍ਪਾਯੋ.

ਅਪਲੋਕਨਕਮ੍ਮਕਥਾਵਣ੍ਣਨਾ

੪੯੫-੪੯੬. ਕਾਯਸਮ੍ਭੋਗਸਾਮਗ੍ਗੀਤਿ ਸਹਸੇਯ੍ਯਪਟਿਗ੍ਗਹਣਾਦਿ. ਸੋ ਰਤੋਤਿ ਸੁਭੇ ਰਤੋ. ਸੁਟ੍ਠੁ ਓਰਤੋਤਿ ਵਾ ਸੋਰਤੋ. ਨਿਵਾਤਵੁਤ੍ਤੀਤਿ ਨੀਚਵੁਤ੍ਤਿ. ਪਟਿਸਙ੍ਖਾਤਿ ਪਟਿਸਙ੍ਖਾਯ ਞਾਣੇਨ ਉਪਪਰਿਕ੍ਖਿਤ੍ਵਾ. ਯਂ ਤਂ ਅਵਨ੍ਦਿਯਕਮ੍ਮਂ ਅਨੁਞ੍ਞਾਤਨ੍ਤਿ ਸਮ੍ਬਨ੍ਧੋ. ਇਮਸ੍ਸ ਅਪਲੋਕਨਕਮ੍ਮਸ੍ਸ ਠਾਨਂ ਹੋਤੀਤਿ ਏਵਮ੍ਪਿ ਅਪਲੋਕਨਕਮ੍ਮਂ ਪਵਤ੍ਤਤੀਤਿ ਅਤ੍ਥੋ. ਕਮ੍ਮਮੇਵ ਲਕ੍ਖਣਨ੍ਤਿ ਕਮ੍ਮਲਕ੍ਖਣਂ. ਓਸਾਰਣਨਿਸ੍ਸਾਰਣਭਣ੍ਡੁਕਮ੍ਮਾਦਯੋ ਵਿਯ ਕਮ੍ਮਞ੍ਚ ਹੁਤ੍ਵਾ ਅਞ੍ਞਞ੍ਚ ਨਾਮਂ ਨ ਲਭਤਿ, ਕਮ੍ਮਮੇਵ ਹੁਤ੍ਵਾ ਉਪਲਕ੍ਖੀਯਤੀਤਿ ‘‘ਕਮ੍ਮਲਕ੍ਖਣ’’ਨ੍ਤਿ ਵੁਚ੍ਚਤਿ. ਏਤਮ੍ਪਿ ਕਮ੍ਮਲਕ੍ਖਣਮੇਵਾਤਿ ਵੁਤ੍ਤਕਮ੍ਮਲਕ੍ਖਣਂ ਦਸ੍ਸੇਤੁਂ ‘‘ਅਚ੍ਛਿਨ੍ਨਚੀਵਰਜਿਣ੍ਣਚੀਵਰਨਟ੍ਠਚੀਵਰਾਨ’’ਨ੍ਤਿਆਦਿ ਵੁਤ੍ਤਂ. ਇਣਪਲਿਬੋਧਮ੍ਪੀਤਿ ਇਣਮੇਵ ਪਲਿਬੋਧੋ ਇਣਪਲਿਬੋਧੋ, ਤਮ੍ਪਿ ਦਾਤੁਂ ਵਟ੍ਟਤਿ. ਸਚੇ ਤਾਦਿਸਂ ਭਿਕ੍ਖੁਂ ਇਣਾਯਿਕਾ ਪਲਿਬੁਨ੍ਧਨ੍ਤਿ, ਤਤ੍ਰੁਪ੍ਪਾਦਤੋਪਿ ਤਸ੍ਸ ਇਣਂ ਸੋਧੇਤੁਂ ਵਟ੍ਟਤੀਤਿ ਅਧਿਪ੍ਪਾਯੋ.

ਛਤ੍ਤਂ ਵਾ ਵੇਦਿਕਂ ਵਾਤਿ ਏਤ੍ਥ ਵੇਦਿਕਾਤਿ ਚੇਤਿਯਸ੍ਸ ਉਪਰਿ ਚਤੁਰਸ੍ਸਚਯੋ ਵੁਚ੍ਚਤਿ. ਛਤ੍ਤਨ੍ਤਿ ਤਤੋ ਉਦ੍ਧਂ ਵਲਯਾਨਿ ਦਸ੍ਸੇਤ੍ਵਾ ਕਤੋ ਅਗ੍ਗਚਯੋ ਵੁਚ੍ਚਤਿ. ਚੇਤਿਯਸ੍ਸ ਉਪਨਿਕ੍ਖੇਪਤੋਤਿ ਚੇਤਿਯੇ ਨਵਕਮ੍ਮਤ੍ਤਾਯ ਉਪਨਿਕ੍ਖਿਤ੍ਤਤੋ, ਚੇਤਿਯਸਨ੍ਤਕਤੋਤਿ ਵੁਤ੍ਤਂ ਹੋਤਿ. ਅਞ੍ਞਾ ਕਤਿਕਾ ਕਾਤਬ੍ਬਾਤਿ ਪੁਰਿਮਕਤਿਕਾਯ ਅਸਙ੍ਗਹਿਤਤ੍ਤਾ ਵੁਤ੍ਤਂ. ਤੇਹੀਤਿ ਯੇਸਂ ਪੁਗ੍ਗਲਿਕਟ੍ਠਾਨੇ ਤਿਟ੍ਠਨ੍ਤਿ, ਤੇਹਿ. ਦਸਭਾਗਨ੍ਤਿ ਦਸਮਭਾਗਂ. ਤਤ੍ਥਾਤਿ ਤਸ੍ਮਿਂ ਵਿਹਾਰੇ. ਮੂਲੇਤਿ ਪੁਬ੍ਬੇ. ‘‘ਇਤੋ ਪਟ੍ਠਾਯ ਭਾਜੇਤ੍ਵਾ ਖਾਦਨ੍ਤੂ’’ਤਿ ਵਚਨੇਨੇਵ ਯਥਾਸੁਖਂ ਪਰਿਭੋਗੋ ਪਟਿਕ੍ਖਿਤ੍ਤੋ ਹੋਤੀਤਿ ਆਹ ‘‘ਪੁਰਿਮਕਤਿਕਾ ਪਟਿਪ੍ਪਸ੍ਸਮ੍ਭਤੀ’’ਤਿ.

ਅਨੁਵਿਚਰਿਤ੍ਵਾਤਿ ਪਚ੍ਛਤੋ ਪਚ੍ਛਤੋ ਗਨ੍ਤ੍ਵਾ. ਅਪਚ੍ਚਾਸੀਸਨ੍ਤੇਨਾਤਿ ਤੇਸਂ ਸਨ੍ਤਿਕਾ

ਪਚ੍ਚਯਂ ਅਪਚ੍ਚਾਸੀਸਨ੍ਤੇਨ. ਮੂਲਭਾਗਨ੍ਤਿ ਵੁਤ੍ਤਮੇਵਤ੍ਥਂ ਵਿਭਾਵੇਤਿ ‘‘ਦਸਭਾਗਮਤ੍ਤ’’ਨ੍ਤਿ. ਅਕਤਾਵਾਸਂ ਵਾ ਕਤ੍ਵਾਤਿ ਤਤੋ ਉਪ੍ਪਨ੍ਨਆਯੇਨ ਕਤ੍ਵਾ. ਜਗ੍ਗਿਤਕਾਲੇ ਚ ਨ ਵਾਰੇਤਬ੍ਬਾਤਿ ਜਗ੍ਗਿਤਾਨਂ ਪੁਪ੍ਫਫਲਭਰਿਤਕਾਲੇ ਨ ਵਾਰੇਤਬ੍ਬਾ. ਜਗ੍ਗਨਕਾਲੇਤਿ ਜਗ੍ਗਿਤੁਂ ਆਰਦ੍ਧਕਾਲੇ. ਞਤ੍ਤਿਕਮ੍ਮਟ੍ਠਾਨਭੇਦੇਤਿ ਞਤ੍ਤਿਕਮ੍ਮਸ੍ਸ ਠਾਨਭੇਦੇ.

ਕਮ੍ਮਵਗ੍ਗਵਣ੍ਣਨਾ ਨਿਟ੍ਠਿਤਾ.

ਅਪਞ੍ਞਤ੍ਤੇ ਪਞ੍ਞਤ੍ਤਵਗ੍ਗਵਣ੍ਣਨਾ

੫੦੦. ਸਤ੍ਤ ਆਪਤ੍ਤਿਕ੍ਖਨ੍ਧਾ ਪਞ੍ਞਤ੍ਤਂ ਨਾਮਾਤਿ ਸਮ੍ਬਨ੍ਧੋ. ਕਕੁਸਨ੍ਧਕੋਣਾਗਮਨਕਸ੍ਸਪਾ ਏਵ ਸਤ੍ਤ ਆਪਤ੍ਤਿਕ੍ਖਨ੍ਧੇ ਪਞ੍ਞਪੇਸੁਂ, ਵਿਪਸ੍ਸੀਆਦਯੋ ਪਨ ਓਵਾਦਪਾਤਿਮੋਕ੍ਖਂ ਉਦ੍ਦਿਸਿਂਸੁ, ਨ ਸਿਕ੍ਖਾਪਦਂ ਪਞ੍ਞਪੇਸੁਨ੍ਤਿ ਆਹ ‘‘ਕਕੁਸਨ੍ਧਞ੍ਚ…ਪੇ… ਅਨ੍ਤਰਾ ਕੇਨਚਿ ਅਪਞ੍ਞਤ੍ਤੇ ਸਿਕ੍ਖਾਪਦੇ’’ਤਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਇਤਿ ਸਮਨ੍ਤਪਾਸਾਦਿਕਾਯ ਵਿਨਯਟ੍ਠਕਥਾਯ ਸਾਰਤ੍ਥਦੀਪਨਿਯਂ

ਪਰਿਵਾਰਟ੍ਠਕਥਾਵਣ੍ਣਨਾ ਸਮਤ੍ਤਾ.

ਨਿਗਮਨਕਥਾਵਣ੍ਣਨਾ

ਅਵਸਾਨਗਾਥਾਸੁ ਪਨ ਅਯਮਤ੍ਥੋ. ਵਿਭਤ੍ਤਦੇਸਨਨ੍ਤਿ ਉਭਤੋਵਿਭਙ੍ਗਖਨ੍ਧਕਪਰਿਵਾਰੇਹਿ ਵਿਭਤ੍ਤਦੇਸਨਂ ਵਿਨਯਪਿਟਕਨ੍ਤਿ ਯੋਜੇਤਬ੍ਬਂ. ਤਸ੍ਸਾਤਿ ਤਸ੍ਸ ਵਿਨਯਸ੍ਸ.

ਤਤ੍ਰਿਦਨ੍ਤਿਆਦਿ ਪਠਮਪਾਰਾਜਿਕਵਣ੍ਣਨਾਯਂ ਵੁਤ੍ਤਨਯਮੇਵ.

ਸਤ੍ਥੁਮਹਾਬੋਧਿਵਿਭੂਸਿਤੋਤਿ ਸਤ੍ਥੁਨਾ ਪਰਿਭੁਤ੍ਤਮਹਾਬੋਧਿਵਿਭੂਸਿਤੋ ਮਣ੍ਡਿਤੋ, ਤਸ੍ਸ ਮਹਾਵਿਹਾਰਸ੍ਸ ਦਕ੍ਖਿਣਭਾਗੇ ਉਤ੍ਤਮਂ ਯਂ ਪਧਾਨਘਰਨ੍ਤਿ ਸਮ੍ਬਨ੍ਧੋ. ਤਤ੍ਥ ਪਧਾਨਘਰਨ੍ਤਿ ਤਂਨਾਮਕਂ ਪਰਿਵੇਣਂ. ਸੁਚਿਚਾਰਿਤ੍ਤਸੀਲੇਨ, ਭਿਕ੍ਖੁਸਙ੍ਘੇਨ ਸੇਵਿਤਨ੍ਤਿ ਇਦਮ੍ਪਿ ਪਧਾਨਘਰਵਿਸੇਸਨਂ.

ਤਤ੍ਥਾਤਿ ਤਸ੍ਮਿਂ ਪਧਾਨਘਰੇ. ਚਾਰੁਪਾਕਾਰਸਞ੍ਚਿਤਨ੍ਤਿ ਮਨਾਪੇਨ ਪਾਕਾਰੇਨ ਪਰਿਕ੍ਖਿਤ੍ਤਂ. ਸੀਤਚ੍ਛਾਯਤਰੂਪੇਤਨ੍ਤਿ ਘਨਨਿਚਿਤਪਤ੍ਤਸਞ੍ਛਨ੍ਨਸਾਖਾਪਸਾਖਤਾਯ ਸੀਤਚ੍ਛਾਯੇਹਿ ਰੁਕ੍ਖੇਹਿ ਉਪੇਤਂ. ਵਿਕਸਿਤਕਮਲਕੁਵਲਯਪੁਣ੍ਡਰੀਕਸੋਗਨ੍ਧਿਕਾਦਿਪੁਪ੍ਫਸਞ੍ਛਨ੍ਨਮਧੁਰਸੀਤਲੁਦਕਪੁਣ੍ਣਤਾਯ ਸਮ੍ਪਨ੍ਨਾ ਸਲਿਲਾਸਯਾ ਅਸ੍ਸਾਤਿ ਸਮ੍ਪਨ੍ਨਸਲਿਲਾਸਯੋ. ਉਦ੍ਦਿਸਿਤ੍ਵਾਤਿ ਬੁਦ੍ਧਸਿਰਿਂ ਨਾਮ ਥੇਰਂ ਨਿਸ੍ਸਾਯ, ਤਸ੍ਸ ਅਜ੍ਝੇਸਨਂ ਨਿਸ੍ਸਾਯਾਤਿ ਵੁਤ੍ਤਂ ਹੋਤਿ. ਇਦ੍ਧਾਤਿ ਅਤ੍ਥਵਿਨਿਚ੍ਛਯਾਦੀਹਿ ਇਦ੍ਧਾ ਫੀਤਾ ਪਰਿਪੁਣ੍ਣਾ.

ਸਿਰਿਨਿਵਾਸਸ੍ਸਾਤਿ ਸਿਰਿਯਾ ਨਿਵਾਸਟ੍ਠਾਨਭੂਤਸ੍ਸ. ਜਯਸਂਵਚ੍ਛਰੇਤਿ ਜਯਪ੍ਪਤ੍ਤਸਂਵਚ੍ਛਰੇ. ਅਯਨ੍ਤਿ ਥੇਰਂ ਬੁਦ੍ਧਸਿਰਿਂ ਉਦ੍ਦਿਸ੍ਸ ਯਾ ਵਿਨਯਵਣ੍ਣਨਾ ਆਰਦ੍ਧਾ, ਅਯਂ. ਧਮ੍ਮੂਪਸਂਹਿਤਾਤਿ ਕੁਸਲਸਨ੍ਨਿਸ੍ਸਿਤਾ. ਇਦਾਨਿ ਸਦੇਵਕਸ੍ਸ ਲੋਕਸ੍ਸ ਅਚ੍ਚਨ੍ਤਸੁਖਾਧਿਗਮਾਯ ਅਤ੍ਤਨੋ ਪੁਞ੍ਞਂ ਪਰਿਣਾਮੇਨ੍ਤੋ ‘‘ਚਿਰਟ੍ਠਿਤਤ੍ਥ ਧਮ੍ਮਸ੍ਸਾ’’ਤਿਆਦਿਮਾਹ. ਤਤ੍ਥ ਸਮਾਚਿਤਨ੍ਤਿ ਉਪਚਿਤਂ. ਸਬ੍ਬਸ੍ਸ ਆਨੁਭਾਵੇਨਾਤਿ ਸਬ੍ਬਸ੍ਸ ਤਸ੍ਸ ਪੁਞ੍ਞਸ੍ਸ ਤੇਜੇਨ. ਸਬ੍ਬੇਪਿ ਪਾਣਿਨੋਤਿ ਕਾਮਾਵਚਰਾਦਿਭੇਦਾ ਸਬ੍ਬੇ ਸਤ੍ਤਾ. ਸਦ੍ਧਮ੍ਮਰਸਸੇਵਿਨੋਤਿ ਯਥਾਰਹਂ ਬੋਧਿਤ੍ਤਯਾਧਿਗਮਵਸੇਨ ਸਦ੍ਧਮ੍ਮਰਸਸੇਵਿਨੋ ਭਵਨ੍ਤੁ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਨਿਗਮਨਕਥਾਵਣ੍ਣਨਾ ਨਿਟ੍ਠਿਤਾ.

ਨਿਗਮਨਕਥਾ

ਏਤ੍ਤਾਵਤਾ ਚ –

ਵਿਨਯੇ ਪਾਟਵਤ੍ਥਾਯ, ਸਾਸਨਸ੍ਸ ਚ ਵੁਡ੍ਢਿਯਾ;

ਵਣ੍ਣਨਾ ਯਾ ਸਮਾਰਦ੍ਧਾ, ਵਿਨਯਟ੍ਠਕਥਾਯ ਸਾ.

ਸਾਰਤ੍ਥਦੀਪਨੀ ਨਾਮ, ਸਬ੍ਬਸੋ ਪਰਿਨਿਟ੍ਠਿਤਾ;

ਤਿਂਸਸਹਸ੍ਸਮਤ੍ਤੇਹਿ, ਗਨ੍ਥੇਹਿ ਪਰਿਮਾਣਤੋ.

ਅਜ੍ਝੇਸਿਤੋ ਨਰਿਨ੍ਦੇਨ, ਸੋਹਂ ਪਰਕ੍ਕਮਬਾਹੁਨਾ;

ਸਦ੍ਧਮ੍ਮਟ੍ਠਿਤਿਕਾਮੇਨ, ਸਾਸਨੁਜ੍ਜੋਤਕਾਰਿਨਾ.

ਤੇਨੇਵ ਕਾਰਿਤੇ ਰਮ੍ਮੇ, ਪਾਸਾਦਸਤਮਣ੍ਡਿਤੇ;

ਨਾਨਾਦੁਮਗਣਾਕਿਣ੍ਣੇ, ਭਾਵਨਾਭਿਰਤਾਲਯੇ.

ਸੀਤਲੂਦਕਸਮ੍ਪਨ੍ਨੇ, ਵਸਂ ਜੇਤਵਨੇ ਇਮਂ;

ਅਤ੍ਥਬ੍ਯਞ੍ਜਨਸਮ੍ਪਨ੍ਨਂ, ਅਕਾਸਿਂ ਸੁਵਿਨਿਚ੍ਛਯਂ.

ਯਂ ਸਿਦ੍ਧਂ ਇਮਿਨਾ ਪੁਞ੍ਞਂ, ਯਂ ਚਞ੍ਞਂ ਪਸੁਤਂ ਮਯਾ;

ਏਤੇਨ ਪੁਞ੍ਞਕਮ੍ਮੇਨ, ਦੁਤਿਯੇ ਅਤ੍ਤਸਮ੍ਭਵੇ.

ਤਾਵਤਿਂਸੇ ਪਮੋਦੇਨ੍ਤੋ, ਸੀਲਾਚਾਰਗੁਣੇ ਰਤੋ;

ਅਲਗ੍ਗੋ ਪਞ੍ਚਕਾਮੇਸੁ, ਪਤ੍ਵਾਨ ਪਠਮਂ ਫਲਂ.

ਅਨ੍ਤਿਮੇ ਅਤ੍ਤਭਾਵਮ੍ਹਿ, ਮੇਤ੍ਤੇਯ੍ਯਂ ਮੁਨਿਪੁਙ੍ਗਵਂ;

ਲੋਕਗ੍ਗਪੁਗ੍ਗਲਂ ਨਾਥਂ, ਸਬ੍ਬਸਤ੍ਤਹਿਤੇ ਰਤਂ.

ਦਿਸ੍ਵਾਨ ਤਸ੍ਸ ਧੀਰਸ੍ਸ, ਸੁਤ੍ਵਾ ਸਦ੍ਧਮ੍ਮਦੇਸਨਂ;

ਅਧਿਗਨ੍ਤ੍ਵਾ ਫਲਂ ਅਗ੍ਗਂ, ਸੋਭੇਯ੍ਯਂ ਜਿਨਸਾਸਨਂ.

ਸਦਾ ਰਕ੍ਖਨ੍ਤੁ ਰਾਜਾਨੋ, ਧਮ੍ਮੇਨੇਵ ਇਮਂ ਪਜਂ;

ਨਿਰਤਾ ਪੁਞ੍ਞਕਮ੍ਮੇਸੁ, ਜੋਤੇਨ੍ਤੁ ਜਿਨਸਾਸਨਂ.

ਇਮੇ ਚ ਪਾਣਿਨੋ ਸਬ੍ਬੇ, ਸਬ੍ਬਦਾ ਨਿਰੁਪਦ੍ਦਵਾ;

ਨਿਚ੍ਚਂ ਕਲ੍ਯਾਣਸਙ੍ਕਪ੍ਪਾ, ਪਪ੍ਪੋਨ੍ਤੁ ਅਮਤਂ ਪਦਨ੍ਤਿ.

ਸਾਰਤ੍ਥਦੀਪਨੀ ਨਾਮ ਵਿਨਯਟੀਕਾ ਨਿਟ੍ਠਿਤਾ.