੩. ਯਮਕਸੁਤ੍ਤਵਣ੍ਣਨਾ

੮੫. ਦਿਟ੍ਠਿ ਏਵ ਦਿਟ੍ਠਿਗਤਂ ‘‘ਗੂਥਗਤਂ ਮੁਤ੍ਤਗਤ’’ਨ੍ਤਿ (ਮ. ਨਿ. ੨.੧੧੯; ਅ. ਨਿ. ੯.੧੧) ਯਥਾ. ਦਿਟ੍ਠਿਗਤਂ ਨਾਮ ਜਾਤਂ ਖਨ੍ਧਵਿਨਿਮੁਤ੍ਤਸ੍ਸ ਸਤ੍ਤਸ੍ਸ ਗਹਿਤਤ੍ਤਾ.

ਕੁਪਿਤੇਤਿ ਦਿਟ੍ਠਿਸਙ੍ਖਾਤਰੋਗੇਨ ਕੁਪਿਤੇ. ਪਗ੍ਗਯ੍ਹਾਤਿ ਤੇਸਂ ਭਿਕ੍ਖੂਨਂ ਸਨ੍ਤਿਕੇ ਵਿਯ ਥੇਰਸ੍ਸ ਸਾਰਿਪੁਤ੍ਤਸ੍ਸ ਸਮ੍ਮੁਖਾ ਅਤ੍ਤਨੋ ਲਦ੍ਧਿਂ ਪਗ੍ਗਯ੍ਹ ‘‘ਏਵਂ ਖ੍ਵਾਹ’’ਨ੍ਤਿ ਏਵਂ ਨਿਚ੍ਛਯੇਨ ਵਤ੍ਤੁਂ ਅਸਕ੍ਕੋਨ੍ਤੋ.

ਅਨੁਯੋਗਵਤ੍ਤਂ ਨਾਮ ਯੇਨ ਯੁਤ੍ਤੋ, ਤਸ੍ਸ ਅਤ੍ਤਨੋ ਗਾਹਂ ਨਿਜ੍ਝਾਨਕ੍ਖਨ੍ਤਿਯਾਵ ਯਾਥਾਵਤੋ ਪਵੇਦਨਂ. ਥੇਰਸ੍ਸ ਅਨੁਯੋਗੇ ਭੁਮ੍ਮਨ੍ਤਿ ‘‘ਤਂ ਕਿਂ ਮਞ੍ਞਸਿ, ਆਵੁਸੋ ਯਮਕਾ’’ਤਿਆਦਿਨਾ ਥੇਰੇਨ ਕਥਿਤਪੁਚ੍ਛਾਯ ਭੁਮ੍ਮਨਿਦ੍ਦੇਸੋ. ਸਚੇ ਤਂ ਆਵੁਸੋਤਿ ਇਦਨ੍ਤਿ ‘‘ਸਚੇ ਤਂ, ਆਵੁਸੋ’’ਤਿ ਏਵਮਾਦਿਕਂ ਇਦਂ ਵਚਨਂ. ਏਤਨ੍ਤਿ ਯਮਕਤ੍ਥੇਰਂ. ਅਞ੍ਞਨ੍ਤਿ ਅਰਹਤ੍ਤਂ. ਵਤ੍ਤਬ੍ਬਾਕਾਰੇਨ ਵਦਨ੍ਤੋ ਅਤ੍ਥਤੋ ਅਰਹਤ੍ਤਂ ਬ੍ਯਾਕਰੋਨ੍ਤੋ ਨਾਮ ਹੋਤੀਤਿ ਅਧਿਪ੍ਪਾਯੇਨ ਵਦਤਿ.

ਏਤਸ੍ਸ ਪਠਮਮਗ੍ਗਸ੍ਸਾਤਿ ਏਤਸ੍ਸ ਇਦਾਨਿਯੇਵ ਤਿਪਰਿਵਟ੍ਟਦੇਸਨਾਵਸਾਨੇ ਤਯਾ ਅਧਿਗਤਸ੍ਸ ਪਠਮਮਗ੍ਗਸ੍ਸ. ਚਤੂਹਿ ਯੋਗੇਹੀਤਿ ਅਤ੍ਤਤੋ ਪਿਯਤੋ ਉਦਾਸਿਨਤੋ ਵੇਰਿਤੋਤਿ ਚਤੂਹਿਪਿ ਉਪ੍ਪਜ੍ਜਨਅਨਤ੍ਥਯੋਗੇਹਿ.

ਉਪੇਤੀਤਿ ਤਣ੍ਹੁਪਯਦਿਟ੍ਠੁਪਯੇਹਿ ਉਪਾਦਿਯਤਿ ਤਣ੍ਹਾਦਿਟ੍ਠਿਵਤ੍ਥੁਂ ਪਪ੍ਪੋਤਿ. ਉਪਾਦਿਯਤੀਤਿ ਦਲ਼੍ਹਗ੍ਗਾਹਂ ਗਣ੍ਹਾਤਿ. ਅਧਿਤਿਟ੍ਠਤੀਤਿ ਅਭਿਨਿਵਿਸ੍ਸ ਤਿਟ੍ਠਤਿ. ਕਿਨ੍ਤਿ? ‘‘ਅਤ੍ਤਾ ਮੇ’’ਤਿ. ਪਚ੍ਚਤ੍ਥਿਕਾ ਮੇ ਏਤੇਤਿ ਏਤੇ ਰੂਪਵੇਦਨਾਦਯੋ ਪਞ੍ਚੁਪਾਦਾਨਕ੍ਖਨ੍ਧਾ ਮਯ੍ਹਂ ਪਚ੍ਚਤ੍ਥਿਕਾ ਅਨਤ੍ਥਾਵਹਤ੍ਤਾਤਿ ਵਿਪਸ੍ਸਨਾਞਾਣੇਨ ਞਤ੍ਵਾ. ਵਿਪਸ੍ਸਨਾਯ ਯੋਜੇਤ੍ਵਾਤਿ ਵਿਪਸ੍ਸਨਾਯ ਖਨ੍ਧੇ ਯੋਜੇਤ੍ਵਾ.

ਯਮਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.