੪. ਚਤੁਤ੍ਥਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਂ

੭੪੮. ਚਤੁਤ੍ਥੇ ਕਿਣਾਤਿ ਅਨੇਨਾਤਿ ਕਯਨ੍ਤਿ ਵਚਨਤ੍ਥੇਨ ਮੂਲਂ ਕਯਂ ਨਾਮਾਤਿ ਆਹ ‘‘ਮੂਲੇਨਾ’’ਤਿ. ਸਾਤਿ ਥੁਲ੍ਲਨਨ੍ਦਾ, ਆਹ ਕਿਰਾਤਿ ਸਮ੍ਬਨ੍ਧੋ. ਞਾਧਾਤੁਯਾ ਅਵਬੋਧਨਤ੍ਥਤੋ ਅਞ੍ਞਮ੍ਪਿ ਞਾਧਾਤੁਯਾ ਯਾਚਨਤ੍ਥਂ ਦਸ੍ਸੇਨ੍ਤੋ ਆਹ ‘‘ਯਾਚਿਤ੍ਵਾ ਵਾ’’ਤਿ.

੭੫੨. ਯਨ੍ਤਿ ਸਬ੍ਬਿਤੇਲਾਦਿ. ਤਞ੍ਞੇਵਾਤਿ ਸਬ੍ਬਿਤੇਲਾਦਿਮੇਵ. ਯਮਕਨ੍ਤਿ ਸਬ੍ਬਿਂ ਸਹ ਤੇਲੇਨ ਯੁਗਲ਼ਂ ਕਤ੍ਵਾ. ਵੇਜ੍ਜੇਨਾਤਿ ਭਿਸਕ੍ਕੇਨ. ਸੋ ਹਿ ਆਯੁਬ੍ਬੇਦਸਙ੍ਖਾਤਂ ਵਿਜ੍ਜਂ ਜਾਨਾਤੀਤਿ ਵੇਜ੍ਜੋਤਿ ਚ ਰੋਗਞ੍ਚ ਤਸ੍ਸ ਨਿਦਾਨਞ੍ਚ ਭੇਸਜ੍ਜਞ੍ਚ ਵਿਦਤਿ ਜਾਨਾਤੀਤਿਪਿ ਵੇਜ੍ਜੋਤਿ ਚ ਵੁਚ੍ਚਤਿ. ਤਤੋਤਿ ਵੇਜ੍ਜੇਨ ਵੁਤ੍ਤਕਾਰਣਾ. ਕਹਾਪਣਸ੍ਸਾਤਿ ਕਹਾਪਣੇਨ, ਆਭਤਨ੍ਤਿ ਸਮ੍ਬਨ੍ਧੋਤਿ. ਚਤੁਤ੍ਥਂ.