੪. ਅਰਹਨ੍ਤਸੁਤ੍ਤਵਣ੍ਣਨਾ

੭੬. ਯਤ੍ਤਕਾ ਸਤ੍ਤਾਵਾਸਾਤਿ ਤਸ੍ਮਿਂ ਤਸ੍ਮਿਂ ਸਤ੍ਤਨਿਕਾਯੇ ਆਵਸਨਟ੍ਠੇਨ ਸਤ੍ਤਾ ਏਵ ਸਤ੍ਤਾਵਾਸਾ. ਤੇਨ ਯਤ੍ਤਕਾ ਸਤ੍ਤਾਵਾਸਾ, ਤੇਹਿ ਸਬ੍ਬੇਹਿਪਿ ਏਤੇ ਅਗ੍ਗਾ ਏਤੇ ਸੇਟ੍ਠਾ, ਯੇ ਇਮੇ ਅਰਹਨ੍ਤਾਤਿ ਦਸ੍ਸੇਤਿ. ਪੁਰਿਮਨਯੇਨੇਵਾਤਿ ਪੁਰਿਮਸ੍ਮਿਂ ਸਤ੍ਤਟ੍ਠਾਨਕੋਸਲ੍ਲਸੁਤ੍ਤੇ ਵੁਤ੍ਤਨਯੇਨ.

ਤਦਤ੍ਥਪਰਿਦੀਪਨਾਹੀਤਿ ‘‘ਪਞ੍ਚਕ੍ਖਨ੍ਧੇ ਪਰਿਞ੍ਞਾਯ. ਤਣ੍ਹਾ ਤੇਸਂ ਨ ਵਿਜ੍ਜਤਿ. ਅਸ੍ਮਿਮਾਨੋ ਸਮੁਚ੍ਛਿਨ੍ਨੋ’’ਤਿਆਦਿਨਾ ਤਸ੍ਸ ਯਥਾਨਿਦ੍ਦਿਟ੍ਠਸ੍ਸ ਸੁਤ੍ਤਸ੍ਸ ਅਤ੍ਥਦੀਪਨਾਹਿ ਚੇਵ ‘‘ਅਨੇਜਂ ਤੇ ਅਨੁਪ੍ਪਤ੍ਤਾ, ਚਿਤ੍ਤਂ ਤੇਸਂ ਅਨਾਵਿਲ’’ਨ੍ਤਿਆਦਿਨਾ ਵਿਸੇਸਤ੍ਥਪਰਿਦੀਪਨਾਹਿ ਚ. ਝਾਨਮਗ੍ਗਫਲਪਰਿਯਾਪਨ੍ਨਂ ਅਤਿਸਯਿਤਸੁਖਂ ਏਤੇਸਮਤ੍ਥੀਤਿ ਸੁਖਿਨੋਤਿ ਆਹ ‘‘ਝਾਨ…ਪੇ… ਸੁਖਿਤਾ’’ਤਿ. ਤਣ੍ਹਾ ਤੇਸਂ ਨ ਵਿਜ੍ਜਤੀਤਿ ਏਤ੍ਥ ਤੇਸਂ ਅਪਾਯਦੁਕ੍ਖਜਨਿਕਾ ਤਣ੍ਹਾ ਨ ਵਿਜ੍ਜਤੀਤਿ ਵੁਤ੍ਤਂ. ਵਟ੍ਟਮੂਲਿਕਾਯ ਤਣ੍ਹਾਯ ਅਭਾਵਾ ‘‘ਨਨ੍ਦੀ ਤੇਸਂ ਨ ਵਿਜ੍ਜਤੀ’’ਤਿ ਏਤ੍ਥ ਵੁਚ੍ਚਤੀਤਿ. ਇਮਸ੍ਸਪੀਤਿ ਪਿ-ਸਦ੍ਦੇਨ ਦੁਕ੍ਖਸ੍ਸਾਭਾਵੇਨਪੀਤਿ ਦੁਕ੍ਖਾਭਾਵੋ ਵਿਯ ਵਟ੍ਟਮੂਲਿਕਤਣ੍ਹਾਭਾਵੋ ਸਮ੍ਪਿਣ੍ਡੀਯਤੀਤਿ ਦਟ੍ਠਬ੍ਬਂ. ਤੇਨ ਹਿ ਤੇ ਅਨੁਪਾਦਿਸੇਸਨਿਬ੍ਬਾਨਪ੍ਪਤ੍ਤਿਯਾ ਅਚ੍ਚਨ੍ਤਸੁਖਿਤਾ ਏਵਾਤਿ ਵੁਚ੍ਚਨ੍ਤੀਤਿ. ‘‘ਸੇਯ੍ਯੋਹਮਸ੍ਮੀ’’ਤਿਆਦਿਨਯਪ੍ਪਵਤ੍ਤਿਯਾ ਨਵਵਿਧੋ. ਞਾਣੇਨਾਤਿ ਅਗ੍ਗਮਗ੍ਗਞ੍ਞਾਣੇਨ.

ਅਰਹਤ੍ਤਂ ਅਨੁਪ੍ਪਤ੍ਤਾ. ਅਲਿਤ੍ਤਾਤਿ ਅਮਕ੍ਖਿਤਾ. ਬ੍ਰਹ੍ਮਭੂਤਾਤਿ ਬ੍ਰਹ੍ਮਭਾਵਂ ਪਤ੍ਤਾ, ਬ੍ਰਹ੍ਮਤੋ ਵਾ ਅਰਿਯਮਗ੍ਗਞਾਣਤੋ ਭੂਤਾ ਅਰਿਯਾਯ ਜਾਤਿਯਾ ਜਾਤਾ. ਸਤ੍ਤ ਸਦ੍ਧਮ੍ਮਾ ਗੋਚਰੋ ਪਵਤ੍ਤਿਟ੍ਠਾਨਂ ਏਤੇਸਨ੍ਤਿ ਸਤ੍ਤਸਦ੍ਧਮ੍ਮਗੋਚਰਾ.

ਨਿਰਾਸਙ੍ਕਚਾਰੋ ਨਾਮ ਗਹਿਤੋ ਕੁਤੋਚਿਪਿ ਤੇਸਂ ਆਸਙ੍ਕਾਯ ਅਭਾਵਤੋ. ਸਮ੍ਮਾਦਿਟ੍ਠਿਆਦੀਹਿ ਦਸਹਿ ਅਙ੍ਗੇਹਿ ਸਮ੍ਮਾਵਿਮੁਤ੍ਤਿ-ਸਮ੍ਮਾਞਾਣਪਰਿਯੋਸਾਨੇਹਿ. ‘‘ਆਗੁਂ ਨ ਕਰੋਤੀ’’ਤਿਆਦੀਹਿ ਚਤੂਹਿ ਕਾਰਣੇਹਿ. ਤਣ੍ਹਾ ਤੇਸਂ ਨ ਵਿਜ੍ਜਤੀਤਿ ਇਦਮ੍ਪਿ ਤਣ੍ਹਾਪਹਾਨਸ੍ਸ ਬਹੂਪਕਾਰਤਾਦਸ੍ਸਨਂ. ਤੇਨਾਹ ‘‘ਦਾਸਕਾਰਿਕਾ ਤਣ੍ਹਾਪਿ ਤੇਸਂ ਨਤ੍ਥੀ’’ਤਿ.

ਨ ਵਿਕਮ੍ਪਨ੍ਤਿ ‘‘ਸੇਯ੍ਯੋਹਮਸ੍ਮੀ’’ਤਿਆਦਿਨਾ.

ਉਦ੍ਧਂ ਤਿਰਿਯਂ ਅਪਾਚੀਨਨ੍ਤਿ ਏਤ੍ਥ ‘‘ਉਦ੍ਧਂ ਵੁਚ੍ਚਤੀ’’ਤਿਆਦਿਨਾ ਰੂਪਮੁਖੇਨ ਅਤ੍ਤਭਾਵਂ ਗਹੇਤ੍ਵਾ ਪਵਤ੍ਤੋ ਪਠਮਨਯੋ. ਕਾਲਤ੍ਤਯਵਸੇਨ ਧਮ੍ਮਪ੍ਪਵਤ੍ਤਿਂ ਗਹੇਤ੍ਵਾ ਪਵਤ੍ਤੋ ਦੁਤਿਯਨਯੋ. ਠਾਨਵਸੇਨ ਸਕਲਲੋਕਧਾਤੁਂ ਗਹੇਤ੍ਵਾ ਪਵਤ੍ਤੋ ਤਤਿਯਨਯੋ. ਬੁਦ੍ਧਾਤਿ ਚਤ੍ਤਾਰਿ ਸਚ੍ਚਾਨਿ ਬੁਦ੍ਧਵਨ੍ਤੋ.

ਸੀਹਨਾਦਸਮੋਧਾਨਨ੍ਤਿ ਸੀਹਨਾਦਾਨਂ ਸਂਕਲਨਂ. ਲੋਕੇ ਅਤ੍ਤਨੋ ਉਤ੍ਤਰਿਤਰਸ੍ਸਾਭਾਵਾ ਅਨੁਤ੍ਤਰਾ. ਉਤ੍ਤਰੋ ਤਾਵ ਤਿਟ੍ਠਤੁ ਪੁਰਿਸੋ, ਸਦਿਸੋਪਿ ਤਾਵ ਨਤ੍ਥੀਤਿ ਅਸਦਿਸਾ. ਸਕਲਮ੍ਪਿ ਭਵਂ ਉਤ੍ਤਰਿਤ੍ਵਾ ਭਵਪਿਟ੍ਠੇ ਠਤ੍ਵਾ ਵਿਮੁਤ੍ਤਿਸੁਖੇਨ ਸੁਖਿਤਤ੍ਤਾਦਿਵਸੇਨ ਏਕਵੀਸਤਿਯਾਕਾਰੇਹਿ ਸੀਹਨਾਦਂ ਨਦਨ੍ਤਿ.

ਅਰਹਨ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.