੬. ਮਚ੍ਛਮਂਸਵਿਨਿਚ੍ਛਯਕਥਾ

੩੮. ਏਵਂ ਕੁਲਸਙ੍ਗਹਵਿਨਿਚ੍ਛਯਂ ਕਥੇਤ੍ਵਾ ਇਦਾਨਿ ਮਚ੍ਛਮਂਸਵਿਨਿਚ੍ਛਯਂ ਕਥੇਤੁਂ ‘‘ਮਚ੍ਛਮਂਸੇਸੁ ਪਨਾ’’ਤਿਆਦਿ ਵੁਤ੍ਤਂ. ਤਤ੍ਥ ਥਲੇ ਠਪਿਤਮਤ੍ਤੇ ਮਰਤਿ, ਕੇਵਟ੍ਟਾਦੀਹਿ ਵਾ ਮਾਰਿਯਤੀਤਿ ਮਚ੍ਛੋ. ਮਚ੍ਛਸ੍ਸ ਇਦਨ੍ਤਿ ਮਚ੍ਛਂ, ਮਸਿਯਤੇ ਆਮਸਿਯਤੇਤਿ ਮਂਸਂ, ਮਚ੍ਛਞ੍ਚ ਮਂਸਞ੍ਚ ਮਚ੍ਛਮਂਸਾਨਿ, ਤੇਸੁ. ਮਚ੍ਛਮਂਸੇਸੁ ਪਨ ਵਿਨਿਚ੍ਛਯੋ ਏਵਂ ਵੇਦਿਤਬ੍ਬੋਤਿ ਯੋਜਨਾ. ਮਚ੍ਛਗ੍ਗਹਣੇਨਾਤਿ ਏਤ੍ਥ ਨਿਦ੍ਧਾਰਣਂ ਨ ਕਾਤਬ੍ਬਂ. ਪਨ-ਸਦ੍ਦੋ ਪਕ੍ਖਨ੍ਤਰਤ੍ਥੋ, ਦਿਵਾਸੇਯ੍ਯਾਦੀਸੁ ਵਿਨਿਚ੍ਛਯਤੋ ਅਪਰੋ ਮਚ੍ਛਮਂਸੇਸੁ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਅਤ੍ਥੋ. ਗਯ੍ਹਤੇ ਅਨੇਨਾਤਿ ਗਹਣਂ. ਕਿਂ ਤਂ? ਸਦ੍ਦੋ, ਮਚ੍ਛਇਤਿ ਗਹਣਂ ਮਚ੍ਛਗ੍ਗਹਣਂ, ਤੇਨ ਮਚ੍ਛਗ੍ਗਹਣੇਨ, ਮਚ੍ਛਸਦ੍ਦੇਨਾਤਿ ਅਤ੍ਥੋ. ਮਂਸੇਸੁ ਪਨ…ਪੇ… ਅਕਪ੍ਪਿਯਾਨੀਤਿ ਏਤ੍ਥ ਮਨੁਸ੍ਸਮਂਸਂ ਸਮਾਨਜਾਤਿਮਂਸਤੋ ਪਟਿਕ੍ਖਿਤ੍ਤਂ. ਹਤ੍ਥਿਅਸ੍ਸਾਨਂ ਮਂਸਾਨਿ ਰਾਜਙ੍ਗਤੋ, ਸੁਨਖਅਹੀਨਂ ਜੇਗੁਚ੍ਛਭਾਵਤੋ, ਸੇਸਾਨਂ ਵਾਲ਼ਮਿਗਤ੍ਤਾ ਭਿਕ੍ਖੂਨਂ ਪਰਿਬਨ੍ਧਵਿਮੋਚਨਤ੍ਥਂ ਪਟਿਕ੍ਖਿਤ੍ਤਨ੍ਤਿ ਦਟ੍ਠਬ੍ਬਂ.

ਤਿਕੋਟਿਪਰਿਸੁਦ੍ਧਨ੍ਤਿ ਦਿਟ੍ਠਸੁਤਪਰਿਸਙ੍ਕਿਤਸਙ੍ਖਾਤਾਹਿ ਤੀਹਿ ਕੋਟੀਹਿ ਤੀਹਿ ਆਕਾਰੇਹਿ ਤੀਹਿ ਕਾਰਣੇਹਿ ਪਰਿਸੁਦ੍ਧਂ, ਵਿਮੁਤ੍ਤਨ੍ਤਿ ਅਤ੍ਥੋ. ਤਤ੍ਥ ਅਦਿਟ੍ਠਅਸੁਤਾਨਿ ਚਕ੍ਖੁਵਿਞ੍ਞਾਣਸੋਤਵਿਞ੍ਞਾਣਾਨਂ ਅਨਾਰਮ੍ਮਣਭਾਵਤੋ ਜਾਨਿਤਬ੍ਬਾਨਿ. ਅਪਰਿਸਙ੍ਕਿਤਂ ਪਨ ਕਥਂ ਜਾਨਿਤਬ੍ਬਨ੍ਤਿ ਆਹ ‘‘ਅਪਰਿਸਙ੍ਕਿਤਂ ਪਨਾ’’ਤਿਆਦਿ, ਤੀਣਿ ਪਰਿਸਙ੍ਕਿਤਾਨਿ ਞਤ੍ਵਾ ਤੇਸਂ ਪਟਿਪਕ੍ਖਵਸੇਨ ਅਪਰਿਸਙ੍ਕਿਤਂ ਜਾਨਿਤਬ੍ਬਨ੍ਤਿ ਅਤ੍ਥੋ. ਇਦਾਨਿ ਤਾਨਿ ਤੀਣਿ ਪਰਿਸਙ੍ਕਿਤਾਨਿ ਚ ਏਵਂ ਪਰਿਸਙ੍ਕਿਤੇ ਸਤਿ ਭਿਕ੍ਖੂਹਿ ਕਤ੍ਤਬ੍ਬਵਿਧਿਞ੍ਚ ਤੇਨ ਵਿਧਿਨਾ ਅਪਰਿਸਙ੍ਕਿਤੇ ਸਤਿ ਕਤ੍ਤਬ੍ਬਭਾਵਞ੍ਚ ਵਿਤ੍ਥਾਰਤੋ ਦਸ੍ਸੇਤੁਂ ‘‘ਕਥ’’ਨ੍ਤਿਆਦਿਮਾਹ. ਤਤ੍ਥ ਦਿਸ੍ਵਾ ਪਰਿਸਙ੍ਕਿਤਂ ਦਿਟ੍ਠਪਰਿਸਙ੍ਕਿਤਂ ਨਾਮ. ਸੁਤ੍ਵਾ ਪਰਿਸਙ੍ਕਿਤਂ ਸੁਤਪਰਿਸਙ੍ਕਿਤਂ ਨਾਮ. ਅਦਿਸ੍ਵਾ ਅਸੁਤ੍ਵਾ ਤਕ੍ਕੇਨ ਅਨੁਮਾਨੇਨ ਪਰਿਸਙ੍ਕਿਤਂ ਤਦੁਭਯਵਿਨਿਮੁਤ੍ਤਪਰਿਸਙ੍ਕਿਤਂ ਨਾਮ. ਤਂ ਤਿਵਿਧਮ੍ਪਿ ਪਰਿਸਙ੍ਕਿਤਸਾਮਞ੍ਞੇਨ ਏਕਾ ਕੋਟਿ ਹੋਤਿ, ਤਤੋ ਵਿਮੁਤ੍ਤਂ ਅਪਰਿਸਙ੍ਕਿਤਂ ਨਾਮ. ਏਵਂ ਅਦਿਟ੍ਠਂ ਅਸੁਤਂ ਅਪਰਿਸਙ੍ਕਿਤਂ ਮਚ੍ਛਮਂਸਂ ਤਿਕੋਟਿਪਰਿਸੁਦ੍ਧਂ ਹੋਤਿ.

ਜਾਲਂ ਮਚ੍ਛਬਨ੍ਧਨਂ. ਵਾਗੁਰਾ ਮਿਗਬਨ੍ਧਿਨੀ. ਕਪ੍ਪਤੀਤਿ ਯਦਿ ਤੇਸਂ ਵਚਨੇਨ ਸਙ੍ਕਾ ਨਿਵਤ੍ਤਤਿ, ਵਟ੍ਟਤਿ, ਨ ਤਂ ਵਚਨਂ ਲੇਸਕਪ੍ਪਂ ਕਾਤੁਂ ਵਟ੍ਟਤਿ. ਤੇਨੇਵ ਵਕ੍ਖਤਿ ‘‘ਯਤ੍ਥ ਚ ਨਿਬ੍ਬੇਮਤਿਕੋ ਹੋਤਿ, ਤਂ ਸਬ੍ਬਂ ਕਪ੍ਪਤੀ’’ਤਿ. ਪਵਤ੍ਤਮਂਸਨ੍ਤਿ ਆਪਣਾਦੀਸੁ ਪਵਤ੍ਤਂ ਵਿਕ੍ਕਾਯਿਕਂ ਵਾ ਮਤਮਂਸਂ ਵਾ. ਮਙ੍ਗਲਾਦੀਨਨ੍ਤਿ ਆਦਿ-ਸਦ੍ਦੇਨ ਆਹੁਨਪਾਹੁਨਾਦਿਕੇ ਸਙ੍ਗਣ੍ਹਾਤਿ. ਭਿਕ੍ਖੂਨਂਯੇਵ ਅਤ੍ਥਾਯ ਅਕਤਨ੍ਤਿ ਏਤ੍ਥ ਅਟ੍ਠਾਨਪ੍ਪਯੁਤ੍ਤੋ ਏਵ-ਸਦ੍ਦੋ, ਭਿਕ੍ਖੂਨਂ ਅਤ੍ਥਾਯ ਅਕਤਮੇਵਾਤਿ ਸਮ੍ਬਨ੍ਧਿਤਬ੍ਬਂ, ਤਸ੍ਮਾ ਭਿਕ੍ਖੂਨਞ੍ਚ ਮਙ੍ਗਲਾਦੀਨਞ੍ਚਾਤਿ ਮਿਸ੍ਸੇਤ੍ਵਾ ਕਤਮ੍ਪਿ ਨ ਵਤ੍ਤਤੀਤਿ ਵੇਦਿਤਬ੍ਬਂ. ਕੇਚਿ ਪਨ ‘‘ਯਥਾਠਿਤਵਸੇਨ ਅਵਧਾਰਣਂ ਗਹੇਤ੍ਵਾ ਵਟ੍ਟਤੀ’’ਤਿ ਵਦਨ੍ਤਿ, ਤਂ ਨ ਸੁਨ੍ਦਰਂ. ਯਤ੍ਥ ਚ ਨਿਬ੍ਬੇਮਤਿਕੋ ਹੋਤੀਤਿ ਭਿਕ੍ਖੂਨਂ ਅਤ੍ਥਾਯ ਕਤੇਪਿ ਸਬ੍ਬੇਨ ਸਬ੍ਬਂ ਪਰਿਸਙ੍ਕਿਤਾਭਾਵਮਾਹ.

੩੯. ਤਮੇਵਤ੍ਥਂ ਆਵਿਕਾਤੁਂ ‘‘ਸਚੇ ਪਨਾ’’ਤਿਆਦਿ ਵੁਤ੍ਤਂ. ਇਤਰੇਸਂ ਵਟ੍ਟਤੀਤਿ ਅਜਾਨਨ੍ਤਾਨਂ ਵਟ੍ਟਤਿ, ਜਾਨਤੋਵੇਤ੍ਥ ਆਪਤ੍ਤਿ ਹੋਤੀਤਿ. ਤੇਯੇਵਾਤਿ ਯੇ ਉਦ੍ਦਿਸ੍ਸ ਕਤਂ, ਤੇਯੇਵ. ਉਦ੍ਦਿਸ੍ਸ ਕਤਮਂਸਪਰਿਭੋਗਤੋ ਅਕਪ੍ਪਿਯਮਂਸਪਰਿਭੋਗੇ ਵਿਸੇਸਂ ਦਸ੍ਸੇਤੁਂ ‘‘ਅਕਪ੍ਪਿਯਮਂਸਂ ਪਨਾ’’ਤਿਆਦਿ ਵੁਤ੍ਤਂ. ਪੁਰਿਮਸ੍ਮਿਂ ਸਚਿਤ੍ਤਕਾਪਤ੍ਤਿ, ਇਤਰਸ੍ਮਿਂ ਅਚਿਤ੍ਤਕਾ. ਤੇਨਾਹ ‘‘ਅਕਪ੍ਪਿਯਮਂਸਂ ਅਜਾਨਿਤ੍ਵਾ ਭੁਞ੍ਜਨ੍ਤਸ੍ਸਪਿ ਆਪਤ੍ਤਿਯੇਵਾ’’ਤਿ. ‘‘ਪਰਿਭੋਗਕਾਲੇ ਪੁਚ੍ਛਿਤ੍ਵਾ ਪਰਿਭੁਞ੍ਜਿਸ੍ਸਾਮੀਤਿ ਵਾ ਗਹੇਤ੍ਵਾ ਪੁਚ੍ਛਿਤ੍ਵਾਵ ਪਰਿਭੁਞ੍ਜਿਤਬ੍ਬ’’ਨ੍ਤਿ (ਵਿ. ਸਙ੍ਗ. ਅਟ੍ਠ. ੩੯) ਵਚਨਤੋ ਅਕਪ੍ਪਿਯਮਂਸਂ ਅਜਾਨਿਤ੍ਵਾ ਪਟਿਗ੍ਗਣ੍ਹਨ੍ਤਸ੍ਸ ਪਟਿਗ੍ਗਹਣੇ ਅਨਾਪਤ੍ਤਿ ਸਿਦ੍ਧਾ. ਅਜਾਨਿਤ੍ਵਾ ਪਰਿਭੁਞ੍ਜਨ੍ਤਸ੍ਸੇਵ ਹਿ ਆਪਤ੍ਤਿ ਵੁਤ੍ਤਾ. ਵਤ੍ਤਨ੍ਤਿ ਵਦਨ੍ਤੀਤਿ ਇਮਿਨਾ ਆਪਤ੍ਤਿ ਨਤ੍ਥੀਤਿ ਦਸ੍ਸੇਤਿ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਮਚ੍ਛਮਂਸਵਿਨਿਚ੍ਛਯਕਥਾਲਙ੍ਕਾਰੋ ਨਾਮ

ਛਟ੍ਠੋ ਪਰਿਚ੍ਛੇਦੋ.