੯. ਪਾਲਿਲੇਯ੍ਯਸੁਤ੍ਤਵਣ੍ਣਨਾ

੮੧. ਪਰਿਯਾਦਿਣ੍ਣਰੂਪਚਿਤ੍ਤਾਤਿ ਰਾਗਾਦੀਹਿ ਪਰਿਯਾਦਿਯਿਤ੍ਵਾ ਖੇਪੇਤ੍ਵਾ ਗਹਿਤਚਿਤ੍ਤਾ.

ਭਗਵਤੋ ਚਾਰੋ ਵਿਦਿਤੋ ਪਰਿਚਯਵਸੇਨ. ਸਤ੍ਥਾ ਪਰਿਭੋਗਂ ਕਰੋਤਿ ਅਨੁਗ੍ਗਣ੍ਹਨ੍ਤੋ ‘‘ਏਵਂ ਹਿਸ੍ਸ ਦੁਗ੍ਗਤਿਮੋਕ੍ਖੋ ਭਵਿਸ੍ਸਤੀ’’ਤਿ. ਅਞ੍ਞਤ੍ਰਾਤਿ ਵਿਨਾ.

ਨਾਗੇਨਾਤਿ ਬੁਦ੍ਧਨਾਗੇਨ ਅਙ੍ਕੁਸਰਹਿਤੇਨ. ਤਤੋ ਏਵ ਉਜੁਭੂਤੇਨ ਚਿਤ੍ਤੇਨ. ਈਸਾਦਨ੍ਤਸ੍ਸ ਨਙ੍ਗਲਸਦਿਸਦਨ੍ਤਸ੍ਸ ਹਤ੍ਥਿਨੋ ਏਵਂ ਚਿਤ੍ਤਂ ਸਮੇਤਿ. ਤਤ੍ਥ ਕਾਰਣਮਾਹ ‘‘ਯਦੇਕੋ ਰਮਤੀ ਵਨੇ’’ਤਿ. ਏਤੇਨ ਕਾਯਵਿਵੇਕੇਨ ਰਤਿਸਾਮਞ੍ਞਂ ਵਦਤਿ.

ਅਤ੍ਤਨੋ ਧਮ੍ਮਤਾਯਾਤਿ ਪਕਤਿਯਾ ਸਯਮੇਵ.

ਆਸਵਾਨਂ ਖਯੋਤਿ ਇਧ ਅਰਹਤ੍ਤਂ ਅਧਿਪ੍ਪੇਤਂ, ਤਂ ਪਨ ਅਗ੍ਗਮਗ੍ਗਾਨਨ੍ਤਰਮੇਵਾਤਿ ਆਹ ‘‘ਮਗ੍ਗਾਨਨ੍ਤਰਂ ਅਰਹਤ੍ਤਫਲ’’ਨ੍ਤਿ. ਵਿਚਯੋ ਦੇਸਨਾਪਞ੍ਞਾ ਅਧਿਪ੍ਪੇਤਾ, ਸਾ ਚ ਅਨੇਕਧਾ ਪਵਤ੍ਤਾ ਏਵਾਤਿ ਵੁਤ੍ਤਂ ‘‘ਵਿਚਯਸੋ’’ਤਿ, ਅਨੇਕਕ੍ਖਤ੍ਤੁਂ ਪਵਤ੍ਤਮਾਨਾਪਿ ਵਿਚਯੋ ਏਵਾਤਿ ਕਤ੍ਵਾ ‘‘ਵਿਚਯੇਨਾ’’ਤਿ ਅਤ੍ਥੋ ਵੁਤ੍ਤੋ. ਸਾਸਨਧਮ੍ਮੋਤਿ ਸੀਲਕ੍ਖਨ੍ਧਾਦਿਪਰਿਦੀਪਨੋ ਪਰਿਯਤ੍ਤਿਧਮ੍ਮੋ. ਪਰਿਵਿਤਕ੍ਕੋ ਉਦਪਾਦਿ ‘‘ਚਤ੍ਤਾਰੋ ਸਤਿਪਟ੍ਠਾਨਾ’’ਤਿਆਦਿਨਾ, ਏਵਂ ਕੋਟ੍ਠਾਸਤੋ ਪਰਿਚ੍ਛਿਜ੍ਜ ਦੇਸਿਤੇ ਮਯਾ ਧਮ੍ਮੇ ਕਤਮਸ੍ਸ ਜਾਨਨਸ੍ਸ ਅਨ੍ਤਰਾ ਆਸਵਾਨਂ ਖਯੋ ਹੋਤੀਤਿ ਏਕਚ੍ਚਸ੍ਸ ਕਙ੍ਖਾ ਹੋਤਿਯੇਵਾਤਿ ਅਧਿਪ੍ਪਾਯੋ. ਦਿਟ੍ਠਿ ਏਵ ਸਮਨੁਪਸ੍ਸਨਾ ਦਿਟ੍ਠਿਸਮਨੁਪਸ੍ਸਨਾ. ਦਿਟ੍ਠਿਸਙ੍ਖਾਰੋਤਿ ਦਿਟ੍ਠਿਪਚ੍ਚਯੋ ਸਙ੍ਖਾਰੋ. ਤਤੋ ਏਵ ਤਣ੍ਹਾਪਚ੍ਚਯੋ ਹੋਤੀਤਿ ਵੁਤ੍ਤਂ ‘‘ਤਤੋਜੋ ਸੋ ਸਙ੍ਖਾਰੋ’’ਤਿ. ਤਤੋ ਤਣ੍ਹਾਤੋ ਸੋ ਸਙ੍ਖਾਰੋ ਜਾਤੋਤਿ ਚਤੂਸੁ ਏਸ ਦਿਟ੍ਠਿਸਙ੍ਖਾਰੋ ਦਿਟ੍ਠੂਪਨਿਸ੍ਸਯੋ ਸਙ੍ਖਾਰੋ ਜਾਯਤਿ. ਅਵਿਜ੍ਜਾਸਮ੍ਫਸ੍ਸੋਤਿ ਅਵਿਜ੍ਜਾਸਮ੍ਪਯੁਤ੍ਤਸਮ੍ਫਸ੍ਸੋ. ਏਵਮੇਤ੍ਥ ਭਗਵਾ ਸਲ਼ਾਯਤਨਨਾਮਰੂਪਵਿਞ੍ਞਾਣਾਨਿ ਸਙ੍ਖਾਰਪਕ੍ਖਿਕਾਨੇਵ ਕਤ੍ਵਾ ਦਸ੍ਸੇਤਿ.

ਏਤ੍ਤਕੇ ਠਾਨੇਤਿ ‘‘ਇਧ ਭਿਕ੍ਖਵੇ ਅਸ੍ਸੁਤਵਾ ਪੁਥੁਜ੍ਜਨੋ’’ਤਿਆਦਿਂ ਕਤ੍ਵਾ ਯਾਵ ‘‘ਨ ਮੇ ਭਵਿਸ੍ਸਤੀ’’ਤਿ ਏਤ੍ਤਕੇ ਠਾਨੇ. ਗਹਿਤਗਹਿਤਦਿਟ੍ਠਿਨ੍ਤਿ ਸਕ੍ਕਾਯਦਿਟ੍ਠਿਯਾ ‘‘ਸੋ ਅਤ੍ਤਾ, ਸੋ ਲੋਕੋ’’ਤਿਆਦਿਨਾ ਪਵਤ੍ਤਂ ਸਸ੍ਸਤਦਿਟ੍ਠਿਂ, ਨੋ ਚਸ੍ਸਂ, ਨੋ ਚ ਮੇ ਸਿਯਾ’’ਤਿਆਦਿਨਾ ਪਵਤ੍ਤਂ ਉਚ੍ਛੇਦਦਿਟ੍ਠਿਨ੍ਤਿ ਤਥਾ ਤਥਾ ਗਹਿਤਦਿਟ੍ਠਿਂ. ‘‘ਇਤਿ ਖੋ, ਭਿਕ੍ਖਵੇ, ਸੋਪਿ ਸਙ੍ਖਾਰੋ ਅਨਿਚ੍ਚੋ’’ਤਿਆਦਿਦੇਸਨਾਯ ਵਿਸ੍ਸਜ੍ਜਾਪੇਨ੍ਤੋ ਆਗਤੋ. ਤਤ੍ਥ ਤਤ੍ਥੇਵਾਸ੍ਸ ਉਪ੍ਪਨ੍ਨਦਿਟ੍ਠਿਵਿਵੇਚਨਤੋ ਇਮਿਸ੍ਸਾ ਦੇਸਨਾਯ ਪੁਗ੍ਗਲਜ੍ਝਾਸਯੇਨ ਪਵਤ੍ਤਿਤਤਾ ਵੇਦਿਤਬ੍ਬਾ, ਤੇਵੀਸਤਿਯਾ ਠਾਨੇਸੁ ਅਰਹਤ੍ਤਪਾਪਨੇਨ ਦੇਸਨਾਵਿਲਾਸੋ. ਤਤੋਜੋ ਸੋ ਸਙ੍ਖਾਰੋਤਿ ਤਤੋ ਵਿਚਿਕਿਚ੍ਛਾਯ ਪਚ੍ਚਯਭੂਤਤਣ੍ਹਾਤੋ ਜਾਤੋ ਵਿਚਿਕਿਚ੍ਛਾਯ ਸਮ੍ਪਯੁਤ੍ਤੋ ਸਙ੍ਖਾਰੋ. ਯਦਿ ਸਹਜਾਤਾਦਿਪਚ੍ਚਯਵਸੇਨ ਤਤੋ ਤਣ੍ਹਾਤੋ ਜਾਤੋਤਿ ਤਤੋਜੋ ਸਙ੍ਖਾਰੋਤਿ ਵੁਚ੍ਚੇਯ੍ਯ, ਇਦਮਯੁਤ੍ਤਨ੍ਤਿ ਦਸ੍ਸੇਨ੍ਤੋ ‘‘ਤਣ੍ਹਾਸਮ੍ਪਯੁਤ੍ਤ…ਪੇ… ਜਾਯਤੀ’’ਤਿ ਚੋਦੇਤਿ. ਇਤਰੋ ਉਪਨਿਸ੍ਸਯਕੋਟਿ ਇਧਾਧਿਪ੍ਪੇਤਾਤਿ ਦਸ੍ਸੇਨ੍ਤੋ ‘‘ਅਪ੍ਪਹੀਨਤ੍ਤਾ’’ਤਿ ਵਤ੍ਵਾ ‘‘ਯਸ੍ਸ ਹੀ’’ਤਿਆਦਿਨਾ ਤਮਤ੍ਥਂ ਵਿਵਰਤਿ. ਨ ਹਿ ਤਣ੍ਹਾਯ ਵਿਚਿਕਿਚ੍ਛਾ ਸਮ੍ਭਵਤਿ. ਯਦਿ ਅਸਤਿ ਸਹਜਾਤਕੋਟਿਯਾ ਉਪਨਿਸ੍ਸਯਕੋਟਿਯਾ ਤਣ੍ਹਾਪਚ੍ਚਯਾ ਵਿਚਿਕਿਚ੍ਛਾਯ ਸਮ੍ਭਵੋ ਏਵ. ਦਿਟ੍ਠਿਯਾਪੀਤਿ ਦ੍ਵਾਸਟ੍ਠਿਦਿਟ੍ਠਿਯਾਪਿ. ਤੇਨਾਹ ‘‘ਚਤੂਸੁ ਹੀ’’ਤਿਆਦਿ. ਵੀਸਤਿ ਸਕ੍ਕਾਯਦਿਟ੍ਠਿਯੋ ਸਸ੍ਸਤਦਿਟ੍ਠਿਂ ਉਚ੍ਛੇਦਦਿਟ੍ਠਿਂ ਵਿਚਿਕਿਚ੍ਛਞ੍ਚ ਪਕ੍ਖਿਪਿਤ੍ਵਾ ਪਚ੍ਚੇਕਂ ਅਨਿਚ੍ਚਤਾਮੁਖੇਨ ਵਿਪਸ੍ਸਨਂ ਦਸ੍ਸੇਤ੍ਵਾ ਅਰਹਤ੍ਤਂ ਪਾਪੇਤ੍ਵਾ ਦੇਸਨਾ ਨਿਟ੍ਠਾਪਿਤਾਤਿ ਆਹ ‘‘ਤੇਵੀਸਤਿਯਾ ਠਾਨੇਸੂ’’ਤਿਆਦਿ.

ਪਾਲਿਲੇਯ੍ਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.