੧੨. ਧਮ੍ਮਕਥਿਕਵਗ੍ਗੋ

੧-੨. ਅਵਿਜ੍ਜਾਸੁਤ੍ਤਾਦਿਵਣ੍ਣਨਾ

੧੧੩-੧੧੪. ਯਾਵਤਾਤਿ ਯਸ੍ਮਾ. ਇਮਾਯ…ਪੇ… ਸਮਨ੍ਨਾਗਤੋਤਿ ‘‘ਇਦਂ ਦੁਕ੍ਖਨ੍ਤਿ ਯਥਾਭੂਤਂ ਨਪ੍ਪਜਾਨਾਤੀ’’ਤਿਆਦਿਨਾ ਨਯੇਨ ਵੁਤ੍ਤਾਯ ਚਤੂਸੁ ਅਰਿਯਸਚ੍ਚੇਸੁ ਅਞ੍ਞਾਣਸਭਾਵਾਯ ਅਵਿਜ੍ਜਾਯ ਸਮ੍ਮੋਹੇਨ ਸਮਨ੍ਨਾਗਤੋ. ਏਤ੍ਤਾਵਤਾਤਿ ਏਤ੍ਤਕੇਨ ਕਾਰਣੇਨ ਅਵਿਜ੍ਜਾਗਤੋ ਸਮਙ੍ਗੀਭੂਤੇਨ ਉਪਗਤੋ, ਅਵਿਜ੍ਜਾਯ ਵਾ ਉਪੇਤੋ ਨਾਮ ਹੋਤਿ.

ਦੁਤਿਯੇਪੀਤਿ ਵਿਜ੍ਜਾਸੁਤ੍ਤੇ. ‘‘ਵਿਜ੍ਜਾਵਸੇਨ ਦੇਸਨਾ’’ਤਿ ਅਯਮੇਵ ਵਿਸੇਸੋਤਿ ਆਹ ‘‘ਏਸੇਵ ਨਯੋ’’ਤਿ.

ਅਵਿਜ੍ਜਾਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੩. ਧਮ੍ਮਕਥਿਕਸੁਤ੍ਤਵਣ੍ਣਨਾ

੧੧੫. ਪਠਮੇਨ ਧਮ੍ਮਕਥਿਕੋ ਕਥਿਤੋ ‘‘ਧਮ੍ਮਂ ਦੇਸੇਤੀ’’ਤਿ ਵੁਤ੍ਤਤ੍ਤਾ. ਦੁਤਿਯੇਨ ਸੇਖਭੂਮਿ ਕਥਿਤਾ ‘‘ਪਟਿਪਨ੍ਨੋ ਹੋਤੀ’’ਤਿ ਵੁਤ੍ਤਤ੍ਤਾ, ਤਤਿਯੇਨ ਅਸੇਖਭੂਮਿ ਕਥਿਤਾ ‘‘ਅਨੁਪਾਦਾਵਿਮੁਤ੍ਤੋ ਹੋਤੀ’’ਤਿ ਵੁਤ੍ਤਤ੍ਤਾ. ਧਮ੍ਮਕਥਿਕਂ ਪੁਚ੍ਛਿਤੇਨ ਭਗਵਤਾ. ਵਿਸੇਸੇਤ੍ਵਾਤਿ ਧਮ੍ਮਕਥਿਕਭਾਵਤੋ ਵਿਸੇਸੇਤ੍ਵਾ ਉਕ੍ਕਂਸੇਤ੍ਵਾ. ਦ੍ਵੇ ਭੂਮਿਯੋਤਿ ਸੇਕ੍ਖਾਸੇਕ੍ਖਭੂਮਿਯੋ.

ਧਮ੍ਮਕਥਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਦੁਤਿਯਧਮ੍ਮਕਥਿਕਸੁਤ੍ਤਵਣ੍ਣਨਾ

੧੧੬. ਤੀਣਿ ਵਿਸ੍ਸਜ੍ਜਨਾਨੀਤਿ ਯਥਾਪੁਚ੍ਛਂ ਤੀਣਿ ਵਿਸ੍ਸਜ੍ਜਨਾਨਿ.

ਦੁਤਿਯਧਮ੍ਮਕਥਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫-੯. ਬਨ੍ਧਨਸੁਤ੍ਤਾਦਿਵਣ੍ਣਨਾ

੧੧੭-੧੨੧. ਤੀਰਂ ਵੁਚ੍ਚਤਿ ਵਟ੍ਟਂ ਓਰਿਮਤੀਰਨ੍ਤਿ ਕਤ੍ਵਾ. ਤੇਨਾਹ ‘‘ਅਥਾਯਂ ਇਤਰਾ ਪਜਾ, ਤੀਰਮੇਵਾਨੁਧਾਵਤੀ’’ਤਿ (ਧ. ਪ. ੮੫). ਪਾਰਂ ਵੁਚ੍ਚਤਿ ਨਿਬ੍ਬਾਨਂ ਸਂਸਾਰਸ੍ਸ ਪਾਰਿਮਨ੍ਤਿ ਕਤ੍ਵਾ. ਬਦ੍ਧੋਤਿ ਅਨੁਸਯਪ੍ਪਹਾਨਸ੍ਸ ਅਕਤਤ੍ਤਾ ਕਿਲੇਸਬਨ੍ਧਨੇਨ ਬਦ੍ਧੋ, ਸੁਕ੍ਕਪਕ੍ਖੇਪਿ ਦਿਟ੍ਠਿਸਮਨੁਪਸ੍ਸਨਾਯ ਰੂਪਾਦਿਬਨ੍ਧਨਸ੍ਸ ਪਟਿਕ੍ਖੇਪਮਤ੍ਤਮੇਵ ਵੁਤ੍ਤਂ, ਨ ਵਿਮੋਕ੍ਖਨ੍ਤਿ ਅਧਿਪ੍ਪਾਯੋ. ਇਮਸ੍ਮਿਂ ਸੁਤ੍ਤੇ ਵਟ੍ਟਦੁਕ੍ਖਂ ਕਥਿਤਨ੍ਤਿ ‘‘ਤੀਰਦਸ੍ਸੀ ਪਾਰਦਸ੍ਸੀ, ਪਰਿਮੁਤ੍ਤੋ ਸੋ ਦੁਕ੍ਖਸ੍ਮਾਤਿ ਵਦਾਮੀ’’ਤਿ ਆਗਤਤ੍ਤਾ ਵਟ੍ਟਵਿਵਟ੍ਟਂ ਕਥਿਕਨ੍ਤਿ ਵਤ੍ਤੁਂ ਸਕ੍ਕਾ.

ਛਟ੍ਠਾਦੀਨਿ ਉਤ੍ਤਾਨਤ੍ਥਾਨੇਵ ਹੇਟ੍ਠਾ ਵੁਤ੍ਤਨਯਤ੍ਤਾ.

ਬਨ੍ਧਨਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੧੦. ਸੀਲਵਨ੍ਤਸੁਤ੍ਤਵਣ੍ਣਨਾ

੧੨੨. ਆਬਾਧਟ੍ਠੇਨਾਤਿ ਆਦਿਤੋ ਉਪ੍ਪਤ੍ਤਿਤੋ ਪਟ੍ਠਾਯ ਬਾਧਨਟ੍ਠੇਨ ਰੁਜਨਟ੍ਠੇਨ. ਅਨ੍ਤੋਦੋਸਟ੍ਠੇਨਾਤਿ ਅਬ੍ਭਨ੍ਤਰੇ ਏਵ ਦੁਸ੍ਸਨਟ੍ਠੇਨ ਕੁਪ੍ਪਨਟ੍ਠੇਨ. ਖਣਨਟ੍ਠੇਨਾਤਿ ਸਸਨਟ੍ਠੇਨ. ਦੁਕ੍ਖਟ੍ਠੇਨਾਤਿ ਦੁਕ੍ਖਮਤ੍ਤਾ ਦੁਕ੍ਖਭਾਵੇਨ. ਦੁਕ੍ਖਞ੍ਹਿ ਲੋਕੇ ‘‘ਅਘ’’ਨ੍ਤਿ ਵੁਚ੍ਚਤਿ ਅਤਿਵਿਯ ਹਨਨਤੋ. ਵਿਸਭਾਗਂ …ਪੇ… ਪਚ੍ਚਯਟ੍ਠੇਨਾਤਿ ਯਥਾਪਵਤ੍ਤਮਾਨਾਨਂ ਧਾਤਾਦੀਨਂ ਵਿਸਭਾਗਭੂਤਮਹਾਭੂਤਸਮੁਟ੍ਠਾਨਸ੍ਸ ਆਬਾਧਸ੍ਸ ਪਚ੍ਚਯਭਾਵੇਨ. ਅਸਕਟ੍ਠੇਨਾਤਿ ਅਨਤ੍ਤਨਿਯਤੋ. ਪਲੁਜ੍ਜਨਟ੍ਠੇਨਾਤਿ ਪਕਾਰਤੋ ਭਿਜ੍ਜਨਟ੍ਠੇਨ. ਸਤ੍ਤਸੁਞ੍ਞਤਟ੍ਠੇਨਾਤਿ ਸਤ੍ਤਸਙ੍ਖਾਤਅਤ੍ਤਸੁਞ੍ਞਤਟ੍ਠੇਨ. ਅਤ੍ਤਾਭਾਵੇਨਾਤਿ ਦਿਟ੍ਠਿਗਤਿਕਪਰਿਕਪ੍ਪਿਤਸ੍ਸ ਅਤ੍ਤਨੋ ਅਭਾਵੇਨ. ਸੁਞ੍ਞਤੋ ਅਨਤ੍ਤਤੋਤਿ ਏਤ੍ਥ ‘‘ਪਰਤੋ’’ਤਿ ਪਦਸ੍ਸ ਸਙ੍ਗਹੋ ਕਾਤਬ੍ਬੋ, ਤਸ੍ਮਾ ‘‘ਦ੍ਵੀਹਿ ਅਨਤ੍ਤਮਨਸਿਕਾਰੋ’’ਤਿ ਵਤ੍ਤਬ੍ਬਂ.

ਸੀਲਵਨ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੧. ਸੁਤਵਨ੍ਤਸੁਤ੍ਤਵਣ੍ਣਨਾ

੧੨੩. ਤਥਾ ਏਕਾਦਸਮੇਤਿ ਏਤ੍ਥ ਤਥਾ-ਸਦ੍ਦੇਨ ‘‘ਉਤ੍ਤਾਨਮੇਵਾ’’ਤਿ ਇਦਂ ਆਕਡ੍ਢਤਿ. ਇਧਾਤਿ ਏਕਾਦਸਮੇ. ਕਮ੍ਮਟ੍ਠਾਨਸ੍ਸ ਉਗ੍ਗਹਧਾਰਣਪਰਿਚਯਮਨਸਿਕਾਰਵਸੇਨ ਪਵਤ੍ਤਞਾਣਂ ਕਮ੍ਮਟ੍ਠਾਨਸੁਤਵਸੇਨ ਨਿਪ੍ਫਜ੍ਜਨਤੋ ‘‘ਸੁਤ’’ਨ੍ਤਿ ਵੁਤ੍ਤਂ.

ਸੁਤਵਨ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੨-੧੩. ਕਪ੍ਪਸੁਤ੍ਤਾਦਿਵਣ੍ਣਨਾ

੧੨੪-੧੨੫. ਰਾਹੁਲੋਵਾਦਸਦਿਸਾਨੀਤਿ ਰਾਹੁਲੋਵਾਦਸੁਤ੍ਤੇ (ਮ. ਨਿ. ੨.੧੧੩ ਆਦਯੋ) ਆਗਤਸੁਤ੍ਤਸਦਿਸਾਨਿ.

ਕਪ੍ਪਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਧਮ੍ਮਕਥਿਕਵਗ੍ਗਵਣ੍ਣਨਾ ਨਿਟ੍ਠਿਤਾ.