੫. ਖੁਦ੍ਦਕਵਤ੍ਥੁਕ੍ਖਨ੍ਧਕਂ

ਖੁਦ੍ਦਕਵਤ੍ਥੁਕਥਾਵਣ੍ਣਨਾ

੨੪੩. ਖੁਦ੍ਦਕਵਤ੍ਥੁਕ੍ਖਨ੍ਧਕੇ ਅਟ੍ਠਪਦਾਕਾਰੇਨਾਤਿ ਅਟ੍ਠਪਦਫਲਕਾਕਾਰੇਨ, ਜੂਤਫਲਕਸਦਿਸਨ੍ਤਿ ਵੁਤ੍ਤਂ ਹੋਤਿ. ਮਲ੍ਲਕਮੂਲਸਣ੍ਠਾਨੇਨਾਤਿ ਖੇਲ਼ਮਲ੍ਲਕਮੂਲਸਣ੍ਠਾਨੇਨ.

੨੪੫. ਮੁਤ੍ਤੋਲਮ੍ਬਕਾਦੀਨਨ੍ਤਿ ਆਦਿ-ਸਦ੍ਦੇਨ ਕੁਣ੍ਡਲਾਦਿਂ ਸਙ੍ਗਣ੍ਹਾਤਿ. ਪਲਮ੍ਬਕਸੁਤ੍ਤਨ੍ਤਿ ਯਞ੍ਞੋਪਚਿਤਾਕਾਰੇਨ ਓਲਮ੍ਬਕਸੁਤ੍ਤਂ.

੨੪੬. ਚਿਕ੍ਕਲੇਨਾਤਿ ਸਿਲੇਸੇਨ.

੨੪੮. ਸਾਧੁਗੀਤਨ੍ਤਿ ਅਨਿਚ੍ਚਤਾਦਿਪਟਿਸਂਯੁਤ੍ਤਗੀਤਂ.

੨੪੯. ਚਤੁਰਸ੍ਸੇਨ ਵਤ੍ਤੇਨਾਤਿ ਪਰਿਪੁਣ੍ਣੇਨ ਉਚ੍ਚਾਰਣਵਤ੍ਤੇਨ. ਤਰਙ੍ਗਵਤ੍ਤਾਦੀਨਂ ਉਚ੍ਚਾਰਣਵਿਧਾਨਾਨਿ ਨਟ੍ਠਪ੍ਪਯੋਗਾਨਿ. ਬਾਹਿਰਲੋਮਿਨ੍ਤਿ ਭਾਵਨਪੁਂਸਕਨਿਦ੍ਦੇਸੋ, ਯਥਾ ਤਸ੍ਸ ਉਣ੍ਣਪਾਵਾਰਸ੍ਸ ਬਹਿਦ੍ਧਾ ਲੋਮਾਨਿ ਦਿਸ੍ਸਨ੍ਤਿ, ਤਥਾ ਧਾਰੇਨ੍ਤਸ੍ਸ ਦੁਕ੍ਕਟਨ੍ਤਿ ਵੁਤ੍ਤਂ ਹੋਤਿ.

੨੫੧. ਇਮਾਨਿ ਚਤ੍ਤਾਰਿ ਅਹਿਰਾਜਕੁਲਾਨੀਤਿ (ਅ. ਨਿ. ਅਟ੍ਠ. ੨.੪.੬੭) ਇਦਂ ਦਟ੍ਠਵਿਸੇ ਸਨ੍ਧਾਯ ਵੁਤ੍ਤਂ. ਯੇ ਹਿ ਕੇਚਿ ਦਟ੍ਠਵਿਸਾ, ਸਬ੍ਬੇ ਤੇ ਇਮੇਸਂ ਚਤੁਨ੍ਨਂ ਅਹਿਰਾਜਕੁਲਾਨਂ ਅਬ੍ਭਨ੍ਤਰਗਤਾਵ ਹੋਨ੍ਤਿ. ਅਤ੍ਤਗੁਤ੍ਤਿਯਾਤਿ ਅਤ੍ਤਨੋ ਗੁਤ੍ਤਤ੍ਥਾਯ. ਅਤ੍ਤਰਕ੍ਖਾਯਾਤਿ ਅਤ੍ਤਨੋ ਰਕ੍ਖਣਤ੍ਥਾਯ. ਅਤ੍ਤਪਰਿਤ੍ਤਂਕਾਤੁਨ੍ਤਿ ਅਤ੍ਤਨੋ ਪਰਿਤ੍ਤਾਣਤ੍ਥਾਯ ਅਤ੍ਤਪਰਿਤ੍ਤਂ ਨਾਮ ਕਾਤੁਂ ਅਨੁਜਾਨਾਮੀਤਿ ਅਤ੍ਥੋ.

ਇਦਾਨਿ ਯਥਾ ਤਂ ਪਰਿਤ੍ਤਂ ਕਾਤਬ੍ਬਂ, ਤਂ ਦਸ੍ਸੇਤੁਂ ‘‘ਏਵਞ੍ਚ ਪਨ ਭਿਕ੍ਖਵੇ’’ਤਿਆਦਿਮਾਹ. ਤਤ੍ਥ (ਜਾ. ਅਟ੍ਠ. ੨.੨.੧੦੫) ਵਿਰੂਪਕ੍ਖੇਹੀਤਿ ਵਿਰੂਪਕ੍ਖਨਾਗਕੁਲੇਹਿ. ਸੇਸੇਸੁਪਿ ਏਸੇਵ ਨਯੋ. ਸਹਯੋਗੇ ਚੇਤਂ ਕਰਣਵਚਨਂ, ਏਤੇਹਿ ਸਹ ਮਯ੍ਹਂ ਮਿਤ੍ਤਭਾਵੋਤਿ ਵੁਤ੍ਤਂ ਹੋਤਿ ਅਪਾਦਕੇਹੀਤਿ ਅਪਾਦਕਸਤ੍ਤੇਹਿ. ਸੇਸੇਸੁਪਿ ਏਸੇਵ ਨਯੋ. ਸਬ੍ਬੇ ਸਤ੍ਤਾਤਿ ਇਤੋ ਪੁਬ੍ਬੇ ਏਤ੍ਤਕੇਨ ਠਾਨੇਨ ਓਦਿਸ੍ਸਕਮੇਤ੍ਤਂ ਕਥੇਤ੍ਵਾ ਇਦਾਨਿ ਅਨੋਦਿਸ੍ਸਕਮੇਤ੍ਤਂ ਕਥੇਤੁਂ ਇਦਮਾਰਦ੍ਧਂ. ਤਤ੍ਥ ਸਤ੍ਤਾ ਪਾਣਾ ਭੂਤਾਤਿ ਸਬ੍ਬਾਨੇਤਾਨਿ ਪੁਗ੍ਗਲਵੇਵਚਨਾਨੇਵ. ਭਦ੍ਰਾਨਿ ਪਸ੍ਸਨ੍ਤੂਤਿ ਭਦ੍ਰਾਨਿ ਆਰਮ੍ਮਣਾਨਿ ਪਸ੍ਸਨ੍ਤੁ. ਮਾ ਕਞ੍ਚਿ ਪਾਪਮਾਗਮਾਤਿ ਕਞ੍ਚਿ ਸਤ੍ਤਂ ਪਾਪਕਂ ਲਾਮਕਂ ਮਾ ਆਗਚ੍ਛਤੁ.

ਅਪ੍ਪਮਾਣੋ ਬੁਦ੍ਧੋਤਿ ਏਤ੍ਥ ਬੁਦ੍ਧੋਤਿ ਬੁਦ੍ਧਗੁਣਾ ਵੇਦਿਤਬ੍ਬਾ, ਤੇ ਹਿ ਅਪ੍ਪਮਾਣਾ ਨਾਮ. ਸੇਸਦ੍ਵਯੇਸੁਪਿ ਏਸੇਵ ਨਯੋ, ਪਮਾਣਵਨ੍ਤਾਨੀਤਿ ਗੁਣਪ੍ਪਮਾਣੇਨ ਯੁਤ੍ਤਾਨਿ. ਉਣ੍ਣਨਾਭੀਤਿ ਲੋਮਸਨਾਭਿਕੋ ਮਕ੍ਕਟਕੋ. ਸਰਬੂਤਿ ਘਰਗੋਲ਼ਿਕਾ. ਕਤਾ ਮੇ ਰਕ੍ਖਾ ਕਤਂ ਮੇ ਪਰਿਤ੍ਤਨ੍ਤਿ ਮਯਾ ਏਤ੍ਤਕਸ੍ਸ ਜਨਸ੍ਸ ਰਕ੍ਖਾ ਚ ਪਰਿਤ੍ਤਾਣਞ੍ਚ ਕਤਂ. ਪਟਿਕ੍ਕਮਨ੍ਤੁ ਭੂਤਾਨੀਤਿ ਸਬ੍ਬੇਪਿ ਮੇ ਕਤਪਰਿਤ੍ਤਾਣਾ ਸਤ੍ਤਾ ਅਪਗਚ੍ਛਨ੍ਤੁ, ਮਾ ਮਂ ਵਿਹੇਠਯਿਂਸੂਤਿ ਅਤ੍ਥੋ. ਸੋਹਨ੍ਤਿ ਯਸ੍ਸ ਮਮ ਏਤੇਹਿ ਸਬ੍ਬੇਹਿਪਿ ਮੇਤ੍ਤਂ, ਸੋ ਅਹਂ ਭਗਵਤੋ ਨਮੋ ਕਰੋਮਿ, ਵਿਪਸ੍ਸੀਆਦੀਨਞ੍ਚ ਸਤ੍ਤਨ੍ਨਂ ਸਮ੍ਮਾਸਮ੍ਬੁਦ੍ਧਾਨਂ ਨਮੋ ਕਰੋਮੀਤਿ ਸਮ੍ਬਨ੍ਧੋ.

ਅਞ੍ਞਮ੍ਹਿ ਛੇਤਬ੍ਬਮ੍ਹੀਤਿ ਰਾਗਾਨੁਸਯਂ ਸਨ੍ਧਾਯ ਵਦਤਿ. ਤਾਦਿਸਂ ਵਾ ਦੁਕ੍ਖਨ੍ਤਿ ਮੁਟ੍ਠਿਆਦੀਹਿ ਦੁਕ੍ਖਂ ਉਪ੍ਪਾਦੇਨ੍ਤਸ੍ਸ.

੨੫੨. ਜਾਲਾਨਿ ਪਰਿਕ੍ਖਿਪਾਪੇਤ੍ਵਾਤਿ ਪਰਿਸ੍ਸਯਮੋਚਨਤ੍ਥਞ੍ਚੇਵ ਪਮਾਦੇਨ ਗਲ਼ਿਤਾਨਂ ਆਭਰਣਾਦੀਨਂ ਰਕ੍ਖਣਤ੍ਥਞ੍ਚ ਜਾਲਾਨਿ ਕਰਣ੍ਡਕਾਕਾਰੇਨ ਪਰਿਕ੍ਖਿਪਾਪੇਤ੍ਵਾ. ਚਨ੍ਦਨਗਣ੍ਠਿ ਆਗਨ੍ਤ੍ਵਾ ਜਾਲੇ ਲਗ੍ਗਾਤਿ ਏਕੋ ਕਿਰ ਰਤ੍ਤਚਨ੍ਦਨਰੁਕ੍ਖੋ ਗਙ੍ਗਾਯ ਉਪਰਿਤੀਰੇ ਜਾਤੋ ਗਙ੍ਗੋਦਕੇਨ ਧੋਤਮੂਲੋ ਪਤਿਤ੍ਵਾ ਤਤ੍ਥ ਤਤ੍ਥ ਪਾਸਾਣੇਸੁ ਸਮ੍ਭਿਜ੍ਜਮਾਨੋ ਵਿਪ੍ਪਕਿਰਿ. ਤਤੋ ਏਕਾ ਘਟਪ੍ਪਮਾਣਾ ਘਟਿਕਾ ਪਾਸਾਣੇਸੁ ਘਂਸਿਯਮਾਨਾ ਉਦਕਊਮੀਹਿ ਪੋਥਿਯਮਾਨਾ ਮਟ੍ਠਾ ਹੁਤ੍ਵਾ ਅਨੁਪੁਬ੍ਬੇਨ ਵੁਯ੍ਹਮਾਨਾ ਸੇਵਾਲਪਰਿਯੋਨਦ੍ਧਾ ਆਗਨ੍ਤ੍ਵਾ ਤਸ੍ਮਿਂ ਜਾਲੇ ਲਗ੍ਗਿ. ਤਂ ਸਨ੍ਧਾਯੇਤਂ ਵੁਤ੍ਤਂ. ਲੇਖਨ੍ਤਿ ਲਿਖਿਤਗਹਿਤਂ ਚੁਣ੍ਣਂ. ਉਡ੍ਡਿਤ੍ਵਾਤਿ ਵੇਲ਼ੁਪਰਮ੍ਪਰਾਯ ਉਦ੍ਧਂ ਪਾਪੇਤ੍ਵਾ, ਉਟ੍ਠਾਪੇਤ੍ਵਾਤਿ ਵੁਤ੍ਤਂ ਹੋਤਿ. ਓਹਰਤੂਤਿ ਇਦ੍ਧਿਯਾ ਓਤਾਰੇਤ੍ਵਾ ਗਣ੍ਹਤੁ.

ਪੂਰਣਕਸ੍ਸਪਾਦਯੋ ਛ ਸਤ੍ਥਾਰੋ. ਤਤ੍ਥ (ਦੀ. ਨਿ. ਅਟ੍ਠ. ੧.੧੫੧-੧੫੨; ਮ. ਨਿ. ਅਟ੍ਠ. ੧.੩੧੨) ਪੂਰਣੋਤਿ ਤਸ੍ਸ ਸਤ੍ਥੁਪਟਿਞ੍ਞਸ੍ਸ ਨਾਮਂ. ਕਸ੍ਸਪੋਤਿ ਗੋਤ੍ਤਂ. ਸੋ ਕਿਰ ਅਞ੍ਞਤਰਸ੍ਸ ਕੁਲਸ੍ਸ ਏਕੂਨਦਾਸਸਤਂ ਪੂਰਯਮਾਨੋ ਜਾਤੋ. ਤੇਨਸ੍ਸ ‘‘ਪੂਰਣੋ’’ਤਿ ਨਾਮਂ ਅਕਂਸੁ. ਮਙ੍ਗਲਦਾਸਤ੍ਤਾ ਚਸ੍ਸ ਕਤਂ ‘‘ਦੁਕ੍ਕਟ’’ਨ੍ਤਿ ਵਤ੍ਤਾ ਨਤ੍ਥਿ, ਅਕਤਂ ਵਾ ‘‘ਨ ਕਤ’’ਨ੍ਤਿ. ਸੋ ‘‘ਕਿਮਹਂ ਏਤ੍ਥ ਵਸਾਮੀ’’ਤਿ ਪਲਾਯਿ. ਅਥਸ੍ਸ ਚੋਰਾ ਵਤ੍ਥਾਨਿ ਅਚ੍ਛਿਨ੍ਦਿਂਸੁ. ਸੋ ਪਣ੍ਣੇਨ ਵਾ ਤਿਣੇਨ ਵਾ ਪਟਿਚ੍ਛਾਦੇਤੁਮ੍ਪਿ ਅਜਾਨਨ੍ਤੋ ਜਾਤਰੂਪੇਨੇਵ ਏਕਂ ਗਾਮਂ ਪਾਵਿਸਿ. ਮਨੁਸ੍ਸਾ ਤਂ ਦਿਸ੍ਵਾ ‘‘ਅਯਂ ਸਮਣੋ ਅਰਹਾ ਅਪ੍ਪਿਚ੍ਛੋ, ਨਤ੍ਥਿ ਇਮਿਨਾ ਸਦਿਸੋ’’ਤਿ ਪੂਵਭਤ੍ਤਾਦੀਨਿ ਗਹੇਤ੍ਵਾ ਉਪਸਙ੍ਕਮਨ੍ਤਿ. ਸੋ ‘‘ਮਯ੍ਹਂ ਸਾਟਕਂ ਅਨਿਵਤ੍ਥਭਾਵੇਨ ਇਦਂ ਉਪ੍ਪਨ੍ਨ’’ਨ੍ਤਿ ਤਤੋ ਪਟ੍ਠਾਯ ਸਾਟਕਂ ਲਭਿਤ੍ਵਾਪਿ ਨ ਨਿਵਾਸੇਸਿ, ਤਦੇਵ ਪਬ੍ਬਜ੍ਜਂ ਅਗ੍ਗਹੇਸਿ. ਤਸ੍ਸ ਸਨ੍ਤਿਕੇ ਅਞ੍ਞੇਪਿ ਅਞ੍ਞੇਪੀਤਿ ਪਞ੍ਚਸਤਾ ਮਨੁਸ੍ਸਾ ਪਬ੍ਬਜਿਂਸੁ. ਏਵਮਯਂ ਗਣਾਚਰਿਯੋ ਹੁਤ੍ਵਾ ‘‘ਸਤ੍ਥਾ’’ਤਿ ਲੋਕੇ ਪਾਕਟੋ ਅਹੋਸਿ.

ਮਕ੍ਖਲੀਤਿ ਤਸ੍ਸ ਨਾਮਂ. ਗੋਸਾਲਾਯ ਜਾਤਤ੍ਤਾ ਗੋਸਾਲੋਤਿ ਦੁਤਿਯਨਾਮਂ. ਤਂ ਕਿਰ ਸਕਦ੍ਦਮਾਯ ਭੂਮਿਯਾ ਤੇਲਘਟਂ ਗਹੇਤ੍ਵਾ ਗਚ੍ਛਨ੍ਤਂ ‘‘ਤਾਤ ਮਾ ਖਲੀ’’ਤਿ ਸਾਮਿਕੋ ਆਹ. ਸੋ ਪਮਾਦੇਨ ਖਲਿਤ੍ਵਾ ਪਤਿਤ੍ਵਾ ਸਾਮਿਕਸ੍ਸ ਭਯੇਨ ਪਲਾਯਿਤੁਂ ਆਰਦ੍ਧੋ. ਸਾਮਿਕੋ ਉਪਧਾਵਿਤ੍ਵਾ ਸਾਟਕਕਣ੍ਣੇ ਅਗ੍ਗਹੇਸਿ, ਸੋ ਸਾਟਕਂ ਛਡ੍ਡੇਤ੍ਵਾ ਅਚੇਲਕੋ ਹੁਤ੍ਵਾ ਪਲਾਯਿ. ਸੇਸਂ ਪੂਰਣਸਦਿਸਮੇਵ.

ਅਜਿਤੋਤਿ ਤਸ੍ਸ ਨਾਮਂ. ਕੇਸਕਮ੍ਬਲਂ ਧਾਰੇਤੀਤਿ ਕੇਸਕਮ੍ਬਲੋ. ਇਤਿ ਨਾਮਦ੍ਵਯਂ ਸਂਸਨ੍ਦਿਤ੍ਵਾ ‘‘ਅਜਿਤੋ ਕੇਸਕਮ੍ਬਲੋ’’ਤਿ ਵੁਚ੍ਚਤਿ. ਤਤ੍ਥ ਕੇਸਕਮ੍ਬਲੋ ਨਾਮ ਮਨੁਸ੍ਸਾਨਂ ਕੇਸੇਹਿ ਕਤਕਮ੍ਬਲੋ. ਤਤੋ ਪਟਿਕਿਟ੍ਠਤਰਂ ਵਤ੍ਥਂ ਨਾਮ ਨਤ੍ਥਿ. ਯਥਾਹ ‘‘ਸੇਯ੍ਯਥਾਪਿ, ਭਿਕ੍ਖਵੇ, ਯਾਨਿ ਕਾਨਿਚਿ ਤਨ੍ਤਾਵੁਤਾਨਂ ਵਤ੍ਥਾਨਂ, ਕੇਸਕਮ੍ਬਲੋ ਤੇਸਂ ਪਟਿਕਿਟ੍ਠੋ ਅਕ੍ਖਾਯਤਿ. ਕੇਸਕਮ੍ਬਲੋ, ਭਿਕ੍ਖਵੇ, ਸੀਤੇ ਸੀਤੋ ਉਣ੍ਹੇ ਉਣ੍ਹੋ ਦੁਬ੍ਬਣ੍ਣੋ ਦੁਗ੍ਗਨ੍ਧੋ ਦੁਕ੍ਖਸਮ੍ਫਸ੍ਸੋ’’ਤਿ (ਅ. ਨਿ. ੩.੧੩੮).

ਪਕੁਧੋਤਿ ਤਸ੍ਸ ਨਾਮਂ. ਕਚ੍ਚਾਯਨੋਤਿ ਗੋਤ੍ਤਂ. ਇਤਿ ਨਾਮਗੋਤ੍ਤਂ ਸਂਸਨ੍ਦਿਤ੍ਵਾ ‘‘ਪਕੁਧੋ ਕਚ੍ਚਾਯਨੋ’’ਤਿ ਵੁਚ੍ਚਤਿ. ਸੀਤੂਦਕਪਟਿਕ੍ਖਿਤ੍ਤਕੋ ਏਸ, ਵਚ੍ਚਂ ਕਤ੍ਵਾਪਿ ਉਦਕਕਿਚ੍ਚਂ ਨ ਕਰੋਤਿ, ਉਣ੍ਹੋਦਕਂ ਵਾ ਕਞ੍ਜਿਯਂ ਵਾ ਲਭਿਤ੍ਵਾ ਕਰੋਤਿ, ਨਦਿਂ ਵਾ ਮਗ੍ਗੋਦਕਂ ਵਾ ਅਤਿਕ੍ਕਮ੍ਮ ‘‘ਸੀਲਂ ਮੇ ਭਿਨ੍ਨ’’ਨ੍ਤਿ ਵਾਲਿਕਥੂਪਂ ਕਤ੍ਵਾ ਸੀਲਂ ਅਧਿਟ੍ਠਾਯ ਗਚ੍ਛਤਿ. ਏਵਰੂਪਨਿਸ੍ਸਿਰਿਕਲਦ੍ਧਿਕੋ ਏਸ.

ਸਞ੍ਚਯੋਤਿ ਤਸ੍ਸ ਨਾਮਂ. ਬੇਲਟ੍ਠਸ੍ਸ ਪੁਤ੍ਤੋ ਬੇਲਟ੍ਠਪੁਤ੍ਤੋ. ‘‘ਅਮ੍ਹਾਕਂ ਗਣ੍ਠਨਕਿਲੇਸੋ ਪਲਿਬੁਨ੍ਧਨਕਿਲੇਸੋ ਨਤ੍ਥਿ, ਕਿਲੇਸਗਣ੍ਠਿਰਹਿਤਾ ਮਯ’’ਨ੍ਤਿ ਏਵਂਵਾਦਿਤਾਯ ਲਦ੍ਧਨਾਮਵਸੇਨ ਨਿਗਣ੍ਠੋ. ਨਾਟਸ੍ਸ ਪੁਤ੍ਤੋਤਿ ਨਾਟਪੁਤ੍ਤੋ.

ਪਿਣ੍ਡੋਲਭਾਰਦ੍ਵਾਜੋਤਿ (ਉਦਾ. ਅਟ੍ਠ. ੩੬) ਪਿਣ੍ਡਂ ਉਲਮਾਨੋ ਪਰਿਯੇਸਮਾਨੋ ਪਬ੍ਬਜਿਤੋਤਿ ਪਿਣ੍ਡੋਲੋ. ਸੋ ਕਿਰ ਪਰਿਜਿਣ੍ਣਭੋਗੋ ਬ੍ਰਾਹ੍ਮਣੋ ਹੁਤ੍ਵਾ ਮਹਨ੍ਤਂ ਭਿਕ੍ਖੁਸਙ੍ਘਸ੍ਸ ਲਾਭਸਕ੍ਕਾਰਂ ਦਿਸ੍ਵਾ ਪਿਣ੍ਡਤ੍ਥਾਯ ਨਿਕ੍ਖਮਿਤ੍ਵਾ ਪਬ੍ਬਜਿਤੋ. ਸੋ ਮਹਨ੍ਤਂ ਕਪਲ੍ਲਪਤ੍ਤਂ ‘‘ਪਤ੍ਤ’’ਨ੍ਤਿ ਗਹੇਤ੍ਵਾ ਚਰਤਿ, ਕਪਲ੍ਲਪੂਰਂ ਯਾਗੁਂ ਪਿਵਤਿ, ਭਤ੍ਤਂ ਭੁਞ੍ਜਤਿ, ਪੂਵਖਜ੍ਜਕਞ੍ਚ ਖਾਦਤਿ. ਅਥਸ੍ਸ ਮਹਗ੍ਘਸਭਾਵਂ ਸਤ੍ਥੁ ਆਰੋਚਯਿਂਸੁ. ਸਤ੍ਥਾ ਤਸ੍ਸ ਪਤ੍ਤਤ੍ਥਵਿਕਂ ਨਾਨੁਜਾਨਿ. ਥੇਰੋ ਹੇਟ੍ਠਾਮਞ੍ਚੇ ਪਤ੍ਤਂ ਨਿਕੁਜ੍ਜਿਤ੍ਵਾ ਠਪੇਤਿ. ਸੋ ਠਪੇਨ੍ਤੋਪਿ ਘਂਸੇਨ੍ਤੋਵ ਪਣਾਮੇਤ੍ਵਾ ਠਪੇਤਿ, ਗਣ੍ਹਨ੍ਤੋਪਿ ਘਂਸੇਨ੍ਤੋਵ ਆਕਡ੍ਢਿਤ੍ਵਾ ਗਣ੍ਹਾਤਿ. ਤਂ ਗਚ੍ਛਨ੍ਤੇ ਗਚ੍ਛਨ੍ਤੇ ਕਾਲੇ ਘਂਸਨੇਨ ਪਰਿਕ੍ਖੀਣਂ ਨਾਲ਼ਿਕੋਦਨਮਤ੍ਤਸ੍ਸੇਵ ਗਣ੍ਹਨਕਂ ਜਾਤਂ. ਤਤੋ ਸਤ੍ਥੁ ਆਰੋਚੇਸੁਂ. ਅਥਸ੍ਸ ਸਤ੍ਥਾ ਪਤ੍ਤਤ੍ਥਵਿਕਂ ਅਨੁਜਾਨਿ. ਥੇਰੋ ਅਪਰੇਨ ਸਮਯੇਨ ਇਨ੍ਦ੍ਰਿਯਭਾਵਨਂ ਭਾਵੇਨ੍ਤੋ ਅਗ੍ਗਫਲੇ ਅਰਹਤ੍ਤੇ ਪਤਿਟ੍ਠਾਸਿ. ਇਤਿ ਸੋ ਪੁਬ੍ਬੇ ਸਵਿਸੇਸਂ ਪਿਣ੍ਡਤ੍ਥਾਯ ਉਲਤੀਤਿ ਪਿਣ੍ਡੋਲੋ. ਗੋਤ੍ਤੇਨ ਪਨ ਭਾਰਦ੍ਵਾਜੋਤਿ ਉਭਯਂ ਏਕਤੋ ਕਤ੍ਵਾ ‘‘ਪਿਣ੍ਡੋਲਭਾਰਦ੍ਵਾਜੋ’’ਤਿ ਵੁਚ੍ਚਤਿ.

‘‘ਅਥ ਖੋ ਆਯਸ੍ਮਾ ਪਿਣ੍ਡੋਲਭਾਰਦ੍ਵਾਜੋ…ਪੇ… ਏਤਦਵੋਚਾ’’ਤਿ ਕਸ੍ਮਾ ਏਵਮਾਹਂਸੁ? ਸੋ ਕਿਰ (ਧ. ਪ. ਅਟ੍ਠ. ੨.੧੮੦ ਦੇਵੋਰੋਹਣਵਤ੍ਥੁ) ਸੇਟ੍ਠਿ ਨੇਵ ਸਮ੍ਮਾਦਿਟ੍ਠਿ, ਨ ਮਿਚ੍ਛਾਦਿਟ੍ਠਿ, ਮਜ੍ਝਤ੍ਤਧਾਤੁਕੋ. ਸੋ ਚਿਨ੍ਤੇਸਿ ‘‘ਮਯ੍ਹਂ ਗੇਹੇ ਚਨ੍ਦਨਂ ਬਹੁ, ਕਿਂ ਨੁ ਖੋ ਇਮਿਨਾ ਕਰਿਸ੍ਸਾਮੀ’’ਤਿ. ਅਥਸ੍ਸ ਏਤਦਹੋਸਿ ‘‘ਇਮਸ੍ਮਿਂ ਲੋਕੇ ‘ਮਯਂ ਅਰਹਨ੍ਤੋ, ਮਯਂ ਅਰਹਨ੍ਤੋ’ਤਿ ਵਤ੍ਤਾਰੋ ਬਹੂ, ਅਹਂ ਏਕਂ ਅਰਹਨ੍ਤਮ੍ਪਿ ਨ ਜਾਨਾਮਿ, ਗੇਹੇ ਭਮਂ ਯੋਜੇਤ੍ਵਾ ਪਤ੍ਤਂ ਲਿਖਾਪੇਤ੍ਵਾ ਸਿਕ੍ਕਾਯ ਠਪੇਤ੍ਵਾ ਵੇਲ਼ੁਪਰਮ੍ਪਰਾਯ ਸਟ੍ਠਿਹਤ੍ਥਮਤ੍ਤੇ ਆਕਾਸੇ ਓਲਮ੍ਬਾਪੇਤ੍ਵਾ ‘ਸਚੇ ਅਰਹਾ ਅਤ੍ਥਿ, ਆਕਾਸੇਨਾਗਨ੍ਤ੍ਵਾ ਗਣ੍ਹਾਤੂ’ਤਿ ਵਕ੍ਖਾਮਿ. ਯੋ ਤਂ ਗਹੇਸ੍ਸਤਿ, ਤਸ੍ਸ ਸਪੁਤ੍ਤਦਾਰੋ ਸਰਣਂ ਗਮਿਸ੍ਸਾਮੀ’’ਤਿ. ਸੋ ਚਿਨ੍ਤਿਤਨਿਯਾਮੇਨੇਵ ਪਤ੍ਤਂ ਲਿਖਾਪੇਤ੍ਵਾ ਵੇਲ਼ੁਪਰਮ੍ਪਰਾਯ ਉਸ੍ਸਾਪੇਤ੍ਵਾ ‘‘ਯੋ ਇਮਸ੍ਮਿਂ ਲੋਕੇ ਅਰਹਾ, ਸੋ ਆਕਾਸੇਨ ਆਗਨ੍ਤ੍ਵਾ ਇਮਂ ਪਤ੍ਤਂ ਗਣ੍ਹਾਤੂ’’ਤਿ ਆਹ.

ਤਦਾ ਛ ਸਤ੍ਥਾਰੋ ‘‘ਅਮ੍ਹਾਕਂ ਏਸ ਅਨੁਚ੍ਛਵਿਕੋ, ਅਮ੍ਹਾਕਮੇਵ ਨਂ ਦੇਹੀ’’ਤਿ ਵਦਿਂਸੁ. ਸੋ ‘‘ਆਕਾਸੇਨਾਗਨ੍ਤ੍ਵਾ ਗਣ੍ਹਥਾ’’ਤਿ ਆਹ. ਛਟ੍ਠੇ ਦਿਵਸੇ ਨਿਗਣ੍ਠੋ ਨਾਟਪੁਤ੍ਤੋ ਅਨ੍ਤੇਵਾਸਿਕੇ ਪੇਸੇਸਿ ‘‘ਗਚ੍ਛਥ ਸੇਟ੍ਠਿਂ ਏਵਂ ਵਦੇਥ ‘ਅਮ੍ਹਾਕਂ ਆਚਰਿਯਸ੍ਸੇਵ ਅਨੁਚ੍ਛਵਿਕੋ, ਮਾ ਅਪ੍ਪਮਤ੍ਤਕਸ੍ਸ ਕਾਰਣਾ ਆਕਾਸੇਨ ਆਗਮਨਂ ਕਰਿ, ਦੇਹਿ ਕਿਰ ਤੇ ਪਤ੍ਤ’ਨ੍ਤਿ’’. ਤੇ ਗਨ੍ਤ੍ਵਾ ਸੇਟ੍ਠਿਂ ਤਥਾ ਵਦਿਂਸੁ. ਸੇਟ੍ਠਿ ‘‘ਆਕਾਸੇਨਾਗਨ੍ਤ੍ਵਾ ਗਣ੍ਹਿਤੁਂ ਸਮਤ੍ਥੋਵ ਗਣ੍ਹਾਤੂ’’ਤਿ ਆਹ. ਨਾਟਪੁਤ੍ਤੋ ਸਯਂ ਗਨ੍ਤੁਕਾਮੋ ਹੁਤ੍ਵਾ ਅਨ੍ਤੇਵਾਸਿਕਾਨਂ ਸਞ੍ਞਂ ਅਦਾਸਿ ‘‘ਅਹਂ ਏਕਂ ਹਤ੍ਥਞ੍ਚ ਪਾਦਞ੍ਚ ਉਕ੍ਖਿਪਿਤ੍ਵਾ ਉਪ੍ਪਤਿਤੁਕਾਮੋ ਵਿਯ ਭਵਿਸ੍ਸਾਮਿ, ਤੁਮ੍ਹੇ ਮਂ ‘ਆਚਰਿਯ ਕਿਂ ਕਰੋਥ, ਦਾਰੁਮਯਪਤ੍ਤਸ੍ਸ ਕਾਰਣਾ ਪਟਿਚ੍ਛਨ੍ਨਂ ਅਰਹਤ੍ਤਗੁਣਂ ਮਹਾਜਨਸ੍ਸ ਮਾ ਦਸ੍ਸਯਿਤ੍ਥਾ’ਤਿ ਵਤ੍ਵਾ ਮਂ ਹਤ੍ਥੇਸੁ ਚ ਪਾਦੇਸੁ ਚ ਗਹੇਤ੍ਵਾ ਆਕਡ੍ਢਨ੍ਤਾ ਭੂਮਿਯਂ ਪਾਤੇਯ੍ਯਾਥਾ’’ਤਿ. ਸੋ ਤਤ੍ਥ ਗਨ੍ਤ੍ਵਾ ਸੇਟ੍ਠਿਂ ਆਹ ‘‘ਮਹਾਸੇਟ੍ਠਿ ਅਯਂ ਪਤ੍ਤੋ ਅਞ੍ਞੇਸਂ ਨਾਨੁਚ੍ਛਵਿਕੋ, ਮਾ ਤੇ ਅਪ੍ਪਮਤ੍ਤਕਸ੍ਸ ਕਾਰਣਾ ਮਮ ਆਕਾਸੇ ਉਪ੍ਪਤਨਂ ਰੁਚ੍ਚਿ, ਦੇਹਿ ਮੇ ਪਤ੍ਤ’’ਨ੍ਤਿ. ਭਨ੍ਤੇ, ਆਕਾਸੇਨ ਉਪ੍ਪਤਿਤ੍ਵਾਵ ਗਣ੍ਹਥਾਤਿ. ਤਤੋ ਨਾਟਪੁਤ੍ਤੋ ‘‘ਤੇਨ ਹਿ ਅਪੇਥ ਅਪੇਥਾ’’ਤਿ ਅਨ੍ਤੇਵਾਸਿਕੇ ਅਪਨੇਤ੍ਵਾ ‘‘ਆਕਾਸੇ ਉਪ੍ਪਤਿਸ੍ਸਾਮੀ’’ਤਿ ਏਕਂ ਹਤ੍ਥਞ੍ਚ ਪਾਦਞ੍ਚ ਉਕ੍ਖਿਪਿ. ਅਥ ਨਂ ਅਨ੍ਤੇਵਾਸਿਕਾ ‘‘ਆਚਰਿਯ, ਕਿਂ ਨਾਮੇਤਂ ਕਰੋਥ, ਛਵਸ੍ਸ ਦਾਰੁਮਯਪਤ੍ਤਸ੍ਸ ਕਾਰਣਾ ਪਟਿਚ੍ਛਨ੍ਨਗੁਣੇਨ ਤੁਮ੍ਹੇਹਿ ਮਹਾਜਨਸ੍ਸ ਦਸ੍ਸਿਤੇਨ ਕੋ ਅਤ੍ਥੋ’’ਤਿ ਤਂ ਹਤ੍ਥਪਾਦੇਸੁ ਗਹੇਤ੍ਵਾ ਆਕਡ੍ਢਿਤ੍ਵਾ ਭੂਮਿਯਂ ਪਾਤੇਸੁਂ. ਸੋ ਸੇਟ੍ਠਿਂ ਆਹ ‘‘ਮਹਾਸੇਟ੍ਠਿ, ਇਮੇ ਮੇ ਉਪ੍ਪਤਿਤੁਂ ਨ ਦੇਨ੍ਤਿ, ਦੇਹਿ ਮੇ ਪਤ੍ਤ’’ਨ੍ਤਿ. ਉਪ੍ਪਤਿਤ੍ਵਾਵ ਗਣ੍ਹਥ ਭਨ੍ਤੇਤਿ. ਏਵਂ ਤਿਤ੍ਥਿਯਾ ਛ ਦਿਵਸਾਨਿ ਵਾਯਮਿਤ੍ਵਾਪਿ ਪਤ੍ਤਂ ਨ ਲਭਿਂਸੁਯੇਵ.

ਅਥ ਸਤ੍ਤਮੇ ਦਿਵਸੇ ਆਯਸ੍ਮਤੋ ਚ ਮੋਗ੍ਗਲ੍ਲਾਨਸ੍ਸ ਆਯਸ੍ਮਤੋ ਚ ਪਿਣ੍ਡੋਲਭਾਰਦ੍ਵਾਜਸ੍ਸ ‘‘ਰਾਜਗਹੇ ਪਿਣ੍ਡਾਯ ਚਰਿਸ੍ਸਾਮਾ’’ਤਿ ਗਨ੍ਤ੍ਵਾ ਏਕਸ੍ਮਿਂ ਪਿਟ੍ਠਿਪਾਸਾਣੇ ਠਤ੍ਵਾ ਚੀਵਰਂ ਪਾਰੁਪਨਕਾਲੇ ਧੁਤ੍ਤਕਾ ਕਥਂ ਸਮੁਟ੍ਠਾਪੇਸੁਂ ‘‘ਹਮ੍ਭੋ ਪੁਬ੍ਬੇ ਛ ਸਤ੍ਥਾਰੋ ‘ਮਯਂ ਅਰਹਨ੍ਤਾਮ੍ਹਾ’ਤਿ ਵਿਚਰਿਂਸੁ, ਰਾਜਗਹਸੇਟ੍ਠਿਨੋ ਪਨ ਅਜ੍ਜ ਸਤ੍ਤਮੋ ਦਿਵਸੋ ਪਤ੍ਤਂ ਉਸ੍ਸਾਪੇਤ੍ਵਾ ਠਪਯਤੋ ‘ਸਚੇ ਅਰਹਾ ਅਤ੍ਥਿ, ਆਕਾਸੇਨਾਗਨ੍ਤ੍ਵਾ ਗਣ੍ਹਾਤੂ’ਤਿ ਵਦਨ੍ਤਸ੍ਸ, ਏਕੋਪਿ ‘ਅਹਂ ਅਰਹਾ’ਤਿ ਆਕਾਸੇ ਉਪ੍ਪਤਨ੍ਤੋ ਨਤ੍ਥਿ, ਅਜ੍ਜ ਨੋ ਲੋਕੇ ਅਰਹਨ੍ਤਾਨਂ ਨਤ੍ਥਿਭਾਵੋ ਞਾਤੋ’’ਤਿ. ਤਂ ਕਥਂ ਸੁਤ੍ਵਾ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ਆਯਸ੍ਮਨ੍ਤਂ ਪਿਣ੍ਡੋਲਭਾਰਦ੍ਵਾਜਂ ਆਹ ‘‘ਸੁਤਂ ਤੇ, ਆਵੁਸੋ ਭਾਰਦ੍ਵਾਜ, ਇਮੇਸਂ ਵਚਨਂ, ਇਮੇ ਬੁਦ੍ਧਸਾਸਨਂ ਪਰਿਗ੍ਗਣ੍ਹਨ੍ਤਾ ਵਿਯ ਵਦਨ੍ਤਿ, ਤ੍ਵਞ੍ਚ ਮਹਿਦ੍ਧਿਕੋ ਮਹਾਨੁਭਾਵੋ, ਗਚ੍ਛੇਤਂ ਪਤ੍ਤਂ ਆਕਾਸੇਨ ਗਨ੍ਤ੍ਵਾ ਗਣ੍ਹਾਹੀ’’ਤਿ. ‘‘ਆਵੁਸੋ ਮੋਗ੍ਗਲ੍ਲਾਨ, ਤ੍ਵਂ ‘ਇਦ੍ਧਿਮਨ੍ਤਾਨਂ ਅਗ੍ਗੋ’ਤਿ ਪਾਕਟੋ, ਤ੍ਵਂ ਏਤਂ ਗਣ੍ਹ, ਤਯਿ ਪਨ ਅਗ੍ਗਣ੍ਹਨ੍ਤੇ ਅਹਂ ਗਣ੍ਹਿਸ੍ਸਾਮੀ’’ਤਿ ਆਹ. ਅਥ ਆਯਸ੍ਮਾ ਮਹਾਮੋਗ੍ਗਲ੍ਲਾਨੋ ‘‘ਗਣ੍ਹਾਵੁਸੋ’’ਤਿ ਆਹ. ਇਤਿ ਤੇ ਲੋਕਸ੍ਸ ਅਰਹਨ੍ਤੇਹਿ ਅਸੁਞ੍ਞਭਾਵਦਸ੍ਸਨਤ੍ਥਂ ਏਵਮਾਹਂਸੁ.

ਤਿਕ੍ਖਤ੍ਤੁਂ ਰਾਜਗਹਂ ਅਨੁਪਰਿਯਾਯੀਤਿ ਤਿਕ੍ਖਤ੍ਤੁਂ ਰਾਜਗਹਂ ਅਨੁਗਨ੍ਤ੍ਵਾ ਪਰਿਬ੍ਭਮਿ. ‘‘ਸਤ੍ਤਕ੍ਖਤ੍ਤੁ’’ਨ੍ਤਿਪਿ ਵਦਨ੍ਤਿ. ਥੇਰੋ ਕਿਰ ਅਭਿਞ੍ਞਾਪਾਦਕਂ ਝਾਨਂ ਸਮਾਪਜ੍ਜਿਤ੍ਵਾ ਉਟ੍ਠਾਯ ਤਿਗਾਵੁਤਂ ਪਿਟ੍ਠਿਪਾਸਾਣਂ ਅਨ੍ਤਨ੍ਤੇਨ ਪਰਿਚ੍ਛਿਨ੍ਦਨ੍ਤੋ ਤੂਲਪਿਚੁ ਵਿਯ ਆਕਾਸੇ ਉਟ੍ਠਾਪੇਤ੍ਵਾ ਰਾਜਗਹਨਗਰਸ੍ਸ ਉਪਰਿ ਸਤ੍ਤਕ੍ਖਤ੍ਤੁਂ ਅਨੁਪਰਿਯਾਯਿ. ਸੋ ਤਿਗਾਵੁਤਪ੍ਪਮਾਣਸ੍ਸ ਨਗਰਸ੍ਸ ਅਪਿਧਾਨਂ ਵਿਯ ਪਞ੍ਞਾਯਿ. ਨਗਰਵਾਸਿਨੋ ‘‘ਪਾਸਾਣੋ ਨੋ ਅਵਤ੍ਥਰਿਤ੍ਵਾ ਗਣ੍ਹਾਤੀ’’ਤਿ ਭੀਤਾ ਸੁਪ੍ਪਾਦੀਨਿ ਮਤ੍ਥਕੇ ਕਤ੍ਵਾ ਤਤ੍ਥ ਤਤ੍ਥ ਨਿਲੀਯਿਂਸੁ. ਸਤ੍ਤਮੇ ਵਾਰੇ ਥੇਰੋ ਪਿਟ੍ਠਿਪਾਸਾਣਂ ਭਿਨ੍ਦਿਤ੍ਵਾ ਅਤ੍ਤਾਨਂ ਦਸ੍ਸੇਤਿ. ਮਹਾਜਨੋ ਥੇਰਂ ਦਿਸ੍ਵਾ ‘‘ਭਨ੍ਤੇ ਪਿਣ੍ਡੋਲਭਾਰਦ੍ਵਾਜ, ਤਵ ਪਾਸਾਣਂ ਗਾਲ਼੍ਹਂ ਕਤ੍ਵਾ ਗਣ੍ਹ, ਮਾ ਨੋ ਸਬ੍ਬੇ ਨਾਸਯੀ’’ਤਿ ਆਹ. ਥੇਰੋ ਪਾਸਾਣਂ ਪਾਦਨ੍ਤੇਨ ਖਿਪਿਤ੍ਵਾ ਵਿਸ੍ਸਜ੍ਜੇਸਿ. ਸੋ ਗਨ੍ਤ੍ਵਾ ਯਥਾਠਾਨੇਯੇਵ ਪਤਿਟ੍ਠਾਸਿ. ਥੇਰੋ ਸੇਟ੍ਠਿਸ੍ਸ ਗੇਹਮਤ੍ਥਕੇ ਅਟ੍ਠਾਸਿ. ਤਂ ਦਿਸ੍ਵਾ ਸੇਟ੍ਠਿ ਉਰੇਨ ਨਿਪਜ੍ਜਿਤ੍ਵਾ ‘‘ਓਤਰ ਸਾਮੀ’’ਤਿ ਵਤ੍ਵਾ ਆਕਾਸਤੋ ਓਤਿਣ੍ਣਂ ਥੇਰਂ ਨਿਸੀਦਾਪੇਤ੍ਵਾ ਪਤ੍ਤਂ ਗਹੇਤ੍ਵਾ ਚਤੁਮਧੁਰਪੁਣ੍ਣਂ ਕਤ੍ਵਾ ਥੇਰਸ੍ਸ ਅਦਾਸਿ. ਥੇਰੋ ਪਤ੍ਤਂ ਗਹੇਤ੍ਵਾ ਵਿਹਾਰਾਭਿਮੁਖੋ ਪਾਯਾਸਿ. ਅਥਸ੍ਸ ਯੇ ਅਰਞ੍ਞਗਤਾ ਪਾਟਿਹਾਰਿਯਂ ਨਾਦ੍ਦਸਂਸੁ, ਤੇ ਸਨ੍ਨਿਪਤਿਤ੍ਵਾ ‘‘ਭਨ੍ਤੇ, ਅਮ੍ਹਾਕਮ੍ਪਿ ਪਾਟਿਹਾਰਿਯਂ ਦਸ੍ਸੇਹੀ’’ਤਿ ਥੇਰਂ ਅਨੁਬਨ੍ਧਿਂਸੁ. ਸੋ ਤੇਸਂ ਤੇਸਂ ਪਾਟਿਹਾਰਿਯਂ ਦਸ੍ਸੇਨ੍ਤੋ ਵਿਹਾਰਂ ਅਗਮਾਸਿ. ਸਤ੍ਥਾ ਤਂ ਅਨੁਬਨ੍ਧਿਤ੍ਵਾ ਉਨ੍ਨਾਦੇਨ੍ਤਸ੍ਸ ਮਹਾਜਨਸ੍ਸ ਸਦ੍ਦਂ ਸੁਤ੍ਵਾ ‘‘ਆਨਨ੍ਦ, ਕਸ੍ਸੇਸੋ ਸਦ੍ਦੋ’’ਤਿ ਪੁਚ੍ਛਿ. ਤੇਨ ਵੁਤ੍ਤਂ ‘‘ਅਸ੍ਸੋਸਿ ਖੋ ਭਗਵਾ…ਪੇ… ਕਿਂ ਨੁ ਖੋ ਸੋ, ਆਨਨ੍ਦ, ਉਚ੍ਚਾਸਦ੍ਦੋ ਮਹਾਸਦ੍ਦੋ’’ਤਿ.

ਵਿਕੁਬ੍ਬਨਿਦ੍ਧਿਯਾ ਪਾਟਿਹਾਰਿਯਂ ਪਟਿਕ੍ਖਿਤ੍ਤਨ੍ਤਿ ਏਤ੍ਥ ਵਿਕੁਬ੍ਬਨਿਦ੍ਧਿ ਨਾਮ ‘‘ਸੋ ਪਕਤਿਵਣ੍ਣਂ ਵਿਜਹਿਤ੍ਵਾ ਕੁਮਾਰਕਵਣ੍ਣਂ ਵਾ ਦਸ੍ਸੇਤਿ ਨਾਗਵਣ੍ਣਂ ਵਾ, ਵਿਵਿਧਮ੍ਪਿ ਸੇਨਾਬ੍ਯੂਹਂ ਦਸ੍ਸੇਤੀ’’ਤਿ (ਪਟਿ. ਮ. ੩.੧੩) ਏਵਮਾਗਤਾ ਪਕਤਿਵਣ੍ਣਵਿਜਹਨਵਿਕਾਰਵਸੇਨ ਪਵਤ੍ਤਾ ਇਦ੍ਧਿ. ਅਧਿਟ੍ਠਾਨਿਦ੍ਧਿ ਪਨ ‘‘ਪਕਤਿਯਾ ਏਕੋ ਬਹੁਕਂ ਆਵਜ੍ਜਤਿ ਸਤਂ ਵਾ ਸਹਸ੍ਸਂ ਵਾ ਸਤਸਹਸ੍ਸਂ ਵਾ, ਆਵਜ੍ਜਿਤ੍ਵਾ ਞਾਣੇਨ ਅਧਿਟ੍ਠਾਤਿ ‘ਬਹੁਕੋ ਹੋਮੀ’’’ਤਿ (ਪਟਿ. ਮ. ੩.੧੦ ਦਸਇਦ੍ਧਿਨਿਦ੍ਦੇਸ) ਏਵਂ ਵਿਭਜਿਤ੍ਵਾ ਦਸ੍ਸਿਤਾ ਅਧਿਟ੍ਠਾਨਵਸੇਨ ਨਿਪ੍ਫਨ੍ਨਾ ਇਦ੍ਧਿ.

੨੫੩-੨੫੪. ਨ ਅਚ੍ਛੁਪਿਯਨ੍ਤੀਤਿ ਨ ਸੁਫਸ੍ਸਿਤਾਨਿ ਹੋਨ੍ਤਿ. ਰੂਪਕਾਕਿਣ੍ਣਾਨੀਤਿ ਇਤ੍ਥਿਰੂਪਾਦੀਹਿ ਆਕਿਣ੍ਣਾਨਿ. ਭੂਮਿਆਧਾਰਕੇਤਿ ਵਲਯਾਧਾਰਕੇ. ਦਾਰੁਆਧਾਰਕਦਣ੍ਡਾਧਾਰਕੇਸੂਤਿ ਏਕਦਾਰੁਨਾ ਕਤਆਧਾਰਕੇ ਬਹੂਹਿ ਦਣ੍ਡਕੇਹਿ ਕਤਆਧਾਰਕੇ ਵਾਤਿ ਅਤ੍ਥੋ, ਤੀਹਿ ਦਣ੍ਡੇਹਿ ਕਤੋ ਪਨ ਨ ਵਟ੍ਟਤਿ. ਭੂਮਿਯਂ ਪਨ ਨਿਕ੍ਕੁਜ੍ਜਿਤ੍ਵਾ ਏਕਮੇਵ ਠਪੇਤਬ੍ਬਨ੍ਤਿ ਏਤ੍ਥ ਦ੍ਵੇ ਠਪੇਨ੍ਤੇਨ ਉਪਰਿ ਠਪਿਤਪਤ੍ਤਂ ਏਕੇਨ ਪਸ੍ਸੇਨ ਭੂਮਿਯਂ ਫੁਸਾਪੇਤ੍ਵਾ ਠਪੇਤੁਂ ਵਟ੍ਟਤੀਤਿ ਵਦਨ੍ਤਿ. ਆਲਿਨ੍ਦਕਮਿਡ੍ਢਿਕਾਦੀਨਨ੍ਤਿ ਪਮੁਖਮਿਡ੍ਢਿਕਾਨਂ. ਪਰਿਵਤ੍ਤਿਤ੍ਵਾ ਤਤ੍ਥੇਵ ਪਤਿਟ੍ਠਾਤੀਤਿ ਏਤ੍ਥ ‘‘ਪਰਿਵਤ੍ਤਿਤ੍ਵਾ ਤਤਿਯਵਾਰੇ ਤਤ੍ਥੇਵ ਮਿਡ੍ਢਿਯਾ ਪਤਿਟ੍ਠਾਤੀ’’ਤਿ ਗਣ੍ਠਿਪਦੇਸੁ ਵੁਤ੍ਤਂ. ਪਰਿਭਣ੍ਡਂ ਨਾਮ ਗੇਹਸ੍ਸ ਬਹਿ ਕੁਟ੍ਟਪਾਦਸ੍ਸ ਥਿਰਭਾਵਤ੍ਥਂ ਕਤਾ ਤਨੁਕਮਿਡ੍ਢਿਕਾ ਵੁਚ੍ਚਤਿ. ਤਨੁਕਮਿਡ੍ਢਿਕਾਯਾਤਿ ਖੁਦ੍ਦਕਮਿਡ੍ਢਿਕਾਯ. ਮਿਡ੍ਢਨ੍ਤੇਪਿ ਆਧਾਰਕੇ ਠਪੇਤੁਂ ਵਟ੍ਟਤਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਆਧਾਰਕ’’ਨ੍ਤਿ ਹਿ ਵਚਨਤੋ ਮਿਡ੍ਢਾਦੀਸੁ ਯਤ੍ਥ ਕਤ੍ਥਚਿ ਆਧਾਰਕਂ ਠਪੇਤ੍ਵਾ ਤਤ੍ਥ ਪਤ੍ਤਂ ਠਪੇਤੁਂ ਵਟ੍ਟਤਿ ਆਧਾਰਕੇ ਠਪਨੋਕਾਸਸ੍ਸ ਅਨਿਯਮਿਤਤ੍ਤਾਤਿ ਵਦਨ੍ਤਿ. ‘‘ਪਤ੍ਤਮਾਲ਼ੋ ਨਾਮ ਵਟ੍ਟੇਤ੍ਵਾ ਪਤ੍ਤਾਨਂ ਅਗਮਨਤ੍ਥਂ ਵਟ੍ਟਂ ਵਾ ਚਤੁਰਸ੍ਸਂ ਵਾ ਇਟ੍ਠਕਾਦੀਹਿ ਪਰਿਕ੍ਖਿਪਿਤ੍ਵਾ ਕਤੋ’’ਤਿ ਗਣ੍ਠਿਪਦੇਸੁ ਵੁਤ੍ਤਂ.

੨੫੫. ਘਟਿਕਨ੍ਤਿ ਉਪਰਿ ਯੋਜਿਤਂ ਅਗ੍ਗਲ਼ਂ. ਤਾਵਕਾਲਿਕਂ ਪਰਿਭੁਞ੍ਜਿਤੁਂ ਵਟ੍ਟਤੀਤਿ ਸਕਿਦੇਵ ਗਹੇਤ੍ਵਾ ਤੇਨ ਆਮਿਸਂ ਪਰਿਭੁਞ੍ਜਿਤ੍ਵਾ ਛਡ੍ਡੇਤੁਂ ਵਟ੍ਟਤੀਤਿ ਅਧਿਪ੍ਪਾਯੋ. ਘਟਿਕਟਾਹੇਤਿ ਭਾਜਨਕਪਾਲੇ. ਅਭੁਂ ਮੇਤਿ ਏਤ੍ਥ ਭਵਤੀਤਿ ਭੂ, ਵਡ੍ਢਿ. ਨ ਭੂਤਿ ਅਭੂ, ਅਵਡ੍ਢਿ. ਭਯਵਸੇਨ ਪਨ ਸਾ ਇਤ੍ਥੀ ‘‘ਅਭੁ’’ਨ੍ਤਿ ਆਹ, ਵਿਨਾਸੋ ਮਯ੍ਹਨ੍ਤਿ ਅਤ੍ਥੋ. ਛਵਸੀਸਸ੍ਸ ਪਤ੍ਤਨ੍ਤਿ ਛਵਸੀਸਮਯਂ ਪਤ੍ਤਂ. ਪਕਤਿਵਿਕਾਰਸਮ੍ਬਨ੍ਧੇ ਚੇਤਂ ਸਾਮਿਵਚਨਂ, ਅਭੇਦੇਪਿ ਵਾ ਭੇਦੂਪਚਾਰੇਨਾਯਂ ਵੋਹਾਰੋ ‘‘ਸਿਲਾਪੁਤ੍ਤਕਸ੍ਸ ਸਰੀਰ’’ਨ੍ਤਿਆਦੀਸੁ ਵਿਯ.

ਚਬ੍ਬੇਤ੍ਵਾਤਿ ਖਾਦਿਤ੍ਵਾ. ਏਕਂ ਉਦਕਗਣ੍ਡੁਸਂ ਗਹੇਤ੍ਵਾਤਿ ਵਾਮਹਤ੍ਥੇਨੇਵ ਪਤ੍ਤਂ ਉਕ੍ਖਿਪਿਤ੍ਵਾ ਮੁਖੇਨ ਗਣ੍ਡੁਸਂ ਗਹੇਤ੍ਵਾ. ਉਚ੍ਛਿਟ੍ਠਹਤ੍ਥੇਨਾਤਿ ਸਾਮਿਸੇਨ ਹਤ੍ਥੇਨ. ਏਤ੍ਤਾਵਤਾਤਿ ਏਕਗਣ੍ਡੁਸਗਹਣਮਤ੍ਤੇਨ. ਲੁਞ੍ਚਿਤ੍ਵਾਤਿ ਤਤੋ ਮਂਸਂ ਉਦ੍ਧਰਿਤ੍ਵਾ. ਏਤੇਸੁ ਸਬ੍ਬੇਸੁ ਪਣ੍ਣਤ੍ਤਿਂ ਜਾਨਾਤੁ ਵਾ ਮਾ ਵਾ, ਆਪਤ੍ਤਿਯੇਵ.

੨੫੬. ਕਿਣ੍ਣਚੁਣ੍ਣੇਨਾਤਿ ਸੁਰਾਕਿਣ੍ਣਚੁਣ੍ਣੇਨ. ‘‘ਅਨੁਵਾਤਂ ਪਰਿਭਣ੍ਡਨ੍ਤਿ ਕਿਲਞ੍ਜਾਦੀਸੁ ਕਰੋਨ੍ਤੀ’’ਤਿ ਗਣ੍ਠਿਪਦੇਸੁ ਵੁਤ੍ਤਂ. ਬਿਦਲਕਨ੍ਤਿ ਦੁਗੁਣਕਰਣਸਙ੍ਖਾਤਸ੍ਸ ਕਿਰਿਯਾਵਿਸੇਸਸ੍ਸ ਅਧਿਵਚਨਂ. ਕਸ੍ਸ ਦੁਗੁਣਕਰਣਂ? ਯੇਨ ਕਿਲਞ੍ਜਾਦਿਨਾ ਮਹਨ੍ਤਂ ਕਥਿਨਂ ਅਤ੍ਥਤਂ, ਤਸ੍ਸ. ਤਞ੍ਹਿ ਦਣ੍ਡਕਥਿਨਪ੍ਪਮਾਣੇਨ ਪਰਿਯਨ੍ਤੇ ਸਂਹਰਿਤ੍ਵਾ ਦੁਗੁਣਂ ਕਾਤਬ੍ਬਂ. ਪਟਿਗ੍ਗਹਨ੍ਤਿ ਅਙ੍ਗੁਲਿਕਞ੍ਚੁਕਂ.

੨੫੭-੨੫੯. ਪਾਤਿ ਨਾਮ ਪਟਿਗ੍ਗਹਣਸਣ੍ਠਾਨੇਨ ਕਤੋ ਭਾਜਨਵਿਸੇਸੋ. ਨ ਸਮ੍ਮਤੀਤਿ ਨਪ੍ਪਹੋਤਿ.

੨੬੦-੨੬੨. ਨੀਚਵਤ੍ਥੁਕਂ ਚਿਨਿਤੁਨ੍ਤਿ ਬਹਿਕੁਟ੍ਟਸ੍ਸ ਸਮਨ੍ਤਤੋ ਨੀਚਵਤ੍ਥੁਕਂ ਕਤ੍ਵਾ ਚਿਨਿਤੁਂ. ਅਰਹਟਘਟਿਯਨ੍ਤਂ ਨਾਮ ਸਕਟਚਕ੍ਕਸਣ੍ਠਾਨਂ ਅਰੇ ਅਰੇ ਘਟਿਕਾਨਿ ਬਨ੍ਧਿਤ੍ਵਾ ਏਕੇਨ ਦ੍ਵੀਹਿ ਵਾ ਪਰਿਬ੍ਭਮਿਯਮਾਨਂ ਯਨ੍ਤਂ.

੨੬੩. ਆਵਿਦ੍ਧਪਕ੍ਖਪਾਸਕਨ੍ਤਿ ਕਣ੍ਣਿਕਮਣ੍ਡਲਸ੍ਸ ਸਮਨ੍ਤਾ ਠਪਿਤਪਕ੍ਖਪਾਸਕਂ. ਮਣ੍ਡਲੇਤਿ ਕਣ੍ਣਿਕਮਣ੍ਡਲੇ. ਪਕ੍ਖਪਾਸਕੇ ਠਪੇਤ੍ਵਾਤਿ ਸਮਨ੍ਤਾ ਪਕ੍ਖਪਾਸਕਫਲਕਾਨਿ ਠਪੇਤ੍ਵਾ.

੨੬੪. ‘‘ਨਮਤਕਂ ਸਨ੍ਥਤਸਦਿਸ’’ਨ੍ਤਿ ਗਣ੍ਠਿਪਦੇਸੁ ਵੁਤ੍ਤਂ. ਚਮ੍ਮਖਣ੍ਡਪਰਿਹਾਰੇਨ ਪਰਿਭੁਞ੍ਜਿਤਬ੍ਬਨ੍ਤਿ ਅਨਧਿਟ੍ਠਹਿਤ੍ਵਾ ਪਰਿਭੁਞ੍ਜਿਤਬ੍ਬਂ. ਏਤ੍ਥੇਵ ਪਵਿਟ੍ਠਾਨੀਤਿ ਮਲ਼ੋਰਿਕਾਯ ਏਵ ਅਨ੍ਤੋਗਧਾਨਿ. ਪੁਬ੍ਬੇ ਪਤ੍ਤਸਙ੍ਗੋਪਨਤ੍ਥਂ ਆਧਾਰਕੋ ਅਨੁਞ੍ਞਾਤੋ, ਇਦਾਨਿ ਭੁਞ੍ਜਨਤ੍ਥਂ.

੨੬੫. ਨਿਕ੍ਕੁਜ੍ਜਿਤਬ੍ਬੋਤਿ ਤੇਨ ਦਿਨ੍ਨਸ੍ਸ ਦੇਯ੍ਯਧਮ੍ਮਸ੍ਸ ਅਪ੍ਪਟਿਗ੍ਗਹਣਤ੍ਥਂ ਪਤ੍ਤਨਿਕ੍ਕੁਜ੍ਜਨਕਮ੍ਮਵਾਚਾਯ ਨਿਕ੍ਕੁਜ੍ਜਿਤਬ੍ਬੋ, ਨ ਅਧੋਮੁਖਠਪਨੇਨ. ਤੇਨੇਵਾਹ ‘‘ਏਵਞ੍ਚ ਪਨ, ਭਿਕ੍ਖਵੇ, ਨਿਕ੍ਕੁਜ੍ਜਿਤਬ੍ਬੋ’’ਤਿਆਦਿ. ਅਲਾਭਾਯਾਤਿ ਚਤੁਨ੍ਨਂ ਪਚ੍ਚਯਾਨਂ ਅਲਾਭਤ੍ਥਾਯ. ਅਨਤ੍ਥਾਯਾਤਿ ਉਪਦ੍ਦਵਾਯ ਅਵਡ੍ਢਿਯਾ.

੨੬੬. ਪਸਾਦੇਸ੍ਸਾਮਾਤਿ ਆਯਾਚਿਸ੍ਸਾਮ. ਏਤਦਵੋਚਾਤਿ ‘‘ਅਪ੍ਪਤਿਰੂਪਂ ਮਯਾ ਕਤਂ, ਭਗਵਾ ਪਨ ਮਹਨ੍ਤੇਪਿ ਅਗੁਣੇ ਅਚਿਨ੍ਤੇਤ੍ਵਾ ਮਯ੍ਹਂ ਅਚ੍ਚਯਂ ਪਟਿਗ੍ਗਣ੍ਹਿਸ੍ਸਤੀ’’ਤਿ ਮਞ੍ਞਮਾਨੋ ਏਤਂ ‘‘ਅਚ੍ਚਯੋ ਮਂ ਭਨ੍ਤੇ’’ਤਿਆਦਿਵਚਨਂ ਅਵੋਚ. ਤਤ੍ਥ ਞਾਯਪਟਿਪਤ੍ਤਿਂ ਅਤਿਚ੍ਚ ਏਤਿ ਪਵਤ੍ਤਤੀਤਿ ਅਚ੍ਚਯੋ, ਅਪਰਾਧੋ. ਮਂ ਅਚ੍ਚਗਮਾਤਿ ਮਂ ਅਤਿਕ੍ਕਮ੍ਮ ਅਭਿਭਵਿਤ੍ਵਾ ਪਵਤ੍ਤੋ. ਪੁਰਿਸੇਨ ਮਦ੍ਦਿਤ੍ਵਾ ਅਭਿਭਵਿਤ੍ਵਾ ਪਵਤ੍ਤਿਤੋਪਿ ਹਿ ਅਪਰਾਧੋ ਅਤ੍ਥਤੋ ਪੁਰਿਸਂ ਅਤਿਚ੍ਚ ਅਭਿਭਵਿਤ੍ਵਾ ਪਵਤ੍ਤੋ ਨਾਮ ਹੋਤਿ. ਪਟਿਗ੍ਗਣ੍ਹਾਤੂਤਿ ਖਮਤੁ. ਆਯਤਿਂ ਸਂਵਰਾਯਾਤਿ ਅਨਾਗਤੇ ਸਂਵਰਣਤ੍ਥਾਯ ਪੁਨ ਏਵਰੂਪਸ੍ਸ ਅਪਰਾਧਸ੍ਸ ਦੋਸਸ੍ਸ ਖਲਿਤਸ੍ਸ ਅਕਰਣਤ੍ਥਾਯ. ਤਗ੍ਘਾਤਿ ਏਕਂਸੇਨ. ਯਥਾਧਮ੍ਮਂ ਪਟਿਕਰੋਸੀਤਿ ਯਥਾ ਧਮ੍ਮੋ ਠਿਤੋ, ਤਥੇਵ ਕਰੋਸਿ, ਖਮਾਪੇਸੀਤਿ ਵੁਤ੍ਤਂ ਹੋਤਿ. ਤਂ ਤੇ ਮਯਂ ਪਟਿਗ੍ਗਣ੍ਹਾਮਾਤਿ ਤਂ ਤਵ ਅਪਰਾਧਂ ਮਯਂ ਖਮਾਮ. ਵੁਡ੍ਢਿ ਹੇਸਾ, ਆਵੁਸੋ ਵਡ੍ਢ, ਅਰਿਯਸ੍ਸ ਵਿਨਯੇਤਿ ਏਸਾ, ਆਵੁਸੋ ਵਡ੍ਢ, ਅਰਿਯਸ੍ਸ ਵਿਨਯੇ ਬੁਦ੍ਧਸ੍ਸ ਭਗਵਤੋ ਸਾਸਨੇ ਵੁਡ੍ਢਿ ਨਾਮ. ਕਤਮਾ? ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰਿਤ੍ਵਾ ਆਯਤਿਂ ਸਂਵਰਾਪਜ੍ਜਨਾ. ਦੇਸਨਂ ਪਨ ਪੁਗ੍ਗਲਾਧਿਟ੍ਠਾਨਂ ਕਰੋਨ੍ਤੋ ‘‘ਯੋ ਅਚ੍ਚਯਂ ਅਚ੍ਚਯਤੋ ਦਿਸ੍ਵਾ ਯਥਾਧਮ੍ਮਂ ਪਟਿਕਰੋਤਿ, ਆਯਤਿਂ ਸਂਵਰਂ ਆਪਜ੍ਜਤੀ’’ਤਿ ਆਹ.

੨੬੮. ਬੋਧਿਰਾਜਕੁਮਾਰਵਤ੍ਥੁਮ੍ਹਿ (ਮ. ਨਿ. ਅਟ੍ਠ. ੨.੩੨੪ ਆਦਯੋ) ਕੋਕਨਦੋਤਿ ਕੋਕਨਦਂ ਵੁਚ੍ਚਤਿ ਪਦੁਮਂ, ਸੋ ਚ ਮਙ੍ਗਲਪਾਸਾਦੋ ਓਲੋਕਨਪਦੁਮਂ ਦਸ੍ਸੇਤ੍ਵਾ ਕਤੋ, ਤਸ੍ਮਾ ‘‘ਕੋਕਨਦੋ’’ਤਿ ਸਙ੍ਖਂ ਲਭਿ. ਯਾਵ ਪਚ੍ਛਿਮਸੋਪਾਨਕਲ਼ੇਵਰਾਤਿ ਏਤ੍ਥ ਪਚ੍ਛਿਮਸੋਪਾਨਕਲ਼ੇਵਰਨ੍ਤਿ ਪਠਮਸੋਪਾਨਫਲਕਂ ਵੁਤ੍ਤਂ ਤਸ੍ਸ ਸਬ੍ਬਪਚ੍ਛਾ ਦੁਸ੍ਸੇਨ ਸਨ੍ਥਤਤ੍ਤਾ. ਉਪਰਿਮਸੋਪਾਨਫਲਕਤੋ ਪਟ੍ਠਾਯ ਹਿ ਸੋਪਾਨਂ ਸਨ੍ਥਤਂ. ਅਦ੍ਦਸਾ ਖੋਤਿ ਓਲੋਕਨਤ੍ਥਂਯੇਵ ਦ੍ਵਾਰਕੋਟ੍ਠਕੇ ਠਿਤੋ ਅਦ੍ਦਸ.

ਭਗਵਾ ਤੁਣ੍ਹੀ ਅਹੋਸੀਤਿ ‘‘ਕਿਸ੍ਸ ਨੁ ਖੋ ਅਤ੍ਥਾਯ ਰਾਜਕੁਮਾਰੇਨ ਅਯਂ ਮਹਾਸਕ੍ਕਾਰੋ ਕਤੋ’’ਤਿ ਆਵਜ੍ਜੇਨ੍ਤੋ ਪੁਤ੍ਤਪਤ੍ਥਨਾਯ ਕਤਭਾਵਂ ਅਞ੍ਞਾਸਿ. ਸੋ ਹਿ ਰਾਜਪੁਤ੍ਤੋ ਅਪੁਤ੍ਤਕੋ. ਸੁਤਞ੍ਚਾਨੇਨ ਅਹੋਸਿ ‘‘ਬੁਦ੍ਧਾਨਂ ਕਿਰ ਅਧਿਕਾਰਂ ਕਤ੍ਵਾ ਮਨਸਾ ਇਚ੍ਛਿਤਂ ਲਭਨ੍ਤੀ’’ਤਿ. ਸੋ ‘‘ਸਚਾਹਂ ਪੁਤ੍ਤਂ ਲਭਿਸ੍ਸਾਮਿ, ਸਮ੍ਮਾਸਮ੍ਬੁਦ੍ਧੋ ਇਮਂ ਚੇਲਪਟਿਕਂ ਅਕ੍ਕਮਿਸ੍ਸਤਿ. ਨੋ ਚੇ ਲਭਿਸ੍ਸਾਮਿ, ਨ ਅਕ੍ਕਮਿਸ੍ਸਤੀ’’ਤਿ ਪਤ੍ਥਨਂ ਕਤ੍ਵਾ ਸਨ੍ਥਰਾਪੇਸਿ. ਅਥ ਭਗਵਾ ‘‘ਨਿਬ੍ਬਤ੍ਤਿਸ੍ਸਤਿ ਨੁ ਖੋ ਏਤਸ੍ਸ ਪੁਤ੍ਤੋ’’ਤਿ ਆਵਜ੍ਜੇਤ੍ਵਾ ‘‘ਨ ਨਿਬ੍ਬਤ੍ਤਿਸ੍ਸਤੀ’’ਤਿ ਅਦ੍ਦਸ. ਪੁਬ੍ਬੇ ਕਿਰ ਸੋ ਏਕਸ੍ਮਿਂ ਦੀਪੇ ਵਸਮਾਨੋ ਸਮਾਨਚ੍ਛਨ੍ਦੇਨ ਸਕੁਣਪੋਤਕੇ ਖਾਦਿ. ਸਚਸ੍ਸ ਮਾਤੁਗਾਮੋ ਪੁਞ੍ਞਵਾ ਭਵੇਯ੍ਯ, ਪੁਤ੍ਤਂ ਲਭੇਯ੍ਯ. ਉਭੋਹਿ ਪਨ ਸਮਾਨਚ੍ਛਨ੍ਦੇਹਿ ਹੁਤ੍ਵਾ ਪਾਪਕਮ੍ਮਂ ਕਤਂ, ਤੇਨਸ੍ਸ ਪੁਤ੍ਤੋ ਨ ਨਿਬ੍ਬਤ੍ਤਿਸ੍ਸਤੀਤਿ ਅਞ੍ਞਾਸਿ. ਦੁਸ੍ਸੇ ਪਨ ਅਕ੍ਕਨ੍ਤੇ ‘‘ਬੁਦ੍ਧਾਨਂ ਅਧਿਕਾਰਂ ਕਤ੍ਵਾ ਪਤ੍ਥਿਤਂ ਲਭਨ੍ਤੀਤਿ ਲੋਕੇ ਅਨੁਸ੍ਸਵੋ, ਮਯਾ ਚ ਮਹਾਅਧਿਕਾਰੋ ਕਤੋ, ਨ ਚ ਪੁਤ੍ਤਂ ਲਭਾਮਿ, ਤੁਚ੍ਛਂ ਇਦਂ ਵਚਨ’’ਨ੍ਤਿ ਮਿਚ੍ਛਾਗਹਣਂ ਗਣ੍ਹੇਯ੍ਯ. ਤਿਤ੍ਥਿਯਾਪਿ ‘‘ਨਤ੍ਥਿ ਸਮਣਾਨਂ ਅਕਤ੍ਤਬ੍ਬਂ ਨਾਮ, ਚੇਲਪਟਿਕਂ ਮਦ੍ਦਨ੍ਤਾ ਆਹਿਣ੍ਡਨ੍ਤੀ’’ਤਿ ਉਜ੍ਝਾਯੇਯ੍ਯੁਂ. ਏਤਰਹਿ ਚ ਅਕ੍ਕਮਨ੍ਤੇਸੁ ਬਹੂ ਭਿਕ੍ਖੂ ਪਰਚਿਤ੍ਤਵਿਦੁਨੋ, ਤੇ ਭਬ੍ਬਤਂ ਜਾਨਿਤ੍ਵਾ ਅਕ੍ਕਮਿਸ੍ਸਨ੍ਤਿ, ਅਭਬ੍ਬਤਂ ਜਾਨਿਤ੍ਵਾ ਨ ਅਕ੍ਕਮਿਸ੍ਸਨ੍ਤਿ. ਅਨਾਗਤੇ ਪਨ ਉਪਨਿਸ੍ਸਯੋ ਮਨ੍ਦੋ ਭਵਿਸ੍ਸਤਿ, ਅਨਾਗਤਂ ਨ ਜਾਨਿਸ੍ਸਨ੍ਤਿ, ਤੇਸੁ ਅਕ੍ਕਮਨ੍ਤੇਸੁ ਸਚੇ ਪਤ੍ਥਿਤਂ ਇਜ੍ਝਿਸ੍ਸਤਿ, ਇਚ੍ਚੇਤਂ ਕੁਸਲਂ. ਨੋ ਚੇ ਇਜ੍ਝਿਸ੍ਸਤਿ, ‘‘ਪੁਬ੍ਬੇ ਭਿਕ੍ਖੁਸਙ੍ਘਸ੍ਸ ਅਧਿਕਾਰਂ ਕਤ੍ਵਾ ਇਚ੍ਛਿਤਿਚ੍ਛਿਤਂ ਲਭਨ੍ਤਿ, ਇਦਾਨਿ ਨ ਲਭਨ੍ਤਿ, ਤੇਯੇਵ ਮਞ੍ਞੇ ਭਿਕ੍ਖੂ ਪਟਿਪਤ੍ਤਿਪੂਰਕਾ ਅਹੇਸੁਂ, ਇਮੇ ਪਨ ਪਟਿਪਤ੍ਤਿਂ ਪੂਰੇਤੁਂ ਨ ਸਕ੍ਕੋਨ੍ਤੀ’’ਤਿ ਮਨੁਸ੍ਸਾ ਵਿਪ੍ਪਟਿਸਾਰਿਨੋ ਭਵਿਸ੍ਸਨ੍ਤੀਤਿ ਇਮੇਹਿ ਤੀਹਿ ਕਾਰਣੇਹਿ ਭਗਵਾ ਅਕ੍ਕਮਿਤੁਂ ਅਨਿਚ੍ਛਨ੍ਤੋ ਤੁਣ੍ਹੀ ਅਹੋਸਿ. ਪਚ੍ਛਿਮਂ ਜਨਤਂ ਤਥਾਗਤੋ ਅਨੁਕਮ੍ਪਤੀਤਿ ਇਦਂ ਪਨ ਥੇਰੋ ਵੁਤ੍ਤੇਸੁ ਕਾਰਣੇਸੁ ਤਤਿਯਂ ਕਾਰਣਂ ਸਨ੍ਧਾਯਾਹ. ਮਙ੍ਗਲਂ ਇਚ੍ਛਨ੍ਤੀਤਿ ਮਙ੍ਗਲਿਕਾ.

੨੬੯. ਬੀਜਨਿਨ੍ਤਿ ਚਤੁਰਸ੍ਸਬੀਜਨਿਂ. ਤਾਲਵਣ੍ਟਨ੍ਤਿ ਤਾਲਪਤ੍ਤਾਦੀਹਿ ਕਤਂ ਮਣ੍ਡਲਿਕਬੀਜਨਿਂ.

੨੭੦-੨੭੫. ‘‘ਏਕਪਣ੍ਣਚ੍ਛਤ੍ਤਂ ਨਾਮ ਤਾਲਪਤ੍ਤ’’ਨ੍ਤਿ ਗਣ੍ਠਿਪਦੇਸੁ ਵੁਤ੍ਤਂ. ਕਮ੍ਮਸਤੇਨਾਤਿ ਏਤ੍ਥ ਸਤ-ਸਦ੍ਦੋ ਅਨੇਕਪਰਿਯਾਯੋ, ਅਨੇਕੇਨ ਕਮ੍ਮੇਨਾਤਿ ਅਤ੍ਥੋ, ਮਹਤਾ ਉਸ੍ਸਾਹੇਨਾਤਿ ਵੁਤ੍ਤਂ ਹੋਤਿ. ਰੁਧੀਤਿ ਖੁਦ੍ਦਕਵਣਂ.

੨੭੮. ‘‘ਅਕਾਯਬਨ੍ਧਨੇਨ ਸਞ੍ਚਿਚ੍ਚ ਅਸਞ੍ਚਿਚ੍ਚ ਵਾ ਗਾਮਪ੍ਪਵੇਸਨੇ ਆਪਤ੍ਤਿ. ਸਰਿਤਟ੍ਠਾਨਤੋ ਬਨ੍ਧਿਤ੍ਵਾ ਪਵਿਸਿਤਬ੍ਬਂ ਨਿਵਤ੍ਤਿਤਬ੍ਬਂ ਵਾ’’ਤਿ ਗਣ੍ਠਿਪਦੇਸੁ ਵੁਤ੍ਤਂ. ਮੁਰਜਵਟ੍ਟਿਸਣ੍ਠਾਨਂ ਵੇਠੇਤ੍ਵਾ ਕਤਨ੍ਤਿ ਬਹੂ ਰਜ੍ਜੁਕੇ ਏਕਤੋ ਕਤ੍ਵਾ ਨਾਨਾਵਣ੍ਣੇਹਿ ਸੁਤ੍ਤੇਹਿ ਵੇਠੇਤ੍ਵਾ ਮੁਰਜਵਟ੍ਟਿਸਦਿਸਂ ਕਤਂ. ਤੇਨੇਵ ਦੁਤਿਯਪਾਰਾਜਿਕਵਣ੍ਣਨਾਯਂ (ਪਾਰਾ. ਅਟ੍ਠ. ੧.੮੫ ਪਾਲ਼ਿਮੁਤ੍ਤਕਵਿਨਿਚ੍ਛਯ) ਵੁਤ੍ਤਂ ‘‘ਬਹੂ ਰਜ੍ਜੁਕੇ ਏਕਤੋ ਕਤ੍ਵਾ ਏਕੇਨ ਨਿਰਨ੍ਤਰਂ ਵੇਠੇਤ੍ਵਾ ਕਤਂ ਬਹੁਰਜ੍ਜੁਕਨ੍ਤਿ ਨ ਵਤ੍ਤਬ੍ਬਂ, ਤਂ ਵਟ੍ਟਤੀ’’ਤਿ. ਤਤ੍ਥ ਯਂ ਵਤ੍ਤਬ੍ਬਂ, ਤਂ ਹੇਟ੍ਠਾ ਵੁਤ੍ਤਮੇਵ. ਮੁਦ੍ਦਿਕਕਾਯਬਨ੍ਧਨਂ ਨਾਮ ਚਤੁਰਸ੍ਸਂ ਅਕਤ੍ਵਾ ਸਜ੍ਜਿਤਂ. ਪਾਮਙ੍ਗਦਸਾ ਚਤੁਰਸ੍ਸਾ. ਮੁਦਿਙ੍ਗਸਣ੍ਠਾਨੇਨਾਤਿ ਵਰਕਸੀਸਾਕਾਰੇਨ. ਪਾਸਨ੍ਤੋਤਿ ਦਸਾਮੂਲਂ.

੨੮੦-੨੮੨. ਮੁਣ੍ਡਵਟ੍ਟੀਤਿ ਮਲ੍ਲਕਮ੍ਮਕਰਾਦਯੋ. ਪਮਾਣਙ੍ਗੁਲੇਨਾਤਿ ਵਡ੍ਢਕੀਅਙ੍ਗੁਲਂ ਸਨ੍ਧਾਯ ਵੁਤ੍ਤਂ. ਸੇਸਮੇਤ੍ਥ ਪਾਲ਼ਿਤੋ ਅਟ੍ਠਕਥਾਤੋ ਚ ਸੁਵਿਞ੍ਞੇਯ੍ਯਮੇਵ.

ਖੁਦ੍ਦਕਵਤ੍ਥੁਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.