੭. ਖਜ੍ਜਨੀਯਸੁਤ੍ਤਵਣ੍ਣਨਾ

੭੯. ਵਿਪਸ੍ਸਨਾਵਸੇਨਾਤਿ ਏਤਰਹਿ ਰੂਪਵੇਦਨਾਦਯੋ ਅਨੁਸ੍ਸਰਿਤ੍ਵਾ ‘‘ਪੁਬ੍ਬੇਪਾਹਂ ਏਵਂਵੇਦਨੋ ਅਹੋਸਿ’’ਨ੍ਤਿ ਅਤੀਤਾਨਂ ਰੂਪਵੇਦਨਾਦੀਨਂ ਪਚ੍ਚੁਪ੍ਪਨ੍ਨੇਹਿ ਵਿਸੇਸਾਭਾਵਦਸ੍ਸਨਾ ਵਿਪਸ੍ਸਨਾ, ਤਸ੍ਸਾ ਵਿਪਸ੍ਸਨਾਯ ਵਸੇਨ. ਯ੍ਵਾਯਂ ‘‘ਨ ਇਦਂ ਅਭਿਞ੍ਞਾਵਸੇਨਾ’’ਤਿ ਪਟਿਕ੍ਖੇਪੋ ਕਤੋ, ਤਸ੍ਸ ਕਾਰਣਂ ਦਸ੍ਸੇਨ੍ਤੋ ‘‘ਅਭਿਞ੍ਞਾਵਸੇਨ ਹੀ’’ਤਿਆਦਿਮਾਹ. ਖਨ੍ਧਪਟਿਬਦ੍ਧਾ ਨਾਮ ਗੋਤ੍ਤਵਣ੍ਣਹਾਰਾਦਯੋ. ਏਵਂ ਅਨੁਸ੍ਸਰਨ੍ਤੋਤਿ ਯਥਾਵੁਤ੍ਤਵਿਪਸ੍ਸਨਾਵਸੇਨ ਅਨੁਸ੍ਸਰਨ੍ਤੋ. ਸਭਾਵਧਮ੍ਮਾਨਂ ਏਵ ਅਨੁਸ੍ਸਰਣਸ੍ਸ ਵੁਤ੍ਤਤ੍ਤਾ ‘‘ਸੁਞ੍ਞਤਾਪਬ੍ਬ’’ਨ੍ਤਿ ਵੁਤ੍ਤਂ.

ਯਸ੍ਮਾ ਤੇ ਏਵ ਰੂਪਾਦਯੋ ਨੇਵ ਅਤ੍ਤਾ, ਨ ਅਤ੍ਤਨਿਯਾ ਅਸਾਰਾ ਅਨਿਸ੍ਸਰਾ, ਤਸ੍ਮਾ ਤਤੋ ਸੁਞ੍ਞਾ, ਤੇਸਂ ਭਾਵੋ ਸੁਞ੍ਞਤਾ, ਤਸ੍ਸਾ ਲਕ੍ਖਣਂ ਰੁਪ੍ਪਨਾਦਿਕਂ ਦਸ੍ਸੇਤੁਂ.

ਕਿਞ੍ਚਾਤਿ ਹੇਤੁਅਤ੍ਥਜੋਤਕੇ ਕਾਰਣੇ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਕਿਞ੍ਚਾਤਿ ਕਾਰਣਪੁਚ੍ਛਾ, ਕੇਨ ਕਾਰਣੇਨ ਰੂਪਂ ਵਦੇਥਾ’’ਤਿ. ਏਤਨ੍ਤਿ ਏਤਂ ਭੂਤੁਪਾਦਾਯਭੇਦਂ ਧਮ੍ਮਜਾਤਂ. ਕੇਨ ਕਾਰਣੇਨ ਰੂਪਂ ਨਾਮਾਤਿ ਕਿਂ ਕਾਰਣਂ ਨਿਸ੍ਸਾਯ ਰੂਪਨ੍ਤਿ ਵੁਚ੍ਚਤੀਤਿ ਅਤ੍ਥੋ. ਕਾਰਣੁਦ੍ਦੇਸੋਤਿ ਕਾਰਣਸ੍ਸ ਉਦ੍ਦਿਸਨਂ. ਰੁਪ੍ਪਤੀਤਿ ਏਤ੍ਥ ਰੂਪਂ ਨਾਮ ਸੀਤਾਦਿਵਿਰੋਧਿਪਚ੍ਚਯਸਨ੍ਨਿਪਾਤੇਨ ਵਿਸਦਿਸੁਪ੍ਪਤ੍ਤਿ. ਤੇਨਾਹ ‘‘ਸੀਤੇਨਪੀ’’ਤਿਆਦਿ. ਪਬ੍ਬਤਪਾਦੇਤਿ ਚਕ੍ਕਵਾਲ਼ਪਬ੍ਬਤਪਾਦੇ, ਸੋ ਪਨ ਤਤ੍ਥ ਅਚ੍ਚੁਗ੍ਗਤੋ ਪਾਕਾਰੋ ਵਿਯ ਠਿਤੋ. ਤਥਾ ਹਿ ਤਤ੍ਥ ਸਤ੍ਤਾ ਓਲਮ੍ਬਨ੍ਤਾ ਤਿਟ੍ਠਨ੍ਤਿ. ਹਤ੍ਥਪਾਸਾਗਤਾਤਿ ਹਤ੍ਥਪਾਸਂ ਆਗਤਾ ਉਪਾਗਤਾ. ਤਤ੍ਥਾਤਿ ਤਸ੍ਮਿਂ ਹਤ੍ਥਪਾਸਾਗਤੇ ਸਤ੍ਤੇ. ਛਿਜ੍ਜਿਤ੍ਵਾਤਿ ਮੁਚ੍ਛਾਪਤ੍ਤਿਯਾ ਮੁਚ੍ਚਿਤ੍ਵਾ, ਅਙ੍ਗਪਚ੍ਚਙ੍ਗਉਚ੍ਛੇਦਵਸੇਨ ਵਾ ਪਰਿਚ੍ਛਿਜ੍ਜਿਤ੍ਵਾ. ਅਚ੍ਚਨ੍ਤਖਾਰੇ ਉਦਕੇਤਿ ਆਤਪਸਨ੍ਤਾਪਾਭਾਵੇਨ ਅਤਿਸੀਤਭਾਵਮੇਵ ਸਨ੍ਧਾਯ ਅਚ੍ਚਨ੍ਤਖਾਰਤਾ ਵੁਤ੍ਤਾ ਸਿਯਾ. ਨ ਹਿ ਤਂ ਕਪ੍ਪਸਣ੍ਠਾਨਉਦਕਂ ਸਮ੍ਪਤ੍ਤਿਕਰਮਹਾਮੇਘਵੁਟ੍ਠਂ ਪਥਵੀਸਨ੍ਧਾਰਕਂ ਕਪ੍ਪਵਿਨਾਸਉਦਕਂ ਵਿਯ ਖਾਰਂ ਭਵਿਤੁਂ ਅਰਹਤਿ, ਤਥਾ ਸਤਿ ਪਥਵੀਪਿ ਵਿਲੀਯੇਯ੍ਯਾਤਿ. ਮਹਿਂਸਕਰਟ੍ਠਂ ਨਾਮ ਹਿਮਵਨ੍ਤਪਦੇਸੇ ਏਕਂ ਰਟ੍ਠਂ.

ਅਵੀਚਿਮਹਾਨਿਰਯੇਤਿ ਸਉਸ੍ਸਦਂ ਅਵੀਚਿਨਿਰਯਂ ਵੁਤ੍ਤਂ. ਗਙ੍ਗਾਪਿਟ੍ਠੇਤਿ ਗਙ੍ਗਾਤੀਰੇ.

ਸਰਨ੍ਤਾ ਗਚ੍ਛਨ੍ਤੀਤਿ ਸਰੀਸਪਪਦਸ੍ਸ ਅਤ੍ਥਂ ਵਦਤਿ. ਏਤਨ੍ਤਿ ਰੁਪ੍ਪਨਂ. ਯਥਾ ਕਠਿਨਤਾ ਪਥਵਿਯਾ ਪਚ੍ਚਤ੍ਤਲਕ੍ਖਣਂ, ਏਵਂ ਰੁਪ੍ਪਨਂ ਰੂਪਕ੍ਖਨ੍ਧਸ੍ਸ ਪਚ੍ਚਤ੍ਤਲਕ੍ਖਣਂ, ਸਭਾਵਭੂਤਲਕ੍ਖਣਨ੍ਤਿ ਅਤ੍ਥੋ.

ਪੁਰਿਮਸਦਿਸਨ੍ਤਿ ਪੁਰਿਮੇ ਰੂਪਕ੍ਖਨ੍ਧੇ ਵੁਤ੍ਤੇਨ ਸਦਿਸਂ. ਤਂ ‘‘ਕਿਨ੍ਤਿ ਕਾਰਣਪੁਚ੍ਛਾ’’ਤਿਆਦਿਨਾ ਵੁਤ੍ਤਨਯੇਨੇਵ ਵੇਦਿਤਬ੍ਬਂ. ਸੁਖਂ ਇਟ੍ਠਾਰਮ੍ਮਣਂ. ਸੁਖਾਦੀਨਂ ਵੇਦਨਾਨਂ. ਪਚ੍ਚਯਤੋਤਿ ਆਰਮ੍ਮਣਪਚ੍ਚਯਤੋ. ਅਯਮਤ੍ਥੋਤਿ ‘‘ਸੁਖਾਰਮ੍ਮਣਂ ਸੁਖਨ੍ਤਿ ਵੁਚ੍ਚਤੀ’’ਤਿ ਅਯਮਤ੍ਥੋ. ਉਤ੍ਤਰਪਦਲੋਪੇਨ ਹੇਸ ਨਿਦ੍ਦੇਸੋ. ਵੇਦਯਤੀਤਿ ਅਨੁਭਵਤਿ. ਵੇਦਯਿਤਲਕ੍ਖਣਾਤਿ ਅਨੁਭਵਨਲਕ੍ਖਣਾ.

ਨੀਲਪੁਪ੍ਫੇਤਿ ਨੀਲਵਣ੍ਣਪੁਪ੍ਫੇ. ਵਤ੍ਥੇ ਵਾਤਿ ਨੀਲਵਤ੍ਥੇ. ਵਾ-ਸਦ੍ਦੇਨ ਵਣ੍ਣਧਾਤੁਆਦਿਂ ਸਙ੍ਗਣ੍ਹਾਤਿ. ਅਪ੍ਪਨਂ ਵਾ ਝਾਨਂ ਵਾਪੇਨ੍ਤੋ. ਉਪ੍ਪਜ੍ਜਨਸਞ੍ਞਾਪੀਤਿ ਯਂ ਕਿਞ੍ਚਿ ਨੀਲਂ ਰੂਪਾਯਤਨਂ ਆਰਬ੍ਭ ਉਪ੍ਪਜ੍ਜਨਸਞ੍ਞਾਪਿ, ਯਾ ਪਕਿਣ੍ਣਕਸਞ੍ਞਾਤਿ ਵੁਚ੍ਚਤਿ.

ਰੂਪਤ੍ਤਾਯਾਤਿ ਰੂਪਭਾਵਾਯ. ਯਾਗੁਮੇਵਾਤਿ ਯਾਗੁਭਾਵਿਨਮੇਵ ਵਤ੍ਥੁਂ. ਯਾਗੁਤ੍ਤਾਯ ਯਾਗੁਭਾਵਾਯ. ਪਚਤਿ ਨਾਮ ਪੁਗ੍ਗਲੋ. ਏਵਨ੍ਤਿ ਯਥਾ ਯਾਗੁਆਦਿਵਤ੍ਥੁਂ ਪੁਰਿਸੋ ਯਾਗੁਆਦਿਅਤ੍ਥਾਯ ਪਚਤਿ ਨਿਪ੍ਫਾਦੇਤਿ, ਅਯਂ ਏਵਂ ਰੁਪ੍ਪਨਾਦਿਸਭਾਵੇ ਧਮ੍ਮਸਮੂਹੇ ਯਥਾਸਕਂ ਪਚ੍ਚਯੇਹਿ ਅਭਿਸਙ੍ਖਰਿਯਮਾਨੇ ਚੇਤਨਾਪਧਾਨੋ ਧਮ੍ਮਸਮੂਹੋ ਪਵਤ੍ਤਨਤ੍ਥਂ ਵਿਸੇਸਪਚ੍ਚਯੋ ਹੁਤ੍ਵਾ ਤੇ ਅਭਿਸਙ੍ਖਰੋਤਿ ਨਿਰੋਪੇਤਿ ਨਿਬ੍ਬਤ੍ਤੇਤਿ. ਤੇਨਾਹ ‘‘ਪਚ੍ਚਯੇਹੀ’’ਤਿਆਦਿ. ਰੂਪਮੇਵਾਤਿ ਰੂਪਸਭਾਵਮੇਵ, ਨ ਅਞ੍ਞਂ ਸਭਾਵਂ. ਅਭਿਸਙ੍ਖਰੋਤੀਤਿ ਇਤਰੇਹਿ ਪਚ੍ਚਯਧਮ੍ਮੇਹਿ ਅਧਿਕਂ ਸੁਟ੍ਠੁ ਪਚ੍ਚਯਤਂ ਕਰੋਤਿ. ‘‘ਉਪਗਚ੍ਛਤਿ ਯਾਪੇਤਿ ਆਯੂਹਤੀ’’ਤਿ ਤਸ੍ਸੇਵ ਵੇਵਚਨਾਨਿ. ਅਭਿਸਙ੍ਖਰਣਮੇਵ ਹਿ ਆਯੂਹਨਾਦੀਨਿ. ਨਿਬ੍ਬਤ੍ਤੇਤੀਤਿ ਤੇਸਂ ਧਮ੍ਮਾਨਂ ਰੁਪ੍ਪਨਾਦਿਭਾਵੇਨ ਨਿਬ੍ਬਤ੍ਤਿਯਾ ਪਚ੍ਚਯੋ ਹੋਤੀਤਿ ਅਤ੍ਥੋ. ਚੇਤਯਿਤਲਕ੍ਖਣਸ੍ਸ ਸਙ੍ਖਾਰਸ੍ਸਾਤਿ ਇਦਂ ਸਙ੍ਖਾਰਕ੍ਖਨ੍ਧਧਮ੍ਮਾਨਂ ਚੇਤਨਾਪਧਾਨਤ੍ਤਾ ਵੁਤ੍ਤਂ. ਤਥਾ ਹਿ ਭਗਵਾ ਸੁਤ੍ਤਨ੍ਤਭਾਜਨੀਯੇ ਸਙ੍ਖਾਰਕ੍ਖਨ੍ਧਂ ਵਿਭਜਨ੍ਤੇਨ ਚੇਤਨਾਵ ਵਿਭਤ੍ਤਾ.

ਵਾਤਿਙ੍ਗਣਂ ਬ੍ਰਹਤਿਫਲਂ. ਚਤੁਰਸ੍ਸਵਲ੍ਲੀਤਿ ਤਿਵੁਤਾਲਤਾ. ਅਖਾਰਿਕਨ੍ਤਿ ਖਾਰਰਸਰਹਿਤਂ, ਤਂ ਪਨ ਪਣ੍ਣਫਲਾਦਿ. ਯਤ੍ਥ ਲੋਣਰਸੋ ਅਧਿਕੋ, ਤਂ ਲੋਣਿਕਨ੍ਤਿ ਆਹ ‘‘ਲੋਣਯਾਗੂ’’ਤਿਆਦਿ. ਅਮ੍ਬਿਲਾਦਿਭੇਦਂ ਰਸਂ.

ਆਕਾਰਸਣ੍ਠਾਨਗਹਣਵਸੇਨਾਤਿ ਨੀਲਪੀਤਾਦਿਆਕਾਰਗਹਣਵਸੇਨ ਚੇਵ ਵਟ੍ਟਚਤੁਰਸ੍ਸਾਦਿਸਣ੍ਠਾਨਗਹਣਵਸੇਨ ਚ. ਵਿਨਾਪਿ ਆਕਾਰਸਣ੍ਠਾਨਾਤਿ ਆਕਾਰਸਣ੍ਠਾਨੇਹਿ ਵਿਨਾ, ਤੇ ਠਪੇਤ੍ਵਾਪਿ. ਪਚ੍ਚਤ੍ਤਭੇਦਗਹਣਵਸੇਨਾਤਿ ਤਸ੍ਸ ਤਸ੍ਸ ਆਰਮ੍ਮਣਸ੍ਸ ਪਭੇਦਗਹਣਵਸੇਨ. ਅਸਮ੍ਮੋਹਤੋਤਿ ਯਾਥਾਵਤੋ. ਵਿਸੇਸੋ ਵਿਸੇਸਤ੍ਥਦੀਪਨਤੋ, ਅਵਿਸੇਸੋ ਅਯਂ ਧਮ੍ਮੋ ਅਵਿਸੇਸਦੀਪਨਤੋ. ਤੇਨਾਹ ‘‘ਵਿਸੇਸੋ ਵੇਦਿਤਬ੍ਬੋ’’ਤਿ. ਜਾਨਨਞ੍ਹਿ ਅਵਿਸਿਟ੍ਠਂ, ਤਂ ਸਮਾਸਪਦਤੋ ਉਪਸਗ੍ਗਾ ਵਿਸੇਸੇਨ੍ਤਿ. ਤਥਾ ਹਿ ਸਞ੍ਜਾਨਨਪਦਂ ਪਚ੍ਚਭਿਞ੍ਞਾਣਨਿਮਿਤ੍ਤਂ ਆਕਾਰਗਹਣਮਤ੍ਤਂ ਬੋਧੇਤਿ, ਵਿਜਾਨਨਪਦਂ ਤਤੋ ਵਿਸਿਟ੍ਠਵਿਸਯਗਹਣਂ. ਪਜਾਨਨਪਦਂ ਪਨ ਤਤੋਪਿ ਵਿਸਿਟ੍ਠਤਰਂ ਪਕਾਰਤੋ ਅਵਬੋਧਂ ਬੋਧੇਤਿ. ਤੇਨਾਹ ‘‘ਤਸ੍ਸਾਪੀ’’ਤਿਆਦਿ. ਆਰਮ੍ਮਣਸਞ੍ਜਾਨਨਮਤ੍ਤਮੇਵਾਤਿ ਨੀਲਾਦਿਭੇਦਸ੍ਸ ਆਰਮ੍ਮਣਸ੍ਸ ਸਲ੍ਲਕ੍ਖਣਮਤ੍ਤਮੇਵ. ਅਵਧਾਰਣੇਨ ਲਕ੍ਖਣਪਟਿਵੇਧਤ੍ਤਂ ਨਿਵਤ੍ਤੇਤਿ. ਤੇਨਾਹ ‘‘ਅਨਿਚ੍ਚ’’ਨ੍ਤਿਆਦਿ. ਞਾਣਸਮ੍ਪਯੁਤ੍ਤਚਿਤ੍ਤੇਹਿ ਵਿਪਸ੍ਸਨ੍ਤਸ੍ਸ ਵਿਪਸ੍ਸਨਾਯ ਪਗੁਣਭਾਵੇ ਸਤਿ ਞਾਣਵਿਪ੍ਪਯੁਤ੍ਤੇਨ ਚਿਤ੍ਤੇਨਪਿ ਵਿਪਸ੍ਸਨਾ ਹੋਤਿਯੇਵਾਤਿ ਆਹ ‘‘ਅਨਿਚ੍ਚਾਦਿਵਸੇਨ ਲਕ੍ਖਣਪਟਿਵੇਧਞ੍ਚ ਪਾਪੇਤੀ’’ਤਿ. ਪਟਿਵੇਧਨ੍ਤਿ ਚ ਉਪਲਦ੍ਧਿਮੇਵ ਵਦਤਿ, ਨ ਪਟਿਵਿਜ੍ਝਨਂ. ਤੇਨਾਹ ‘‘ਉਸ੍ਸਕ੍ਕਿਤ੍ਵਾ ਪਨਾ’’ਤਿਆਦਿ. ਉਸ੍ਸਕ੍ਕਿਤ੍ਵਾਤਿ ਉਸ੍ਸਕ੍ਕਾਪੇਤ੍ਵਾ ਮਗ੍ਗਪਾਤੁਭਾਵਮ੍ਪਿ ਪਾਪੇਤਿ ਅਸਮ੍ਮੋਹਸਭਾਵਤ੍ਤਾ. ਯਥਾ ਲਕ੍ਖਣਪਟਿਵੇਧਕਾਲੇ ਸਞ੍ਜਾਨਨਲਕ੍ਖਣਵਸੇਨ ਸਞ੍ਞਾਣਅਨੁਰੂਪਵਸੇਨੇਵ ਪਵਤ੍ਤਂ, ਏਵਂ ਵਿਞ੍ਞਾਣਵਿਜਾਨਨਵਸੇਨ ਵਾਯਂ ਅਨੁਰੂਪਵਸੇਨੇਵ ਪਵਤ੍ਤਤੀਤਿ ਦਟ੍ਠਬ੍ਬਂ.

ਇਦਾਨਿ ਤਮਤ੍ਥਂ ਹੇਰਞ੍ਞਿਕਾਦਿਉਪਮਾਯ ਵਿਭਾਵੇਤੁਂ ‘‘ਯਥਾ ਹੀ’’ਤਿਆਦਿਮਾਹ. ਹਿਰਞ੍ਞਂ ਵੁਚ੍ਚਤਿ ਕਹਾਪਣਂ, ਹਿਰਞ੍ਞਜਾਨਨੇ ਨਿਯੁਤ੍ਤੋ ਹੇਰਞ੍ਞਿਕੋ. ਲੋਕਵੋਹਾਰੇ ਅਜਾਤਾ ਅਸਞ੍ਜਾਤਾ ਬੁਦ੍ਧਿ ਏਤਸ੍ਸਾਤਿ ਅਜਾਤਬੁਦ੍ਧਿ, ਬਾਲਦਾਰਕੋ. ਵੋਹਾਰਕੁਸਲੋ ਗਾਮਵਾਸੀ ਪੁਰਿਸੋ ਗਾਮਿਕਪੁਰਿਸੋ. ਉਪਭੋਗਪਰਿਭੋਗਾਰਹਤ੍ਤਾ ਉਪਭੋਗਪਰਿਭੋਗਂ. ਤਮ੍ਬਕਂਸਮਯਤ੍ਤਾ ਕੂਟੋ. ਮਹਾਸਾਰਤ੍ਤਾ ਛੇਕੋ. ਅਡ੍ਢਸਾਰਤ੍ਤਾ ਕਰਟੋ. ਨਿਹੀਨਸਾਰਤ੍ਤਾ ਸਣ੍ਹੋ. ਏਤ੍ਥ ਚ ਯਥਾ ਹੇਰਞ੍ਞਿਕੋ ਕਹਾਪਣਂ ਚਿਤ੍ਤਾਦਿਭਾਵਤੋ ਉਦ੍ਧਂ ਕੂਟਾਦਿਭਾਵਂ ਰੂਪਦਸ੍ਸਨਾਦਿਵਸੇਨ ਉਪ੍ਪਤ੍ਤਿਟ੍ਠਾਨਤੋਪਿ ਜਾਨਨ੍ਤੋ ਅਨੇਕਾਕਾਰਤੋ ਜਾਨਾਤਿ, ਏਵਂ ਪਞ੍ਞਾ ਆਰਮ੍ਮਣਂ ਨਾਨਪ੍ਪਕਾਰਤੋ ਜਾਨਾਤਿ ਪਟਿਵਿਜ੍ਝਤਿ, ਤਾਯ ਸਦ੍ਧਿਂ ਪਵਤ੍ਤਮਾਨਵਿਞ੍ਞਾਣਮ੍ਪਿ ਯਥਾਵਿਸਯਂ ਆਰਮ੍ਮਣਂ ਜਾਨਾਤਿ.

ਏਵਂ ਸ੍ਵਾਯਂ ਨੇਸਂ ਜਾਨਨੇ ਵਿਸੇਸੋ ਅਞ੍ਞੇਸਂ ਅਵਿਸਯੋ, ਬੁਦ੍ਧਾਨਂ ਏਵ ਵਿਸਯੋਤਿ ਇਦਂ ਵਿਸੇਸਂ ਮਿਲਿਨ੍ਦਪਞ੍ਹੇਨ ਵਿਭਾਵੇਤੁਂ ‘‘ਤੇਨਾਹਾ’’ਤਿਆਦਿਮਾਹ, ਤਂ ਸੁਵਿਞ੍ਞੇਯ੍ਯਮੇਵ.

ਅਤ੍ਤਸੁਞ੍ਞਾਨਂ ਸਭਾਵਧਮ੍ਮਾਨਂ ਧਮ੍ਮਮਤ੍ਤਤਾਯ ਕਥਿਤਤ੍ਤਾ ‘‘ਅਨਤ੍ਤਲਕ੍ਖਣਂ ਕਥੇਤ੍ਵਾ’’ਤਿ ਵੁਤ੍ਤਂ. ਹੇਟ੍ਠਿਮਮਗ੍ਗਾ ਚ ਯਦਿ ਅਧਿਗਤਾ, ਅਰਹਤ੍ਤਸ੍ਸ ਅਨਧਿਗਤਤ੍ਤਾ ‘‘ਏਕਦੇਸਮਤ੍ਤੇਨਾ’’ਤਿ ਵੁਤ੍ਤਂ, ਤਂ ਅਨਿਚ੍ਚਲਕ੍ਖਣਂ ਦਸ੍ਸੇਤੁਂ ਇਦਂ ਪਬ੍ਬਮਾਰਦ੍ਧਂ, ਇਤਰਾਨਿ ਦ੍ਵੇ ਲਕ੍ਖਣਾਨਿ ਤਸ੍ਸ ਪਰਿਹਾਰਭਾਵੇਨਾਤਿ ਅਧਿਪ੍ਪਾਯੋ.

ਯਸ੍ਮਾ ਪਨੇਤ੍ਥ ‘‘ਤਂ ਕਿਂ ਮਞ੍ਞਥ, ਭਿਕ੍ਖਵੇ’’ਤਿਆਦਿਦੇਸਨਾਯ ਤੀਸੁ ਲਕ੍ਖਣੇਸੁ ਇਦਮੇਵ ਪਧਾਨਭਾਵੇਨ ਦਸ੍ਸਿਤਂ, ਇਦਂ ਅਪ੍ਪਧਾਨਭਾਵੇਨਾਤਿ ਨ ਸਕ੍ਕਾ ਵਤ੍ਤੁਂ, ਤਸ੍ਮਾ ‘‘ਤੀਣਿ ਲਕ੍ਖਣਾਨਿ ਸਮੋਧਾਨੇਤ੍ਵਾ ਦਸ੍ਸੇਤੁਮ੍ਪੀ’’ਤਿ ਵੁਤ੍ਤਂ. ਅਪਚਿਨਾਤੀਤਿ ਅਪਚਯਗਾਮਿਧਮ੍ਮੇ ਨਿਵਤ੍ਤੇਤਿ ਏਕਂਸਤੋ ਅਪਚਯਗਾਮਿਪਟਿਪਦਾਯ ਪਰਿਪੂਰਣਤੋ. ਤੇਨਾਹ ‘‘ਨੋ ਆਚਿਨਾਤੀ’’ਤਿਆਦਿ. ਵਟ੍ਟਂ ਵਿਨਾਸੇਤੀਤਿ ਵਿਧਮਤਿ ਅਦਸ੍ਸਨਂ ਗਮੇਤਿ. ਨੇਵ ਚਿਨਾਤੀਤਿ ਨ ਵਡ੍ਢੇਤਿ. ਤਦੇਵਾਤਿ ਤਂ ਵਟ੍ਟਂ ਏਵ. ਵਿਸ੍ਸਜ੍ਜੇਤੀਤਿ ਛਡ੍ਡੇਤਿ. ਵਿਕਿਰਤੀਤਿ ਵਿਦ੍ਧਂਸੇਤਿ. ਵਿਧੂਪੇਤੀਤਿ ਵਟ੍ਟਤ੍ਤਯਸਙ੍ਖਾਤਂ ਅਗ੍ਗਿਕ੍ਖਨ੍ਧਂ ਵਿਗਤਧੂਮਂ ਵਿਗਤਸਨ੍ਤਾਪਂ ਕਰੋਤੀਤਿ ਅਤ੍ਥੋਤਿ ਆਹ ‘‘ਨਿਬ੍ਬਾਪੇਤੀ’’ਤਿ.

ਏਵਂ ਪਸ੍ਸਨ੍ਤਿਆਦਿ ਅਨਾਗਾਮਿਫਲੇ ਠਿਤਸ੍ਸ ਅਰਿਯਸਾਵਕਸ੍ਸ ਅਗ੍ਗਮਗ੍ਗਫਲਾਧਿਗਮਾਯ ਦੇਸਨਾਤਿ ਅਧਿਪ੍ਪਾਯੇਨਾਹ ‘‘ਵਟ੍ਟਂ ਵਿਨਾਸੇਤ੍ਵਾ ਠਿਤਂ ਮਹਾਖੀਣਾਸਵਂ ਦਸ੍ਸੇਸ੍ਸਾਮੀ’’ਤਿ. ਖੀਣਾਸਵਸ੍ਸ ਅਨਾਗਤਭਾਵਦਸ੍ਸਨਂਯੇਵ, ਸਬ੍ਬਾ ਚਾਯਂ ਹੇਟ੍ਠਿਮਾ ਦੇਸਨਾ ਸੁਦ੍ਧਵਿਪਸ੍ਸਨਾਕਥਾ, ਸਹਪਠਮਮਗ੍ਗਾ ਵਾ ਸਹਵਿਜ੍ਜੂਪਮਧਮ੍ਮਾ ਵਾ ਵਿਪਸ੍ਸਨਾਕਥਾਤਿ ਦਸ੍ਸੇਨ੍ਤੋ ‘‘ਏਤ੍ਤਕੇਨ ਠਾਨੇਨਾ’’ਤਿਆਦਿਮਾਹ.

ਨਮਸ੍ਸਨ੍ਤਿਯੇਵ ਮਹਤਾ ਗਾਰਵਬਹੁਮਾਨੇਨ. ਤੇਨਾਹ ‘‘ਨਮੋ ਤੇ ਪੁਰਿਸਾਜਞ੍ਞਾ’’ਤਿਆਦਿ. ਤਤ੍ਥ ਨਿਦਸ੍ਸਨਂ ਦਸ੍ਸੇਨ੍ਤੋ ‘‘ਆਯਸ੍ਮਨ੍ਤਂ ਨੀਤਤ੍ਥੇਰਂ ਵਿਯਾ’’ਤਿ ਵਤ੍ਵਾ ਤਮਤ੍ਥਂ ਵਿਭਾਵੇਤੁਂ ‘‘ਥੇਰੋ’’ਤਿਆਦਿਮਾਹ. ਤਤ੍ਥ ਖੁਰਗ੍ਗੇਯੇਵਾਤਿ ਕੇਸੋਰੋਪਨਤ੍ਥਂ ਖੁਰਧਾਰਾਯ ਅਗ੍ਗੇ ਸੀਸੇ ਠਪਿਤੇ ਤਚਪਞ੍ਚਕਕਮ੍ਮਟ੍ਠਾਨਮੁਖੇਨ ਭਾਵਨਂ ਅਨੁਯੁਞ੍ਜਨ੍ਤੋ ਅਰਹਤ੍ਤਂ ਪਤ੍ਵਾ. ਬ੍ਰਹ੍ਮਵਿਮਾਨਾਤਿ ਬ੍ਰਹ੍ਮਾਨਂ ਨਿਵਾਸਭੂਤਾ ਵਿਮਾਨਾ.

ਖਜ੍ਜਨੀਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.