੭. ਸਤਿਪਟ੍ਠਾਨਵਿਭਙ੍ਗੋ

੧. ਸੁਤ੍ਤਨ੍ਤਭਾਜਨੀਯਂ

ਉਦ੍ਦੇਸਵਾਰਵਣ੍ਣਨਾ

੩੫੫. ਤਯੋ ਸਤਿਪਟ੍ਠਾਨਾਤਿ ਸਤਿਪਟ੍ਠਾਨ-ਸਦ੍ਦਸ੍ਸ ਅਤ੍ਥੁਦ੍ਧਾਰਂ ਕਰੋਤਿ, ਨ ਇਧ ਪਾਲ਼ਿਯਂ ਵੁਤ੍ਤਸ੍ਸ ਸਤਿਪਟ੍ਠਾਨ-ਸਦ੍ਦਸ੍ਸ ਅਤ੍ਥਦਸ੍ਸਨਂ. ਆਦੀਸੁ ਹਿ ਸਤਿਗੋਚਰੋਤਿ ਆਦਿ-ਸਦ੍ਦੇਨ ‘‘ਫਸ੍ਸਸਮੁਦਯਾ ਵੇਦਨਾਨਂ ਸਮੁਦਯੋ, ਨਾਮਰੂਪਸਮੁਦਯਾ ਚਿਤ੍ਤਸ੍ਸ ਸਮੁਦਯੋ, ਮਨਸਿਕਾਰਸਮੁਦਯਾ ਧਮ੍ਮਾਨਂ ਸਮੁਦਯੋ’’ਤਿ (ਸਂ. ਨਿ. ੫.੪੦੮) ਸਤਿਪਟ੍ਠਾਨਨ੍ਤਿ ਵੁਤ੍ਤਾਨਂ ਸਤਿਗੋਚਰਾਨਂ ਦੀਪਕੇ ਸੁਤ੍ਤਪ੍ਪਦੇਸੇ ਸਙ੍ਗਣ੍ਹਾਤਿ. ਏਵਂ ਪਟਿਸਮ੍ਭਿਦਾਪਾਲ਼ਿਯਮ੍ਪਿ ਅਵਸੇਸਪਾਲ਼ਿਪ੍ਪਦੇਸਦਸ੍ਸਨਤ੍ਥੋ ਆਦਿ-ਸਦ੍ਦੋ ਦਟ੍ਠਬ੍ਬੋ. ਦਾਨਾਦੀਨਿਪਿ ਕਰੋਨ੍ਤਸ੍ਸ ਰੂਪਾਦੀਨਿ ਕਸਿਣਾਦੀਨਿ ਚ ਸਤਿਯਾ ਠਾਨਂ ਹੋਤੀਤਿ ਤਂਨਿਵਾਰਣਤ੍ਥਮਾਹ ‘‘ਪਧਾਨਂ ਠਾਨ’’ਨ੍ਤਿ. ਪ-ਸਦ੍ਦੋ ਹਿ ਪਧਾਨਤ੍ਥਦੀਪਕੋਤਿ ਅਧਿਪ੍ਪਾਯੋ.

ਅਰਿਯੋਤਿ ਅਰਿਯਂ ਸੇਟ੍ਠਂ ਸਮ੍ਮਾਸਮ੍ਬੁਦ੍ਧਮਾਹ. ਏਤ੍ਥਾਤਿ ਏਤਸ੍ਮਿਂ ਸਲ਼ਾਯਤਨਵਿਭਙ੍ਗਸੁਤ੍ਤੇਤਿ ਅਤ੍ਥੋ. ਸੁਤ੍ਤੇਕਦੇਸੇਨ ਹਿ ਸੁਤ੍ਤਂ ਦਸ੍ਸੇਤਿ. ਤਤ੍ਥ ਹਿ –

‘‘ਤਯੋ ਸਤਿਪਟ੍ਠਾਨਾ ਯਦਰਿਯੋ…ਪੇ… ਅਰਹਤੀਤਿ ਇਤਿ ਖੋ ਪਨੇਤਂ ਵੁਤ੍ਤਂ, ਕਿਞ੍ਚੇਤਂ ਪਟਿਚ੍ਚ ਵੁਤ੍ਤਂ? ਇਧ, ਭਿਕ੍ਖਵੇ, ਸਤ੍ਥਾ ਸਾਵਕਾਨਂ ਧਮ੍ਮਂ ਦੇਸੇਤਿ ਅਨੁਕਮ੍ਪਕੋ ਹਿਤੇਸੀ ਅਨੁਕਮ੍ਪਂ ਉਪਾਦਾਯ ‘ਇਦਂ ਵੋ ਹਿਤਾਯ ਇਦਂ ਵੋ ਸੁਖਾਯਾ’ਤਿ. ਤਸ੍ਸ ਸਾਵਕਾ ਨ ਸੁਸ੍ਸੂਸਨ੍ਤਿ, ਨ ਸੋਤਂ ਓਦਹਨ੍ਤਿ, ਨ ਅਞ੍ਞਾ ਚਿਤ੍ਤਂ ਉਪਟ੍ਠਾਪੇਨ੍ਤਿ, ਵੋਕ੍ਕਮ੍ਮ ਚ ਸਤ੍ਥੁਸਾਸਨਾ ਵਤ੍ਤਨ੍ਤਿ. ਤਤ੍ਰ, ਭਿਕ੍ਖਵੇ, ਤਥਾਗਤੋ ਨ ਚੇਵ ਅਨਤ੍ਤਮਨੋ ਹੋਤਿ, ਨ ਚ ਅਨਤ੍ਤਮਨਤਂ ਪਟਿਸਂਵੇਦੇਤਿ, ਅਨਵਸ੍ਸੁਤੋ ਚ ਵਿਹਰਤਿ ਸਤੋ ਸਮ੍ਪਜਾਨੋ. ਇਦਂ, ਭਿਕ੍ਖਵੇ, ਪਠਮਂ ਸਤਿਪਟ੍ਠਾਨਂ. ਯਦਰਿਯੋ…ਪੇ… ਅਰਹਤਿ.

‘‘ਪੁਨ ਚਪਰਂ ਭਿਕ੍ਖਵੇ ਸਤ੍ਥਾ…ਪੇ… ਇਦਂ ਵੋ ਸੁਖਾਯਾਤਿ. ਤਸ੍ਸ ਏਕਚ੍ਚੇ ਸਾਵਕਾ ਨ ਸੁਸ੍ਸੂਸਨ੍ਤਿ…ਪੇ… ਵਤ੍ਤਨ੍ਤਿ. ਏਕਚ੍ਚੇ ਸਾਵਕਾ ਸੁਸ੍ਸੂਸਨ੍ਤਿ …ਪੇ… ਨ ਚ ਵੋਕ੍ਕਮ੍ਮ ਸਤ੍ਥੁਸਾਸਨਾ ਵਤ੍ਤਨ੍ਤਿ. ਤਤ੍ਰ, ਭਿਕ੍ਖਵੇ, ਤਥਾਗਤੋ ਨ ਚੇਵ ਅਤ੍ਤਮਨੋ ਹੋਤਿ, ਨ ਚ ਅਤ੍ਤਮਨਤਂ ਪਟਿਸਂਵੇਦੇਤਿ. ਨ ਚੇਵ ਅਨਤ੍ਤਮਨੋ ਹੋਤਿ, ਨ ਚ ਅਨਤ੍ਤਮਨਤਂ ਪਟਿਸਂਵੇਦੇਤਿ. ਅਤ੍ਤਮਨਤਞ੍ਚ ਅਨਤ੍ਤਮਨਤਞ੍ਚ ਤਦੁਭਯਂ ਅਭਿਨਿਵਜ੍ਜੇਤ੍ਵਾ ਉਪੇਕ੍ਖਕੋ ਚ ਵਿਹਰਤਿ ਸਤੋ ਸਮ੍ਪਜਾਨੋ. ਇਦਂ, ਭਿਕ੍ਖਵੇ, ਦੁਤਿਯਂ…ਪੇ….

‘‘ਪੁਨ ਚਪਰਂ…ਪੇ… ਸੁਖਾਯਾਤਿ. ਤਸ੍ਸ ਸਾਵਕਾ ਸੁਸ੍ਸੂਸਨ੍ਤਿ…ਪੇ… ਵਤ੍ਤਨ੍ਤਿ. ਤਤ੍ਰ, ਭਿਕ੍ਖਵੇ, ਤਥਾਗਤੋ ਅਤ੍ਤਮਨੋ ਚੇਵ ਹੋਤਿ, ਅਤ੍ਤਮਨਤਞ੍ਚ ਪਟਿਸਂਵੇਦੇਤਿ, ਅਨਵਸ੍ਸੁਤੋ ਚ ਵਿਹਰਤਿ ਸਤੋ ਸਮ੍ਪਜਾਨੋ. ਇਦਂ, ਭਿਕ੍ਖਵੇ, ਤਤਿਯ’’ਨ੍ਤਿ (ਮ. ਨਿ. ੩.੩੧੧) –

ਏਵਂ ਪਟਿਘਾਨੁਨਯੇਹਿ ਅਨਵਸ੍ਸੁਤਤਾ, ਨਿਚ੍ਚਂ ਉਪਟ੍ਠਿਤਸਤਿਤਾ, ਤਦੁਭਯਵੀਤਿਵਤ੍ਤਤਾ ਸਤਿਪਟ੍ਠਾਨਨ੍ਤਿ ਵੁਤ੍ਤਾ. ਬੁਦ੍ਧਾਨਮੇਵ ਕਿਰ ਨਿਚ੍ਚਂ ਉਪਟ੍ਠਿਤਸਤਿਤਾ ਹੋਤਿ, ਨ ਪਚ੍ਚੇਕਬੁਦ੍ਧਾਦੀਨਨ੍ਤਿ.

ਪ-ਸਦ੍ਦੋ ਆਰਮ੍ਭਂ ਜੋਤੇਤਿ, ਆਰਮ੍ਭੋ ਚ ਪਵਤ੍ਤੀਤਿ ਕਤ੍ਵਾ ਆਹ ‘‘ਪਵਤ੍ਤਯਿਤਬ੍ਬਤੋਤਿ ਅਤ੍ਥੋ’’ਤਿ. ਸਤਿਯਾ ਕਰਣਭੂਤਾਯ ਪਟ੍ਠਾਨਂ ਪਟ੍ਠਾਪੇਤਬ੍ਬਂ ਸਤਿਪਟ੍ਠਾਨਂ. ਅਨ-ਸਦ੍ਦਞ੍ਹਿ ਬਹੁਲਂ-ਵਚਨੇਨ ਕਮ੍ਮਤ੍ਥਂ ਇਚ੍ਛਨ੍ਤਿ ਸਦ੍ਦਵਿਦੂ, ਤਥੇਵ ਕਤ੍ਤੁਅਤ੍ਥਮ੍ਪਿ ਇਚ੍ਛਨ੍ਤੀਤਿ ਪੁਨ ਤਤਿਯਨਯੇ ‘‘ਪਤਿਟ੍ਠਾਤੀਤਿ ਪਟ੍ਠਾਨ’’ਨ੍ਤਿ ਵੁਤ੍ਤਂ. ਤਤ੍ਥ ਪ-ਸਦ੍ਦੋ ਭੁਸਤ੍ਥਂ ਪਕ੍ਖਨ੍ਦਨਂ ਦੀਪੇਤੀਤਿ ‘‘ਓਕ੍ਕਨ੍ਤਿਤ੍ਵਾ ਪਕ੍ਖਨ੍ਦਿਤ੍ਵਾ ਵਤ੍ਤਤੀਤਿ ਅਤ੍ਥੋ’’ਤਿ ਆਹ. ਪੁਨ ਭਾਵਤ੍ਥੇ ਸਤਿ-ਸਦ੍ਦਂ ਪਟ੍ਠਾਨ-ਸਦ੍ਦਞ੍ਚ ਵਣ੍ਣੇਨ੍ਤੋ ‘‘ਅਥ ਵਾ’’ਤਿਆਦਿਮਾਹ. ਤੇਨ ਪੁਰਿਮਤ੍ਥੇ ਸਤਿ-ਸਦ੍ਦੋ ਪਟ੍ਠਾਨ-ਸਦ੍ਦੋ ਚ ਕਤ੍ਤੁਅਤ੍ਥੋਤਿ ਵਿਞ੍ਞਾਯਤਿ.

ਵਿਸੇਸੇਨ ਕਾਯੋ ਚ ਵੇਦਨਾ ਚ ਅਸ੍ਸਾਦਸ੍ਸ ਕਾਰਣਨ੍ਤਿ ਤਪ੍ਪਹਾਨਤ੍ਥਂ ਤੇਸਂ ਤਣ੍ਹਾਵਤ੍ਥੂਨਂ ਓਲ਼ਾਰਿਕਸੁਖੁਮਾਨਂ ਅਸੁਭਦੁਕ੍ਖਤਾਦਸ੍ਸਨਾਨਿ ਮਨ੍ਦਤਿਕ੍ਖਪਞ੍ਞੇਹਿ ਤਣ੍ਹਾਚਰਿਤੇਹਿ ਸੁਕਰਾਨੀਤਿ ਤਾਨਿ ਤੇਸਂ ਵਿਸੁਦ੍ਧਿਮਗ੍ਗੋਤਿ ਵੁਤ੍ਤਾਨਿ, ਏਵਂ ਦਿਟ੍ਠਿਯਾ ਵਿਸੇਸਕਾਰਣੇਸੁ ਚਿਤ੍ਤਧਮ੍ਮੇਸੁ ਅਨਿਚ੍ਚਾਨਤ੍ਤਤਾਦਸ੍ਸਨਾਨਿ ਨਾਤਿਪਭੇਦਾਤਿਪਭੇਦਗਤੇਸੁ ਤੇਸੁ ਤਪ੍ਪਹਾਨਤ੍ਥਂ ਮਨ੍ਦਤਿਕ੍ਖਾਨਂ ਦਿਟ੍ਠਿਚਰਿਤਾਨਂ ਸੁਕਰਾਨੀਤਿ ਤੇਸਂ ਤਾਨਿ ਵਿਸੁਦ੍ਧਿਮਗ੍ਗੋਤਿ. ਤਿਕ੍ਖੋ ਸਮਥਯਾਨਿਕੋ ਓਲ਼ਾਰਿਕਾਰਮ੍ਮਣਂ ਪਰਿਗ੍ਗਣ੍ਹਨ੍ਤੋ ਤਤ੍ਥ ਅਟ੍ਠਤ੍ਵਾ ਝਾਨਂ ਸਮਾਪਜ੍ਜਿਤ੍ਵਾ ਵੁਟ੍ਠਾਯ ਵੇਦਨਂ ਪਰਿਗ੍ਗਣ੍ਹਾਤੀਤਿ ਆਹ ‘‘ਓਲ਼ਾਰਿਕਾਰਮ੍ਮਣੇ ਅਸਣ੍ਠਹਨਤੋ’’ਤਿ. ਵਿਪਸ੍ਸਨਾਯਾਨਿਕਸ੍ਸ ਸੁਖੁਮੇ ਚਿਤ੍ਤੇ ਧਮ੍ਮੇਸੁ ਚ ਚਿਤ੍ਤਂ ਪਕ੍ਖਨ੍ਦਤੀਤਿ ਤਦਨੁਪਸ੍ਸਨਾਨਂ ਤਂਵਿਸੁਦ੍ਧਿਮਗ੍ਗਤਾ ਵੁਤ੍ਤਾ.

ਤੇਸਂ ਤਤ੍ਥਾਤਿ ਏਤ੍ਥ ਤਤ੍ਥ-ਸਦ੍ਦਸ੍ਸ ਪਹਾਨਤ੍ਥਨ੍ਤਿ ਏਤੇਨ ਯੋਜਨਾ. ਪਞ੍ਚ ਕਾਮਗੁਣਾ ਸਵਿਸੇਸਾ ਕਾਯੇ ਲਬ੍ਭਨ੍ਤੀਤਿ ਵਿਸੇਸੇਨ ਕਾਯੋ ਕਾਮੋਘਸ੍ਸ ਵਤ੍ਥੁ, ਭਵੇ ਸੁਖਗ੍ਗਹਣਵਸੇਨ ਭਵਸ੍ਸਾਦੋ ਹੋਤੀਤਿ ਭਵੋਘਸ੍ਸ ਵੇਦਨਾ, ਸਨ੍ਤਤਿਘਨਗ੍ਗਹਣਵਸੇਨ ਚਿਤ੍ਤੇ ਅਤ੍ਤਾਭਿਨਿਵੇਸੋ ਹੋਤੀਤਿ ਦਿਟ੍ਠੋਘਸ੍ਸ ਚਿਤ੍ਤਂ, ਧਮ੍ਮਵਿਨਿਬ੍ਭੋਗਸ੍ਸ ਧਮ੍ਮਾਨਂ ਧਮ੍ਮਮਤ੍ਤਤਾਯ ਚ ਦੁਪ੍ਪਟਿਵਿਜ੍ਝਤ੍ਤਾ ਸਮ੍ਮੋਹੋ ਹੋਤੀਤਿ ਅਵਿਜ੍ਜੋਘਸ੍ਸ ਧਮ੍ਮਾ, ਤਸ੍ਮਾ ਤੇਸੁ ਤੇਸਂ ਪਹਾਨਤ੍ਥਂ ਚਤ੍ਤਾਰੋਵ ਵੁਤ੍ਤਾ, ਦੁਕ੍ਖਾਯ ਵੇਦਨਾਯ ਪਟਿਘਾਨੁਸਯੋ ਅਨੁਸੇਤੀਤਿ ਦੁਕ੍ਖਦੁਕ੍ਖਵਿਪਰਿਣਾਮਦੁਕ੍ਖਸਙ੍ਖਾਰਦੁਕ੍ਖਭੂਤਾ ਵੇਦਨਾ ਵਿਸੇਸੇਨ ਬ੍ਯਾਪਾਦਕਾਯਗਨ੍ਥਸ੍ਸ ਵਤ੍ਥੁ, ਚਿਤ੍ਤੇ ਨਿਚ੍ਚਗ੍ਗਹਣਵਸੇਨ ਸਸ੍ਸਤਸ੍ਸ ਅਤ੍ਤਨੋ ਸੀਲੇਨ ਸੁਦ੍ਧੀਤਿਆਦਿਪਰਾਮਸਨਂ ਹੋਤੀਤਿ ਸੀਲਬ੍ਬਤਪਰਾਮਾਸਸ੍ਸ ਚਿਤ੍ਤਂ, ਨਾਮਰੂਪਪਰਿਚ੍ਛੇਦੇਨ ਭੂਤਂ ਭੂਤਤੋ ਅਪਸ੍ਸਨ੍ਤਸ੍ਸ ਭਵਵਿਭਵਦਿਟ੍ਠਿਸਙ੍ਖਾਤੋ ਇਦਂਸਚ੍ਚਾਭਿਨਿਵੇਸੋ ਹੋਤੀਤਿ ਤਸ੍ਸ ਧਮ੍ਮਾ…ਪੇ… ਸੁਖਵੇਦਨਾਸ੍ਸਾਦਵਸੇਨ ਪਰਲੋਕਨਿਰਪੇਕ੍ਖੋ ‘‘ਨਤ੍ਥਿ ਦਿਨ੍ਨ’’ਨ੍ਤਿਆਦਿਪਰਾਮਾਸਂ ਉਪ੍ਪਾਦੇਤੀਤਿ ਦਿਟ੍ਠੁਪਾਦਾਨਸ੍ਸ ਵੇਦਨਾ. ਸਨ੍ਤਤਿਘਨਗ੍ਗਹਣਵਸੇਨ ਸਰਾਗਾਦਿਚਿਤ੍ਤੇ ਸਮ੍ਮੋਹੋ ਹੋਤੀਤਿ ਮੋਹਾਗਤਿਯਾ ਚਿਤ੍ਤਂ, ਧਮ੍ਮਸਭਾਵਾਨਵਬੋਧੇਨ ਭਯਂ ਹੋਤੀਤਿ ਭਯਾਗਤਿਯਾ ਧਮ੍ਮਾ…ਪੇ… ਅਵੁਤ੍ਤਾਨਂ ਵੁਤ੍ਤਨਯੇਨ ਵਤ੍ਥੁਭਾਵੋ ਯੋਜੇਤਬ੍ਬੋ.

‘‘ਆਹਾਰਸਮੁਦਯਾ ਕਾਯਸਮੁਦਯੋ, ਫਸ੍ਸਸਮੁਦਯਾ ਵੇਦਨਾਸਮੁਦਯੋ (ਸਂ. ਨਿ. ੫.੪੦੮), ਸਙ੍ਖਾਰਪਚ੍ਚਯਾ ਵਿਞ੍ਞਾਣਂ, ਵਿਞ੍ਞਾਣਪਚ੍ਚਯਾ ਨਾਮਰੂਪ’’ਨ੍ਤਿ (ਮ. ਨਿ. ੩.੧੨੬; ਸਂ. ਨਿ. ੨.੧; ਉਦਾ. ੧) ਵਚਨਤੋ ਕਾਯਾਦੀਨਂ ਸਮੁਦਯਭੂਤਾ ਕਬਲ਼ੀਕਾਰਾਹਾਰਫਸ੍ਸਮਨੋਸਞ੍ਚੇਤਨਾਵਿਞ੍ਞਾਣਾਹਾਰਾ ਕਾਯਾਦਿਪਰਿਜਾਨਨੇਨ ਪਰਿਞ੍ਞਾਤਾ ਹੋਨ੍ਤੀਤਿ ਆਹ ‘‘ਚਤੁਬ੍ਬਿਧਾਹਾਰਪਰਿਞ੍ਞਤ੍ਥ’’ਨ੍ਤਿ. ਪਕਰਣਨਯੋਤਿ ਤਮ੍ਬਪਣ੍ਣਿਭਾਸਾਯ ਵਣ੍ਣਨਾਨਯੋ. ਨੇਤ੍ਤਿਪੇਟਕਪ੍ਪਕਰਣੇ ਧਮ੍ਮਕਥਿਕਾਨਂ ਯੋਜਨਾਨਯੋਤਿਪਿ ਵਦਨ੍ਤਿ.

ਸਰਣਵਸੇਨਾਤਿ ਕਾਯਾਦੀਨਂ ਕੁਸਲਾਦਿਧਮ੍ਮਾਨਞ੍ਚ ਧਾਰਣਤਾਵਸੇਨ. ਸਰਨ੍ਤਿ ਗਚ੍ਛਨ੍ਤਿ ਏਤਾਯਾਤਿ ਸਤੀਤਿ ਇਮਸ੍ਮਿਂ ਅਤ੍ਥੇ ਏਕਤ੍ਤੇ ਨਿਬ੍ਬਾਨੇ ਸਮਾਗਮੋ ਏਕਤ੍ਤਸਮੋਸਰਣਂ. ਏਤਦੇਵ ਹਿ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿਮਾਹ. ਏਕਨਿਬ੍ਬਾਨਪ੍ਪਵੇਸਹੇਤੁਭੂਤੋ ਵਾ ਸਮਾਨਤਾਯ ਏਕੋ ਸਤਿਪਟ੍ਠਾਨਸਭਾਵੋ ਏਕਤ੍ਤਂ, ਤਤ੍ਥ ਸਮੋਸਰਣਂ ਤਂਸਭਾਗਤਾ ਏਕਤ੍ਤਸਮੋਸਰਣਂ. ਏਕਨਿਬ੍ਬਾਨਪ੍ਪਵੇਸਹੇਤੁਭਾਵਂ ਪਨ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿਮਾਹ. ਏਤਸ੍ਮਿਂ ਅਤ੍ਥੇ ਸਰਣੇਕਤ੍ਤਸਮੋਸਰਣਾਨਿ ਸਹ ਸਤਿਪਟ੍ਠਾਨੇਕਭਾਵਸ੍ਸ ਕਾਰਣਤ੍ਤੇਨ ਵੁਤ੍ਤਾਨੀਤਿ ਦਟ੍ਠਬ੍ਬਾਨਿ, ਪੁਰਿਮਸ੍ਮਿਂ ਵਿਸੁਂ. ਸਰਣਵਸੇਨਾਤਿ ਵਾ ਗਮਨਵਸੇਨਾਤਿ ਅਤ੍ਥੇ ਸਤਿ ਤਦੇਵ ਗਮਨਂ ਸਮੋਸਰਣਨ੍ਤਿ ਸਮੋਸਰਣੇ ਵਾ ਸਤਿ-ਸਦ੍ਦਤ੍ਥਵਸੇਨ ਅਵੁਚ੍ਚਮਾਨੇ ਧਾਰਣਤਾਵ ਸਤੀਤਿ ਸਤਿ-ਸਦ੍ਦਤ੍ਥਨ੍ਤਰਾਭਾਵਾ ਪੁਰਿਮਂ ਸਤਿਭਾਵਸ੍ਸ ਕਾਰਣਂ, ਪਚ੍ਛਿਮਂ ਏਕਭਾਵਸ੍ਸਾਤਿ ਨਿਬ੍ਬਾਨਸਮੋਸਰਣੇਪਿ ਸਹਿਤਾਨੇਵ ਤਾਨਿ ਸਤਿਪਟ੍ਠਾਨੇਕਭਾਵਸ੍ਸ ਕਾਰਣਾਨਿ.

ਚੁਦ੍ਦਸਵਿਧੇਨਾਤਿ ਇਦਂ ਮਹਾਸਤਿਪਟ੍ਠਾਨਸੁਤ੍ਤੇ (ਦੀ. ਨਿ. ੨.੩੭੨ ਆਦਯੋ; ਮ. ਨਿ. ੧.੧੦੫ ਆਦਯੋ) ਵੁਤ੍ਤਾਨਂ ਆਨਾਪਾਨਪਬ੍ਬਾਦੀਨਂ ਵਸੇਨ. ਤਥਾ ਪਞ੍ਚਵਿਧੇਨ ਧਮ੍ਮਾਨੁਪਸ੍ਸਨਨ੍ਤਿ ਏਤ੍ਥਾਪਿ ਦਟ੍ਠਬ੍ਬਂ. ਏਤ੍ਥ ਚ ਉਟ੍ਠਾਨਕਭਣ੍ਡਸਦਿਸਤਾ ਤਂਤਂਸਤਿਪਟ੍ਠਾਨਭਾਵਨਾਨੁਭਾਵਸ੍ਸ ਦਟ੍ਠਬ੍ਬਾ. ਭਿਕ੍ਖੁਗੋਚਰਾ ਹਿ ਏਤੇ. ਵੁਤ੍ਤਞ੍ਹਿ ‘‘ਗੋਚਰੇ, ਭਿਕ੍ਖਵੇ, ਚਰਥ ਸਕੇ ਪੇਤ੍ਤਿਕੇ ਵਿਸਯੇ’’ਤਿਆਦਿ (ਸਂ. ਨਿ. ੫.੩੭੨; ਦੀ. ਨਿ. ੩.੮੦).

ਕਾਯਾਨੁਪਸ੍ਸਨਾਦਿਪਟਿਪਤ੍ਤਿਯਾ ਭਿਕ੍ਖੁ ਹੋਤੀਤਿ ਭਿਕ੍ਖੁਂ ‘‘ਕਾਯਾਨੁਪਸ੍ਸੀ ਵਿਹਰਤੀ’’ਤਿਆਦਿਨਾ ਦਸ੍ਸੇਤਿ ਭਿਕ੍ਖੁਮ੍ਹਿ ਤਂਨਿਯਮਤੋ. ਤੇਨਾਹ ‘‘ਪਟਿਪਤ੍ਤਿਯਾ ਵਾ ਭਿਕ੍ਖੁਭਾਵਦਸ੍ਸਨਤੋ’’ਤਿ.

ਸਮਂ ਚਰੇਯ੍ਯਾਤਿ ਕਾਯਾਦਿਵਿਸਮਚਰਿਯਂ ਪਹਾਯ ਕਾਯਾਦੀਹਿ ਸਮਂ ਚਰੇਯ੍ਯ. ਰਾਗਾਦਿਵੂਪਸਮੇਨ ਸਨ੍ਤੋ, ਇਨ੍ਦ੍ਰਿਯਦਮਨੇਨ ਦਨ੍ਤੋ, ਚਤੁਮਗ੍ਗਨਿਯਮੇਨ ਨਿਯਤੋ, ਸੇਟ੍ਠਚਾਰਿਤਾਯ ਬ੍ਰਹ੍ਮਚਾਰੀ. ਕਾਯਦਣ੍ਡਾਦਿਓਰੋਪਨੇਨ ਨਿਧਾਯ ਦਣ੍ਡਂ. ਸੋ ਏਵਰੂਪੋ ਬਾਹਿਤਪਾਪਸਮਿਤਪਾਪਭਿਨ੍ਨਕਿਲੇਸਤਾਹਿ ਬ੍ਰਾਹ੍ਮਣਾਦਿਸਮਞ੍ਞੋ ਵੇਦਿਤਬ੍ਬੋ.

ਕਾਯਾਨੁਪਸ੍ਸਨਾਉਦ੍ਦੇਸਵਣ੍ਣਨਾ

ਅਸਮ੍ਮਿਸ੍ਸਤੋਤਿ ਵੇਦਨਾਦਯੋਪਿ ਏਤ੍ਥ ਸਿਤਾ, ਏਤ੍ਥ ਪਟਿਬਦ੍ਧਾਤਿ ਕਾਯੇ ਵੇਦਨਾਦਿਅਨੁਪਸ੍ਸਨਾਪਸਙ੍ਗੇਪਿ ਆਪਨ੍ਨੇ ਤਦਮਿਸ੍ਸਤੋਤਿ ਅਤ੍ਥੋ. ਅਵਯਵੀਗਾਹਸਮਞ੍ਞਾਤਿਧਾਵਨਸਾਰਾਦਾਨਾਭਿਨਿਵੇਸਨਿਸੇਧਨਤ੍ਥਂ ਕਾਯਂ ਅਙ੍ਗਪਚ੍ਚਙ੍ਗੇਹਿ, ਤਾਨਿ ਚ ਕੇਸਾਦੀਹਿ, ਕੇਸਾਦਿਕੇ ਚ ਭੂਤੁਪਾਦਾਯਰੂਪੇਹਿ ਵਿਨਿਬ੍ਭੁਜ੍ਜਨ੍ਤੋ ‘‘ਤਥਾ ਨ ਕਾਯੇ’’ਤਿਆਦਿਮਾਹ. ਪਾਸਾਦਾਦਿਨਗਰਾਵਯਵਸਮੂਹੇ ਅਵਯਵੀਵਾਦਿਨੋਪਿ ਅਵਯਵੀਗਾਹਂ ਨ ਕਰੋਨ੍ਤਿ. ਨਗਰਂ ਨਾਮ ਕੋਚਿ ਅਤ੍ਥੋ ਅਤ੍ਥੀਤਿ ਪਨ ਕੇਸਞ੍ਚਿ ਸਮਞ੍ਞਾਤਿਧਾਵਨਂ ਸਿਯਾਤਿ ਇਤ੍ਥਿਪੁਰਿਸਾਦਿਸਮਞ੍ਞਾਤਿਧਾਵਨੇ ਨਗਰਨਿਦਸ੍ਸਨਂ ਵੁਤ੍ਤਂ.

ਯਂ ਪਸ੍ਸਤਿ ਇਤ੍ਥਿਂ ਵਾ ਪੁਰਿਸਂ ਵਾ, ਨਨੁ ਚਕ੍ਖੁਨਾ ਇਤ੍ਥਿਪੁਰਿਸਦਸ੍ਸਨਂ ਨਤ੍ਥੀਤਿ? ਸਚ੍ਚਂ ਨਤ੍ਥਿ, ‘‘ਇਤ੍ਥਿਂ ਪਸ੍ਸਾਮਿ, ਪੁਰਿਸਂ ਪਸ੍ਸਾਮੀ’’ਤਿ ਪਨ ਪਵਤ੍ਤਸਞ੍ਞਾਯ ਵਸੇਨ ‘‘ਯਂ ਪਸ੍ਸਤੀ’’ਤਿ ਵੁਤ੍ਤਂ. ਮਿਚ੍ਛਾਦਸ੍ਸਨੇ ਵਾ ਦਿਟ੍ਠਿਯਾ ਯਂ ਪਸ੍ਸਤਿ, ਨ ਤਂ ਦਿਟ੍ਠਂ, ਤਂ ਰੂਪਾਯਤਨਂ ਨ ਹੋਤਿ, ਰੂਪਾਯਤਨਂ ਵਾ ਤਂ ਨ ਹੋਤੀਤਿ ਅਤ੍ਥੋ. ਅਥ ਵਾ ਤਂ ਕੇਸਾਦਿਭੂਤੁਪਾਦਾਯਸਮੂਹਸਙ੍ਖਾਤਂ ਦਿਟ੍ਠਂ ਨ ਹੋਤਿ, ਦਿਟ੍ਠਂ ਵਾ ਯਥਾਵੁਤ੍ਤਂ ਨ ਹੋਤੀਤਿ ਅਤ੍ਥੋ. ਯਂ ਦਿਟ੍ਠਂ ਤਂ ਨ ਪਸ੍ਸਤੀਤਿ ਯਂ ਰੂਪਾਯਤਨਂ, ਕੇਸਾਦਿਭੂਤੁਪਾਦਾਯਸਮੂਹਸਙ੍ਖਾਤਂ ਵਾ ਦਿਟ੍ਠਂ, ਤਂ ਪਞ੍ਞਾਚਕ੍ਖੁਨਾ ਭੂਤਤੋ ਨ ਪਸ੍ਸਤੀਤਿ ਅਤ੍ਥੋ.

ਨ ਅਞ੍ਞਧਮ੍ਮਾਨੁਪਸ੍ਸੀਤਿ ਨ ਅਞ੍ਞਸਭਾਵਾਨੁਪਸ੍ਸੀ, ਅਸੁਭਾਦਿਤੋ ਅਞ੍ਞਾਕਾਰਾਨੁਪਸ੍ਸੀ ਨ ਹੋਤੀਤਿ ਵੁਤ੍ਤਂ ਹੋਤਿ. ਪਥਵੀਕਾਯਨ੍ਤਿ ਕੇਸਾਦਿਪਥਵਿਂ ਧਮ੍ਮਸਮੂਹਤ੍ਤਾ ਕਾਯੋਤਿ ਵਦਤਿ, ਲਕ੍ਖਣਪਥਵਿਮੇਵ ਵਾ ਅਨੇਕਪ੍ਪਭੇਦਸਕਲਸਰੀਰਗਤਂ ਪੁਬ੍ਬਾਪਰਿਯਭਾਵੇਨ ਪਵਤ੍ਤਮਾਨਂ ਸਮੂਹਵਸੇਨ ਗਹੇਤ੍ਵਾ ਕਾਯੋਤਿ ਵਦਤਿ, ਏਵਂ ਅਞ੍ਞਤ੍ਥਾਪਿ.

ਅਜ੍ਝਤ੍ਤਬਹਿਦ੍ਧਾਤਿ ਅਜ੍ਝਤ੍ਤਬਹਿਦ੍ਧਾਧਮ੍ਮਾਨਂ ਘਟਿਤਾਰਮ੍ਮਣਂ ਏਕਤੋ ਆਰਮ੍ਮਣਭਾਵੋ ਨਤ੍ਥੀਤਿ ਅਤ੍ਥੋ, ਅਜ੍ਝਤ੍ਤਬਹਿਦ੍ਧਾ ਧਮ੍ਮਾ ਵਾ ਘਟਿਤਾਰਮ੍ਮਣਂ ਇਦਂ ਨਤ੍ਥੀਤਿ ਅਤ੍ਥੋ. ਤੀਸੁ ਭਵੇਸੁ ਕਿਲੇਸਾਨਨ੍ਤਿ ਭਵਤ੍ਤਯਵਿਸਯਾਨਂ ਕਿਲੇਸਾਨਨ੍ਤਿ ਅਤ੍ਥੋ.

ਸਬ੍ਬਤ੍ਥਿਕਨ੍ਤਿ ਸਬ੍ਬਤ੍ਥ ਭਵਂ. ਸਬ੍ਬਸ੍ਮਿਂ ਲੀਨੇ ਉਦ੍ਧਟੇ ਚ ਚਿਤ੍ਤੇ ਇਚ੍ਛਿਤਬ੍ਬਤ੍ਤਾ, ਸਬ੍ਬੇ ਵਾ ਲੀਨੇ ਉਦ੍ਧਟੇ ਚ ਭਾਵੇਤਬ੍ਬਾ ਬੋਜ੍ਝਙ੍ਗਾ ਅਤ੍ਥਿਕਾ ਏਤਾਯਾਤਿ ਸਬ੍ਬਤ੍ਥਿਕਾ. ਅਨ੍ਤੋਸਙ੍ਖੇਪੋਤਿ ਅਨ੍ਤੋਓਲੀਯਨਾ ਕੋਸਜ੍ਜਨ੍ਤਿ ਅਤ੍ਥੋ.

ਅਵਿਸੇਸੇਨ ਦ੍ਵੀਹਿਪਿ ਨੀਵਰਣਪ੍ਪਹਾਨਂ ਵੁਤ੍ਤਨ੍ਤਿ ਕਤ੍ਵਾ ਪੁਨ ਏਕੇਕੇਨ ਵੁਤ੍ਤਪ੍ਪਹਾਨਵਿਸੇਸਂ ਦਸ੍ਸੇਤੁਂ ‘‘ਵਿਸੇਸੇਨਾ’’ਤਿ ਆਹ, ‘‘ਵਿਨੇਯ੍ਯ ਨੀਵਰਣਾਨੀ’’ਤਿ ਅਵਤ੍ਵਾ ਅਭਿਜ੍ਝਾਦੋਮਨਸ੍ਸਵਿਨਯਸ੍ਸ ਵਾ ਪਯੋਜਨਂ ਦਸ੍ਸੇਨ੍ਤੋ ‘‘ਵਿਸੇਸੇਨਾ’’ਤਿਆਦਿਮਾਹ. ਕਾਯਾਨੁਪਸ੍ਸਨਾਭਾਵਨਾਯ ਉਜੁਵਿਪਚ੍ਚਨੀਕਾਨਂ ਅਨੁਰੋਧਵਿਰੋਧਾਦੀਨਂ ਪਹਾਨਦਸ੍ਸਨਞ੍ਹਿ ਏਤਸ੍ਸ ਪਯੋਜਨਨ੍ਤਿ. ਕਾਯਭਾਵਨਾਯਾਤਿ ਕਾਯਾਨੁਪਸ੍ਸਨਾਭਾਵਨਾ ਅਧਿਪ੍ਪੇਤਾ. ਤੇਨਾਤਿ ਅਨੁਰੋਧਾਦਿਪ੍ਪਹਾਨਵਚਨੇਨ.

ਸਬ੍ਬਤ੍ਥਿਕਕਮ੍ਮਟ੍ਠਾਨਂ ਬੁਦ੍ਧਾਨੁਸ੍ਸਤਿ ਮੇਤ੍ਤਾ ਮਰਣਸ੍ਸਤਿ ਅਸੁਭਭਾਵਨਾ ਚ. ਸਤਿਸਮ੍ਪਜਞ੍ਞੇਨ ਏਤੇਨ ਯੋਗਿਨਾ ਪਰਿਹਰਿਯਮਾਨਂ ਤਂ ਸਬ੍ਬਤ੍ਥਿਕਕਮ੍ਮਟ੍ਠਾਨਂ ਵੁਤ੍ਤਂ ਸਤਿਸਮ੍ਪਜਞ੍ਞਬਲੇਨ ਅਵਿਚ੍ਛਿਨ੍ਨਸ੍ਸ ਤਸ੍ਸ ਪਰਿਹਰਿਤਬ੍ਬਤ੍ਤਾ, ਸਤਿਯਾ ਵਾ ਸਮਥੋ ਵੁਤ੍ਤੋ ਸਮਾਧਿਕ੍ਖਨ੍ਧਸਙ੍ਗਹਿਤਤ੍ਤਾ.

ਕਾਯਾਨੁਪਸ੍ਸਨਾਉਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਵੇਦਨਾਨੁਪਸ੍ਸਨਾਦਿਉਦ੍ਦੇਸਵਣ੍ਣਨਾ

ਕੇਵਲਂ ਪਨਿਧਾਤਿਆਦਿਨਾ ਇਧ ਏਤ੍ਤਕਂ ਵੇਦਿਤਬ੍ਬਨ੍ਤਿ ਵੇਦਿਤਬ੍ਬਂ ਪਰਿਚ੍ਛੇਦਂ ਦਸ੍ਸੇਤਿ. ਅਦ੍ਦਮਦਕ੍ਖੀਤਿ ਦ੍ਵੇਪਿ ਏਕਤ੍ਥਾ. ਸਮ੍ਮਦ੍ਦਸੋਤਿ ਸਮ੍ਮਾ ਪਸ੍ਸਕੋ.

ਸੁਖਦੁਕ੍ਖਤੋਪਿ ਚਾਤਿ ਸੁਖਾਦੀਨਂ ਠਿਤਿਵਿਪਰਿਣਾਮਞਾਣਸੁਖਤਾਯ, ਵਿਪਰਿਣਾਮਟ੍ਠਿਤਿਅਞ੍ਞਾਣਦੁਕ੍ਖਤਾਯ ਚ ਵੁਤ੍ਤਤ੍ਤਾ ਤਿਸ੍ਸੋਪਿ ਚ ਸੁਖਤੋ ਤਿਸ੍ਸੋਪਿ ਚ ਦੁਕ੍ਖਤੋ ਅਨੁਪਸ੍ਸਿਤਬ੍ਬਾਤਿ ਅਤ੍ਥੋ.

ਰੂਪਾਦਿਆਰਮ੍ਮਣਛਨ੍ਦਾਦਿਅਧਿਪਤਿਞਾਣਾਦਿਸਹਜਾਤਕਾਮਾਵਚਰਾਦਿਭੂਮਿਨਾਨਤ੍ਤਭੇਦਾਨਂ ਕੁਸਲਾਕੁਸਲਤਬ੍ਬਿਪਾਕਕਿਰਿਯਾਨਾਨਤ੍ਤਭੇਦਸ੍ਸ ਚ ਆਦਿ-ਸਦ੍ਦੇਨ ਸਸਙ੍ਖਾਰਿਕਾਸਙ੍ਖਾਰਿਕਸਵਤ੍ਥੁਕਾਵਤ੍ਥੁਕਾਦਿਨਾਨਤ੍ਤਭੇਦਾਨਞ੍ਚ ਵਸੇਨਾਤਿ ਯੋਜੇਤਬ੍ਬਂ. ਸੁਞ੍ਞਤਾਧਮ੍ਮਸ੍ਸਾਤਿ ‘‘ਧਮ੍ਮਾ ਹੋਨ੍ਤਿ, ਖਨ੍ਧਾ ਹੋਨ੍ਤੀ’’ਤਿਆਦਿਨਾ (ਧ. ਸ. ੧੨੧) ਸੁਞ੍ਞਤਾਵਾਰੇ ਆਗਤਸੁਞ੍ਞਤਾਸਭਾਵਸ੍ਸ ਵਸੇਨ. ਕਾਮਞ੍ਚੇਤ੍ਥਾਤਿਆਦਿਨਾ ਪੁਬ੍ਬੇ ਪਹੀਨਤ੍ਤਾ ਪੁਨ ਪਹਾਨਂ ਨ ਵਤ੍ਤਬ੍ਬਨ੍ਤਿ ਚੋਦਨਂ ਦਸ੍ਸੇਤਿ, ਮਗ੍ਗਚਿਤ੍ਤਕ੍ਖਣੇ ਵਾ ਏਕਤ੍ਥ ਪਹੀਨਂ ਸਬ੍ਬਤ੍ਥ ਪਹੀਨਂ ਹੋਤੀਤਿ ਵਿਸੁਂ ਵਿਸੁਂ ਨ ਵਤ੍ਤਬ੍ਬਨ੍ਤਿ. ਤਤ੍ਥ ਪੁਰਿਮਚੋਦਨਾਯ ਨਾਨਾਪੁਗ੍ਗਲਪਰਿਹਾਰੋ, ਪਚ੍ਛਿਮਾਯ ਨਾਨਾਚਿਤ੍ਤਕ੍ਖਣਿਕਪਰਿਹਾਰੋ. ਲੋਕਿਯਭਾਵਨਾਯ ਹਿ ਕਾਯੇ ਪਹੀਨਂ ਨ ਵੇਦਨਾਦੀਸੁ ਵਿਕ੍ਖਮ੍ਭਿਤਂ ਹੋਤਿ. ਯਦਿਪਿ ਨ ਪਵਤ੍ਤੇਯ੍ਯ, ਨ ਪਟਿਪਕ੍ਖਭਾਵਨਾਯ ਤਤ੍ਥ ਸਾ ਅਭਿਜ੍ਝਾਦੋਮਨਸ੍ਸਸ੍ਸ ਅਪ੍ਪਵਤ੍ਤਿ ਹੋਤੀਤਿ ਪੁਨ ਤਪ੍ਪਹਾਨਂ ਵਤ੍ਤਬ੍ਬਮੇਵਾਤਿ. ਉਭਯਤ੍ਥ ਵਾ ਉਭਯਂ ਸਮ੍ਭਵਤੋ ਯੋਜੇਤਬ੍ਬਂ. ਏਕਤ੍ਥ ਪਹੀਨਂ ਸੇਸੇਸੁਪਿ ਪਹੀਨਂ ਹੋਤੀਤਿ ਮਗ੍ਗਸਤਿਪਟ੍ਠਾਨਭਾਵਨਂ, ਲੋਕਿਯਭਾਵਨਾਯ ਵਾ ਸਬ੍ਬਤ੍ਥ ਅਪ੍ਪਵਤ੍ਤਿਮਤ੍ਤਂ ਸਨ੍ਧਾਯ ਵੁਤ੍ਤਂ. ‘‘ਪਞ੍ਚਪਿ ਖਨ੍ਧਾ ਲੋਕੋ’’ਤਿ ਹਿ ਚਤੂਸੁਪਿ ਵੁਤ੍ਤਨ੍ਤਿ.

ਵੇਦਨਾਨੁਪਸ੍ਸਨਾਦਿਉਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਉਦ੍ਦੇਸਵਾਰਵਣ੍ਣਨਾ ਨਿਟ੍ਠਿਤਾ.

ਕਾਯਾਨੁਪਸ੍ਸਨਾਨਿਦ੍ਦੇਸਵਣ੍ਣਨਾ

੩੫੬. ਸਬ੍ਬਪ੍ਪਕਾਰਵਚਨੇਨ ਉਦ੍ਦੇਸੇ ਦਸ੍ਸਿਤਾ ਅਜ੍ਝਤ੍ਤਾਦਿਅਨੁਪਸ੍ਸਨਾ ਪਕਾਰਾ ਚ ਗਹਿਤਾ. ਤਤ੍ਥ ਅਨ੍ਤੋਗਧਾ ਚੁਦ੍ਦਸ ਪਕਾਰਾ, ਕਾਯਗਤਾਸਤਿਸੁਤ੍ਤੇ ਵੁਤ੍ਤਾ ਕੇਸਾਦਿਵਣ੍ਣਕਸਿਣਾਰਮ੍ਮਣਚਤੁਕ੍ਕਜ੍ਝਾਨਪ੍ਪਕਾਰਾ, ਲੋਕਿਯਾਦਿਪ੍ਪਕਾਰਾ ਚਾਤਿ ਤੇਪਿ ਗਹਿਤਾ ਏਵ. ਨਿਦ੍ਦੇਸੇ ਹਿ ਏਕਪ੍ਪਕਾਰਨਿਦ੍ਦੇਸੇਨ ਨਿਦਸ੍ਸਨਮਤ੍ਤਂ ਕਤਨ੍ਤਿ, ਸਬ੍ਬਪ੍ਪਕਾਰਗ੍ਗਹਣਞ੍ਚ ਬਾਹਿਰੇਸੁਪਿ ਏਕਦੇਸਸਮ੍ਭਵਤੋ ਕਤਨ੍ਤਿ ਦਟ੍ਠਬ੍ਬਂ.

ਤਿਰਿਯਂ ਤਚਪਰਿਚ੍ਛਿਨ੍ਨਨ੍ਤਿ ਏਤ੍ਥ ਨਨੁ ਕੇਸਲੋਮਨਖਾਨਂ ਅਤਚਪਰਿਚ੍ਛਿਨ੍ਨਤਾ ਤਚਸ੍ਸ ਚ ਅਤ੍ਥੀਤਿ? ਯਦਿਪਿ ਅਤ੍ਥਿ, ਤਚਪਰਿਚ੍ਛਿਨ੍ਨਬਹੁਲਤਾਯ ਪਨ ਤਚਪਰਿਚ੍ਛਿਨ੍ਨਤਾ ਨ ਨ ਹੋਤਿ ਕਾਯਸ੍ਸਾਤਿ ਏਵਂ ਵੁਤ੍ਤਂ. ਤਚੋ ਪਰਿਯਨ੍ਤੋ ਅਸ੍ਸਾਤਿ ਤਚਪਰਿਯਨ੍ਤੋਤਿ ਵੁਤ੍ਤੋਤਿ ਏਤੇਨ ਪਨ ਵਚਨੇਨ ਕਾਯੇਕਦੇਸਭੂਤੋ ਤਚੋ ਗਹਿਤੋ ਏਵ. ਤਪ੍ਪਟਿਬਦ੍ਧਾ ਚ ਕੇਸਾਦਯੋ ਤਦਨੁਪਵਿਟ੍ਠਮੂਲਾ ਤਚਪਰਿਯਨ੍ਤਾਵ ਹੋਨ੍ਤੀਤਿ ਦ੍ਵਤ੍ਤਿਂਸਾਕਾਰਸਮੂਹੋ ਸਬ੍ਬੋਪਿ ਕਾਯੋ ਤਚਪਰਿਯਨ੍ਤੋਤਿ ਵੁਤ੍ਤੋਤਿ ਵੇਦਿਤਬ੍ਬੋ.

‘‘ਪੂਰਂ ਨਾਨਪ੍ਪਕਾਰਸ੍ਸਾ’’ਤਿ ਵੁਤ੍ਤਂ, ਕੇ ਪਨ ਤੇ ਪਕਾਰਾ? ਯੇਹਿ ਨਾਨਪ੍ਪਕਾਰਂ ਅਸੁਚਿ ਵੁਤ੍ਤਨ੍ਤਿ ਕੇਸਾ ਲੋਮਾਤਿਆਦਿ ਵੁਤ੍ਤਨ੍ਤਿ ਇਮਮਤ੍ਥਂ ਦੀਪੇਨ੍ਤੋ ਆਹ ‘‘ਏਤੇ ਕੇਸਾਦਯੋ ਆਕਾਰਾ’’ਤਿ. ਆਕਾਰਾ ਪਕਾਰਾਤਿ ਹਿ ਏਕੋ ਅਤ੍ਥੋ.

ਨਿਸਿਨ੍ਨਸ੍ਸ ਯਾਵ ਅਪਰਿਪ੍ਫਨ੍ਦਨਿਸਜ੍ਜਾਮੂਲਕਂ ਦੁਕ੍ਖਂ ਉਪ੍ਪਜ੍ਜਤਿ, ਯਾਵਤਾ ਉਟ੍ਠਾਤਿ ਵਾ, ਤਾਵ ਏਕੋ ਨਿਸਜ੍ਜਵਾਰੋ. ਯੇਨ ਵਿਧਿਨਾ ਉਗ੍ਗਹੇ ਕੁਸਲੋ ਹੋਤਿ, ਸੋ ਸਤ੍ਤਵਿਧੋ ਵਿਧਿ ‘‘ਉਗ੍ਗਹਕੋਸਲ੍ਲ’’ਨ੍ਤਿ ਵੁਚ੍ਚਤਿ, ਤਂਨਿਬ੍ਬਤ੍ਤਂ ਵਾ ਞਾਣਂ.

ਪਥਵੀਧਾਤੁਬਹੁਲਭਾਵਤੋ ਮਤ੍ਥਲੁਙ੍ਗਸ੍ਸ ਕਰੀਸਾਵਸਾਨੇ ਤਨ੍ਤਿਆਰੋਪਨਮਾਹ. ਏਤ੍ਥ ਪਨ ਮਂਸਂ…ਪੇ… ਵਕ੍ਕਂ…ਪੇ… ਕੇਸਾਤਿ ਏਵਂ ਵਕ੍ਕਪਞ੍ਚਕਾਦੀਸੁ ਅਨੁਲੋਮਸਜ੍ਝਾਯਂ ਵਤ੍ਵਾ ਪਟਿਲੋਮਸਜ੍ਝਾਯੋ ਪੁਰਿਮੇਹਿ ਸਮ੍ਬਨ੍ਧੋ ਵੁਤ੍ਤੋ. ਸ੍ਵਾਯਂ ਯੇ ਪਰਤੋ ਵਿਸੁਂ ਤਿਪਞ੍ਚਾਹਂ, ਪੁਰਿਮੇਹਿ ਏਕਤੋ ਤਿਪਞ੍ਚਾਹਨ੍ਤਿ ਛਪਞ੍ਚਾਹਂ ਸਜ੍ਝਾਯਾ ਵਕ੍ਖਮਾਨਾ, ਤੇਸੁ ਆਦਿਅਨ੍ਤਦਸ੍ਸਨਵਸੇਨ ਵੁਤ੍ਤੋਤਿ ਦਟ੍ਠਬ੍ਬੋ. ਅਨੁਲੋਮਪਟਿਲੋਮਸਜ੍ਝਾਯੇਪਿ ਹਿ ਪਟਿਲੋਮਸਜ੍ਝਾਯੋ ਅਨ੍ਤਿਮੋਤਿ. ਸਜ੍ਝਾਯਪ੍ਪਕਾਰਨ੍ਤਰਂ ਵਾ ਏਤਮ੍ਪੀਤਿ ਵੇਦਿਤਬ੍ਬਂ. ਹਤ੍ਥਸਙ੍ਖਲਿਕਾ ਅਙ੍ਗੁਲਿਪਨ੍ਤਿ. ਲਕ੍ਖਣਪਟਿਵੇਧਸ੍ਸਾਤਿ ਅਸੁਭਲਕ੍ਖਣਪਟਿਵੇਧਸ੍ਸ, ਧਾਤੁਲਕ੍ਖਣਪਟਿਵੇਧਸ੍ਸ ਵਾ.

ਅਤ੍ਤਨੋ ਭਾਗੋ ਸਭਾਗੋ, ਸਭਾਗੇਨ ਪਰਿਚ੍ਛੇਦੋ ਸਭਾਗਪਰਿਚ੍ਛੇਦੋ, ਹੇਟ੍ਠੁਪਰਿਤਿਰਿਯਨ੍ਤੇਹਿ ਸਕਕੋਟ੍ਠਾਸਿਕਕੇਸਨ੍ਤਰਾਦੀਹਿ ਚ ਪਰਿਚ੍ਛੇਦੋਤਿ ਅਤ੍ਥੋ.

ਧਾਤੁਵਿਭਙ੍ਗੋ (ਮ. ਨਿ. ੩.੩੪੨ ਆਦਯੋ) ਪੁਕ੍ਕੁਸਾਤਿਸੁਤ੍ਤਂ. ਸਾਧਾਰਣਵਸੇਨਾਤਿ ਏਤ੍ਤਕੇਨੇਵ ਸਿਦ੍ਧੇ ਸਬ੍ਬ-ਗ੍ਗਹਣਂ ਵਣ੍ਣਕਸਿਣਵਸੇਨ ਚਤੁਕ੍ਕਜ੍ਝਾਨਿਕਸਮਥਸਾਧਾਰਣਤ੍ਤਸ੍ਸ ਚ ਦਸ੍ਸਨਤ੍ਥਂ.

ਓਕ੍ਕਮਨਵਿਸ੍ਸਜ੍ਜਨਨ੍ਤਿ ਪਟਿਪਜ੍ਜਿਤਬ੍ਬਵਜ੍ਜੇਤਬ੍ਬੇ ਮਗ੍ਗੇਤਿ ਅਤ੍ਥੋ. ਬਹਿਦ੍ਧਾ ਪੁਥੁਤ੍ਤਾਰਮ੍ਮਣੇਤਿ ਏਤ੍ਥ ਕਾਯਾਨੁਪਸ੍ਸਨਂ ਹਿਤ੍ਵਾ ਸੁਭਾਦਿਵਸੇਨ ਗਯ੍ਹਮਾਨਾ ਕੇਸਾਦਯੋਪਿ ਬਹਿਦ੍ਧਾ ਪੁਥੁਤ੍ਤਾਰਮ੍ਮਣਾਨੇਵਾਤਿ ਵੇਦਿਤਬ੍ਬਾ. ਉਕ੍ਕੁਟ੍ਠੁਕ੍ਕਟ੍ਠਿਟ੍ਠਾਨੇਯੇਵ ਉਟ੍ਠਹਿਤ੍ਵਾਤਿ ਪੁਬ੍ਬੇ ਵਿਯ ਏਕਤ੍ਥ ਕਤਾਯ ਉਕ੍ਕੁਟ੍ਠਿਯਾ ਕਮੇਨ ਸਬ੍ਬਤਾਲੇਸੁ ਪਤਿਤ੍ਵਾ ਉਟ੍ਠਹਿਤ੍ਵਾ ਪਰਿਯਨ੍ਤਤਾਲਂ ਆਦਿਤਾਲਞ੍ਚ ਅਗਨ੍ਤ੍ਵਾ ਤਤੋ ਤਤੋ ਤਤ੍ਥ ਤਤ੍ਥੇਵ ਕਤਾਯ ਉਕ੍ਕੁਟ੍ਠਿਯਾ ਉਟ੍ਠਹਿਤ੍ਵਾਤਿ ਅਤ੍ਥੋ.

ਅਧਿਚਿਤ੍ਤਨ੍ਤਿ ਸਮਥਵਿਪਸ੍ਸਨਾਚਿਤ੍ਤਂ. ਅਨੁਯੁਤ੍ਤੇਨਾਤਿ ਯੁਤ੍ਤਪਯੁਤ੍ਤੇਨ, ਭਾਵੇਨ੍ਤੇਨਾਤਿ ਅਤ੍ਥੋ. ਸਮਾਧਿਨਿਮਿਤ੍ਤਂ ਉਪਲਕ੍ਖਣਾਕਾਰੋ ਸਮਾਧਿਯੇਵ. ਮਨਸਿ ਕਾਤਬ੍ਬਨ੍ਤਿ ਚਿਤ੍ਤੇ ਕਾਤਬ੍ਬਂ, ਉਪ੍ਪਾਦੇਤਬ੍ਬਨ੍ਤਿ ਅਤ੍ਥੋ. ਸਮਾਧਿਕਾਰਣਂ ਵਾ ਆਰਮ੍ਮਣਂ ਸਮਾਧਿਨਿਮਿਤ੍ਤਂ ਆਵਜ੍ਜਿਤਬ੍ਬਨ੍ਤਿ ਅਤ੍ਥੋ. ਠਾਨਂ ਅਤ੍ਥੀਤਿ ਵਚਨਸੇਸੋ, ਤਂ ਚਿਤ੍ਤਂ ਕੋਸਜ੍ਜਾਯ ਸਂਵਤ੍ਤੇਯ੍ਯ, ਏਤਸ੍ਸ ਸਂਵਤ੍ਤਨਸ੍ਸ ਕਾਰਣਂ ਅਤ੍ਥੀਤਿ ਅਤ੍ਥੋ. ਤਂ ਵਾ ਮਨਸਿਕਰਣਂ ਚਿਤ੍ਤਂ ਕੋਸਜ੍ਜਾਯ ਸਂਵਤ੍ਤੇਯ੍ਯਾਤਿ ਏਤਸ੍ਸ ਠਾਨਂ ਕਾਰਣਨ੍ਤਿ ਅਤ੍ਥੋ. ਨ ਚ ਪਭਙ੍ਗੂਤਿ ਕਮ੍ਮਨਿਯਭਾਵੂਪਗਮਨੇਨ ਚ ਪਭਿਜ੍ਜਨਸਭਾਵਨ੍ਤਿ ਅਤ੍ਥੋ.

ਆਲਿਮ੍ਪੇਤੀਤਿ ਆਦੀਪੇਤਿ ਜਾਲੇਤਿ. ਤਞ੍ਚਾਤਿ ਤਂ ਪਿਲ਼ਨ੍ਧਨਵਿਕਤਿਸਙ੍ਖਾਤਂ ਅਤ੍ਥਂ ਪਯੋਜਨਂ. ਅਸ੍ਸਾਤਿ ਸੁਵਣ੍ਣਕਾਰਸ੍ਸ ਅਨੁਭੋਤਿ ਸਮ੍ਭੋਤਿ ਸਾਧੇਤਿ. ਅਸ੍ਸ ਵਾ ਸੁਵਣ੍ਣਸ੍ਸ ਤਂ ਅਤ੍ਥਂ ਸੁਵਣ੍ਣਕਾਰੋ ਅਨੁਭੋਤਿ ਪਾਪੁਣਾਤਿ.

ਅਭਿਞ੍ਞਾਯ ਇਦ੍ਧਿਵਿਧਾਦਿਞਾਣੇਨ ਸਚ੍ਛਿਕਰਣੀਯਸ੍ਸ ਇਦ੍ਧਿਵਿਧਪਚ੍ਚਨੁਭਵਨਾਦਿਕਸ੍ਸ ਅਭਿਞ੍ਞਾਸਚ੍ਛਿਕਰਣੀਯਸ੍ਸ. ਪਚ੍ਚਕ੍ਖਂ ਯਸ੍ਸ ਅਤ੍ਥਿ, ਸੋ ਸਕ੍ਖਿ, ਸਕ੍ਖਿਨੋ ਭਬ੍ਬਤਾ ਸਕ੍ਖਿਭਬ੍ਬਤਾ, ਸਕ੍ਖਿਭਵਨਤਾਤਿ ਵੁਤ੍ਤਂ ਹੋਤਿ. ਸਕ੍ਖਿ ਚ ਸੋ ਭਬ੍ਬੋ ਚਾਤਿ ਵਾ ਸਕ੍ਖਿਭਬ੍ਬੋ. ਅਯਞ੍ਹਿ ਇਦ੍ਧਿਵਿਧਾਦੀਨਂ ਭਬ੍ਬੋ, ਤਤ੍ਥ ਚ ਸਕ੍ਖੀਤਿ ਸਕ੍ਖਿਭਬ੍ਬੋ, ਤਸ੍ਸ ਭਾਵੋ ਸਕ੍ਖਿਭਬ੍ਬਤਾ, ਤਂ ਪਾਪੁਣਾਤਿ. ਆਯਤਨੇਤਿ ਪੁਬ੍ਬਹੇਤਾਦਿਕੇ ਕਾਰਣੇ ਸਤਿ.

ਸੀਤਿਭਾਵਨ੍ਤਿ ਨਿਬ੍ਬਾਨਂ, ਕਿਲੇਸਦਰਥਵੂਪਸਮਂ ਵਾ. ਸਮ੍ਪਹਂਸੇਤੀਤਿ ਸਮਪਵਤ੍ਤਂ ਚਿਤ੍ਤਂ ਤਥਾਪਵਤ੍ਤਿਯਾ ਪਞ੍ਞਾਯ ਤੋਸੇਤਿ ਉਤ੍ਤੇਜੇਤਿ. ਯਦਾ ਵਾ ਨਿਰਸ੍ਸਾਦਂ ਚਿਤ੍ਤਂ ਭਾਵਨਾਯ ਨ ਪਕ੍ਖਨ੍ਦਤਿ, ਤਦਾ ਜਾਤਿਆਦੀਨਿ ਸਂਵੇਗਵਤ੍ਥੂਨਿ ਪਚ੍ਚਵੇਕ੍ਖਿਤ੍ਵਾ ਸਮ੍ਪਹਂਸੇਤਿ ਸਮੁਤ੍ਤੇਜੇਤਿ.

ਤਿਰਿਯਂ ਅਞ੍ਞਮਞ੍ਞੇਨ ਪਰਿਚ੍ਛਿਨ੍ਨਾ, ਕਥਂ? ਦ੍ਵੇ ਕੇਸਾ ਏਕਤੋ ਨਤ੍ਥੀਤਿ. ਆਸਯੋਤਿ ਨਿਸ੍ਸਯੋ, ਪਚ੍ਚਯੋਤਿ ਅਤ੍ਥੋ.

ਨਖਾ ਤਿਰਿਯਂ ਅਞ੍ਞਮਞ੍ਞੇਨ ਪਰਿਚ੍ਛਿਨ੍ਨਾਤਿ ਵਿਸੁਂ ਵਵਤ੍ਥਿਤਤਂ ਸਨ੍ਧਾਯ ਵੁਤ੍ਤਂ. ਤਮੇਵ ਹਿ ਅਤ੍ਥਂ ਦਸ੍ਸੇਤੁਂ ‘‘ਦ੍ਵੇ ਨਖਾ ਏਕਤੋ ਨਤ੍ਥੀ’’ਤਿ ਆਹਾਤਿ.

ਸੁਖੁਮਮ੍ਪੀਤਿ ਯਥਾਵੁਤ੍ਤਓਲ਼ਾਰਿਕਚਮ੍ਮਤੋ ਸੁਖੁਮਂ ਅਨ੍ਤੋਮੁਖਚਮ੍ਮਾਦਿ. ਕੋਟ੍ਠਾਸੇਸੁ ਵਾ ਤਚੇਨ ਪਰਿਚ੍ਛਿਨ੍ਨਤ੍ਤਾ ਯਂ ਦੁਰੁਪਲਕ੍ਖਣੀਯਂ, ਤਂ ‘‘ਸੁਖੁਮ’’ਨ੍ਤਿ ਵੁਤ੍ਤਂ. ਤਞ੍ਹਿ ਵੁਤ੍ਤਨਯੇਨ ਤਚਂ ਵਿਵਰਿਤ੍ਵਾ ਪਸ੍ਸਨ੍ਤਸ੍ਸ ਪਾਕਟਂ ਹੋਤੀਤਿ.

ਤਾਲਗੁਲ਼ਪਟਲਂ ਨਾਮ ਪਕ੍ਕਤਾਲਫਲਲਸਿਕਂ ਤਾਲਪਟ੍ਟਿਕਾਯ ਲਿਮ੍ਪਿਤ੍ਵਾ ਸੁਕ੍ਖਾਪੇਤ੍ਵਾ ਉਦ੍ਧਰਿਤ੍ਵਾ ਗਹਿਤਪਟਲਂ.

ਏਵਂ ਤਿਮਤ੍ਤਾਨੀਤਿ ਏਵਂ-ਮਤ੍ਤ-ਸਦ੍ਦੇਹਿ ਗੋਪ੍ਫਕਟ੍ਠਿਕਾਦੀਨਿ ਅਵੁਤ੍ਤਾਨਿਪਿ ਦਸ੍ਸੇਤੀਤਿ ਵੇਦਿਤਬ੍ਬਂ. ਕੀਲ਼ਾਗੋਲ਼ਕਾਨਿ ਸੁਤ੍ਤੇਨ ਬਨ੍ਧਿਤ੍ਵਾ ਅਞ੍ਞਮਞ੍ਞਂ ਘਟ੍ਟੇਤ੍ਵਾ ਕੀਲ਼ਨਗੋਲ਼ਕਾਨਿ.

ਤਤ੍ਥ ਜਙ੍ਘਟ੍ਠਿਕਸ੍ਸ ਪਤਿਟ੍ਠਿਤਟ੍ਠਾਨਨ੍ਤਿ ਜਣ੍ਣੁਕਟ੍ਠਿਮ੍ਹਿ ਪਵਿਸਿਤ੍ਵਾ ਠਿਤਟ੍ਠਾਨਨ੍ਤਿ ਅਧਿਪ੍ਪਾਯੋ. ਤੇਨ ਅਟ੍ਠਿਨਾ ਪਤਿਟ੍ਠਿਤਟ੍ਠਾਨਂ ਯਂ ਕਟਿਟ੍ਠਿਨੋ, ਤਂ ਅਗ੍ਗਛਿਨ੍ਨਮਹਾਪੁਨ੍ਨਾਗਫਲਸਦਿਸਂ. ਸੀਸਕਪਟ੍ਟਵੇਠਕਂ ਵੇਠੇਤ੍ਵਾ ਠਪਿਤਸੀਸਮਯਂ ਪਟ੍ਟਕਂ. ਸੁਤ੍ਤਕਨ੍ਤਨਸਲਾਕਾਵਿਦ੍ਧਾ ਗੋਲ਼ਕਾ ਵਟ੍ਟਨਾਤਿ ਵੁਚ੍ਚਨ੍ਤਿ, ਵਟ੍ਟਨਾਨਂ ਆਵਲਿ ਵਟ੍ਟਨਾਵਲਿ. ਅਵਲੇਖਨਸਤ੍ਥਕਂ ਉਚ੍ਛੁਤਚਾਵਲੇਖਨਸਤ੍ਥਕਂ.

ਵਕ੍ਕਭਾਗੇਨ ਪਰਿਚ੍ਛਿਨ੍ਨਨ੍ਤਿ ਵਕ੍ਕਪਰਿਯਨ੍ਤਭਾਗੇਨ ਪਰਿਚ੍ਛਿਨ੍ਨਂ.

ਸਕ੍ਖਰਸੁਧਾਵਣ੍ਣਨ੍ਤਿ ਮਰੁਮ੍ਪੇਹਿ ਕਤਸੁਧਾਵਣ੍ਣਂ. ‘‘ਸੇਤਸਕ੍ਖਰਸੁਧਾਵਣ੍ਣ’’ਨ੍ਤਿ ਚ ਪਾਠਂ ਵਦਨ੍ਤਿ, ਸੇਤਸਕ੍ਖਰਾਵਣ੍ਣਂ ਸੁਧਾਵਣ੍ਣਞ੍ਚਾਤਿ ਅਤ੍ਥੋ.

ਯਤ੍ਥ ਅਨ੍ਨਪਾਨਂ ਨਿਪਤਿਤ੍ਵਾ ਤਿਟ੍ਠਤੀਤਿ ਸਮ੍ਬਨ੍ਧੋ.

ਵਿਸਮਚ੍ਛਿਨ੍ਨਕਲਾਪੋ ਵਿਸਮਂ ਉਦਕਂ ਪਗ੍ਘਰਤਿ, ਏਵਮੇਵ ਸਰੀਰਂ ਕੇਸਕੂਪਾਦਿਵਿਵਰੇਹਿ ਉਪਰਿ ਹੇਟ੍ਠਾ ਤਿਰਿਯਞ੍ਚ ਵਿਸਮਂ ਪਗ੍ਘਰਤੀਤਿ ਦਸ੍ਸੇਤੁਂ ਵਿਸਮਚ੍ਛਿਨ੍ਨ-ਗ੍ਗਹਣਂ ਕਰੋਤਿ.

ਅਤਿਕਟੁਕਅਚ੍ਚੁਣ੍ਹਾਦਿਕੋ ਵਿਸਭਾਗਾਹਾਰੋ ਉਣ੍ਹਕਾਲੇ ਪਵਤ੍ਤਮਾਨਾਨਂ ਧਾਤੂਨਂ ਵਿਸਭਾਗਤ੍ਤਾ.

ਏਕਤ੍ਤਾਰਮ੍ਮਣਬਲੇਨੇਵ ਵਾਤਿ ਵਿਕ੍ਖਮ੍ਭਿਤਨੀਵਰਣੇਨ ਸੁਸਮਾਹਿਤਚਿਤ੍ਤੇਨ ਉਪਟ੍ਠਿਤਸ੍ਸ ਨਾਨਾਰਮ੍ਮਣਵਿਪ੍ਫਨ੍ਦਨਵਿਰਹੇਨ ਏਕਸਭਾਵਸ੍ਸ ਆਰਮ੍ਮਣਸ੍ਸ ਵਸੇਨ. ਤਞ੍ਹਿ ਏਕਤ੍ਤਾਰਮ੍ਮਣਂ ਉਪਟ੍ਠਹਮਾਨਮੇਵ ਅਤ੍ਤਨਿ ਅਭਿਰਤਿਂ, ਸਾਤਿਸਯਂ ਫਰਣਪੀਤਿਂ, ਇਟ੍ਠਾਕਾਰਾਨੁਭਵਨਞ੍ਚ ਸੋਮਨਸ੍ਸਂ ਉਪ੍ਪਾਦੇਤਿ. ਨ ਹਿ ਅਭਿਰਤਿਸੋਮਨਸ੍ਸੇਹਿ ਵਿਨਾ ਅਨਤਿਕ੍ਕਨ੍ਤਪੀਤਿਸੁਖਸ੍ਸ ਏਕਤ੍ਤੁਪਟ੍ਠਾਨਂ ਅਤ੍ਥੀਤਿ.

ਅਵਿਸੇਸਤੋ ਪਨ ਸਾਧਾਰਣਵਸੇਨਾਤਿ ਪਟਿਕੂਲਧਾਤੁਵਣ੍ਣਵਿਸੇਸਂ ਅਕਤ੍ਵਾ ਸਮਥਵਿਪਸ੍ਸਨਾਸਾਧਾਰਣਵਸੇਨਾਤਿ ਅਤ੍ਥੋ. ਤਿਵਿਧੇਨਾਤਿ ਅਨੁਲੋਮਾਦਿਨਾ ਵਕ੍ਖਮਾਨੇਨ. ਛ ਮਾਸੇਤਿ ਅਦ੍ਧਮਾਸੇ ਊਨੇਪਿ ਮਾਸਪਰਿਚ੍ਛੇਦੇਨ ਪਰਿਚ੍ਛਿਜ੍ਜਮਾਨੇ ਸਜ੍ਝਾਯੇ ਛ ਮਾਸਾ ਪਰਿਚ੍ਛੇਦਕਾ ਹੋਨ੍ਤੀਤਿ ਕਤ੍ਵਾ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਪਰਿਚ੍ਛਿਜ੍ਜਮਾਨਸ੍ਸ ਮਾਸਨ੍ਤਰਗਮਨਨਿਵਾਰਣਞ੍ਹਿ ਛਮਾਸਗ੍ਗਹਣਂ, ਨ ਸਕਲਛਮਾਸੇ ਪਰਿਵਤ੍ਤਦਸ੍ਸਨਤ੍ਥਂ. ਆਚਰਿਯਾਤਿ ਅਟ੍ਠਕਥਾਚਰਿਯਾ.

ਲਕ੍ਖਣਨ੍ਤਿ ਧਾਤੁਪਟਿਕੂਲਲਕ੍ਖਣਂ. ਜਨਂ ਨ ਅਰਹਨ੍ਤੀਤਿ ਅਜਞ੍ਞਾ, ਜਨੇ ਪਵੇਸੇਤੁਂ ਅਯੁਤ੍ਤਾ ਜਿਗੁਚ੍ਛਨੀਯਾਤਿ ਵੁਤ੍ਤਂ ਹੋਤਿ.

ਪਟਿਪਾਟਿਯਾ ਅਟ੍ਠੀਨੀਤਿ ਪਟਿਪਾਟਿਯਾ ਅਟ੍ਠੀਨਿ ਕੋਟਿਯਾ ਠਿਤਾਨਿ. ਨ ਏਤ੍ਥ ਕੋਚਿ ਅਤ੍ਤਾ ਨਾਮ ਅਤ੍ਥਿ, ਅਟ੍ਠੀਨਿ ਏਵ ਅਟ੍ਠਿਪੁਞ੍ਜਮਤ੍ਤੋ ਏਵਾਯਂ ਸਙ੍ਘਾਟੋਤਿ ਦਸ੍ਸੇਤਿ. ਅਨੇਕਸਨ੍ਧਿਯਮਿਤੋਤਿ ਅਨੇਕੇਹਿ ਸਨ੍ਧੀਹਿ ਯਮਿਤੋ ਸਮ੍ਬਦ੍ਧੋ ਸੋ ਅਟ੍ਠਿਪੁਞ੍ਜੋਤਿ ਦਸ੍ਸੇਤਿ. ਨ ਕੇਹਿਚੀਤਿ ਯਮੇਨ੍ਤਂ ਅਤ੍ਤਾਨਂ ਪਟਿਸੇਧੇਤਿ. ਚੋਦਿਤੋ ਜਰਾਯ ਮਰਣਾਭਿਮੁਖਗਮਨੇਨ ਚੋਦਿਤੋ.

ਮਹਾਭੂਤਂ ਉਪਾਦਾਰੂਪੇਨ ਪਰਿਚ੍ਛਿਨ੍ਨਂ ‘‘ਨੀਲਂ ਪੀਤਂ ਸੁਗਨ੍ਧਂ ਦੁਗ੍ਗਨ੍ਧ’’ਨ੍ਤਿਆਦਿਨਾ. ਉਪਾਦਾਰੂਪਂ ਮਹਾਭੂਤੇਨ ਤਨ੍ਨਿਸ੍ਸਿਤਸ੍ਸ ਤਸ੍ਸ ਤਤੋ ਬਹਿ ਅਭਾਵਾ. ਛਾਯਾਤਪਾਨਂ ਆਤਪਪਚ੍ਚਯਛਾਯੁਪ੍ਪਾਦਕਭਾਵੋ ਅਞ੍ਞਮਞ੍ਞਪਰਿਚ੍ਛੇਦਕਤਾ. ਰੂਪਕ੍ਖਨ੍ਧਸ੍ਸ ਪਰਿਗ੍ਗਹਿਤਤ੍ਤਾ ਤਦਨ੍ਤੋਗਧਾਨਂ ਚਕ੍ਖਾਦਿਆਯਤਨਦ੍ਵਾਰਾਨਂ ਵਸੇਨ ਤਂਤਂਦ੍ਵਾਰਿਕਾ ਅਰੂਪਿਨੋ ਖਨ੍ਧਾ ਪਾਕਟਾ ਹੋਨ੍ਤਿ, ਆਯਤਨਾਨਿ ਚ ਦ੍ਵਾਰਾਨਿ ਚ ਆਯਤਨਦ੍ਵਾਰਾਨੀਤਿ ਵਾ ਅਤ੍ਥੋ. ਤੇਨ ਰੂਪਾਯਤਨਾਦੀਨਞ੍ਚ ਵਸੇਨਾਤਿ ਵੁਤ੍ਤਂ ਹੋਤਿ.

ਸਪ੍ਪਚ੍ਚਯਾਤਿ ਸਪ੍ਪਚ੍ਚਯਭਾਵਾ, ਪਚ੍ਚਯਾਯਤ੍ਤਂ ਹੁਤ੍ਵਾ ਨਿਬ੍ਬਤ੍ਤਨ੍ਤਿ ਵੁਤ੍ਤਂ ਹੋਤਿ. ਸਮਾਨੋ ਵਾ ਸਦਿਸੋ ਯੁਤ੍ਤੋ ਪਚ੍ਚਯੋ ਸਪ੍ਪਚ੍ਚਯੋ, ਤਸ੍ਮਾ ਸਪ੍ਪਚ੍ਚਯਾ.

ਏਤ੍ਤਕੋਤਿ ਯਥਾਵੁਤ੍ਤੇਨ ਆਕਾਰੇਨ ਪਗੁਣੋ ਕੋਟ੍ਠਾਸੋ. ਉਗ੍ਗਹੋਵ ਉਗ੍ਗਹਸਨ੍ਧਿ. ਵਣ੍ਣਾਦਿਮੁਖੇਨ ਹਿ ਉਪਟ੍ਠਾਨਂ ਏਤ੍ਥ ਸਨ੍ਧੀਯਤਿ ਸਮ੍ਬਜ੍ਝਤੀਤਿ ‘‘ਸਨ੍ਧੀ’’ਤਿ ਵੁਚ੍ਚਤਿ.

ਉਪਟ੍ਠਾਤੀਤਿ ਵਣ੍ਣਾਦਿਵਸੇਨ ਉਪਟ੍ਠਾਤੀਤਿ ਅਤ੍ਥੋ. ਪਞ੍ਚਙ੍ਗਸਮਨ੍ਨਾਗਤੇਤਿ ਨਾਤਿਦੂਰਨਾਚ੍ਚਾਸਨ੍ਨਗਮਨਾਗਮਨਸਮ੍ਪਨ੍ਨਨ੍ਤਿ ਏਕਙ੍ਗਂ, ਦਿਵਾ ਅਬ੍ਬੋਕਿਣ੍ਣਂ ਰਤ੍ਤਿਂ ਅਪ੍ਪਸਦ੍ਦਂ ਅਪ੍ਪਨਿਗ੍ਘੋਸਨ੍ਤਿ ਏਕਂ, ਅਪ੍ਪਡਂਸਮਕਸਵਾਤਾਤਪਸਰੀਸਪਸਮ੍ਫਸ੍ਸਨ੍ਤਿ ਏਕਂ, ਤਸ੍ਮਿਂ ਖੋ ਪਨ ਸੇਨਾਸਨੇ ਵਿਹਰਨ੍ਤਸ੍ਸ ਅਪ੍ਪਕਸਿਰੇਨ ਉਪ੍ਪਜ੍ਜਤਿ ਚੀਵਰ…ਪੇ… ਪਰਿਕ੍ਖਾਰੋਤਿ ਏਕਂ, ਤਸ੍ਮਿਂ ਪਨ ਸੇਨਾਸਨੇ ਥੇਰਾ ਭਿਕ੍ਖੂ ਵਿਹਰਨ੍ਤਿ ਬਹੁਸ੍ਸੁਤਾਤਿ ਏਕਂ (ਅ. ਨਿ. ੧੦.੧੧). ਪਞ੍ਚਙ੍ਗਸਮਨ੍ਨਾਗਤੇਨਾਤਿ ਅਪ੍ਪਾਬਾਧਾਸਾਠੇਯ੍ਯਸਦ੍ਧਾਪਞ੍ਞਾਵੀਰਿਯੇਹਿ ਪਧਾਨਿਯਙ੍ਗੇਹਿ ਸਮਨ੍ਨਾਗਤੇਨ.

ਉਟ੍ਠਾਨਕਦਾਯਨ੍ਤਿ ਤੇਹਿ ਖੇਤ੍ਤੇਹਿ ਉਟ੍ਠਾਨਕਂ, ਤੇਹਿ ਦਾਤਬ੍ਬਧਞ੍ਞਨ੍ਤਿ ਅਤ੍ਥੋ. ਏਤ੍ਥ ਚ ਅਟ੍ਠਕੁਮ੍ਭਦਾਯਕਖੇਤ੍ਤਂ ਵਿਯ ਮੁਖਧੋਵਨਕਿਚ੍ਚਂ, ਸੋਲ਼ਸਕੁਮ੍ਭਦਾਯਕਂ ਵਿਯ ਖਾਦਨਭੁਞ੍ਜਨਕਿਚ੍ਚਂ ਦਟ੍ਠਬ੍ਬਂ ਲਹੁਕਗਰੁਕਭਾਵਤੋ. ਤਤੋ ਪਨ ਯਂ ਦੁਕ੍ਖਂ ਨਿਬ੍ਬਤ੍ਤਤਿ, ਤਂ ਅਞ੍ਞਞ੍ਚ ਦ੍ਵਤ੍ਤਿਂਸਾਕਾਰਮਨਸਿਕਾਰੇਨ ਚ ਨਿਵਤ੍ਤਤੀਤਿ ਆਹ ‘‘ਏਤ੍ਥੇਵ ਕਮ੍ਮਂ ਕਾਤਬ੍ਬ’’ਨ੍ਤਿ. ਏਤ੍ਤਾਵਤਾਤਿ ਏਕਦਿਵਸਂ ਤਿਂਸ ਵਾਰੇ ਮਨਸਿਕਾਰਟ੍ਠਪਨੇਨ.

ਸਹਸ੍ਸੁਦ੍ਧਾਰਂ ਸਾਧੇਤ੍ਵਾਤਿ ਸਹਸ੍ਸਵਡ੍ਢਿਤਂ ਇਣਂ ਯੋਜੇਤ੍ਵਾ. ਉਦ੍ਧਰਿਤਬ੍ਬੋਤਿ ਉਦ੍ਧਾਰੋਤਿ ਹਿ ਵਡ੍ਢਿ ਵੁਚ੍ਚਤੀਤਿ. ਸੁਦ੍ਧਚਿਤ੍ਤੇਨਾਤਿ ਵਿਕ੍ਖੇਪਾਦਿਕਿਲੇਸਵਿਰਹਿਤਚਿਤ੍ਤੇਨ. ਕੇਸਾਦੀਸੁ ਤਚੇ ਰਜ੍ਜਨ੍ਤਾ ਸੁਚ੍ਛਵਿਚਮ੍ਮਂ ਤਚੋਤਿ ਗਹੇਤ੍ਵਾ ‘‘ਸੁਵਣ੍ਣਾਦਿਵਣ੍ਣੋ ਮੇ ਤਚੋ’’ਤਿਆਦਿਨਾ ਰਜ੍ਜਨ੍ਤਿ.

ਤੇਸੁ ਦ੍ਵੇ ਏਕਮਗ੍ਗਂ ਪਟਿਪਜ੍ਜਮਾਨਾ ਨਾਮ ਨ ਹੋਨ੍ਤੀਤਿ ਯਥਾ ਤਥਾ ਵਾ ਪਲਾਯਨ੍ਤੀਤਿ ਅਤ੍ਥੋ. ਤਤ੍ਥ ਰਾਗਾਦਿਵਤ੍ਥੁਭਾਵੇਨ ਦ੍ਵਤ੍ਤਿਂਸਾਕਾਰਾਨਂ ਚੋਰਸਦਿਸਤਾ ਅਨਤ੍ਥਾਵਹਤਾ ਦਟ੍ਠਬ੍ਬਾ.

ਕਮ੍ਮਮੇਵ ਵਿਸੇਸਾਧਿਗਮਸ੍ਸ ਠਾਨਨ੍ਤਿ ਕਮ੍ਮਟ੍ਠਾਨਂ ਭਾਵਨਾ ਵੁਚ੍ਚਤਿ. ਤੇਨਾਹ ‘‘ਮਨਸਿਕਰੋਨ੍ਤਸ੍ਸ ਅਪ੍ਪਨਂ ਪਾਪੁਣਾਤੀ’’ਤਿ. ਕਮ੍ਮਸ੍ਸ ਵਾ ਭਾਵਨਾਯ ਠਾਨਂ ਆਰਮ੍ਮਣਂ ਅਪ੍ਪਨਾਰਮ੍ਮਣਭਾਵੂਪਗਮਨੇਨ ਅਪ੍ਪਨਂ ਪਾਪੁਣਾਤੀਤਿ ਵੁਤ੍ਤਂ.

ਮਾਨਜਾਤਿਕੋਤਿ ਏਤੇਨ ਲਙ੍ਘਨਸਮਤ੍ਥਤਾਯੋਗੇਨ ਉਪਸਮਰਹਿਤਤਂ ਦਸ੍ਸੇਤਿ. ਚਿਤ੍ਤਮ੍ਪਿ ਹਿ ਤਥਾ ਨਾਨਾਰਮ੍ਮਣੇਸੁ ਵਡ੍ਢਿਤਂ ਉਪਸਮਰਹਿਤਨ੍ਤਿ ਦਸ੍ਸੇਤਬ੍ਬਨ੍ਤਿ.

ਹਤ੍ਥੇ ਗਹਿਤਪਞ੍ਹਵਤ੍ਥੁ ਪਾਕਤਿਕਮੇਵਾਤਿ ਵਿਸੁਦ੍ਧਿਮਗ੍ਗੇ ਵੁਤ੍ਤਤਂ ਸਨ੍ਧਾਯਾਹ. ਤਤ੍ਥ ਹਿ ਵੁਤ੍ਤਂ –

‘‘ਮਾਲਕਤ੍ਥੇਰੋ ਕਿਰ ਦੀਘਭਾਣਕਅਭਯਤ੍ਥੇਰਂ ਹਤ੍ਥੇ ਗਹੇਤ੍ਵਾ ‘ਆਵੁਸੋ ਅਭਯ, ਇਮਂ ਤਾਵ ਪਞ੍ਹਂ ਉਗ੍ਗਣ੍ਹਾਹੀ’ਤਿ ਵਤ੍ਵਾ ਆਹ ‘ਮਾਲਕਤ੍ਥੇਰੋ ਦ੍ਵਤ੍ਤਿਂਸਕੋਟ੍ਠਾਸੇਸੁ ਦ੍ਵਤ੍ਤਿਂਸਪਠਮਜ੍ਝਾਨਲਾਭੀ, ਸਚੇ ਰਤ੍ਤਿਂ ਏਕਂ, ਦਿਵਾ ਏਕਂ ਸਮਾਪਜ੍ਜਤਿ, ਅਤਿਰੇਕਡ੍ਢਮਾਸੇਨ ਪੁਨ ਸਮ੍ਪਜ੍ਜਤਿ. ਸਚੇ ਪਨ ਦੇਵਸਿਕਂ ਏਕਮੇਵ ਸਮਾਪਜ੍ਜਤਿ, ਅਤਿਰੇਕਮਾਸੇਨ ਪੁਨ ਸਮ੍ਪਜ੍ਜਤੀ’’’ਤਿ.

ਇਦਂ ਪਨ ਏਕਂ ਮਨਸਿਕਰੋਨ੍ਤਸ੍ਸ ਏਕਂ ਪਾਟਿਯੇਕ੍ਕਂ ਮਨਸਿਕਰੋਨ੍ਤਸ੍ਸ ਦ੍ਵਤ੍ਤਿਂਸਾਤਿ ਏਤਸ੍ਸ ਸਾਧਨਤ੍ਥਂ ਨਿਦਸ੍ਸਨਵਸੇਨ ਆਨੀਤਨ੍ਤਿ ਦਟ੍ਠਬ੍ਬਂ.

ਅਨੁਪਾਦਿਨ੍ਨਕਪਕ੍ਖੇ ਠਿਤਾਨੀਤਿ ਏਤੇਨ ਚੇਤਿਯਪਬ੍ਬਤਵਾਸੀ ਮਹਾਤਿਸ੍ਸਤ੍ਥੇਰੋ ਵਿਯ, ਸਙ੍ਘਰਕ੍ਖਿਤਤ੍ਥੇਰੁਪਟ੍ਠਾਕਸਾਮਣੇਰੋ ਵਿਯ ਚ ਅਨੁਪਾਦਿਨ੍ਨਕਪਕ੍ਖੇ ਠਪੇਤ੍ਵਾ ਗਹੇਤੁਂ ਸਕ੍ਕੋਨ੍ਤਸ੍ਸ ਦਸਵਿਧਾਸੁਭਵਸੇਨ ਜੀਵਮਾਨਕਸਰੀਰੇਪਿ ਉਪਟ੍ਠਿਤੇ ਉਪਚਾਰਪ੍ਪਤ੍ਤਿ ਦਸ੍ਸਿਤਾ ਹੋਤੀਤਿ ਵੇਦਿਤਬ੍ਬਾ. ‘‘ਅਤ੍ਥਿਸ੍ਸ ਕਾਯੇ’’ਤਿ ਪਨ ਸਤ੍ਤਵਸੇਨ ਕੇਸਾਦੀਸੁ ਗਯ੍ਹਮਾਨੇਸੁ ਯਥਾ ‘‘ਇਮਸ੍ਮਿਂ ਕਾਯੇ’’ਤਿ ਸਤ੍ਤ-ਗ੍ਗਹਣਰਹਿਤੇ ਅਹਂਕਾਰਵਤ੍ਥੁਮ੍ਹਿ ਵਿਦ੍ਧਸ੍ਤਾਹਂਕਾਰੇ ਸਦਾ ਸਨ੍ਨਿਹਿਤੇ ਪਾਕਟੇ ਚ ਅਤ੍ਤਨੋ ਕਾਯੇ ਉਪਟ੍ਠਾਨਂ ਹੋਤਿ, ਨ ਤਥਾ ਤਤ੍ਥਾਤਿ ਅਪ੍ਪਨਂ ਅਪ੍ਪਤ੍ਤਾ ਆਦੀਨਵਾਨੁਪਸ੍ਸਨਾਵ ਤਤ੍ਥ ਹੋਤੀਤਿ ਅਧਿਪ੍ਪਾਯੇਨਾਹ ‘‘ਅਸੁਭਾਨੁਪਸ੍ਸਨਾਸਙ੍ਖਾਤਾ ਪਨ ਵਿਪਸ੍ਸਨਾਭਾਵਨਾ ਹੋਤੀਤਿ ਵੇਦਿਤਬ੍ਬਾ’’ਤਿ.

੩੫੭. ਆਦਿਮ੍ਹਿ ਸੇਵਨਾ ਆਸੇਵਨਾ, ਵਡ੍ਢਨਂ ਭਾਵਨਾ, ਪੁਨਪ੍ਪੁਨਂ ਕਰਣਂ ਬਹੁਲੀਕਮ੍ਮਨ੍ਤਿ ਅਯਮੇਤੇਸਂ ਵਿਸੇਸੋ.

੩੬੨. ਵਤ੍ਥੁਪਰਿਞ੍ਞਾਯਾਤਿ ਅਭਿਜ੍ਝਾਦੋਮਨਸ੍ਸਾਨਂ ਵਤ੍ਥੁਭੂਤਸ੍ਸ ਕਾਯਸ੍ਸ ਪਰਿਜਾਨਨੇਨ. ਅਪ੍ਪਿਤਾਤਿ ਗਮਿਤਾ, ਸਾ ਚ ਵਿਨਾਸਿਤਤਾਤਿ ਆਹ ‘‘ਵਿਨਾਸਿਤਾ’’ਤਿ. ਅਪ੍ਪਵਤ੍ਤਿਯਂ ਠਪਿਤਾਤਿਪਿ ਅਪ੍ਪਿਤਾਤਿ ਅਯਮਤ੍ਥੋ ਨਿਰੁਤ੍ਤਿਸਿਦ੍ਧਿਯਾ ਵੁਤ੍ਤੋਤਿ ਦਟ੍ਠਬ੍ਬੋ. ਵਿਗਤਨ੍ਤਾ ਕਤਾਤਿ ਇਦਾਨਿ ਕਾਤਬ੍ਬੋ ਅਨ੍ਤੋ ਏਤੇਸਂ ਨਤ੍ਥੀਤਿ ਵਿਗਤਨ੍ਤਾ, ਏਵਂਭੂਤਾ ਕਤਾਤਿ ਅਤ੍ਥੋ. ਕਮ੍ਮਮੇਵ ਵਿਸੇਸਾਧਿਗਮਸ੍ਸ ਠਾਨਂ ਕਮ੍ਮਟ੍ਠਾਨਂ, ਕਮ੍ਮੇ ਵਾ ਠਾਨਂ ਭਾਵਨਾਰਮ੍ਭੋ ਕਮ੍ਮਟ੍ਠਾਨਂ, ਤਞ੍ਚ ਅਨੁਪਸ੍ਸਨਾਤਿ ਆਹ ‘‘ਅਨੁਪਸ੍ਸਨਾਯ ਕਮ੍ਮਟ੍ਠਾਨ’’ਨ੍ਤਿ, ਅਨੁਪਸ੍ਸਨਾਯ ਵੁਤ੍ਤਨ੍ਤਿ ਅਧਿਪ੍ਪਾਯੋ.

ਕਾਯਾਨੁਪਸ੍ਸਨਾਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਵੇਦਨਾਨੁਪਸ੍ਸਨਾਨਿਦ੍ਦੇਸਵਣ੍ਣਨਾ

੩੬੩. ਸਮ੍ਪਜਾਨਸ੍ਸ ਵੇਦਿਯਨਂ ਸਮ੍ਪਜਾਨਵੇਦਿਯਨਂ. ਵਤ੍ਥੁਨ੍ਤਿ ਸੁਖਾਦੀਨਂ ਆਰਮ੍ਮਣਮਾਹ, ਤੇਨ ਵਤ੍ਥੁ ਆਰਮ੍ਮਣਂ ਏਤਿਸ੍ਸਾਤਿ ਵਤ੍ਥੁਆਰਮ੍ਮਣਾਤਿ ਸਮਾਸੋ ਦਟ੍ਠਬ੍ਬੋ. ਵੋਹਾਰਮਤ੍ਤਂ ਹੋਤੀਤਿ ਏਤੇਨ ‘‘ਸੁਖਂ ਵੇਦਨਂ ਵੇਦਯਾਮੀ’’ਤਿ ਇਦਂ ਵੋਹਾਰਮਤ੍ਤੇਨ ਵੁਤ੍ਤਨ੍ਤਿ ਦਸ੍ਸੇਤਿ.

ਵੀਰਿਯਸਮਾਧਿਂ ਯੋਜੇਤ੍ਵਾਤਿ ਅਧਿਵਾਸਨਵੀਰਿਯਸ੍ਸ ਅਧਿਮਤ੍ਤਤਾਯ ਤਸ੍ਸ ਸਮਤਾਯ ਉਭਯਂ ਸਹ ਯੋਜੇਤ੍ਵਾ. ਸਹ ਪਟਿਸਮ੍ਭਿਦਾਹੀਤਿ ਲੋਕੁਤ੍ਤਰਪਟਿਸਮ੍ਭਿਦਾਹਿ ਸਹ. ਲੋਕਿਯਾਨਮ੍ਪਿ ਵਾ ਸਤਿ ਉਪ੍ਪਤ੍ਤਿਕਾਲੇ ਤਤ੍ਥ ਸਮਤ੍ਥਤਂ ਸਨ੍ਧਾਯ ‘‘ਸਹ ਪਟਿਸਮ੍ਭਿਦਾਹੀ’’ਤਿ ਵੁਤ੍ਤਨ੍ਤਿ ਦਟ੍ਠਬ੍ਬਂ. ਸਮਸੀਸੀਤਿ ਵਾਰਸਮਸੀਸੀ ਹੁਤ੍ਵਾ ਪਚ੍ਚਵੇਕ੍ਖਣਵਾਰਸ੍ਸ ਅਨਨ੍ਤਰਵਾਰੇ ਪਰਿਨਿਬ੍ਬਾਯੀਤਿ ਅਤ੍ਥੋ. ਸਙ੍ਖੇਪਮਨਸਿਕਾਰਵਸੇਨ ਮਹਾਸਤਿਪਟ੍ਠਾਨੇ, ਵਿਤ੍ਥਾਰਮਨਸਿਕਾਰਵਸੇਨ ਰਾਹੁਲੋਵਾਦਧਾਤੁਵਿਭਙ੍ਗਾਦੀਸੁ.

ਫਸ੍ਸਪਞ੍ਚਮਕੇਯੇਵਾਤਿ ਏਵ-ਸਦ੍ਦੇਨ ਵੁਤ੍ਤੇਸੁ ਤੀਸੁਪਿ ਮੁਖੇਸੁ ਪਰਿਗ੍ਗਹਸ੍ਸ ਸਮਾਨਤਂ ਦਸ੍ਸੇਤਿ. ਨਾਮਰੂਪਵਵਤ੍ਥਾਨਸ੍ਸ ਅਧਿਪ੍ਪੇਤਤ੍ਤਾ ਨਿਰਵਸੇਸਰੂਪਪਰਿਗ੍ਗਹਸ੍ਸ ਦਸ੍ਸਨਤ੍ਥਂ ‘‘ਵਤ੍ਥੁ ਨਾਮ ਕਰਜਕਾਯੋ’’ਤਿ ਆਹ, ਨ ਚਕ੍ਖਾਦੀਨਿ ਛਵਤ੍ਥੂਨੀਤਿ. ਕਰਜਕਾਯਸ੍ਸ ਪਨ ਵਤ੍ਥੁਭਾਵਸਾਧਨਤ੍ਥਂ ‘‘ਇਦਞ੍ਚ ਪਨ ਮੇ ਵਿਞ੍ਞਾਣਂ ਏਤ੍ਥ ਸਿਤਂ, ਏਤ੍ਥ ਪਟਿਬਦ੍ਧ’’ਨ੍ਤਿ (ਦੀ. ਨਿ. ੧.੨੩੫; ਮ. ਨਿ. ੨.੨੫੨) ਸੁਤ੍ਤਂ ਆਭਤਂ.

ਫਸ੍ਸਵਿਞ੍ਞਾਣਾਨਂ ਪਾਕਟਤਾ ਕੇਸਞ੍ਚਿ ਹੋਤੀਤਿ ਯੇਸਂ ਨ ਹੋਤਿ, ਤੇ ਸਨ੍ਧਾਯਾਹ ‘‘ਫਸ੍ਸਵਸੇਨ ਵਾ ਹਿ…ਪੇ… ਨ ਪਾਕਟਂ ਹੋਤੀ’’ਤਿ. ਤੇਸਂ ਪਨ ਅਞ੍ਞੇਸਞ੍ਚ ਸਬ੍ਬੇਸਂ ਵੇਨੇਯ੍ਯਾਨਂ ਵੇਦਨਾ ਪਾਕਟਾਤਿ ਆਹ ‘‘ਵੇਦਨਾਵਸੇਨ ਪਨ ਪਾਕਟਂ ਹੋਤੀ’’ਤਿ. ਸਤਧੋਤਸਪ੍ਪਿ ਨਾਮ ਸਤਵਾਰਂ ਵਿਲਾਪੇਤ੍ਵਾ ਵਿਲਾਪੇਤ੍ਵਾ ਉਦਕੇ ਪਕ੍ਖਿਪਿਤ੍ਵਾ ਉਦ੍ਧਰਿਤ੍ਵਾ ਗਹਿਤਸਪ੍ਪਿ.

ਵਿਨਿਵਤ੍ਤੇਤ੍ਵਾਤਿ ਚਤੁਕ੍ਖਨ੍ਧਸਮੁਦਾਯਤੋ ਵਿਸੁਂ ਉਦ੍ਧਰਿਤ੍ਵਾ. ਮਹਾਸਤਿਪਟ੍ਠਾਨਸੁਤ੍ਤਾਦੀਸੁ ਕਤ੍ਥਚਿ ਪਠਮਂ ਰੂਪਕਮ੍ਮਟ੍ਠਾਨਂ ਵਤ੍ਵਾ ਪਚ੍ਛਾ ਅਰੂਪਕਮ੍ਮਟ੍ਠਾਨਂ ਵੇਦਨਾਵਸੇਨ ਵਿਨਿਵਤ੍ਤੇਤ੍ਵਾ ਦਸ੍ਸਿਤਂ. ਕਤ੍ਥਚਿ ਅਰੂਪਕਮ੍ਮਟ੍ਠਾਨਂ ਏਵ ਵੇਦਨਾਵਸੇਨ ਅਰੂਪਰਾਸਿਤੋ, ਞਾਤਪਰਿਞ੍ਞਾਯ ਪਰਿਞ੍ਞਾਤਤੋ ਵਾ ਰੂਪਾਰੂਪਰਾਸਿਤੋ ਵਾ ਵਿਨਿਵਤ੍ਤੇਤ੍ਵਾ ਦਸ੍ਸਿਤਂ. ਤਤ੍ਥਾਪਿ ਯੇਸੁ ਪਠਮਂ ਞਾਤਪਰਿਞ੍ਞਾ ਵੁਤ੍ਤਾ, ਤੇਸੁ ਤਦਨ੍ਤੋਗਧਂ. ਯੇਸੁ ਨ ਵੁਤ੍ਤਾ, ਤੇਸੁ ਚ ਵੇਦਨਾਯ ਆਰਮ੍ਮਣਮਤ੍ਤਂ ਸਂਖਿਤ੍ਤਂ ਪਾਲ਼ਿਅਨਾਰੁਲ਼੍ਹਂ ਰੂਪਕਮ੍ਮਟ੍ਠਾਨਂ ਸਨ੍ਧਾਯ ਰੂਪਕਮ੍ਮਟ੍ਠਾਨਸ੍ਸ ਪਠਮਂ ਕਥਿਤਤਾ ਵੁਤ੍ਤਾਤਿ ਵੇਦਿਤਬ੍ਬਾ.

‘‘ਮਨੋਵਿਞ੍ਞੇਯ੍ਯਾਨਂ ਧਮ੍ਮਾਨਂ ਇਟ੍ਠਾਨਂ ਕਨ੍ਤਾਨ’’ਨ੍ਤਿਆਦਿਨਾ (ਮ. ਨਿ. ੩.੩੦੬) ਨਯੇਨ ਵੁਤ੍ਤਂ ਛਗੇਹਸ੍ਸਿਤਸੋਮਨਸ੍ਸਂ ਪਞ੍ਚਕਾਮਗੁਣੇਸੁ ਅਸ੍ਸਾਦਾਨੁਪਸ੍ਸਿਨੋ ਏਵ ਹੋਤੀਤਿ ਆਹ ‘‘ਪਞ੍ਚਕਾਮਗੁਣਾਮਿਸਨਿਸ੍ਸਿਤਾ ਛ ਗੇਹਸ੍ਸਿਤਸੋਮਨਸ੍ਸਵੇਦਨਾ’’ਤਿ.

ਵੇਦਨਾਨੁਪਸ੍ਸਨਾਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਚਿਤ੍ਤਾਨੁਪਸ੍ਸਨਾਨਿਦ੍ਦੇਸਵਣ੍ਣਨਾ

੩੬੫. ਕਿਲੇਸਸਮ੍ਪਯੁਤ੍ਤਾਨਂ ਧਮ੍ਮਾਨਂ ਕੇਹਿਚਿ ਕਿਲੇਸੇਹਿ ਵਿਪ੍ਪਯੋਗੇਪਿ ਸਤਿ ਯੇਹਿ ਸਮ੍ਪਯੁਤ੍ਤਾ, ਤੇਹਿ ਸਂਕਿਲੇਸਭਾਵੇਨ ਸਦਿਸੇਹਿ ਸਂਕਿਲਿਟ੍ਠਤ੍ਤਾ ਇਤਰੇਹਿਪਿ ਨ ਵਿਸੁਦ੍ਧਤਾ ਹੋਤੀਤਿ ਆਹ ‘‘ਨ ਪਚ੍ਛਿਮਪਦਂ ਭਜਨ੍ਤੀ’’ਤਿ. ਦੁਵਿਧਨ੍ਤਿ ਵਿਸੁਂ ਵਚਨਂ ਸਰਾਗਸਦੋਸੇਹਿ ਵਿਸਿਟ੍ਠਗ੍ਗਹਣਤ੍ਥਂ. ਅਵਿਪਸ੍ਸਨੁਪਗਤ੍ਤਾ ‘‘ਇਧ ਓਕਾਸੋਵ ਨਤ੍ਥੀ’’ਤਿ ਵੁਤ੍ਤਂ.

ਚਿਤ੍ਤਾਨੁਪਸ੍ਸਨਾਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਧਮ੍ਮਾਨੁਪਸ੍ਸਨਾਨਿਦ੍ਦੇਸੋ

ਕ. ਨੀਵਰਣਪਬ੍ਬਵਣ੍ਣਨਾ

੩੬੭. ਕਣ੍ਹਸੁਕ੍ਕਾਨਂ ਯੁਗਨਦ੍ਧਤਾ ਨਤ੍ਥੀਤਿ ਪਜਾਨਨਕਾਲੇ ਅਭਾਵਾ ‘‘ਅਭਿਣ੍ਹਸਮੁਦਾਚਾਰਵਸੇਨਾ’’ਤਿ ਆਹ.

ਸੁਭਮ੍ਪੀਤਿ ਕਾਮਚ੍ਛਨ੍ਦੋਪਿ. ਸੋ ਹਿ ਅਤ੍ਤਨੋ ਗਹਣਾਕਾਰੇਨ ‘‘ਸੁਭ’’ਨ੍ਤਿ ਵੁਚ੍ਚਤਿ, ਤੇਨਾਕਾਰੇਨ ਪਵਤ੍ਤਮਾਨਕਸ੍ਸ ਅਞ੍ਞਸ੍ਸ ਕਾਮਚ੍ਛਨ੍ਦਸ੍ਸ ਨਿਮਿਤ੍ਤਤ੍ਤਾ ‘‘ਨਿਮਿਤ੍ਤ’’ਨ੍ਤਿ ਚਾਤਿ. ਆਕਙ੍ਖਿਤਸ੍ਸ ਹਿਤਸੁਖਸ੍ਸ ਅਨੁਪਾਯਭੂਤੋ ਮਨਸਿਕਾਰੋ ਅਨੁਪਾਯਮਨਸਿਕਾਰੋ. ਤਤ੍ਥਾਤਿ ਨਿਪ੍ਫਾਦੇਤਬ੍ਬੇ ਆਰਮ੍ਮਣਭੂਤੇ ਚ ਦੁਵਿਧੇਪਿ ਸੁਭਨਿਮਿਤ੍ਤੇ.

ਅਸੁਭਮ੍ਪੀਤਿ ਅਸੁਭਜ੍ਝਾਨਮ੍ਪਿ. ਤਂ ਪਨ ਦਸਸੁ ਅਸੁਭੇਸੁ ਕੇਸਾਦੀਸੁ ਚ ਪਵਤ੍ਤਂ ਦਟ੍ਠਬ੍ਬਂ. ਕੇਸਾਦੀਸੁ ਹਿ ਸਞ੍ਞਾ ਅਸੁਭਸਞ੍ਞਾਤਿ ਗਿਰਿਮਾਨਨ੍ਦਸੁਤ੍ਤੇ ਵੁਤ੍ਤਾਤਿ. ਏਤ੍ਥ ਚਤੁਬ੍ਬਿਧਸ੍ਸਪਿ ਅਯੋਨਿਸੋਮਨਸਿਕਾਰਸ੍ਸ ਯੋਨਿਸੋਮਨਸਿਕਾਰਸ੍ਸ ਚ ਦਸ੍ਸਨਂ ਨਿਰਵਸੇਸਦਸ੍ਸਨਤ੍ਥਂ ਕਤਨ੍ਤਿ ਵੇਦਿਤਬ੍ਬਂ. ਤੇਸੁ ਪਨ ਅਸੁਭੇ ਸੁਭਨ੍ਤਿ ਅਸੁਭਨ੍ਤਿ ਚ ਮਨਸਿਕਾਰੋ ਇਧਾਧਿਪ੍ਪੇਤੋ, ਤਦਨੁਕੁਲਤ੍ਤਾ ਵਾ ਇਤਰੇਪੀਤਿ.

ਭੋਜਨੇ ਮਤ੍ਤਞ੍ਞੁਨੋ ਥਿਨਮਿਦ੍ਧਾਭਿਭਵਾਭਾਵਾ ਓਤਾਰਂ ਅਲਭਮਾਨੋ ਕਾਮਰਾਗੋ ਪਹੀਯਤੀਤਿ ਵਦਨ੍ਤਿ. ਭੋਜਨਨਿਸ੍ਸਿਤਂ ਪਨ ਆਹਾਰੇਪਟਿਕੂਲਸਞ੍ਞਂ, ਤਬ੍ਬਿਪਰਿਣਾਮਸ੍ਸ ਤਦਾਧਾਰਸ੍ਸ ਤਸ੍ਸ ਚ ਉਪਨਿਸ੍ਸਯਭੂਤਸ੍ਸ ਅਸੁਭਤਾਦਿਦਸ੍ਸਨਂ, ਕਾਯਸ੍ਸ ਚ ਆਹਾਰਟ੍ਠਿਤਿਕਤਾਦਿਦਸ੍ਸਨਂ ਸੋ ਉਪ੍ਪਾਦੇਤੀਤਿ ਤਸ੍ਸ ਕਾਮਚ੍ਛਨ੍ਦੋ ਪਹੀਯਤੇਵ, ਅਭਿਧਮ੍ਮਪਰਿਯਾਯੇਨ ਸਬ੍ਬੋਪਿ ਲੋਭੋ ਕਾਮਚ੍ਛਨ੍ਦਨੀਵਰਣਨ੍ਤਿ ਆਹ ‘‘ਅਰਹਤ੍ਤਮਗ੍ਗੇਨਾ’’ਤਿ.

ਓਦਿਸ੍ਸਕਾਨੋਦਿਸ੍ਸਕਦਿਸਾਫਰਣਾਨਨ੍ਤਿ ਅਤ੍ਤਗਰੁਅਤਿਪ੍ਪਿਯਸਹਾਯਮਜ੍ਝਤ੍ਤਵਸੇਨ ਓਦਿਸ੍ਸਕਤਾ, ਸੀਮਾਭੇਦੇ ਕਤੇ ਅਨੋਦਿਸ੍ਸਕਤਾ, ਏਕਦਿਸਾਫਰਣਵਸੇਨ ਦਿਸਾਫਰਣਤਾ ਮੇਤ੍ਤਾਯ ਉਗ੍ਗਹਣੇ ਵੇਦਿਤਬ੍ਬਾ. ਵਿਹਾਰਰਚ੍ਛਾਗਾਮਾਦਿਵਸੇਨ ਵਾ ਓਦਿਸ੍ਸਕਦਿਸਾਫਰਣਂ, ਵਿਹਾਰਾਦਿਉਦ੍ਦੇਸਰਹਿਤਂ ਪੁਰਤ੍ਥਿਮਾਦਿਦਿਸਾਵਸੇਨ ਅਨੋਦਿਸ੍ਸਕਦਿਸਾਫਰਣਨ੍ਤਿ ਏਵਂ ਵਾ ਦ੍ਵਿਧਾ ਉਗ੍ਗਹਂ ਸਨ੍ਧਾਯ ‘‘ਓਦਿਸ੍ਸਕਾਨੋਦਿਸ੍ਸਕਦਿਸਾਫਰਣਾਨ’’ਨ੍ਤਿ ਵੁਤ੍ਤਂ. ਉਗ੍ਗਹੋ ਚ ਯਾਵ ਉਪਚਾਰਾ ਦਟ੍ਠਬ੍ਬੋ, ਉਗ੍ਗਹਿਤਾਯ ਆਸੇਵਨਾ ਭਾਵਨਾ. ਤਤ੍ਥ ‘‘ਸਬ੍ਬੇ ਸਤ੍ਤਾ ਪਾਣਾ ਭੂਤਾ ਪੁਗ੍ਗਲਾ ਅਤ੍ਤਭਾਵਪਰਿਯਾਪਨ੍ਨਾ’’ਤਿ ਏਤੇਸਂ ਵਸੇਨ ਪਞ੍ਚਵਿਧਾ, ਏਕੇਕਸ੍ਮਿਂ ‘‘ਅਵੇਰਾ ਹੋਨ੍ਤੁ, ਅਬ੍ਯਾਪਜ੍ਜਾ, ਅਨੀਘਾ, ਸੁਖੀ ਅਤ੍ਤਾਨਂ ਪਰਿਹਰਨ੍ਤੂ’’ਤਿ ਚਤੁਧਾ ਪਵਤ੍ਤਿਤੋ ਵੀਸਤਿਵਿਧਾ ਵਾ ਅਨੋਧਿਸੋਫਰਣਾ ਮੇਤ੍ਤਾ, ‘‘ਸਬ੍ਬਾ ਇਤ੍ਥਿਯੋ ਪੁਰਿਸਾ ਅਰਿਯਾ ਅਨਰਿਯਾ ਦੇਵਾ ਮਨੁਸ੍ਸਾ ਵਿਨਿਪਾਤਿਕਾ’’ਤਿ ਸਤ੍ਤੋਧਿਕਰਣਵਸੇਨ ਪਵਤ੍ਤਾ ਸਤ੍ਤਵਿਧਾ, ਅਟ੍ਠਵੀਸਤਿਵਿਧਾ ਵਾ ਓਧਿਸੋਫਰਣਾ ਮੇਤ੍ਤਾ, ਦਸਹਿ ਦਿਸਾਹਿ ਦਿਸੋਧਿਕਰਣਵਸੇਨ ਪਵਤ੍ਤਾ ਦਸਵਿਧਾ ਚ ਦਿਸਾਫਰਣਾ ਮੇਤ੍ਤਾ, ਏਕੇਕਾਯ ਵਾ ਦਿਸਾਯ ਸਤ੍ਤਾਦਿਇਤ੍ਥਿਆਦਿਅਵੇਰਾਦਿਯੋਗੇਨ ਅਸੀਤਾਧਿਕਚਤੁਸਤਪ੍ਪਭੇਦਾ ਅਨੋਧਿਸੋਓਧਿਸੋਫਰਣਾ ਵੇਦਿਤਬ੍ਬਾ.

ਕਾਯਵਿਨਾਮਨਾਤਿ ਕਾਯਸ੍ਸ ਵਿਵਿਧੇਨ ਆਕਾਰੇਨ ਨਾਮਨਾ.

ਅਤਿਭੋਜਨੇ ਨਿਮਿਤ੍ਤਗ੍ਗਾਹੋਤਿ ਅਤਿਭੋਜਨੇ ਥਿਨਮਿਦ੍ਧਸ੍ਸ ਨਿਮਿਤ੍ਤਗ੍ਗਾਹੋ, ‘‘ਏਤ੍ਤਕੇ ਭੁਤ੍ਤੇ ਥਿਨਮਿਦ੍ਧਸ੍ਸ ਕਾਰਣਂ ਹੋਤਿ, ਏਤ੍ਤਕੇ ਨ ਹੋਤੀ’’ਤਿ ਥਿਨਮਿਦ੍ਧਸ੍ਸ ਕਾਰਣਾਕਾਰਣਗ੍ਗਾਹੋਤਿ ਅਤ੍ਥੋ. ਧੁਤਙ੍ਗਾਨਂ ਵੀਰਿਯਨਿਸ੍ਸਿਤਤ੍ਤਾ ਆਹ ‘‘ਧੁਤਙ੍ਗਨਿਸ੍ਸਿਤਸਪ੍ਪਾਯਕਥਾਯਪੀ’’ਤਿ.

ਕੁਕ੍ਕੁਚ੍ਚਮ੍ਪਿ ਕਤਾਕਤਾਨੁਸੋਚਨਵਸੇਨ ਪਵਤ੍ਤਮਾਨਂ ਉਦ੍ਧਚ੍ਚੇਨ ਸਮਾਨਲਕ੍ਖਣਂ ਅਵੂਪਸਮਸਭਾਵਮੇਵਾਤਿ ਚੇਤਸੋ ਅਵੂਪਸਮੋ ‘‘ਉਦ੍ਧਚ੍ਚਕੁਕ੍ਕੁਚ੍ਚਮੇਵਾ’’ਤਿ ਵੁਤ੍ਤੋ.

ਬਹੁਸ੍ਸੁਤਸ੍ਸ ਗਨ੍ਥਤੋ ਚ ਅਤ੍ਥਤੋ ਚ ਅਤ੍ਥਾਦੀਨਿ ਵਿਚਿਨਨ੍ਤਸ੍ਸ ਚੇਤਸੋ ਵਿਕ੍ਖੇਪੋ ਨ ਹੋਤਿ ਯਥਾਵਿਧਿਪਟਿਪਤ੍ਤਿਯਾ ਯਥਾਨੁਰੂਪਪਤਿਕਾਰਪ੍ਪਵਤ੍ਤਿਯਾ ਕਤਾਕਤਾਨੁਸੋਚਨਞ੍ਚਾਤਿ ‘‘ਬਾਹੁਸਚ੍ਚੇਨਪਿ ਉਦ੍ਧਚ੍ਚਕੁਕ੍ਕੁਚ੍ਚਂ ਪਹੀਯਤੀ’’ਤਿ ਆਹ. ਵੁਡ੍ਢਸੇਵਿਤਾ ਚ ਵੁਡ੍ਢਸੀਲਿਤਂ ਆਵਹਤੀਤਿ ਚੇਤੋਵੂਪਸਮਕਰਤ੍ਤਾ ਉਦ੍ਧਚ੍ਚਕੁਕ੍ਕੁਚ੍ਚਪ੍ਪਹਾਨਕਾਰਿਤਾ ਵੁਤ੍ਤਾ. ਵੁਡ੍ਢਤਂ ਪਨ ਅਨਪੇਕ੍ਖਿਤ੍ਵਾ ਵਿਨਯਧਰਾ ਕੁਕ੍ਕੁਚ੍ਚਵਿਨੋਦਕਾ ਕਲ੍ਯਾਣਮਿਤ੍ਤਾ ਵੁਤ੍ਤਾਤਿ ਦਟ੍ਠਬ੍ਬਾ.

ਤਿਟ੍ਠਤਿ ਏਤ੍ਥਾਤਿ ਠਾਨੀਯਾ, ਵਿਚਿਕਿਚ੍ਛਾਯ ਠਾਨੀਯਾ ਵਿਚਿਕਿਚ੍ਛਾਠਾਨੀਯਾ. ਠਾਤਬ੍ਬਾਤਿ ਵਾ ਠਾਨੀਯਾ, ਵਿਚਿਕਿਚ੍ਛਾ ਠਾਨੀਯਾ ਏਤੇਸੂਤਿ ਵਿਚਿਕਿਚ੍ਛਾਠਾਨੀਯਾ.

ਕਾਮਂ ਬਹੁਸ੍ਸੁਤਤਾਪਰਿਪੁਚ੍ਛਕਤਾਹਿ ਅਟ੍ਠਵਤ੍ਥੁਕਾਪਿ ਵਿਚਿਕਿਚ੍ਛਾ ਪਹੀਯਤਿ, ਤਥਾਪਿ ਰਤਨਤ੍ਤਯਵਿਚਿਕਿਚ੍ਛਾਮੂਲਿਕਾ ਸੇਸਵਿਚਿਕਿਚ੍ਛਾਤਿ ਕਤ੍ਵਾ ਆਹ ‘‘ਤੀਣਿ ਰਤਨਾਨਿ ਆਰਬ੍ਭਾ’’ਤਿ. ਵਿਨਯੇ ਪਕਤਞ੍ਞੁਤਾ ‘‘ਸਿਕ੍ਖਾਯ ਕਙ੍ਖਤੀ’’ਤਿ (ਧ. ਸ. ੧੦੦੮; ਵਿਭ. ੯੧੫) ਵੁਤ੍ਤਾਯ ਵਿਚਿਕਿਚ੍ਛਾਯ ਪਹਾਨਂ ਕਰੋਤੀਤਿ ਆਹ ‘‘ਵਿਨਯੇ ਚਿਣ੍ਣਵਸੀਭਾਵਸ੍ਸਪੀ’’ਤਿ. ਓਕਪ੍ਪਨਿਯਸਦ੍ਧਾਸਙ੍ਖਾਤਅਧਿਮੋਕ੍ਖਬਹੁਲਸ੍ਸਾਤਿ ਅਨੁਪਵਿਸਨਸਦ੍ਧਾਸਙ੍ਖਾਤਅਧਿਮੋਕ੍ਖੇਨ ਅਧਿਮੁਚ੍ਚਨਬਹੁਲਸ੍ਸ. ਅਧਿਮੁਚ੍ਚਨਞ੍ਚ ਅਧਿਮੋਕ੍ਖੁਪ੍ਪਾਦਨਮੇਵਾਤਿ ਦਟ੍ਠਬ੍ਬਂ. ਸਦ੍ਧਾਯ ਵਾ ਨਿਨ੍ਨਤਾ ਅਧਿਮੁਤ੍ਤਿ.

ਨੀਵਰਣਪਬ੍ਬਵਣ੍ਣਨਾ ਨਿਟ੍ਠਿਤਾ.

ਖ. ਬੋਜ੍ਝਙ੍ਗਪਬ੍ਬਵਣ੍ਣਨਾ

ਖਨ੍ਧਾਦਿਪਾਲ਼ਿਯਾ ਅਤ੍ਥੋ ਖਨ੍ਧਾਦੀਨਂ ਅਤ੍ਥੋਤਿ ਕਤ੍ਵਾ ਆਹ ‘‘ਖਨ੍ਧ…ਪੇ… ਵਿਪਸ੍ਸਨਾਨਂ ਅਤ੍ਥਸਨ੍ਨਿਸ੍ਸਿਤਪਰਿਪੁਚ੍ਛਾਬਹੁਲਤਾ’’ਤਿ. ਤੇਨ ਪਾਲ਼ਿਮੁਤ੍ਤਕਪੁਚ੍ਛਾ ਨ ਤਥਾ ਪਞ੍ਞਾਸਂਵਤ੍ਤਨਿਕਾ, ਯਥਾ ਅਤ੍ਥਪਟਿਪੁਚ੍ਛਾਤਿ ਦਸ੍ਸੇਤਿ.

ਮਨ੍ਦਤ੍ਤਾ ਅਗ੍ਗਿਜਾਲਾਦੀਸੁ ਆਪੋਧਾਤੁਆਦੀਨਂ ਵਿਯ ਵੀਰਿਯਾਦੀਨਂ ਸਕਿਚ੍ਚੇ ਅਸਮਤ੍ਥਤਾ ਵੁਤ੍ਤਾ.

ਪਤ੍ਤਂ ਨੀਹਰਨ੍ਤੋਵ ਤਂ ਸੁਤ੍ਵਾਤਿ ਏਤ੍ਥ ਪਞ੍ਚਾਭਿਞ੍ਞਤ੍ਤਾ ਦਿਬ੍ਬਸੋਤੇਨ ਅਸ੍ਸੋਸੀਤਿ ਵਦਨ੍ਤਿ.

ਪਸਾਦਸਿਨੇਹਾਭਾਵੇਨਾਤਿ ਪਸਾਦਸਙ੍ਖਾਤਸ੍ਸ ਸਿਨੇਹਸ੍ਸ ਅਭਾਵੇਨ. ਗਦ੍ਰਭਪਿਟ੍ਠੇ ਲੂਖਰਜੋ ਲੂਖਤਰੋ ਹੁਤ੍ਵਾ ਦਿਸ੍ਸਤੀਤਿ ਅਤਿਲੂਖਤਾਯ ਤਂਸਦਿਸੇ.

ਸਂਵੇਜਨਪਸਾਦਨੇਹਿ ਤੇਜਨਂ ਤੋਸਨਞ੍ਚ ਸਮ੍ਪਹਂਸਨਾਤਿ.

ਬੋਜ੍ਝਙ੍ਗਪਬ੍ਬਵਣ੍ਣਨਾ ਨਿਟ੍ਠਿਤਾ.

ਸਮਥਵਿਪਸ੍ਸਨਾਸੁਦ੍ਧਵਿਪਸ੍ਸਨਾਵਸੇਨ ਪਠਮਸ੍ਸ ਇਤਰੇਸਞ੍ਚ ਕਥਿਤਤ੍ਤਾਤਿ ਅਤ੍ਥੋ. ਮਗ੍ਗਸਮ੍ਪਯੁਤ੍ਤਾ ਸਤਿ ਕਾਯਾਨੁਪਸ੍ਸਨਾ ਨਾਮਾਤਿ ਆਗਮਨਵਸੇਨ ਵੁਤ੍ਤਂ. ਏਵਂ ਤਾਵ ਦੇਸਨਾ ਪੁਗ੍ਗਲੇ ਤਿਟ੍ਠਤੀਤਿ ਕਾਯਾਨੁਪਸ੍ਸੀਆਦੀਨਂ ਆਗਮਨਵਸੇਨ ਵਿਸੇਸੇਤ੍ਵਾ ਵੁਤ੍ਤਾ ਸਤਿਪਟ੍ਠਾਨਦੇਸਨਾ ਪੁਗ੍ਗਲੇ ਤਿਟ੍ਠਤੀਤਿ ਅਤ੍ਥੋ. ਨ ਹਿ ਸਕ੍ਕਾ ਏਕਸ੍ਸ ਅਨੇਕਸਮਙ੍ਗਿਤਾ ਵਤ੍ਤੁਂ ਏਕਕ੍ਖਣੇ ਅਨੇਕਸਤਿਸਮ੍ਭਵਾਵਬੋਧਪਸਙ੍ਗਾ, ਪੁਗ੍ਗਲਂ ਪਨ ਆਮਸਿਤ੍ਵਾ ਸਕਿਚ੍ਚਪਰਿਚ੍ਛਿਨ੍ਨੇ ਧਮ੍ਮੇ ਵੁਚ੍ਚਮਾਨੇ ਕਿਚ੍ਚਭੇਦੇਨ ਏਕਿਸ੍ਸਾਪਿ ਸਤਿਯਾ ਅਨੇਕਨਾਮਤਾ ਹੋਤੀਤਿ ਦਸ੍ਸੇਨ੍ਤੋ ‘‘ਕਾਯੇ ਪਨਾ’’ਤਿਆਦਿਮਾਹ. ਯਥਾ ਹਿ ਪੁਗ੍ਗਲਕਿਚ੍ਚਂ ਧਮ੍ਮਾ ਏਵਾਤਿ ਧਮ੍ਮਭੇਦੇਨ ਕਾਯਾਨੁਪਸ੍ਸੀਆਦਿਪੁਗ੍ਗਲਭੇਦੋਵ ਹੋਤਿ, ਨ ਏਵਂ ਧਮ੍ਮਸ੍ਸ ਧਮ੍ਮੋ ਕਿਚ੍ਚਨ੍ਤਿ ਨ ਧਮ੍ਮਭੇਦੇਨ ਤਸ੍ਸ ਭੇਦੋ, ਤਸ੍ਮਾ ਏਕਾਵ ਸਤਿ ਚਤੁਵਿਪਲ੍ਲਾਸਪ੍ਪਹਾਨਭੂਤਾ ਮਗ੍ਗੇ ਸਮਿਦ੍ਧਾ ਅਨਤ੍ਥਨ੍ਤਰੇਨ ਤਪ੍ਪਹਾਨਕਿਚ੍ਚਭੇਦੇਨ ਚਤ੍ਤਾਰਿ ਨਾਮਾਨਿ ਲਭਤੀਤਿ ਅਯਮੇਤ੍ਥ ਅਧਿਪ੍ਪਾਯੋ.

ਸੁਤ੍ਤਨ੍ਤਭਾਜਨੀਯਵਣ੍ਣਨਾ ਨਿਟ੍ਠਿਤਾ.

੨. ਅਭਿਧਮ੍ਮਭਾਜਨੀਯਵਣ੍ਣਨਾ

੩੭੪. ਅਭਿਧਮ੍ਮਭਾਜਨੀਯੇ ‘‘ਕਥਞ੍ਚ ਭਿਕ੍ਖੁ ਕਾਯੇ ਕਾਯਾਨੁਪਸ੍ਸੀ ਵਿਹਰਤਿ? ਇਧ ਭਿਕ੍ਖੁ ਯਸ੍ਮਿਂ ਸਮਯੇ…ਪੇ… ਦਨ੍ਧਾਭਿਞ੍ਞਂ ਕਾਯੇ ਕਾਯਾਨੁਪਸ੍ਸੀ, ਯਾ ਤਸ੍ਮਿਂ ਸਮਯੇ ਸਤੀ’’ਤਿਆਦਿਨਾ ਆਗਮਨਵਸੇਨ ਵਿਸੇਸਿਤਾਨਿ ਸਤਿਪਟ੍ਠਾਨਾਨਿ ਪੁਗ੍ਗਲੇ ਠਪੇਤ੍ਵਾ ਦੇਸੇਤ੍ਵਾ ਪੁਨ ‘‘ਤਤ੍ਥ ਕਤਮਂ ਸਤਿਪਟ੍ਠਾਨਂ? ਇਧ ਭਿਕ੍ਖੁ ਯਸ੍ਮਿਂ ਸਮਯੇ…ਪੇ… ਦਨ੍ਧਾਭਿਞ੍ਞਂ…ਪੇ… ਯਾ ਤਸ੍ਮਿਂ ਸਮਯੇ ਸਤੀ’’ਤਿਆਦਿਨਾ ਪੁਗ੍ਗਲਂ ਅਨਾਮਸਿਤ੍ਵਾ ਆਗਮਵਿਸੇਸਨਞ੍ਚ ਅਕਤ੍ਵਾ ਚਤੁਕਿਚ੍ਚਸਾਧਕੇਕਸਤਿਵਸੇਨ ਸੁਦ੍ਧਿਕਸਤਿਪਟ੍ਠਾਨਨਯੋ ਵੁਤ੍ਤੋਤਿ ਅਯਮੇਤ੍ਥ ਨਯਦ੍ਵਯੇ ਵਿਸੇਸੋ.

ਅਭਿਧਮ੍ਮਭਾਜਨੀਯਵਣ੍ਣਨਾ ਨਿਟ੍ਠਿਤਾ.

ਸਤਿਪਟ੍ਠਾਨਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.