੧੧. ਏਕਾਦਸਮਨਿਸ੍ਸਗ੍ਗਿਯਪਾਚਿਤ੍ਤਿਯਸਿਕ੍ਖਾਪਦਂ

੭੮੪. ਏਕਾਦਸਮੇ ਗਰੁਪਾਵੁਰਣਂ ਨਾਮ ਸੀਤਕਾਲੇ ਪਾਵੁਰਣਵਤ੍ਥਨ੍ਤਿ ਦਸ੍ਸੇਨ੍ਤੋ ਆਹ ‘‘ਸੀਤਕਾਲੇ ਪਾਵੁਰਣ’’ਨ੍ਤਿ. ਸੀਤਕਾਲੇ ਹਿ ਮਨੁਸ੍ਸਾ ਥੂਲਪਾਵੁਰਣਂ ਪਾਰੁਪਨ੍ਤਿ. ‘‘ਚਤੁਕ੍ਕਂਸਪਰਮ’’ਨ੍ਤਿ ਏਤ੍ਥ ਕਂਸਸਦ੍ਦੋ ਭੁਞ੍ਜਨਪਤ੍ਤੇ ਚ ਸੁਵਣ੍ਣਾਦਿਲੋਹਵਿਸੇਸੇ ਚ ਚਤੁਕਹਾਪਣੇ ਚਾਤਿ ਤੀਸੁ ਅਤ੍ਥੇਸੁ ਦਿਸ੍ਸਤਿ, ਇਧ ਪਨ ਚਤੁਕਹਾਪਣੇ ਵਤ੍ਤਤੀਤਿ ਦਸ੍ਸੇਨ੍ਤੋ ਆਹ ‘‘ਕਂਸੋ ਨਾਮ ਚਤੁਕ੍ਕਹਾਪਣਿਕੋ ਹੋਤੀ’’ਤਿ. ਚਤੁਕ੍ਕਂਸਸਙ੍ਖਾਤਂ ਪਰਮਂ ਇਮਸ੍ਸਾਤਿ ਚਤੁਕ੍ਕਂਸਪਰਮਂ, ਸੋਲ਼ਸਕਹਾਪਣਗ੍ਘਨਕਂ ਪਾਵੁਰਣਨ੍ਤਿ ਅਤ੍ਥੋਤਿ. ਏਕਾਦਸਮਂ.