੩. ਅਸ੍ਸੁਸੁਤ੍ਤਵਣ੍ਣਨਾ

੧੨੬. ਕਨ੍ਦਨਂ ਸਸਦ੍ਦਂ, ਰੋਦਨਂ ਪਨ ਕੇਵਲਮੇਵਾਤਿ ਆਹ ‘‘ਕਨ੍ਦਨ੍ਤਾਨਨ੍ਤਿ ਸਸਦ੍ਦਂ ਰੁਦਮਾਨਾਨ’’ਨ੍ਤਿ. ਪਵਤ੍ਤਨ੍ਤਿ ਸਨ੍ਦਨਵਸੇਨ ਪਵਤ੍ਤਂ. ‘‘ਸਿਨੇਰੁਰਸ੍ਮੀਹਿ ਪਰਿਚ੍ਛਿਨ੍ਨੇਸੂ’’ਤਿ ਸਙ੍ਖੇਪੇਨ ਵੁਤ੍ਤਮਤ੍ਥਂ ਵਿਵਰਨ੍ਤੋ ‘‘ਸਿਨੇਰੁਸ੍ਸਾ’’ਤਿਆਦਿਮਾਹ. ਮਣਿਮਯਨ੍ਤਿ ਇਨ੍ਦਨੀਲਮਣਿਮਯਂ. ਸਿਨੇਰੁਸ੍ਸ ਪੁਬ੍ਬਦਕ੍ਖਿਣਕੋਣਸਮਪਦੇਸਾ ‘‘ਪੁਬ੍ਬਦਕ੍ਖਿਣਪਸ੍ਸਾ’’ਤਿ ਅਧਿਪ੍ਪੇਤਾ. ਤੇਹਿ ਨਿਕ੍ਖਨ੍ਤਰਜਤਰਸ੍ਮਿਯੋ ਇਨ੍ਦਨੀਲਰਸ੍ਮਿਯੋ ਚ ਏਕਤੋ ਹੁਤ੍ਵਾ. ਤਾਸਂ ਰਸ੍ਮੀਨਂ ਅਨ੍ਤਰੇਸੂਤਿ ਤਾਸਂ ਚਤੂਹਿ ਕੋਣੇਹਿ ਨਿਕ੍ਖਨ੍ਤਰਸ੍ਮੀਨਂ ਚਤੂਸੁ ਅਨ੍ਤਰੇਸੁ. ਚਤ੍ਤਾਰੋਤਿ ਦਕ੍ਖਿਣਾਦਿਭੇਦਾ ਚਤ੍ਤਾਰੋ ਮਹਾਸਮੁਦ੍ਦਾ ਹੋਨ੍ਤਿ. ਵਿਅਸਨਨ੍ਤਿ ਵਿਸੇਸੇਨ ਖੇਪਨਂ. ਕਿਂ ਪਨ ਤਨ੍ਤਿ ਆਹ ‘‘ਵਿਨਾਸੋਤਿ ਅਤ੍ਥੋ’’ਤਿ.

ਅਸ੍ਸੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.