੧. ਅਟ੍ਠਿਸੁਤ੍ਤਵਣ੍ਣਨਾ

੨੦੨. ਆਯਸ੍ਮਾ ਚ ਲਕ੍ਖਣੋਤਿਆਦੀਸੁ ‘‘ਕੋ ਨਾਮਾਯਸ੍ਮਾ ਲਕ੍ਖਣੋ, ਕਸ੍ਮਾ ਚ ‘ਲਕ੍ਖਣੋ’ਤਿ ਨਾਮਂ ਅਹੋਸਿ, ਕੋ ਚਾਯਸ੍ਮਾ ਮੋਗ੍ਗਲ੍ਲਾਨੋ, ਕਸ੍ਮਾ ਚ ਸਿਤਂ ਪਾਤ੍ਵਾਕਾਸੀ’’ਤਿ ਤਂ ਸਬ੍ਬਂ ਪਕਾਸੇਤੁਂ ‘‘ਯ੍ਵਾਯ’’ਨ੍ਤਿਆਦਿ ਆਰਦ੍ਧਂ. ਲਕ੍ਖਣਸਮ੍ਪਨ੍ਨੇਨਾਤਿ ਪੁਰਿਸਲਕ੍ਖਣਸਮ੍ਪਨ੍ਨੇਨ.

ਈਸਂ ਹਸਿਤਂ ‘‘ਸਿਤ’’ਨ੍ਤਿ ਵੁਚ੍ਚਤੀਤਿ ਆਹ ‘‘ਮਨ੍ਦਹਸਿਤ’’ਨ੍ਤਿ. ਅਟ੍ਠਿਸਙ੍ਖਲਿਕਨ੍ਤਿ ਨਯਿਦਂ ਅਵਿਞ੍ਞਾਣਕਂ ਅਟ੍ਠਿਸਙ੍ਖਲਿਕਮਤ੍ਤਂ, ਅਥ ਖੋ ਏਕੋ ਪੇਤੋਤਿ ਆਹ ‘‘ਪੇਤਲੋਕੇ ਨਿਬ੍ਬਤ੍ਤ’’ਨ੍ਤਿ. ਏਤੇ ਅਤ੍ਤਭਾਵਾਤਿ ਪੇਤਤ੍ਤਭਾਵਾ. ਨ ਆਪਾਥਂ ਆਗਚ੍ਛਨ੍ਤੀਤਿ ਦੇਵਤ੍ਤਭਾਵਾ ਵਿਯ ਨ ਆਪਾਥਂ ਆਗਚ੍ਛਨ੍ਤਿ ਪਕਤਿਯਾ. ਤੇਸਂ ਪਨ ਰੁਚਿਯਾ ਆਪਾਥਂ ਆਗਚ੍ਛੇਯ੍ਯੁਂ ਮਨੁਸ੍ਸਾਨਂ. ਦੁਕ੍ਖਾਭਿਭੂਤਾਨਂ ਅਨਾਥਭਾਵਦਸ੍ਸਨਪਦਟ੍ਠਾਨਾ ਕਰੁਣਾਤਿ ਆਹ ‘‘ਕਾਰੁਞ੍ਞੇ ਕਤ੍ਤਬ੍ਬੇ’’ਤਿ. ਅਤ੍ਤਨੋ ਚ ਸਮ੍ਪਤ੍ਤਿਂ ਬੁਦ੍ਧਞਾਣਸ੍ਸ ਚ ਸਮ੍ਪਤ੍ਤਿਨ੍ਤਿ ਪਚ੍ਚੇਕਂ ਸਮ੍ਪਤ੍ਤਿਸਦ੍ਦੋ ਯੋਜੇਤਬ੍ਬੋ. ਤਦੁਭਯਂ ਵਿਭਾਵੇਤੁਂ ‘‘ਤਂ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਅਤ੍ਤਨੋ ਸਮ੍ਪਤ੍ਤਿਂ ਅਨੁਸ੍ਸਰਿਤ੍ਵਾ ਸਿਤਂ ਪਾਤ੍ਵਾਕਾਸੀਤਿ ਪਦਂ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਧਮ੍ਮਧਾਤੂਤਿ ਸਬ੍ਬਞ੍ਞੁਤਞ੍ਞਾਣਂ ਸਨ੍ਧਾਯ ਵਦਤਿ. ਧਮ੍ਮਧਾਤੂਤਿ ਵਾ ਧਮ੍ਮਾਨਂ ਸਭਾਵੋ.

ਇਤਰੋਤਿ ਲਕ੍ਖਣਤ੍ਥੇਰੋ. ਉਪਪਤ੍ਤੀਤਿ ਜਾਤਿ. ਉਪਪਤ੍ਤਿਸੀਸੇਨ ਹਿ ਤਥਾਰੂਪਂ ਅਤ੍ਤਭਾਵਂ ਵਦਤਿ. ਲੋਹਤੁਣ੍ਡਕੇਹੀਤਿ ਲੋਹਮਯੇਹੇਵ ਤੁਣ੍ਡਕੇਹਿ. ਚਰਨ੍ਤੀਤਿ ਆਕਾਸੇਨ ਗਚ੍ਛਨ੍ਤਿ. ਅਚ੍ਛਰਿਯਂ ਵਤਾਤਿ ਗਰਹਚ੍ਛਰਿਯਂ ਨਾਮੇਤਂ. ਚਕ੍ਖੁਭੂਤਾਤਿ ਸਮ੍ਪਤ੍ਤਦਿਬ੍ਬਚਕ੍ਖੁਕਾ, ਲੋਕਸ੍ਸ ਚਕ੍ਖੁਭੂਤਾਤਿ ਏਵਂ ਵਾ ਏਤ੍ਥ ਅਤ੍ਥੋ ਦਟ੍ਠਬ੍ਬੋ.

ਯਤ੍ਰਾਤਿ ਹੇਤੁਅਤ੍ਥੇ ਨਿਪਾਤੋਤਿ ਆਹ ‘‘ਯਤ੍ਰਾਤਿ ਕਾਰਣਵਚਨ’’ਨ੍ਤਿ. ਅਞ੍ਞਤ੍ਰ ਹਿ ‘‘ਯਤ੍ਰ ਹਿ ਨਾਮਾ’’ਤਿ ਅਤ੍ਥੋ ਵੁਚ੍ਚਤਿ. ਅਪ੍ਪਮਾਣੇ ਸਤ੍ਤਨਿਕਾਯੇ ਤੇ ਚ ਖੋ ਵਿਭਾਗੇਨ ਕਾਮਭਵਾਦਿਭੇਦੇ ਭਵੇ, ਨਿਰਯਾਦਿਭੇਦਾ ਗਤਿਯੋ, ਨਾਨਤ੍ਤਕਾਯਨਾਨਤ੍ਤਸਞ੍ਞਿਆਦਿਵਿਞ੍ਞਾਣਟ੍ਠਿਤਿਯੋ, ਤਥਾਰੂਪੇ ਸਤ੍ਤਾਵਾਸੇ ਚ ਸਬ੍ਬਞ੍ਞੁਤਞ੍ਞਾਣਞ੍ਚ ਮੇ ਉਪਨੇਤੁਂ ਪਚ੍ਚਕ੍ਖਂ ਕਰੋਨ੍ਤੇਨ.

ਗੋਘਾਤਕੋਤਿ ਗੁਨ੍ਨਂ ਅਭਿਣ੍ਹਂ ਹਨਨਕੋ. ਤੇਨਾਹ ‘‘ਵਧਿਤ੍ਵਾ ਵਧਿਤ੍ਵਾ’’ਤਿ. ਤਸ੍ਸਾਤਿ ਗੁਨ੍ਨਂ ਵਧਕਕਮ੍ਮਸ੍ਸ. ਅਪਰਾਪਰਿਯਕਮ੍ਮਸ੍ਸਾਤਿ ਅਪਰਾਪਰਿਯਵੇਦਨੀਯਕਮ੍ਮਸ੍ਸ. ਬਲਵਤਾ ਗੋਘਾਤਕਕਮ੍ਮੇਨ ਵਿਪਾਕੇ ਦੀਯਮਾਨੇ ਅਲਦ੍ਧੋਕਾਸਂ ਅਪਰਾਪਰਿਯਵੇਦਨੀਯਂ ਤਸ੍ਮਿਂ ਵਿਪਕ੍ਕਵਿਪਾਕੇ ਇਦਾਨਿ ਲਦ੍ਧੋਕਾਸਂ ‘‘ਅਵਸੇਸਕਮ੍ਮ’’ਨ੍ਤਿ ਵੁਤ੍ਤਂ. ਪਟਿਸਨ੍ਧੀਤਿ ਪਾਪਕਮ੍ਮਜਨਿਤਾ ਪਟਿਸਨ੍ਧਿ. ਕਮ੍ਮਸਭਾਗਤਾਯਾਤਿ ਕਮ੍ਮਸਦਿਸਭਾਵੇਨ. ਆਰਮ੍ਮਣਸਭਾਗਤਾਯਾਤਿ ਆਰਮ੍ਮਣਸ੍ਸ ਸਭਾਗਭਾਵੇਨ ਸਦਿਸਭਾਵੇਨ. ਯਾਦਿਸੇ ਹਿ ਆਰਮ੍ਮਣੇ ਪੁਬ੍ਬੇ ਤਂ ਕਮ੍ਮਂ ਤਸ੍ਸ ਚ ਵਿਪਾਕੋ ਪਵਤ੍ਤੋ, ਤਾਦਿਸੇਯੇਵ ਆਰਮ੍ਮਣੇ ਇਦਂ ਕਮ੍ਮਂ ਇਮਸ੍ਸ ਵਿਪਾਕੋ ਚ ਪਵਤ੍ਤੋਤਿ ਕਤ੍ਵਾ ਵੁਤ੍ਤਂ ‘‘ਤਸ੍ਸੇਵ ਕਮ੍ਮਸ੍ਸ ਵਿਪਾਕਾਵਸੇਸੇਨਾ’’ਤਿ. ਭਵਤਿ ਹਿ ਤਂਸਦਿਸੇਪਿ ਤਬ੍ਬੋਹਾਰੋ ਯਥਾ ‘‘ਸੋ ਏਵ ਤਿਤ੍ਤਿਰੋ, ਤਾਨਿਯੇਵ ਓਸਧਾਨੀ’’ਤਿ. ਨਿਮਿਤ੍ਤਂ ਅਹੋਸੀਤਿ ਪੁਬ੍ਬੇ ਕਤੂਪਚਿਤਸ੍ਸ ਪੇਤੂਪਪਤ੍ਤਿਨਿਬ੍ਬਤ੍ਤਨਵਸੇਨ ਕਤੋਕਾਸਸ੍ਸ ਤਸ੍ਸ ਕਮ੍ਮਸ੍ਸ ਨਿਮਿਤ੍ਤਭੂਤਂ ਇਦਾਨਿ ਤਥਾ ਉਪਟ੍ਠਹਨ੍ਤਂ ਤਸ੍ਸ ਵਿਪਾਕਸ੍ਸ ਨਿਮਿਤ੍ਤਂ ਆਰਮ੍ਮਣਂ ਅਹੋਸਿ. ਸੋਤਿ ਗੋਘਾਤਕੋ. ਅਟ੍ਠਿਸਙ੍ਖਲਿਕਪੇਤੋ ਜਾਤੋ ਕਮ੍ਮਸਰਿਕ੍ਖਕਵਿਪਾਕਤਾਵਸੇਨ.

ਅਟ੍ਠਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.