ਉਪਾਲਿਪਞ੍ਚਕਵਣ੍ਣਨਾ

੪੨੦-੪੨੧. ਓਮਦ੍ਦਕਾਰਕੋਤਿ ਓਮਦ੍ਦਿਤ੍ਵਾ ਅਭਿਭਵਿਤ੍ਵਾ ਕਾਰਕੋ. ਉਪਤ੍ਥਮ੍ਭੋ ਨ ਦਾਤਬ੍ਬੋਤਿ ਸਾਮਗ੍ਗਿਵਿਨਾਸਾਯ ਅਨੁਬਲਂ ਨ ਦਾਤਬ੍ਬਂ. ਦਿਟ੍ਠਾਵਿਕਮ੍ਮਮ੍ਪਿ ਕਤ੍ਵਾਤਿ ‘‘ਨ ਮੇਤਂ ਖਮਤੀ’’ਤਿ ਦਿਟ੍ਠਿਂ ਆਵਿ ਕਤ੍ਵਾਪਿ.

ਵੋਹਾਰਵਗ੍ਗਵਣ੍ਣਨਾ

੪੨੪. ਕਾਯਪ੍ਪਯੋਗੇਨ ਆਪਜ੍ਜਿਤਬ੍ਬਾ ਕਾਯਪ੍ਪਯੋਗਾ. ਵਚੀਪਯੋਗੇਨ ਆਪਜ੍ਜਿਤਬ੍ਬਾ ਵਚੀਪਯੋਗਾ. ਨਵਸੁ ਠਾਨੇਸੂਤਿ ਓਸਾਰਣਾਦੀਸੁ ਨਵਸੁ ਠਾਨੇਸੁ. ਦ੍ਵੀਸੁ ਠਾਨੇਸੂਤਿ ਞਤ੍ਤਿਦੁਤਿਯਞਤ੍ਤਿਚਤੁਤ੍ਥਕਮ੍ਮੇਸੁ. ਤਸ੍ਮਾਤਿ ਯਸ੍ਮਾ ਮਹਾਅਟ੍ਠਕਥਾਯਂ ਵੁਤ੍ਤਨਯੇਨ ਉਭਤੋਵਿਭਙ੍ਗਾ ਅਸਙ੍ਗਹਿਤਾ, ਤਸ੍ਮਾ. ਯਂ ਕੁਰੁਨ੍ਦਿਯਂ ਵੁਤ੍ਤਂ, ਤਂ ਗਹੇਤਬ੍ਬਨ੍ਤਿ ਸਮ੍ਬਨ੍ਧੋ.

ਦਿਟ੍ਠਾਵਿਕਮ੍ਮਵਗ੍ਗਵਣ੍ਣਨਾ

੪੨੫. ‘‘ਚਤੂਹਿ ਪਞ੍ਚਹੀ’’ਤਿ ਵਚਨਤੋ ਦ੍ਵੀਹਿ ਵਾ ਤੀਹਿ ਵਾ ਏਕਤੋ ਦੇਸੇਤੁਂ ਵਟ੍ਟਤਿ, ਤਤੋ ਪਰਂ ਨ ਵਟ੍ਟਤਿ. ਮਾਲ਼ਕਸੀਮਾਯਾਤਿ ਖਣ੍ਡਸੀਮਾਯ. ਅਵਿਪ੍ਪਵਾਸਸੀਮਾਯਾਤਿ ਮਹਾਸੀਮਾਯ.

ਮੁਸਾਵਾਦਵਗ੍ਗਵਣ੍ਣਨਾ

੪੪੪. ਪਰਿਯਾਯੇਨ ਜਾਨਨ੍ਤਸ੍ਸ ਵੁਤ੍ਤਮੁਸਾਵਾਦੋਤਿ ਯਸ੍ਸ ਕਸ੍ਸਚਿ ਜਾਨਨ੍ਤਸ੍ਸ ਪਰਿਯਾਯੇਨ ਵੁਤ੍ਤਮੁਸਾਵਾਦੋਤਿ ਅਤ੍ਥੋ.

੪੪੬. ਅਨੁਯੋਗੋ ਨ ਦਾਤਬ੍ਬੋਤਿ ਤੇਨ ਵੁਤ੍ਤਂ ਅਨਾਦਿਯਿਤ੍ਵਾ ਤੁਣ੍ਹੀ ਭਵਿਤਬ੍ਬਨ੍ਤਿ ਅਤ੍ਥੋ.

ਭਿਕ੍ਖੁਨੋਵਾਦਵਗ੍ਗਵਣ੍ਣਨਾ

੪੫੪. ਏਕੂਨਵੀਸਤਿਭੇਦਾਯਾਤਿ ਮਗ੍ਗਪਚ੍ਚਵੇਕ੍ਖਣਾਦਿਵਸੇਨ ਏਕੂਨਵੀਸਤਿਭੇਦਾਯ.

ਅਧਿਕਰਣਵੂਪਸਮਵਗ੍ਗਵਣ੍ਣਨਾ

੪੫੮. ਪਞ੍ਚਹਿ ਕਾਰਣੇਹੀਤਿ ਇਦਂ ਅਤ੍ਥਨਿਪ੍ਫਾਦਨਕਾਨਿ ਤੇਸਂ ਪੁਬ੍ਬਭਾਗਾਨਿ ਚ ਕਾਰਣਭਾਵਸਾਮਞ੍ਞੇਨ ਏਕਜ੍ਝਂ ਗਹੇਤ੍ਵਾ ਵੁਤ੍ਤਂ, ਨ ਪਨ ਸਬ੍ਬੇਸਂ ਪਞ੍ਚਨ੍ਨਂ ਸਮਾਨਯੋਗਕ੍ਖੇਮਤ੍ਤਾ. ਅਨੁਸ੍ਸਾਵਨੇਨਾਤਿ ਭੇਦਸ੍ਸ ਅਨੁਰੂਪਸਾਵਨੇਨ. ਯਥਾ ਭੇਦੋ ਹੋਤਿ, ਏਵਂ ਭਿਨ੍ਦਿਤਬ੍ਬਾਨਂ ਭਿਕ੍ਖੂਨਂ ਅਤ੍ਤਨੋ ਵਚਨਸ੍ਸ ਸਾਵਨੇਨ ਵਿਞ੍ਞਾਪਨੇਨਾਤਿ ਅਤ੍ਥੋ. ਤੇਨਾਹ ‘‘ਨਨੁ ਤੁਮ੍ਹੇ’’ਤਿਆਦਿ. ਕਣ੍ਣਮੂਲੇ ਵਚੀਭੇਦਂ ਕਤ੍ਵਾਤਿ ਏਤੇਨ ਪਾਕਟਂ ਕਤ੍ਵਾ ਭੇਦਕਰਵਤ੍ਥੁਦੀਪਨਂ ਵੋਹਰਣਂ. ਤਤ੍ਥ ਅਤ੍ਤਨਾ ਵਿਨਿਚ੍ਛਿਤਮਤ੍ਤਂ ਰਹਸ੍ਸਵਸੇਨ ਵਿਞ੍ਞਾਪਨਂ ਅਨੁਸ੍ਸਾਵਨਨ੍ਤਿ ਦਸ੍ਸੇਤਿ. ਕਮ੍ਮਮੇਵ ਉਦ੍ਦੇਸੋ ਵਾ ਪਮਾਣਨ੍ਤਿ ਤੇਹਿ ਸਙ੍ਘਭੇਦਸਿਦ੍ਧਿਤੋ ਪਮਾਣਂ, ਇਤਰੇ ਪਨ ਤੇਸਂ ਸਮ੍ਭਾਰਭੂਤਾ. ਤੇਨਾਹ ‘‘ਵੋਹਾਰਾ’’ਤਿਆਦਿ. ਤਤ੍ਥਾਤਿ ਵੋਹਰਣੇ.

ਕਥਿਨਤ੍ਥਾਰਵਗ੍ਗਵਣ੍ਣਨਾ

੪੬੭. ਅਨ੍ਤਰਾ ਵੁਤ੍ਤਕਾਰਣੇਨਾਤਿ ‘‘ਤਞ੍ਹਿ ਵਨ੍ਦਨ੍ਤਸ੍ਸ ਮਞ੍ਚਪਾਦਾਦੀਸੁਪਿ ਨਲਾਟਂ ਪਟਿਹਞ੍ਞੇਯ੍ਯਾ’’ਤਿਆਦਿਨਾ ਵੁਤ੍ਤਕਾਰਣੇਨ.