੮. ਅਟ੍ਠਮਸਿਕ੍ਖਾਪਦਂ

੮੨੪. ਅਟ੍ਠਮੇ ਨਿਬ੍ਬਿਟ੍ਠਰਾਜਭਟੋਤਿ ਏਤ੍ਥ ਉਤ੍ਤਰਪਦਸ੍ਸ ਛਟ੍ਠੀਸਮਾਸਞ੍ਚ ਪੁਬ੍ਬਪਦੇਨ ਬਾਹਿਰਤ੍ਥਸਮਾਸਞ੍ਚ ਦਸ੍ਸੇਨ੍ਤੋ ਆਹ ‘‘ਨਿਬ੍ਬਿਟ੍ਠੋ’’ਤਿਆਦਿ. ਤਤ੍ਥ ‘‘ਰਞ੍ਞੋ ਭਤੀ’’ਤਿ ਇਮਿਨਾ ਰਞ੍ਞੋ ਭਟੋ ਰਾਜਭਟੋਤਿ ਛਟ੍ਠੀਸਮਾਸਂ ਦਸ੍ਸੇਤਿ, ‘‘ਏਤੇਨਾ’’ਤਿ ਇਮਿਨਾ ਬਾਹਿਰਤ੍ਥਸਮਾਸਂ. ਨਿਬ੍ਬਿਟ੍ਠੋਤਿ ਨਿਵਿਟ੍ਠੋ ਪਤਿਟ੍ਠਾਪਿਤੋਤਿ ਅਤ੍ਥੋ. ਕੇਣੀਤਿ ਰਞ੍ਞੋ ਦਾਤਬ੍ਬਸ੍ਸ ਆਯਸ੍ਸੇਤਮਧਿਵਚਨਂ. ਏਤੇਨਾਤਿ ਬ੍ਰਾਹ੍ਮਣੇਨ. ਤਤੋਤਿ ਠਾਨਨ੍ਤਰਤੋ. ਭਟਸਙ੍ਖਾਤਾਯ ਕੇਣਿਯਾ ਪਥਤ੍ਤਾ ਕਾਰਣਤ੍ਤਾ ਠਾਨਨ੍ਤਰਂ ਭਟਪਥਨ੍ਤਿ ਆਹ ‘‘ਤਂਯੇਵ ਠਾਨਨ੍ਤਰ’’ਨ੍ਤਿ.

੮੨੬. ਚਤ੍ਤਾਰਿਪਿ ਵਤ੍ਥੂਨੀਤਿ ਉਚ੍ਚਾਰਾਦੀਨਿ. ਪਾਟੇਕ੍ਕਨ੍ਤਿ ਪਟਿਵਿਸੁਂ ਏਕੇਕਮੇਵ. ਉਚ੍ਚਾਰਂ ਵਾਤਿਆਦੀਸੁ ਵਾਸਦ੍ਦੇਨ ਦਨ੍ਤਕਟ੍ਠਾਦਯੋਪਿ ਗਹੇਤਬ੍ਬਾਤਿ ਆਹ ‘‘ਦਨ੍ਤਕਟ੍ਠ…ਪੇ… ਪਾਚਿਤ੍ਤਿਯਮੇਵਾ’’ਤਿ. ਸਬ੍ਬਤ੍ਥਾਤਿ ਸਬ੍ਬੇਸੁ ਉਚ੍ਚਾਰਾਦੀਸੂਤਿ. ਅਟ੍ਠਮਂ.