੨-੫੦. ਪਣੀਤਤਰਸੁਤ੍ਤਾਦਿਵਣ੍ਣਨਾ

੩੪੩-੩੯੧. ਵਿਸ੍ਸਟ੍ਠਕਾਯਾਤਿ ‘‘ਯੇ ਚਮ੍ਮੇਨ ਵਾ ਰੁਧਿਰੇਨ ਵਾ ਅਟ੍ਠਿਨਾ ਵਾ ਅਤ੍ਥਿਕਾ, ਤੇ ਸਬ੍ਬਂ ਗਣ੍ਹਨ੍ਤੂ’’ਤਿ ਤਤ੍ਥ ਨਿਰਪੇਕ੍ਖਚਿਤ੍ਤਤਾਯ ਅਧਿਟ੍ਠਿਤਸੀਲਤਾਯ ਪਰਿਚ੍ਚਤ੍ਤਸਰੀਰਾ. ਦੁਵਿਧਕਾਰਿਨੋਤਿ ‘‘ਕਾਲੇਨ ਕੁਸਲਂ, ਕਾਲੇਨ ਅਕੁਸਲ’’ਨ੍ਤਿ ਏਵਂ ਕੁਸਲਾਕੁਸਲਕਾਰਿਨੋ. ਸਹ ਬ੍ਯਯਤਿ ਪਵਤ੍ਤਤੀਤਿ ਸਹਬ੍ਯੋ, ਸਹਚਾਰੋ. ਤਸ੍ਸ ਭਾਵੋ ਸਹਬ੍ਯਤਾ, ਤਂ ਸਹਬ੍ਯਤਂ. ਅਦਨੀਯਤੋ ਅਨ੍ਨਂ. ਖਾਦਨੀਯਤੋ ਖਜ੍ਜਂ. ਪਾਤਬ੍ਬਤੋ ਪਾਨਂ. ਨਿਵਸਨੀਯਤੋ ਵਤ੍ਥਂ. ਨਿਵਸਿਤਬ੍ਬਂ ਨਿਵਾਸਨਂ. ਪਰਿਵਰਿਤਬ੍ਬਂ ਪਾਵੁਰਣਂ. ਯਾਨ੍ਤਿ ਤੇਨਾਤਿ ਯਾਨਂ, ਉਪਾਹਨਾਦਿਯਾਨਾਨਿ. ਆਦਿਸਦ੍ਦੇਨ ਵਯ੍ਹਸਿਵਿਕਾਦੀਨਂ ਸਙ੍ਗਹੋ. ਛਤ੍ਤਮ੍ਪਿ ਪਰਿਸ੍ਸਯਾਤਪਦੁਕ੍ਖਪਰਿਰਕ੍ਖਣੇਨ ਮਗ੍ਗਗਮਨਸਾਧਨਨ੍ਤਿ ਕਤ੍ਵਾ ‘‘ਛਤ੍ਤੁਪਾਹਨ’’ਨ੍ਤਿਆਦਿ ਵੁਤ੍ਤਂ. ਤੇਨ ਵੁਤ੍ਤਂ ‘‘ਯਂ ਕਿਞ੍ਚਿ ਗਮਨਪਚ੍ਚਯ’’ਨ੍ਤਿ. ਪਤ੍ਥਨਂ ਕਤ੍ਵਾ…ਪੇ… ਤਤ੍ਥ ਨਿਬ੍ਬਤ੍ਤਨ੍ਤਿ ਚਮ੍ਪੇਯ੍ਯਨਾਗਰਾਜਾ ਵਿਯਾਤਿ ਦਟ੍ਠਬ੍ਬਂ.

ਪਣੀਤਤਰਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਨਾਗਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.