੫. ਪਞ੍ਚਮਸਿਕ੍ਖਾਪਦਂ

੮੧੦. ਪਞ੍ਚਮੇ ‘‘ਅਤਿਗਮ੍ਭੀਰ’’ਨ੍ਤਿਪਦਂ ਕਿਰਿਯਾਵਿਸੇਸਨਨ੍ਤਿ ਆਹ ‘‘ਅਤਿਅਨ੍ਤੋ ਪਵੇਸੇਤ੍ਵਾ’’ਤਿ. ‘‘ਉਦਕੇਨ ਧੋਵਨਂ ਕੁਰੁਮਾਨਾ’’ਤਿ ਇਮਿਨਾ ‘‘ਉਦਕਸੁਦ੍ਧਿਕ’’ਨ੍ਤਿਪਦਸ੍ਸ ਉਦਕੇਨ ਸੁਦ੍ਧਿਯਾ ਕਰਣਨ੍ਤਿ ਅਤ੍ਥਂ ਦਸ੍ਸੇਤਿ.

੮੧੨. ਦ੍ਵਙ੍ਗੁਲਪਬ੍ਬਪਰਮਨ੍ਤਿ ਏਤ੍ਥ ਦ੍ਵੇ ਅਙ੍ਗੁਲਾਨਿ ਚ ਦ੍ਵੇ ਪਬ੍ਬਾਨਿ ਚ ਦ੍ਵਙ੍ਗੁਲਪਬ੍ਬਂ, ਉਤ੍ਤਰਪਦੇ ਪੁਬ੍ਬਪਦਲੋਪੋ. ਦ੍ਵਙ੍ਗੁਲਪਬ੍ਬਂ ਪਰਮਂ ਪਮਾਣਂ ਏਤਸ੍ਸ ਉਦਕਸੁਦ੍ਧਿਕਸ੍ਸਾਤਿ ਦ੍ਵਙ੍ਗੁਲਪਬ੍ਬਪਰਮਂ. ਵਿਤ੍ਥਾਰਤੋ ਦ੍ਵਙ੍ਗੁਲਪਰਮਂ, ਗਮ੍ਭੀਰਤੋ ਦ੍ਵਿਪਬ੍ਬਪਰਮਨ੍ਤਿ ਵੁਤ੍ਤਂ ਹੋਤਿ. ਤੇਨਾਹ ‘‘ਵਿਤ੍ਥਾਰਤੋ’’ਤਿਆਦਿ. ਅਙ੍ਗੁਲਂ ਪਵੇਸੇਨ੍ਤਿਯਾਤਿ ਸਮ੍ਬਨ੍ਧੋ. ਹੀਤਿ ਸਚ੍ਚਂ. ‘‘ਚਤੁਨ੍ਨਂ ਵਾ’’ਤਿ ਇਦਂ ਉਕ੍ਕਟ੍ਠਵਸੇਨ ਵੁਤ੍ਤਂ, ਤਿਣ੍ਣਮ੍ਪਿ ਪਬ੍ਬਂ ਨ ਵਟ੍ਟਤਿ, ਚਤੁਨ੍ਨਂ ਪਨ ਪਗੇਵਾਤਿ ਅਤ੍ਥੋਤਿ. ਪਞ੍ਚਮਂ.