੫. ਚਿਤ੍ਤਾਗਾਰਵਗ੍ਗੋ
੧. ਪਠਮਸਿਕ੍ਖਾਪਦ-ਅਤ੍ਥਯੋਜਨਾ
੯੭੮. ਚਿਤ੍ਤਾਗਾਰਵਗ੍ਗਸ੍ਸ ਪਠਮੇ ਰਞ੍ਞੋ ਕੀਲ਼ਨਟ੍ਠਾਨਂ ਅਗਾਰਂ ਰਾਜਾਗਾਰਨ੍ਤਿ ਵਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਰਞ੍ਞੋ ਕੀਲ਼ਨਘਰ’’ਨ੍ਤਿ. ਚਿਤ੍ਤਂ ਅਗਾਰਂ ਚਿਤ੍ਤਾਗਾਰਂ. ਆਰਾਮਨ੍ਤਿ ਨਗਰਤੋ ਨਾਤਿਦੂਰਆਰਾਮੋਤਿ ਆਹ ‘‘ਉਪਵਨ’’ਨ੍ਤਿ. ਉਯ੍ਯਾਨਨ੍ਤਿ ਸਮ੍ਪਨ੍ਨਪੁਪ੍ਫਫਲਤਾਯ ਉਦ੍ਧਂ ਉਲ੍ਲੋਕੇਤ੍ਵਾ ਮਨੁਸ੍ਸਾ ਯਨ੍ਤਿ ਗਚ੍ਛਨ੍ਤਿ ਏਤ੍ਥਾਤਿ ਉਯ੍ਯਾਨਂ. ਪੋਕ੍ਖਰਣਿਨ੍ਤਿ ਪੋਕ੍ਖਰਂ ਪਦੁਮਂ ਨੇਤੀਤਿ ਪੋਕ੍ਖਰਣੀ. ਪਞ੍ਚਪੀਤਿ ਰਾਜਾਗਾਰਾਦੀਨਿ ਪਞ੍ਚਪਿ. ਸਬ੍ਬਤ੍ਥਾਤਿ ਦਸ੍ਸਨਤ੍ਥਾਯ ਗਮਨੇ ਚ ਗਨ੍ਤ੍ਵਾ ਪਸ੍ਸਨੇ ਚਾਤਿ ਸਬ੍ਬੇਸੁ.
੯੮੧. ‘‘ਅਜ੍ਝਾਰਾਮੇ’’ਤਿਆਦਿਨਾ ਆਰਾਮੇ ਠਿਤਾਯ ਆਰਾਮਤੋ ਬਹਿ ਕਤੇ ਰਾਜਾਗਾਰਾਦਿਕੇ ਪਸ੍ਸਨ੍ਤਿਯਾਪਿ ਅਨਾਪਤ੍ਤੀਤਿ ਦਸ੍ਸੇਤਿ. ਤਾਨੀਤਿ ਰਾਜਾਗਾਰਾਦੀਨੀਤਿ. ਪਠਮਂ.
੨. ਦੁਤਿਯਸਿਕ੍ਖਾਪਦਂ
੯੮੨. ਦੁਤਿਯੇ ਅਨੁਤ੍ਤਾਨਟ੍ਠਾਨਂ ਨਤ੍ਥੀਤਿ. ਦੁਤਿਯਂ.
੩. ਤਤਿਯਸਿਕ੍ਖਾਪਦਂ
੯੮੮. ਤਤਿਯੇ ਯਤ੍ਤਕਨ੍ਤਿ ਯਤ੍ਤਕਂ ਸੁਤ੍ਤਨ੍ਤਿ ਸਮ੍ਬਨ੍ਧੋ. ਅਞ੍ਛਿਤਨ੍ਤਿ ਕਡ੍ਢਿਤਂ. ਤਸ੍ਮਿਨ੍ਤਿ ਤਤ੍ਤਕੇ ਸੁਤ੍ਤੇਤਿ ਸਮ੍ਬਨ੍ਧੋ. ਤਕ੍ਕਮ੍ਹੀਤਿ ਏਤ੍ਥ ਤਕ੍ਕੋਤਿ ਏਕੋ ਅਯੋਮਯੋ ਸੁਤ੍ਤਕਨ੍ਤਨਸ੍ਸ ਉਪਕਰਣਵਿਸੇਸੋ. ਸੋ ਹਿ ਤਕੀਯਤਿ ਸੁਤ੍ਤਂ ਬਨ੍ਧੀਯਤਿ ਏਤ੍ਥ, ਏਤੇਨਾਤਿ ਵਾ ਤਕ੍ਕੋਤਿ ਵੁਚ੍ਚਤਿ, ਤਸ੍ਮਿਂ. ਕਨ੍ਤਨਤੋਤਿ ਕਨ੍ਤੀਯਤੇ ਕਪ੍ਪਾਸਾਦਿਭਾਵਸ੍ਸ ਛਿਨ੍ਦੀਯਤੇ ਕਨ੍ਤਨਂ, ਤਤੋ.
੯੮੯. ਦਸਿਕਸੁਤ੍ਤਾਦਿਨ੍ਤਿ ਏਤ੍ਥ ਦਸਾਤਿ ਵਤ੍ਥਸ੍ਸਾਵਯਵੋ. ਸੋ ਹਿ ਦਿਯ੍ਯਤਿ ਅਵਖਣ੍ਡੀਯਤੀਤਿ ਦਸਾਤਿ ਵੁਚ੍ਚਤਿ, ਤਸ੍ਸਂ ਦਸਾਯਂ ਪਵਤ੍ਤਂ ਦਸਿਕਂ, ਤਮੇਵ ਸੁਤ੍ਤਂ ਦਸਿਕਸੁਤ੍ਤਂ. ਆਦਿਸਦ੍ਦੇਨ ਵਕ੍ਖਮਾਨਂ ਦੁਕ੍ਕਨ੍ਤਿਤਸੁਤ੍ਤਾਦਿਂ ਸਙ੍ਗਣ੍ਹਾਤੀਤਿ. ਤਤਿਯਂ.
੪. ਚਤੁਤ੍ਥਸਿਕ੍ਖਾਪਦਂ
੯੯੨. ਚਤੁਤ੍ਥੇ ਆਦਿਂ ਕਤ੍ਵਾਤਿ ਧੋਵਨਾਦੀਨਿ ਆਦਿਂ ਕਤ੍ਵਾ. ਖਾਦਨੀਯਾਦੀਸੂਤਿ ਪੂਵਖਾਦਨੀਯਾਦੀਸੁ. ਰੂਪਗਣਨਾਯਾਤਿ ਪੂਵਾਦੀਨਂ ਸਣ੍ਠਾਨਗਣਨਾਯ.
੯੯੩. ਯਾਗੁਪਾਨੇਤ੍ਤ ਯਾਗੁਸਙ੍ਖਾਤੇ ਪਾਨੇ. ਤੇਸਨ੍ਤਿ ਮਨੁਸ੍ਸਾਨਂ. ਵੇਯ੍ਯਾਵਚ੍ਚਕਰਟ੍ਠਾਨੇ ਠਪੇਤ੍ਵਾਤਿ ਮਾਤਾਪਿਤਰੋ ਅਤ੍ਤਨੋ ਵੇਯ੍ਯਾਵਚ੍ਚਕਰਟ੍ਠਾਨੇ ਠਪੇਤ੍ਵਾਤਿ. ਚਤੁਤ੍ਥਂ.
੫. ਪਞ੍ਚਮਸਿਕ੍ਖਾਪਦਂ
੯੯੬. ਪਞ੍ਚਮੇ ਵਿਨਿਚ੍ਛਿਨਨ੍ਤੀਤਿ ਅਧਿਕਰਣਂ ਵਿਨਿਚ੍ਛਿਨਨ੍ਤੀ ਭਿਕ੍ਖੁਨੀਤਿ ਯੋਜਨਾਤਿ. ਪਞ੍ਚਮਂ.
੬. ਛਟ੍ਠਸਿਕ੍ਖਾਪਦਂ
੯੯੯. ਛਟ੍ਠੇ ਅਨੁਤ੍ਤਾਨਵਚਨਂ ਨਤ੍ਥੀਤਿ.
੭. ਸਤ੍ਤਮਸਿਕ੍ਖਾਪਦਂ
੧੦੦੭. ਸਤ੍ਤਮੇ ‘‘ਪੁਨ ਪਰਿਯਾਯੇ’’ਤਿ ਏਤ੍ਥ ਪਰਿਯਾਯਸਦ੍ਦੋ ਵਾਰਵੇਵਚਨੋਤਿ ਆਹ ‘‘ਪੁਨ ਵਾਰੇ’’ਤਿ. ਮਹਗ੍ਘਚੀਵਰਨ੍ਤਿ ਮਹਗ੍ਘਂ ਆਵਸਥਚੀਵਰਨ੍ਤਿ. ਸਤ੍ਤਮਂ.
੮. ਅਟ੍ਠਮਸਿਕ੍ਖਾਪਦਂ
੧੦੦੮. ਅਟ੍ਠਮੇ ਅਨਿਸ੍ਸਜ੍ਜਿਤ੍ਵਾਤਿ ਏਤ੍ਥ ਬ੍ਰਹ੍ਮਦੇਯ੍ਯੇਨ ਨ ਅਨਿਸ੍ਸਜ੍ਜਨਂ, ਅਥ ਖੋ ਤਾਵਕਾਲਿਕਮੇਵਾਤਿ ਦਸ੍ਸੇਨ੍ਤੋ ਆਹ ‘‘ਰਕ੍ਖਨਤ੍ਥਾਯਾ’’ਤਿਆਦਿ.
੧੦੧੨. ਪਟਿਜਗ੍ਗਿਕਨ੍ਤਿ ਰਕ੍ਖਣਕਂ. ਵਚੀਭੇਦਨ੍ਤਿ ‘‘ਪਟਿਜਗ੍ਗਾਹੀ’’ਤਿ ਵਚੀਭੇਦਂ. ਰਟ੍ਠੇਤਿ ਵਿਜਿਤੇ. ਤਞ੍ਹਿ ਰਠਨ੍ਤਿ ਗਾਮਨਿਗਮਾਦਯੋ ਤਿਟ੍ਠਨ੍ਤਿ ਏਤ੍ਥਾਤਿ ਰਟ੍ਠਨ੍ਤਿ ਵੁਚ੍ਚਤੀਤਿ. ਅਟ੍ਠਮਂ.
੯. ਨਵਮਸਿਕ੍ਖਾਪਦਂ
੧੦੧੫. ਨਵਮੇ ਸਿਪ੍ਪਸਦ੍ਦੋ ਪਚ੍ਚੇਕਂ ਯੋਜੇਤਬ੍ਬੋ ‘‘ਹਤ੍ਥਿਸਿਪ੍ਪਞ੍ਚ ਅਸ੍ਸਸਿਪ੍ਪਞ੍ਚ ਰਥਸਿਪ੍ਪਞ੍ਚ ਧਨੁਸਿਪ੍ਪਞ੍ਚ ਥਰੁਸਿਪ੍ਪਞ੍ਚਾ’’ਤਿ. ਤਤ੍ਥ ਥਰੁਸਿਪ੍ਪਨ੍ਤਿ ਅਸਿਕੀਲ਼ਨਸਿਪ੍ਪਂ. ਮਨ੍ਤਸਦ੍ਦੋਪਿ ਪਚ੍ਚੇਕਂ ਯੋਜੇਤਬ੍ਬੋ ‘‘ਆਥਬ੍ਬਣਮਨ੍ਤੋ ਚ ਖੀਲਨਮਨ੍ਤੋ ਚ ਵਸੀਕਰਣਮਨ੍ਤੋ ਚ ਸੋਸਾਪਨਮਨ੍ਤੋ ਚਾ’’ਤਿ. ਤਤ੍ਥ ਆਥਬ੍ਬਣਮਨ੍ਤੋਤਿ ਆਥਬ੍ਬਣਵੇਦੇਨ ਵਿਹਿਤੋ ਪਰੂਪਘਾਤਕਰੋ ਮਨ੍ਤੋ. ਖੀਲਨਮਨ੍ਤੋਤਿ ਸਾਰਦਾਰੁਖੀਲਂ ਮਨ੍ਤੇਨ ਜਪ੍ਪਿਤ੍ਵਾ ਪਥਵਿਯਂ ਨਿਖਣਿਤ੍ਵਾ ਧਾਰਣਮਨ੍ਤੋ. ਵਸੀਕਰਣਮਨ੍ਤੋਤਿ ਮਨ੍ਤੇਨ ਜਪ੍ਪਿਤ੍ਵਾ ਪਰਸ੍ਸ ਉਮ੍ਮਤ੍ਤਭਾਵਮਾਪਨ੍ਨਕਰਣੋ ਮਨ੍ਤੋ. ਸੋਸਾਪਨਮਨ੍ਤੋਤਿ ਪਰਸ੍ਸ ਮਂਸਲੋਹਿਤਾਦਿਸੋਸਾਪਨਮਨ੍ਤੋ. ਅਗਦਪਯੋਗੋਤਿ ਭੁਸਵਿਸਸ੍ਸ ਪਯੋਜਨਂ. ਆਦਿਸਦ੍ਦੇਨ ਅਞ੍ਞੇਪਿ ਪਰੂਪਘਾਤਕਰਣੇ ਸਿਪ੍ਪੇ ਸਙ੍ਗਣ੍ਹਾਤਿ. ਯਕ੍ਖਪਰਿਤ੍ਤਨ੍ਤਿ ਯਕ੍ਖੇਹਿ ਸਮਨ੍ਤਤੋ ਤਾਣਂ. ਨਾਗਮਣ੍ਡਲਨ੍ਤਿ ਸਪ੍ਪਾਨਂ ਪਵੇਸਨਨਿਵਾਰਣਤ੍ਥਂ ਮਣ੍ਡਲਬਨ੍ਧਮਨ੍ਤੋ. ਆਦਿਸਦ੍ਦੇਨ ਵਿਸਪਟਿਹਨਨਮਨ੍ਤਾਦਯੋ ਸਙ੍ਗਣ੍ਹਾਤੀਤਿ. ਨਵਮਂ.
੧੦. ਦਸਮਸਿਕ੍ਖਾਪਦਂ
੧੦੧੮. ਦਸਮੇ ਅਨੁਤ੍ਤਾਨਵਚਨਂ ਨਤ੍ਥੀਤਿ. ਦਸਮਂ.
ਚਿਤ੍ਤਾਗਾਰਵਗ੍ਗੋ ਪਞ੍ਚਮੋ.