੭. ਗਬ੍ਭਿਨਿਵਗ੍ਗੋ

੧. ਪਠਮਸਿਕ੍ਖਾਪਦ-ਅਤ੍ਥਯੋਜਨਾ

੧੦੬੯. ਗਬ੍ਭਿਨਿਵਗ੍ਗਸ੍ਸ ਪਠਮੇ ਕੁਚ੍ਛਿਂ ਪਵਿਟ੍ਠੋ ਸਤ੍ਤੋ ਏਤਿਸ੍ਸਾ ਅਤ੍ਥੀਤਿ ਕੁਚ੍ਛਿਪਵਿਟ੍ਠਸਤ੍ਤਾ. ‘‘ਕੁਚ੍ਛਿ’’ਨ੍ਤਿਪਿ ਪਾਠੋ. ਇਮਿਨਾ ਗਬ੍ਭਿਨੀਤਿ ਏਤ੍ਥ ਗਬ੍ਭਸਦ੍ਦੋ ਕੁਚ੍ਛਿਟ੍ਠਸਤ੍ਤਵਾਚਕੋਤਿ ਦਸ੍ਸੇਤਿ. ਗਬ੍ਭਸਦ੍ਦੋ (ਅਭਿਧਾਨਪ੍ਪਦੀਪਿਕਾਯਂ ੯੪੪ ਗਾਥਾਯਂ) ਹਿ ਕੁਚ੍ਛਿਟ੍ਠਸਤ੍ਤੇ ਚ ਕੁਚ੍ਛਿਮ੍ਹਿ ਚ ਓਵਰਕੇ ਚ ਵਤ੍ਤਤੀਤਿ. ਪਠਮਂ.

੨. ਦੁਤਿਯਸਿਕ੍ਖਾਪਦਂ

੧੦੭੩. ਦੁਤਿਯੇ ਥਞ੍ਞਂ ਪਿਵਤੀਤਿ ਪਾਯਨ੍ਤੋ, ਦਾਰਕੋ, ਸੋ ਏਤਿਸ੍ਸਾ ਅਤ੍ਥੀਤਿ ਪਾਯਨ੍ਤੀਤਿ ਦਸ੍ਸੇਨ੍ਤੋ ਆਹ ‘‘ਥਞ੍ਞਂ ਪਾਯਮਾਨਿ’’ਨ੍ਤਿ. ਦੁਤਿਯਂ.

੩. ਤਤਿਯਸਿਕ੍ਖਾਪਦਂ

੧੦੭੭. ਤਤਿਯੇ ਨਿਤ੍ਥਰਿਸ੍ਸਤੀਤਿ ਵਟ੍ਟਦੁਕ੍ਖਤੋ ਨਿਤ੍ਥਰਿਸ੍ਸਤਿ.

੧੦੭੯. ਪਾਣਾਤਿਪਾਤਾ ਵੇਰਮਣਿਨ੍ਤਿ ਏਤ੍ਥ ਪਾਣਾਤਿਪਾਤਾ ਵਿਰਮਤਿ ਇਮਾਯਾਤਿ ਵੇਰਮਣੀਤਿ ਅਤ੍ਥੇਨ ਸਿਕ੍ਖਾਪਦਂ ਵੇਰਮਣਿ ਨਾਮਾਤਿ ਆਹ ‘‘ਪਾਣਾਤਿਪਾਤਾ ਵੇਰਮਣਿਸਿਕ੍ਖਾਪਦ’’ਨ੍ਤਿ. ਯਂ ਤਂ ਸਿਕ੍ਖਾਪਦਨ੍ਤਿ ਸਮ੍ਬਨ੍ਧੋ. ਸਬ੍ਬਤ੍ਥਾਤਿ ‘‘ਅਦਿਨ੍ਨਾਦਾਨਾ ਵੇਰਮਣਿ’’ਨ੍ਤਿਆਦੀਸੁ ਸਬ੍ਬੇਸੁ ਵਾਕ੍ਯੇਸੁ. ਪਬ੍ਬਜਿਤਾਯ ਸਾਮਣੇਰਿਯਾਤਿ ਸਮ੍ਬਨ੍ਧੋ. ਏਤਾਸੂਤਿ ਛਸੁ ਸਿਕ੍ਖਾਸੂਤਿ. ਤਤਿਯਂ.

੪. ਚਤੁਤ੍ਥਸਿਕ੍ਖਾਪਦਂ

੧੦੮੪. ਚਤੁਤ੍ਥੇ ‘‘ਵੁਟ੍ਠਾਨਸਮ੍ਮੁਤੀ’’ਤਿ ਪਦਂ ‘‘ਹੋਤੀ’’ਤਿ ਪਦੇ ਕਤ੍ਤਾ, ‘‘ਦਾਤਬ੍ਬਾਯੇਵਾ’’ਤਿ ਪਦੇ ਕਮ੍ਮਨ੍ਤਿ. ਚਤੁਤ੍ਥਂ.

੫-੯. ਪਞ੍ਚਮਾਦਿਸਿਕ੍ਖਾਪਦਂ

੧੦੯੫. ਪਞ੍ਚਮਾਦੀਸੁ ਨਵਮਪਰਿਯੋਸਾਨੇਸੁ ਸਿਕ੍ਖਾਪਦੇਸੁ ਅਨੁਤ੍ਤਾਨਟ੍ਠਾਨਂ ਨਤ੍ਥੀਤਿ. ਪਞ੍ਚਮਛਟ੍ਠਸਤ੍ਤਮਟ੍ਠਮਨਵਮਾਨਿ.

੧੦. ਦਸਮਸਿਕ੍ਖਾਪਦਂ

੧੧੧੬. ਦਸਮੇ ਵੂਪਕਾਸੇਯ੍ਯਾਤਿ ਏਤ੍ਥ ਕਾਸਧਾਤੁਯਾ ਗਤ੍ਯਤ੍ਥਂ ਦਸ੍ਸੇਨ੍ਤੋ ਆਹ ‘‘ਗਚ੍ਛੇਯ੍ਯਾ’’ਤਿ. ਦਸਮਂ.

ਗਬ੍ਭਿਨਿਵਗ੍ਗੋ ਸਤ੍ਤਮੋ.