੨. ਪਾਰਿਵਾਸਿਕਕ੍ਖਨ੍ਧਕਂ

ਪਾਰਿਵਾਸਿਕਵਤ੍ਤਕਥਾਵਣ੍ਣਨਾ

੭੫. ਪਾਰਿਵਾਸਿਕਕ੍ਖਨ੍ਧਕੇ ਨਵਕਤਰਂ ਪਾਰਿਵਾਸਿਕਨ੍ਤਿ ਅਤ੍ਤਨੋ ਨਵਕਤਰਂ ਪਾਰਿਵਾਸਿਕਂ. ਪਾਰਿਵਾਸਿਕਸ੍ਸ ਹਿ ਅਤ੍ਤਨੋ ਨਵਕਤਰਂ ਪਾਰਿਵਾਸਿਕਂ ਠਪੇਤ੍ਵਾ ਅਞ੍ਞੇ ਮੂਲਾਯਪਟਿਕਸ੍ਸਨਾਰਹਮਾਨਤ੍ਤਾਰਹਮਾਨਤ੍ਤਚਾਰਿਕਅਬ੍ਭਾਨਾਰਹਾਪਿ ਪਕਤਤ੍ਤਟ੍ਠਾਨੇਯੇਵ ਤਿਟ੍ਠਨ੍ਤਿ. ਤੇਨਾਹ ‘‘ਅਨ੍ਤਮਸੋ ਮੂਲਾਯਪਅਕਸ੍ਸਨਾਰਹਾਦੀਨਮ੍ਪੀ’’ਤਿ. ਪਾਦੇ ਘਂਸੇਨ੍ਤਿ ਏਤੇਨਾਤਿ ਪਾਦਘਂਸਨਂ, ਸਕ੍ਖਰਕਥਲਾਦਿ. ‘‘ਅਨੁਜਾਨਾਮਿ, ਭਿਕ੍ਖਵੇ, ਤਿਸ੍ਸੋ ਪਾਦਘਂਸਨਿਯੋ ਸਕ੍ਖਰਂ ਕਥਲਂ ਸਮੁਦ੍ਦਫੇਣਕ’’ਨ੍ਤਿ (ਚੂਲ਼ਵ. ੨੬੯) ਹਿ ਵੁਤ੍ਤਂ. ਸਦ੍ਧਿਵਿਹਾਰਿਕਾਦੀਨਮ੍ਪਿ ਸਾਦਿਯਨ੍ਤਸ੍ਸਾਤਿ ਸਦ੍ਧਿਵਿਹਾਰਿਕਾਨਮ੍ਪਿ ਅਭਿਵਾਦਨਾਦਿਂ ਸਾਦਿਯਨ੍ਤਸ੍ਸ. ‘‘ਮਾ ਮਂ ਗਾਮਪ੍ਪਵੇਸਨਂ ਆਪੁਚ੍ਛਥਾ’’ਤਿ ਵੁਤ੍ਤੇ ਅਨਾਪੁਚ੍ਛਾਪਿ ਗਾਮਂ ਪਵਿਸਿਤੁਂ ਵਟ੍ਟਤਿ. ਯੋ ਯੋ ਵੁਡ੍ਢੋਤਿ ਪਾਰਿਵਾਸਿਕੇਸੁ ਭਿਕ੍ਖੂਸੁ ਯੋ ਯੋ ਵੁਡ੍ਢੋ. ਨਵਕਤਰਸ੍ਸ ਸਾਦਿਤੁਨ੍ਤਿ ਪਾਰਿਵਾਸਿਕਨਵਕਤਰਸ੍ਸ ਅਭਿਵਾਦਨਾਦਿਂ ਸਾਦਿਤੁਂ.

ਤਤ੍ਥੇਵਾਤਿ ਸਙ੍ਘਨਵਕਟ੍ਠਾਨੇਯੇਵ. ਅਤ੍ਤਨੋ ਪਾਲ਼ਿਯਾ ਪਵਾਰੇਤਬ੍ਬਨ੍ਤਿ ਅਤ੍ਤਨੋ ਵਸ੍ਸਗ੍ਗੇਨ ਪਤ੍ਤਪਾਲ਼ਿਯਾ ਪਵਾਰੇਤਬ੍ਬਂ, ਨ ਪਨ ਸਬ੍ਬੇਸੁ ਪਵਾਰਿਤੇਸੂਤਿ ਅਤ੍ਥੋ. ਯਦਿ ਪਨ ਨ ਗਣ੍ਹਾਤਿ ਨ ਵਿਸ੍ਸਜ੍ਜੇਤੀਤਿ ਯਦਿ ਪੁਰਿਮਦਿਵਸੇ ਅਤ੍ਤਨੋ ਨ ਗਣ੍ਹਾਤਿ ਗਹੇਤ੍ਵਾ ਚ ਨ ਵਿਸ੍ਸਜ੍ਜੇਤਿ. ਚਤੁਸ੍ਸਾਲਭਤ੍ਤਨ੍ਤਿ ਭੋਜਨਸਾਲਾਯਂ ਪਟਿਪਾਟਿਯਾ ਦਿਯ੍ਯਮਾਨਭਤ੍ਤਂ. ਹਤ੍ਥਪਾਸੇ ਠਿਤੇਨਾਤਿ ਦਾਯਕਸ੍ਸ ਹਤ੍ਥਪਾਸੇ ਠਿਤੇਨ.

੭੬. ਅਞ੍ਞੋ ਸਾਮਣੇਰੋ ਨ ਗਹੇਤਬ੍ਬੋਤਿ ਉਪਜ੍ਝਾਯੇਨ ਹੁਤ੍ਵਾ ਅਞ੍ਞੋ ਸਾਮਣੇਰੋ ਨ ਗਹੇਤਬ੍ਬੋ. ਉਪਜ੍ਝਂ ਦਤ੍ਵਾ ਗਹਿਤਸਾਮਣੇਰਾਪੀਤਿ ਪਕਤਤ੍ਤਕਾਲੇ ਉਪਜ੍ਝਂ ਦਤ੍ਵਾ ਗਹਿਤਸਾਮਣੇਰਾਪਿ. ਲਦ੍ਧਸਮ੍ਮੁਤਿਕੇਨ ਆਣਤ੍ਤੋਪਿ ਗਰੁਧਮ੍ਮੇਹਿ ਅਞ੍ਞੇਹਿ ਵਾ ਓਵਦਿਤੁਂ ਲਭਤੀਤਿ ਆਹ ‘‘ਪਟਿਬਲਸ੍ਸ ਵਾ ਭਿਕ੍ਖੁਸ੍ਸ ਭਾਰੋ ਕਾਤਬ੍ਬੋ’’ਤਿ. ਆਗਤਾ ਭਿਕ੍ਖੁਨਿਯੋ ਵਤ੍ਤਬ੍ਬਾਤਿ ਸਮ੍ਬਨ੍ਧੋ. ਸਵਚਨੀਯਨ੍ਤਿ ਸਦੋਸਂ. ਜੇਟ੍ਠਕਟ੍ਠਾਨਂ ਨ ਕਾਤਬ੍ਬਨ੍ਤਿ ਪਧਾਨਟ੍ਠਾਨਂ ਨ ਕਾਤਬ੍ਬਂ. ਕਿਂ ਤਨ੍ਤਿ ਆਹ ‘‘ਪਾਤਿਮੋਕ੍ਖੁਦ੍ਦੇਸਕੇਨ ਵਾ’’ਤਿਆਦਿ.

ਰਜੇਹਿ ਹਤਾ ਉਪਹਤਾ ਭੂਮਿ ਏਤਿਸ੍ਸਾਤਿ ਰਜੋਹਤਭੂਮਿ, ਰਜੋਕਿਣ੍ਣਭੂਮੀਤਿ ਅਤ੍ਥੋ. ਪਚ੍ਚਯਨ੍ਤਿ ਵਸ੍ਸਾਵਾਸਿਕਲਾਭਂ ਸਨ੍ਧਾਯ ਵੁਤ੍ਤਂ. ਏਕਪਸ੍ਸੇ ਠਤ੍ਵਾਤਿ ਪਾਲ਼ਿਂ ਵਿਹਾਯ ਭਿਕ੍ਖੂਨਂ ਪਚ੍ਛਤੋ ਠਤ੍ਵਾ. ਸੇਨਾਸਨਂ ਨ ਲਭਤੀਤਿ ਸੇਯ੍ਯਾਪਰਿਯਨ੍ਤਭਾਗਿਤਾਯ ਵਸ੍ਸਗ੍ਗੇਨ ਗਣ੍ਹਿਤੁਂ ਨ ਲਭਤਿ. ਅਸ੍ਸਾਤਿ ਭਵੇਯ੍ਯ. ‘‘ਆਗਨ੍ਤੁਕੇਨ ਆਰੋਚੇਤਬ੍ਬਂ, ਆਗਨ੍ਤੁਕਸ੍ਸ ਆਰੋਚੇਤਬ੍ਬ’’ਨ੍ਤਿ ਅਵਿਸੇਸੇਨ ਵੁਤ੍ਤਤ੍ਤਾ ਸਚੇ ਦ੍ਵੇ ਪਾਰਿਵਾਸਿਕਾ ਗਤਟ੍ਠਾਨੇ ਅਞ੍ਞਮਞ੍ਞਂ ਪਸ੍ਸਨ੍ਤਿ, ਉਭੋਹਿਪਿ ਅਞ੍ਞਮਞ੍ਞਸ੍ਸ ਆਰੋਚੇਤਬ੍ਬਂ. ਯਥਾ ਬਹਿ ਦਿਸ੍ਵਾ ਆਰੋਚਿਤਸ੍ਸ ਭਿਕ੍ਖੁਨੋ ਵਿਹਾਰਂ ਆਗਤੇ ਪੁਨ ਆਰੋਚਨਕਿਚ੍ਚਂ ਨਤ੍ਥਿ, ਏਵਂ ਅਞ੍ਞਂ ਵਿਹਾਰਂ ਗਤੇਨਪਿ ਤਤ੍ਥ ਪੁਬ੍ਬੇ ਆਰੋਚਿਤਸ੍ਸ ਪੁਨ ਆਰੋਚਨਕਿਚ੍ਚਂ ਨਤ੍ਥੀਤਿ ਵਦਨ੍ਤਿ.

੮੧. ਅਵਿਸੇਸੇਨਾਤਿ ਪਾਰਿਵਾਸਿਕਸ੍ਸ ਉਕ੍ਖਿਤ੍ਤਕਸ੍ਸ ਚ ਅਵਿਸੇਸੇਨ. ਓਬਦ੍ਧਨ੍ਤਿ ਪਲਿਬੁਦ੍ਧਂ.

੮੩. ਸਹਵਾਸੋਤਿ ਵੁਤ੍ਤਪ੍ਪਕਾਰੇ ਛਨ੍ਨੇ ਪਕਤਤ੍ਤੇਨ ਭਿਕ੍ਖੁਨਾ ਸਦ੍ਧਿਂ ਸਯਨਮੇਵ ਅਧਿਪ੍ਪੇਤਂ, ਨ ਸੇਸਇਰਿਯਾਪਥਕਪ੍ਪਨਂ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਪਾਰਿਵਾਸਿਕਕ੍ਖਨ੍ਧਕਵਣ੍ਣਨਾ ਨਿਟ੍ਠਿਤਾ.