੯-੧੦. ਨਨ੍ਦਿਕ੍ਖਯਸੁਤ੍ਤਾਦਿਵਣ੍ਣਨਾ

੫੧-੫੨. ਨਵਮਦਸਮੇਸੂਤਿ ਸੁਤ੍ਤਦ੍ਵਯਂ ਸਹੇਵ ਉਦ੍ਧਟਂ, ਦ੍ਵੀਸੁਪਿ ਅਤ੍ਥਵਣ੍ਣਨਾਯ ਸਰਿਕ੍ਖਭਾਵਤੋ. ਨਨ੍ਦਨਟ੍ਠੇਨ ਨਨ੍ਦੀ, ਰਞ੍ਜਨਟ੍ਠੇਨ ਰਾਗੋ. ਸਤਿਪਿ ਸਦ੍ਦਤ੍ਥਤੋ ਭੇਦੇ ‘‘ਇਮੇਸਂ ਅਤ੍ਥਤੋ ਨਿਨ੍ਨਾਨਾਕਰਣਤਾਯਾ’’ਤਿ ਵਤ੍ਵਾਪਿ ਪਹਾਯਕਧਮ੍ਮਭੇਦੇਨ ਪਨ ਲਬ੍ਭਤੇਵ ਭੇਦਮਤ੍ਤਾਤਿ ਦਸ੍ਸੇਤੁਂ ‘‘ਨਿਬ੍ਬਿਦਾਨੁਪਸ੍ਸਨਾਯ ਵਾ’’ਤਿਆਦਿ ਵੁਤ੍ਤਂ. ਵਿਰਜ੍ਜਨ੍ਤੋ ਰਾਗਂ ਪਜਹਤੀਤਿ ਸਮ੍ਬਨ੍ਧੋ. ਏਤ੍ਤਾਵਤਾਤਿ ‘‘ਨਨ੍ਦਿਕ੍ਖਯਾ ਰਾਗਕ੍ਖਯੋ’’ਤਿ ਏਤ੍ਤਾਵਤਾ. ਵਿਪਸ੍ਸਨਂ ਨਿਟ੍ਠਪੇਤ੍ਵਾ ਵਿਪਸ੍ਸਨਾਕਿਚ੍ਚਸ੍ਸ ਪਰਿਯੋਸਾਨੇਨ. ਰਾਗਕ੍ਖਯਾਤਿ ਵੁਟ੍ਠਾਨਗਾਮਿਨਿਪਰਿਯੋਸਾਨਾਯ ਵਿਪਸ੍ਸਨਾਯ ਰਾਗਸ੍ਸ ਖੇਪਿਤਤ੍ਤਾ. ਅਨਨ੍ਤਰਂ ਉਪ੍ਪਨ੍ਨੇਨ ਅਰਿਯਮਗ੍ਗੇਨ ਸਮੁਚ੍ਛੇਦਵਸੇਨ ਨਨ੍ਦਿਕ੍ਖਯੋਤਿ. ਤੇਨਾਹ ‘‘ਇਧ ਮਗ੍ਗਂ ਦਸ੍ਸੇਤ੍ਵਾ’’ਤਿ. ਅਨਨ੍ਤਰਂ ਪਨ ਉਪ੍ਪਨ੍ਨੇਨ ਅਰਿਯਫਲੇਨ ਪਟਿਪਸ੍ਸਦ੍ਧਿਵਸੇਨ ਨਨ੍ਦਿਰਾਗਕ੍ਖਯਾ ਸਬ੍ਬਂ ਸਂਕਿਲੇਸਤੋ ਚਿਤ੍ਤਂ ਵਿਮੁਚ੍ਚਤੀਤਿ. ਤੇਨਾਹ ‘‘ਫਲਂ ਦਸ੍ਸਿਤ’’ਨ੍ਤਿ.

ਨਨ੍ਦਿਕ੍ਖਯਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਅਤ੍ਤਦੀਪਵਗ੍ਗਵਣ੍ਣਨਾ ਨਿਟ੍ਠਿਤਾ.

ਮੂਲਪਣ੍ਣਾਸਕੋ ਸਮਤ੍ਤੋ.