੪. ਅਚ੍ਚੇਨ੍ਤਿਸੁਤ੍ਤਵਣ੍ਣਨਾ

੪. ਕਾਲਯਨ੍ਤਿ ਖੇਪੇਨ੍ਤੀਤਿ ਕਾਲਾ. ਪੁਰੇਭਤ੍ਤਾਦਯੋ ਹਿ ਕਾਲਾ ਧਮ੍ਮਪ੍ਪਵਤ੍ਤਿਮਤ੍ਤਤਾਯ ਪਰਮਤ੍ਥਤੋ ਅਵਿਜ੍ਜਮਾਨਾਪਿ ਲੋਕਸਙ੍ਕੇਤਮਤ੍ਤਸਿਦ੍ਧਾ ਤਸ੍ਸਾਯੇਵ ਧਮ੍ਮਪ੍ਪਵਤ੍ਤਿਯਾ ਗਤਗਤਾਯ ਅਨਿਵਤ੍ਤਨਤੋ ਤਂ ਤਂ ਧਮ੍ਮਪ੍ਪਵਤ੍ਤਿਂ ਖੇਪੇਨ੍ਤਾ ਵਿਨਾਸਯਨ੍ਤਾ ਵਿਯ ਸਯਞ੍ਚ ਤਾਹਿ ਸਦ੍ਧਿਂ ਅਚ੍ਚੇਨ੍ਤਾ ਵਿਯ ਹੋਨ੍ਤਿ. ਤੇਨਾਹ – ‘‘ਕਾਲੋ ਘਸਤਿ ਭੂਤਾਨਿ, ਸਬ੍ਬਾਨੇਵ ਸਹਤ੍ਤਨਾ’’ਤਿ (ਜਾ. ੧.੨.੧੯੦). ‘‘ਤਰਯਨ੍ਤਿ ਰਤ੍ਤਿਯੋ’’ਤਿ ਏਤ੍ਥਾਪਿ ਵੁਤ੍ਤਨਯੇਨੇਵ ਅਤ੍ਥੋ ਵੇਦਿਤਬ੍ਬੋ. ‘‘ਏਤਂ ਭਯਂ ਮਰਣੇ ਪੇਕ੍ਖਮਾਨੋ’’ਤਿ ਵੁਚ੍ਚਮਾਨਤ੍ਤਾ ਪੁਗ੍ਗਲਂ ਮਰਣੂਪਗਮਨਾਯ ਤਰਯਨ੍ਤੀਤਿ ਅਤ੍ਥੋ ਵੁਤ੍ਤੋ. ਵਯੋਗੁਣਾਤਿ ਏਤ੍ਥ ਕੋਟ੍ਠਾਸਾ ਗੁਣਾ. ਤਿਤ੍ਥਿਯਾਨਂ ਹਿ ਚਰਿਮਚਿਤ੍ਤੇਨ ਸਕਲਚਿਤ੍ਤੇ ਵਯਸਮੂਹੇ ਵਯਸਮਞ੍ਞਾਤਿ ਆਹ – ‘‘ਪਠਮਮਜ੍ਝਿਮਪਚ੍ਛਿਮਵਯਾਨਂ ਗੁਣਾ, ਰਾਸਯੋਤਿ ਅਤ੍ਥੋ’’ਤਿ. ਆਨਿਸਂਸਟ੍ਠੋ ਗੁਣਟ੍ਠੋ ‘‘ਵਾਕਚਿਰਂ ਨਿਵਾਸੇਸਿਂ, ਦ੍ਵਾਦਸਗੁਣਮੁਪਾਗਤ’’ਨ੍ਤਿਆਦੀਸੁ (ਬੁ. ਵਂ. ੨.੩੦) ਵਿਯ. ‘‘ਤਨ੍ਦਿਗੁਣਾਹਂ ਕਰਿਸ੍ਸਾਮਿ, ਦਿਗੁਣਂ ਦਿਗੁਣਂ ਵਦ੍ਧੇਯ੍ਯਾ’’ਤਿ ਚ ਏਵਮਾਦੀਸੁ ਪਨ ਤਬ੍ਭਾਵਵੁਤ੍ਤਿਅਤ੍ਥੋ ਗੁਣਟ੍ਠੋ.

‘‘ਅਸਙ੍ਖ੍ਯੇਯ੍ਯਾਨਿ ਨਾਮਾਨਿ, ਸਗੁਣੇਨ ਮਹੇਸਿਨੋ;

ਗੁਣੇਨ ਨਾਮਮੁਦ੍ਧੇਯ੍ਯਂ, ਅਪਿ ਨਾਮ ਸਹਸ੍ਸਤੋ’’ਤਿ. (ਧ. ਸ. ਅਟ੍ਠ. ੧੩੧੩; ਉਦਾ. ੫੩; ਪਟਿ. ਮ. ਅਟ੍ਠ. ੧.੧.੭੬) –

ਆਦੀਸੁ ਪਸਂਸਟ੍ਠੋ ਗੁਣਟ੍ਠੋ ਦਟ੍ਠਬ੍ਬੋ. ‘‘ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤੀ’’ਤਿ ਏਤ੍ਥ ਅਤ੍ਥੋ ‘‘ਅਚ੍ਚੇਨ੍ਤਿ ਕਾਲਾ’’ਤਿ ਏਤ੍ਥ ਵੁਤ੍ਤਨਯੋ ਏਵ. ਪਠਮਮਜ੍ਝਿਮਵਯਾਤਿ ਪਠਮਗ੍ਗਹਣਞ੍ਚੇਤ੍ਥ ਵਯਸ੍ਸ ਗਤਸ੍ਸ ਅਪੁਨਰਾਵਤ੍ਤਿਦਸ੍ਸਨਤ੍ਥਂ ਕਤਂ. ਤੇਨੇਵਾਹ – ‘‘ਮਰਣਕ੍ਖਣੇ ਪਨ ਤਯੋਪਿ ਵਯਾ ਜਹਨ੍ਤੇਵਾ’’ਤਿ.

ਏਤ੍ਥ ਚ ਪਾਲ਼ਿਯਂ ‘‘ਅਚ੍ਚੇਨ੍ਤਿ ਕਾਲਾ’’ਤਿ ਸਾਮਞ੍ਞਤੋ ਕਾਲਸ੍ਸ ਅਪਗਮਨਂ ਦਸ੍ਸਿਤਂ, ਪੁਨ ਤਂ ਵਿਸੇਸਤੋਪਿ ਦਸ੍ਸੇਤੁਂ ਇਤਰਦ੍ਵਯਂ ਵੁਤ੍ਤਂ. ਅਟ੍ਠਕਥਾਯਂ ਪਨ ਮੁਦਿਨ੍ਦ੍ਰਿਯਸ੍ਸ ਵਸੇਨ ‘‘ਵਯੋਗੁਣਾ ਅਨੁਪੁਬ੍ਬਂ ਜਹਨ੍ਤੀ’’ਤਿ ਵੁਤ੍ਤਂ, ਮਜ੍ਝਿਮਿਨ੍ਦ੍ਰਿਯਸ੍ਸ ਵਸੇਨ ‘‘ਤਰਯਨ੍ਤਿ ਰਤ੍ਤਿਯੋ’’ਤਿ ਵੁਤ੍ਤਨ੍ਤਿ ਅਧਿਪ੍ਪਾਯੇਨ ‘‘ਕਾਲਾਤਿ ਪੁਰੇਭਤ੍ਤਾਦਯੋ ਕਾਲਾ’’ਤਿ ਵੁਤ੍ਤਂ. ਤਸ੍ਮਾ ਤਤ੍ਥ ਆਦਿ-ਸਦ੍ਦੇਨ ਪਚ੍ਛਾਭਤ੍ਤਪਠਮਯਾਮ-ਮੁਹੁਤ੍ਤਕਾਲਾਦਿ-ਕਾਲਕੋਟ੍ਠਾਸੋ ਏਵ ਅਣੁਪਭੇਦੋ ਕਾਲਵਿਭਾਗੋ ਗਹਿਤੋਤਿ ਵੇਦਿਤਬ੍ਬੋ. ਸੇਸਨ੍ਤਿ ਇਧ ਦ੍ਵੀਸੁ ਗਾਥਾਸੁ ਪਚ੍ਛਿਮਦ੍ਧੋ. ਸੋ ਹਿ ਇਧ ਅਤ੍ਥਤੋ ਅਧਿਗਤਤ੍ਤਾ ਅਨਨ੍ਤਰਸੁਤ੍ਤੇ ਚ ਵੁਤ੍ਤਤ੍ਤਾ ਅਤਿਦਿਸਿਤੋ.

ਅਚ੍ਚੇਨ੍ਤਿਸੁਤ੍ਤਵਣ੍ਣਨਾ ਨਿਟ੍ਠਿਤਾ.