ਪਾਟਿਦੇਸਨੀਯਕਥਾ

੧੮੩੦. ਯੋ ਚਨ੍ਤਰਘਰਂ ਭਿਕ੍ਖੁ, ਪਵਿਟ੍ਠਾਯ ਤੁ ਹਤ੍ਥਤੋ;

ਅਞ੍ਞਾਤਿਕਾਯ ਯਂ ਕਿਞ੍ਚਿ, ਤਸ੍ਸ ਭਿਕ੍ਖੁਨਿਯਾ ਪਨ.

੧੮੩੧. ਸਹਤ੍ਥਾ ਪਟਿਗ੍ਗਣ੍ਹੇਯ੍ਯ, ਖਾਦਨਂ ਭੋਜਨਮ੍ਪਿ ਵਾ;

ਗਹਣੇ ਦੁਕ੍ਕਟਂ ਭੋਗੇ, ਪਾਟਿਦੇਸਨਿਯਂ ਸਿਯਾ.

੧੮੩੨. ਰਥਿਕਾਯਪਿ ਵਾ ਬ੍ਯੂਹੇ, ਸਨ੍ਧਿਸਿਙ੍ਘਾਟਕੇਸੁ ਵਾ;

ਹਤ੍ਥਿਸਾਲਾਦਿਕੇ ਠਤ੍ਵਾ, ਗਣ੍ਹਤੋਪਿ ਅਯਂ ਨਯੋ.

੧੮੩੩. ਰਥਿਕਾਯ ਸਚੇ ਠਤ੍ਵਾ, ਦੇਤਿ ਭਿਕ੍ਖੁਨਿ ਭੋਜਨਂ;

ਆਪਤ੍ਤਿ ਅਨ੍ਤਰਾਰਾਮੇ, ਠਤ੍ਵਾ ਗਣ੍ਹਾਤਿ ਭਿਕ੍ਖੁ ਚੇ.

੧੮੩੪. ਏਤ੍ਥਨ੍ਤਰਘਰਂ ਤਸ੍ਸਾ, ਪਵਿਟ੍ਠਾਯ ਹਿ ਵਾਕ੍ਯਤੋ;

ਭਿਕ੍ਖੁਸ੍ਸ ਚ ਠਿਤਟ੍ਠਾਨਂ, ਨਪ੍ਪਮਾਣਨ੍ਤਿ ਵਣ੍ਣਿਤਂ.

੧੮੩੫. ਤਸ੍ਮਾ ਭਿਕ੍ਖੁਨਿਯਾ ਠਤ੍ਵਾ, ਆਰਾਮਾਦੀਸੁ ਦੇਨ੍ਤਿਯਾ;

ਵੀਥਿਯਾਦੀਸੁ ਚੇ ਠਤ੍ਵਾ, ਨ ਦੋਸੋ ਪਟਿਗਣ੍ਹਤੋ.

੧੮੩੬. ਯਾਮਕਾਲਿਕਸਤ੍ਤਾਹ-ਕਾਲਿਕਂ ਯਾਵਜੀਵਿਕਂ;

ਆਹਾਰਤ੍ਥਾਯ ਗਹਣੇ, ਅਜ੍ਝੋਹਾਰੇ ਚ ਦੁਕ੍ਕਟਂ.

੧੮੩੭. ਆਮਿਸੇਨ ਅਸਮ੍ਭਿਨ੍ਨ-ਰਸਂ ਸਨ੍ਧਾਯ ਭਾਸਿਤਂ;

ਪਾਟਿਦੇਸਨਿਯਾਪਤ੍ਤਿ, ਸਮ੍ਭਿਨ੍ਨੇਕਰਸੇ ਸਿਯਾ.

੧੮੩੮. ਏਕਤੋਉਪਸਮ੍ਪਨ੍ਨ-ਹਤ੍ਥਤੋ ਪਟਿਗਣ੍ਹਤੋ;

ਕਾਲਿਕਾਨਂ ਚਤੁਨ੍ਨਮ੍ਪਿ, ਆਹਾਰਤ੍ਥਾਯ ਦੁਕ੍ਕਟਂ.

੧੮੩੯. ਞਾਤਿਕਾਯਪਿ ਅਞ੍ਞਾਤਿ-ਸਞ੍ਞਿਨੋ ਵਿਮਤਿਸ੍ਸ ਵਾ;

ਦੁਕ੍ਕਟਂ ਞਾਤਿਸਞ੍ਞਿਸ੍ਸ, ਤਥਾ ਅਞ੍ਞਾਤਿਕਾਯ ਵਾ.

੧੮੪੦. ਦਾਪੇਨ੍ਤਿਯਾ ਅਨਾਪਤ੍ਤਿ, ਦਦਮਾਨਾਯ ਵਾ ਪਨ;

ਨਿਕ੍ਖਿਪਿਤ੍ਵਾਨ੍ਤਰਾਰਾਮਾ-ਦੀਸੁ ਠਤ੍ਵਾਪਿ ਦੇਨ੍ਤਿਯਾ.

੧੮੪੧. ਗਾਮਤੋ ਨੀਹਰਿਤ੍ਵਾ ਵਾ, ਦੇਤਿ ਚੇ ਬਹਿ ਵਟ੍ਟਤਿ;

‘‘ਪਚ੍ਚਯੇ ਸਤਿ ਭੁਞ੍ਜਾ’’ਤਿ, ਦੇਤਿ ਚੇ ਕਾਲਿਕਤ੍ਤਯਂ.

੧੮੪੨. ਹਤ੍ਥਤੋ ਸਾਮਣੇਰੀਨਂ, ਸਿਕ੍ਖਮਾਨਾਯ ਵਾ ਤਥਾ;

ਇਦਂ ਏਲ਼ਕਲੋਮੇਨ, ਸਮੁਟ੍ਠਾਨਂ ਸਮਂ ਮਤਂ.

ਪਠਮਪਾਟਿਦੇਸਨੀਯਕਥਾ.

੧੮੪੩. ਅਵੁਤ੍ਤੇ ‘‘ਅਪਸਕ੍ਕਾ’’ਤਿ, ਏਕੇਨਾਪਿ ਚ ਭਿਕ੍ਖੁਨਾ;

ਸਚੇਜ੍ਝੋਹਰਣਤ੍ਥਾਯ, ਆਮਿਸਂ ਪਟਿਗਣ੍ਹਤਿ.

੧੮੪੪. ਗਹਣੇ ਦੁਕ੍ਕਟਂ ਭੋਗੇ, ਪਾਟਿਦੇਸਨਿਯਂ ਸਿਯਾ;

ਏਕਤੋਉਪਸਮ੍ਪਨ੍ਨਂ, ਨ ਵਾਰੇਨ੍ਤਸ੍ਸ ਦੁਕ੍ਕਟਂ.

੧੮੪੫. ਤਥੇਵਾਨੁਪਸਮ੍ਪਨ੍ਨਾ-ਯੁਪਸਮ੍ਪਨ੍ਨਸਞ੍ਞਿਨੋ;

ਤਤ੍ਥ ਵੇਮਤਿਕਸ੍ਸਾਪਿ, ਹੋਤਿ ਆਪਤ੍ਤਿ ਦੁਕ੍ਕਟਂ.

੧੮੪੬. ਅਨਾਪਤ੍ਤਿਤ੍ਤਨੋ ਭਤ੍ਤਂ, ਪਦਾਪੇਤਿ ਨ ਦੇਤਿ ਚੇ;

ਤਥਾ ਅਞ੍ਞਸ੍ਸ ਭਤ੍ਤਂ ਵਾ, ਨ ਦਾਪੇਤਿ ਪਦੇਤਿ ਚੇ.

੧੮੪੭. ਯਂ ਨ ਦਿਨ੍ਨਂ ਤਂ ਦਾਪੇਤਿ, ਨ ਦਿਨ੍ਨਂ ਯਤ੍ਥ ਵਾਪਿ ਚ;

ਤਤ੍ਥ ਤਮ੍ਪਿ ਚ ਸਬ੍ਬੇਸਂ, ਸਮਂ ਦਾਪੇਤਿ ਭਿਕ੍ਖੁਨੀ.

੧੮੪੮. ਵੋਸਾਸਨ੍ਤੀ ਠਿਤਾ ਸਿਕ੍ਖ-ਮਾਨਾ ਵਾ ਸਾਮਣੇਰਿਕਾ;

ਭੋਜਨਾਨਿ ਚ ਪਞ੍ਚੇਵ, ਵਿਨਾ, ਉਮ੍ਮਤ੍ਤਕਾਦਿਨੋ.

੧੮੪੯. ਕਥਿਨੇਨ ਸਮੁਟ੍ਠਾਨਂ, ਸਮਾਨਨ੍ਤਿ ਪਕਾਸਿਤਂ;

ਕ੍ਰਿਯਾਕ੍ਰਿਯਮਿਦਂ ਵੁਤ੍ਤਂ, ਤਿਚਿਤ੍ਤਞ੍ਚ ਤਿਵੇਦਨਂ.

ਦੁਤਿਯਪਾਟਿਦੇਸਨੀਯਕਥਾ.

੧੮੫੦. ਸੇਕ੍ਖਨ੍ਤਿ ਸਮ੍ਮਤੇ ਭਿਕ੍ਖੁ, ਲਦ੍ਧਸਮ੍ਮੁਤਿਕੇ ਕੁਲੇ;

ਘਰੂਪਚਾਰੋਕ੍ਕਮਨਾ, ਪੁਬ੍ਬੇਵ ਅਨਿਮਨ੍ਤਿਤੋ.

੧੮੫੧. ਅਗਿਲਾਨੋ ਗਹੇਤ੍ਵਾ ਚੇ, ਪਰਿਭੁਞ੍ਜੇਯ੍ਯ ਆਮਿਸਂ;

ਗਹਣੇ ਦੁਕ੍ਕਟਂ ਭੋਗੇ, ਪਾਟਿਦੇਸਨਿਯਂ ਸਿਯਾ.

੧੮੫੨. ਯਾਮਕਾਲਿਕਸਤ੍ਤਾਹ-ਕਾਲਿਕੇ ਯਾਵਜੀਵਿਕੇ;

ਗਹਣੇ ਪਰਿਭੋਗੇ ਚ, ਹੋਤਿ ਆਪਤ੍ਤਿ ਦੁਕ੍ਕਟਂ.

੧੮੫੩. ਅਸੇਕ੍ਖਸਮ੍ਮਤੇ ਸੇਕ੍ਖ-ਸਮ੍ਮਤਨ੍ਤਿ ਚ ਸਞ੍ਞਿਨੋ;

ਤਤ੍ਥ ਵੇਮਤਿਕਸ੍ਸਾਪਿ, ਤਥੇਵ ਪਰਿਦੀਪਿਤਂ.

੧੮੫੪. ਅਨਾਪਤ੍ਤਿ ਗਿਲਾਨਸ੍ਸ, ਗਿਲਾਨਸ੍ਸਾਵਸੇਸਕੇ;

ਨਿਮਨ੍ਤਿਤਸ੍ਸ ਵਾ ਭਿਕ੍ਖਾ, ਅਞ੍ਞੇਸਂ ਤਤ੍ਥ ਦੀਯਤਿ.

੧੮੫੫. ਘਰਤੋ ਨੀਹਰਿਤ੍ਵਾ ਵਾ, ਦੇਨ੍ਤਿ ਚੇ ਯਤ੍ਥ ਕਤ੍ਥਚਿ;

ਨਿਚ੍ਚਭਤ੍ਤਾਦਿਕੇ ਵਾਪਿ, ਤਥਾ ਉਮ੍ਮਤ੍ਤਕਾਦਿਨੋ.

੧੮੫੬. ਅਨਾਗਤੇ ਹਿ ਭਿਕ੍ਖੁਮ੍ਹਿ, ਘਰਤੋ ਪਠਮਂ ਪਨ;

ਨੀਹਰਿਤ੍ਵਾ ਸਚੇ ਦ੍ਵਾਰੇ, ਸਮ੍ਪਤ੍ਤੇ ਦੇਨ੍ਤਿ ਵਟ੍ਟਤਿ.

੧੮੫੭. ਭਿਕ੍ਖੁਂ ਪਨ ਚ ਦਿਸ੍ਵਾਵ, ਨੀਹਰਿਤ੍ਵਾਨ ਗੇਹਤੋ;

ਨ ਵਟ੍ਟਤਿ ਸਚੇ ਦੇਨ੍ਤਿ, ਸਮੁਟ੍ਠਾਨੇਲ਼ਕੂਪਮਂ.

ਤਤਿਯਪਾਟਿਦੇਸਨੀਯਕਥਾ.

੧੮੫੮. ਗਹਟ੍ਠੇਨਾਗਹਟ੍ਠੇਨ, ਇਤ੍ਥਿਯਾ ਪੁਰਿਸੇਨ ਵਾ;

ਆਰਾਮਂ ਉਪਚਾਰਂ ਵਾ, ਪਵਿਸਿਤ੍ਵਾ ਸਚੇ ਪਨ.

੧੮੫੯. ‘‘ਇਤ੍ਥਨ੍ਨਾਮਸ੍ਸ ਤੇ ਭਤ੍ਤਂ, ਯਾਗੁ ਵਾ ਆਹਰੀਯਤਿ’’;

ਏਵਮਾਰੋਚਿਤਂ ਵੁਤ੍ਤਂ, ਪਟਿਸਂਵਿਦਿਤਨ੍ਤਿ ਹਿ.

੧੮੬੦. ਆਹਰੀਯਤੁ ਤਂ ਪਚ੍ਛਾ, ਯਥਾਰੋਚਿਤਮੇਵ ਵਾ;

ਤਸ੍ਸ ਵਾ ਪਰਿਵਾਰਮ੍ਪਿ, ਅਞ੍ਞਂ ਕਤ੍ਵਾ ਬਹੁਂ ਪਨ.

੧੮੬੧. ਯਾਗੁਯਾ ਵਿਦਿਤਂ ਕਤ੍ਵਾ, ਪੂਵਂ ਭਤ੍ਤਂ ਹਰਨ੍ਤਿ ਚੇ;

ਇਦਮ੍ਪਿ ਵਿਦਿਤਂ ਵੁਤ੍ਤਂ, ਵਟ੍ਟਤੀਤਿ ਕੁਰੁਨ੍ਦਿਯਂ.

੧੮੬੨. ਕੁਲਾਨਿ ਪਨ ਅਞ੍ਞਾਨਿ, ਦੇਯ੍ਯਧਮ੍ਮਂ ਪਨਤ੍ਤਨੋ;

ਹਰਨ੍ਤਿ ਤੇਨ ਸਦ੍ਧਿਂ ਚੇ, ਸਬ੍ਬਂ ਵਟ੍ਟਤਿ ਤਮ੍ਪਿ ਚ.

੧੮੬੩. ਅਨਾਰੋਚਿਤਮੇਵਂ ਯਂ, ਯਂ ਆਰਾਮਮਨਾਭਤਂ;

ਤਂ ਅਸਂਵਿਦਿਤਂ ਨਾਮ, ਸਹਧਮ੍ਮਿਕਞਾਪਿਤਂ.

੧੮੬੪. ਯਂ ਅਸਂਵਿਦਿਤਂ ਕਤ੍ਵਾ, ਆਭਤਂ ਪਨ ਤਂ ਬਹਿ;

ਆਰਾਮਂ ਪਨ ਪੇਸੇਤ੍ਵਾ, ਕਾਰਾਪੇਤ੍ਵਾ ਤਮਾਹਰੇ.

੧੮੬੫. ਗਨ੍ਤ੍ਵਾ ਵਾ ਅਨ੍ਤਰਾਮਗ੍ਗੇ, ਗਹੇਤਬ੍ਬਂ ਤੁ ਭਿਕ੍ਖੁਨਾ;

ਸਚੇ ਏਵਮਕਤ੍ਵਾ ਤਂ, ਆਰਾਮੇ ਉਪਚਾਰਤੋ.

੧੮੬੬. ਗਹੇਤ੍ਵਾਜ੍ਝੋਹਰਨ੍ਤਸ੍ਸ, ਗਹਣੇ ਦੁਕ੍ਕਟਂ ਸਿਯਾ;

ਅਜ੍ਝੋਹਾਰਪਯੋਗੇਸੁ, ਪਾਟਿਦੇਸਨਿਯਂ ਮਤਂ.

੧੮੬੭. ਪਟਿਸਂਵਿਦਿਤੇਯੇਵ, ਅਸਂਵਿਦਿਤਸਞ੍ਞਿਨੋ;

ਤਤ੍ਥ ਵੇਮਤਿਕਸ੍ਸਾਪਿ, ਹੋਤਿ ਆਪਤ੍ਤਿ ਦੁਕ੍ਕਟਂ.

੧੮੬੮. ਪਟਿਸਂਵਿਦਿਤੇ ਤਸ੍ਸ, ਗਿਲਾਨਸ੍ਸਾਵਸੇਸਕੇ;

ਬਹਾਰਾਮੇ ਗਹੇਤ੍ਵਾ ਵਾ, ਅਨ੍ਤੋਯੇਵਸ੍ਸ ਭੁਞ੍ਜਤੋ.

੧੮੬੯. ਤਤ੍ਥਜਾਤਫਲਾਦੀਨਿ, ਅਨਾਪਤ੍ਤੇਵ ਖਾਦਤੋ;

ਸਮੁਟ੍ਠਾਨਾਦਯੋ ਸਬ੍ਬੇ, ਕਥਿਨੇਨ ਸਮਾ ਮਤਾ.

ਚਤੁਤ੍ਥਪਾਟਿਦੇਸਨੀਯਕਥਾ.

ਇਤਿ ਵਿਨਯਵਿਨਿਚ੍ਛਯੇ ਪਾਟਿਦੇਸਨੀਯਕਥਾ ਨਿਟ੍ਠਿਤਾ.