੩. ਧਾਤੁਸਂਯੁਤ੍ਤਂ

੧. ਨਾਨਤ੍ਤਵਗ੍ਗੋ

੧. ਧਾਤੁਨਾਨਤ੍ਤਸੁਤ੍ਤਵਣ੍ਣਨਾ

੮੫. ਪਠਮਨ੍ਤਿ ਇਮਸ੍ਮਿਂ ਨਿਦਾਨਵਗ੍ਗੇ ਸਂਯੁਤ੍ਤਾਨਂ ਪਠਮਂ ਸਂਗੀਤਤ੍ਤਾ. ਨਿਸ੍ਸਤ੍ਤਟ੍ਠਸੁਞ੍ਞਤਟ੍ਠਸਙ੍ਖਾਤੇਨਾਤਿ ਧਮ੍ਮਮਤ੍ਤਤਾਯ ਨਿਸ੍ਸਤ੍ਤਤਾਸਙ੍ਖਾਤੇਨ ਨਿਚ੍ਚਸੁਭਸੁਖਅਤ੍ਤਸੁਞ੍ਞਤਤ੍ਥਸਙ੍ਖਾਤੇਨ. ਸਭਾਵਟ੍ਠੇਨਾਤਿ ਯਥਾਭੂਤਸਭਾਵਟ੍ਠੇਨ. ਤਤੋ ਏਵ ਸਭਾਵਸ੍ਸ ਧਾਰਣਟ੍ਠੇਨ ਧਾਤੂਤਿ ਲਦ੍ਧਨਾਮਾਨਂ. ਨਾਨਾਸਭਾਵੋ ਅਞ੍ਞਮਞ੍ਞਵਿਸਦਿਸਤਾ ਧਾਤੁਨਾਨਤ੍ਤਂ. ਚਕ੍ਖੁਸਙ੍ਖਾਤੋ ਪਸਾਦੋ ਚਕ੍ਖੁਪਸਾਦੋ. ਸੋ ਏਵ ਚਕ੍ਖਨਟ੍ਠੇਨ ਚਕ੍ਖੁ, ਨਿਸ੍ਸਤ੍ਤਸੁਞ੍ਞਤਟ੍ਠੇਨ ਧਾਤੁ ਚਾਤਿ ਚਕ੍ਖੁਧਾਤੁ. ਚਕ੍ਖੁਪਸਾਦਵਤ੍ਥੁਂ ਅਧਿਟ੍ਠਾਨਂ ਕਤ੍ਵਾ ਪਵਤ੍ਤਂ ਚਕ੍ਖੁਪਸਾਦਵਤ੍ਥੁਕਂ. ਸੇਸਪਦੇਸੁਪਿ ਏਸੇਵ ਨਯੋ. ਦ੍ਵੇ ਸਮ੍ਪਟਿਚ੍ਛਨਮਨੋਧਾਤੁਯੋ, ਏਕਾ ਕਿਰਿਯਾ ਮਨੋਧਾਤੂਤਿ ਤਿਸ੍ਸੋ ਮਨੋਧਾਤੁਯੋ ਮਨੋਧਾਤੁ ‘‘ਮਨਨਮਤ੍ਤਾ ਧਾਤੂ’’ਤਿ ਕਤ੍ਵਾ. ਵੇਦਨਾਦਯੋ…ਪੇ… ਨਿਬ੍ਬਾਨਞ੍ਚ ਧਮ੍ਮਧਾਤੁ ਵਿਸੇਸਸਞ੍ਞਾਪਰਿਹਾਰੇਨ ਸਾਮਞ੍ਞਸਞ੍ਞਾਯ ਪਵਤ੍ਤਨਤੋ. ਤਥਾ ਹੇਤੇ ਧਮ੍ਮਾ ਆਯਤਨਦੇਸਨਾਯ ‘‘ਧਮ੍ਮਾਯਤਨ’’ਨ੍ਤੇਵ ਦੇਸਿਤਾ. ਨ ਹਿ ਨੇਸਂ ਰੂਪਾਯਤਨਾਦੀਨਂ ਵਿਯ ਵਿਞ੍ਞਾਣੇਹਿ ਅਞ੍ਞਵਿਞ੍ਞਾਣੇਨ ਗਹੇਤਬ੍ਬਤਾਕਾਰੋ ਅਤ੍ਥਿ. ਸਬ੍ਬਮ੍ਪੀਤਿ ਛਸਤ੍ਤਤਿਵਿਧਂ ਮਨੋਵਿਞ੍ਞਾਣਂ. ਕਾਮਾਵਚਰਾ ਕਾਮਧਾਤੁਪਰਿਯਾਪਨ੍ਨਤ੍ਤਾ. ਅਵਸਾਨੇ ਦ੍ਵੇਤਿ ਧਮ੍ਮਧਾਤੁਮਨੋਵਿਞ੍ਞਾਣਧਾਤੁਯੋ. ਅਯਮੇਤ੍ਥ ਸਙ੍ਖੇਪੋ, ਵਿਤ੍ਥਾਰੋ ਪਨ ਵਿਸੁਦ੍ਧਿਮਗ੍ਗੇ ਤਂਸਂਵਣ੍ਣਨਾਸੁ ਦਟ੍ਠਬ੍ਬੋ.

ਧਾਤੁਨਾਨਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਫਸ੍ਸਨਾਨਤ੍ਤਸੁਤ੍ਤਵਣ੍ਣਨਾ

੮੬. ਜਾਤਿਪਸੁਤਿਆਰਮ੍ਮਣਾਦਿਭੇਦੇਨ ਨਾਨਾਭਾਵੋ ਫਸ੍ਸੋ. ਜਾਤਿਪਚ੍ਚਯਭੇਦੇਨ ਹਿ ਪਚ੍ਚਯੁਪ੍ਪਨ੍ਨਸ੍ਸ ਭੇਦੋ ਹੋਤਿਯੇਵ. ਧਮ੍ਮਪਰਿਚ੍ਛੇਦਵਸੇਨ ਧਾਤੁਦੇਸਨਾਯਂ ਤਿਸ੍ਸੋ ਮਨਨਮਤ੍ਤਾ ਧਾਤੁਯੋਵ ਮਨੋਧਾਤੁਯੋ. ਕਿਰਿਯਾਮਯਸ੍ਸ ਚਿਤ੍ਤੁਪ੍ਪਤ੍ਤਿਵਿਭਾਗੇਨ ਪਚ੍ਚਯੁਪ੍ਪਨ੍ਨਸ੍ਸ ਵਸੇਨ ਧਾਤੁਦੇਸਨਾਯਂ ਮਨਨਟ੍ਠੇਨ ਧਾਤੁਤਾਯ ਸਾਮਞ੍ਞਤੋ ਮਨੋਦ੍ਵਾਰਾਵਜ੍ਜਨਂ ‘‘ਮਨੋਧਾਤੂ’’ਤਿ ਅਧਿਪ੍ਪੇਤਨ੍ਤਿ ਵੁਤ੍ਤਂ ‘‘ਮਨੋਸਮ੍ਫਸ੍ਸੋ ਮਨੋਦ੍ਵਾਰੇ ਪਠਮਜਵਨਸਮ੍ਪਯੁਤ੍ਤੋ’’ਤਿਆਦਿ. ਤਸ੍ਮਾਤਿ ਯਸ੍ਮਾ ਕਾਮਂ ਸਮ੍ਪਟਿਚ੍ਛਨਮਨੋਧਾਤੁਅਨਨ੍ਤਰਂ ਉਪ੍ਪਜ੍ਜਮਾਨੋ ਸਨ੍ਤੀਰਣਵਿਞ੍ਞਾਣਧਾਤੁਯਾ ਸਮ੍ਪਯੁਤ੍ਤੋ ਫਸ੍ਸੋਪਿ ਮਨੋਸਮ੍ਫਸ੍ਸੋ ਏਵ ਨਾਮ, ਦੁਬ੍ਬਲਤ੍ਤਾ ਪਨ ਸੋ ਸਬ੍ਬਭਵੇਸੁ ਅਸਮ੍ਭਵਤੋ ਚ ਗਹਿਤੋ ਅਨਵਸੇਸਤੋ ਗਹਣਂ ਨ ਹੋਤੀਤਿ ਮਨੋਦ੍ਵਾਰੇ ਜਵਨਸਮ੍ਫਸ੍ਸੋ ਹੋਤਿ, ਤਸ੍ਮਾ. ਅਯਮੇਤ੍ਥ ਅਤ੍ਥੋਤਿ ਅਯਂ ਇਧ ਅਧਿਪ੍ਪਾਯਾਨੁਗਤੋ ਅਤ੍ਥੋ.

ਫਸ੍ਸਨਾਨਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਨੋਫਸ੍ਸਨਾਨਤ੍ਤਸੁਤ੍ਤਵਣ੍ਣਨਾ

੮੭. ਮਨੋਸਮ੍ਫਸ੍ਸਂ ਪਟਿਚ੍ਚਾਤਿ ਮਨੋਦ੍ਵਾਰੇ ਪਠਮਜਵਨਸਮ੍ਪਯੁਤ੍ਤੋ ਫਸ੍ਸੋ ਮਨੋਸਮ੍ਫਸ੍ਸੋ, ਤਂ ਮਨੋਸਮ੍ਫਸ੍ਸਂ ਪਟਿਚ੍ਚ. ਮਨੋਧਾਤੂਤਿ ਆਵਜ੍ਜਨਕਿਰਿਯਮਨੋਧਾਤੁ. ਮਨੋਵਿਞ੍ਞਾਣਧਾਤੁ ਮਨੋਧਾਤੂਤਿ ਵੇਨੇਯ੍ਯਜ੍ਝਾਸਯਵਸੇਨ ਵੁਤ੍ਤਂ. ਤੇਨਾਹ ‘‘ਮਨੋਦ੍ਵਾਰੇ…ਪੇ… ਏਵਮਤ੍ਥੋ ਦਟ੍ਠਬ੍ਬੋ’’ਤਿ. ਤਥਾ ਹਿ ਵਕ੍ਖਤਿ ‘‘ਸਬ੍ਬਾਨਿ ਚੇਤਾਨੀ’’ਤਿਆਦਿ.

ਨੋਫਸ੍ਸਨਾਨਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਵੇਦਨਾਨਾਨਤ੍ਤਸੁਤ੍ਤਵਣ੍ਣਨਾ

੮੮. ਸਬ੍ਬਾਪਿ ਤਸ੍ਮਿਂ ਦ੍ਵਾਰੇ ਵੇਦਨਾ ਵਤ੍ਤੇਯ੍ਯੁਂ ਚਕ੍ਖੁਸਮ੍ਫਸ੍ਸਵੇਦਨਾ ਉਪਨਿਸ੍ਸਯਪਚ੍ਚਯਭਾਵਿਤਾ. ਨਿਬ੍ਬਤ੍ਤਿਫਾਸੁਕਤ੍ਥਨ੍ਤਿ ਨਿਬ੍ਬਤ੍ਤਿਯਾ ਉਪਨਿਸ੍ਸਯਭਾਵੇਨ ਪਵਤ੍ਤਿਯਾ ਦਸ੍ਸਨਸੁਖਤ੍ਥਂ. ਸਮ੍ਪਟਿਚ੍ਛਨਵੇਦਨਮੇਵ ਗਹੇਤੁਂ ਵਟ੍ਟਤਿ, ਤਾਯ ਗਹਿਤਾਯ ਇਤਰਾਸਂ ਗਹਣਂ ਞਾਯਾਗਤਮੇਵਾਤਿ. ਵੁਤ੍ਤਂ ਪੋਰਾਣਟ੍ਠਕਥਾਯਂ. ਆਵਜ੍ਜਨਸਮ੍ਫਸ੍ਸਨ੍ਤਿ ਆਵਜ੍ਜਨਮਨੋਸਮ੍ਫਸ੍ਸਂ. ਅਨਨ੍ਤਰੂਪਨਿਸ੍ਸਯਭੂਤਂ ਪਟਿਚ੍ਚ ਪਠਮਜਵਨਵਸੇਨ ਉਪ੍ਪਜ੍ਜਤੀਤਿ ਯੋਜਨਾ. ਅਯਮਧਿਪ੍ਪਾਯੋ ਉਪਨਿਸ੍ਸਯਸ੍ਸ ਅਧਿਪ੍ਪੇਤਤ੍ਤਾ.

ਵੇਦਨਾਨਾਨਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਦੁਤਿਯਵੇਦਨਾਨਾਨਤ੍ਤਸੁਤ੍ਤਵਣ੍ਣਨਾ

੮੯. ਤਤਿਯਚਤੁਤ੍ਥੇਸੁ ਵੁਤ੍ਤਨਯਾਵਾਤਿ ‘‘ਨੋ ਚਕ੍ਖੁਸਮ੍ਫਸ੍ਸਂ ਪਟਿਚ੍ਚ ਉਪ੍ਪਜ੍ਜਤਿ ਚਕ੍ਖੁਧਾਤੂ’’ਤਿ ਏਵਂ ਵੁਤ੍ਤਨਯੋ, ਚਤੁਤ੍ਥੇ ‘‘ਚਕ੍ਖੁਧਾਤੁਂ, ਭਿਕ੍ਖਵੇ, ਪਟਿਚ੍ਚ ਉਪ੍ਪਜ੍ਜਤਿ ਚਕ੍ਖੁਸਮ੍ਫਸ੍ਸੋ’’ਤਿਆਦਿਨਾ ਵੁਤ੍ਤਨਯੋ ਚ. ਏਕਤੋ ਕਤ੍ਵਾਤਿ ਏਕਜ੍ਝਂ ਕਤ੍ਵਾ ਦੇਸਿਤਾ. ਕਸ੍ਮਾ ਪਨ ਤੇਸੁ ਸੁਤ੍ਤੇਸੁ ਏਵਂ ਦੇਸਨਾ ਪਵਤ੍ਤਾਤਿ ਆਹ ‘‘ਸਬ੍ਬਾਨਿ ਚੇਤਾਨੀ’’ਤਿਆਦਿ. ਪਟਿਸੇਧੋ ਪਨ ਤੇਸਂ ਵੇਦਨਾਨਾਨਤ੍ਤਾਦੀਨਂ ਫਸ੍ਸਨਾਨਤ੍ਤਾਦਿਕਸ੍ਸ ਪਚ੍ਚਯਭਾਵਤੋ ਤਥਾਉਪ੍ਪਤ੍ਤਿਯਾ ਅਸਮ੍ਭਵਤੋ. ਇਤੋ ਪਰੇਸੂਤਿ ‘‘ਨੋ ਪਰਿਯੇਸਨਾਨਾਨਤ੍ਤਂ ਪਟਿਚ੍ਚ ਉਪ੍ਪਜ੍ਜਤਿ ਪਰਿਲ਼ਾਹਨਾਨਤ੍ਤ’’ਨ੍ਤਿਆਦੀਸੁ.

ਦੁਤਿਯਵੇਦਨਾਨਾਨਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਬਾਹਿਰਧਾਤੁਨਾਨਤ੍ਤਸੁਤ੍ਤਵਣ੍ਣਨਾ

੯੦. ਪਞ੍ਚ ਧਾਤੁਯੋ ਕਾਮਾਵਚਰਾ ਰੂਪਸਭਾਵਤ੍ਤਾ.

ਬਾਹਿਰਧਾਤੁਨਾਨਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਸਞ੍ਞਾਨਾਨਤ੍ਤਸੁਤ੍ਤਵਣ੍ਣਨਾ

੯੧. ਆਪਾਥੇ ਪਤਿਤਨ੍ਤਿ ਚਕ੍ਖੁਸ੍ਸ ਆਪਾਥਗਤਂ ਸਾਟਕਵੇਠਨਾਦਿਸਞ੍ਞਿਤਂ ਭੂਤਸਙ੍ਘਾਤਂ ਸਮ੍ਮਾ ਨਿਸ੍ਸਿਤਂ. ਚਕ੍ਖੁਦ੍ਵਾਰੇ ਸਮ੍ਪਟਿਚ੍ਛਨਾਦਿਸਮ੍ਪਯੁਤ੍ਤਸਞ੍ਞਾਨਂ ਸਙ੍ਕਪ੍ਪਗਤਿਕਤ੍ਤਾ, ਚਕ੍ਖੁਵਿਞ੍ਞਾਣਸਮ੍ਪਯੁਤ੍ਤਸਞ੍ਞਾਗਹਣੇਨੇਵ ਵਾ ਗਹੇਤਬ੍ਬਤੋ ‘‘ਰੂਪਸਞ੍ਞਾਤਿ ਚਕ੍ਖੁਵਿਞ੍ਞਾਣਸਮ੍ਪਯੁਤ੍ਤਾ ਸਞ੍ਞਾ’’ਤਿ ਵੁਤ੍ਤਂ ਤਤ੍ਥ ਸਞ੍ਞਾਯ ਏਵ ਲਬ੍ਭਨਤੋ. ਏਤੇਨੇਵ ਹਿ ਤਂਸਮ੍ਪਯੁਤ੍ਤੋ ਸਙ੍ਕਪ੍ਪੋਤਿ ਇਦਮ੍ਪਿ ਸਂਵਣ੍ਣਿਤਨ੍ਤਿ ਦਟ੍ਠਬ੍ਬਂ. ਤੇਨਾਹ ‘‘ਸਞ੍ਞਾਸਙ੍ਕਪ੍ਪਛਨ੍ਦਾ ਏਕਜਵਨਵਾਰੇਪਿ ਨਾਨਾਜਵਨਵਾਰੇਪਿ ਲਬ੍ਭਨ੍ਤੀ’’ਤਿ. ਜਵਨਸਮ੍ਪਯੁਤ੍ਤਸ੍ਸ ਵਿਤਕ੍ਕਸ੍ਸ ਛਨ੍ਦਗਤਿਕਤ੍ਤਾ ਵੁਤ੍ਤਂ ‘‘ਤੀਹਿ ਚਿਤ੍ਤੇਹਿ ਸਮ੍ਪਯੁਤ੍ਤੋ ਸਙ੍ਕਪ੍ਪੋ’’ਤਿ. ਛਨ੍ਦਿਕਤਟ੍ਠੇਨਾਤਿ ਛਨ੍ਦਕਰਣਟ੍ਠੇਨ, ਇਚ੍ਛਿਤਟ੍ਠੇਨਾਤਿ ਅਤ੍ਥੋ. ਅਨੁਡਹਨਟ੍ਠੇਨਾਤਿ ਪਰਿਡਹਨਟ੍ਠੇਨ. ਸਨ੍ਨਿਸ੍ਸਯਡਾਹਰਸਾ ਹਿ ਰਾਗਗ੍ਗਿਆਦਯੋ ‘‘ਰੂਪੇ’’ਤਿ ਪਨ ਤਸ੍ਸ ਆਰਮ੍ਮਣਦਸ੍ਸਨਮੇਤਂ. ਪਰਿਲ਼ਾਹੋਤਿ ਪਰਿਲ਼ਾਹਸੀਸੇਨ ਅਪੇਕ੍ਖਂ ਵਦਤਿ. ਤੇਨਾਹ ‘‘ਪਰਿਲ਼ਾਹੇ ਉਪ੍ਪਨ੍ਨੇ’’ਤਿਆਦਿ. ‘‘ਪਰਿਲ਼ਾਹੋ’’ਤਿ ਦਲ਼੍ਹਜ੍ਝੋਸਾਨਾ ਬਲਵਾਕਾਰਪ੍ਪਤ੍ਤਾ ਵੁਤ੍ਤਾਤਿ ਆਹ ‘‘ਪਰਿਲ਼ਾਹਪਰਿਯੇਸਨਾ ਪਨ ਨਾਨਾਜਵਨਵਾਰੇਯੇਵ ਲਬ੍ਭਨ੍ਤੀ’’ਤਿ. ਤਾਸਂ ਲਦ੍ਧੂਪਨਿਸ੍ਸਯਭਾਵਤੋਤਿ ਦਸ੍ਸੇਤਿ. ਇਮਿਨਾ ਨਯੇਨਾਤਿ ‘‘ਉਪ੍ਪਜ੍ਜਤਿ ਸਞ੍ਞਾਨਾਨਤ੍ਤ’’ਨ੍ਤਿ ਏਤ੍ਥ ਵੁਤ੍ਤਨਯੇਨ ਅਤ੍ਥੋ ਵੇਦਿਤਬ੍ਬੋ. ‘‘ਰੂਪਸਞ੍ਞਾਦਿਨਾਨਾਸਭਾਵਂ ਸਞ੍ਞਂ ਪਟਿਚ੍ਚ ਕਾਮਸਙ੍ਕਪ੍ਪਾਦਿਨਾਨਾਸਭਾਵੋ ਸਙ੍ਕਪ੍ਪੋ ਉਪ੍ਪਜ੍ਜਤੀ’’ਤਿਆਦਿਨਾ ਨਯੇਨ ਵੇਦਿਤਬ੍ਬੋ.

ਸਞ੍ਞਾਨਾਨਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮. ਨੋਪਰਿਯੇਸਨਾਨਾਨਤ੍ਤਸੁਤ੍ਤਵਣ੍ਣਨਾ

੯੨. ਪਟਿਸੇਧਮਤ੍ਤਮੇਵ ਨਾਨਂ, ਸੇਸਂ ਹੇਟ੍ਠਾ ਵੁਤ੍ਤਨਯਮੇਵਾਤਿ ਅਧਿਪ੍ਪਾਯੋ.

ਨੋਪਰਿਯੇਸਨਾਨਾਨਤ੍ਤਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੯. ਬਾਹਿਰਫਸ੍ਸਨਾਨਤ੍ਤਸੁਤ੍ਤਾਦਿਵਣ੍ਣਨਾ

੯੩. ਵੁਤ੍ਤਪ੍ਪਕਾਰੇ ਆਰਮ੍ਮਣੇਤਿ ‘‘ਆਪਾਥੇ ਪਤਿਤ’’ਨ੍ਤਿਆਦਿਨਾ ਹੇਟ੍ਠਾ ਵੁਤ੍ਤਪ੍ਪਕਾਰੇ ਰੂਪਾਰਮ੍ਮਣੇ. ਸਞ੍ਞਾਤਿ ਰੂਪਸਞ੍ਞਾਵ. ਅਰੂਪਧਮ੍ਮੋਪਿ ਸਮਾਨੋ ਯਸ੍ਮਿਂ ਆਰਮ੍ਮਣੇ ਪਵਤ੍ਤਤਿ, ਤਂ ਫੁਸਨ੍ਤੋ ਵਿਯ ਹੋਤੀਤਿ ਵੁਤ੍ਤਂ ‘‘ਆਰਮ੍ਮਣਂ ਫੁਸਮਾਨੋ’’ਤਿ. ਤਣ੍ਹਾਯ ਵਤ੍ਥੁਭੂਤਂਯੇਵ ਰੂਪਾਰਮ੍ਮਣਂ ਲਬ੍ਭਤੀਤਿ ਕਤ੍ਵਾ ‘‘ਰੂਪਲਾਭੋ’’ਤਿ ਅਧਿਪ੍ਪੇਤਨ੍ਤਿ ਆਹ ‘‘ਸਹ ਤਣ੍ਹਾਯ ਆਰਮ੍ਮਣਂ ਰੂਪਲਾਭੋ’’ਤਿ. ਸਬ੍ਬਸਙ੍ਗਾਹਿਕਨਯੋਤਿ ਏਕਸ੍ਮਿਂਯੇਵ ਆਰਮ੍ਮਣੇ ਸਬ੍ਬੇਸਂ ਸਞ੍ਞਾਦੀਨਂ ਧਮ੍ਮਾਨਂ ਉਪ੍ਪਤ੍ਤਿਯਾ ਸਬ੍ਬਸਙ੍ਗਣ੍ਹਨਵਸੇਨ ਦਸ੍ਸਿਤਨਯੋ. ਤੇਨਾਹ ‘‘ਏਕਸ੍ਮਿਂਯੇਵਾ’’ਤਿਆਦਿ. ਸਬ੍ਬਸਙ੍ਗਾਹਿਕਨਯੋਤਿ ਵਾ ਧੁਵਪਰਿਭੋਗਵਸੇਨ ਨਿਬਦ੍ਧਾਰਮ੍ਮਣਨ੍ਤਿ ਵਾ ਆਗਨ੍ਤੁਕਾਰਮ੍ਮਣਨ੍ਤਿ ਵਾ ਵਿਭਾਗਂ ਅਕਤ੍ਵਾ ਸਬ੍ਬਸਙ੍ਗਾਹਿਕਨਯੋ. ਅਪਰੋ ਨਯੋ. ਮਿਸ੍ਸਕੋਤਿ ਆਗਨ੍ਤੁਕਾਰਮ੍ਮਣੇ ਨਿਬਦ੍ਧਾਰਮ੍ਮਣੇ ਚ ਵਿਸਯਤੋ ਨਿਬਦ੍ਧਾਰਮ੍ਮਣੇਨ ਮਿਸ੍ਸਕੋ. ਨਿਬਦ੍ਧਾਰਮ੍ਮਣੇ ਸਤ੍ਤਾਨਂ ਕਿਲੇਸੋ ਮਨ੍ਦੋ ਹੋਤਿ. ਤਥਾ ਹਿ ਸਞ੍ਞਾਸਙ੍ਕਪ੍ਪਫਸ੍ਸਵੇਦਨਾਵ ਦਸ੍ਸਿਤਾ. ਯਂ ਕਿਞ੍ਚਿ ਵਿਯਾਤਿ ਯਂ ਕਿਞ੍ਚਿ ਅਞ੍ਞਮਞ੍ਞਂ ਵਿਯ. ਖੋਭੇਤ੍ਵਾਤਿ ਕੁਤੂਹਲੁਪ੍ਪਾਦਨਵਸੇਨ ਚਿਤ੍ਤਂ ਖੋਭੇਤ੍ਵਾ.

ਉਪਾਸਿਕਾਤਿ ਤਸ੍ਸ ਅਮਚ੍ਚਪੁਤ੍ਤਸ੍ਸ ਭਰਿਯਂ ਸਨ੍ਧਾਯਾਹ. ਤਸ੍ਮਿਨ੍ਤਿ ਆਗਨ੍ਤੁਕਾਰਮ੍ਮਣੇ. ਲਾਭੋ ਨਾਮ ‘‘ਲਬ੍ਭਤੀ’’ਤਿ ਕਤ੍ਵਾ.

ਉਰੁਵਲ੍ਲਿਯਵਾਸੀਤਿ ਉਰੁਵਲ੍ਲਿਯਲੇਣਵਾਸੀ, ਉਰੁਵਲ੍ਲਿਯਵਿਹਾਰਵਾਸੀਤਿ ਵਦਨ੍ਤਿ. ਪਾਲ਼ਿਯਾਤਿ ‘‘ਧਾਤੁਨਾਨਤ੍ਤਂ, ਭਿਕ੍ਖਵੇ, ਪਟਿਚ੍ਚ ਉਪ੍ਪਜ੍ਜਤੀ’’ਤਿਆਦਿਨਯਪਵਤ੍ਤਾਯ ਇਮਿਸ੍ਸਾ ਸੁਤ੍ਤਪਾਲ਼ਿਯਾ. ਪਰਿਵਟ੍ਟੇਤ੍ਵਾਤਿ ਮਜ੍ਝੇ ਗਹਿਤਫਸ੍ਸਵੇਦਨਾਪਰਿਯੋਸਾਨੇ ਠਪਨਵਸੇਨ ਪਾਲ਼ਿਂ ਪਰਿਵਟ੍ਟੇਤ੍ਵਾ. ਵੁਤ੍ਤਪ੍ਪਕਾਰੇਤਿਆਦਿ ਪਰਿਵਤ੍ਤੇਤਬ੍ਬਾਕਾਰਦਸ੍ਸਨਂ. ਤਤ੍ਥ ਵੁਤ੍ਤਪ੍ਪਕਾਰੇਤਿ ਆਪਾਥਗਤਰੂਪਾਰਮ੍ਮਣੇ. ਅਵਿਭੂਤਵਾਰਨ੍ਤਿ ਅਵਿਭੂਤਾਰਮ੍ਮਣਵਾਰਂ. ਅਯਮੇਵ ਵਾ ਪਾਠੋ. ਗਣ੍ਹਨ੍ਤਿ ਕਥੇਨ੍ਤਿ. ਏਕਜਵਨਵਾਰੇਪਿ ਲਬ੍ਭਨ੍ਤਿ ਚਿਰਤਰਨਿਵੇਸਾਭਾਵਾ. ਨਾਨਾਜਵਨਵਾਰੇਯੇਵ ਦਲ਼੍ਹਤਰਨਿਵੇਸਤਾਯ.

੯੪. ਦਸਮਂ ਉਤ੍ਤਾਨਮੇਵ ਨਵਮੇ ਵੁਤ੍ਤਨਯਤ੍ਤਾ. ਪਟਿਸੇਧਮਤ੍ਤਮੇਵ ਹੇਤ੍ਥ ਨਾਨਤ੍ਤਨ੍ਤਿ.

ਬਾਹਿਰਫਸ੍ਸਨਾਨਤ੍ਤਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਨਾਨਤ੍ਤਵਗ੍ਗਵਣ੍ਣਨਾ ਨਿਟ੍ਠਿਤਾ.

੨. ਦੁਤਿਯਵਗ੍ਗੋ

੧. ਸਤ੍ਤਧਾਤੁਸੁਤ੍ਤਵਣ੍ਣਨਾ

੯੫. ਆਭਾਤੀਤਿ ਆਭਾ, ਆਲੋਕਭਾਵੇਨ ਨਿਪ੍ਫਜ੍ਜਤਿ, ਉਪਟ੍ਠਾਤੀਤਿ ਵਾ ਅਤ੍ਥੋ. ਸੋ ਏਵ ਨਿਜ੍ਜੀਵਟ੍ਠੇਨ ਧਾਤੂਤਿ ਆਭਾਧਾਤੁ. ਆਲੋਕਸ੍ਸਾਤਿ ਆਲੋਕਕਸਿਣਸ੍ਸ. ਸੁਟ੍ਠੁ, ਸੋਭਨਂ ਵਾ ਭਾਤੀਤਿ ਸੁਭਂ. ਕਸਿਣਸਹਚਰਣਤੋ ਝਾਨਂ ਸੁਭਂ. ਸੇਸਂ ਵੁਤ੍ਤਨਯਮੇਵ. ਸੁਪਰਿਸੁਦ੍ਧਵਣ੍ਣਂ ਕਸਿਣਂ. ਆਕਾਸਾਨਞ੍ਚਾਦਯੋਪਿ ਸੁਭਾਰਮ੍ਮਣਂ ਏਵਾਤਿ ਕੇਚਿ. ਦੇਸਨਂ ਨਿਟ੍ਠਾਪੇਸੀਤਿ ਦੇਸਨਂ ਉਦ੍ਦੇਸਮਤ੍ਤੇ ਏਵ ਠਪੇਸਿ. ਪਾਲ਼ਿਯਂ ‘‘ਅਨ੍ਧਕਾਰਂ ਪਟਿਚ੍ਚ ਪਞ੍ਞਾਯਤੀ’’ਤਿ ਏਤ੍ਥਾਪਿ ਆਰਮ੍ਮਣਮੇਵ ਗਹਿਤਂ, ਤਥਾ ‘‘ਅਯਂ ਧਾਤੁ ਅਸੁਭਂ ਪਟਿਚ੍ਚ ਪਞ੍ਞਾਯਤੀ’’ਤਿ ਏਤ੍ਥਾਪਿ. ਯਥਾ ਹਿ ਇਧ ਸੁਵਣ੍ਣਂ ਕਸਿਣਂ ਸੁਭਨ੍ਤਿ ਅਧਿਪ੍ਪੇਤਂ, ਏਵਂ ਦੁਬ੍ਬਣ੍ਣਂ ਅਸੁਭਨ੍ਤਿ.

ਅਨ੍ਧਕਾਰਂ ਪਟਿਚ੍ਚਾਤਿ ਅਨ੍ਧਕਾਰਂ ਪਟਿਚ੍ਛਾਦਕਪਚ੍ਚਯਂ ਪਟਿਚ੍ਚ. ਪਞ੍ਞਾਯਤੀਤਿ ਪਾਕਟੋ ਹੋਤਿ. ਤੇਨਾਹ ‘‘ਅਨ੍ਧਕਾਰੋ ਹੀ’’ਤਿਆਦਿ. ਆਲੋਕੋਪਿ, ਅਨ੍ਧਕਾਰੇਨ ਪਰਿਚ੍ਛਿਨ੍ਨੋ ਹੋਤੀਤਿ ਯੋਜਨਾ. ਅਨ੍ਧਕਾਰੋ ਤਾਵ ਆਲੋਕੇਨ ਪਰਿਚ੍ਛਿਨ੍ਨੋ ਹੋਤੁ ‘‘ਯਤ੍ਥ ਆਲੋਕੋ ਨਤ੍ਥਿ, ਤਤ੍ਥ ਅਨ੍ਧਕਾਰੋ’’ਤਿ ਆਲੋਕੋ ਕਥਂ ਅਨ੍ਧਕਾਰੇਨ ਪਰਿਚ੍ਛਿਨ੍ਨੋ ਹੋਤੀਤਿ ਆਹ ‘‘ਅਨ੍ਧਕਾਰੇਨ ਹਿ ਸੋ ਪਾਕਟੋ ਹੋਤੀ’’ਤਿ. ਪਰਿਚ੍ਛੇਦਲੇਖਾਯ ਵਿਯ ਚਿਤ੍ਤਰੂਪਂ ਅਨ੍ਧਕਾਰੇਨ ਹਿ ਪਰਿਤੋ ਪਰਿਚ੍ਛਿਨ੍ਨੋ ਹੁਤ੍ਵਾ ਪਞ੍ਞਾਯਤਿ, ਯਥਾ ਤਂ ਛਾਯਾਯ ਆਤਪੋ. ਏਸੇਵ ਨਯੋਤਿ ਅਸੁਭਸੁਭਾਨਂ ਅਞ੍ਞਮਞ੍ਞਪਰਿਚ੍ਛਿਨ੍ਨਤਂ ਅਤਿਦਿਸਿਤ੍ਵਾ ਤਤ੍ਥ ਅਧਿਪ੍ਪੇਤਮੇਵ ਦਸ੍ਸੇਨ੍ਤੋ ‘‘ਅਸੁਭੇ ਸਤਿ ਸੁਭਂ ਪਞ੍ਞਾਯਤੀ’’ਤਿ ਆਹ. ਏਵਮਾਹਾਤਿ ‘‘ਅਸੁਭਂ ਪਟਿਚ੍ਚ ਸੁਭਂ ਪਞ੍ਞਾਯਤੀ’’ਤਿ ਅਵੋਚ. ‘‘ਰੂਪੀ ਰੂਪਾਨਿ ਪਸ੍ਸਤੀ’’ਤਿਆਦੀਸੁ ਵਿਯ ਉਤ੍ਤਰਪਦਲੋਪੇਨਾਯਂ ਨਿਦ੍ਦੇਸੋਤਿ ਆਹ ‘‘ਰੂਪਂ ਪਟਿਚ੍ਚਾਤਿ ਰੂਪਾਵਚਰਸਮਾਪਤ੍ਤਿਂ ਪਟਿਚ੍ਚਾ’’ਤਿ. ਤਾਯ ਹਿ ਸਤਿ ਅਧਿਗਤਾਯ. ਰੂਪਸਮਤਿਕ੍ਕਮਾ ਵਾ ਹੋਤੀਤਿ ਸਭਾਵਾਰਮ੍ਮਣਾਨਂ ਰੂਪਜ੍ਝਾਨਾਨਂ ਸਮਤਿਕ੍ਕਮਾ ਆਕਾਸਾਨਞ੍ਚਾਯਤਨਸਮਾਪਤ੍ਤਿ ਨਾਮ ਹੋਤੀਤਿ ਅਤ੍ਥੋ. ਏਸੇਵ ਨਯੋਤਿ ਇਮਿਨਾ ‘‘ਆਕਾਸਾਨਞ੍ਚਾਯਤਨਸਮਤਿਕ੍ਕਮਾ ਵਿਞ੍ਞਾਣਞ੍ਚਾਯਤਨਸਮਾਪਤ੍ਤਿ ਨਾਮ ਹੋਤੀ’’ਤਿਆਦਿਨਾ ਦ੍ਵੇਪਿ ਪਕਾਰੇ ਅਤਿਦਿਸਤਿ. ਪਟਿਸਙ੍ਖਾਤਿ ਪਟਿਸਙ੍ਖਾਞਾਣੇਨ. ਅਪ੍ਪਵਤ੍ਤਿਨ੍ਤਿ ਯਥਾਪਰਿਚ੍ਛਿਨ੍ਨਕਾਲਂ ਅਪ੍ਪਵਤ੍ਤਨਂ. ਏਤੇਨ ਖਣਨਿਰੋਧਾਦਿਂ ਪਟਿਕ੍ਖਿਪਤਿ.

ਕਥਂ ਸਮਾਪਤ੍ਤਿ ਪਤ੍ਤਬ੍ਬਾਤਿ ਇਮਾਸੁ ਸਤ੍ਤਸੁ ਧਾਤੂਸੁ ਕਾ ਪਕਾਰਾ ਸਞ੍ਞਾਸਮਾਪਤ੍ਤਿ ਨਾਨਾ ਹੁਤ੍ਵਾ ਸਮਾਪਜ੍ਜਿਤਬ੍ਬਾ. ਤੇਨਾਹ ‘‘ਕੀਦਿਸਾ ਸਮਾਪਤ੍ਤਿਯੋ’’ਤਿਆਦਿ. ਸਞ੍ਞਾਯ ਅਤ੍ਥਿਭਾਵੇਨਾਤਿ ਪਟੁਕਿਚ੍ਚਾਯ ਸਞ੍ਞਾਯ ਅਤ੍ਥਿਭਾਵੇਨ. ਸੁਖੁਮਸਙ੍ਖਾਰਾਨਂ ਤਤ੍ਥ ਸਮਾਪਤ੍ਤਿਯਂ ਅਵਸਿਸ੍ਸਤਾਯ. ਨਿਰੋਧੋਵਾਤਿ ਸਙ੍ਖਾਰਾਨਂ ਨਿਰੋਧੋ ਏਵ.

ਸਤ੍ਤਧਾਤੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਸਨਿਦਾਨਸੁਤ੍ਤਵਣ੍ਣਨਾ

੯੬. ਭਾਵਨਪੁਂਸਕਮੇਤਂ ‘‘ਵਿਸਮਂ ਚਨ੍ਦਿਮਸੂਰਿਯਾ ਪਰਿਵਤ੍ਤਨ੍ਤੀ’’ਤਿਆਦੀਸੁ (ਅ. ਨਿ. ੪.੭੦) ਵਿਯ. ਸਨਿਦਾਨਨ੍ਤਿ ਅਤ੍ਤਨੋ ਫਲਂ ਨਿਦਦਾਤੀਤਿ ਨਿਦਾਨਂ, ਕਾਰਣਨ੍ਤਿ ਆਹ ‘‘ਸਨਿਦਾਨੋ ਸਪ੍ਪਚ੍ਚਯੋ’’ਤਿ. ਕਾਮਪਟਿਸਂਯੁਤ੍ਤੋਤਿ ਕਾਮਰਾਗਸਙ੍ਖਾਤੇਨ ਕਾਮੇਨ ਪਟਿਸਂਯੁਤ੍ਤੋ ਵਾ ਕਾਮਪਟਿਬਦ੍ਧੋ ਵਾ. ਤਕ੍ਕੇਤੀਤਿ ਤਕ੍ਕੋ. ਅਭੂਤਕਾਰਂ ਸਮਾਰੋਪੇਤ੍ਵਾ ਕਪ੍ਪੇਤੀਤਿ ਸਙ੍ਕਪ੍ਪੋ. ਆਰਮ੍ਮਣੇ ਚਿਤ੍ਤਂ ਅਪ੍ਪੇਤੀਤਿ ਅਪ੍ਪਨਾ. ਵਿਸੇਸੇਨ ਅਪ੍ਪੇਤੀਤਿ ਬ੍ਯਪ੍ਪਨਾ. ਆਰਮ੍ਮਣੇ ਚਿਤ੍ਤਂ ਅਭਿਨਿਰੋਪੇਨ੍ਤਂ ਵਿਯ ਪਵਤ੍ਤਤੀਤਿ ਚੇਤਸੋ ਅਭਿਨਿਰੋਪਨਾ. ਮਿਚ੍ਛਾ ਵਿਪਰੀਤੋ ਪਾਪਕੋ ਸਙ੍ਕਪ੍ਪੋਤਿ ਮਿਚ੍ਛਾਸਙ੍ਕਪ੍ਪੋ. ਅਞ੍ਞੇਸੁ ਚ ਕਾਮਪਟਿਸਂਯੁਤ੍ਤੇਸੁ ਵਿਜ੍ਜਮਾਨੇਸੁ ਵਿਤਕ੍ਕੋ ਏਵ ਕਾਮਧਾਤੁਸਦ੍ਦੇਨ ਨਿਰੁਲ਼੍ਹੋ ਦਟ੍ਠਬ੍ਬੋ ਵਿਤਕ੍ਕਸ੍ਸ ਕਾਮਪਸਙ੍ਗਪ੍ਪਤ੍ਤਿਸਾਤਿਸਯਤ੍ਤਾ. ਏਸ ਨਯੋ ਬ੍ਯਾਪਾਦਧਾਤੁਆਦੀਸੁਪਿ. ਸਬ੍ਬੇਪਿ ਅਕੁਸਲਾ ਧਮ੍ਮਾ ਕਾਮਧਾਤੁ ਹੀਨਜ੍ਝਾਸਯੇਹਿ ਕਾਮੇਤਬ੍ਬਧਾਤੁਭਾਵਤੋ.

ਕਿਲੇਸਕਾਮਸ੍ਸ ਆਰਮ੍ਮਣਭਾਵਤ੍ਤਾ ਸਬ੍ਬਾਕੁਸਲਸਂਗਾਹਿਕਾਯ ਕਾਮਧਾਤੁਯਾ ਇਤਰਾ ਦ੍ਵੇ ਸਙ੍ਗਹੇਤ੍ਵਾ ਕਥਨਂ ਸਬ੍ਬਸਙ੍ਗਾਹਿਕਾ. ਤਿਸ੍ਸਨ੍ਨਂ ਧਾਤੂਨਂ ਅਞ੍ਞਮਞ੍ਞਂ ਅਸਙ੍ਕਰਤੋ ਕਥਾ ਅਸਮ੍ਭਿਨ੍ਨਾ. ਇਮਂ ਕਾਮਾਵਚਰਸਞ੍ਞਿਤਂ ਕਾਮਵਿਤਕ੍ਕਸਞ੍ਞਿਤਞ੍ਚ ਕਾਮਧਾਤੁਂ. ਪਟਿਚ੍ਚਾਤਿ ਪਚ੍ਚਯਭੂਤਂ ਲਭਿਤ੍ਵਾ. ਤੀਹਿ ਕਾਰਣੇਹੀਤਿ ਤੀਹਿ ਸਾਰਭੂਤੇਹਿ ਕਾਰਣੇਹਿ.

ਬ੍ਯਾਪਾਦਵਿਤਕ੍ਕੋ ਬ੍ਯਾਪਾਦੋ ਉਤ੍ਤਰਪਦਲੋਪੇਨ, ਸੋ ਏਵ ਨਿਜ੍ਜੀਵਟ੍ਠੇਨ ਸਭਾਵਧਾਰਣਟ੍ਠੇਨ ਧਾਤੂਤਿ ਬ੍ਯਾਪਾਦਧਾਤੁ. ਬ੍ਯਾਪਜ੍ਜਤਿ ਚਿਤ੍ਤਂ ਏਤੇਨਾਤਿ ਬ੍ਯਾਪਾਦੋ, ਦੋਸੋ. ਬ੍ਯਾਪਾਦੋਪਿ ਧਾਤੂਤਿ ਯੋਜਨਾ. ਸਹਜਾਤਪਚ੍ਚਯਾਦਿਵਸੇਨਾਤਿ ਸਹਜਾਤਅਞ੍ਞਮਞ੍ਞਨਿਸ੍ਸਯਸਮ੍ਪਯੁਤ੍ਤਅਤ੍ਥਿਅਵਿਗਤਪਚ੍ਚਯਵਸੇਨ. ਵਿਸੇਸੇਨ ਹਿ ਪਰਸ੍ਸ ਅਤ੍ਤਨੋ ਚ ਦੁਕ੍ਖਾਪਨਂ ਵਿਹਿਂਸਾ, ਸਾ ਏਵ ਧਾਤੁ, ਅਤ੍ਥਤੋ ਰੋਸਨਾ ਪਰੂਪਘਾਤੋ, ਤਥਾ ਪਵਤ੍ਤੋ ਵਾ ਦੋਸਸਹਗਤਚਿਤ੍ਤੁਪ੍ਪਾਦੋ.

ਤਿਣਗਹਨੇ ਅਰਞ੍ਞੇਤਿ ਤਿਣੇਹਿ ਗਹਨਭੂਤੇ ਅਰਞ੍ਞੇ. ਅਨਯਬ੍ਯਸਨਨ੍ਤਿ ਅਪਾਯਬ੍ਯਸਨਂ, ਪਰਿਹਰਣੂਪਾਯਰਹਿਤਂ ਵਿਪਤ੍ਤਿਨ੍ਤਿ ਵਾ ਅਤ੍ਥੋ. ਅਵਡ੍ਢਿਂ ਵਿਨਾਸਨ੍ਤਿ ਅਵਡ੍ਢਿਞ੍ਚੇਵ ਵਿਨਾਸਞ੍ਚਾਤਿ ਵਦਨ੍ਤਿ ਸਬ੍ਬਸੋ ਵਡ੍ਢਿਰਹਿਤਂ. ਸੁਕ੍ਖਤਿਣਦਾਯੋ ਵਿਯ ਆਰਮ੍ਮਣਂ ਕਿਲੇਸਗ੍ਗਿਸਂਵਦ੍ਧਨਟ੍ਠੇਨ. ਤਿਣੁਕ੍ਕਾ ਵਿਯ ਅਕੁਸਲਸਞ੍ਞਾ ਅਨੁਦਹਨਟ੍ਠੇਨ. ਤਿਣਕਟ੍ਠ…ਪੇ… ਸਤ੍ਤਾ ਅਨਯਬ੍ਯਸਨਾਪਤ੍ਤਿਤੋ. ‘‘ਇਮੇ ਸਤ੍ਤਾ’’ਤਿ ਹਿ ਅਯੋਨਿਸੋ ਪਟਿਪਜ੍ਜਮਾਨਾ ਅਧਿਪ੍ਪੇਤਾ. ਤੇਨਾਹ ‘‘ਯਥਾ ਸੁਕ੍ਖਤਿਣਦਾਯੇ’’ਤਿਆਦਿ.

ਸਮਤਾਭਾਵਤੋ ਸਮਤਾਵਿਰੋਧਤੋ ਵਿਸਮਤਾਹੇਤੁਤੋ ਚ ਵਿਸਮਾ ਰਾਗਾਦਯੋਤਿ ਆਹ ‘‘ਰਾਗਵਿਸਮਾਦੀਨਿ ਅਨੁਗਤ’’ਨ੍ਤਿ. ਇਚ੍ਛਿਤਬ੍ਬਾ ਅਵਸ੍ਸਂਭਾਵਿਨਿਭਾਵੇਨ.

ਸਂਕਿਲੇਸਤੋ ਨਿਕ੍ਖਮਨਟ੍ਠੇਨ ਨੇਕ੍ਖਮ੍ਮੋ, ਸੋ ਏਵ ਨਿਜ੍ਜੀਵਟ੍ਠੇਨ ਧਾਤੂਤਿ ਨੇਕ੍ਖਮ੍ਮਧਾਤੁ. ਸ੍ਵਾਯਂ ਨੇਕ੍ਖਮ੍ਮਸਦ੍ਦੋ ਪਬ੍ਬਜ੍ਜਾਦੀਸੁ ਕੁਸਲਵਿਤਕ੍ਕੇ ਚ ਨਿਰੁਲ਼੍ਹੋਤਿ ਆਹ ‘‘ਨੇਕ੍ਖਮ੍ਮਵਿਤਕ੍ਕੋਪਿ ਨੇਕ੍ਖਮ੍ਮਧਾਤੂ’’ਤਿ. ਇਤਰਾਪਿ ਦ੍ਵੇ ਧਾਤੁਯੋਤਿ ਅਬ੍ਯਾਪਾਦਅਵਿਹਿਂਸਾਧਾਤੁਯੋ ਵਦਤਿ. ਵਿਸੁਂ ਦੀਪੇਤਬ੍ਬਾ ਸਰੂਪੇਨ ਆਗਤਤ੍ਤਾ. ਵਿਤਕ੍ਕਾਦਯੋਤਿ ਨੇਕ੍ਖਮ੍ਮਸਙ੍ਕਪ੍ਪਚ੍ਛਨ੍ਦਪਰਿਲ਼ਾਹਪਰਿਯੇਸਨਾ. ਯਥਾਨੁਰੂਪਂ ਅਤ੍ਤਨੋ ਅਤ੍ਤਨੋ ਪਚ੍ਚਯਾਨੁਰੂਪਂ. ਕਥਂ ਪਨੇਤ੍ਥ ਕੁਸਲਧਮ੍ਮੇਸੁ ਪਰਿਲ਼ਾਹੋ ਵੁਤ੍ਤੋਤਿ? ਸਙ੍ਖਾਰਪਰਿਲ਼ਾਹਮਤ੍ਤਂ ਸਨ੍ਧਾਯੇਤਂ ਵੁਤ੍ਤਂ, ਸੋਲ਼ਸਸੁ ਆਕਾਰੇਸੁ ਦੁਕ੍ਖਸਚ੍ਚੇ ਸਨ੍ਤਾਪਟ੍ਠੋ ਵਿਯ ਵੁਤ੍ਤੋ, ਯਸ੍ਸ ਵਿਗਮੇਨ ਅਰਹਤੋ ਸੀਤਿਭਾਵਪ੍ਪਤ੍ਤਿ ਵੁਚ੍ਚਤਿ.

ਸਯਂ ਨ ਬ੍ਯਾਪਜ੍ਜਤਿ, ਤੇਨ ਵਾ ਤਂਸਮਙ੍ਗੀਪੁਗ੍ਗਲੋ ਨ ਕਿਞ੍ਚਿ ਬ੍ਯਾਪਾਦੇਤੀਤਿ ਅਬ੍ਯਾਪਾਦੋ, ਵਿਹਿਂਸਾਯ ਵੁਤ੍ਤਵਿਪਰਿਯਾਯੇਹਿ ਸਾ ਵੇਦਿਤਬ੍ਬਾ. ਹਿਤੇਸਿਭਾਵੇਨ ਮਿਜ੍ਜਤਿ ਸਿਨਿਯ੍ਹਤੀਤਿ ਮਿਤ੍ਤੋ, ਮਿਤ੍ਤਸ੍ਸ ਏਸਾਤਿ ਮੇਤ੍ਤਿ, ਅਬ੍ਯਾਪਾਦੋ. ਮੇਤ੍ਤਾਯਨਾਤਿ ਮੇਤ੍ਤਾਕਾਰਣਂ, ਮੇਤ੍ਤਾਯ ਵਾ ਅਯਨਾ ਪਵਤ੍ਤਨਾ. ਮੇਤ੍ਤਾਯਿਤਤ੍ਤਨ੍ਤਿ ਮੇਤ੍ਤਾਯਿਤਸ੍ਸ ਮੇਤ੍ਤਾਯ ਪਵਤ੍ਤਸ੍ਸ ਭਾਵੋ. ਮੇਤ੍ਤਾਚੇਤੋਵਿਮੁਤ੍ਤੀਤਿ ਮੇਤ੍ਤਾਯਨਵਸੇਨ ਪਵਤ੍ਤੋ ਚਿਤ੍ਤਸਮਾਧਿ. ਸੇਸਂ ਵੁਤ੍ਤਨਯਮੇਵ.

ਸਨਿਦਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਗਿਞ੍ਜਕਾਵਸਥਸੁਤ੍ਤਵਣ੍ਣਨਾ

੯੭. ਇਤੋ ਪਟ੍ਠਾਯਾਤਿ ‘‘ਧਾਤੁਂ, ਭਿਕ੍ਖਵੇ’’ਤਿ ਇਮਸ੍ਮਾ ਤਤਿਯਸੁਤ੍ਤਤੋ ਪਟ੍ਠਾਯ. ਯਾਵ ਕਮ੍ਮਵਗ੍ਗੋ, ਤਾਵ ਨੇਤ੍ਵਾ ਉਪਗਨ੍ਤ੍ਵਾ ਸੇਤਿ ਏਤ੍ਥਾਤਿ ਆਸਯੋ, ਹੀਨਾਦਿਭਾਵੇਨ ਅਧੀਨੋ ਆਸਯੋ ਅਜ੍ਝਾਸਯੋ, ਤਂ ਅਜ੍ਝਾਸਯਂ, ਅਧਿਮੁਤ੍ਤਨ੍ਤਿ ਅਤ੍ਥੋ. ਸਞ੍ਞਾ ਉਪ੍ਪਜ੍ਜਤੀਤਿਆਦੀਸੁ ਹੀਨਾਦਿਭੇਦਂ ਅਜ੍ਝਾਸਯਂ ਪਟਿਚ੍ਚ ਹੀਨਾਦਿਭੇਦਾ ਸਞ੍ਞਾ, ਤਨ੍ਨਿਸ੍ਸਯਦਿਟ੍ਠਿਵਿਕਪ੍ਪਨਾ, ਵਿਤਕ੍ਕੋ ਚ ਉਪ੍ਪਜ੍ਜਤਿ ਸਹਜਾਤਕੋਟਿਯਾ ਉਪਨਿਸ੍ਸਯਕੋਟਿਯਾ ਚ. ਸਤ੍ਥਾਰੇਸੂਤਿ ਤੇਸਂ ਸਤ੍ਥੁਪਟਿਞ੍ਞਤਾਯ ਵੁਤ੍ਤਂ, ਨ ਸਤ੍ਥੁਲਕ੍ਖਣਸਬ੍ਭਾਵਤੋ. ਅਸਮ੍ਮਾਸਮ੍ਬੁਦ੍ਧੇਸੂਤਿ ਆਧਾਰੇ ਵਿਸਯੇ ਚ ਭੁਮ੍ਮਂ ਏਕਤੋ ਕਤ੍ਵਾ ਵੁਤ੍ਤਨ੍ਤਿ ਪਠਮਂ ਤਾਵ ਦਸ੍ਸੇਨ੍ਤੋ ‘‘ਮਯਂ ਸਮ੍ਮਾਸਮ੍ਬੁਦ੍ਧਾ’’ਤਿਆਦਿਂ ਵਤ੍ਵਾ ਇਤਰਂ ਦਸ੍ਸੇਨ੍ਤੋ ‘‘ਤੇਸੁ ਸਮ੍ਮਾਸਮ੍ਬੁਦ੍ਧਾ ਏਤੇ’’ਤਿਆਦਿਮਾਹ. ਤੇਸਂ ‘‘ਮਯਂ ਸਮ੍ਮਾਸਮ੍ਬੁਦ੍ਧਾ’’ਤਿ ਉਪ੍ਪਨ੍ਨਦਿਟ੍ਠਿ ਇਧ ਮੂਲਭਾਵੇਨ ਪੁਚ੍ਛਿਤਾ, ਇਤਰਾ ਅਨੁਸਙ੍ਕਿਤਾਤਿ ਪੁਚ੍ਛਤਿਯੇਵਾਤਿ ਸਾਸਙ੍ਕਂ ਵਦਤਿ.

‘‘ਮਹਤੀ’’ਤਿ ਏਤ੍ਥ ਮਹਾਸਦ੍ਦੋ ‘‘ਮਹਾਜਨੋ’’ਤਿਆਦੀਸੁ ਵਿਯ ਬਹੁਅਤ੍ਥਵਾਚਕੋਤਿ ਦਟ੍ਠਬ੍ਬੋ. ਅਵਿਜ੍ਜਾਪਿ ਹੀਨਹੀਨਤਰਹੀਨਤਮਾਦਿਭੇਦੇਨ ਬਹੁਪਕਾਰਾ. ਤਸ੍ਸਾਤਿ ਦਿਟ੍ਠਿਯਾ. ਕਸ੍ਮਾ ਪਨੇਤ੍ਥ ‘‘ਯਦਿਦਂ ਅਵਿਜ੍ਜਾ ਧਾਤੂ’’ਤਿ ਅਵਿਜ੍ਜਂ ਉਦ੍ਧਰਿਤ੍ਵਾ ‘‘ਹੀਨਂ ਧਾਤੁਂ ਪਟਿਚ੍ਚਾ’’ਤਿ ਅਜ੍ਝਾਸਯਧਾਤੁ ਨਿਦ੍ਦਿਟ੍ਠਾਤਿ? ਨ ਖੋ ਪਨੇਤਂ ਏਵਂ ਦਟ੍ਠਬ੍ਬਂ, ‘‘ਅਞ੍ਞਂ ਉਦ੍ਧਰਿਤ੍ਵਾ ਅਞ੍ਞਂ ਨਿਦ੍ਦਿਟ੍ਠਾ’’ਤਿ, ਯਤੋ ਅਵਿਜ੍ਜਾਸੀਸੇਨ ਅਜ੍ਝਾਸਯਧਾਤੁ ਏਵ ਗਹਿਤਾ. ਅਵਿਜ੍ਜਾਗਹਿਤੋ ਹਿ ਪੁਰਿਸਪੁਗ੍ਗਲੋ ਦਿਟ੍ਠਜ੍ਝਾਸਯੋ ਹੀਨਾਦਿਭੇਦਂ ਅਵਿਜ੍ਜਾਧਾਤੁਂ ਨਿਸ੍ਸਾਯ ਤਤੋ ਸਞ੍ਞਾਦਿਟ੍ਠਿਆਦਿਕੇ ਸਙ੍ਕਪ੍ਪੇਤਿ. ਪਣਿਧਿ ਪਤ੍ਥਨਾ, ਸਾ ਪਨ ਤਥਾ ਤਥਾ ਚਿਤ੍ਤਸ੍ਸ ਠਪਨਵਸੇਨ ਹੋਤੀਤਿ ਆਹ ‘‘ਚਿਤ੍ਤਟ੍ਠਪਨ’’ਨ੍ਤਿ. ਤੇਨਾਹ ‘‘ਸਾ ਪਨੇਸਾ’’ਤਿਆਦਿ. ਏਤੇਤਿ ਹੀਨਪਚ੍ਚਯਾ ਸਞ੍ਞਾਦਿਟ੍ਠਿਵਿਤਕ੍ਕਚੇਤਨਾ ਪਤ੍ਥਨਾ ਪਣਿਧਿਸਙ੍ਖਾਤਾ ਹੀਨਾ ਧਮ੍ਮਾ. ਹੀਨੋ ਨਾਮ ਹੀਨਧਮ੍ਮਸਮਾਯੋਗਤੋ. ਸਬ੍ਬਪਦਾਨੀਤਿ ‘‘ਪਞ੍ਞਪੇਤੀ’’ਤਿਆਦੀਨਿ ਪਦਾਨਿ ਯੋਜੇਤਬ੍ਬਾਨਿ ਹੀਨਸਦ੍ਦੇਨ ਮਜ੍ਝਿਮੁਤ੍ਤਮਟ੍ਠਾਨਨ੍ਤਰਸ੍ਸ ਅਸਮ੍ਭਵਤੋ. ਉਪਪਜ੍ਜਨਂ ‘‘ਉਪਪਤ੍ਤੀ’’ਤਿ ਆਹ ‘‘ਦ੍ਵੇ ਉਪਪਤ੍ਤਿਯੋ ਪਟਿਲਾਭੋ ਚ ਨਿਬ੍ਬਤ੍ਤਿ ਚਾ’’ਤਿ. ਤਤ੍ਥ ਹੀਨਕੁਲਾਦੀਤਿ ਆਦਿ-ਸਦ੍ਦੇਨ ਹੀਨਰੂਪਭੋਗਪਰਿਸਾਦੀਨਂ ਸਙ੍ਗਹੋ. ਹੀਨਤ੍ਤਿਕਵਸੇਨਾਤਿ ਹੀਨਤ੍ਤਿਕੇ ਵੁਤ੍ਤਤ੍ਤਿਕਪਦਵਸੇਨਾਤਿ ਅਧਿਪ੍ਪਾਯੋ. ਚਿਤ੍ਤੁਪ੍ਪਾਦਕ੍ਖਣੇਤਿ ਇਦਂ ਹੀਨਤ੍ਤਿਕਪਰਿਯਾਪਨ੍ਨਾਨਂ ਚਿਤ੍ਤੁਪ੍ਪਾਦਾਨਂ ਵਸੇਨ ਤਤ੍ਥ ਤਤ੍ਥ ਲਦ੍ਧਤ੍ਤਾ ਵੁਤ੍ਤਂ. ਪਞ੍ਚਸੁ ਨੀਚਕੁਲੇਸੂਤਿ ਚਣ੍ਡਾਲਵੇਨਨੇਸਾਦਰਥਕਾਰਪੁਕ੍ਕੁਸਕੁਲੇਸੁ. ਦ੍ਵਾਦਸਅਕੁਸਲਚਿਤ੍ਤੁਪ੍ਪਾਦਾਨਂ ਪਨ ਯੋ ਕੋਚਿ ਪਟਿਲਾਭੋ ਹੀਨੋਤਿ ਯੋਜਨਾ. ਸੇਸਦ੍ਵਯੇਪਿ ਏਸੇਵ ਨਯੋ. ਇਮਸ੍ਮਿਂ ਠਾਨੇਤਿ ‘‘ਯਾਯਂ, ਭਨ੍ਤੇ, ਦਿਟ੍ਠੀ’’ਤਿਆਦਿਨਾ ਆਗਤੇ ਇਮਸ੍ਮਿਂ ਠਾਨੇ. ‘‘ਧਾਤੁਂ, ਭਿਕ੍ਖਵੇ, ਪਟਿਚ੍ਚ ਉਪ੍ਪਜ੍ਜਤੀ’’ਤਿਆਦਿਨਾ ਆਗਤਤ੍ਤਾ ਨਿਬ੍ਬਤ੍ਤਿਯੇਵ ਅਧਿਪ੍ਪੇਤਾ, ਨ ਪਟਿਲਾਭੋ.

ਗਿਞ੍ਜਕਾਵਸਥਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਹੀਨਾਧਿਮੁਤ੍ਤਿਕਸੁਤ੍ਤਵਣ੍ਣਨਾ

੯੮. ਏਕਤੋ ਹੋਨ੍ਤੀਤਿ ਸਮਾਨਚ੍ਛਨ੍ਦਤਾਯ ਅਜ੍ਝਾਸਯਤੋ ਏਕਤੋ ਹੋਨ੍ਤਿ. ਨਿਰਨ੍ਤਰਾ ਹੋਨ੍ਤੀਤਿ ਤਾਯ ਏਵ ਸਮਾਨਚ੍ਛਨ੍ਦਤਾਯ ਚਿਤ੍ਤੇਨ ਨਿਬ੍ਬਿਸੇਸਾ ਹੋਨ੍ਤਿ. ਇਧ ਅਧਿਮੁਤ੍ਤਿ ਨਾਮ ਅਜ੍ਝਾਸਯਧਾਤੂਤਿ ਆਹ ‘‘ਹੀਨਾਧਿਮੁਤ੍ਤਿਕਾਤਿ ਹੀਨਜ੍ਝਾਸਯਾ’’ਤਿ.

ਹੀਨਾਧਿਮੁਤ੍ਤਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਚਙ੍ਕਮਸੁਤ੍ਤਵਣ੍ਣਨਾ

੯੯. ਮਹਾਪਞ੍ਞੇਸੂਤਿ ਵਿਪੁਲਪਞ੍ਞੇਸੁ. ਨਨ੍ਤਿ ਸਾਰਿਪੁਤ੍ਤਤ੍ਥੇਰਂ. ਖਨ੍ਧਨ੍ਤਰਨ੍ਤਿ ਖਨ੍ਧਵਿਭਾਗਂ, ਖਨ੍ਧਾਨਂ ਵਾ ਅਨ੍ਤਰਂ ਵਿਸੇਸੋ ਅਤ੍ਥੀਤਿ ਖਨ੍ਧਨ੍ਤਰੋ. ਏਸ ਨਯੋ ਸੇਸੇਸੁਪਿ. ਪਰਿਕਮ੍ਮਨ੍ਤਿ ਇਦ੍ਧਿਵਿਧਾਧਿਗਮਸ੍ਸ ਪੁਬ੍ਬਭਾਗਪਰਿਕਮ੍ਮਞ੍ਚੇਵ ਉਤ੍ਤਰਪਰਿਕਮ੍ਮਞ੍ਚ. ਆਨਿਸਂਸਨ੍ਤਿ ਇਦ੍ਧਾਨਿਸਂਸਞ੍ਚੇਵ ਆਨਿਸਂਸਞ੍ਚ. ਅਧਿਟ੍ਠਾਨਂ ਵਿਕੁਬ੍ਬਨਨ੍ਤਿ ਅਧਿਟ੍ਠਾਨਵਿਧਾਨਞ੍ਚੇਵ ਵਿਕੁਬ੍ਬਨਵਿਧਾਨਞ੍ਚ. ਵੁਤ੍ਤਨਯੇਨੇਵਾਤਿ ‘‘ਪਥਵਿਂ ਪਤ੍ਥਰਨ੍ਤੋ ਵਿਯਾ’’ਤਿਆਦਿਨਾ.

ਧੁਤਙ੍ਗਪਰਿਹਾਰਨ੍ਤਿ ਧੁਤਙ੍ਗਾਨਂ ਪਰਿਹਰਣਵਿਧਿਂ. ਪਰਿਹਰਣਗ੍ਗਹਣੇਨੇਵ ਸਮਾਦਾਨਂ ਸਿਦ੍ਧਂ ਹੋਤੀਤਿ ਤਂ ਨ ਗਹਿਤਂ. ਆਨਿਸਂਸਨ੍ਤਿ ਤਂਤਂਧੁਤਙ੍ਗਪਰਿਹਰਣੇ ਦਟ੍ਠਬ੍ਬਂ ਆਨਿਸਂਸਮੇਵ. ਸਮੋਧਾਨਨ੍ਤਿ ‘‘ਏਤ੍ਤਕਾ ਪਿਣ੍ਡਪਾਤਪਟਿਸਂਯੁਤ੍ਤਾ, ਏਤ੍ਤਕਾ ਸੇਨਾਸਨਪਟਿਸਂਯੁਤ੍ਤਾ’’ਤਿ ਪਚ੍ਚਯਵਸੇਨ ਅਞ੍ਞਮਞ੍ਞਞ੍ਚ ਅਨ੍ਤੋਗਧਤ੍ਤਾ. ਅਧਿਟ੍ਠਾਨਨ੍ਤਿ ਅਧਿਟ੍ਠਾਨਵਿਧਿਂ. ਭੇਦਨ੍ਤਿ ਉਕ੍ਕਟ੍ਠਾਦਿਭੇਦਞ੍ਚੇਵ ਭਿਨ੍ਨਾਕਾਰਞ੍ਚ.

ਪਰਿਕਮ੍ਮਨ੍ਤਿ ‘‘ਦਿਬ੍ਬਚਕ੍ਖੁ ਏਵਂ ਉਪ੍ਪਾਦੇਤਬ੍ਬਂ, ਏਵਂ ਵਿਸੋਧੇਤਬ੍ਬ’’ਨ੍ਤਿਆਦਿਨਾ ਪਰਿਕਮ੍ਮਵਿਧਾਨਂ. ਆਨਿਸਂਸਨ੍ਤਿ ਪਰੇਸਂ ਅਜ੍ਝਾਸਯਾਨੁਰੂਪਾਯਤਨਾਦਿਆਨਿਸਂਸਪਭੇਦਂ. ਉਪਕ੍ਕਿਲੇਸਨ੍ਤਿ ਸਾਧਾਰਣਂ ਅਸਾਧਾਰਣਂ ਦੁਵਿਧਂ ਉਪਕ੍ਕਿਲੇਸਂ. ਵਿਪਸ੍ਸਨਾਭਾਵਨੁਪਕ੍ਕਿਲੇਸਾ ਹਿ ਦਿਬ੍ਬਚਕ੍ਖੁਸ੍ਸ ਉਪਕ੍ਕਿਲੇਸਾਤਿ ਵੇਦਿਤਬ੍ਬਾ.

ਸਙ੍ਖੇਪਵਿਤ੍ਥਾਰਗਮ੍ਭੀਰੁਤ੍ਤਾਨਵਿਚਿਤ੍ਰਕਥਾਦੀਸੂਤਿ ਸਙ੍ਖੇਪੋ ਵਿਤ੍ਥਾਰੋ ਗਮ੍ਭੀਰਤਾ ਉਤ੍ਤਾਨਤਾ ਵਿਚਿਤ੍ਰਭਾਵੋ ਨੇਯ੍ਯਤ੍ਥਤਾ ਨੀਤਤ੍ਥਤਾਤਿ ਏਵਮਾਦੀਸੁ ਧਮ੍ਮਸ੍ਸ ਕਥੇਤਬ੍ਬਪ੍ਪਕਾਰੇਸੁ ਤਂ ਤਂ ਕਥੇਤਬ੍ਬਾਕਾਰਂ.

ਇਤਿ-ਸਦ੍ਦੋ ਆਦਿਅਤ੍ਥੋ, ਪਕਾਰਤ੍ਥੋ ਵਾ. ਤੇਨ –

‘‘ਆਦਿਮ੍ਹਿ ਸੀਲਂ ਦੇਸੇਯ੍ਯ, (ਦੀ. ਨਿ. ਅਟ੍ਠ. ੧.੧੯੦; ਮ. ਨਿ. ਅਟ੍ਠ. ੧.੨੯੧)

ਮਜ੍ਝੇ ਚਿਤ੍ਤਂ ਵਿਨਿਦ੍ਦਿਸੇ;

ਅਨ੍ਤੇ ਪਞ੍ਞਾ ਕਥੇਤਬ੍ਬਾ,

ਏਸੋ ਧਮ੍ਮਕਥਾਵਿਧੋ’’ਤਿ. –

ਏਵਂ ਕਥੇਤਬ੍ਬਾਕਾਰਂ ਸਙ੍ਗਣ੍ਹਾਤਿ.

‘‘ਸਿਥਿਲਂ ਧਨਿਤਞ੍ਚ ਦੀਘਰਸ੍ਸਂ, ਗਰੁਕਂ ਲਹੁਕਞ੍ਚ ਨਿਗ੍ਗਹੀਤਂ;

ਸਮ੍ਬਨ੍ਧਂ ਵਵਤ੍ਥਿਤਂ ਵਿਮੁਤ੍ਤਂ, ਦਸਧਾ ਬ੍ਯਞ੍ਜਨਬੁਦ੍ਧਿਯਾ ਪਭੇਦੋ’’ਤਿ. (ਦੀ. ਨਿ. ੧.੧੯੦; ਮ. ਨਿ. ਅਟ੍ਠ. ੧.੨੯੧; ਪਰਿ. ੪੮੫) –

ਏਵਂ ਵੁਤ੍ਤਂ ਦਸਵਿਧਂ ਬ੍ਯਞ੍ਜਨਬੁਦ੍ਧਿਂ. ਅਟ੍ਠੁਪ੍ਪਤ੍ਤਿਨ੍ਤਿ ਤਸ੍ਸ ਤਸ੍ਸ ਸੁਤ੍ਤਸ੍ਸ ਜਾਤਕਸ੍ਸ ਚ ਅਟ੍ਠੁਪ੍ਪਤ੍ਤਿਂ. ਅਨੁਸਨ੍ਧਿਨ੍ਤਿ ਪਚ੍ਛਾਨੁਸਨ੍ਧਿਆਦਿਅਨੁਸਨ੍ਧਿਂ. ਪੁਬ੍ਬਾਪਰਨ੍ਤਿ ਸਮ੍ਬਨ੍ਧਂ. ਇਦਂ ਪਦਂ ਏਵਂ ਵਤ੍ਤਬ੍ਬਂ, ਇਦਂ ਪੁਬ੍ਬਾਪਰਂ ਏਵਂ ਗਹੇਤਬ੍ਬਨ੍ਤਿ.

ਕੁਲਸਙ੍ਗਣ੍ਹਨਪਰਿਹਾਰਨ੍ਤਿ ਲਾਭੁਪ੍ਪਾਦਨਤ੍ਥਂ ਕੁਲਾਨਂ ਸਙ੍ਗਣ੍ਹਨਵਿਧਿਨੋ ਪਰਿਹਰਣਂ ਤਨ੍ਨਿਯਮਿਤਂ ਏਕਨ੍ਤਿਕਂ ਕੁਲਸਙ੍ਗਹਣਵਿਧਿਂ.

ਚਙ੍ਕਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬. ਸਗਾਥਾਸੁਤ੍ਤਵਣ੍ਣਨਾ

੧੦੦. ‘‘ਧਾਤੁਸੋ ਸਂਸਨ੍ਦਨ੍ਤੀ’’ਤਿ ਇਦਂ ਅਜ੍ਝਾਸਯਤੋ ਸਰਿਕ੍ਖਤਾਦਸ੍ਸਨਂ, ਨ ਕਾਯੇਨ ਮਿਸ੍ਸੀਭਾਵਦਸ੍ਸਨਨ੍ਤਿ ਆਹ ‘‘ਸਮੁਦ੍ਦਨ੍ਤਰੇ’’ਤਿਆਦਿ. ਨਿਰਨ੍ਤਰੋਤਿ ਨਿਬ੍ਬਿਸੇਸੋ. ਸਂਸਗ੍ਗਾਤਿ ਪਞ੍ਚਵਿਧਸਂਸਗ੍ਗਹੇਤੁ. ਸਂਸਗ੍ਗਗਹਣੇਨ ਚੇਤ੍ਥ ਸਂਸਗ੍ਗਵਤ੍ਥੁਕਾ ਤਣ੍ਹਾ ਗਹਿਤਾ. ਤੇਨਾਹ ‘‘ਦਸ੍ਸਨ…ਪੇ… ਸ੍ਨੇਹੇਨਾ’’ਤਿ.

ਵਨਤਿ ਭਜਤਿ ਸਜ੍ਜਤਿ ਤੇਨਾਤਿ ਵਨਂ, ਵਨਥੋਤਿ ਚ ਕਿਲੇਸੋ ਵੁਚ੍ਚਤੀਤਿ ਆਹ ‘‘ਵਨਥੋ ਜਾਤੋਤਿ ਕਿਲੇਸਵਨਂ ਜਾਤ’’ਨ੍ਤਿ. ਇਤਰੇ ਸਂਸਗ੍ਗਮੂਲਕਾਤਿ ਤਮੇਵ ਪਟਿਕ੍ਖਿਪਨ੍ਤੋ ਆਹ ‘‘ਅਦਸ੍ਸਨੇਨਾ’’ਤਿ. ਸਾਧੁਜੀਵੀਤਿ ਸਾਧੁ ਸੁਟ੍ਠੁ ਜੀਵੀ, ਤਂਜੀਵਨਸੀਲੋ. ਤੇਨਾਹ ‘‘ਪਰਿਸੁਦ੍ਧਜੀਵਿਤਂ ਜੀਵਮਾਨੋ’’ਤਿ.

ਸਗਾਥਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੭. ਅਸ੍ਸਦ੍ਧਸਂਸਨ੍ਦਨਸੁਤ੍ਤਵਣ੍ਣਨਾ

੧੦੧. ਨਿਰੋਜਾਤਿ ਸਦ੍ਧਾਸ੍ਨੇਹਾਭਾਵੇਨ ਨਿਸ੍ਨੇਹਾ. ਤਤੋ ਏਵ ਅਰਸਭਾਵੇਨ ਨਿਰਸਾ. ਏਕਸਦਿਸਾਤਿ ਸਮਸਮਾ ਨਿਬ੍ਬਿਸੇਸਾ. ਤੇਨਾਹ ‘‘ਨਿਰਨ੍ਤਰਾ’’ਤਿ. ਅਲਜ੍ਜਿਤਾਯ ਏਕਸੀਮਕਤਾ ਭਿਨ੍ਨਮਰਿਯਾਦਾ. ਸਦ੍ਧਾ ਤੇਸਂ ਅਤ੍ਥੀਤਿ ਸਦ੍ਧਾ. ਤਨ੍ਤਿਪਾਲਕਾਤਿ ਸਦ੍ਧਮ੍ਮਤਨ੍ਤਿਯਾ ਪਾਲਕਾ. ਵਂਸਾਨੁਰਕ੍ਖਕਾਤਿ ਅਰਿਯਵਂਸਸ੍ਸ ਅਨੁਰਕ੍ਖਕਾ. ਆਰਦ੍ਧਵੀਰਿਯਾਤਿ ਪਗ੍ਗਹਿਤਵੀਰਿਯਾ. ਯਸ੍ਮਾ ਤਾਦਿਸਾਨਂ ਵੀਰਿਯਂ ਪਰਿਪੁਣ੍ਣਂ ਨਾਮ ਹੋਤਿ ਕਿਚ੍ਚਸਿਦ੍ਧਿਯਾ, ਤਸ੍ਮਾ ਵੁਤ੍ਤਂ ‘‘ਪਰਿਪੁਣ੍ਣਪਰਕ੍ਕਮਾ’’ਤਿ. ਸਬ੍ਬਕਿਚ੍ਚਪਰਿਗ੍ਗਾਹਿਕਾਯਾਤਿ ਚਤੁਨ੍ਨਂ ਸਤਿਪਟ੍ਠਾਨਾਨਂ ਭਾਵਨਾਕਿਚ੍ਚਪਰਿਗ੍ਗਾਹਿਕਾਯ.

ਅਸ੍ਸਦ੍ਧਸਂਸਨ੍ਦਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੮-੧੨. ਅਸ੍ਸਦ੍ਧਮੂਲਕਸੁਤ੍ਤਾਦਿਵਣ੍ਣਨਾ

੧੦੨-੧੦੬. ਅਟ੍ਠਮਾਦੀਨੀਤਿ ਅਟ੍ਠਮਂ ਨਵਮਂ ਦਸਮਂ ਏਕਾਦਸਮਂ ਦ੍ਵਾਦਸਮਨ੍ਤਿ ਇਮਾਨਿ ਪਞ੍ਚ ਸੁਤ੍ਤਾਨੀਤਿ ਏਕੇ. ਅਪਰੇ ਪਨ ਨਵ ਸੁਤ੍ਤਾਨੀਤਿ ਇਚ੍ਛਨ੍ਤਿ. ਸ੍ਵਾਯਮਤ੍ਥੋ ਅਟ੍ਠਕਥਾਯਂ ਵੁਤ੍ਤੋਯੇਵ. ਪਾਲ਼ਿਯਞ੍ਚ ਕੇਸੁਚਿ ਪੋਤ੍ਥਕੇਸੁ ਲਿਖੀਯਤਿ.

ਅਸ੍ਸਦ੍ਧਮੂਲਕਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਦੁਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.

੩. ਕਮ੍ਮਪਥਵਗ੍ਗੋ

੧-੨. ਅਸਮਾਹਿਤਸੁਤ੍ਤਾਦਿਵਣ੍ਣਨਾ

੧੦੭-੧੦੮. ਇਤੋ ਪਰੇਸੂਤਿ ਇਤੋ ਦੁਤਿਯਵਗ੍ਗਤੋ ਪਰੇਸੁ ਸੁਤ੍ਤੇਸੁ. ਪਠਮਨ੍ਤਿ ਪਠਮਵਗ੍ਗੇ ਪਠਮਂ. ਕਸ੍ਮਾ ਪਨੇਤ੍ਥ ਏਵਂ ਦੇਸਨਾ ਪਵਤ੍ਤਾਤਿ ਆਹ ‘‘ਏਵਂ ਵੁਚ੍ਚਮਾਨੇ’’ਤਿਆਦਿ.

ਅਸਮਾਹਿਤਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੩-੫. ਪਞ੍ਚਸਿਕ੍ਖਾਪਦਸੁਤ੍ਤਾਦਿਵਣ੍ਣਨਾ

੧੦੯-੧੧੧. ਸੁਰਾਮੇਰਯਸਙ੍ਖਾਤਨ੍ਤਿ ਪਿਟ੍ਠਸੁਰਾਦਿਸੁਰਾਸਙ੍ਖਾਤਂ ਪੁਪ੍ਫਾਸਵਾਦਿਮੇਰਯਸਙ੍ਖਾਤਞ੍ਚ. ਮਜ੍ਜਨਟ੍ਠੇਨ ਮਜ੍ਜਂ. ਸੁਰਾਮੇਰਯਮਜ੍ਜਪ੍ਪਮਾਦੋਤਿ ਵੁਚ੍ਚਤਿ ‘‘ਮਜ੍ਜਤਿ ਤੇਨਾ’’ਤਿ ਕਤ੍ਵਾ. ਤਸ੍ਮਿਂ ਤਿਟ੍ਠਨ੍ਤੀਤਿ ਤਸ੍ਮਿਂ ਪਮਾਦੇ ਪਮਜ੍ਜਨਵਸੇਨ ਤਿਟ੍ਠਨ੍ਤੀਤਿ ਅਤ੍ਥੋ. ਸੇਸਂ ਤਤਿਯਚਤੁਤ੍ਥੇਸੁ ਸੁਵਿਞ੍ਞੇਯ੍ਯਮੇਵਾਤਿ.

ਪਞ੍ਚਮੇ ਤਾਨਿ ਪਦਾਨਿ ਸਂਵਣ੍ਣੇਤੁਂ ‘‘ਪਞ੍ਚਮੇ’’ਤਿਆਦਿ ਆਰਦ੍ਧਂ. ਤਤ੍ਥ ਪਾਣੋ ਨਾਮ ਵੋਹਾਰਤੋ ਸਤ੍ਤੋ, ਪਰਮਤ੍ਥਤੋ ਜੀਵਿਤਿਨ੍ਦ੍ਰਿਯਂ, ਤਂ ਪਾਣਂ ਅਤਿਪਾਤੇਨ੍ਤਿ ਅਤਿਚ੍ਚ ਅਨ੍ਤਰੇਯੇਵ, ਅਤਿਕ੍ਕਮ੍ਮ ਵਾ ਸਤ੍ਥਾਦੀਹਿ ਅਭਿਭਵਿਤ੍ਵਾ ਪਾਤੇਨ੍ਤਿ ਸਣਿਕਂ ਪਤਿਤੁਂ ਅਦਤ੍ਵਾ ਸੀਘਂ ਪਾਤੇਨ੍ਤੀਤਿ ਅਤ੍ਥੋ. ਕਾਯੇਨ ਵਾਚਾਯ ਵਾ ਅਦਿਨ੍ਨਂ ਪਰਸਨ੍ਤਕਂ. ਆਦਿਯਨ੍ਤੀਤਿ ਗਣ੍ਹਨ੍ਤਿ. ਮਿਚ੍ਛਾਤਿ ਨ ਸਮ੍ਮਾ, ਗਾਰਯ੍ਹਵਸੇਨ. ਮੁਸਾਤਿ ਅਤਥਂ ਵਤ੍ਥੁ. ਵਦਨ੍ਤੀਤਿ ਵਿਸਂਵਾਦਨਵਸੇਨ ਵਦਨ੍ਤਿ. ਪਿਯਸੁਞ੍ਞਕਰਣਤੋ ਪਿਸੁਣਾ, ਪਿਸਤਿ ਵਾ ਪਰੇ ਸਤ੍ਤੇ, ਹਿਂਸਤੀਤਿ ਅਤ੍ਥੋ. ਮਮ੍ਮਚ੍ਛੇਦਿਕਾਤਿ ਏਤੇਨ ਪਰਸ੍ਸ ਮਮ੍ਮਚ੍ਛੇਦਵਸੇਨ ਏਕਨ੍ਤਫਰੁਸਸਞ੍ਚੇਤਨਾ ਫਰੁਸਵਾਚਾ ਨਾਮਾਤਿ ਦਸ੍ਸੇਤਿ. ਅਭਿਜ੍ਝਾਸਦ੍ਦੋ ਲੁਬ੍ਭਨੇ ਨਿਰੁਲ਼੍ਹੋਤਿ ਆਹ ‘‘ਪਰਭਣ੍ਡੇ ਲੁਬ੍ਭਨਸੀਲਾਤਿ ਅਤ੍ਥੋ’’ਤਿ. ਬ੍ਯਾਪਨ੍ਨਨ੍ਤਿ ਦੋਸਵਸੇਨ ਵਿਪਨ੍ਨਂ. ਪਕਤਿਵਿਜਹਨੇਨ ਪੂਤਿਭੂਤਂ. ਸਾਧੂਹਿ ਗਰਹਿਤਬ੍ਬਤਂ ਪਤ੍ਤਾ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਨਯਪ੍ਪਵਤ੍ਤਾ ਨਤ੍ਥਿਕਾਹੇਤੁਕਅਕਿਰਿਯਦਿਟ੍ਠਿ ਕਮ੍ਮਪਥਪਰਿਯਾਪਨ੍ਨਾ ਨਾਮ. ਮਿਚ੍ਛਤ੍ਤਪਰਿਯਾਪਨ੍ਨਾ ਸਬ੍ਬਾਪਿ ਲੋਕੁਤ੍ਤਰਮਗ੍ਗਪਟਿਪਕ੍ਖਾ ਵਿਪਰੀਤਦਿਟ੍ਠਿ.

ਤੇਸਨ੍ਤਿ ਕਮ੍ਮਪਥਾਨਂ. ਵੋਹਾਰਤੋਤਿ ਇਨ੍ਦ੍ਰਿਯਬਦ੍ਧਂ ਉਪਾਦਾਯ ਪਞ੍ਞਤ੍ਤਿਮਤ੍ਤਤੋ. ਤਿਰਚ੍ਛਾਨਗਤਾਦੀਸੂਤਿ ਆਦਿ-ਸਦ੍ਦੇਨ ਪੇਤਾਨਂ ਸਙ੍ਗਹੋ. ਪਯੋਗਵਤ੍ਥੁਮਹਨ੍ਤਤਾਦੀਹਿ ਮਹਾਸਾਵਜ੍ਜਤਾ ਤੇਹਿ ਪਚ੍ਚਯੇਹਿ ਉਪ੍ਪਜ੍ਜਮਾਨਾਯ ਚੇਤਨਾਯ ਬਲਵਭਾਵਤੋ. ਯਥਾਵੁਤ੍ਤਪਚ੍ਚਯਵਿਪਰਿਯਾਯੇਪਿ ਤਂਤਂਪਚ੍ਚਯੇਹਿ ਚੇਤਨਾਯ ਬਲਵਭਾਵਵਸੇਨ ਅਪ੍ਪਸਾਵਜ੍ਜਮਹਾਸਾਵਜ੍ਜਤਾ ਵਾ ਵੇਦਿਤਬ੍ਬਾ. ਇਦ੍ਧਿਮਯੋਤਿ ਕਮ੍ਮਵਿਪਾਕਿਦ੍ਧਿਮਯੋ ਦਾਠਾਕੋਟਨਾਦੀਨਂ ਵਿਯ.

ਮੇਥੁਨਸਮਾਚਾਰੇਸੂਤਿ ਸਦਾਰਪਰਦਾਰਗਮਨਵਸੇਨ ਦੁਵਿਧੇਸੁ ਮੇਥੁਨਸਮਾਚਾਰੇਸੁ. ਤੇਪਿ ਹੀਨਾਧਿਮੁਤ੍ਤਿਕੇਹਿ ਕਤ੍ਤਬ੍ਬਤੋ ਕਾਮਾ ਨਾਮ. ਮਿਚ੍ਛਾਚਾਰੋਤਿ ਗਾਰਯ੍ਹਾਚਾਰੋ. ਗਾਰਯ੍ਹਤਾ ਚਸ੍ਸ ਏਕਨ੍ਤਨਿਹੀਨਤਾਯਾਤਿ ਆਹ ‘‘ਏਕਨ੍ਤਨਿਨ੍ਦਿਤੋ ਲਾਮਕਾਚਾਰੋ’’ਤਿ ਅਸਦ੍ਧਮ੍ਮਾਧਿਪ੍ਪਾਯੇਨਾਤਿ ਅਸਦ੍ਧਮ੍ਮਸੇਵਨਾਧਿਪ੍ਪਾਯੇਨ. ਗੋਤ੍ਤਰਕ੍ਖਿਤਾਤਿ ਸਗੋਤ੍ਤੇਹਿ ਰਕ੍ਖਿਤਾ. ਧਮ੍ਮਰਕ੍ਖਿਤਾਤਿ ਸਹਧਮ੍ਮੇਹਿ ਰਕ੍ਖਿਤਾ. ਸਸ੍ਸਾਮਿਕਾ ਨਾਮ ਸਾਰਕ੍ਖਾ. ਯਸ੍ਸਾ ਗਮਨੇ ਦਣ੍ਡੋ ਠਪਿਤੋ, ਸਾ ਸਪਰਿਦਣ੍ਡਾ. ਭਰਿਯਭਾਵਾਯ ਧਨੇਨ ਕੀਤਾ ਧਨਕ੍ਕੀਤਾ. ਛਨ੍ਦੇਨ ਵਸਤੀਤਿ ਛਨ੍ਦਵਾਸਿਨੀ. ਭੋਗਤ੍ਥਂ ਵਸਤੀਤਿ ਭੋਗਵਾਸਿਨੀ. ਪਟਤ੍ਥਂ ਵਸਤੀਤਿ ਪਟਵਾਸਿਨੀ. ਉਦਕਪਤ੍ਤਂ ਆਮਸਿਤ੍ਵਾ ਗਹਿਤਾ ਓਦਪਤ੍ਤਕਿਨੀ. ਚੁਮ੍ਬਟਂ ਅਪਨੇਤ੍ਵਾ ਗਹਿਤਾ ਓਭਟਚੁਮ੍ਬਟਾ. ਕਰਮਰਾਨੀਤਾ ਧਜਾਹਟਾ. ਤਙ੍ਖਣਿਕਂ ਗਹਿਤਾ ਮੁਹੁਤ੍ਤਿਕਾ. ਅਭਿਭਵਿਤ੍ਵਾ ਵੀਤਿਕ੍ਕਮੋ ਮਿਚ੍ਛਾਚਾਰੋ ਮਹਾਸਾਵਜ੍ਜੋ, ਨ ਤਥਾ ਦ੍ਵਿਨ੍ਨਂ ਸਮਾਨਚ੍ਛਨ੍ਦਤਾਯ. ਅਭਿਭਵਿਤ੍ਵਾ ਵੀਤਿਕ੍ਕਮਨੇ ਸਤਿਪਿ ਮਗ੍ਗੇਨਮਗ੍ਗਪਟਿਪਤ੍ਤਿਅਧਿਵਾਸਨੇ ਪੁਰਿਮੁਪ੍ਪਨ੍ਨਸੇਵਨਾਭਿਸਨ੍ਧਿਪਯੋਗਾਭਾਵਤੋ ਮਿਚ੍ਛਾਚਾਰੋ ਨ ਹੋਤਿ ਅਭਿਭੁਯ੍ਯਮਾਨਸ੍ਸਾਤਿ ਵਦਨ੍ਤਿ. ਸੇਵਨਾਚਿਤ੍ਤੇ ਸਤਿ ਪਯੋਗਾਭਾਵੋ ਅਪ੍ਪਮਾਣਂ ਯੇਭੁਯ੍ਯੇਨ ਇਤ੍ਥਿਯਾ ਸੇਵਨਾਪਯੋਗਸ੍ਸ ਅਭਾਵਤੋ. ਤਥਾ ਸਤਿ ਪੁਰੇਤਰਂ ਸੇਵਨਾਚਿਤ੍ਤਸ੍ਸ ਉਪਟ੍ਠਾਨੇਪਿ ਤਸ੍ਸਾ ਮਿਚ੍ਛਾਚਾਰੋ ਨ ਸਿਯਾ, ਤਥਾ ਪੁਰਿਸਸ੍ਸਪਿ ਸੇਵਨਾਪਯੋਗਾਭਾਵੇ. ਤਸ੍ਮਾ ਅਤ੍ਤਨੋ ਰੁਚਿਯਾ ਪਵਤ੍ਤਿਤਸ੍ਸ ਵਸੇਨ ਤਯੋ, ਬਲਕ੍ਕਾਰੇਨ ਪਵਤ੍ਤਿਤਸ੍ਸ ਵਸੇਨ ਤਯੋਤਿ ਸਬ੍ਬੇਪਿ ਅਗ੍ਗਹਿਤਗ੍ਗਹਣੇਨ ‘‘ਚਤ੍ਤਾਰੋ ਸਮ੍ਭਾਰਾ’’ਤਿ ਵੁਤ੍ਤਂ.

ਆਸੇਵਨਮਨ੍ਦਤਾਯਾਤਿ ਯਾਯ ਅਕੁਸਲਚੇਤਨਾਯ ਸਮ੍ਫਂ ਪਲਪਤਿ, ਤਸ੍ਸਾ ਇਤ੍ਤਰਕਾਲਤਾਯ ਪਵਤ੍ਤਿਯਾ ਅਨਾਸੇਵਨਾਤਿ ਪਰਿਦੁਬ੍ਬਲਾ ਹੋਤਿ ਚੇਤਨਾ.

ਉਪਸਗ੍ਗਵਸੇਨ ਅਤ੍ਥਵਿਸੇਸਵਾਚਿਨੋ ਧਾਤੁਸਦ੍ਦਾਤਿ ਅਭਿਜ੍ਝਾਯਤੀਤਿ ਪਦਸ੍ਸ ਪਰਭਣ੍ਡਾਭਿਮੁਖੀਤਿਆਦਿਅਤ੍ਥੋ ਵੁਤ੍ਤੋ. ਤਨ੍ਨਿਨ੍ਨਤਾਯਾਤਿ ਤਸ੍ਮਿਂ ਪਰਭਣ੍ਡੇ ਲੁਬ੍ਭਨਵਸੇਨ ਨਿਨ੍ਨਤਾਯ. ਅਭਿਪੁਬ੍ਬੋ ਝੇ-ਸਦ੍ਦੋ ਲੁਬ੍ਭਨੇ ਨਿਰੁਲ਼੍ਹੋਤਿ ਦਟ੍ਠਬ੍ਬੋ. ਯਸ੍ਸ ਭਣ੍ਡਂ ਅਭਿਜ੍ਝਾਯਤਿ, ਤਸ੍ਸ ਅਪ੍ਪਗੁਣਤਾਯ ਅਪ੍ਪਸਾਵਜ੍ਜਾ, ਮਹਾਗੁਣਤਾਯ ਮਹਾਸਾਵਜ੍ਜਾਤਿਆਦਿਨਾ ਨਯੇਨ ਤਤ੍ਥ ਅਪ੍ਪਸਾਵਜ੍ਜਮਹਾਸਾਵਜ੍ਜਵਿਭਾਗੋ ਵੇਦਿਤਬ੍ਬੋ. ਤੇਨਾਹ ‘‘ਅਦਿਨ੍ਨਾਦਾਨਂ ਵਿਯਾ’’ਤਿਆਦਿ. ਅਤ੍ਤਨੋ ਪਰਿਣਾਮਨਂ ਚਿਤ੍ਤੇਨੇਵਾਤਿ ਦਟ੍ਠਬ੍ਬਂ.

ਹਿਤਸੁਖਂ ਬ੍ਯਾਪਾਦਯਤੀਤਿ ਯੋ ਨਂ ਉਪ੍ਪਾਦੇਤਿ, ਯਸ੍ਸ ਉਪ੍ਪਾਦੇਤਿ, ਤਸ੍ਸ ਸਤਿ ਸਮਵਾਯੇ ਹਿਤਸੁਖਂ ਵਿਨਾਸੇਤਿ. ਅਹੋ ਵਤਾਤਿ ਇਮਿਨਾ ਯਥਾ ਅਭਿਜ੍ਝਾਨੇ ਵਤ੍ਥੁਨੋ ਏਕਨ੍ਤਤੋ ਅਤ੍ਤਨੋ ਪਰਿਣਾਮਨਂ ਦਸ੍ਸਿਤਂ, ਏਵਮਿਧਾਪਿ ਵਤ੍ਥੁਨੋ ‘‘ਅਹੋ ਵਤਾ’’ਤਿ ਇਮਿਨਾ ਪਰਸ੍ਸ ਵਿਨਾਸਚਿਨ੍ਤਾਯ ਏਕਨ੍ਤਤੋ ਨਿਯਮਿਤਭਾਵਂ ਦਸ੍ਸੇਤਿ. ਏਵਞ੍ਹਿ ਨੇਸਂ ਦਾਰੁਣਪ੍ਪਵਤ੍ਤਿਯਾ ਕਮ੍ਮਪਥਪ੍ਪਵਤ੍ਤਿ.

ਯਥਾਭੁਚ੍ਚਗਹਣਾਭਾਵੇਨਾਤਿ ਯਥਾਤਚ੍ਛਗਹਣਸ੍ਸ ਅਭਾਵੇਨ ਅਨਿਚ੍ਚਾਦਿਸਭਾਵਸ੍ਸ ਨਿਚ੍ਚਾਦਿਤੋ ਗਹਣੇਨ. ਮਿਚ੍ਛਾ ਪਸ੍ਸਤੀਤਿ ਵਿਤਥਂ ਪਸ੍ਸਤਿ. ਸਮ੍ਫਪ੍ਪਲਾਪੋ ਵਿਯਾਤਿ ਇਮਿਨਾ ਆਸੇਵਨਸ੍ਸ ਅਪ੍ਪਮਹਨ੍ਤਤਾਹਿ ਮਿਚ੍ਛਾਦਿਟ੍ਠਿਯਾ ਅਪ੍ਪਸਾਵਜ੍ਜਮਹਾਸਾਵਜ੍ਜਤਾ. ਵਤ੍ਥੁਨੋਤਿ ਗਹਿਤਵਤ੍ਥੁਨੋ. ਗਹਿਤਾਕਾਰਵਿਪਰੀਤਤਾਤਿ ਮਿਚ੍ਛਾਦਿਟ੍ਠਿਯਾ ਗਹਿਤਾਕਾਰਸ੍ਸ ਵਿਪਰੀਤਤਾ. ਤਥਾਭਾਵੇਨਾਤਿ ਅਤ੍ਤਨੋ ਗਹਿਤਾਕਾਰੇਨੇਵ ਤਸ੍ਸਾ ਦਿਟ੍ਠਿਯਾ, ਗਹਿਤਸ੍ਸ ਵਾ ਵਤ੍ਥੁਨੋ ਉਪਟ੍ਠਾਨਂ ‘‘ਏਵਮੇਤਂ, ਨ ਇਤੋ ਅਞ੍ਞਥਾ’’ਤਿ.

ਧਮ੍ਮਤੋਤਿ ਸਭਾਵਤੋ. ਕੋਟ੍ਠਾਸਤੋਤਿ ਚਿਤ੍ਤਙ੍ਗਕੋਟ੍ਠਾਸਤੋ, ਯਂਕੋਟ੍ਠਾਸਾ ਹੋਨ੍ਤਿ, ਤਤੋਤਿ ਅਤ੍ਥੋ. ਚੇਤਨਾਧਮ੍ਮਾਵਾਤਿ ਚੇਤਨਾਸਭਾਵਾ ਏਵ. ਪਟਿਪਾਟਿਯਾ ਸਤ੍ਤਾਤਿ ਏਤ੍ਥ ਨਨੁ ਚੇਤਨਾ ਅਭਿਧਮ੍ਮੇ ਕਮ੍ਮਪਥੇਸੁ ਨ ਵੁਤ੍ਤਾਤਿ ਪਟਿਪਾਟਿਯਾ ਸਤ੍ਤਨ੍ਨਂ ਕਮ੍ਮਪਥਭਾਵੋ ਨ ਯੁਤ੍ਤੋਤਿ? ਨ, ਅਵਚਨਸ੍ਸ ਅਞ੍ਞਹੇਤੁਕਤ੍ਤਾ. ਨ ਹਿ ਤਤ੍ਥ ਚੇਤਨਾਯ ਅਕਮ੍ਮਪਥਤ੍ਤਾ ਕਮ੍ਮਪਥਰਾਸਿਮ੍ਹਿ ਅਵਚਨਂ, ਕਦਾਚਿ ਪਨ ਕਮ੍ਮਪਥੋ ਹੋਤਿ, ਨ ਸਬ੍ਬਦਾਤਿ ਕਮ੍ਮਪਥਭਾਵਸ੍ਸ ਅਨਿਯਤਤ੍ਤਾ ਅਵਚਨਂ. ਯਦਾ, ਪਨਸ੍ਸ ਕਮ੍ਮਪਥਭਾਵੋ ਹੋਤਿ, ਤਦਾ ਕਮ੍ਮਪਥਰਾਸਿਸਙ੍ਗਹੋ ਨ ਨਿਵਾਰਿਤੋ. ਏਤ੍ਥਾਹ – ਯਦਿ ਚੇਤਨਾਯ ਸਬ੍ਬਦਾ ਕਮ੍ਮਪਥਭਾਵਾਭਾਵਤੋ ਅਨਿਯਤੋ ਕਮ੍ਮਪਥਭਾਵੋਤਿ ਕਮ੍ਮਪਥਰਾਸਿਮ੍ਹਿ ਅਵਚਨਂ, ਨਨੁ ਅਭਿਜ੍ਝਾਦੀਨਮ੍ਪਿ ਕਮ੍ਮਪਥਭਾਵਂ ਅਪ੍ਪਤ੍ਤਾਨਂ ਅਤ੍ਥਿਤਾਯ ਅਨਿਯਤੋ ਕਮ੍ਮਪਥਭਾਵੋਤਿ ਤੇਸਮ੍ਪਿ ਕਮ੍ਮਪਥਰਾਸਿਮ੍ਹਿ ਅਵਚਨਂ ਆਪਜ੍ਜਤੀਤਿ? ਨਾਪਜ੍ਜਤਿ, ਕਮ੍ਮਪਥਤਾਤਂਸਭਾਗਤਾਹਿ ਤੇਸਂ ਤਤ੍ਥ ਵੁਤ੍ਤਤ੍ਤਾ. ਯਦਿ ਏਵਂ ਚੇਤਨਾਪਿ ਤਤ੍ਥ ਵਤ੍ਤਬ੍ਬਾ ਸਿਯਾ? ਸਚ੍ਚਮੇਤਂ. ਸਾ ਪਨ ਪਾਣਾਤਿਪਾਤਾਦਿਕਾਤਿ ਪਾਕਟੋ ਤਸ੍ਸਾ ਕਮ੍ਮਪਥਭਾਵੋਤਿ ਨ ਵੁਤ੍ਤਾ ਸਿਯਾ. ਚੇਤਨਾਯ ਹਿ ‘‘ਚੇਤਨਾਹਂ, ਭਿਕ੍ਖਵੇ, ਕਮ੍ਮਂ ਵਦਾਮਿ (ਅ. ਨਿ. ੬.੬੩; ਕਥਾ. ੫੩੯) ਤਿਵਿਧਾ, ਭਿਕ੍ਖਵੇ, ਕਾਯਸਞ੍ਚੇਤਨਾ ਅਕੁਸਲਂ ਕਾਯਕਮ੍ਮ’’ਨ੍ਤਿਆਦਿਵਚਨਤੋ (ਕਥਾ. ੫੩੯) ਕਮ੍ਮਭਾਵੋ ਪਾਕਟੋ. ਕਮ੍ਮਂਯੇਵ ਚ ਸੁਗਤਿਦੁਗ੍ਗਤੀਨਂ ਤਤ੍ਥੁਪ੍ਪਜ੍ਜਨਕਸੁਖਦੁਕ੍ਖਾਨਞ੍ਚ ਪਥਭਾਵੇਨ ਪਵਤ੍ਤਂ ਕਮ੍ਮਪਥੋਤਿ ਵੁਚ੍ਚਤੀਤਿ ਪਾਕਟੋ, ਤਸ੍ਸਾ ਕਮ੍ਮਪਥਭਾਵੋ. ਅਭਿਜ੍ਝਾਦੀਨਂ ਪਨ ਚੇਤਨਾਸਮੀਹਨਭਾਵੇਨ ਸੁਚਰਿਤਦੁਚ੍ਚਰਿਤਭਾਵੋ, ਚੇਤਨਾਜਨਿਤਪਿਟ੍ਠਿਵਟ੍ਟਕਭਾਵੇਨ ਸੁਗਤਿਦੁਗ੍ਗਤਿਤਦੁਪ੍ਪਜ੍ਜਨਕਸੁਖਦੁਕ੍ਖਾਨਂ ਪਥਭਾਵੋ ਚਾਤਿ, ਨ ਤਥਾ ਪਾਕਟੋ ਕਮ੍ਮਪਥਭਾਵੋਤਿ, ਤੇ ਏਵ ਤੇਨ ਸਭਾਵੇਨ ਦਸ੍ਸੇਤੁਂ ਅਭਿਧਮ੍ਮੇ ਕਮ੍ਮਪਥਰਾਸਿਭਾਵੇਨ ਵੁਤ੍ਤਾ. ਅਤਥਾਜਾਤਿਯਕਤ੍ਤਾ ਵਾ ਚੇਤਨਾ ਤੇਹਿ ਸਦ੍ਧਿਂ ਨ ਵੁਤ੍ਤਾਤਿ ਦਟ੍ਠਬ੍ਬਂ. ਮੂਲਂ ਪਤ੍ਵਾਤਿ ਮੂਲਦੇਸਨਂ ਪਤ੍ਵਾ, ਮੂਲਸਭਾਵੇਸੁ ਧਮ੍ਮੇਸੁ ਦੇਸਿਯਮਾਨੇਸੂਤਿ ਅਤ੍ਥੋ.

ਅਦਿਨ੍ਨਾਦਾਨਂ ਸਤ੍ਤਾਰਮ੍ਮਣਨ੍ਤਿ ਇਦਂ ‘‘ਪਞ੍ਚ ਸਿਕ੍ਖਾਪਦਾ ਪਰਿਤ੍ਤਾਰਮ੍ਮਣਾ ਏਵਾ’’ਤਿ ਇਮਾਯ ਪਾਲ਼ਿਯਾ ਵਿਰੁਜ੍ਝਤਿ. ਯਞ੍ਹਿ ਪਾਣਾਤਿਪਾਤਾਦਿਦੁਸ੍ਸੀਲ੍ਯਸ੍ਸ ਆਰਮ੍ਮਣਂ, ਤਦੇਵ ਤਂ ਵੇਰਮਣਿਯਾ ਆਰਮ੍ਮਣਂ. ਵੀਤਿਕ੍ਕਮਿਤਬ੍ਬਵਤ੍ਥੁਤੋ ਏਵ ਹਿ ਵਿਰਤੀਤਿ. ‘‘ਸਤ੍ਤਾਰਮ੍ਮਣ’’ਨ੍ਤਿ ਵਾ ਸਤ੍ਤਸਙ੍ਖਾਤਂ ਸਙ੍ਖਾਰਾਰਮ੍ਮਣਮੇਵ ਉਪਾਦਾਯ ਵੁਤ੍ਤਤ੍ਤਾ ਨ ਕੋਚਿ ਵਿਰੋਧੋ. ਤਥਾ ਹਿ ਵੁਤ੍ਤਂ ਸਮ੍ਮੋਹਵਿਨੋਦਨਿਯਂ (ਵਿਭ. ਅਟ੍ਠ. ੭੧੪) ‘‘ਯਾਨਿ ਸਿਕ੍ਖਾਪਦਾਨਿ ਏਤ੍ਥ ‘ਸਤ੍ਤਾਰਮ੍ਮਣਾਨੀ’ਤਿ ਵੁਤ੍ਤਾਨਿ, ਤਾਨਿ ਯਸ੍ਮਾ ‘ਸਤ੍ਤੋਤਿ’ਤਿ ਸਙ੍ਖਂ ਗਤੇ ਸਙ੍ਖਾਰੇਯੇਵ ਆਰਮ੍ਮਣਂ ਕਰੋਨ੍ਤੀ’’ਤਿ. ਇਤੋ ਪਰੇਸੁਪਿ ਏਸੇਵ ਨਯੋ. ਵਿਸਭਾਗਵਤ੍ਥੁਨੋ ‘‘ਇਤ੍ਥਿਪੁਰਿਸਾ’’ਤਿ ਗਹੇਤਬ੍ਬਤੋ ਸਤ੍ਤਾਰਮ੍ਮਣੋਤਿਪਿ ਏਕੇ. ‘‘ਏਕੋ ਦਿਟ੍ਠੋ, ਦ੍ਵੇ ਸੁਤਾ’’ਤਿਆਦਿਨਾ ਸਮ੍ਫਪ੍ਪਲਪਨੇ ਦਿਟ੍ਠਸੁਤਮੁਤਵਿਞ੍ਞਾਤਵਸੇਨ. ਤਥਾ ਅਭਿਜ੍ਝਾਤਿ ਏਤ੍ਥ ਤਥਾ-ਸਦ੍ਦੋ ‘‘ਦਿਟ੍ਠਸੁਤਮੁਤਵਿਞ੍ਞਾਤਵਸੇਨਾ’’ਤਿ ਇਦਮ੍ਪਿ ਉਪਸਂਹਰਤਿ, ਨ ਸਤ੍ਤਸਙ੍ਖਾਰਾਰਮ੍ਮਣਤਂ ਏਵ ਦਸ੍ਸਨਾਦਿਵਸੇਨ ਅਭਿਜ੍ਝਾਯਨਤੋ. ‘‘ਨਤ੍ਥਿ ਸਤ੍ਤਾ ਓਪਪਾਤਿਕਾ’’ਤਿ ਪਵਤ੍ਤਮਾਨਾਪਿ ਮਿਚ੍ਛਾਦਿਟ੍ਠਿ ਤੇਭੂਮਕਧਮ੍ਮਾਰਮ੍ਮਣਾ ਏਵਾਤਿ ਅਧਿਪ੍ਪਾਯੇਨ ਤਸ੍ਸਾ ਸਙ੍ਖਾਰਾਰਮ੍ਮਣਤਾ ਵੁਤ੍ਤਾ. ਕਥਂ ਪਨ ਮਿਚ੍ਛਾਦਿਟ੍ਠਿਯਾ ਮਹਗ੍ਗਤਪ੍ਪਤ੍ਤਾ ਧਮ੍ਮਾ ਆਰਮ੍ਮਣਂ ਹੋਨ੍ਤੀਤਿ? ਸਾਧਾਰਣਤੋ. ਨਤ੍ਥਿ ਸੁਕਟਦੁਕ੍ਕਟਾਨਂ ਕਮ੍ਮਾਨਂ ਫਲਂ ਵਿਪਾਕੋਤਿ ਹਿ ਪਵਤ੍ਤਮਾਨਾਯ ਅਤ੍ਥਤੋ ਰੂਪਾਰੂਪਾਵਚਰਧਮ੍ਮਾਪਿ ਗਹਿਤਾਵ ਹੋਨ੍ਤੀਤਿ.

ਸੁਖਬਹੁਲਤਾਯ ਰਾਜਾਨੋ ਹਸਮਾਨਾਪਿ ‘‘ਚੋਰਂ ਘਾਤੇਥਾ’’ਤਿ ਵਦਨ੍ਤਿ, ਹਾਸੋ ਪਨ ਤੇਸਂ ਅਞ੍ਞਵਿਸਯੋਤਿ ਆਹ ‘‘ਸਨ੍ਨਿਟ੍ਠਾਪਕਚੇਤਨਾ ਪਨ ਨੇਸਂ ਦੁਕ੍ਖਸਮ੍ਪਯੁਤ੍ਤਾਵ ਹੋਤੀ’’ਤਿ. ਮਜ੍ਝਤ੍ਤਵੇਦਨੋ ਨ ਹੋਤਿ, ਸੁਖਵੇਦਨੋਵ. ਤਤ੍ਥ ‘‘ਕਾਮਾਨਂ ਸਮੁਦਯਾ’’ਤਿਆਦਿਨਾ ਵੇਦਨਾਭੇਦੋ ਵੇਦਿਤਬ੍ਬੋ. ਲੋਭਸਮੁਟ੍ਠਾਨੋ ਮੁਸਾਵਾਦੋ ਸੁਖਵੇਦਨੋ ਵਾ ਸਿਯਾ ਮਜ੍ਝਤ੍ਤਵੇਦਨੋ ਵਾ, ਦੋਸਸਮੁਟ੍ਠਾਨੋ ਦੁਕ੍ਖਵੇਦਨੋ ਵਾਤਿ ਮੁਸਾਵਾਦੋ ਤਿਵੇਦਨੋ ਸਿਯਾ. ਇਮਿਨਾ ਨਯੇਨ ਸੇਸੇਸੁਪਿ ਯਥਾਰਹਂ ਵੇਦਨਾਨਂ ‘‘ਲੋਭੋ ਨਿਦਾਨਂ ਕਮ੍ਮਾਨਂ ਸਮੁਦਯਾਯਾ’’ਤਿਆਦਿਨਾ ਭੇਦੋ ਵੇਦਿਤਬ੍ਬੋ.

ਪਾਣਾਤਿਪਾਤੋ ਦੋਸਮੋਹਵਸੇਨ ਦ੍ਵਿਮੂਲਕੋਤਿ ਸਮ੍ਪਯੁਤ੍ਤਮੂਲਮੇਵ ਸਨ੍ਧਾਯ ਵੁਤ੍ਤਂ. ਤਸ੍ਸ ਹਿ ਮੂਲਟ੍ਠੇਨ ਉਪਕਾਰਭਾਵੋ ਦੋਸਵਿਸੇਸੋ, ਨਿਦਾਨਮੂਲੇ ਪਨ ਗਯ੍ਹਮਾਨੇ ਲੋਭਮੋਹਵਸੇਨਪਿ ਵਟ੍ਟਤਿ. ਸਮ੍ਮੂਲ਼੍ਹੋ ਆਮਿਸਕਿਞ੍ਜਕ੍ਖਕਾਮੋਪਿ ਹਿ ਪਾਣਂ ਹਨਤਿ. ਤੇਨੇਵਾਹ ‘‘ਲੋਭੋ ਨਿਦਾਨਂ ਕਮ੍ਮਾਨਂ ਸਮੁਦਯਾਯਾ’’ਤਿਆਦਿ (ਅ. ਨਿ. ੩.੩੪). ਸੇਸੇਸੁਪਿ ਏਸੇਵ ਨਯੋ.

ਅਸਮਾਦਿਨ੍ਨਸੀਲਸ੍ਸ ਸਮ੍ਪਤ੍ਤਤੋ ਯਥਾਉਪਟ੍ਠਿਤਵੀਤਿਕ੍ਕਮਿਤਬ੍ਬਵਤ੍ਥੁਤੋ ਵਿਰਤਿ ਸਮ੍ਪਤ੍ਤਵਿਰਤਿ. ਸਮਾਦਾਨੇਨ ਉਪ੍ਪਨ੍ਨਾ ਵਿਰਤਿ ਸਮਾਦਾਨਵਿਰਤਿ. ਕਿਲੇਸਾਨਂ ਸਮੁਚ੍ਛਿਨ੍ਦਨਵਸੇਨ ਪਵਤ੍ਤਾ ਮਗ੍ਗਸਮ੍ਪਯੁਤ੍ਤਾ ਵਿਰਤਿ ਸਮੁਚ੍ਛੇਦਵਿਰਤਿ. ਕਾਮਞ੍ਚੇਤ੍ਥ ਪਾਲ਼ਿਯਂ ਵਿਰਤਿਯੋਵ ਆਗਤਾ, ਸਿਕ੍ਖਾਪਦਵਿਭਙ੍ਗੇ ਪਨ ਚੇਤਨਾਪਿ ਆਹਰਿਤ੍ਵਾ ਦਸ੍ਸਿਤਾਤਿ ਤਦੁਭਯਮ੍ਪਿ ਗਣ੍ਹਨ੍ਤੋ ‘‘ਚੇਤਨਾਪਿ ਵਟ੍ਟਨ੍ਤਿ ਵਿਰਤਿਯੋਪੀ’’ਤਿ ਆਹ.

ਅਦੁਸ੍ਸੀਲ੍ਯਾਰਮ੍ਮਣਾ ਜੀਵਿਤਿਨ੍ਦ੍ਰਿਯਾਦਿਆਰਮ੍ਮਣਾ ਕਥਂ ਦੁਸ੍ਸੀਲ੍ਯਾਨਿ ਪਜਹਨ੍ਤੀਤਿ ਦਸ੍ਸੇਤੁਂ ‘‘ਯਥਾ ਪਨਾ’’ਤਿਆਦਿ ਵੁਤ੍ਤਂ. ਪਾਣਾਤਿਪਾਤਾਦੀਹਿ ਵਿਰਮਣਵਸੇਨ ਪਵਤ੍ਤਨਤੋ ਤਦਾਰਮ੍ਮਣਭਾਵੇਨੇਵ ਤਾਨਿ ਪਜਹਨ੍ਤਿ. ਨ ਹਿ ਤਦੇਵ ਆਰਬ੍ਭ ਤਂ ਪਜਹਿਤੁਂ ਸਕ੍ਕਾ ਤਤੋ ਅਨਿਸ੍ਸਟਭਾਵਤੋ.

ਅਨਭਿਜ੍ਝਾ…ਪੇ… ਵਿਰਮਨ੍ਤਸ੍ਸਾਤਿ ਅਭਿਜ੍ਝਂ ਪਜਹਨ੍ਤਸ੍ਸਾਤਿ ਅਤ੍ਥੋ. ਨ ਹਿ ਮਨੋਦੁਚ੍ਚਰਿਤਤੋ ਵਿਰਤਿ ਅਤ੍ਥਿ ਅਨਭਿਜ੍ਝਾਦੀਹੇਵ ਤਪ੍ਪਹਾਨਸਿਦ੍ਧਿਤੋ.

ਪਞ੍ਚਸਿਕ੍ਖਾਪਦਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

੭. ਦਸਙ੍ਗਸੁਤ੍ਤਵਣ੍ਣਨਾ

੧੧੩. ਮਿਚ੍ਛਤ੍ਤਸਮ੍ਮਤ੍ਤਵਸੇਨਾਤਿ ਏਤ੍ਥ ਮਿਚ੍ਛਾਭਾਵੋ ਮਿਚ੍ਛਤ੍ਤਂ, ਤਥਾ ਸਮ੍ਮਾਭਾਵੋ ਸਮ੍ਮਤ੍ਤਂ. ਤਥਾ ਤਥਾ ਪਵਤ੍ਤਾ ਅਕੁਸਲਕ੍ਖਨ੍ਧਾਵ ਮਿਚ੍ਛਾਸਤਿ, ਏਵਂ ਮਿਚ੍ਛਾਞਾਣਮ੍ਪਿ ਦਟ੍ਠਬ੍ਬਂ. ਨ ਹਿ ਞਾਣਸ੍ਸ ਮਿਚ੍ਛਾਭਾਵੋ ਨਾਮ ਅਤ੍ਥਿ. ਤਸ੍ਮਾ ਮਿਚ੍ਛਾਞਾਣਿਨੋਤਿ ਮਿਚ੍ਛਾਸਞ੍ਞਾਣਾਤਿ ਅਤ੍ਥੋ, ਅਯੋਨਿਸੋ ਪਵਤ੍ਤਚਿਤ੍ਤੁਪ੍ਪਾਦਾਤਿ ਅਧਿਪ੍ਪਾਯੋ. ਮਿਚ੍ਛਾਪਚ੍ਚਵੇਕ੍ਖਣੇਨਾਤਿ ਮਿਚ੍ਛਾਦਿਟ੍ਠਿਆਦੀਨਂ ਮਿਚ੍ਛਾ ਅਯੋਨਿਸੋ ਪਚ੍ਚਵੇਕ੍ਖਣੇਨ. ਕੁਸਲਵਿਮੁਤ੍ਤੀਤਿ ਪਕਤਿਪੁਰਿਸਸਨ੍ਤਰਜਾਨਨਂ, ਗੁਣਵਿਯੁਤ੍ਤਸ੍ਸ ਅਤ੍ਤਨੋ ਸਕਤ੍ਤਨਿ ਅਵਟ੍ਠਾਨਨ੍ਤਿ ਏਵਮਾਦਿਂ ਅਕੁਸਲਪਵਤ੍ਤਿਂ ‘‘ਕੁਸਲਵਿਮੁਤ੍ਤੀ’’ਤਿ ਗਹੇਤ੍ਵਾ ਠਿਤਾ ਮਿਚ੍ਛਾਵਿਮੁਤ੍ਤਿਕਾ. ਸਮ੍ਮਾਪਚ੍ਚਵੇਕ੍ਖਣਾਤਿ ਝਾਨਵਿਮੋਕ੍ਖਾਦੀਸੁ ਸਮ੍ਮਾ ਅਵਿਪਰੀਤਂ ਪਵਤ੍ਤਾ ਪਚ੍ਚਵੇਕ੍ਖਣਾ.

ਦਸਙ੍ਗਸੁਤ੍ਤਵਣ੍ਣਨਾ ਨਿਟ੍ਠਿਤਾ.

ਤਤਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.

੪. ਚਤੁਤ੍ਥਵਗ੍ਗੋ

੧. ਚਤੁਧਾਤੁਸੁਤ੍ਤਵਣ੍ਣਨਾ

੧੧੪. ਪਤਿਟ੍ਠਾਧਾਤੂਤਿ ਸਹਜਾਤਾਨਂ ਧਮ੍ਮਾਨਂ ਪਤਿਟ੍ਠਾਭੂਤਾ ਧਾਤੁ. ਆਬਨ੍ਧਨਧਾਤੂਤਿ ਨਹਾਨਿਯਚੁਣ੍ਣਸ੍ਸ ਉਦਕਂ ਵਿਯ ਸਹਜਾਤਧਮ੍ਮਾਨਂ ਆਬਨ੍ਧਨਭੂਤਾ ਧਾਤੁ. ਪਰਿਪਾਚਨਧਾਤੂਤਿ ਸੂਰਿਯੋ ਫਲਾਦੀਨਂ ਵਿਯ ਸਹਜਾਤਧਮ੍ਮਾਨਂ ਪਰਿਪਾਚਨਭੂਤਾ ਧਾਤੁ. ਵਿਤ੍ਥਮ੍ਭਨਧਾਤੂਤਿ ਦੁਤਿਯੋ ਵਿਯ ਸਹਜਾਤਧਮ੍ਮਾਨਂ ਵਿਤ੍ਥਮ੍ਭਨਭੂਤਾ ਧਾਤੁ. ਕੇਸਾਦਯੋ ਵੀਸਤਿ ਕੋਟ੍ਠਾਸਾ. ਆਦਿ-ਸਦ੍ਦੇਨ ਪਿਤ੍ਤਾਦਯੋ ਸਨ੍ਤਪ੍ਪਨਾਦਯੋ ਉਦ੍ਧਙ੍ਗਮਾ ਵਾਤਾਦਯੋ ਗਹਿਤਾ. ਏਤਾਤਿ ਧਾਤੁਯੋ.

ਚਤੁਧਾਤੁਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੨. ਪੁਬ੍ਬੇਸਮ੍ਬੋਧਸੁਤ੍ਤਵਣ੍ਣਨਾ

੧੧੫. ਅਯਂ ਪਥਵੀਧਾਤੁਂ ਨਿਸ੍ਸਾਯ ਤਂ ਆਰਬ੍ਭ ਪਵਤ੍ਤੋ ਅਸ੍ਸਾਦੋ. ਏਵਂ ਪਵਤ੍ਤਾਨਨ੍ਤਿ ਏਵਂ ਕਾਯੇ ਪਭਾਵਸ੍ਸ ਪਵੇਦਨਵਸੇਨੇਵ ਪਵਤ੍ਤਾਨਂ. ਹੁਤ੍ਵਾ ਅਭਾਵਾਕਾਰੇਨਾਤਿ ਪੁਬ੍ਬੇ ਅਵਿਜ੍ਜਮਾਨਾ ਪਚ੍ਚਯਸਾਮਗ੍ਗਿਯਾ ਹੁਤ੍ਵਾ ਉਪ੍ਪਜ੍ਜਿਤ੍ਵਾ ਪੁਨ ਭਙ੍ਗੁਪਗਮਨਤੋ ਉਦ੍ਧਂ ਅਭਾਵਾਕਾਰੇਨ. ਨ ਨਿਚ੍ਚਾਤਿ ਅਨਿਚ੍ਚਾ ਅਦ੍ਧੁਵਤ੍ਤਾ, ਧੁਵਂ ਨਿਚ੍ਚਂ. ਪਟਿਪੀਲ਼ਨਾਕਾਰੇਨਾਤਿ ਉਦਯਬ੍ਬਯਵਸੇਨ ਅਭਿਣ੍ਹਂ ਪੀਲ਼ਨਾਕਾਰੇਨ ਦੁਕ੍ਖਟ੍ਠੇਨ. ਸਭਾਵਵਿਗਮਾਕਾਰੇਨਾਤਿ ਅਤ੍ਤਨੋ ਸਭਾਵਸ੍ਸ ਵਿਗਚ੍ਛਨਾਕਾਰੇਨ. ਸਭਾਵਧਮ੍ਮਾ ਹਿ ਅਪ੍ਪਮਤ੍ਤਂ ਖਣਂ ਪਤ੍ਵਾ ਨਿਰੁਜ੍ਝਨ੍ਤਿ. ਤਸ੍ਮਾ ਤੇ ‘‘ਜਰਾਯ ਮਰਣੇਨ ਚਾ’’ਤਿ ਦ੍ਵੇਧਾ ਵਿਪਰਿਣਮਨ੍ਤਿ. ਤੇਨਾਹ ‘‘ਵਿਪਰਿਣਾਮਧਮ੍ਮਾ’’ਤਿ. ਆਦੀਨਂ ਵਾਤਿ ਪਵਤ੍ਤੇਤੀਤਿ ਆਦੀਨਵੋ, ਪਰਮਕਾਪਞ੍ਞਤਾ. ਵਿਨੀਯਤੀਤਿ ਵੂਪਸਮੀਯਤਿ. ਅਚ੍ਚਨ੍ਤਪ੍ਪਹਾਨਵਸੇਨ ਨਿਸ੍ਸਰਤਿ ਏਤੇਨਾਤਿ ਨਿਸ੍ਸਰਣਂ.

ਸਾਯਂ ਨਿਪਨ੍ਨਾ ਸਬ੍ਬਰਤ੍ਤਿਂ ਖੇਪੇਤ੍ਵਾ ਪਾਤੋ ਉਟ੍ਠਹਾਮ, ਮਾਸਪੁਣ੍ਣਘਟੋ ਵਿਯ ਨੋ ਸਰੀਰਂ ਨਿਸ੍ਸਨ੍ਦਾਭਾਵਤੋ.

ਫੁਸਿਤਮਤ੍ਤੇਸੁਪੀਤਿ ਉਦਕਸ੍ਸ ਫੁਸਿਤਮਤ੍ਤੇਸੁਪਿ.

ਅਤਿਨਾਮੇਨ੍ਤਿ ਕਾਲਂ. ਏਵਂ ਵੁਤ੍ਤਨਯੇਨ ਪਵਤ੍ਤਾ ਪੁਗ੍ਗਲਾ ਏਤਾ ਪਥਵੀਧਾਤੁਆਦਯੋ ਅਸ੍ਸਾਦੇਨ੍ਤਿ ਨਾਮ ਅਭਿਰਤਿਵਸੇਨ ਤਤ੍ਥ ਆਕਙ੍ਖੁਪ੍ਪਾਦਨਤੋ.

ਅਭਿਵਿਸਿਟ੍ਠੇਨ ਞਾਣੇਨਾਤਿ ਅਗ੍ਗਮਗ੍ਗਞਾਣੇਨ. ਰੁਕ੍ਖੋ ਬੋਧਿ ‘‘ਬੁਜ੍ਝਤਿ ਏਤ੍ਥਾ’’ਤਿ ਕਤ੍ਵਾ. ਮਗ੍ਗੋ ਬੋਧਿ ‘‘ਬੁਜ੍ਝਤਿ ਏਤੇਨਾ’’ਤਿ ਕਤ੍ਵਾ. ਸਬ੍ਬਞ੍ਞੁਤਞ੍ਞਾਣਂ ਬੋਧਿ ਸਮ੍ਮਾ ਸਾਮਞ੍ਚ ਸਬ੍ਬਧਮ੍ਮਾਨਂ ਬੁਜ੍ਝਨਤੋ. ਨਿਬ੍ਬਾਨਂ ਬੋਧਿ ਬੁਜ੍ਝਿਤਬ੍ਬਤੋ. ਤੇਸਨ੍ਤਿ ਨਿਦ੍ਧਾਰਣੇ ਸਾਮਿਵਚਨਂ. ਸਾਵਕਪਾਰਮੀਞਾਣਨ੍ਤਿ ਸਾਵਕਪਾਰਮੀਞਾਣਂ ਯਾਥਾਵਤੋ ਦਸ੍ਸਨਵਤ੍ਥੁ.

ਅਕੁਪ੍ਪਾਤਿ ਪਟਿਪਕ੍ਖੇਹਿ ਅਕੋਪੇਤਬ੍ਬੋ. ਕਾਰਣਤੋਤਿ ਅਰਿਯਮਗ੍ਗਤੋ. ਤਤੋ ਹਿਸ੍ਸ ਅਕੁਪ੍ਪਤਾ. ਤੇਨਾਹ ‘‘ਸਾ ਹੀ’’ਤਿਆਦੀ. ਆਰਮ੍ਮਣਤੋਤਿ ਨਿਬ੍ਬਾਨਾਰਮ੍ਮਣਤੋ ਨਿਬ੍ਬਾਨਾਰਮ੍ਮਣਾਨਂ ਲੋਕਿਯਸਮਾਪਤ੍ਤੀਨਂ ਅਭਾਵਤੋ.

ਵਿਤ੍ਥਾਰਵਸੇਨਾਤਿ ਏਕੇਕਧਾਤੁਵਸੇਨਾਤਿ ਵਦਨ੍ਤਿ, ਏਕੇਕਿਸ੍ਸਾ ਪਨ ਧਾਤੁਯਾ ਲਕ੍ਖਣਵਿਭਤ੍ਤਿਦਸ੍ਸਨਵਸੇਨ. ਯਨ੍ਤਿ ਹੇਤੁਅਤ੍ਥੇ ਨਿਪਾਤੋ, ਯਂ ਨਿਮਿਤ੍ਤਨ੍ਤਿ ਅਤ੍ਥੋ. ਅਸ੍ਸਾਦੇਤਿ ਏਤੇਨਾਤਿ ਅਸ੍ਸਾਦੋ, ਤਣ੍ਹਾ. ਅਯਂ ਪਥਵੀਧਾਤੁਯਾ ਅਸ੍ਸਾਦੋਤਿ ਏਤ੍ਥ ਅਯਂ-ਸਦ੍ਦੋ ‘‘ਪਹਾਨਪਟਿਵੇਧੋ’’ਤਿ ਏਤ੍ਥਾਪਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬੋ ‘‘ਅਯਂ ਪਹਾਨਪਟਿਵੇਧੋ ਪਟਿਵਿਜ੍ਝਿਤਬ੍ਬਟ੍ਠੇਨ ਸਮੁਦਯਸਚ੍ਚ’’ਨ੍ਤਿ. ਏਸ ਨਯੋ ਸੇਸਸਚ੍ਚੇਸੁਪਿ. ਯਾਤਿ ਯਥਾਵੁਤ੍ਤੇਸੁ ਅਸ੍ਸਾਦੋ ਆਦੀਨਵੋ ਨਿਸ੍ਸਰਣਨ੍ਤਿ ਇਮੇਸੁ ਤੀਸੁ ਠਾਨੇਸੁ ਪਵਤ੍ਤਾ ਯਾ ਦਿਟ੍ਠਿ…ਪੇ… ਯੋ ਸਮਾਧਿ, ਅਯਂ ਭਾਵਨਾਪਟਿਵੇਧੋ ਮਗ੍ਗਸਚ੍ਚਨ੍ਤਿ ਵੁਤ੍ਤਨਯੇਨੇਵ ਯੋਜੇਤਬ੍ਬਂ.

ਪੁਬ੍ਬੇਸਮ੍ਬੋਧਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੩. ਅਚਰਿਂਸੁਤ੍ਤਵਣ੍ਣਨਾ

੧੧੬. ਯਥਾ ਯਾਵਤਾ ਨਿਸ੍ਸਰਣਪਰਿਯੇਸਨਟ੍ਠਾਨੇ ਆਦੀਨਵਪਰਿਯੇਸਨਾ, ਏਵਂ ਯਾਵਤਾ ਆਦੀਨਵਪਰਿਯੇਸਨਟ੍ਠਾਨੇ ਅਸ੍ਸਾਦਪਰਿਯੇਸਨਾ ਸਮ੍ਮਾਪਟਿਪਨ੍ਨਸ੍ਸਾਤਿ ਵੁਤ੍ਤਂ ‘‘ਅਚਰਿਨ੍ਤਿ ਞਾਣਚਾਰੇਨ ਅਚਰਿਂ, ਅਨੁਭਵਨਚਾਰੇਨਾ’’ਤਿ.

ਅਚਰਿਂਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੪. ਨੋਚੇਦਂਸੁਤ੍ਤਵਣ੍ਣਨਾ

੧੧੭. ਨਿਸ੍ਸਟਾਤਿਆਦੀਨਿ ਪਦਾਨਿ, ਆਦਿਤੋ ਵੁਤ੍ਤਪਟਿਸੇਧੇਨਾਤਿ ‘‘ਨੇਵਾ’’ਤਿ ਏਤ੍ਥ ਵੁਤ੍ਤੇਨ ਨਕਾਰੇਨ. ਤੇਨਾਹ ‘‘ਨ ਨਿਸ੍ਸਟਾ’’ਤਿਆਦਿ. ਵਿਮਰਿਯਾਦਿਕਤੇਨਾਤਿਆਦਿ ਚ ਏਤ੍ਥ ਵਿਹਰਣਪੇਕ੍ਖਣੇ ਕਰਣਵਚਨਂ. ਦੁਤਿਯਨਯੇਤਿ ‘‘ਯਤੋ ਚ ਖੋ, ਭਿਕ੍ਖਵੇ’’ਤਿਆਦਿਨਾ ਵੁਤ੍ਤਨਯੇ. ਕਿਲੇਸਵਟ੍ਟਮਰਿਯਾਦਾਯ ਸਬ੍ਬਸੋ ਅਭਾਵਤੋ ਨਿਮ੍ਮਰਿਯਾਦਿਕਤੇਨ ਚਿਤ੍ਤੇਨ. ਤੇਨਾਹ ‘‘ਤਤ੍ਥਾ’’ਤਿਆਦਿ. ਤੀਸੂਤਿ ਦੁਤਿਯਾਦੀਸੁ ਤੀਸੁ.

ਨੋਚੇਦਂਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੫. ਏਕਨ੍ਤਦੁਕ੍ਖਸੁਤ੍ਤਵਣ੍ਣਨਾ

੧੧੮. ਏਕਨ੍ਤੇਨੇਵ ਦੁਕ੍ਖਾਤਿ ਅਵੀਚਿਮਹਾਨਿਰਯੋ ਵਿਯ ਏਕਨ੍ਤਤੋ ਦੁਕ੍ਖਾ ਏਵ ਸੁਖੇਨ ਅਵੋਮਿਸ੍ਸਾ. ਦੁਕ੍ਖੇਨ ਅਨੁਪਤਿਤਾਤਿ ਦੁਕ੍ਖੇਨੇਵ ਸਬ੍ਬਸੋ ਉਪਗਤਾ. ਦੁਕ੍ਖੇਨ ਓਕ੍ਕਨ੍ਤਾਤਿ ਬਹਿਦ੍ਧਾ ਵਿਯ ਅਨ੍ਤੋਪਿ ਦੁਕ੍ਖੇਨ ਅਵਕ੍ਕਨ੍ਤਾ ਅਨੁਪਵਿਟ੍ਠਾ. ਸੁਖਵੇਦਨਾਪਚ੍ਚਯਤਾਯ ਇਮਾਸਂ ਧਾਤੂਨਂ ਸੁਖਤਾ ਵਿਯ ਦੁਕ੍ਖਵੇਦਨਾਪਚ੍ਚਯਤਾਪਿ ਵੇਦਿਤਬ੍ਬਾ, ਸਙ੍ਖਾਰਦੁਕ੍ਖਤਾ ਪਨ ਸਬ੍ਬਤ੍ਥ ਚਰਿਤਾ ਏਵ. ਸਬ੍ਬਤ੍ਥਾਤਿ ਸਬ੍ਬਾਸੁ ਧਾਤੂਸੁ, ਸਬ੍ਬਟ੍ਠਾਨੇਸੁ ਵਾ. ਪਠਮਂ ਸੁਖਂ ਦਸ੍ਸੇਤ੍ਵਾਪਿ ਪਚ੍ਛਾ ਦੁਕ੍ਖਸ੍ਸ ਕਥਿਤਤ੍ਤਾ ‘‘ਦੁਕ੍ਖਲਕ੍ਖਣਂ ਕਥਿਤ’’ਨ੍ਤਿ ਵੁਤ੍ਤਂ.

ਏਕਨ੍ਤਦੁਕ੍ਖਸੁਤ੍ਤਵਣ੍ਣਨਾ ਨਿਟ੍ਠਿਤਾ.

੬-੧੦. ਅਭਿਨਨ੍ਦਸੁਤ੍ਤਾਦਿਵਣ੍ਣਨਾ

੧੧੯-੧੨੩. ਛਟ੍ਠਸਤ੍ਤਮੇਸੁ ਵਟ੍ਟਵਿਵਟ੍ਟਂ ਕਥਿਤਂ. ਅਟ੍ਠਕਥਾਯਂ ਪਨ ‘‘ਵਿਵਟ੍ਟਂ ਕਥਿਤ’’ਨ੍ਤਿ ਵੁਤ੍ਤਂ. ਤੀਸੁ ਸੁਤ੍ਤੇਸੁ. ਚਤੁਸਚ੍ਚਮੇਵਾਤਿ ਚਤ੍ਤਾਰਿ ਸਚ੍ਚਾਨਿ ਸਮਾਹਟਾਨਿ ਚਤੁਸਚ੍ਚਨ੍ਤਿ ਤੇਸਂ ਏਕਜ੍ਝਂ ਗਹਣਂ, ਨਿਯਮੋ ਪਨ ਤਬ੍ਬਿਨਿਮੁਤ੍ਤਸ੍ਸ ਪਰਮਤ੍ਥਸ੍ਸ ਅਭਾਵਤੋ.

ਅਭਿਨਨ੍ਦਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਚਤੁਤ੍ਥਵਗ੍ਗਵਣ੍ਣਨਾ ਨਿਟ੍ਠਿਤਾ.

ਸਾਰਤ੍ਥਪ੍ਪਕਾਸਿਨਿਯਾ ਸਂਯੁਤ੍ਤਨਿਕਾਯ-ਅਟ੍ਠਕਥਾਯ

ਧਾਤੁਸਂਯੁਤ੍ਤਵਣ੍ਣਨਾਯ ਲੀਨਤ੍ਥਪ੍ਪਕਾਸਨਾ ਸਮਤ੍ਤਾ.