੧੦. ਸੂਚਿਮੁਖੀਸੁਤ੍ਤਵਣ੍ਣਨਾ

੩੪੧. ਤਸ੍ਮਿਂ ਵਚਨੇ ਪਟਿਕ੍ਖਿਤ੍ਤੇਤਿ – ‘‘ਅਧੋਮੁਖੋ ਭੁਞ੍ਜਸੀ’’ਤਿ ਪਰਿਬ੍ਬਾਜਿਕਾਯ ਵੁਤ੍ਤਵਚਨੇ – ‘‘ਨ ਖ੍ਵਾਹਂ ਭਗਿਨੀ’’ਤਿ ਪਟਿਕ੍ਖਿਤ੍ਤੇ. ਵਾਦਨ੍ਤਿ ਦੋਸਂ. ਉਬ੍ਭਮੁਖੋਤਿ ਉਪਰਿਮੁਖੋ. ਪੁਰਤ੍ਥਿਮਾਦਿਕਾ ਚਤਸ੍ਸੋ ਦਿਸਾ. ਦਕ੍ਖਿਣਪੁਰਤ੍ਥਿਮਾਦਿਕਾ ਚਤਸ੍ਸੋ ਵਿਦਿਸਾ.

ਆਰਾਮਆਰਾਮਵਤ੍ਥੁਆਦੀਸੁ ਭੂਮਿਪਰਿਕਮ੍ਮਬੀਜਾਭਿਸਙ੍ਖਰਣਾਦਿਪਟਿਸਂਯੁਤ੍ਤਾ ਵਿਜ੍ਜਾ ਵਤ੍ਥੁਵਿਜ੍ਜਾ, ਤਸ੍ਸਾ ਪਨ ਮਿਚ੍ਛਾਜੀਵਭਾਵਂ ਦਸ੍ਸੇਤੁਂ ‘‘ਤੇਸ’’ਨ੍ਤਿਆਦਿ ਵੁਤ੍ਤਂ. ਤੇਸਂ ਤੇਸਂ ਅਤ੍ਤਨੋ ਪਚ੍ਚਯਦਾਯਕਾਨਂ. ਤਤ੍ਥ ਤਤ੍ਥ ਗਮਨਨ੍ਤਿ ਤੇਸਂ ਸਾਸਨਹਰਣਵਸੇਨ ਤਂ ਤਂ ਗਾਮਨ੍ਤਰਦੇਸਨ੍ਤਰਂ. ਏਵਮਾਰੋਚੇਸੀਤਿ ਅਤ੍ਤੁਕ੍ਕਂਸਨਪਰਵਮ੍ਭਨਰਹਿਤਂ ਕਣ੍ਣਸੁਖਂ ਪੇਮਨੀਯਂ ਹਦਯਙ੍ਗਮਂ ਥੇਰਸ੍ਸ ਧਮ੍ਮਕਥਂ ਸੁਤ੍ਵਾ ਪਸਨ੍ਨਮਾਨਸਾ ਏਵਂ ‘‘ਧਮ੍ਮਿਕਂ ਸਮਣਾ ਸਕ੍ਯਪੁਤ੍ਤਿਯਾ’’ਤਿਆਦਿਨਾ ਸਾਸਨਸ੍ਸ ਗੁਣਸਂਕਿਤ੍ਤਨਵਾਚਂ ਕੁਲਾਨਂ ਆਰੋਚੇਸਿ.

ਸੂਚਿਮੁਖੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਸਾਰਿਪੁਤ੍ਤਸਂਯੁਤ੍ਤਵਣ੍ਣਨਾ ਨਿਟ੍ਠਿਤਾ.