੭. ਰਾਹੁਲਸਂਯੁਤ੍ਤਂ
੧. ਪਠਮਵਗ੍ਗੋ
੧-੮. ਚਕ੍ਖੁਸੁਤ੍ਤਾਦਿਵਣ੍ਣਨਾ
੧੮੮-੧੯੫. ਏਕਵਿਹਾਰੀਤਿ ਚਤੂਸੁਪਿ ਇਰਿਯਾਪਥੇਸੁ ਏਕਾਕੀ ਹੁਤ੍ਵਾ ਵਿਹਰਨ੍ਤੋ. ਵਿਵੇਕਟ੍ਠੋਤਿ ਵਿਵਿਤ੍ਤਟ੍ਠੋ, ਤੇਨਾਹ ‘‘ਨਿਸ੍ਸਦ੍ਦੋ’’ਤਿ. ਸਤਿਯਾ ਅਵਿਪ੍ਪਵਸਨ੍ਤੋਤਿ ਸਤਿਯਾ ਅਵਿਪ੍ਪਵਾਸੇਨ ਠਿਤੋ, ਸਬ੍ਬਦਾ ਅਵਿਜਹਨਵਸੇਨ ਪਵਤ੍ਤੋ. ਆਤਾਪੀਤਿ ਵੀਰਿਯਸਮ੍ਪਨ੍ਨੋਤਿ ਸਬ੍ਬਸੋ ਕਿਲੇਸਾਨਂ ਆਤਾਪਨਪਰਿਤਾਪਨਵਸੇਨ ਪਵਤ੍ਤਵੀਰਿਯਸਮਙ੍ਗੀਭੂਤੋ. ਪਹਿਤਤ੍ਤੋਤਿ ਤਸ੍ਮਿਂ ਵਿਸੇਸਾਧਿਗਮੇ ਪੇਸਿਤਚਿਤ੍ਤੋ, ਤਤ੍ਥ ਨਿਨ੍ਨੋ ਤਪ੍ਪਬ੍ਭਾਰੋਤਿ ਅਤ੍ਥੋ. ਹੁਤ੍ਵਾ ਅਭਾਵਾਕਾਰੇਨਾਤਿ ਉਪ੍ਪਤ੍ਤਿਤੋ ਪੁਬ੍ਬੇ ਅਵਿਜ੍ਜਮਾਨੋ ਪਚ੍ਚਯਸਮਵਾਯੇਨ ਹੁਤ੍ਵਾ ਉਪ੍ਪਜ੍ਜਿਤ੍ਵਾ ਭਙ੍ਗੁਪਰਮਸਙ੍ਖਾਤੇਨ ਅਭਾਵਾਕਾਰੇਨ. ਅਨਿਚ੍ਚਨ੍ਤਿ ਨਿਚ੍ਚਧੁਵਤਾਭਾਵਤੋ. ਉਪ੍ਪਾਦਵਯਵਨ੍ਤਤਾਯਾਤਿ ਖਣੇ ਖਣੇ ਉਪ੍ਪਜ੍ਜਿਤ੍ਵਾ ਨਿਰੁਜ੍ਝਨਤੋ. ਤਾਵਕਾਲਿਕਤਾਯਾਤਿ ਤਙ੍ਖਣਿਕਤਾਯ. ਵਿਪਰਿਣਾਮਕੋਟਿਯਾਤਿ ਵਿਪਰਿਣਾਮਵਨ੍ਤਤਾਯ. ਚਕ੍ਖੁਞ੍ਹਿ ਉਪਾਦਾਯ ਵਿਕਾਰਾਪਜ੍ਜਨੇਨ ਵਿਪਰਿਣਮਨ੍ਤਂ ਵਿਨਾਸਂ ਪਟਿਪੀਲ਼ਂ ਪਾਪੁਣਾਤਿ. ਨਿਚ੍ਚਪਟਿਕ੍ਖੇਪਤੋਤਿ ਨਿਚ੍ਚਤਾਯ ਪਟਿਕ੍ਖਿਪਿਤਬ੍ਬਤੋ ਲੇਸਮਤ੍ਤਸ੍ਸਪਿ ਅਨੁਪਲਬ੍ਭਨਤੋ. ਦੁਕ੍ਖਮਨਟ੍ਠੇਨਾਤਿ ਨਿਰਨ੍ਤਰਦੁਕ੍ਖਤਾਯ ਦੁਕ੍ਖੇਨ ਖਮਿਤਬ੍ਬਤੋ. ਦੁਕ੍ਖਵਤ੍ਥੁਕਟ੍ਠੇਨਾਤਿ ਨਾਨਪ੍ਪਕਾਰਦੁਕ੍ਖਾਧਿਟ੍ਠਾਨਤੋ. ਸਤਤਸਮ੍ਪੀਲ਼ਨਟ੍ਠੇਨਾਤਿ ਅਭਿਣ੍ਹਤਾਪਸਭਾਵਤੋ. ਸੁਖਪਟਿਕ੍ਖੇਪੇਨਾਤਿ ਸੁਖਭਾਵਸ੍ਸ ਪਟਿਕ੍ਖਿਪਿਤਬ੍ਬਤੋ. ਤਣ੍ਹਾਗਾਹੋ ਮਮਂਕਾਰਭਾਵਤੋ. ਮਾਨਗਾਹੋ ਅਹਂਕਾਰਭਾਵਤੋ. ਦਿਟ੍ਠਿਗਾਹੋ ‘‘ਅਤ੍ਤਾ ਮੇ’’ਤਿ ਵਿਪਲ੍ਲਾਸਭਾਵਤੋ. ਵਿਰਾਗਵਸੇਨਾਤਿ ਵਿਰਾਗਗ੍ਗਹਣੇਨ. ਤਥਾ ਵਿਮੁਤ੍ਤਿਵਸੇਨਾਤਿ ਵਿਮੁਤ੍ਤਿਗ੍ਗਹਣੇਨ.
ਪਸਾਦਾਵ ਗਹਿਤਾ ਦ੍ਵਾਰਭਾਵਪ੍ਪਤ੍ਤਸ੍ਸ ਅਧਿਪ੍ਪੇਤਤ੍ਤਾ. ਸਮ੍ਮਸਨਚਾਰਚਿਤ੍ਤਂ ਦ੍ਵਾਰਭੂਤਮਨੋਤਿ ਅਧਿਪ੍ਪਾਯੋ.
ਛਟ੍ਠੇ ਆਰਮ੍ਮਣੇ ਤੇਭੂਮਕਧਮ੍ਮਾ ਸਮ੍ਮਸਨਚਾਰਸ੍ਸ ਅਧਿਪ੍ਪੇਤਤ੍ਤਾ. ਯਥਾ ਪਠਮਸੁਤ੍ਤੇ ਪਞ੍ਚ ਪਸਾਦਾ ਗਹਿਤਾ, ਨ ਸਸਮ੍ਭਾਰਚਕ੍ਖੁਆਦਯੋ, ਏਵਂ ਤਤਿਯਸੁਤ੍ਤੇ ਨ ਪਸਾਦਵਤ੍ਥੁਕਚਿਤ੍ਤਮੇਵ ਗਹਿਤਂ. ਨ ਤਂਸਮ੍ਪਯੁਤ੍ਤਾ ਧਮ੍ਮਾ. ਏਵਞ੍ਹਿ ਅਵਧਾਰਣਂ ਸਾਤ੍ਥਕਂ ਹੋਤਿ ਅਞ੍ਞਥਾ ਤੇਨ ਅਪਨੇਤਬ੍ਬਸ੍ਸ ਅਭਾਵਤੋ. ਸਬ੍ਬਤ੍ਥਾਤਿ ਸਬ੍ਬੇਸੁ ਚਤੁਤ੍ਥਸੁਤ੍ਤਾਦੀਸੁ. ਜਵਨਪ੍ਪਤ੍ਤਾਤਿ ਜਵਨਚਿਤ੍ਤਸਂਯੁਤ੍ਤਾ.
ਚਕ੍ਖੁਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੯. ਧਾਤੁਸੁਤ੍ਤਵਣ੍ਣਨਾ
੧੯੬. ਆਕਾਸਧਾਤੁ ਰੂਪਪਰਿਚ੍ਛੇਦਤਾਯ ਰੂਪਪਰਿਯਾਪਨ੍ਨਨ੍ਤਿ ਅਧਿਪ੍ਪਾਯੇਨ ‘‘ਸੇਸਾਹਿ ਰੂਪ’’ਨ੍ਤਿ ਵੁਤ੍ਤਂ. ਨਾਮਰੂਪਨ੍ਤਿ ਤੇਭੂਮਕਂ ਨਾਮਂ ਰੂਪਞ੍ਚ ਕਥਿਤਂ.
ਧਾਤੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੦. ਖਨ੍ਧਸੁਤ੍ਤਵਣ੍ਣਨਾ
੧੯੭. ਸਬ੍ਬਸਙ੍ਗਾਹਿਕਪਰਿਚ੍ਛੇਦੇਨਾਤਿ ਧਮ੍ਮਸਙ੍ਗਣ੍ਹਨਪਰਿਯਾਯੇਨ. ਇਧਾਤਿ ਇਮਸ੍ਮਿਂ ਸੁਤ੍ਤੇ. ਤੇਭੂਮਕਾਤਿ ਗਹੇਤਬ੍ਬਾ ਸਮ੍ਮਸਨਚਾਰਸ੍ਸ ਅਧਿਪ੍ਪੇਤਤ੍ਤਾ.
ਖਨ੍ਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਪਠਮਵਗ੍ਗਵਣ੍ਣਨਾ ਨਿਟ੍ਠਿਤਾ.
੨. ਦੁਤਿਯਵਗ੍ਗੋ
੧੧. ਅਨੁਸਯਸੁਤ੍ਤਵਣ੍ਣਨਾ
੨੦੦. ਦੁਤਿਯਵਗ੍ਗੇ ਅਤ੍ਤਨੋਤਿ ਆਯਸ੍ਮਾ ਰਾਹੁਲੋ ਅਤ੍ਤਨੋ ਸਵਿਞ੍ਞਾਣਕਂ ਕਾਯਂ ਦਸ੍ਸੇਤਿ. ਪਰਸ੍ਸਾਤਿ ਪਰਸ੍ਸ ਅਵਿਞ੍ਞਾਣਕਕਾਯਂ ਦਸ੍ਸੇਤਿ. ਪਰਸਨ੍ਤਾਨੇ ਵਾ ਅਰੂਪੇ ਧਮ੍ਮੇ ਅਗ੍ਗਹੇਤ੍ਵਾ ਰੂਪਕਾਯਮੇਵ ਗਣ੍ਹਨ੍ਤੋ ਵਦਤਿ. ਅਪਰੇ ‘‘ਅਸਞ੍ਞਸਤ੍ਤਾਨਂ ਅਤ੍ਤਭਾਵਂ ਸਨ੍ਧਾਯ ਤਥਾ ਵੁਤ੍ਤ’’ਨ੍ਤਿ ਵਦਨ੍ਤਿ. ਪੁਰਿਮੇਨਾਤਿ ‘‘ਇਮਸ੍ਮਿਂ ਸਵਿਞ੍ਞਾਣਕੇ ਕਾਯੇ’’ਤਿ ਇਮਿਨਾ ਪਦੇਨ. ਪਚ੍ਛਿਮੇਨਾਤਿ ‘‘ਬਹਿਦ੍ਧਾ’’ਤਿ ਇਮਿਨਾ ਪਦੇਨ. ਏਤੇ ਕਿਲੇਸਾਤਿ ਏਤੇ ਦਿਟ੍ਠਿਤਣ੍ਹਾਮਾਨਸਞ੍ਞਿਤਾ ਕਿਲੇਸਾ. ਏਤੇਸੁ ਵਤ੍ਥੂਸੂਤਿ ਅਜ੍ਝਤ੍ਤਬਹਿਦ੍ਧਾਵਤ੍ਥੂਸੁ. ਸਮ੍ਮ…ਪੇ… ਪਸ੍ਸਤੀਤਿ ਪੁਬ੍ਬਭਾਗੇ ਵਿਪਸ੍ਸਨਾਞਾਣੇਨ ਸਮ੍ਮਸਨਵਸੇਨ, ਮਗ੍ਗਕ੍ਖਣੇ ਅਭਿਸਮਯਵਸੇਨ ਸੁਟ੍ਠੁ ਅਤ੍ਤਪਚ੍ਚਕ੍ਖੇਨ ਞਾਣੇਨ ਪਸ੍ਸਤਿ.
ਅਨੁਸਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੧੨. ਅਪਗਤਸੁਤ੍ਤਵਣ੍ਣਨਾ
੨੦੧. ‘‘ਅਹਮੇਤ’’ਨ੍ਤਿ ਅਹਂਕਾਰਾਦੀਨਂ ਅਨਵਸੇਸਪ੍ਪਹਾਨੇਨ ਅਚ੍ਚਨ੍ਤਮੇਵ ਅਪਗਤਂ.
ਅਪਗਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਦੁਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.
ਦ੍ਵੀਸੂਤਿ ਪਠਮਵਗ੍ਗਾਦੀਸੁ. ਦੇਸਨਾਯ ਅਸੇਕ੍ਖਭੂਮਿਯਾ ਦੇਸਿਤਤ੍ਤਾ ਅਸੇਕ੍ਖਭੂਮਿ ਕਥਿਤਾ. ਪਠਮੋਤਿ ਪਠਮਵਗ੍ਗੋ ‘‘ਸਾਧੁ ਮੇ, ਭਨ੍ਤੇ, ਭਗਵਾ’’ਤਿਆਦਿਨਾ ਆਯਾਚਨ੍ਤਸ੍ਸ, ਦੁਤਿਯੋ ਅਨਾਯਾਚਨ੍ਤਸ੍ਸ ਥੇਰਸ੍ਸ ਅਜ੍ਝਾਸਯਵਸੇਨ ਕਥਿਤੋ. ਵਿਮੁਤ੍ਤਿਪਰਿਪਾਚਨੀਯਧਮ੍ਮਾ ਨਾਮ ਵਿਵਟ੍ਟਸਨ੍ਨਿਸ੍ਸਿਤਾ ਸਦ੍ਧਿਨ੍ਦ੍ਰਿਯਾਦਯੋ. ਤੇਨ ਪਨ ਵਿਪਸ੍ਸਨਾਯ ਕਥਿਤਤ੍ਤਾ ਕਥਿਤਾ ਏਵਾਤਿ. ਤਂਤਂਦੇਸਨਾਨੁਸਾਰੇਨ ਹਿ ਥੇਰੋ ਤੇ ਧਮ੍ਮੇ ਪਰਿਪਾਕਂ ਪਾਪੇਸਿ. ਤਥਾ ਹਿ ਭਗਵਾ ਦੁਤਿਯਵਗ੍ਗਂ ਅਨਾਯਾਚਿਤੋਪਿ ਦੇਸੇਸਿ.
ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ
ਰਾਹੁਲਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.