੧੭. ਮਞ੍ਚਪੀਠਾਦਿਸਙ੍ਘਿਕਸੇਨਾਸਨੇਸੁਪਟਿਪਜ੍ਜਿਤਬ੍ਬਵਿਨਿਚ੍ਛਯਕਥਾ

੮੨. ਏਵਂ ਸਹਸੇਯ੍ਯਵਿਨਿਚ੍ਛਯਂ ਕਥੇਤ੍ਵਾ ਇਦਾਨਿ ਸਙ੍ਘਿਕੇ ਵਿਹਾਰੇ ਸੇਯ੍ਯਾਸੁ ਕਤ੍ਤਬ੍ਬਵਿਨਿਚ੍ਛਯਂ ਕਥੇਤੁਂ ‘‘ਵਿਹਾਰੇ ਸਙ੍ਘਿਕੇ ਸੇਯ੍ਯ’’ਨ੍ਤ੍ਯਾਦਿਮਾਹ. ਤਤ੍ਥ ਸਮਗ੍ਗਂ ਕਮ੍ਮਂ ਸਮੁਪਗਚ੍ਛਤੀਤਿ ਸਙ੍ਘੋ, ਅਯਮੇਵ ਵਚਨਤ੍ਥੋ ਸਬ੍ਬਸਙ੍ਘਸਾਧਾਰਣੋ. ਸਙ੍ਘਸ੍ਸ ਦਿਨ੍ਨੋ ਸਙ੍ਘਿਕੋ, ਵਿਹਰਤਿ ਏਤ੍ਥਾਤਿ ਵਿਹਾਰੋ, ਤਸ੍ਮਿਂ. ਸਯਨ੍ਤਿ ਏਤ੍ਥਾਤਿ ਸੇਯ੍ਯਾ, ਤਂ. ਅਸਨ੍ਥਰੀਤਿ ਸਨ੍ਥਰਿਤ੍ਵਾਨ. ਪਕ੍ਕਮਨਂ ਪਕ੍ਕਮੋ, ਗਮਨਨ੍ਤਿ ਅਤ੍ਥੋ. ‘‘ਵਿਹਾਰੇ ਸਙ੍ਘਿਕੇ ਸੇਯ੍ਯਂ, ਸਨ੍ਥਰਿਤ੍ਵਾਨ ਪਕ੍ਕਮੋ’’ਤਿ ਇਮਸ੍ਸ ਉਦ੍ਦੇਸਪਾਠਸ੍ਸ ਸਙ੍ਘਿਕੇ ਵਿਹਾਰੇ…ਪੇ… ਪਕ੍ਕਮਨਨ੍ਤਿ ਅਤ੍ਥੋ ਦਟ੍ਠਬ੍ਬੋਤਿ ਯੋਜਨਾ. ਤਤ੍ਰਾਤਿ ਤਸ੍ਮਿਂ ਪਕ੍ਕਮਨੇ ਅਯਂ ਈਦਿਸੋ ਮਯਾ ਵੁਚ੍ਚਮਾਨੋ ਵਿਨਿਚ੍ਛਯੋ ਵੇਦਿਤਬ੍ਬੋਤਿ ਅਤ੍ਥੋ. ਕਤਮੋ ਸੋ ਵਿਨਿਚ੍ਛਯੋਤਿ ਆਹ ‘‘ਸਙ੍ਘਿਕੇ…ਪੇ… ਪਾਚਿਤ੍ਤਿਯ’’ਨ੍ਤਿ. ਅਪਰਿਕ੍ਖਿਤ੍ਤਸ੍ਸ ਉਪਚਾਰੋ ਨਾਮ ਸੇਨਾਸਨਤੋ ਦ੍ਵੇ ਲੇਡ੍ਡੁਪਾਤਾ. ਪਾਚਿਤ੍ਤਿਯਨ੍ਤਿ ਪਠਮਂ ਪਾਦਂ ਅਤਿਕ੍ਕਾਮੇਨ੍ਤਸ੍ਸ ਦੁਕ੍ਕਟਂ, ਦੁਤਿਯਾਤਿਕ੍ਕਮੇ ਪਾਚਿਤ੍ਤਿਯਂ. ਕਥਂ ਵਿਞ੍ਞਾਯਤਿਚ੍ਚਾਹ ‘‘ਯੋ ਪਨ ਭਿਕ੍ਖੁ…ਪੇ… ਵਚਨਤੋ’’ਤਿ.

ਤਤ੍ਥ ਸਙ੍ਘਿਕੋ ਵਿਹਾਰੋ ਪਾਕਟੋ, ਸੇਯ੍ਯਾ ਅਪਾਕਟਾ, ਸਾ ਕਤਿਵਿਧਾਇਚ੍ਚਾਹ ‘‘ਸੇਯ੍ਯਾ ਨਾਮ…ਪੇ… ਦਸਵਿਧਾ’’ਤਿ. ਤਤ੍ਥਾਪਿ ਕਤਮਾ ਭਿਸਿ, ਕਤਮਾ ਚਿਮਿਲਿਕਾਦਯੋਤਿ ਆਹ ‘‘ਤਤ੍ਥ ਭਿਸੀਤਿ…ਪੇ… ਏਸ ਨਯੋ ਪਣ੍ਣਸਨ੍ਥਾਰੇ’’ਤਿ. ਤਤ੍ਥ ਮਞ੍ਚੇ ਅਤ੍ਥਰਿਤਬ੍ਬਾਤਿ ਮਞ੍ਚਕਭਿਸਿ, ਏਵਂ ਇਤਰਤ੍ਰ, ਵਣ੍ਣਾਨੁਰਕ੍ਖਣਤ੍ਥਂ ਕਤਾਤਿ ਪਟਖਣ੍ਡਾਦੀਹਿ ਸਿਬ੍ਬਿਤ੍ਵਾ ਕਤਾ. ਭੂਮਿਯਂ ਅਤ੍ਥਰਿਤਬ੍ਬਾਤਿ ਚਿਮਿਲਿਕਾਯ ਸਤਿ ਤਸ੍ਸਾ ਉਪਰਿ, ਅਸਤਿ ਸੁਦ੍ਧਭੂਮਿਯਂ ਅਤ੍ਥਰਿਤਬ੍ਬਾ. ਸੀਹਧਮ੍ਮਾਦੀਨਂ ਪਰਿਹਰਣੇ ਏਵ ਪਟਿਕ੍ਖੇਪੋਤਿ ਇਮਿਨਾ ਮਞ੍ਚਪੀਠਾਦੀਸੁ ਅਤ੍ਥਰਿਤ੍ਵਾ ਪੁਨ ਸਂਹਰਿਤ੍ਵਾ ਠਪਨਾਦਿਵਸੇਨ ਅਤ੍ਤਨੋ ਅਤ੍ਥਾਯ ਪਰਿਹਰਣਮੇਵ ਨ ਵਟ੍ਟਤਿ, ਭੂਮਤ੍ਥਰਣਾਦਿਵਸੇਨ ਪਰਿਭੋਗੋ ਪਨ ਅਤ੍ਤਨੋ ਪਰਿਹਰਣਂ ਨ ਹੋਤੀਤਿ ਦਸ੍ਸੇਤਿ. ਖਨ੍ਧਕੇ ਹਿ ‘‘ਅਨ੍ਤੋਪਿ ਮਞ੍ਚੇ ਪਞ੍ਞਤ੍ਤਾਨਿ ਹੋਨ੍ਤਿ, ਬਹਿਪਿ ਮਞ੍ਚੇ ਪਞ੍ਞਤ੍ਤਾਨਿ ਹੋਨ੍ਤੀ’’ਤਿ ਏਵਂ ਅਤ੍ਤਨੋ ਅਤ੍ਥਾਯ ਮਞ੍ਚਾਦੀਸੁ ਪਞ੍ਞਪੇਤ੍ਵਾ ਪਰਿਹਰਣਵਤ੍ਥੁਸ੍ਮਿਂ ‘‘ਨ, ਭਿਕ੍ਖਵੇ, ਮਹਾਚਮ੍ਮਾਨਿ ਧਾਰੇਤਬ੍ਬਾਨਿ ਸੀਹਚਮ੍ਮਂ ਬ੍ਯਗ੍ਘਚਮ੍ਮਂ ਦੀਪਿਚਮ੍ਮਂ, ਯੋ ਧਾਰੇਯ੍ਯ, ਆਪਤ੍ਤਿ ਦੁਕ੍ਕਟਸ੍ਸਾ’’ਤਿ (ਮਹਾਵ. ੨੫੫) ਪਟਿਕ੍ਖੇਪੋ ਕਤੋ, ਤਸ੍ਮਾ ਵੁਤ੍ਤਨਯੇਨੇਵੇਤ੍ਥ ਅਧਿਪ੍ਪਾਯੋ ਦਟ੍ਠਬ੍ਬੋ. ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੧੧੨) ਪਨ ‘‘ਯਦਿ ਏਵਂ ‘ਪਰਿਹਰਣੇਯੇਵ ਪਟਿਕ੍ਖੇਪੋ’ਤਿ ਇਦਂ ਕਸ੍ਮਾ ਵੁਤ੍ਤਨ੍ਤਿ ਚੋਦਨਂ ਕਤ੍ਵਾ ‘ਅਨੁਜਾਨਾਮਿ, ਭਿਕ੍ਖਵੇ, ਸਬ੍ਬਂ ਪਾਸਾਦਪਰਿਭੋਗ’ਨ੍ਤਿ (ਚੂਲ਼ਵ. ੩੨੦) ਵਚਨਤੋ ਪੁਗ੍ਗਲਿਕੇਪਿ ਸੇਨਾਸਨੇ ਸੇਨਾਸਨਪਰਿਭੋਗਵਸੇਨ ਨਿਯਮਿਤਂ ਸੁਵਣ੍ਣਘਟਾਦਿਕਂ ਪਰਿਭੁਞ੍ਜਿਤੁਂ ਵਟ੍ਟਮਾਨਮ੍ਪਿ ਕੇਵਲਂ ਅਤ੍ਤਨੋ ਸਨ੍ਤਕਂ ਕਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਤਿ. ਏਵਮਿਦਂ ਭੂਮਤ੍ਥਰਣਵਸੇਨ ਪਰਿਭੁਞ੍ਜਿਤੁਂ ਵਟ੍ਟਮਾਨਮ੍ਪਿ ਅਤ੍ਤਨੋ ਸਨ੍ਤਕਂ ਕਤ੍ਵਾ ਤਂ ਤਂ ਵਿਹਾਰਂ ਹਰਿਤ੍ਵਾ ਪਰਿਭੁਞ੍ਜਿਤੁਂ ਨ ਵਟ੍ਟਤੀਤਿ ਦਸ੍ਸਨਤ੍ਥਂ ਪਰਿਹਰਣੇਯੇਵ ਪਟਿਕ੍ਖੇਪੋ ਵੇਦਿਤਬ੍ਬੋ’’ਤਿ ਵੁਤ੍ਤਂ.

ਪਾਵਾਰੋ ਕੋਜਵੋਤਿ ਪਚ੍ਚਤ੍ਥਰਣਤ੍ਥਾਯੇਵ ਠਪਿਤਾ ਉਗ੍ਗਤਲੋਮਾ ਅਤ੍ਥਰਣਵਿਸੇਸਾ. ਏਤ੍ਤਕਮੇਵ ਵੁਤ੍ਤਨ੍ਤਿ ਅਟ੍ਠਕਥਾਸੁ (ਪਾਚਿ. ਅਟ੍ਠ. ੧੧੬) ਵੁਤ੍ਤਂ. ‘‘ਇਦਂ ਅਟ੍ਠਕਥਾਸੁ ਤਥਾਵੁਤ੍ਤਭਾਵਦਸ੍ਸਨਤ੍ਥਂ ਵੁਤ੍ਤਂ, ਅਞ੍ਞਮ੍ਪਿ ਤਾਦਿਸਂ ਮਞ੍ਚਪੀਠੇਸੁ ਅਤ੍ਥਰਿਤਬ੍ਬਂ ਅਤ੍ਥਰਣਮੇਵਾ’’ਤਿ ਤੀਸੁਪਿ ਗਣ੍ਠਿਪਦੇਸੁ ਵੁਤ੍ਤਂ. ਮਾਤਿਕਾਟ੍ਠਕਥਾਯਂ (ਕਙ੍ਖਾ. ਅਟ੍ਠ. ਦੁਤਿਯਸੇਨਾਸਨਸਿਕ੍ਖਾਪਦਵਣ੍ਣਨਾ) ਪਨ ‘‘ਪਚ੍ਚਤ੍ਥਰਣਂ ਨਾਮ ਪਾਵਾਰੋ ਕੋਜਵੋ’’ਤਿ ਨਿਯਮੇਤ੍ਵਾ ਵੁਤ੍ਤਂ, ਤਸ੍ਮਾ ਗਣ੍ਠਿਪਦੇਸੁ ਵੁਤ੍ਤਂ ਇਮਿਨਾ ਨ ਸਮੇਤਿ, ‘‘ਵੀਮਂਸਿਤ੍ਵਾ ਗਹੇਤਬ੍ਬ’’ਨ੍ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੧੧੬) ਵੁਤ੍ਤਂ. ਵੀਮਂਸਿਤੇ ਪਨ ਏਵਮਧਿਪ੍ਪਾਯੋ ਪਞ੍ਞਾਯਤਿ – ਮਾਤਿਕਾਟ੍ਠਕਥਾਪਿ ਅਟ੍ਠਕਥਾਯੇਵ, ਤਸ੍ਮਾ ਮਹਾਅਟ੍ਠਕਥਾਦੀਸੁ ਵੁਤ੍ਤਨਯੇਨ ‘‘ਪਾਵਾਰੋ ਕੋਜਵੋ’’ਤਿ ਨਿਯਮੇਤ੍ਵਾ ਵੁਤ੍ਤਂ, ਏਵਂ ਨਿਯਮਨੇ ਸਤਿਪਿ ਯਥਾ ‘‘ਲਦ੍ਧਾਤਪਤ੍ਤੋ ਰਾਜਕੁਮਾਰੋ’’ਤਿ ਆਤਪਤ੍ਤਸ੍ਸ ਲਦ੍ਧਭਾਵੇਯੇਵ ਨਿਯਮੇਤ੍ਵਾ ਵੁਤ੍ਤੇਪਿ ਨਿਦਸ੍ਸਨਨਯਵਸੇਨ ਰਾਜਕਕੁਧਭਣ੍ਡਸਾਮਞ੍ਞੇਨ ਸਮਾਨਾ ਵਾਲਬੀਜਨਾਦਯੋਪਿ ਵੁਤ੍ਤਾਯੇਵ ਹੋਨ੍ਤਿ, ਏਵਂ ‘‘ਪਾਵਾਰੋ ਕੋਜਵੋ’’ਤਿ ਨਿਯਮੇਤ੍ਵਾ ਵੁਤ੍ਤੇਪਿ ਨਿਦਸ੍ਸਨਨਯਵਸੇਨ ਤੇਹਿ ਮਞ੍ਚਪੀਠੇਸੁ ਅਤ੍ਥਰਿਤਬ੍ਬਭਾਵਸਾਮਞ੍ਞੇਨ ਸਮਾਨਾ ਅਞ੍ਞੇ ਅਤ੍ਥਰਣਾਪਿ ਵੁਤ੍ਤਾਯੇਵ ਹੋਨ੍ਤਿ, ਤਸ੍ਮਾ ਗਣ੍ਠਿਪਦੇਸੁ ਵੁਤ੍ਤਵਚਨਂ ਅਟ੍ਠਕਥਾਵਚਨਸ੍ਸ ਪਟਿਲੋਮਂ ਨ ਹੋਤਿ, ਅਨੁਲੋਮਮੇਵਾਤਿ ਦਟ੍ਠਬ੍ਬਂ.

ਇਮਸ੍ਮਿਂ ਪਨ ਠਾਨੇ ‘‘ਯੇਨ ਵਿਹਾਰੋ ਕਾਰਿਤੋ, ਸੋ ਵਿਹਾਰਸ੍ਸਾਮਿਕੋ’’ਤਿ ਪਾਠਂ ਨਿਸ੍ਸਾਯ ਏਕਚ੍ਚੇ ਵਿਨਯਧਰਾ ‘‘ਸਙ੍ਘਿਕਵਿਹਾਰਸ੍ਸ ਵਾ ਪੁਗ੍ਗਲਿਕਵਿਹਾਰਸ੍ਸ ਵਾ ਵਿਹਾਰਦਾਯਕੋਯੇਵ ਸਾਮਿਕੋ, ਸੋਯੇਵ ਇਸ੍ਸਰੋ, ਤਸ੍ਸ ਰੁਚਿਯਾ ਏਵ ਵਸਿਤੁਂ ਲਭਤਿ, ਨ ਸਙ੍ਘਗਣਪੁਗ੍ਗਲਾਨਂ ਰੁਚਿਯਾ’’ਤਿ ਵਿਨਿਚ੍ਛਯਂ ਕਰੋਨ੍ਤਿ, ਸੋ ਵੀਮਂਸਿਤਬ੍ਬੋ, ਕਥਂ ਅਯਂ ਪਾਠੋ ਕਿਮਤ੍ਥਂ ਸਾਧੇਤਿ ਇਸ੍ਸਰਤ੍ਥਂ ਵਾ ਆਪੁਚ੍ਛਿਤਬ੍ਬਤ੍ਥਂ ਵਾਤਿ? ਏਵਂ ਵੀਮਂਸਿਤੇ ‘‘ਭਿਕ੍ਖੁਮ੍ਹਿ ਸਤਿ ਭਿਕ੍ਖੁ ਆਪੁਚ੍ਛਿਤਬ੍ਬੋ’’ਤਿਆਦਿਵਚਨਤੋ ਆਪੁਚ੍ਛਿਤਬ੍ਬਤ੍ਥਮੇਵ ਸਾਧੇਤਿ, ਨ ਇਸ੍ਸਰਤ੍ਥਨ੍ਤਿ ਵਿਞ੍ਞਾਯਤਿ.

ਅਥ ਸਿਯਾ ‘‘ਆਪੁਚ੍ਛਿਤਬ੍ਬਤ੍ਥੇ ਸਿਦ੍ਧੇ ਇਸ੍ਸਰਤ੍ਥੋ ਸਿਦ੍ਧੋਯੇਵ ਹੋਤਿ. ਇਸ੍ਸਰਭਾਵਤੋਯੇਵ ਹਿ ਸੋ ਆਪੁਚ੍ਛਿਤਬ੍ਬੋ’’ਤਿ. ਤਤ੍ਥੇਵਂ ਵਤ੍ਤਬ੍ਬਂ – ‘‘ਆਪੁਚ੍ਛਨ੍ਤੇਨ ਚ ਭਿਕ੍ਖੁਮ੍ਹਿ ਸਤਿ ਭਿਕ੍ਖੁ ਆਪੁਚ੍ਛਿਤਬ੍ਬੋ, ਤਸ੍ਮਿਂ ਅਸਤਿ ਸਾਮਣੇਰੋ, ਤਸ੍ਮਿਂ ਅਸਤਿ ਆਰਾਮਿਕੋ’’ਤਿਆਦਿਵਚਨਤੋ ਆਯਸ੍ਮਨ੍ਤਾਨਂ ਮਤੇਨ ਭਿਕ੍ਖੁਪਿ ਸਾਮਣੇਰੋਪਿ ਆਰਾਮਿਕੋਪਿ ਵਿਹਾਰਕਾਰਕੋਪਿ ਤਸ੍ਸ ਕੁਲੇ ਯੋ ਕੋਚਿ ਪੁਗ੍ਗਲੋਪਿ ਇਸ੍ਸਰੋਤਿ ਆਪਜ੍ਜੇਯ੍ਯ, ਏਵਂ ਵਿਞ੍ਞਾਯਮਾਨੇਪਿ ਭਿਕ੍ਖੁਮ੍ਹਿ ਵਾ ਸਾਮਣੇਰੇ ਵਾ ਆਰਾਮਿਕੇ ਵਾ ਸਤਿ ਤੇਯੇਵ ਇਸ੍ਸਰਾ, ਨ ਵਿਹਾਰਕਾਰਕੋ. ਤੇਸੁ ਏਕਸ੍ਮਿਮ੍ਪਿ ਅਸਤਿਯੇਵ ਵਿਹਾਰਕਾਰਕੋ ਇਸ੍ਸਰੋ ਸਿਯਾਤਿ. ਇਮਸ੍ਮਿਂ ਪਨ ਅਧਿਕਾਰੇ ਸਙ੍ਘਿਕਂ ਸੇਨਾਸਨਂ ਰਕ੍ਖਣਤ੍ਥਾਯ ਆਪੁਚ੍ਛਿਤਬ੍ਬਂਯੇਵ ਵਦਤਿ, ਨ ਇਸ੍ਸਰਭਾਵਤੋ ਆਪੁਚ੍ਛਿਤਬ੍ਬਂ. ਵੁਤ੍ਤਞ੍ਹਿ ਅਟ੍ਠਕਥਾਯਂ (ਪਾਚਿ. ਅਟ੍ਠ. ੧੧੬) ‘‘ਅਨਾਪੁਚ੍ਛਂ ਵਾ ਗਚ੍ਛੇਯ੍ਯਾਤਿ ਏਤ੍ਥ ਭਿਕ੍ਖੁਮ੍ਹਿ ਸਤਿ ਭਿਕ੍ਖੁ ਆਪੁਚ੍ਛਿਤਬ੍ਬੋ’’ਤਿਆਦਿ.

ਅਥਾਪਿ ਏਵਂ ਵਦੇਯ੍ਯ ‘‘ਨ ਸਕਲਸ੍ਸ ਵਾਕ੍ਯਪਾਠਸ੍ਸ ਅਧਿਪ੍ਪਾਯਤ੍ਥਂ ਸਨ੍ਧਾਯ ਅਮ੍ਹੇਹਿ ਵੁਤ੍ਤਂ, ਅਥ ਖੋ ‘ਵਿਹਾਰਸ੍ਸਾਮਿਕੋ’ਤਿ ਏਤਸ੍ਸ ਪਦਤ੍ਥਂਯੇਵ ਸਨ੍ਧਾਯ ਵੁਤ੍ਤਂ. ਕਥਂ? ਸਂ ਏਤਸ੍ਸ ਅਤ੍ਥੀਤਿ ਸਾਮਿਕੋ, ਵਿਹਾਰਸ੍ਸ ਸਾਮਿਕੋ ਵਿਹਾਰਸ੍ਸਾਮਿਕੋ. ‘ਕੋ ਵਿਹਾਰਸ੍ਸਾਮਿਕੋ ਨਾਮਾ’ਤਿ ਵੁਤ੍ਤੇ ‘ਯੇਨ ਵਿਹਾਰੋ ਕਾਰਿਤੋ, ਸੋ ਵਿਹਾਰਸ੍ਸਾਮਿਕੋ ਨਾਮਾ’ਤਿ ਵਤ੍ਤਬ੍ਬੋ, ਤਸ੍ਮਾ ਵਿਹਾਰਕਾਰਕੋ ਦਾਯਕੋ ਵਿਹਾਰਸ੍ਸਾਮਿਕੋ ਨਾਮਾਤਿ ਵਿਞ੍ਞਾਯਤਿ, ਏਵਂ ਵਿਞ੍ਞਾਯਮਾਨੇ ਸਤਿ ਸਾਮਿਕੋ ਨਾਮ ਸਸ੍ਸ ਧਨਸ੍ਸ ਇਸ੍ਸਰੋ, ਤਸ੍ਸ ਰੁਚਿਯਾ ਏਵ ਅਞ੍ਞੇ ਲਭਨ੍ਤਿ, ਤਸ੍ਮਾ ਵਿਹਾਰਸ੍ਸਾਮਿਕਭੂਤਸ੍ਸ ਦਾਯਕਸ੍ਸ ਰੁਚਿਯਾ ਏਵ ਭਿਕ੍ਖੂ ਵਸਿਤੁਂ ਲਭਨ੍ਤਿ, ਨ ਸਙ੍ਘਗਣਪੁਗ੍ਗਲਾਨਂ ਰੁਚਿਯਾਤਿ ਇਮਮਤ੍ਥਂ ਸਨ੍ਧਾਯ ਵੁਤ੍ਤ’’ਨ੍ਤਿ. ਤੇ ਏਵਂ ਵਤ੍ਤਬ੍ਬਾ – ਮਾ ਆਯਸ੍ਮਨ੍ਤੋ ਏਵਂ ਅਵਚੁਤ੍ਥ, ਯਥਾ ਨਾਮ ‘‘ਘਟਿਕਾਰੋ ਬ੍ਰਹ੍ਮਾ’’ਤਿ ਵੁਤ੍ਤੋ ਸੋ ਬ੍ਰਹ੍ਮਾ ਇਦਾਨਿ ਘਟਂ ਨ ਕਰੋਤਿ, ਪੁਰਿਮਤ੍ਤਭਾਵੇ ਪਨ ਕਰੋਤਿ, ਤਸ੍ਮਾ ‘‘ਘਟਂ ਕਰੋਤੀ’’ਤਿ ਵਚਨਤ੍ਥੇਨ ‘‘ਘਟਿਕਾਰੋ’’ਤਿ ਨਾਮਂ ਲਭਤਿ. ਇਤਿ ਪੁਬ੍ਬੇ ਲਦ੍ਧਨਾਮਤ੍ਤਾ ਪੁਬ੍ਬਵੋਹਾਰਵਸੇਨ ਬ੍ਰਹ੍ਮਭੂਤੋਪਿ ‘‘ਘਟਿਕਾਰੋ’’ਇਚ੍ਚੇਵ ਵੁਚ੍ਚਤਿ, ਏਵਂ ਸੋ ਵਿਹਾਰਕਾਰਕੋ ਭਿਕ੍ਖੂਨਂ ਪਰਿਚ੍ਚਤ੍ਤਕਾਲਤੋ ਪਟ੍ਠਾਯ ਵਿਹਾਰਸ੍ਸਾਮਿਕੋ ਨ ਹੋਤਿ ਵਤ੍ਥੁਪਰਿਚ੍ਚਾਗਲਕ੍ਖਣਤ੍ਤਾ ਦਾਨਸ੍ਸ, ਪੁਬ੍ਬੇ ਪਨ ਅਪਰਿਚ੍ਚਤ੍ਤਕਾਲੇ ਵਿਹਾਰਸ੍ਸ ਕਾਰਕਤ੍ਤਾ ਵਿਹਾਰਸ੍ਸਾਮਿਕੋ ਨਾਮ ਹੋਤਿ, ਸੋ ਏਵਂ ਪੁਬ੍ਬੇ ਲਦ੍ਧਨਾਮਤ੍ਤਾ ਪੁਬ੍ਬਵੋਹਾਰਵਸੇਨ ‘‘ਵਿਹਾਰਸ੍ਸਾਮਿਕੋ’’ਤਿ ਵੁਚ੍ਚਤਿ, ਨ, ਪਰਿਚ੍ਚਤ੍ਤਸ੍ਸ ਵਿਹਾਰਸ੍ਸ ਇਸ੍ਸਰਭਾਵਤੋ. ਤੇਨੇਵ ਸਮ੍ਮਾਸਮ੍ਬੁਦ੍ਧੇਨ ‘‘ਵਿਹਾਰਦਾਯਕਾਨਂ ਰੁਚਿਯਾ ਭਿਕ੍ਖੂ ਵਸਨ੍ਤੂ’’ਤਿ ਅਵਤ੍ਵਾ ਸੇਨਾਸਨਪਞ੍ਞਾਪਕੋ ਅਨੁਞ੍ਞਾਤੋਤਿ ਦਟ੍ਠਬ੍ਬੋ. ਤਥਾ ਹਿ ਵੁਤ੍ਤਂ ਵਿਮਤਿਵਿਨੋਦਨਿਯਂ (ਵਿ. ਵਿ. ਟੀ. ਮਹਾਵਗ੍ਗ ੨.੨੯੫) ‘‘ਤੇਸਂ ਗੇਹਾਨੀਤਿ ਏਤ੍ਥ ਭਿਕ੍ਖੂਨਂ ਵਾਸਤ੍ਥਾਯ ਕਤਮ੍ਪਿ ਯਾਵ ਨ ਦੇਨ੍ਤਿ, ਤਾਵ ਤੇਸਂ ਸਨ੍ਤਕਂਯੇਵ ਭਵਿਸ੍ਸਤੀਤਿ ਦਟ੍ਠਬ੍ਬ’’ਨ੍ਤਿ, ਤੇਨ ਦਿਨ੍ਨਕਾਲਤੋ ਪਟ੍ਠਾਯ ਤੇਸਂ ਸਨ੍ਤਕਾਨਿ ਨ ਹੋਨ੍ਤੀਤਿ ਦਸ੍ਸੇਤਿ. ਅਯਂ ਪਨ ਕਥਾ ਪਾਠਸ੍ਸ ਸਮ੍ਮੁਖੀਭੂਤਤ੍ਤਾ ਇਮਸ੍ਮਿਂ ਠਾਨੇ ਕਥਿਤਾ. ਵਿਹਾਰਵਿਨਿਚ੍ਛਯੋ ਪਨ ਚਤੁਪਚ੍ਚਯਭਾਜਨਵਿਨਿਚ੍ਛਯੇ (ਵਿ. ਸਙ੍ਗ. ਅਟ੍ਠ. ੧੯੪ ਆਦਯੋ) ਆਵਿ ਭਵਿਸ੍ਸਤਿ. ਯੋ ਕੋਚੀਤਿ ਞਾਤਕੋ ਵਾ ਅਞ੍ਞਾਤਕੋ ਵਾ ਯੋ ਕੋਚਿ. ਯੇਨ ਮਞ੍ਚਂ ਪੀਠਂ ਵਾ ਵਿਨਨ੍ਤਿ, ਤਂ ਮਞ੍ਚਪੀਠਕਵਾਨਂ.

੮੩. ਸਿਲੁਚ੍ਚਯਲੇਣਨ੍ਤਿ ਸਿਲੁਚ੍ਚਯੇ ਲੇਣਂ, ਪਬ੍ਬਤਗੁਹਾਤਿ ਅਤ੍ਥੋ. ‘‘ਸੇਨਾਸਨਂ ਉਪਚਿਕਾਹਿ ਖਾਯਿਤ’’ਨ੍ਤਿ ਇਮਸ੍ਮਿਂ ਵਤ੍ਥੁਸ੍ਮਿਂ ਪਞ੍ਞਤ੍ਤਤ੍ਤਾ ਵਤ੍ਥੁਅਨੁਰੂਪਵਸੇਨ ਅਟ੍ਠਕਥਾਯਂ ਉਪਚਿਕਾਸਙ੍ਕਾਯ ਅਭਾਵੇਨ ਅਨਾਪਤ੍ਤਿ ਵੁਤ੍ਤਾ. ਵਤ੍ਤਕ੍ਖਨ੍ਧਕੇ (ਚੂਲ਼ਵ. ੩੬੦ ਆਦਯੋ) ਗਮਿਕਵਤ੍ਤਂ ਪਞ੍ਞਾਪੇਨ੍ਤੇਨ ‘‘ਸੇਨਾਸਨਂ ਆਪੁਚ੍ਛਿਤਬ੍ਬ’’ਨ੍ਤਿ ਵੁਤ੍ਤਤ੍ਤਾ ਕੇਵਲਂ ਇਤਿਕਤ੍ਤਬ੍ਬਤਾਮਤ੍ਤਦਸ੍ਸਨਤ੍ਥਂ ‘‘ਆਪੁਚ੍ਛਨਂ ਪਨ ਵਤ੍ਤ’’ਨ੍ਤਿ ਵੁਤ੍ਤਂ, ਨ ਪਨ ਵਤ੍ਤਭੇਦੇ ਦੁਕ੍ਕਟਨ੍ਤਿ ਦਸ੍ਸਨਤ੍ਥਂ, ਤੇਨੇਵ ਅਨ੍ਧਕਟ੍ਠਕਥਾਯਂ ‘‘ਸੇਨਾਸਨਂ ਆਪੁਚ੍ਛਿਤਬ੍ਬ’’ਨ੍ਤਿ ਏਤ੍ਥ ‘‘ਯਂ ਪਾਸਾਣਪਿਟ੍ਠਿਯਂ ਵਾ ਪਾਸਾਣਤ੍ਥਮ੍ਭੇਸੁ ਵਾ ਕਤਸੇਨਾਸਨਂ ਯਤ੍ਥ ਉਪਚਿਕਾ ਨਾਰੋਹਨ੍ਤਿ, ਤਂ ਅਨਾਪੁਚ੍ਛਨ੍ਤਸ੍ਸਪਿ ਅਨਾਪਤ੍ਤੀ’’ਤਿ ਵੁਤ੍ਤਂ. ਤਸ੍ਮਾ ਯਂ ਵੁਤ੍ਤਂ ਗਣ੍ਠਿਪਦੇ ‘‘ਤਾਦਿਸੇ ਸੇਨਾਸਨੇ ਅਨਾਪੁਚ੍ਛਾ ਗਚ੍ਛਨ੍ਤਸ੍ਸ ਪਾਚਿਤ੍ਤਿਯਂ ਨਤ੍ਥਿ, ਗਮਿਕਵਤ੍ਤੇ ਸੇਨਾਸਨਂ ਅਨਾਪੁਚ੍ਛਾ ਗਚ੍ਛਨ੍ਤੋ ਵਤ੍ਤਭੇਦੋ ਹੋਤਿ, ਤਸ੍ਮਾ ਦੁਕ੍ਕਟਂ ਆਪਜ੍ਜਤੀ’’ਤਿ, ਤਂ ਨ ਗਹੇਤਬ੍ਬਂ.

ਪਚ੍ਛਿਮਸ੍ਸ ਆਭੋਗੇਨ ਮੁਤ੍ਤਿ ਨਤ੍ਥੀਤਿ ਤਸ੍ਸ ਪਚ੍ਛਤੋ ਗਚ੍ਛਨ੍ਤਸ੍ਸ ਅਞ੍ਞਸ੍ਸ ਅਭਾਵਤੋ ਵੁਤ੍ਤਂ. ਏਕਂ ਵਾ ਪੇਸੇਤ੍ਵਾ ਆਪੁਚ੍ਛਿਤਬ੍ਬਨ੍ਤਿ ਏਤ੍ਥ ਗਮਨਚਿਤ੍ਤਸ੍ਸ ਉਪ੍ਪਨ੍ਨਟ੍ਠਾਨਤੋ ਅਨਾਪੁਚ੍ਛਿਤ੍ਵਾ ਗਚ੍ਛਨ੍ਤੇ ਦੁਤਿਯਪਾਦੁਦ੍ਧਾਰੇ ਪਾਚਿਤ੍ਤਿਯਂ. ਮਣ੍ਡਪੇ ਵਾਤਿ ਸਾਖਾਮਣ੍ਡਪੇ ਵਾ ਪਦਰਮਣ੍ਡਪੇ ਵਾ. ਰੁਕ੍ਖਮੂਲੇਤਿ ਯਸ੍ਸ ਕਸ੍ਸਚਿ ਰੁਕ੍ਖਸ੍ਸ ਹੇਟ੍ਠਾ. ਪਲੁਜ੍ਜਤੀਤਿ ਵਿਨਸ੍ਸਤਿ.

੮੪. ਮਜ੍ਝੇ ਸਂਖਿਤ੍ਤਂ ਪਣਵਸਣ੍ਠਾਨਂ ਕਤ੍ਵਾ ਬਦ੍ਧਨ੍ਤਿ ਏਰਕਪਤ੍ਤਾਦੀਹਿ ਵੇਣਿਂ ਕਤ੍ਵਾ ਤਾਯ ਵੇਣਿਯਾ ਉਭੋਸੁ ਪਸ੍ਸੇਸੁ ਵਿਤ੍ਥਤਟ੍ਠਾਨੇ ਬਹੁਂ ਵੇਠੇਤ੍ਵਾ ਤਤੋ ਪਟ੍ਠਾਯ ਯਾਵ ਮਜ੍ਝਟ੍ਠਾਨਂ, ਤਾਵ ਅਨ੍ਤੋਆਕਡ੍ਢਨਵਸੇਨ ਵੇਠੇਤ੍ਵਾ ਮਜ੍ਝੇ ਸਂਖਿਪਿਤ੍ਵਾ ਤਤ੍ਥ ਤਤ੍ਥ ਬਨ੍ਧਿਤ੍ਵਾ ਕਤਂ. ਯਤ੍ਥ ਕਾਕਾ ਵਾ ਕੁਲਲਾ ਵਾ ਨ ਊਹਦਨ੍ਤੀਤਿ ਯਤ੍ਥ ਧੁਵਨਿਵਾਸੇਨ ਕੁਲਾਵਕੇ ਕਤ੍ਵਾ ਵਸਮਾਨਾ ਏਤੇ ਕਾਕਕੁਲਲਾ, ਅਞ੍ਞੇ ਵਾ ਸਕੁਣਾ ਤਂ ਸੇਨਾਸਨਂ ਨ ਊਹਦਨ੍ਤਿ, ਤਾਦਿਸੇ ਰੁਕ੍ਖਮੂਲੇ ਨਿਕ੍ਖਿਪਿਤੁਂ ਅਨੁਜਾਨਾਮੀਤਿ ਅਤ੍ਥੋ.

੮੫. ਨਵਵਾਯਿਮੋਤਿ ਅਧੁਨਾ ਸੁਤ੍ਤੇਨ ਵੀਤਕਚ੍ਛੇਨ ਪਲਿਵੇਠਿਤਮਞ੍ਚੋ. ਓਨਦ੍ਧੋਤਿ ਕਪ੍ਪਿਯਚਮ੍ਮੇਨ ਓਨਦ੍ਧੋ, ਸੋਵ ਓਨਦ੍ਧਕੋ ਸਕਤ੍ਥੇ ਕ-ਪਚ੍ਚਯਵਸੇਨ. ਤੇਨ ਹਿ ਵਸ੍ਸੇਨ ਸੀਘਂ ਨ ਨਸ੍ਸਤਿ. ਉਕ੍ਕਟ੍ਠਅਬ੍ਭੋਕਾਸਿਕੋਤਿ ਇਦਂ ਤਸ੍ਸ ਸੁਖਪਟਿਪਤ੍ਤਿਦਸ੍ਸਨਮਤ੍ਤਂ, ਉਕ੍ਕਟ੍ਠਸ੍ਸਾਪਿ ਪਨ ਚੀਵਰਕੁਟਿ ਵਟ੍ਟਤੇਵ. ਕਾਯਾਨੁਗਤਿਕਤ੍ਤਾਤਿ ਭਿਕ੍ਖੁਨੋ ਤਤ੍ਥੇਵ ਨਿਸਿਨ੍ਨਭਾਵਂ ਦੀਪੇਤਿ, ਤੇਨ ਚ ਵਸ੍ਸਭਯੇਨ ਸਯਂ ਅਞ੍ਞਤ੍ਥ ਗਚ੍ਛਨ੍ਤਸ੍ਸ ਆਪਤ੍ਤਿਂ ਦਸ੍ਸੇਤਿ. ਅਬ੍ਭੋਕਾਸਿਕਾਨਂ ਅਤੇਮਨਤ੍ਥਾਯ ਨਿਯਮੇਤ੍ਵਾ ਦਾਯਕੇਹਿ ਦਿਨ੍ਨਮ੍ਪਿ ਅਤ੍ਤਾਨਂ ਰਕ੍ਖਨ੍ਤੇਨ ਰਕ੍ਖਿਤਬ੍ਬਮੇਵ. ‘‘ਯਸ੍ਮਾ ਪਨ ਦਾਯਕੇਹਿ ਦਾਨਕਾਲੇਯੇਵ ਸਤਸਹਸ੍ਸਗ੍ਘਨਕਮ੍ਪਿ ਕਮ੍ਬਲਂ ‘ਪਾਦਪੁਞ੍ਛਨਿਂ ਕਤ੍ਵਾ ਪਰਿਭੁਞ੍ਜਥਾ’ਤਿ ਦਿਨ੍ਨਂ ਤਥੇਵ ਪਰਿਭੁਞ੍ਜਿਤੁਂ ਵਟ੍ਟਤਿ, ਤਸ੍ਮਾ ਇਦਮ੍ਪਿ ਮਞ੍ਚਪੀਠਾਦਿਸੇਨਾਸਨਂ ‘ਅਜ੍ਝੋਕਾਸੇਪਿ ਯਥਾਸੁਖਂ ਪਰਿਭੁਞ੍ਜਥਾ’ਤਿ ਦਾਯਕੇਹਿ ਦਿਨ੍ਨਂ ਚੇ, ਸਬ੍ਬਸ੍ਮਿਮ੍ਪਿ ਕਾਲੇ ਅਜ੍ਝੋਕਾਸੇ ਨਿਕ੍ਖਿਪਿਤੁਂ ਵਟ੍ਟਤੀਤਿ ਵਦਨ੍ਤੀ’’ਤਿ ਸਾਰਤ੍ਥਦੀਪਨਿਯਂ (ਸਾਰਤ੍ਥ. ਟੀ. ਪਾਚਿਤ੍ਤਿਯ ੩.੧੦੮-੧੧੦) ਵੁਤ੍ਤਂ. ਪੇਸੇਤ੍ਵਾ ਗਨ੍ਤਬ੍ਬਨ੍ਤਿ ਏਤ੍ਥ ‘‘ਯੋ ਭਿਕ੍ਖੁ ਇਮਂ ਠਾਨਂ ਆਗਨ੍ਤ੍ਵਾ ਵਸਤਿ, ਤਸ੍ਸ ਦੇਥਾ’’ਤਿ ਵਤ੍ਵਾ ਪੇਸੇਤਬ੍ਬਂ.

ਵਲਾਹਕਾਨਂ ਅਨੁਟ੍ਠਿਤਭਾਵਂ ਸਲ੍ਲਕ੍ਖੇਤ੍ਵਾਤਿ ਇਮਿਨਾ ਗਿਮ੍ਹਾਨੇਪਿ ਮੇਘੇ ਉਟ੍ਠਿਤੇ ਅਬ੍ਭੋਕਾਸੇ ਨਿਕ੍ਖਿਪਿਤੁਂ ਨ ਵਟ੍ਟਤੀਤਿ ਦੀਪੇਤਿ. ਤਤ੍ਰ ਤਤ੍ਰਾਤਿ ਚੇਤਿਯਙ੍ਗਣਾਦਿਕੇ ਤਸ੍ਮਿਂ ਤਸ੍ਮਿਂ ਅਬ੍ਭੋਕਾਸੇ ਨਿਯਮੇਤ੍ਵਾ ਨਿਕ੍ਖਿਤ੍ਤਾ. ਮਜ੍ਝਤੋ ਪਟ੍ਠਾਯ ਪਾਦਟ੍ਠਾਨਾਭਿਮੁਖਾਤਿ ਯਤ੍ਥ ਸਮਨ੍ਤਤੋ ਸਮ੍ਮਜ੍ਜਿਤ੍ਵਾ ਅਙ੍ਗਣਮਜ੍ਝੇ ਸਬ੍ਬਦਾ ਕਚਵਰਸ੍ਸ ਸਙ੍ਕਡ੍ਢਨੇਨ ਮਜ੍ਝੇ ਵਾਲਿਕਾ ਸਞ੍ਚਿਤਾ ਹੋਤਿ, ਤਤ੍ਥ ਕਤ੍ਤਬ੍ਬਵਿਧਿਦਸ੍ਸਨਤ੍ਥਂ ਵੁਤ੍ਤਂ, ਉਚ੍ਚਵਤ੍ਥੁਪਾਦਟ੍ਠਾਨਾਭਿਮੁਖਂ, ਭਿਤ੍ਤਿਪਾਦਟ੍ਠਾਨਾਭਿਮੁਖਂ ਵਾ ਵਾਲਿਕਾ ਹਰਿਤਬ੍ਬਾਤਿ ਅਤ੍ਥੋ. ‘‘ਯਤ੍ਥ ਵਾ ਪਨ ਕੋਣੇਸੁ ਵਾਲਿਕਾ ਸਞ੍ਚਿਤਾ, ਤਤ੍ਥ ਤਤੋ ਪਟ੍ਠਾਯ ਅਪਰਦਿਸਾਭਿਮੁਖਾ ਹਰਿਤਬ੍ਬਾ’’ਤਿ ਕੇਚਿ ਅਤ੍ਥਂ ਵਦਨ੍ਤਿ. ਕੇਚਿ ਪਨ ‘‘ਸਮ੍ਮਟ੍ਠਟ੍ਠਾਨਸ੍ਸ ਪਦਵਲਞ੍ਜੇਨ ਅਵਿਕੋਪਨਤ੍ਥਾਯ ਸਯਂ ਅਸਮ੍ਮਟ੍ਠਟ੍ਠਾਨੇ ਠਤ੍ਵਾ ਅਤ੍ਤਨੋ ਪਾਦਾਭਿਮੁਖਂ ਵਾਲਿਕਾ ਹਰਿਤਬ੍ਬਾਤਿ ਵੁਤ੍ਤ’’ਨ੍ਤਿ ਵਦਨ੍ਤਿ. ਤਤ੍ਥ ‘‘ਮਜ੍ਝਤੋ ਪਟ੍ਠਾਯਾ’’ਤਿ ਵਚਨਸ੍ਸ ਪਯੋਜਨਂ ਨ ਦਿਸ੍ਸਤਿ. ਸਾਰਤ੍ਥਦੀਪਨਿਯਂ ਪਨ ‘‘ਪਾਦਟ੍ਠਾਨਾਭਿਮੁਖਾਤਿ ਨਿਸੀਦਨ੍ਤਾਨਂ ਪਾਦਟ੍ਠਾਨਾਭਿਮੁਖਨ੍ਤਿ ਕੇਚਿ, ਸਮ੍ਮਜ੍ਜਨ੍ਤਸ੍ਸ ਪਾਦਟ੍ਠਾਨਾਭਿਮੁਖਨ੍ਤਿ ਅਪਰੇ, ਬਹਿਵਾਲਿਕਾਯ ਅਗਮਨਨਿਮਿਤ੍ਤਂ ਪਾਦਟ੍ਠਾਨਾਭਿਮੁਖਾ ਹਰਿਤਬ੍ਬਾਤਿ ਵੁਤ੍ਤਨ੍ਤਿ ਏਕੇ’’ਤਿ ਵੁਤ੍ਤਂ. ਕਚਵਰਂ ਹਤ੍ਥੇਹਿ ਗਹੇਤ੍ਵਾ ਬਹਿ ਛਡ੍ਡੇਤਬ੍ਬਨ੍ਤਿ ਇਮਿਨਾ ‘‘ਕਚਵਰਂ ਛਡ੍ਡੇਸ੍ਸਾਮੀ’’ਤਿ ਵਾਲਿਕਾ ਨ ਛਡ੍ਡੇਤਬ੍ਬਾਤਿ ਦੀਪੇਤਿ.

੮੬. ਕਪ੍ਪਂ ਲਭਿਤ੍ਵਾਤਿ ‘‘ਗਚ੍ਛਾ’’ਤਿ ਵੁਤ੍ਤਵਚਨੇਨ ਕਪ੍ਪਂ ਲਭਿਤ੍ਵਾ. ਥੇਰਸ੍ਸ ਹਿ ਆਣਤ੍ਤਿਯਾ ਗਚ੍ਛਨ੍ਤਸ੍ਸ ਅਨਾਪਤ੍ਤਿ. ਪੁਰਿਮਨਯੇਨੇਵਾਤਿ ‘‘ਨਿਸੀਦਿਤ੍ਵਾ ਸਯਂ ਗਚ੍ਛਨ੍ਤੋ’’ਤਿਆਦਿਨਾ ਪੁਬ੍ਬੇ ਵੁਤ੍ਤਨਯੇਨੇਵ.

ਅਞ੍ਞਤ੍ਥ ਗਚ੍ਛਤੀਤਿ ਤਂ ਮਗ੍ਗਂ ਅਤਿਕ੍ਕਮਿਤ੍ਵਾ ਅਞ੍ਞਤ੍ਥ ਗਚ੍ਛਤਿ. ਲੇਡ੍ਡੁਪਾਤੁਪਚਾਰਤੋ ਬਹਿ ਠਿਤਤ੍ਤਾ ‘‘ਪਾਦੁਦ੍ਧਾਰੇਨ ਕਾਰੇਤਬ੍ਬੋ’’ਤਿ ਵੁਤ੍ਤਂ, ਅਞ੍ਞਤ੍ਥ ਗਚ੍ਛਨ੍ਤਸ੍ਸ ਪਠਮਪਾਦੁਦ੍ਧਾਰੇ ਦੁਕ੍ਕਟਂ, ਦੁਤਿਯਪਾਦੁਦ੍ਧਾਰੇ ਪਾਚਿਤ੍ਤਿਯਨ੍ਤਿ ਅਤ੍ਥੋ. ਪਾਕਤਿਕਂ ਅਕਤ੍ਵਾਤਿ ਅਪਟਿਸਾਮੇਤ੍ਵਾ. ਅਨ੍ਤਰਸਨ੍ਨਿਪਾਤੇਤਿ ਅਨ੍ਤਰਨ੍ਤਰਾ ਸਨ੍ਨਿਪਾਤੇ.

੮੭. ਆਵਾਸਿਕਾਨਂਯੇਵ ਪਲਿਬੋਧੋਤਿ ਏਤ੍ਥ ਆਗਨ੍ਤੁਕੇਸੁ ਆਗਨ੍ਤ੍ਵਾ ਕਿਞ੍ਚਿ ਅਵਤ੍ਵਾ ਤਤ੍ਥ ਨਿਸਿਨ੍ਨੇਸੁਪਿ ਨਿਸੀਦਿਤ੍ਵਾ ‘‘ਆਵਾਸਿਕਾਯੇਵ ਉਦ੍ਧਰਿਸ੍ਸਨ੍ਤੀ’’ਤਿ ਗਤੇਸੁਪਿ ਆਵਾਸਿਕਾਨਮੇਵ ਪਲਿਬੋਧੋ. ਮਹਾਪਚ੍ਚਰਿਵਾਦੇ ਪਨ ‘‘ਇਦਂ ਅਮ੍ਹਾਕ’’ਨ੍ਤਿ ਵਤ੍ਵਾਪਿ ਅਵਤ੍ਵਾਪਿ ਨਿਸਿਨ੍ਨਾਨਮੇਵਾਤਿ ਅਧਿਪ੍ਪਾਯੋ. ਮਹਾਅਟ੍ਠਕਥਾਵਾਦੇ ‘‘ਆਪਤ੍ਤੀ’’ਤਿ ਪਾਚਿਤ੍ਤਿਯਮੇਵ ਵੁਤ੍ਤਂ. ਮਹਾਪਚ੍ਚਰਿਯਂ ਪਨ ਸਨ੍ਥਰਾਪਨੇ ਪਾਚਿਤ੍ਤਿਯੇਨ ਭਵਿਤਬ੍ਬਨ੍ਤਿ ਅਨਾਣਤ੍ਤਿਯਾ ਪਞ੍ਞਤ੍ਤਤ੍ਤਾ ਦੁਕ੍ਕਟਂ ਵੁਤ੍ਤਂ. ਉਸ੍ਸਾਰਕੋਤਿ ਸਰਭਾਣਕੋ. ਸੋ ਹਿ ਉਦ੍ਧਂਉਦ੍ਧਂ ਪਾਲ਼ਿਪਾਠਂ ਸਾਰੇਤਿ ਪਵਤ੍ਤੇਤੀਤਿ ‘‘ਉਸ੍ਸਾਰਕੋ’’ਤਿ ਵੁਚ੍ਚਤਿ. ‘‘ਇਦਂ ਉਸ੍ਸਾਰਕਸ੍ਸ, ਇਦਂ ਧਮ੍ਮਕਥਿਕਸ੍ਸਾ’’ਤਿ ਵਿਸੁਂ ਪਞ੍ਞਤ੍ਤਤ੍ਤਾ ਅਨਾਣਤ੍ਤਿਯਾ ਪਞ੍ਞਤ੍ਤੇਪਿ ਪਾਚਿਤ੍ਤਿਯੇਨੇਵ ਭਵਿਤਬ੍ਬਨ੍ਤਿ ਅਧਿਪ੍ਪਾਯੇਨ ‘‘ਤਸ੍ਮਿਂ ਆਗਨ੍ਤ੍ਵਾ ਨਿਸਿਨ੍ਨੇ ਤਸ੍ਸ ਪਲਿਬੋਧੋ’’ਤਿ ਵੁਤ੍ਤਂ. ਕੇਚਿ ਪਨ ਵਦਨ੍ਤਿ ‘‘ਅਨਾਣਤ੍ਤਿਯਾ ਪਞ੍ਞਤ੍ਤੇਪਿ ਧਮ੍ਮਕਥਿਕਸ੍ਸ ਅਨੁਟ੍ਠਾਪਨੀਯਤ੍ਤਾ ਪਾਚਿਤ੍ਤਿਯੇਨ ਭਵਿਤਬ੍ਬਂ, ਆਗਨ੍ਤੁਕਸ੍ਸ ਪਨ ਪਚ੍ਛਾ ਆਗਤੇਹਿ ਵੁਡ੍ਢਤਰੇਹਿ ਉਟ੍ਠਾਪਨੀਯਤ੍ਤਾ ਦੁਕ੍ਕਟਂ ਵੁਤ੍ਤ’’ਨ੍ਤਿ.

੮੮. ਪਾਦਪੁਞ੍ਛਨੀ ਨਾਮ ਰਜ੍ਜੁਕੇਹਿ ਵਾ ਪਿਲੋਤਿਕਾਯ ਵਾ ਪਾਦਪੁਞ੍ਛਨਤ੍ਥਂ ਕਤਾ. ਫਲਕਪੀਠਂ ਨਾਮ ਫਲਕਮਯਂ ਪੀਠਂ. ਅਥ ਵਾ ਫਲਕਞ੍ਚੇਵ ਦਾਰੁਮਯਪੀਠਞ੍ਚ. ਦਾਰੁਮਯਪੀਠਨ੍ਤਿ ਚ ਫਲਕਮਯਮੇਵ ਪੀਠਂ ਵੇਦਿਤਬ੍ਬਂ. ਪਾਦਕਠਲਿਕਨ੍ਤਿ ਅਧੋਤਪਾਦਟ੍ਠਾਪਨਕਂ. ਅਜ੍ਝੋਕਾਸੇ ਰਜਨਂ ਪਚਿਤ੍ਵਾ …ਪੇ… ਪਟਿਸਾਮੇਤਬ੍ਬਨ੍ਤਿ ਏਤ੍ਥ ਥੇਵੇ ਅਸਤਿ ਰਜਨਕਮ੍ਮੇ ਨਿਟ੍ਠਿਤੇ ਪਟਿਸਾਮੇਤਬ੍ਬਂ. ‘‘ਭਿਕ੍ਖੁ ਵਾ ਸਾਮਣੇਰੋ ਵਾ ਆਰਾਮਿਕੋ ਵਾ ਲਜ੍ਜੀ ਹੋਤੀਤਿ ਵੁਤ੍ਤਤ੍ਤਾ ਅਲਜ੍ਜਿਂ ਆਪੁਚ੍ਛਿਤ੍ਵਾ ਗਨ੍ਤੁਂ ਨ ਵਟ੍ਟਤੀ’’ਤਿ ਵਦਨ੍ਤਿ. ਓਤਾਪੇਨ੍ਤੋ…ਪੇ… ਗਚ੍ਛਤੀਤਿ ਏਤ੍ਥ ‘‘ਕਿਞ੍ਚਾਪਿ ‘ਏਤ੍ਤਕਂ ਦੂਰਂ ਗਨ੍ਤਬ੍ਬ’ਨ੍ਤਿ ਪਰਿਚ੍ਛੇਦੋ ਨਤ੍ਥਿ, ਤਥਾਪਿ ਲੇਡ੍ਡੁਪਾਤਂ ਅਤਿਕ੍ਕਮ੍ਮ ਨਾਤਿਦੂਰਂ ਗਨ੍ਤਬ੍ਬ’’ਨ੍ਤਿ ਵਦਨ੍ਤਿ.

ਇਤਿ ਵਿਨਯਸਙ੍ਗਹਸਂਵਣ੍ਣਨਾਭੂਤੇ ਵਿਨਯਾਲਙ੍ਕਾਰੇ

ਮਞ੍ਚਪੀਠਾਦਿਸਙ੍ਘਿਕਸੇਨਾਸਨੇਸੁਪਟਿਪਜ੍ਜਿਤਬ੍ਬ-

ਵਿਨਿਚ੍ਛਯਕਥਾਲਙ੍ਕਾਰੋ ਨਾਮ

ਸਤ੍ਤਰਸਮੋ ਪਰਿਚ੍ਛੇਦੋ.