੧੦. ਪੁਪ੍ਫਵਗ੍ਗੋ

੧. ਨਦੀਸੁਤ੍ਤਵਣ੍ਣਨਾ

੯੩. ਪਬ੍ਬਤੇਯ੍ਯਾਤਿ ਪਬ੍ਬਤਤੋ ਆਗਤਾ. ਤਤੋ ਏਵ ਓਹਾਰਿਨੀ. ਤੇਨਸ੍ਸਾ ਚਣ੍ਡਸੋਤਤਂ ਦਸ੍ਸੇਤਿ. ਦੂਰਂ ਗਚ੍ਛਤੀਤਿ ਦੂਰਙ੍ਗਮਾ. ਤੇਨਸ੍ਸਾ ਮਹੋਘਤਂ ਦਸ੍ਸੇਤਿ.

ਸੋਤੇਤਿ ਵਟ੍ਟਸੋਤੇ. ਚਤੂਹਿ ਗਾਹੇਹੀਤਿ ‘‘ਰੂਪਂ ਅਤ੍ਤਤੋ ਸਮਨੁਪਸ੍ਸਤੀ’’ਤਿਆਦਿਨਯਪ੍ਪਵਤ੍ਤੇਹਿ ਚਤੂਹਿ ਗਾਹੇਹਿ. ਪਲੁਜ੍ਜਨਤ੍ਤਾਤਿ ਛਿਨ੍ਨਤ੍ਤਾ. ਸੋਕਾਦਿਬ੍ਯਸਨਪ੍ਪਤ੍ਤੀਤਿ ਸੋਕਾਦਿਅਨਤ੍ਥੁਪ੍ਪਤ੍ਤਿ.

ਨਦੀਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਪੁਪ੍ਫਸੁਤ੍ਤਵਣ੍ਣਨਾ

੯੪. ਵਿਵਦਤੀਤਿ ਵਿਵਾਦਂ ਕਰੋਤਿ. ਵਦਨ੍ਤੋਤਿ ਅਯਥਾਸਭਾਵੇਨ ਵਦਨ੍ਤੋ. ਵਿਵਦਤਿ ਧਮ੍ਮਤਾਯ ਵਿਰੁਦ੍ਧਂ ਕਤ੍ਵਾ ਵਦਤਿ. ਲੋਕਧਮ੍ਮੋਤਿ ਲੁਜ੍ਜਨਸਭਾਵਧਮ੍ਮੋ. ਕੋ ਪਨ ਸੋਤਿ ਆਹ ‘‘ਖਨ੍ਧਪਞ੍ਚਕ’’ਨ੍ਤਿ. ਤੇਨਾਹ ‘‘ਤਂ ਹੀ’’ਤਿਆਦਿ. ਕਥਂ ਕਰੋਮੀਤਿ ਕੇਨ ਪਕਾਰੇਨਾਹਂ ਬਾਲਂ ਅਜਾਨਨ੍ਤਂ ਕਰੋਮਿ. ਤੇਨਾਹ ‘‘ਮਯ੍ਹਂ ਹੀ’’ਤਿਆਦਿ. ਤਥਾ ਚਾਹ ‘‘ਅਕ੍ਖਾਤੋ ਵੋ ਮਯਾ ਮਗ੍ਗੋ’’ਤਿਆਦਿ (ਧ. ਪ. ੨੭੫). ‘‘ਤਯੋ ਲੋਕਾ ਕਥਿਤਾ’’ਤਿ ਵਤ੍ਵਾ ਤਂ ਵਿਵਰਿਤੁਂ ‘‘ਨਾਹਂ, ਭਿਕ੍ਖਵੇ’’ਤਿਆਦਿਮਾਹ.

ਪੁਪ੍ਫਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਫੇਣਪਿਣ੍ਡੂਪਮਸੁਤ੍ਤਵਣ੍ਣਨਾ

੯੫. ਕੇਨਚਿ ਕਾਰਣੇਨ ਯੁਜ੍ਝਿਤ੍ਵਾ ਗਹੇਤੁਂ ਨ ਸਕ੍ਕਾਤਿ ਅਯੁਜ੍ਝਾ ਨਾਮ. ਨਿਵਤ੍ਤਨਟ੍ਠਾਨੇਤਿ ਉਦਕਪ੍ਪਵਾਹਸ੍ਸ ਨਿਵਤ੍ਤਿਤਟ੍ਠਾਨੇ.

ਅਨੁਸੋਤਾਗਮਨੇਤਿ ਅਨੁਸੋਤਂ ਆਗਮਨਹੇਤੁ, ‘‘ਅਨੁਸੋਤਾਗਮਨੇਨਾ’’ਤਿ ਵਾ ਪਾਠੋ. ਅਨੁਪੁਬ੍ਬੇਨ ਪਵਡ੍ਢਿਤ੍ਵਾਤਿ ਤਤ੍ਥ ਤਤ੍ਥ ਉਟ੍ਠਿਤਾਨਂ ਖੁਦ੍ਦਕਮਹਨ੍ਤਾਨਂ ਫੇਣਪਿਣ੍ਡਾਨਂ ਸਂਸਗ੍ਗੇਨ ਪਕਾਰਤੋ ਵੁਦ੍ਧਿਂ ਪਤ੍ਵਾ. ਆਵਹੇਯ੍ਯਾਤਿ ਆਨੇਤ੍ਵਾ ਵਹੇਯ੍ਯ. ਕਾਰਣੇਨ ਉਪਪਰਿਕ੍ਖੇਯ੍ਯਾਤਿ ਞਾਣੇਨ ਵੀਮਂਸੇਯ੍ਯ. ‘‘ਸਾਰੋ ਨਾਮ ਕਿਂ ਭਵੇਯ੍ਯਾ’’ਤਿ ਵਤ੍ਵਾ ਸਬ੍ਬਸੋ ਤਦਭਾਵਂ ਦਸ੍ਸੇਨ੍ਤੋ ‘‘ਵਿਲੀਯਿਤ੍ਵਾ ਵਿਦ੍ਧਂਸੇਯ੍ਯੇਵਾ’’ਤਿ ਆਹ. ਤੇਨ ਰੂਪਮ੍ਪਿ ਨਿਸ੍ਸਾਰਤਾਯ ਭਿਜ੍ਜਤੇਵਾਤਿ ਦਸ੍ਸੇਤਿ. ਯਥਾ ਹਿ ਅਨਿਚ੍ਚਤਾਯ ਅਸਾਰਤਾਸਿਦ੍ਧਿ, ਏਵਂ ਅਸਾਰਤਾਯਪਿ ਅਨਿਚ੍ਚਤਾਸਿਦ੍ਧੀਤਿ ਅਨਿਚ੍ਚਤਾਯ ਏਵ ਨਿਚ੍ਚਸਾਰਂ ਥਿਰਭਾਵਸਾਰਂ ਧੁਵਸਾਰਂ ਸਾਮੀਨਿਵਾਸੀਕਾਰਕਭੂਤਸ੍ਸ ਅਤ੍ਤਨੋ ਵਸੇ ਪਵਤ੍ਤਨਮ੍ਪੇਤ੍ਥ ਨਤ੍ਥੀਤਿ ਆਹ ‘‘ਰੂਪਮ੍ਪਿ…ਪੇ… ਨਿਸ੍ਸਾਰਮੇਵਾ’’ਤਿ. ਸੋਤਿ ਫੇਣਪਿਣ੍ਡੋ. ਗਹਿਤੋਪਿ ਉਪਾਯੇਨ ਤਮਤ੍ਥਂ ਨ ਸਾਧੇਤਿ ਅਨਰਹਤ੍ਤਾ. ਅਨੇਕਸਨ੍ਧਿਘਟਿਤੋ ਤਥਾ ਤਥਾ ਘਟਿਤੋ ਹੁਤ੍ਵਾ.

ਬ੍ਯਾਮਮਤ੍ਤਮ੍ਪਿ ਏਤਰਹਿ ਮਨੁਸ੍ਸਾਨਂ ਵਸੇਨ. ਅਵਸ੍ਸਮੇਵ ਭਿਜ੍ਜਤਿ ਤਰਙ੍ਗਬ੍ਭਾਹਤਂ ਹੁਤ੍ਵਾ.

ਤਸ੍ਮਿਂ ਤਸ੍ਮਿਂ ਉਦਕਬਿਨ੍ਦੁਮ੍ਹਿ ਪਤਿਤੇ. ਉਦਕਤਲਨ੍ਤਿ ਉਦਕਪਿਟ੍ਠਿਂ. ਅਞ੍ਞਤੋ ਪਤਨ੍ਤਂ ਉਦਕਬਿਨ੍ਦੁਂ. ਉਦਕਜਲ੍ਲਨ੍ਤਿ ਸਨ੍ਤਾਨਕਂ ਹੁਤ੍ਵਾ ਠਿਤਂ ਉਦਕਮਲਂ. ਤਞ੍ਹਿ ਸਂਕਡ੍ਢਿਤ੍ਵਾ ਤਤੋ ਉਦਕਂ ਪੁਟਂ ਕਰੋਤਿ, ਤਸ੍ਮਿਂ ਪੁਟੇ ਪੁਬ੍ਬੁਲ਼ਸਮਞ੍ਞਾ. ਵਤ੍ਥੁਨ੍ਤਿ ਚਕ੍ਖਾਦਿਵਤ੍ਥੁਂ. ਆਰਮ੍ਮਣਨ੍ਤਿ ਰੂਪਾਦਿਆਰਮ੍ਮਣਂ. ਕਿਲੇਸਜਲ੍ਲਨ੍ਤਿ ਪੁਰਿਮਸਿਦ੍ਧਂ, ਪਟਿਲਬ੍ਭਮਾਨਂ ਵਾ ਕਿਲੇਸਮਲਂ. ਫਸ੍ਸਸਙ੍ਘਟ੍ਟਨਨ੍ਤਿ ਫਸ੍ਸਸਮੋਧਾਨਂ. ਪੁਬ੍ਬੁਲ਼ਸਦਿਸਾ ਮੁਹੁਤ੍ਤਰਮਣੀਯਤਾਯ. ਯਸ੍ਮਾ ਘਮ੍ਮਕਾਲੇ ਸੂਰਿਯਾਤਪਸਨ੍ਤਾਪਾਭਿਨਿਬ੍ਬਤ੍ਤਰਸ੍ਮਿਜਾਲਨਿਪਾਤੇ ਤਾਦਿਸੇ ਭੂਮਿਪਦੇਸੇ ਇਤੋ ਚਿਤੋ ਸਮੁਗ੍ਗਤਵਾਤਵੇਗਸਮੁਦ੍ਧਟਵਿਰੁਲ਼੍ਹਸਙ੍ਖਾਤੇਸੁ ਪਰਿਬ੍ਭਮਨ੍ਤੇਸੁ ਅਣੁਪਰਮਾਣੁਤਜ੍ਜਾਰਿਪ੍ਪਕਾਰੇਸੁ ਭੂਤਸਙ੍ਘਾਤੇਸੁ ਮਰੀਚਿਸਮਞ੍ਞਾ, ਤਸ੍ਮਾ ਸਬ੍ਬਸੋ ਸਾਰਵਿਰਹਿਤਾਤਿ ਵੁਤ੍ਤਂ ‘‘ਸਞ੍ਞਾਪਿ ਅਸਾਰਕਟ੍ਠੇਨ ਮਰੀਚਿਸਦਿਸਾ’’ਤਿ. ਯਸ੍ਮਾ ਚ ਪਸ੍ਸਨ੍ਤਾਨਂ ਯੇਭੁਯ੍ਯੇਨ ਉਦਕਾਕਾਰੇਨ ਖਾਯਤਿ, ਤਸ੍ਮਾ ‘‘ਗਹੇਤ੍ਵਾ ਪਿਵਿਤੁਂ ਵਾ’’ਤਿਆਦਿ ਵੁਤ੍ਤਂ. ਨੀਲਾਦਿਅਨੁਭਵਨਤ੍ਥਾਯਾਤਿ ਨੀਲਾਦਿਆਰਮ੍ਮਣਸ੍ਸ ਅਨੁਭਵਨਤ੍ਥਾਯ. ਫਨ੍ਦਤੀਤਿ ਫਨ੍ਦਨਾਕਾਰਪ੍ਪਤ੍ਤਾ ਵਿਯ ਹੋਤਿ ਅਪ੍ਪਹੀਨਤਣ੍ਹਸ੍ਸ ਪੁਗ੍ਗਲਸ੍ਸ. ਵਿਪ੍ਪਲਮ੍ਭੇਤਿ ਅਪ੍ਪਹੀਨਵਿਪਲ੍ਲਾਸਂ ਪੁਗ੍ਗਲਂ. ਤੇਨਾਹ ‘‘ਇਦਂ ਨੀਲਕ’’ਨ੍ਤਿਆਦਿ. ਸਞ੍ਞਾਵਿਪਲ੍ਲਾਸਤੋ ਹਿ ਚਿਤ੍ਤਵਿਪਲ੍ਲਾਸੋ, ਤਤੋ ਦਿਟ੍ਠਿਵਿਪਲ੍ਲਾਸੋਤਿ. ਵਿਪ੍ਪਲਮ੍ਭਨੇਨਾਤਿ ਵਿਪ੍ਪਕਾਰਵਸੇਨੇਵ ਆਰਮ੍ਮਣਸ੍ਸ ਲਮ੍ਭਨੇਨ. ਵਿਪ੍ਪਕਾਰਵਸੇਨ ਹਿ ਏਤਂ ਲਮ੍ਭਨਂ, ਯਦਿਦਂ ਅਨੁਦਕਮੇਵ ਉਦਕਂ ਕਤ੍ਵਾ ਦਸ੍ਸਨਂ ਅਨਗਰਮੇਵ ਨਗਰਂ ਕਤ੍ਵਾ ਗਨ੍ਧਬ੍ਬਨਾਟਕਾਦਿਦਸ੍ਸਨਂ.

ਕੁਕ੍ਕੁਕਂ ਵੁਚ੍ਚਤਿ ਕਦਲਿਕ੍ਖਨ੍ਧਸ੍ਸ ਸਬ੍ਬਪਤ੍ਤਵਟ੍ਟੀਨਂ ਅਬ੍ਭਨ੍ਤਰੇ ਦਣ੍ਡਕਨ੍ਤਿ ਆਹ ‘‘ਅਕੁਕ੍ਕੁਕਜਾਤਨ੍ਤਿ ਅਨ੍ਤੋ ਅਸਞ੍ਜਾਤਘਨਦਣ੍ਡਕ’’ਨ੍ਤਿ. ਨ ਤਥਾ ਹੋਤੀਤਿ ਯਦਤ੍ਥਾਯ ਉਪਨੀਤਂ, ਤਦਤ੍ਥਾਯ ਨ ਹੋਤਿ. ਨਾਨਾਲਕ੍ਖਣੋਤਿ ਨਾਨਾਸਭਾਵੋ. ਸਙ੍ਖਾਰਕ੍ਖਨ੍ਧੋਵਾਤਿ ਏਕੋ ਸਙ੍ਖਾਰਕ੍ਖਨ੍ਧੋਤ੍ਵੇਵ ਵੁਚ੍ਚਤਿ.

ਅਸ੍ਸਾਤਿ ਪੁਰਿਸਸ੍ਸ. ਅਪਗਤਪਟਲਪਿਲ਼ਕਨ੍ਤਿ ਅਪਗਤਪਟਲਦੋਸਞ੍ਚੇਵ ਅਪਗਤਪਿਲ਼ਕਦੋਸਞ੍ਚ. ਅਸਾਰਭਾਵਦਸ੍ਸਨਸਮਤ੍ਥਨ੍ਤਿ ਅਸਾਰਸ੍ਸ ਅਸਾਰਭਾਵਦਸ੍ਸਨਸਮਤ੍ਥਂ. ਇਤ੍ਤਰਾਤਿ ਪਰਿਤ੍ਤਕਾਲਾ, ਨ ਚਿਰਟ੍ਠਿਤਿਕਾ. ਤੇਨਾਹ ‘‘ਲਹੁਪਚ੍ਚੁਪਟ੍ਠਾਨਾ’’ਤਿ. ਅਞ੍ਞਦੇਵ ਚ ਆਗਮਨਕਾਲੇ ਚਿਤ੍ਤਨ੍ਤਿ ਇਦਞ੍ਚ ਓਲ਼ਾਰਿਕਵਸੇਨੇਵ ਵੁਤ੍ਤਂ. ਤਥਾ ਹਿ ਏਕਚ੍ਛਰਕ੍ਖਣੇ ਅਨੇਕਕੋਟਿਸਤਸਹਸ੍ਸਸਙ੍ਖਾਨਿ ਚਿਤ੍ਤਾਨਿ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨ੍ਤਿ. ਮਾਯਾਯ ਦਸ੍ਸਿਤਂ ਰੂਪਂ ਮਾਯਾਤਿ ਵੁਤ੍ਤਂ. ਯਂਕਿਞ੍ਚਿਦੇਵ ਕਪਾਲਿਟ੍ਠਕਪਾਸਾਣਵਾਲਿਕਾਦਿਂ. ਵਞ੍ਚੇਤੀਤਿ ਅਸੁਵਣ੍ਣਮੇਵ ਸੁਵਣ੍ਣਨ੍ਤਿ, ਅਮੁਤ੍ਤਮੇਵ ਮੁਤ੍ਤਾਤਿਆਦਿਨਾ ਵਞ੍ਚੇਤਿ. ਨਨੁ ਚ ਸਞ੍ਞਾਪਿ ਮਰੀਚਿ ਵਿਯ ਵਿਪ੍ਪਲਮ੍ਭੇਤਿ ਵਞ੍ਚੇਤਿ, ਇਦਮ੍ਪਿ ਵਿਞ੍ਞਾਣਂ ਮਾਯਾ ਵਿਯ ਵਞ੍ਚੇਤੀਤਿ ਕੋ ਇਮੇਸਂ ਵਿਸੇਸੋਤਿ? ਵਚਨਤ੍ਥੋ ਨੇਸਂ ਸਾਧਾਰਣੋ. ਤਥਾਪਿ ਸਞ੍ਞਾ ਅਨੁਦਕਂਯੇਵ ਉਦਕਂ ਕਤ੍ਵਾ ਗਾਹਾਪੇਨ੍ਤੀ, ਅਪੁਰਿਸਞ੍ਞੇਵ ਪੁਰਿਸਂ ਕਤ੍ਵਾ ਗਾਹਾਪੇਨ੍ਤੀ ਵਿਪ੍ਪਲਮ੍ਭਨਵਸੇਨ ਅਪ੍ਪਵਿਸਯਾ, ਵਿਞ੍ਞਾਣਂ ਪਨ ਯਂ ਕਿਞ੍ਚਿ ਅਤਂਸਭਾਵਂ ਤਂ ਕਤ੍ਵਾ ਦਸ੍ਸੇਨ੍ਤੀ ਮਾਯਾ ਵਿਯ ਮਹਾਵਿਸਯਾ. ਤੇਨਾਹ ‘‘ਯਂਕਿਞ੍ਚਿਦੇਵਾ’’ਤਿਆਦਿ. ਏਵਮ੍ਪੀਤਿ ਅਤਿਵਿਯ ਲਹੁਪਰਿਵਤ੍ਤਿਭਾਵੇਨਪਿ ਮਾਯਾਸਦਿਸਨ੍ਤਿ.

ਦੇਸਿਤਾਤਿ ਏਵਂ ਦੇਸਿਤਾ ਫੇਣਪਿਣ੍ਡਾਦਿਉਪਮਾਹਿ.

ਭੂਰਿ ਵੁਚ੍ਚਤਿ ਪਥਵੀ, ਸਣ੍ਹਟ੍ਠੇਨ ਵਿਪੁਲਟ੍ਠੇਨ ਚ ਭੂਰਿਸਦਿਸਪਞ੍ਞਤਾਯ ਭੂਰਿਪਞ੍ਞੋ. ਤੇਨਾਹ ‘‘ਸਣ੍ਹਪਞ੍ਞੇਨ ਚੇਵਾ’’ਤਿਆਦਿ. ਕਿਮਿਗਣਾਦੀਨਨ੍ਤਿ ਆਦਿ-ਸਦ੍ਦੇਨ ਅਨੇਕਗਿਜ੍ਝਾਦਿਕੇ ਸਙ੍ਗਣ੍ਹਾਤਿ. ਪਵੇਣੀਤਿ ਧਮ੍ਮਪਬਨ੍ਧੋ. ਬਾਲਲਾਪਿਨੀ ‘‘ਅਹਂ ਮਮਾ’’ਤਿਆਦਿਨਾ. ਸੇਸਧਾਤੁਯੋ ਗਹੇਤ੍ਵਾਵ ਭਿਜ੍ਜਤਿ ਏਕੁਪ੍ਪਾਦੇਕਨਿਰੋਧਤ੍ਤਾ, ਵਤ੍ਥੁਰੂਪਨਿਸ੍ਸਯਪਚ੍ਚਯਤ੍ਤਾ ‘‘ਅਯ’’ਨ੍ਤਿ ਨ ਵਿਸੁਂ ਗਹਿਤਂ. ਵਧਭਾਵਤੋਤਿ ਵਧਸ੍ਸ ਮਰਣਸ੍ਸ ਅਤ੍ਥਿਭਾਵਤੋ. ਸਰਣਨ੍ਤਿ ਪਟਿਸਰਣਂ.

ਫੇਣਪਿਣ੍ਡੂਪਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪-੬. ਗੋਮਯਪਿਣ੍ਡਸੁਤ੍ਤਾਦਿਵਣ੍ਣਨਾ

੯੬-੯੮. ਸਸ੍ਸਤਂ ਸਬ੍ਬਕਾਲਂ ਯਾਵ ਕਪ੍ਪਵੁਟ੍ਠਾਨਾ ਹੋਨ੍ਤੀਤਿ ਸਸ੍ਸਤਿਯੋ, ਸਿਨੇਰੁਆਦਯੋ. ਤਾਹਿ ਸਮਂ ਸਮਕਾਲਂ. ਅਨੇਨਾਤਿ ਭਗਵਤਾ. ਨਯਿਦਨ੍ਤਿ ਏਤ੍ਥ ਯ-ਕਾਰੋ ਪਦਸਨ੍ਧਿਕਰੋ, ਇਦਨ੍ਤਿ ਨਿਪਾਤਪਦਂ. ਤਂ ਪਨ ਯੇਨ ਯੇਨ ਸਮ੍ਬਨ੍ਧੀਯਤਿ, ਤਂ ਤਿਲਿਙ੍ਗੋਵ ਹੋਤੀਤਿ ‘‘ਅਯਂ ਮਗ੍ਗਬ੍ਰਹ੍ਮਚਰਿਯਵਾਸੋ’’ਤਿ ਵੁਤ੍ਤਂ. ‘‘ਨ ਪਞ੍ਞਾਯੇਯ੍ਯਾ’’ਤਿ ਵਤ੍ਵਾ ਤਮਤ੍ਥਂ ਵਿਵਰਿਤੁਂ ‘‘ਮਗ੍ਗੋ ਹੀ’’ਤਿਆਦਿ ਵੁਤ੍ਤਂ. ਵਿਵਟ੍ਟੇਨ੍ਤੋਤਿ ਵਿਨਿਵਟ੍ਟੇਨ੍ਤੋ ਅਪ੍ਪਵਤ੍ਤਿਂ ਕਰੋਨ੍ਤੋ.

ਰਾਜਧਾਨੀਤਿ ਰਞ੍ਞੋ ਨਿਵਾਸਨਗਰਂ. ਸੁਤ੍ਤਮਯਨ੍ਤਿ ਚਿਤ੍ਤਵਣ੍ਣਵਟ੍ਟਿਕਾਮਯਂ.

ਗੋਮਯਪਿਣ੍ਡਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੭. ਗਦ੍ਦੁਲਬਦ੍ਧਸੁਤ੍ਤਵਣ੍ਣਨਾ

੯੯. ਯਂ ਮਹਾਸਮੁਦ੍ਦੋਤਿ ਏਤ੍ਥ ਯਨ੍ਤਿ ਸਮਯਸ੍ਸ ਪਚ੍ਚਾਮਸਨਂ. ਭੁਮ੍ਮਤ੍ਥੇ ਚੇਤਂ ਪਚ੍ਚਤ੍ਤਵਚਨਨ੍ਤਿ ਆਹ ‘‘ਯਸ੍ਮਿਂ ਸਮਯੇ’’ਤਿ. ਸੋ ਚ ਸਮਯੋ ਅਯਨ੍ਤਿ ਦਸ੍ਸੇਨ੍ਤੋ ‘‘ਪਞ੍ਚਮੇ ਸੂਰਿਯੇ ਉਟ੍ਠਿਤੇ’’ਤਿ ਆਹ. ਪਰਿਚ੍ਛੇਦਂ ਨ ਵਦਾਮਿ ਪਰਿਚ੍ਛੇਦਕਾਰਿਕਾਯ ਅਗ੍ਗਮਗ੍ਗਵਿਜ੍ਜਾਯ ਅਨਧਿਗਤਤ੍ਤਾ. ਸੁਨਖੋ ਵਿਯ ਵਟ੍ਟਨਿਸ੍ਸਿਤੋ ਬਾਲੋ ਅਸਵਸਭਾਵਤੋ. ਗਦ੍ਦੁਲੋ ਵਿਯ ਦਿਟ੍ਠਿਬਨ੍ਧੋ. ਸਕ੍ਕਾਯੋ ਤਸ੍ਸ ਅਸਵਸਭਾਵਤੋ. ਪੁਥੁਜ੍ਜਨਸ੍ਸ ਸਕ੍ਕਾਯਾਨੁਪਰਿਵਤ੍ਤਨਨ੍ਤਿ ‘‘ਸਨ੍ਤਾਨੇ ਸਤ੍ਤਵੋਹਾਰੋ’’ਤਿ ਤਂ ਤਤੋ ਅਞ੍ਞਂ ਕਤ੍ਵਾ ਭੇਦੇਨ ਨਿਦ੍ਦੇਸੋ.

ਗਦ੍ਦੁਲਬਦ੍ਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਦੁਤਿਯਗਦ੍ਦੁਲਬਦ੍ਧਸੁਤ੍ਤਵਣ੍ਣਨਾ

੧੦੦. ਦਿਟ੍ਠਿਗਦ੍ਦੁਲਨਿਸ੍ਸਿਤਾਯਾਤਿ ਸਹਜਾਤਾਦਿਪਚ੍ਚਯਵਸੇਨ ਦਿਟ੍ਠਿਗਦ੍ਦੁਲਨਿਸ੍ਸਿਤਾਯ ਨਿਸ੍ਸਾਯੇਵ ਪਵਤ੍ਤਤਿ ਤਤੋ ਅਤ੍ਤਾਨਂ ਵਿਵੇਚੇਤੁਂ ਅਸਕ੍ਕੁਣੇਯ੍ਯਤ੍ਤਾ. ਚਿਤ੍ਤਸਂਕਿਲੇਸੇਨੇਵਾਤਿ ਦਸਵਿਧਕਿਲੇਸਵਤ੍ਥੁਵਸੇਨ ਚਿਤ੍ਤਸ੍ਸ ਸਂਕਿਲਿਟ੍ਠਭਾਵੇਨ. ਅਰਿਯਮਗ੍ਗਾਧਿਗਮਨੇਨ ਚਿਤ੍ਤਸ੍ਸ ਵੋਦਾਨਤ੍ਤਾ ਵੋਦਾਯਨ੍ਤਿ ਵਿਸੁਜ੍ਝਨ੍ਤਿ.

ਵਿਚਰਣਚਿਤ੍ਤਨ੍ਤਿ ਗਹੇਤ੍ਵਾ ਵਿਚਰਣਵਸੇਨ ਵਿਚਰਣਚਿਤ੍ਤਂ. ਸਙ੍ਖਾਨਾਮਾਤਿ ਏਵਂਨਾਮਕਾ. ਬ੍ਰਾਹ੍ਮਣਪਾਸਣ੍ਡਿਕਾਤਿ ਜਾਤਿਯਾ ਬ੍ਰਾਹ੍ਮਣਾ, ਛਨ੍ਨਵੁਤਿਯਾ ਪਾਸਣ੍ਡੇਸੁ ਤਂ ਸਙ੍ਖਾਸਞ੍ਞਿਤਂ ਪਾਸਣ੍ਡਂ ਪਗ੍ਗਯ੍ਹ ਵਿਚਰਣਕਾ. ਪਟਕੋਟ੍ਠਕਨ੍ਤਿ ਦੁਸ੍ਸਾਪਣਕਂ. ਦਸ੍ਸੇਨ੍ਤਾਤਿ ਯਥਾਗਤਿਕਮ੍ਮਵਿਪਾਕਚਿਤ੍ਤਤਂ ਦਸ੍ਸੇਨ੍ਤਾ. ਤਂ ਚਿਤ੍ਤਨ੍ਤਿ ਤਂ ਪਟਕੋਟ੍ਠਕਚਿਤ੍ਤਂ ਗਹੇਤ੍ਵਾ ਵਿਚਰਨ੍ਤਿ. ਚਿਨ੍ਤੇਤ੍ਵਾ ਕਤਤ੍ਤਾਤਿ ‘‘ਇਮਸ੍ਸ ਰੂਪਸ੍ਸ ਏਵਂ ਹਤ੍ਥਪਾਦਾ, ਏਵਂ ਮੁਖਂ ਲਿਖਿਤਬ੍ਬਂ, ਏਵਂ ਆਕਾਰਵਤ੍ਥਗ੍ਗਹਣਾਨਿ, ਏਵਂ ਕਿਰਿਯਾਵਿਸੇਸਾ, ਏਵਂ ਕਿਰਿਯਾਵਿਭਾਗਂ, ਸਤ੍ਤਵਿਸੇਸਾਨਂ ਵਿਭਾਗਂ ਕਾਤਬ੍ਬ’’ਨ੍ਤਿ ਤਸ੍ਸ ਉਬ੍ਬਤ੍ਤਨਖਿਪਨਪਵਤ੍ਤਨਾਦਿਪਯੋਜਨਞ੍ਚਾਤਿ ਸਬ੍ਬਮੇਤਂ ਤਥਾ ਚਿਨ੍ਤੇਤ੍ਵਾ ਕਤਤ੍ਤਾ ਚਿਤ੍ਤੇਨ ਮਨਸਾ ਚਿਨ੍ਤਿਤਂ ਨਾਮ. ਉਪਾਯਪਰਿਯੇਸਨਚਿਤ੍ਤਨ੍ਤਿ ‘‘ਹਤ੍ਥਪਾਦਾ ਏਵਂ ਲਿਖਿਤਬ੍ਬਾ’’ਤਿਆਦਿਨਾ ਯਥਾਵੁਤ੍ਤਉਪਾਯਸ੍ਸ ਚੇਵ ਪੁਬ੍ਬੇ ਪਵਤ੍ਤਸ੍ਸ ਭੂਮਿਪਰਿਕਮ੍ਮਵਣ੍ਣਧਾਤੁਸਮ੍ਮਾਯੋਜਨੁਪਾਯਸ੍ਸ ਚ ਵਸੇਨ ਪਵਤ੍ਤਂ ਚਿਤ੍ਤਂ. ਤਤੋਪਿ ਚਿਤ੍ਤਤਰਨ੍ਤਿ ਤਤੋ ਚਿਤ੍ਤਕਮ੍ਮਤੋਪਿ ਚਿਤ੍ਤਤਰਂ ਚਿਤ੍ਤਕਾਰੇਨ ਚਿਨ੍ਤਿਤਪ੍ਪਕਾਰਾਨਂ ਸਬ੍ਬੇਸਂਯੇਵ ਚਿਤ੍ਤਕਮ੍ਮੇ ਅਨਿਪ੍ਫਜ੍ਜਨਤੋ. ਕਮ੍ਮਚਿਤ੍ਤੇਨਾਤਿ ਕਮ੍ਮਵਿਞ੍ਞਾਣੇਨ. ਕਮ੍ਮਚਿਤ੍ਤੇਨਾਤਿ ਵਾ ਕਮ੍ਮਸ੍ਸ ਚਿਤ੍ਤਭਾਵੇਨ. ਸੋ ਕਮ੍ਮਸ੍ਸ ਵਿਚਿਤ੍ਤਭਾਵੋ ਤਣ੍ਹਾਵਸੇਨ ਜਾਯਤੀਤਿ ਵੇਦਿਤਬ੍ਬੋ. ਸ੍ਵਾਯਮਤ੍ਥੋ ਅਟ੍ਠਸਾਲਿਨੀਟੀਕਾਯਂ ਵਿਭਾਵਿਤੋ. ਏਵਂ ਚਿਤ੍ਤਾਤਿ ਏਵਂ ਚਿਤ੍ਤਰੂਪਵਿਸੇਸਾ. ਯੋਨਿਂ ਉਪਨੇਤੀਤਿ ਤਂ ਤਂ ਅਣ੍ਡਜਾਦਿਭੇਦਂ ਯੋਨਿਵਿਸੇਸਂ ਪਾਪੇਤਿ ਵਣ੍ਣਵਿਸੇਸੋ ਵਿਯ ਫਲਿਕਮਣਿਕਂ. ਨ ਹਿ ਵਿਸੇਸਾ ਹਿਤਵਿਚਿਤ੍ਤਸਾਮਤ੍ਥਿਯਕਮ੍ਮਂ ਯੋਨਿਂ ਉਪਨੇਤਿ, ਤਸ੍ਸ ਤਸ੍ਸ ਵਿਪਾਕੁਪ੍ਪਤ੍ਤਿਯਾ ਪਚ੍ਚਯੋ ਹੋਤਿ. ਯੋਨਿਮੂਲਕੋ ਤੇਸਂ ਚਿਤ੍ਤਭਾਵੋਤਿ ਯਂ ਯਂ ਯੋਨਿਂ ਕਮ੍ਮਂ ਸਤ੍ਤੇ ਉਪਨੇਤਿ, ਤਂਤਂਯੋਨਿਮੂਲਕੋ ਤੇਸਂ ਸਤ੍ਤਾਨਂ ਚਿਤ੍ਤਵਿਚਿਤ੍ਤਭਾਵੋ. ਤੇਨਾਹ ‘‘ਯੋਨਿਉਪਗਤਾ’’ਤਿਆਦਿ. ਸਦਿਸਚਿਤ੍ਤਾਵ ਸਦਿਸਚਿਤ੍ਤਭਾਵਾ ਏਵ. ਇਤੀਤਿਆਦਿ ਵੁਤ੍ਤਸ੍ਸੇਵ ਅਤ੍ਥਸ੍ਸ ਉਪ੍ਪਟਿਪਾਟਿਯਾ ਨਿਗਮਨਂ.

ਤਿਰਚ੍ਛਾਨਗਤਚਿਤ੍ਤਭਾਵਤੋ ਚਿਤ੍ਤਸ੍ਸੇਵ ਸਵਿਸੇਸਂ ਚਿਤ੍ਤਭਾਵਕਰਣਂ ਦਸ੍ਸੇਤੁਂ ‘‘ਅਪਿਚਾ’’ਤਿਆਦਿ ਵੁਤ੍ਤਂ. ਤਤ੍ਥ ਚਿਤ੍ਤਂ ਨਾਮੇਤਂ ਚਿਤ੍ਤਤਰਮੇਵ ਵੇਦਿਤਬ੍ਬਨ੍ਤਿ ਸਮ੍ਬਨ੍ਧੋ. ਸਹਜਾਤਧਮ੍ਮਚਿਤ੍ਤਤਾਯਾਤਿ ਰਾਗਾਦਿਸਦ੍ਧਾਦਿਧਮ੍ਮਵਿਚਿਤ੍ਤਭਾਵੇਨ. ਭੂਮਿਚਿਤ੍ਤਤਾਯਾਤਿ ਅਧਿਟ੍ਠਾਨਚਿਤ੍ਤਤਾਯ. ਕਮ੍ਮਨਾਨਤ੍ਤਂ ਮੂਲਂ ਕਾਰਣਂ ਏਤੇਸਨ੍ਤਿ ਕਮ੍ਮਨਾਨਤ੍ਤਮੂਲਕਾ, ਤੇਸਂ. ਲਿਙ੍ਗਨਾਨਤ੍ਤਂ ਇਤ੍ਥਿਲਿਙ੍ਗਾਦਿਨਾਨਤ੍ਤਵਸੇਨ ਚੇਵ ਤਂਤਂਸਣ੍ਠਾਨਨਾਨਤ੍ਤਵਸੇਨ ਚ ਵੇਦਿਤਬ੍ਬਂ. ਸਞ੍ਞਾਨਾਨਤ੍ਤਂ ਇਤ੍ਥਿਪੁਰਿਸਦੇਵਮਨੁਸ੍ਸਾਦਿਸਞ੍ਞਾਨਾਨਤ੍ਤਵਸੇਨ. ਵੋਹਾਰਨਾਨਤ੍ਤਂ ਤਿਸ੍ਸੋਤਿਆਦਿਵੋਹਾਰਨਾਨਤ੍ਤਵਸੇਨ. ਚਿਤ੍ਤਾਨਂ ਵਿਚਿਤ੍ਤਾਨਂ. ਤਂਤਂਵੋਹਾਰਨਾਨਤ੍ਤਮ੍ਪਿ ਚਿਤ੍ਤੇਨੇਵ ਪਞ੍ਞਪੀਯਤਿ. ਰਙ੍ਗਜਾਤਰੂਪਸਮੁਟ੍ਠਾਪਨਾਦਿਨਾ ਵਤ੍ਥਂ ਰਞ੍ਜਯਤੀਤਿ ਰਜਕੋ, ਵਣ੍ਣਕਾਰੋ. ਪੁਥੁਜ੍ਜਨਸ੍ਸ ਅਤ੍ਤਭਾਵਸਞ੍ਞਿਤਰੂਪਸਮੁਟ੍ਠਾਪਨਤਾ ਨਿਯਤਾ ਏਕਨ੍ਤਿਕਾਤਿ ਪੁਥੁਜ੍ਜਨਗ੍ਗਹਣਂ. ‘‘ਅਭਿਰੂਪਂ ਰੂਪਂ ਸਮੁਟ੍ਠਾਪੇਤੀ’’ਤਿ ਆਨੇਤ੍ਵਾ ਸਮ੍ਬਨ੍ਧੋ.

ਦੁਤਿਯਗਦ੍ਦੁਲਬਦ੍ਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਵਾਸਿਜਟਸੁਤ੍ਤਵਣ੍ਣਨਾ

੧੦੧. ਅਤ੍ਥਸ੍ਸਾਤਿ ਹਿਤਸ੍ਸ. ਅਸਾਧਿਕਾ ‘‘ਭਾਵਨਾਨੁਯੋਗਂ ਅਨਨੁਯੁਤ੍ਤਸ੍ਸਾ’’ਤਿ ਅਨਨੁਯੁਤ੍ਤਸ੍ਸ ਵੁਤ੍ਤਤ੍ਤਾ. ਇਤਰਾਤਿ ਸੁਕ੍ਕਪਕ੍ਖਉਪਮਾ. ਸਾਧਿਕਾ ਭਾਵਨਾਯੋਗਸ੍ਸ ਅਨੁਯੁਤ੍ਤਤ੍ਤਾ. ਤਞ੍ਹਿ ਤਸ੍ਸ ਸਾਧਿਕਾ ਵੇਦਿਤਬ੍ਬਾ. ਸਮ੍ਭਾਵਨਤ੍ਥੇਤਿ ਪਰਮਤ੍ਥਸਮ੍ਭਾਵਨੇ. ਏਵਞ੍ਹਿ ਕਣ੍ਹਪਕ੍ਖੇਪਿ ਅਪਿਸਦ੍ਦਗ੍ਗਹਣਂ ਸਮਤ੍ਥਿਤਂ ਹੋਤਿ. ਸਮ੍ਭਾਵਨਤ੍ਥੇਤਿ ਵਾ ਪਰਿਕਪ੍ਪਨਤ੍ਥੇਤਿ ਅਤ੍ਥੋ. ਸਙ੍ਖਾਤਬ੍ਬੇ ਅਤ੍ਥੇ ਅਨਿਯਮਤੋ ਵੁਚ੍ਚਮਾਨੇ ਸਙ੍ਖਾਤੋ ਅਨਿਯਮਤ੍ਥੋ ਵਾਸਦ੍ਦੋ ਵਤ੍ਤਬ੍ਬੋਤਿ ‘‘ਅਟ੍ਠ ਵਾ’’ਤਿਆਦਿ ਵੁਤ੍ਤਂ. ਊਨਾਧਿਕਾਨੀਤਿ ਊਨਾਨਿਪਿ ਅਧਿਕਾਨਿਪਿ ਕਿਞ੍ਚਾਪਿ ਹੋਨ੍ਤਿ, ਏਕਂਸੋ ਪਨ ਗਹੇਤਬ੍ਬੋਤਿ ‘‘ਅਟ੍ਠ ਵਾ ਦਸ ਵਾ ਦ੍ਵਾਦਸ ਵਾ’’ਤਿ ਵੁਤ੍ਤਂ. ਏਵਂ ਵਚਨਂ ਸਨ੍ਧਾਯ ‘‘ਵਚਨਸਿਲਿਟ੍ਠਤਾਯਾ’’ਤਿਆਦਿ ਵੁਤ੍ਤਂ. ਪਾਦਨਖਸਿਖਾਹਿ ਅਕੋਪਨਵਸੇਨ ਸਮ੍ਮਾ ਅਧਿਸਯਿਤਾਨਿ. ਉਤੁਨ੍ਤਿ ਉਣ੍ਹਉਤੁਂ ਕਾਯੁਸ੍ਮਾਵਸੇਨ. ਤੇਨਾਹ ‘‘ਉਸ੍ਮੀਕਤਾਨੀ’’ਤਿ. ਭਾਵਿਤਾਨੀਤਿ ਕੁਕ੍ਕੁਟਵਾਸਨਾਯ ਵਾਸਿਤਾਨਿ. ਸਮ੍ਮਾਅਧਿਸਯਨਾਦਿਤਿਵਿਧਕਿਰਿਯਾਕਰਣੇਨ ਇਮਂ ਅਪ੍ਪਮਾਦਂ ਕਤ੍ਵਾ. ਸੋਤ੍ਥਿਨਾ ਅਭਿਨਿਬ੍ਭਿਜ੍ਜਿਤੁਨ੍ਤਿ ਅਨਨ੍ਤਰਾਯੇਨ ਤਤੋ ਨਿਕ੍ਖਮਿਤੁਂ. ਇਦਾਨਿ ਤਮਤ੍ਥਂ ਵਿਵਰਨ੍ਤੋ ‘‘ਤੇ ਹੀ’’ਤਿਆਦਿਮਾਹ. ਸਯਮ੍ਪੀਤਿ ਅਣ੍ਡਾਨਿ. ਪਰਿਣਾਮਨ੍ਤਿ ਪਰਿਪਕ੍ਕਂ ਬਹਿਨਿਕ੍ਖਮਨਯੋਗ੍ਗਤਂ.

ਤਨ੍ਤਿ ਓਪਮ੍ਮਸਮ੍ਪਟਿਪਾਦਨਂ. ਏਵਨ੍ਤਿ ਇਦਾਨਿ ਵੁਚ੍ਚਮਾਨਾਕਾਰੇਨ. ਅਤ੍ਥੇਨਾਤਿ ਉਪਮੇਯ੍ਯਤ੍ਥੇਨ. ਸਂਸਨ੍ਦਿਤ੍ਵਾ ਸਮ੍ਮਾ ਯੋਜੇਤ੍ਵਾ. ਸਮ੍ਪਯੁਤ੍ਤਧਮ੍ਮਵਸੇਨ ਞਾਣਸ੍ਸ ਤਿਕ੍ਖਾਦਿਭਾਵੋ ਵੇਦਿਤਬ੍ਬੋ. ਞਾਣਸ੍ਸ ਹਿ ਸਭਾਵਤੋ ਸਤਿਨੇਪਕ੍ਕਤੋ ਚ ਤਿਕ੍ਖਭਾਵੋ, ਸਮਾਧਿਵਸੇਨ ਸੂਰਭਾਵੋ, ਸਦ੍ਧਾਵਸੇਨ ਵਿਪ੍ਪਸਨ੍ਨਭਾਵੋ, ਵੀਰਿਯਵਸੇਨ ਪਰਿਣਾਮਭਾਵੋ. ਪਰਿਣਾਮਕਾਲੋਤਿ ਬਲਵਵਿਪਸ੍ਸਨਾਕਾਲੋ. ਵਡ੍ਢਿਤਕਾਲੋਤਿ ਵੁਟ੍ਠਾਨਗਾਮਿਨਿਵਿਪਸ੍ਸਨਾਕਾਲੋ. ਅਨੁਲੋਮਟ੍ਠਾਨਸ੍ਸ ਹਿ ਵਿਪਸ੍ਸਨਾ ਗਹਿਤਗਬ੍ਭਾ ਨਾਮ ਤਦਾ ਮਗ੍ਗਗਬ੍ਭਸ੍ਸ ਗਹਿਤਤ੍ਤਾ. ਤਜ੍ਜਾਤਿਕਨ੍ਤਿ ਤਸ੍ਸ ਵਿਪਸ੍ਸਨਾਨੁਯੋਗਸ੍ਸ ਅਨੁਰੂਪਂ. ਸਤ੍ਥਾਪਿ ਗਾਥਾਯ ਅਵਿਜ੍ਜਣ੍ਡਕੋਸਂ ਪਹਰਤਿ ਭਿਨ੍ਦਾਪੇਤਿ.

ਓਲਮ੍ਬਕਸਙ੍ਖਾਤਨ੍ਤਿ ਓਲਮ੍ਬਕਸੁਤ੍ਤਸਙ੍ਖਾਤਂ. ਪਲਨ੍ਤਿ ਤਸ੍ਸ ਸੁਤ੍ਤਸ੍ਸ ਨਾਮਂ. ਧਾਰੇਤ੍ਵਾਤਿ ਦਾਰੂਨਂ ਹੇਯ੍ਯਾਦਿਜਾਨਨਤ੍ਥਂ ਉਪਨੇਤ੍ਵਾ. ਦਾਰੂਨਂ ਗਣ੍ਡਂ ਹਰਤੀਤਿ ਪਲਗਣ੍ਡੋਤਿ ਏਤੇਨ ਪਲੇਨ ਗਣ੍ਡਹਾਰੋ ‘‘ਪਲਗਣ੍ਡੋ’’ਤਿ ਪਚ੍ਛਿਮਪਦੇ ਉਤ੍ਤਰਪਦਲੋਪੇਨ ਨਿਦ੍ਦੇਸੋਤਿ ਦਸ੍ਸੇਤਿ. ਗਹਣਟ੍ਠਾਨੇਤਿ ਹਤ੍ਥੇਨ ਗਹੇਤਬ੍ਬਟ੍ਠਾਨੇ. ਸਮ੍ਮਦੇਵ ਖੇਪੀਯਨ੍ਤਿ ਏਤੇਨ ਕਾਯਦੁਚ੍ਚਰਿਤਾਦੀਨੀਤਿ ਸਙ੍ਖੇਪੋ, ਤੇਨ. ਵਿਪਸ੍ਸਨਂ ਅਨੁਯੁਞ੍ਜਨ੍ਤਸ੍ਸ ਪੁਗ੍ਗਲਸ੍ਸੇਵ ਦਿਵਸੇ ਦਿਵਸੇ ਆਸਵਾਨਂ ਪਰਿਕ੍ਖਯੋ ਇਧ ‘‘ਵਿਪਸ੍ਸਨਾਯਾਨਿਸਂਸੋ’’ਤਿ ਅਧਿਪ੍ਪੇਤੋ. ਹੇਮਨ੍ਤਿਕੇਨ ਕਰਣਭੂਤੇਨ. ਭੁਮ੍ਮਤ੍ਥੇ ਵਾ ਏਤਂ ਕਰਣਵਚਨਂ, ਹੇਮਨ੍ਤਿਕੇਤਿ ਅਤ੍ਥੋ. ਪਟਿਪ੍ਪਸ੍ਸਮ੍ਭਨ੍ਤੀਤਿ ਪਟਿਪ੍ਪਸ੍ਸਦ੍ਧਫਲਾਨਿ ਹੋਨ੍ਤਿ. ਤੇਨਾਹ ‘‘ਪੂਤਿਕਾਨਿ ਭਵਨ੍ਤੀ’’ਤਿ.

ਮਹਾਸਮੁਦ੍ਦੋ ਵਿਯ ਸਾਸਨਂ ਸਭਾਵਗਮ੍ਭੀਰਭਾਵਤੋ. ਨਾਵਾ ਵਿਯ ਯੋਗਾਵਚਰੋ ਮਹੋਘੁਤ੍ਤਰਣਤੋ. ਪਰਿਯਾਦਾਨਂ ਵਿਯਾਤਿ ਪਰਿਤੋ ਅਪਰਿਪੂਰਣਂ ਵਿਯ. ਖਜ੍ਜਮਾਨਾਨਨ੍ਤਿ ਸਙ੍ਖਾਦਨ੍ਤੇਨ ਵਿਯ ਉਦਕੇਨ ਖੇਪਿਯਮਾਨਾਨਂ ਬਨ੍ਧਨਾਨਂ. ਤਨੁਭਾਵੋਤਿ ਪਰਿਯੁਟ੍ਠਾਨੁਪ੍ਪਤ੍ਤਿਯਾ ਅਸਮਤ੍ਥਤਾਯ ਦੁਬ੍ਬਲਭਾਵੋ. ਵਿਪਸ੍ਸਨਾਞਾਣਪੀਤਿਪਾਮੋਜ੍ਜੇਹੀਤਿ ਵਿਪਸ੍ਸਨਾਞਾਣਸਮੁਟ੍ਠਿਤੇਹਿ ਪੀਤਿਪਾਮੋਜ੍ਜੇਹਿ. ਓਕ੍ਖਾਯਮਾਨੇ ਪਕ੍ਖਾਯਮਾਨੇਤਿ ਵਿਵਿਧਪਟਿਪਤ੍ਤਿਯਾ ਉਕ੍ਖਾਯਮਾਨੇ ਪਟਿਸਙ੍ਖਾਨੁਪਸ੍ਸਨਾਯ ਪਕ੍ਖਾਯਮਾਨੇ. ਦੁਬ੍ਬਲਤਾ ਦੀਪਿਤਾ ‘‘ਅਪ੍ਪਕਸਿਰੇਨੇਵ ਸਂਯੋਜਨਾਨਿ ਪਟਿਪ੍ਪਸ੍ਸਮ੍ਭਨ੍ਤਿ, ਪੂਤਿਕਾਨਿ ਭਵਨ੍ਤੀ’’ਤਿ ਵੁਤ੍ਤਤ੍ਤਾ.

ਵਾਸਿਜਟਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੧੦. ਅਨਿਚ੍ਚਸਞ੍ਞਾਸੁਤ੍ਤਵਣ੍ਣਨਾ

੧੦੨. ਭਾਵੇਨ੍ਤਸ੍ਸਾਤਿ ਵਿਪਸ੍ਸਨਾਯ ਮਗ੍ਗਂ ਭਾਵੇਨ੍ਤਸ੍ਸ ਉਪ੍ਪਨ੍ਨਸਞ੍ਞਾ. ਤੇਨਾਹ – ‘‘ਸਬ੍ਬਂ ਕਾਮਰਾਗਂ ਪਰਿਯਾਦਿਯਤੀ’’ਤਿਆਦਿ. ਸਨ੍ਤਾਨੇਤ੍ਵਾਤਿ ਕਸਨਟ੍ਠਾਨਂ ਸਬ੍ਬਸੋ ਵਿਤਨੇਤ੍ਵਾ ਪਤ੍ਥਰਿਤ੍ਵਾ. ਕਿਲੇਸਾਤਿ ਉਪਕ੍ਕਿਲੇਸਪ੍ਪਭੇਦਾ ਕਿਲੇਸਾ. ਅਨਿਚ੍ਚਸਞ੍ਞਾਞਾਣੇਨਾਤਿ ਅਨਿਚ੍ਚਸਞ੍ਞਾਸਹਗਤੇਨ ਞਾਣੇਨ.

ਲਾਯਨਨ੍ਤਿ ਲਾਯਨਂ ਵਿਯ ਨਯਨਂ ਵਿਯ ਨਿਚ੍ਛੋਟਨਂ ਵਿਯ ਚ ਅਨਿਚ੍ਚਸਞ੍ਞਾਞਾਣਂ. ਇਮਿਨਾ ਅਤ੍ਥੇਨਾਤਿ ਇਮਿਨਾ ਯਥਾਵੁਤ੍ਤੇਨ ਪਾਲ਼ਿਯਾ ਅਤ੍ਥੇਨ, ਉਪਮਾ ਸਂਸਨ੍ਦੇਤਬ੍ਬਾਤਿ ਏਤ੍ਥ ਪਬ੍ਬਜਲਾਯਕੋ ਵਿਯ ਯੋਗਾਵਚਰੋ. ਲਾਯਨਾਦਿਨਾ ਤਸ੍ਸ ਤਤ੍ਥ ਕਤਕਿਚ੍ਚਤਾਯ ਪਰਿਤੁਟ੍ਠਿ ਵਿਯ ਇਮਸ੍ਸ ਕਿਲੇਸੇ ਸਬ੍ਬਸੋ ਛਿਨ੍ਦਿਤ੍ਵਾ ਫਲਸਮਾਪਤ੍ਤਿਸੁਖੇਨ ਕਾਲਸ੍ਸ ਵੀਤਿਨਾਮਨਾ.

ਕੂਟਂ ਗਚ੍ਛਨ੍ਤੀਤਿ ਪਾਰਿਮਨ੍ਤੇਨ ਕੂਟਂ ਗਚ੍ਛਨ੍ਤਿ. ਕੂਟਂ ਪਵਿਸਨਭਾਵੇਨਾਤਿ ਕੂਟਚ੍ਛਿਦ੍ਦਂ ਅਗ੍ਗੇਨ ਪਵਿਸਨਵਸੇਨ. ਸਮੋਸਰਿਤ੍ਵਾਤਿ ਛਿਦ੍ਦੇ ਅਨੁਪਵਿਸਨਵਸੇਨ ਚ ਆਹਚ੍ਚ ਅਵਟ੍ਠਾਨੇਨ ਚ ਸਮੋਸਰਿਤ੍ਵਾ ਠਿਤਾ. ਕੂਟਂ ਵਿਯ ਅਨਿਚ੍ਚਸਞ੍ਞਾ ਅਨਿਚ੍ਚਾਨੁਪਸ੍ਸਨਾਵਸੇਨ ਅਵਟ੍ਠਾਨਸ੍ਸ ਮੂਲਭਾਵਤੋ. ਗੋਪਾਨਸਿਯੋ ਵਿਯ ਚਤੁਭੂਮਕਕੁਸਲਾ ਧਮ੍ਮਾ ਅਨਿਚ੍ਚਸਞ੍ਞਾਮੂਲਕਤ੍ਤਾ. ਕੂਟਂ ਅਗ੍ਗਂ ਸਬ੍ਬਗੋਪਾਨਸੀਨਂ ਤਥਾਅਧਿਟ੍ਠਾਨਸ੍ਸ ਪਧਾਨਕਾਰਣਤ੍ਤਾ. ਅਨਿਚ੍ਚਸਞ੍ਞਾ ਅਗ੍ਗਾਤਿ ਏਤ੍ਥਾਪਿ ਏਸੇਵ ਨਯੋ. ਅਨਿਚ੍ਚਸਞ੍ਞਾ ਲੋਕਿਯਾਤਿ ਇਦਂ ਅਨਿਚ੍ਚਸਞ੍ਞਾਨੁਪਸ੍ਸਨਂ ਸਨ੍ਧਾਯ ਵੁਤ੍ਤਂ. ਅਨਿਚ੍ਚਾਨੁਪਸ੍ਸਨਾਮੁਖੇਨ ਅਧਿਗਤਅਰਿਯਮਗ੍ਗੇ ਉਪ੍ਪਨ੍ਨਸਞ੍ਞਾ ਅਨਿਚ੍ਚਸਞ੍ਞਾਤਿ ਵਤ੍ਤਬ੍ਬਤਂ ਲਭਤੀਤਿ ‘‘ਅਨਿਚ੍ਚਸਞ੍ਞਾ, ਭਿਕ੍ਖਵੇ, ਭਾਵਿਤਾ ਬਹੁਲੀਕਤਾ ਸਬ੍ਬਂ ਕਾਮਰਾਗਂ ਪਰਿਯਾਦਿਯਤੀ’’ਤਿਆਦਿ ਵੁਤ੍ਤਂ. ਤਥਾ ਹਿ ਧਮ੍ਮਸਙ੍ਗਹੇ (ਧ. ਸ. ੩੫੭, ੩੬੦) ‘‘ਯਸ੍ਮਿਂ ਸਮਯੇ ਲੋਕੁਤ੍ਤਰਂ ਸਞ੍ਞਂ ਭਾਵੇਤੀ’’ਤਿਆਦਿਨਾ ਸਞ੍ਞਾਪਿ ਉਦ੍ਧਟਾ. ਸਬ੍ਬਾਸੁ ਉਪਮਾਸੂਤਿ ਮੂਲਸਨ੍ਤਾਨਉਪਮਾਦੀਸੁ ਪਞ੍ਚਸੁ ਉਪਮਾਸੁ. ਪੁਰਿਮਾਹੀਤਿ ਕਸ੍ਸਕਪਬ੍ਬਜਲਾਯਨਅਮ੍ਬਪਿਣ੍ਡਿਉਪਮਾਹਿ ਅਨਿਚ੍ਚਸਞ੍ਞਾਯ ਕਿਚ੍ਚਂ ਵੁਤ੍ਤਂ ਮੂਲਸਨ੍ਤਾਨਕਪਦਾਲਨਪਬ੍ਬਜਲਾਯਨਵਣ੍ਟਚ੍ਛੇਦਨਪਦੇਸੇਨ ਅਨਿਚ੍ਚਸਞ੍ਞਾਯ ਪਟਿਪਕ੍ਖਪਚ੍ਛੇਦਨਸ੍ਸ ਦਸ੍ਸਿਤਤ੍ਤਾ. ਪਚ੍ਛਿਮਾਹਿ ਬਲਂ ਦਸ੍ਸਿਤਂ ਪਟਿਪਕ੍ਖਾਤਿਭਾਵਸ੍ਸ ਜੋਤਿਤਤ੍ਤਾ.

ਅਨਿਚ੍ਚਸਞ੍ਞਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਪੁਪ੍ਫਵਗ੍ਗਵਣ੍ਣਨਾ ਨਿਟ੍ਠਿਤਾ.

ਮਜ੍ਝਿਮਪਣ੍ਣਾਸਕੋ ਸਮਤ੍ਤੋ.