੧. ਸੁਤ੍ਤਨ੍ਤਭਾਜਨੀਯਂ

ਉਦ੍ਦੇਸਵਾਰਵਣ੍ਣਨਾ

੩੫੫. ਸਮਾਨਸਦ੍ਦਵਚਨੀਯਾਨਂ ਅਤ੍ਥਾਨਂ ਉਦ੍ਧਰਣਂ ਅਤ੍ਥੁਦ੍ਧਾਰੋ. ਸੋ ਯਸ੍ਮਾ ਸਦ੍ਦਤ੍ਥਵਿਚਾਰੋ ਨ ਹੋਤਿ, ਤਸ੍ਮਾ ਵੁਤ੍ਤਂ ‘‘ਨ ਇਧ…ਪੇ… ਅਤ੍ਥਦਸ੍ਸਨ’’ਨ੍ਤਿ. ਪ-ਸਦ੍ਦੋ ਪਧਾਨਤ੍ਥਦੀਪਕੋ ‘‘ਪਣੀਤਾ ਧਮ੍ਮਾ’’ਤਿਆਦੀਸੁ (ਧ. ਸ. ਤਿਕਮਾਤਿਕਾ ੧੪) ਵਿਯ.

ਅਨਵਸ੍ਸੁਤਤਾ ਅਨੁਪਕਿਲਿਟ੍ਠਤਾ. ਤੇਨਾਹ ‘‘ਤਦੁਭਯਵੀਤਿਵਤ੍ਤਤਾ’’ਤਿ.

ਭੁਸਤ੍ਥਂ ਪਕ੍ਖਨ੍ਦਨਨ੍ਤਿ ਭੁਸਤ੍ਥਵਿਸਿਟ੍ਠਂ ਪਕ੍ਖਨ੍ਦਨਂ ਅਨੁਪਵਿਸਨਂ.

ਅਸ੍ਸਾਦਸ੍ਸਾਤਿ ਤਣ੍ਹਾਯ. ‘‘ਨਿਚ੍ਚਂ ਅਤ੍ਤਾ’’ਤਿ ਅਭਿਨਿਵੇਸਵਤ੍ਥੁਤਾਯ ਦਿਟ੍ਠਿਯਾ ਵਿਸੇਸਕਾਰਣਾਨਂ ਚਿਤ੍ਤਧਮ੍ਮਾਨਂ ਤਣ੍ਹਾਯਪਿ ਵਤ੍ਥੁਭਾਵਤੋ ਵਿਸੇਸਗ੍ਗਹਣਂ, ਤਥਾ ਕਾਯਵੇਦਨਾਨਂ ਦਿਟ੍ਠਿਯਾਪਿ ਵਤ੍ਥੁਭਾਵਸਮ੍ਭਵਤੋ ‘‘ਵਿਸੇਸੇਨਾ’’ਤਿ ਵੁਤ੍ਤਂ. ਸਰਾਗਵੀਤਰਾਗਾਦਿਵਿਭਾਗਦ੍ਵਯਵਸੇਨੇਵ ਚਿਤ੍ਤਾਨੁਪਸ੍ਸਨਾਯ ਵੁਤ੍ਤਤ੍ਤਾ ਤਂ ‘‘ਨਾਤਿਪਭੇਦਗਤ’’ਨ੍ਤਿ ਵੁਤ੍ਤਂ. ਧਮ੍ਮਾਤਿ ਇਧ ਸਞ੍ਞਾਸਙ੍ਖਾਰਕ੍ਖਨ੍ਧਾ ਅਧਿਪ੍ਪੇਤਾ, ਸਙ੍ਖਾਰਕ੍ਖਨ੍ਧੋ ਚ ਫਸ੍ਸਾਦਿਵਸੇਨ ਅਨੇਕਭੇਦੋਤਿ ਧਮ੍ਮਾਨੁਪਸ੍ਸਨਾ ‘‘ਅਤਿਪਭੇਦਗਤਾ’’ਤਿ ਵੁਤ੍ਤਾ. ਸਰਾਗਾਦਿਵਿਭਾਗਵਸੇਨ ਸੋਲ਼ਸਭੇਦਤ੍ਤਾ ਵਾ ਚਿਤ੍ਤਾਨੁਪਸ੍ਸਨਾ ਨਾਤਿਪਭੇਦਗਤਾ ਵੁਤ੍ਤਾ, ਸੁਤ੍ਤੇ ਆਗਤਨਯੇਨ ਨੀਵਰਣਾਦਿਵਸੇਨ ਅਨੇਕਭੇਦਤ੍ਤਾ ਧਮ੍ਮਾਨੁਪਸ੍ਸਨਾ ਅਤਿਪਭੇਦਗਤਾ ਵੁਤ੍ਤਾ. ‘‘ਵਿਸੁਦ੍ਧਿਮਗ੍ਗੋਤਿ ਵੁਤ੍ਤਾਨੀ’’ਤਿ ਆਨੇਤ੍ਵਾ ਯੋਜੇਤਬ੍ਬਂ. ਤਾ ਅਨੁਪਸ੍ਸਨਾ ਏਤੇਸਨ੍ਤਿ ਤਦਨੁਪਸ੍ਸਨਾ, ਚਿਤ੍ਤਧਮ੍ਮਾਨੁਪਸ੍ਸਿਨੋ ਪੁਗ੍ਗਲਾ, ਤੇਸਂ.

ਤਤ੍ਥ ‘‘ਅਸੁਭਭਾਵਦਸ੍ਸਨੇਨਾ’’ਤਿ ਯਥਾਠਿਤਵਸੇਨਾਪਿ ਯੋਜਨਾ ਲਬ੍ਭਤੇਵ. ਭਵੋਘਸ੍ਸ ਵੇਦਨਾ ਵਤ੍ਥੁ ਭਵਸ੍ਸਾਦਭਾਵਤੋ. ਨਿਚ੍ਚਗ੍ਗਹਣਵਸੇਨਾਤਿ ਅਤ੍ਤਾਭਿਨਿਵੇਸਵਿਸਿਟ੍ਠਸ੍ਸ ਨਿਚ੍ਚਗ੍ਗਹਣਸ੍ਸ ਵਸੇਨ. ਤਥਾ ਹਿ ਵੁਤ੍ਤਂ ‘‘ਸਸ੍ਸਤਸ੍ਸ ਅਤ੍ਤਨੋ’’ਤਿ. ਓਘੇਸੁ ਵੁਤ੍ਤਨਯਾ ਏਵ ਯੋਗਾਸਵੇਸੁਪਿ ਯੋਜਨਾ ਅਤ੍ਥਤੋ ਅਭਿਨ੍ਨਤ੍ਤਾਤਿ ਤੇ ਨ ਗਹਿਤਾ. ਨਿਚ੍ਚਗ੍ਗਹਣਵਸੇਨਾਤਿ ਅਤ੍ਤਾਭਿਨਿਵੇਸਵਿਸਿਟ੍ਠਸ੍ਸ ਨਿਚ੍ਚਗ੍ਗਹਣਸ੍ਸ ਵਸੇਨ. ਪਠਮੋਘਤਤਿਯਚਤੁਤ੍ਥਗਨ੍ਥਯੋਜਨਾਯਂ ਵੁਤ੍ਤਨਯੇਨੇਵ ਕਾਯਚਿਤ੍ਤਧਮ੍ਮਾਨਂ ਇਤਰੁਪਾਦਾਨਵਤ੍ਥੁਤਾ ਗਹੇਤਬ੍ਬਾਤਿ ਵੇਦਨਾਯ ਦਿਟ੍ਠੁਪਾਦਾਨਵਤ੍ਥੁਤਾ ਦਸ੍ਸਿਤਾ. ਤਥਾ ਕਾਯਵੇਦਨਾਨਂ ਛਨ੍ਦਦੋਸਾਗਤਿਵਤ੍ਥੁਤਾ ਕਾਮੋਘਬ੍ਯਾਪਾਦਕਾਯਗਨ੍ਥਵਤ੍ਥੁਤਾਵਚਨੇਨ ਵੁਤ੍ਤਾਤਿ. ਤੇਨਾਹ ‘‘ਅਵੁਤ੍ਤਾਨਂ ਵੁਤ੍ਤਨਯੇਨ ਵਤ੍ਥੁਭਾਵੋ ਯੋਜੇਤਬ੍ਬੋ’’ਤਿ.

ਧਾਰਣਤਾ ਅਸਮ੍ਮੁਸ੍ਸਨਤਾ, ਅਨੁਸ੍ਸਰਣਮੇਵ ਵਾ. ਏਕਤ੍ਤੇਤਿ ਏਕਸਭਾਵੇ ਨਿਸ੍ਸਰਣਾਦਿਵਸੇਨ. ਸਮਾਗਮੋ ਸਚ੍ਛਿਕਿਰਿਯਾ. ਸਤਿਪਟ੍ਠਾਨਸਭਾਵੋ ਸਮ੍ਮਾਸਤਿਤਾ ਨਿਯ੍ਯਾਨਸਤਿਤਾ ਸਮਾਨਭਾਗਤਾ ਏਕਜਾਤਿਤਾ ਸਭਾਗਤਾ. ਪੁਰਿਮਸ੍ਮਿਨ੍ਤਿ ‘‘ਏਕਤ੍ਤੇ ਨਿਬ੍ਬਾਨੇ ਸਮਾਗਮੋ ਏਕਤ੍ਤਸਮੋਸਰਣ’’ਨ੍ਤਿ ਏਤਸ੍ਮਿਂ ਅਤ੍ਥੇ. ਵਿਸੁਨ੍ਤਿ ਨਾਨਾਅਤ੍ਥਦ੍ਵਯਭਾਵੇਨ. ਤਦੇਵ ਗਮਨਂ ਸਮੋਸਰਣਨ੍ਤਿ ਸਤਿਸਦ੍ਦਤ੍ਥਨ੍ਤਰਾਭਾਵਾ…ਪੇ… ਏਕਭਾਵਸ੍ਸਾਤਿ ਯੋਜੇਤਬ੍ਬਂ. ਸਤਿਸਦ੍ਦਤ੍ਥਵਸੇਨ ਅਵੁਚ੍ਚਮਾਨੇਤਿ ‘‘ਏਕੋ ਸਤਿਪਟ੍ਠਾਨਸਭਾਵੋ ਏਕਤ੍ਤ’’ਨ੍ਤਿਆਦਿਨਾ ਅਵੁਚ੍ਚਮਾਨੇ, ‘‘ਏਕਤ੍ਤੇ ਨਿਬ੍ਬਾਨੇ ਸਮਾਗਮੋ ਏਕਤ੍ਤਸਮੋਸਰਣ’’ਨ੍ਤਿ ਏਵਂ ਵੁਚ੍ਚਮਾਨੇਤਿ ਅਤ੍ਥੋ. ਧਾਰਣਤਾਵ ਸਤੀਤਿ ‘‘ਸਰਣਤਾ’’ਤਿ (ਧ. ਸ. ੧੪) ਵੁਤ੍ਤਧਾਰਣਤਾ ਏਵ ਸਤੀਤਿ ਕਤ੍ਵਾ. ਸਤਿਸਦ੍ਦਤ੍ਥਨ੍ਤਰਾਭਾਵਾਤਿ ਸਤਿਸਙ੍ਖਾਤਸ੍ਸ ਸਰਣੇਕਤ੍ਤਸਮੋਸਰਣਸਦ੍ਦਤ੍ਥਤੋ ਅਞ੍ਞਸ੍ਸ ਅਤ੍ਥਸ੍ਸ ਅਭਾਵਾ. ਪੁਰਿਮਨ੍ਤਿ ਸਰਣਪਦਂ. ਨਿਬ੍ਬਾਨਸਮੋਸਰਣੇਪੀਤਿ ਯਥਾਵੁਤ੍ਤੇ ਦੁਤਿਯੇ ਅਤ੍ਥੇ ਸਰਣੇਕਤ੍ਤਸਮੋਸਰਣਪਦਾਨਿ ਸਹਿਤਾਨੇਵ ਸਤਿਪਟ੍ਠਾਨੇਕਭਾਵਸ੍ਸ ਞਾਪਕਾਨਿ, ਏਵਂ ਨਿਬ੍ਬਾਨਸਮੋਸਰਣੇਪਿ ‘‘ਏਕਤ੍ਤੇ ਨਿਬ੍ਬਾਨੇ ਸਮਾਗਮੋ ਏਕਤ੍ਤਸਮੋਸਰਣ’’ਨ੍ਤਿ ਏਤਸ੍ਮਿਮ੍ਪਿ ਅਤ੍ਥੇ ਸਤਿ…ਪੇ… ਕਾਰਣਾਨਿ.

ਆਨਾਪਾਨਪਬ੍ਬਾਦੀਨਨ੍ਤਿ ਆਨਾਪਾਨਪਬ੍ਬਇਰਿਯਾਪਥਚਤੁਸਮ੍ਪਜਞ੍ਞ ਕੋਟ੍ਠਾਸ ਧਾਤੁਮਨਸਿਕਾਰਨਵਸਿਵਥਿਕਪਬ੍ਬਾਨੀਤਿ ਏਤੇਸਂ. ਇਮੇਸੁ ਪਨ ਯਸ੍ਮਾ ਕੇਸੁਚਿ ਦੇਵਾਨਂ ਕਮ੍ਮਟ੍ਠਾਨਂ ਨ ਇਜ੍ਝਤਿ, ਤਸ੍ਮਾ ਤਾਨਿ ਅਨਾਮਸਿਤ੍ਵਾ ਯਦਿਪਿ ਕੋਟ੍ਠਾਸਧਾਤੁਮਨਸਿਕਾਰਵਸੇਨੇਵੇਤ੍ਥ ਦੇਸਨਾ ਪਵਤ੍ਤਾ, ਦੇਸਨਨ੍ਤਰੇ ਪਨ ਆਗਤਂ ਅਨਵਸੇਸਂ ਕਾਯਾਨੁਪਸ੍ਸਨਾਵਿਭਾਗਂ ਦਸ੍ਸੇਤੁਂ ‘‘ਚੁਦ੍ਦਸਵਿਧੇਨ ਕਾਯਾਨੁਪਸ੍ਸਨਂ ਭਾਵੇਤ੍ਵਾ’’ਤਿ (ਵਿਭ. ਅਟ੍ਠ. ੩੫੫) ਵੁਤ੍ਤਂ. ਤੇਨਾਹ ‘‘ਮਹਾਸਤਿਪਟ੍ਠਾਨਸੁਤ੍ਤੇ ਵੁਤ੍ਤਾਨ’’ਨ੍ਤਿ. ‘‘ਤਥਾ’’ਤਿ ਇਮਿਨਾ ‘‘ਮਹਾਸਤਿਪਟ੍ਠਾਨਸੁਤ੍ਤੇ (ਦੀ. ਨਿ. ੨.੩੮੨) ਵੁਤ੍ਤਾਨ’’ਨ੍ਤਿ ਇਮਮੇਵ ਉਪਸਂਹਰਤਿ. ਪਞ੍ਚਵਿਧੇਨਾਤਿ ਨੀਵਰਣਉਪਾਦਾਨਕ੍ਖਨ੍ਧਾਯਤਨਬੋਜ੍ਝਙ੍ਗਅਰਿਯਸਚ੍ਚਾਨਂ ਵਸੇਨ ਪਞ੍ਚਧਾ. ਭਾਵਨਾਨੁਭਾਵੋ ਅਰਿਯਮਗ੍ਗਗ੍ਗਹਣਸਮਤ੍ਥਤਾ.

ਤਂਨਿਯਮਤੋਤਿ ਤਸ੍ਸਾ ਕਾਯਾਨੁਪਸ੍ਸਨਾਦਿਪਟਿਪਤ੍ਤਿਯਾ ਨਿਯਮਤੋ. ਤਸ੍ਸਾ ਭਿਕ੍ਖੁਭਾਵੇ ਨਿਯਤੇ ਸਾਪਿ ਭਿਕ੍ਖੁਭਾਵੇ ਨਿਯਤਾਯੇਵ ਨਾਮ ਹੋਤਿ.

ਕਾਯਾਨੁਪਸ੍ਸਨਾਉਦ੍ਦੇਸਵਣ੍ਣਨਾ

ਏਤ੍ਥਾਤਿ ਕਾਯੇ. ਅਵਯਵਾ ਅਸ੍ਸ ਅਤ੍ਥੀਤਿ ਅਵਯਵੀ, ਸਮੁਦਾਯੋ, ਸਮੂਹੋਤਿ ਅਤ੍ਥੋ, ਸੋ ਪਨ ਅਵਯਵਵਿਨਿਮੁਤ੍ਤਂ ਦ੍ਰਬ੍ਯਨ੍ਤਰਨ੍ਤਿ ਗਾਹੋ ਲਦ੍ਧਿ ਅਵਯਵੀਗਾਹੋ. ਹਤ੍ਥਪਾਦਾਦਿਅਙ੍ਗੁਲਿਨਖਾਦਿਅਙ੍ਗਪਚ੍ਚਙ੍ਗੇ ਸਨ੍ਨਿਵੇਸਵਿਸਿਟ੍ਠੇ ਉਪਾਦਾਯ ਯਾਯਂ ਅਙ੍ਗਪਚ੍ਚਙ੍ਗਸਮਞ੍ਞਾ ਚੇਵ ਕਾਯਸਮਞ੍ਞਾ ਚ, ਤਂ ਅਤਿਕ੍ਕਮਿਤ੍ਵਾ ਇਤ੍ਥਿਪੁਰਿਸਰਥਘਟਾਦਿਦ੍ਰਬ੍ਯਨ੍ਤਿਪਰਿਕਪ੍ਪਨਂ ਸਮਞ੍ਞਾਤਿਧਾਵਨਂ. ਅਥ ਵਾ ਯਥਾਵੁਤ੍ਤਸਮਞ੍ਞਂ ਅਤਿਕ੍ਕਮਿਤ੍ਵਾ ਪਕਤਿਆਦਿਦ੍ਰਬ੍ਯਾਦਿਜੀਵਾਦਿਕਾਯਾਦਿਪਦਤ੍ਥਨ੍ਤਰਪਰਿਕਪ੍ਪਨਂ ਸਮਞ੍ਞਾਤਿਧਾਵਨਂ. ਨਿਚ੍ਚਸਾਰਾਦਿਗਾਹਭੂਤੋ ਅਭਿਨਿਵੇਸੋ ਸਾਰਾਦਾਨਾਭਿਨਿਵੇਸੋ.

ਨ ਤਂ ਦਿਟ੍ਠਨ੍ਤਿ ਤਂ ਇਤ੍ਥਿਪੁਰਿਸਾਦਿ ਦਿਟ੍ਠਂ ਨ ਹੋਤਿ. ਦਿਟ੍ਠਂ ਵਾ ਇਤ੍ਥਿਪੁਰਿਸਾਦਿ ਨ ਹੋਤੀਤਿ ਯੋਜਨਾ. ਯਥਾਵੁਤ੍ਤਨ੍ਤਿ ਕੇਸਾਦਿਭੂਤੁਪਾਦਾਯਸਮੂਹਸਙ੍ਖਾਤਂ.

ਕੇਸਾਦਿਪਥਵਿਨ੍ਤਿ ਕੇਸਾਦਿਸਞ੍ਞਿਤਂ ਸਸਮ੍ਭਾਰਪਥਵਿਂ. ਪੁਬ੍ਬਾਪਰਿਯਭਾਵੇਨਾਤਿ ਸਨ੍ਤਾਨਵਸੇਨ. ਅਞ੍ਞਤ੍ਥਾਤਿ ‘‘ਆਪੋਕਾਯ’’ਨ੍ਤਿ ਏਵਮਾਦੀਸੁ.

ਅਜ੍ਝਤ੍ਤਬਹਿਦ੍ਧਾਤਿ ਸਪਰਸਨ੍ਤਾਨੇ ਕਾਯੋ ਵੁਤ੍ਤੋਤਿ. ‘‘ਕਾਯੋ’’ਤਿ ਚੇਤ੍ਥ ਸਮ੍ਮਸਨੁਪਗਾ ਰੂਪਧਮ੍ਮਾ ਅਧਿਪ੍ਪੇਤਾਤਿ ਆਹ ‘‘ਅਜ੍ਝਤ੍ਤਬਹਿਦ੍ਧਾਧਮ੍ਮਾਨ’’ਨ੍ਤਿ. ਘਟਿਤਂ ਏਕਾਬਦ੍ਧਂ ਆਰਮ੍ਮਣਂ ਘਟਿਤਾਰਮ੍ਮਣਂ, ਏਕਾਰਮ੍ਮਣਭੂਤਨ੍ਤਿ ਅਤ੍ਥੋ. ਤੇਨਾਹ ‘‘ਏਕਤੋ ਆਰਮ੍ਮਣਭਾਵੋ ਨਤ੍ਥੀ’’ਤਿ.

ਅਨ੍ਤੋਓਲੀਯਨਾ ਅਨ੍ਤੋਸਙ੍ਕੋਚੋ ਅਨ੍ਤਰਾਵੋਸਾਨਂ.

ਦ੍ਵੀਹੀਤਿ ਅਭਿਜ੍ਝਾਵਿਨਯਦੋਮਨਸ੍ਸਵਿਨਯੇਹਿ.

ਸਤਿ ਚ ਸਮ੍ਪਜਞ੍ਞਞ੍ਚ ਸਤਿਸਮ੍ਪਜਞ੍ਞਂ, ਤੇਨ. ਏਤੇਨ ਕਰਣਭੂਤੇਨ. ਵਿਪਕ੍ਖਧਮ੍ਮੇਹਿ ਅਨਨ੍ਤਰਿਤਤ੍ਤਾ ਅਵਿਚ੍ਛਿਨ੍ਨਸ੍ਸ. ਤਸ੍ਸ ਸਬ੍ਬਤ੍ਥਿਕਕਮ੍ਮਟ੍ਠਾਨਸ੍ਸ.

ਕਾਯਾਨੁਪਸ੍ਸਨਾਉਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਵੇਦਨਾਨੁਪਸ੍ਸਨਾਦਿਉਦ੍ਦੇਸਵਣ੍ਣਨਾ

ਸੁਖਾਦੀਨਨ੍ਤਿ ਸੁਖਦੁਕ੍ਖਾਦੁਕ੍ਖਮਸੁਖਾਨਂ.

ਰੂਪਾਦਿਆਰਮ੍ਮਣਨਾਨਤ੍ਤਭੇਦਾਨਂ ਵਸੇਨ ਯੋਜੇਤਬ੍ਬਨ੍ਤਿ ਸਮ੍ਬਨ੍ਧੋ. ਤਥਾ ਚ ਸੇਸੇਸੁਪਿ. ਸਵਤ੍ਥੁਕਾਵਤ੍ਥੁਕਾਦੀਤਿ ਆਦਿ-ਸਦ੍ਦੇਨ ਹੀਨਾਦਿਯੋਨਿਆਦਿਭੇਦਂ ਸਙ੍ਗਣ੍ਹਾਤਿ. ਵਿਸੁਂ ਵਿਸੁਂ ਨ ਵਤ੍ਤਬ੍ਬਨ੍ਤਿ ਚੋਦਨਂ ਦਸ੍ਸੇਤੀਤਿ ਯੋਜਨਾ. ਏਕਤ੍ਥਾਤਿ ਕਾਯਾਦੀਸੁ ਏਕਸ੍ਮਿਂ. ਪੁਰਿਮਚੋਦਨਾਯਾਤਿ ‘‘ਪੁਬ੍ਬੇ ਪਹੀਨਤ੍ਤਾ ਪੁਨ ਪਹਾਨਂ ਨ ਵਤ੍ਤਬ੍ਬ’’ਨ੍ਤਿ ਚੋਦਨਾਯ. ਪਹੀਨਨ੍ਤਿ ਵਿਕ੍ਖਮ੍ਭਿਤਂ. ਪਟਿਪਕ੍ਖਭਾਵਨਾਯਾਤਿ ਮਗ੍ਗਭਾਵਨਾਯ. ਉਭਯਤ੍ਥਾਤਿ ਉਭਯਚੋਦਨਾਯ. ਉਭਯਨ੍ਤਿ ਪਰਿਹਾਰਦ੍ਵਯਂ. ਯਸ੍ਮਾ ਪੁਰਿਮਚੋਦਨਾਯ ਨਾਨਾਪੁਗ੍ਗਲਪਰਿਹਾਰੋ, ਨਾਨਾਚਿਤ੍ਤਕ੍ਖਣਿਕਪਰਿਹਾਰੋ ਚ ਸਮ੍ਭਵਤਿ, ਦੁਤਿਯਚੋਦਨਾਯ ਪਨ ਨਾਨਾਚਿਤ੍ਤਕ੍ਖਣਿਕਪਰਿਹਾਰੋਯੇਵ, ਤਸ੍ਮਾ ਵੁਤ੍ਤਂ ‘‘ਸਮ੍ਭਵਤੋ ਯੋਜੇਤਬ੍ਬ’’ਨ੍ਤਿ. ਮਗ੍ਗਸਤਿਪਟ੍ਠਾਨਭਾਵਨਂ ਸਨ੍ਧਾਯ ਵੁਤ੍ਤਂ. ਸਬ੍ਬਤ੍ਥਾਤਿ ਸਬ੍ਬੇਸੁ ਕਾਯਾਦੀਸੁ.

ਵੇਦਨਾਨੁਪਸ੍ਸਨਾਦਿਉਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਉਦ੍ਦੇਸਵਾਰਵਣ੍ਣਨਾ ਨਿਟ੍ਠਿਤਾ.

ਕਾਯਾਨੁਪਸ੍ਸਨਾਨਿਦ੍ਦੇਸਵਣ੍ਣਨਾ

੩੫੬. ਅਜ੍ਝਤ੍ਤਾਦੀਤਿ ਆਦਿ-ਸਦ੍ਦੇਨ ਇਧ ਵੁਤ੍ਤਾ ਬਹਿਦ੍ਧਾਅਜ੍ਝਤ੍ਤਬਹਿਦ੍ਧਾਅਨੁਪਸ੍ਸਨਪ੍ਪਕਾਰਾ ਵਿਯ ਮਹਾਸਤਿਪਟ੍ਠਾਨਸੁਤ੍ਤੇ ਵੁਤ੍ਤਾ ਸਮੁਦਯਧਮ੍ਮਾਨੁਪਸ੍ਸਿਆਦਿਅਨੁਪਸ੍ਸਨਪ੍ਪਕਾਰਾਪਿ ਕਾਯਾਨੁਪਸ੍ਸਨਾਭਾਵਤੋ ਗਹਿਤਾ ਇਚ੍ਚੇਵ ਵੇਦਿਤਬ੍ਬਂ. ਤਤ੍ਥਾਤਿ ਅਜ੍ਝਤ੍ਤਾਦਿਅਨੁਪਸ੍ਸਨਾਯਂ. ਚੁਦ੍ਦਸ ਪਕਾਰਾ ਮਹਾਸਤਿਪਟ੍ਠਾਨਸੁਤ੍ਤੇ ਆਗਤਚੁਦ੍ਦਸਪ੍ਪਕਾਰਾਦਿਕੇ ਅਪੇਕ੍ਖਿਤ੍ਵਾ ਇਧ ਵੁਤ੍ਤਾ. ਅਜ੍ਝਤ੍ਤਾਦਿਪ੍ਪਕਾਰੋ ਏਕੋ ਪਕਾਰੋਤਿ ਆਹ ‘‘ਏਕਪ੍ਪਕਾਰਨਿਦ੍ਦੇਸੇਨਾ’’ਤਿ. ਬਾਹਿਰੇਸੂਤਿ ਏਕਚ੍ਚੇਸੁ ਅਞ੍ਞਤਿਤ੍ਥਿਯੇਸੁ. ਤੇਸਮ੍ਪਿ ਹਿ ਆਨਾਪਾਨਾਦਿਵਸੇਨ ਸਮਥਪਕ੍ਖਿਕਾ ਕਾਯਾਨੁਪਸ੍ਸਨਾ ਸਮ੍ਭਵਤਿ. ਤੇਨਾਹ ‘‘ਏਕਦੇਸਸਮ੍ਭਵਤੋ’’ਤਿ.

ਤਚਸ੍ਸ ਚ ਅਤਚਪਰਿਚ੍ਛਿਨ੍ਨਤਾ ਤਚੇਨ ਅਪਰਿਚ੍ਛਿਨ੍ਨਤਾ ਅਤ੍ਥੀਤਿ ਯੋਜਨਾ. ‘‘ਦੀਘਬਾਹੁ ਨਚ੍ਚਤੂ’’ਤਿਆਦੀਸੁ ਵਿਯ ਅਞ੍ਞਪਦਤ੍ਥੇਪਿ ਸਮਾਸੇ ਅਵਯਵਪਦਤ੍ਥਸਙ੍ਗਹੋ ਲਬ੍ਭਤੇਵਾਤਿ ਵੁਤ੍ਤਂ ‘‘ਕਾਯੇਕਦੇਸਭੂਤੋ ਤਚੋ ਗਹਿਤੋ ਏਵਾ’’ਤਿ. ਤਚਪਟਿਬਦ੍ਧਾਨਂ ਨਖਦਨ੍ਤਨ੍ਹਾਰੁਮਂਸਾਨਂ, ਤਚਪਟਿਬਦ੍ਧਾਨਂ ਤਦਨੁਪ੍ਪਵਿਟ੍ਠਮੂਲਾਨਂ ਕੇਸਲੋਮਾਨਂ, ਤਪ੍ਪਟਿਬਦ੍ਧਪਟਿਬਦ੍ਧਾਨਂ ਇਤਰੇਸਂ ਸਮੂਹਭੂਤੋ ਸਬ੍ਬੋ ਕਾਯੋ ‘‘ਤਚਪਰਿਯਨ੍ਤੋ’’ਤ੍ਵੇਵ ਵੁਤ੍ਤੋਤਿ ਦਸ੍ਸੇਨ੍ਤੋ ‘‘ਤਪ੍ਪਟਿਬਦ੍ਧਾ’’ਤਿਆਦਿਮਾਹ. ਅਤ੍ਥਿ ਕੇਸਾ, ਅਤ੍ਥਿ ਲੋਮਾਤਿ ਸਮ੍ਬਨ੍ਧੋ. ਤਤ੍ਥ ਅਤ੍ਥੀਤਿ ਪੁਥੁਤ੍ਤਵਾਚੀ ਏਕਂ ਨਿਪਾਤਪਦਂ, ਨ ਕਿਰਿਯਾਪਦਂ. ਕਿਰਿਯਾਪਦਤ੍ਤੇ ਹਿ ਸਨ੍ਤੀਤਿ ਵਤ੍ਤਬ੍ਬਂ ਸਿਯਾ, ਵਚਨਵਿਪਲ੍ਲਾਸੇਨ ਵਾ ਵੁਤ੍ਤਨ੍ਤਿ.

ਕਮ੍ਮਟ੍ਠਾਨਸ੍ਸ ਵਾਚੁਗ੍ਗਤਕਰਣਾਦਿਨਾ ਉਗ੍ਗਣ੍ਹਨਂ ਉਗ੍ਗਹੋ. ਕੋਟ੍ਠਾਸਪਾਲ਼ਿਯਾ ਹਿ ਵਾਚੁਗ੍ਗਤਕਰਣਂ, ਮਨਸਿਕਿਰਿਯਾਯ ਕੇਸਾਦੀਨਂ ਵਣ੍ਣਾਦਿਤੋ ਉਪਧਾਰਣਸ੍ਸ ਚ ਪਗੁਣਭਾਵਾਪਾਦਨਂ ਇਧ ਉਗ੍ਗਹੋ. ਯੇਨ ਪਨ ਨਯੇਨ ਯੋਗਾਵਚਰੋ ਤਤ੍ਥ ਕੁਸਲੋ ਹੋਤਿ, ਸੋ ਵਿਧੀਤਿ ਵੁਤ੍ਤੋ.

ਪੁਰਿਮੇਹੀਤਿ ਪੁਰਿਮਪੁਰਿਮੇਹਿ ਪਞ੍ਚਕਛਕ੍ਕੇਹਿ ਸਮ੍ਬਨ੍ਧੋ ਵੁਤ੍ਤੋ. ‘‘ਮਂਸਂ…ਪੇ… ਵਕ੍ਕ’’ਨ੍ਤਿ ਹਿ ਅਨੁਲੋਮਤੋ ਵਕ੍ਕਪਞ੍ਚਕਸ੍ਸ ਪੁਨ ‘‘ਵਕ੍ਕਂ…ਪੇ… ਕੇਸਾ’’ਤਿ ਵਕ੍ਕਪਞ੍ਚਕਸ੍ਸ, ਤਚਪਞ੍ਚਕਸ੍ਸ ਚ ਪਟਿਲੋਮਤੋ ਸਜ੍ਝਾਯਕ੍ਕਮੋ ਸਮ੍ਬਨ੍ਧੋ ਦਸ੍ਸਿਤੋ. ਸ੍ਵਾਯਂ ਸਜ੍ਝਾਯੋਤਿ ਸਮ੍ਬਨ੍ਧੋ. ਵਿਸੁਂ ਤਿਪਞ੍ਚਾਹਨ੍ਤਿ ਅਨੁਲੋਮਤੋ ਪਞ੍ਚਾਹਂ, ਪਟਿਲੋਮਤੋ ਪਞ੍ਚਾਹਂ, ਅਨੁਲੋਮਪਟਿਲੋਮਤੋ ਪਞ੍ਚਾਹਨ੍ਤਿ ਏਵਂ ਪਞ੍ਚਕਛਕ੍ਕੇਸੁ ਪਚ੍ਚੇਕਂ ਤਿਪਞ੍ਚਾਹਂ. ਪੁਰਿਮੇਹਿ ਏਕਤੋ ਤਿਪਞ੍ਚਾਹਨ੍ਤਿ ਤਚਪਞ੍ਚਕਾਦੀਹਿ ਸਦ੍ਧਿਂ ਅਨੁਲੋਮਤੋ ਵਕ੍ਕਪਞ੍ਚਕਾਦੀਨਿ ਏਕਜ੍ਝਂ ਕਤ੍ਵਾ ਵੁਤ੍ਤਨਯੇਨੇਵ ਤਿਪਞ੍ਚਾਹਂ. ਆਦਿਅਨ੍ਤਦਸ੍ਸਨਵਸੇਨਾਤਿਆਦਿਭੂਤਸ੍ਸ ਅਨੁਲੋਮਤੋ ਸਜ੍ਝਾਯਸ੍ਸ, ਅਨੁਲੋਮਪਟਿਲੋਮਤੋ ਸਜ੍ਝਾਯੇ ਅਨ੍ਤਭੂਤਸ੍ਸ ਪਟਿਲੋਮਤੋ ਸਜ੍ਝਾਯਸ੍ਸ ਦਸ੍ਸਨਵਸੇਨ. ਤੇਨਾਹ ‘‘ਅਨੁਲੋਮ…ਪੇ… ਅਨ੍ਤਿਮੋ’’ਤਿ. ਏਤਮ੍ਪੀਤਿ ਯਦਿਦਂ ਪੁਰਿਮੇਹਿ ਸਦ੍ਧਿਂ ਪਚ੍ਛਿਮਸ੍ਸ ਪਞ੍ਚਕਾਦਿਨੋ ਏਕਤੋ ਸਜ੍ਝਾਯਕਰਣਂ, ਪਞ੍ਚਕਾਦੀਨਂ ਪਚ੍ਚੇਕਂ ਅਨੁਲੋਮਾਦਿਨਾ ਸਜ੍ਝਾਯਪ੍ਪਕਾਰਤੋ ਅਞ੍ਞੋ ਸਜ੍ਝਾਯਪ੍ਪਕਾਰੋ ਏਸੋਤਿ ਅਤ੍ਥੋ. ਦ੍ਵਿਨ੍ਨਂ ਹਤ੍ਥਾਨਂ ਏਕਮੁਖਾ ਅਞ੍ਞਮਞ੍ਞਸਮ੍ਬਨ੍ਧਾ ਠਪਿਤਾ ਅਙ੍ਗੁਲਿਯੋ ਇਧ ਹਤ੍ਥਸਙ੍ਖਲਿਕਾਤਿ ਅਧਿਪ੍ਪੇਤਾਤਿ ਆਹ ‘‘ਅਙ੍ਗੁਲਿਪਨ੍ਤੀ’’ਤਿ. ਅਸੁਭਲਕ੍ਖਣਂ ਕੇਸਾਦੀਨਂ ਪਟਿਕ੍ਕੂਲਭਾਵੋ. ਥਦ੍ਧਾਦਿਭਾਵੋ ਧਾਤੁਲਕ੍ਖਣਂ.

ਅਤ੍ਤਨੋ ਕੋਟ੍ਠਾਸੋ, ਸਮਾਨੋ ਵਾ ਕੋਟ੍ਠਾਸੋ ਸਕੋਟ੍ਠਾਸੋ, ਤਤ੍ਥ ਭਵੋ ਸਕੋਟ੍ਠਾਸਿਕੋ, ਕਮ੍ਮਟ੍ਠਾਨਂ.

ਕਾਯਾਨੁਪਸ੍ਸਨਂ ਹਿਤ੍ਵਾਤਿ ਅਸੁਭਤੋ ਵਾ ਧਾਤੁਤੋ ਅਨੁਪਸ੍ਸਨਂ ਮਨਸਿਕਾਰਂ ਅਕਤ੍ਵਾ. ਪੁਬ੍ਬੇ ਵਿਯ ਪਰਿਯਨ੍ਤਤਾਲਞ੍ਚ ਆਦਿਤਾਲਞ੍ਚ ਅਗਨ੍ਤ੍ਵਾ.

ਸਮਾਧਾਨਾਦਿਵਿਸੇਸਯੋਗੇਨ ਅਧਿਕਂ ਚਿਤ੍ਤਨ੍ਤਿ ਅਧਿਚਿਤ੍ਤਂ. ਤੇਨ ਵੁਤ੍ਤਂ ‘‘ਸਮਥਵਿਪਸ੍ਸਨਾਚਿਤ੍ਤ’’ਨ੍ਤਿ. ਮਨਸਿਕਰਣਂ ਚਿਤ੍ਤਨ੍ਤਿ ਏਕਨ੍ਤਂ ਸਮਾਧਿਨਿਮਿਤ੍ਤਸ੍ਸੇਵ ਸਮਨ੍ਨਾਹਾਰਕਂ ਚਿਤ੍ਤਂ. ਵਿਕ੍ਖੇਪਵਸੇਨ ਚਿਤ੍ਤਸ੍ਸ ਨਾਨਾਰਮ੍ਮਣੇ ਵਿਸਟਪ੍ਪਵਤ੍ਤਿ ਇਧ ਪਭਞ੍ਜਨਂ, ਸਮਾਧਾਨੇਨ ਤਦਭਾਵਤੋ ਨ ਚ ਪਭਞ੍ਜਨਸਭਾਵਂ.

ਸਕ੍ਖਿਭਵਨਤਾ ਪਚ੍ਚਕ੍ਖਕਾਰਿਤਾ. ਪੁਬ੍ਬਹੇਤਾਦਿਕੇਤਿ ਆਦਿ-ਸਦ੍ਦੇਨ ਤਦਨੁਰੂਪਮਨਸਿਕਾਰਾਨੁਯੋਗਾਦਿਂ ਸਙ੍ਗਣ੍ਹਾਤਿ.

ਸਮਪ੍ਪਵਤ੍ਤਨ੍ਤਿ ਲੀਨੁਦ੍ਧਚ੍ਚਰਹਿਤਂ. ਤਥਾਪਵਤ੍ਤਿਯਾਤਿ ਮਜ੍ਝਿਮਸਮਥਨਿਮਿਤ੍ਤਂ ਪਟਿਪਤ੍ਤਿਯਾ, ਤਤ੍ਥ ਚ ਪਕ੍ਖਨ੍ਦਨੇਨ ਸਿਦ੍ਧਾਯ ਯਥਾਵੁਤ੍ਤਸਮਪ੍ਪਵਤ੍ਤਿਯਾ. ਪਞ੍ਞਾਯ ਤੋਸੇਤੀਤਿ ਯਾਯਂ ਤਤ੍ਥ ਜਾਤਾਨਂ ਧਮ੍ਮਾਨਂ ਅਨਤਿਵਤ੍ਤਨਾ, ਇਨ੍ਦ੍ਰਿਯਾਨਂ ਏਕਰਸਤਾ, ਤਦੁਪਗਵੀਰਿਯਵਾਹਨਾ, ਆਸੇਵਨਾਤਿ ਇਮਾਸਂ ਸਾਧਿਕਾ ਭਾਵਨਾਪਞ੍ਞਾ, ਤਾਯ ਅਧਿਚਿਤ੍ਤਂ ਤੋਸੇਤਿ ਪਹਟ੍ਠਂ ਕਰੋਤਿ. ਯਥਾਵੁਤ੍ਤਵਿਸੇਸਸਿਦ੍ਧਿਯਾਵ ਹਿ ਤਂਸਾਧਿਕਾਯ ਪਞ੍ਞਾਯ ਤਂ ਚਿਤ੍ਤਂ ਸਮ੍ਪਹਂਸਿਤਂ ਨਾਮ ਹੋਤਿ. ਏਵਂ ਸਮ੍ਪਹਂਸਨ੍ਤੋ ਚ ਯਸ੍ਮਾ ਸਬ੍ਬਸੋ ਪਰਿਬਨ੍ਧਵਿਸੋਧਨੇਨ ਪਞ੍ਞਾਯ ਚਿਤ੍ਤਂ ਵੋਦਾਪੇਤੀਤਿ ਚ ਵੁਚ੍ਚਤਿ, ਤਸ੍ਮਾ ‘‘ਸਮੁਤ੍ਤੇਜੇਤਿ ਚਾ’’ਤਿ ਵੁਤ੍ਤਂ. ਨਿਰਸ੍ਸਾਦਨ੍ਤਿ ਪੁਬ੍ਬੇਨਾਪਰਂ ਵਿਸੇਸਾਲਾਭੇਨ ਭਾਵਨਾਰਸਵਿਰਹਿਤਂ. ਸਮ੍ਪਹਂਸੇਤੀਤਿ ਭਾਵਨਾਯ ਚਿਤ੍ਤਂ ਸਮ੍ਮਾ ਪਹਾਸੇਤਿ ਪਮੋਦੇਤਿ. ਸਮੁਤ੍ਤੇਜੇਤੀਤਿ ਸਮ੍ਮਾ ਤਤ੍ਥ ਉਤ੍ਤੇਜੇਤਿ.

ਆਸਯੋ ਪਵਤ੍ਤਿਟ੍ਠਾਨਂ.

ਵਵਤ੍ਥਿਤਤਨ੍ਤਿ ਅਸਂਕਿਣ੍ਣਤਂ.

ਅਨ੍ਤੋਤਿ ਅਬ੍ਭਨ੍ਤਰੇ ਕੋਟ੍ਠਾਸੇ. ਸੁਖੁਮਨ੍ਤਿ ਸੁਖੁਮਨ੍ਹਾਰੁਆਦਿਂ ਸਨ੍ਧਾਯ ਵਦਤਿ.

ਤਾਲਪਟ੍ਟਿਕਾ ਤਾਲਪਤ੍ਤਵਿਲਿਵੇਹਿ ਕਤਕਟਸਾਰਕੋ.

ਗਣਨਾਯ ਮਤ੍ਤਾ-ਸਦ੍ਦੋ ਕਤਿਪਯੇਹਿ ਊਨਭਾਵਦੀਪਨਤ੍ਥਂ ਵੁਚ੍ਚਤਿ. ਦਨ੍ਤਟ੍ਠਿਵਜ੍ਜਿਤਾਨਿ ਤੀਹਿ ਊਨਾਨਿ ਤੀਣਿ ਅਟ੍ਠਿਸਤਾਨਿ. ਤਸ੍ਮਾ ‘‘ਤਿਮਤ੍ਤਾਨੀ’’ਤਿ ਵੁਤ੍ਤਂ. ਯਂ ਪਨ ਵਿਸੁਦ੍ਧਿਮਗ੍ਗੇ ‘‘ਅਤਿਰੇਕਤਿਸਤਅਟ੍ਠਿਕਸਮੁਸ੍ਸਯ’’ਨ੍ਤਿ (ਵਿਸੁਦ੍ਧਿ. ੧.੧੨੨) ਵੁਤ੍ਤਂ, ਤਂ ਦਨ੍ਤਟ੍ਠੀਨਿਪਿ ਗਹੇਤ੍ਵਾ ਸਬ੍ਬਸਙ੍ਗਾਹਿਕਨਯੇਨ ਵੁਤ੍ਤਂ. ‘‘ਗੋਪ੍ਫਕਟ੍ਠਿਕਾਦੀਨਿ ਅਵੁਤ੍ਤਾਨੀ’’ਤਿ ਨ ਵਤ੍ਤਬ੍ਬਂ ‘‘ਏਕੇਕਸ੍ਮਿਂ ਪਾਦੇ ਦ੍ਵੇ ਗੋਪ੍ਫਕਟ੍ਠੀਨੀ’’ਤਿ ਵੁਤ੍ਤਤ੍ਤਾ, ‘‘ਆਨਿਸਦਟ੍ਠਿਆਦੀਨੀ’’ਤਿ ਪਨ ਵਤ੍ਤਬ੍ਬਂ.

ਤੇਨ ਅਟ੍ਠਿਨਾਤਿ ਊਰੁਟ੍ਠਿਨਾ.

ਮਰੁਮ੍ਪੇਹੀਤਿ ਮਰੁਮ੍ਪਚੁਣ੍ਣੇਹਿ.

ਸੁਸਮਾਹਿਤਚਿਤ੍ਤੇਨ ਹੇਤੁਭੂਤੇਨ. ਨਾਨਾਰਮ੍ਮਣਵਿਪ੍ਫਨ੍ਦਨਵਿਰਹੇਨਾਤਿ ਨਾਨਾਰਮ੍ਮਣਭਾਵੇਨ ਵਿਪ੍ਫਨ੍ਦਨਂ ਨਾਨਾਰਮ੍ਮਣਵਿਪ੍ਫਨ੍ਦਨਂ, ਤੇਨ ਵਿਰਹੇਨ. ਅਨਤਿਕ੍ਕਨ੍ਤਪੀਤਿਸੁਖਸ੍ਸ ਝਾਨਚਿਤ੍ਤਸ੍ਸ. ਤਂਸਮਙ੍ਗੀਪੁਗ੍ਗਲਸ੍ਸ ਵਾ.

ਪਟਿਕ੍ਕੂਲਧਾਤੁਵਣ੍ਣਵਿਸੇਸਨ੍ਤਿ ਪਟਿਕ੍ਕੂਲਵਿਸੇਸਂ, ਧਾਤੁਵਿਸੇਸਂ, ਵਣ੍ਣਕਸਿਣਵਿਸੇਸਂ. ਵਕ੍ਕਪਞ੍ਚਕਾਦੀਸੁ ਪਞ੍ਚਸੁ ਵਿਸੁਂ, ਹੇਟ੍ਠਿਮੇਹਿ ਏਕਤੋ ਚ ਸਜ੍ਝਾਯੇ ਛਨ੍ਨਂ ਛਨ੍ਨਂ ਪਞ੍ਚਾਹਾਨਂ ਵਸੇਨ ਪਞ੍ਚ ਮਾਸਾ ਪਰਿਪੁਣ੍ਣਾ ਲਬ੍ਭਨ੍ਤਿ, ਤਚਪਞ੍ਚਕੇ ਪਨ ਵਿਸੁਂ ਤਿਪਞ੍ਚਾਹਮੇਵਾਤਿ ਆਹ ‘‘ਅਦ੍ਧਮਾਸੇ ਊਨੇਪੀ’’ਤਿ. ਮਾਸਨ੍ਤਰਗਮਨਂ ਸਜ੍ਝਾਯਸ੍ਸ ਸਤ੍ਤਮਾਦਿਮਾਸਗਮਨਂ.

ਯਮੇਨ੍ਤਨ੍ਤਿ ਬਨ੍ਧੇਨ੍ਤਂ.

‘‘ਨੀਲਂ ਪੀਤ’’ਨ੍ਤਿਆਦਿਨਾ ਸਙ੍ਘਾਟੇ ਨੀਲਾਦਿਵਵਤ੍ਥਾਨਂ ਤਂਨਿਸ੍ਸਯਤ੍ਤਾ ਮਹਾਭੂਤੇ ਉਪਾਦਾਯਾਤਿ ਆਹ ‘‘ਮਹਾਭੂਤਂ…ਪੇ… ਦੁਗ੍ਗਨ੍ਧਨ੍ਤਿਆਦਿਨਾ’’ਤਿ. ਉਪਾਦਾਯਰੂਪਂ ਮਹਾਭੂਤੇਨ ਪਰਿਚ੍ਛਿਨ੍ਨਨ੍ਤਿ ਯੋਜਨਾ. ਤਸ੍ਸਾਤਿ ਉਪਾਦਾਰੂਪਸ੍ਸ. ਤਤੋਤਿ ਮਹਾਭੂਤਤੋ. ਛਾਯਾਯ ਆਤਪਪਚ੍ਚਯਭਾਵੋ ਆਤਪੋ ਪਚ੍ਚਯੋ ਏਤਿਸ੍ਸਾਤਿ, ਆਤਪਸ੍ਸ ਛਾਯਾਯ ਉਪ੍ਪਾਦਕਭਾਵੋ ਛਾਯਾਤਪਾਨਂ ਆਤਪਪਚ੍ਚਯਛਾਯੁਪ੍ਪਾਦਕਭਾਵੋ. ਤੇਨ ਉਪ੍ਪਾਦੇਤਬ੍ਬਉਪ੍ਪਾਦਕਭਾਵੋ ਅਞ੍ਞਮਞ੍ਞਪਰਿਚ੍ਛੇਦਕਤਾਤਿ ਦਸ੍ਸੇਤਿ. ਆਯਤਨਾਨਿ ਚ ਦ੍ਵਾਰਾਨਿ ਚਾਤਿ ਦ੍ਵਾਦਸਾਯਤਨਾਨਿ, ਤਦੇਕਦੇਸਭੂਤਾਨਿ ਦ੍ਵਾਰਾਨਿ ਚ.

ਸਪ੍ਪਚ੍ਚਯਭਾਵਾਤਿ ਸਪ੍ਪਚ੍ਚਯਤ੍ਤਾ.

ਯਥਾਵੁਤ੍ਤੇਨ ਆਕਾਰੇਨਾਤਿ ‘‘ਇਤਿ ਇਦਂ ਸਤ੍ਤਵਿਧਂ ਉਗ੍ਗਹਕੋਸਲ੍ਲਂ ਸੁਗ੍ਗਹਿਤਂ ਕਤ੍ਵਾ’’ਤਿਆਦਿਨਾ (ਵਿਭ. ਅਟ੍ਠ. ੩੫੬), ‘‘ਇਮਂ ਪਨ ਕਮ੍ਮਟ੍ਠਾਨਂ ਭਾਵੇਤ੍ਵਾ ਅਰਹਤ੍ਤਂ ਪਾਪੁਣਿਤੁਕਾਮੇਨਾ’’ਤਿਆਦਿਨਾ (ਵਿਭ. ਅਟ੍ਠ. ੩੫੬) ਵਾ ਵੁਤ੍ਤਪ੍ਪਕਾਰੇਨ ਵਿਧਿਨਾ. ‘‘ਅਵਿਸੇਸਤੋ ਪਨ ਸਾਧਾਰਣਵਸੇਨ ਏਵਂ ਵੇਦਿਤਬ੍ਬਾ’’ਤਿ, ‘‘ਇਤੋ ਪਟ੍ਠਾਯਾ’’ਤਿ ਚ ਵਦਨ੍ਤਿ. ਵਣ੍ਣਾਦਿਮੁਖੇਨਾਤਿ ਵਣ੍ਣਪਟਿਕ੍ਕੂਲਸੁਞ੍ਞਤਾਮੁਖੇਨ. ਉਪਟ੍ਠਾਨਨ੍ਤਿ ਕਮ੍ਮਟ੍ਠਾਨਸ੍ਸ ਉਪਟ੍ਠਾਨਂ, ਯੋ ਉਗ੍ਗਹੋਤਿ ਵੁਤ੍ਤੋ. ਏਤ੍ਥਾਤਿ ਚਤੁਕ੍ਕਪਞ੍ਚਕਜ੍ਝਾਨਪਠਮਜ੍ਝਾਨਵਿਪਸ੍ਸਨਾਸੁ ਏਕਸ੍ਮਿਂ ਸਨ੍ਧੀਯਤਿ. ਕੇਨ? ਕਮ੍ਮਟ੍ਠਾਨਮਨਸਿਕਾਰੇਨੇਵ, ਤਸ੍ਮਾ ਉਗ੍ਗਹੋਵ ਸਨ੍ਧਿ ਉਗ੍ਗਹਸਨ੍ਧੀਤਿ ਵੇਦਿਤਬ੍ਬਂ.

ਉਟ੍ਠਾਨਕਂ ਉਪ੍ਪਜ੍ਜਨਕਂ. ਸਾਤਿਰੇਕਾਨਿ ਛ ਅਮ੍ਬਣਾਨਿ ਕੁਮ੍ਭਂ. ਤਤੋਤਿ ਮੁਖਧੋਵਨਖਾਦਨਭੋਜਨਕਿਚ੍ਚਤੋ. ਨਿਵਤ੍ਤਤੀਤਿ ਅਰਹਤ੍ਤਾਧਿਗਮੇਨ ਅਚ੍ਚਨ੍ਤਨਿਵਤ੍ਤਿਵਸੇਨ ਨਿਵਤ੍ਤਤਿ.

ਕਮ੍ਮਮੇਵਾਤਿ ਮਨਸਿਕਾਰਕਮ੍ਮਮੇਵ. ਆਰਮ੍ਮਣਨ੍ਤਿ ਪੁਬ੍ਬਭਾਗਭਾਵਨਾਰਮ੍ਮਣਂ.

ਤਥਾਤਿ ਵਨਮਕ੍ਕਟੋ ਵਿਯ.

ਏਕਨ੍ਤਿ ਏਕਂ ਕੋਟ੍ਠਾਸਂ.

ਸਤ੍ਤਗਹਣਰਹਿਤੇਤਿ ਸਤ੍ਤਪਞ੍ਞਤ੍ਤਿਮ੍ਪਿ ਅਨਾਮਸਿਤ੍ਵਾ ਦੇਸਿਤਤ੍ਤਾ ਵੁਤ੍ਤਂ. ਸਸਨ੍ਤਾਨਤਾਯ ਅਹਂਕਾਰਵਤ੍ਥੁਮ੍ਹਿ ਅਪ੍ਪਹੀਨਮਾਨਸ੍ਸ ਪਹੀਨਾਕਾਰਂ ਸਨ੍ਧਾਯਾਹ ‘‘ਵਿਦ੍ਧਸ੍ਤਾਹਂਕਾਰੇ’’ਤਿ. ਤਤ੍ਥਾਤਿ ਪਰਸ੍ਸ ਕਾਯੇ.

੩੫੭. ਆਦਿਮ੍ਹਿ ਸੇਵਨਾ ਮਨਸਿਕਾਰਸ੍ਸ ਉਪ੍ਪਾਦਨਾ ਆਰਮ੍ਭੋ.

੩੬੨. ਗਮਿਤਾਤਿ ਵਿਗਮਿਤਾ.

ਕਾਯਾਨੁਪਸ੍ਸਨਾਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਵੇਦਨਾਨੁਪਸ੍ਸਨਾਨਿਦ੍ਦੇਸਵਣ੍ਣਨਾ

੩੬੩. ਸਮ੍ਪਜਾਨਸ੍ਸਾਤਿ ਸਮ੍ਮਾ ਪਕਾਰੇਹਿ ਜਾਨਨ੍ਤਸ੍ਸ, ਵਤ੍ਥਾਰਮ੍ਮਣੇਹਿ ਸਦ੍ਧਿਂ ਸੁਖਸਾਮਿਸਾਦਿਪ੍ਪਕਾਰੇਹਿ ਅਵਿਪਰੀਤਂ ਵੇਦਨਂ ਜਾਨਨ੍ਤਸ੍ਸਾਤਿ ਅਤ੍ਥੋ. ਪੁਬ੍ਬਭਾਗਭਾਵਨਾ ਵੋਹਾਰਾਨੁਸਾਰੇਨੇਵ ਪਵਤ੍ਤਤੀਤਿ ਆਹ ‘‘ਵੋਹਾਰਮਤ੍ਤੇਨਾ’’ਤਿ. ਵੇਦਯਾਮੀਤਿ ‘‘ਅਹਂ ਵੇਦਯਾਮੀ’’ਤਿ ਅਤ੍ਤੁਪਨਾਯਿਕਾ ਵੁਤ੍ਤਾਤਿ, ਪਰਿਞ੍ਞਾਤਵੇਦਨੋਪਿ ਵਾ ਉਪ੍ਪਨ੍ਨਾਯ ਸੁਖਵੇਦਨਾਯ ਲੋਕਵੋਹਾਰੇਨ ‘‘ਸੁਖਂ ਵੇਦਨਂ ਵੇਦਯਾਮੀ’’ਤਿ ਜਾਨਾਤਿ, ਵੋਹਰਤਿ ਚ, ਪਗੇਵ ਇਤਰੋ. ਤੇਨਾਹ ‘‘ਵੋਹਾਰਮਤ੍ਤੇਨ ਵੁਤ੍ਤ’’ਨ੍ਤਿ.

ਉਭਯਨ੍ਤਿ ਵੀਰਿਯਸਮਾਧਿਂ. ਸਹ ਯੋਜੇਤ੍ਵਾਤਿ ਸਮਧੁਰਕਿਚ੍ਚਤੋ ਅਨੂਨਾਧਿਕਂ ਕਤ੍ਵਾ. ਅਤ੍ਥਧਮ੍ਮਾਦੀਸੁ ਸਮ੍ਮੋਹਵਿਦ੍ਧਂਸਨਵਸੇਨ ਪਵਤ੍ਤਾ ਮਗ੍ਗਪਞ੍ਞਾ ਏਵ ਲੋਕੁਤ੍ਤਰਪਟਿਸਮ੍ਭਿਦਾ.

ਵਣ੍ਣਮੁਖਾਦੀਸੁ ਤੀਸੁਪਿ ਮੁਖੇਸੁ. ਪਰਿਗ੍ਗਹਸ੍ਸਾਤਿ ਅਰੂਪਪਰਿਗ੍ਗਹਸ੍ਸ. ‘‘ਵਤ੍ਥੁ ਨਾਮ ਕਰਜਕਾਯੋ’’ਤਿ ਵਚਨੇਨ ਨਿਵਤ੍ਤਿਤਂ ਦਸ੍ਸੇਨ੍ਤੋ ‘‘ਨ ਚਕ੍ਖਾਦੀਨਿ ਛ ਵਤ੍ਥੂਨੀ’’ਤਿ ਆਹ. ਅਞ੍ਞਮਞ੍ਞੁਪਤ੍ਥਮ੍ਭੇਨ ਠਿਤੇਸੁ ਦ੍ਵੀਸੁ ਨਲ਼ਕਲਾਪੇਸੁ ਏਕਸ੍ਸ ਇਤਰਪਟਿਬਦ੍ਧਟ੍ਠਿਤਿਤਾ ਵਿਯ ਨਾਮਕਾਯਸ੍ਸ ਰੂਪਕਾਯਪਟਿਬਦ੍ਧਵੁਤ੍ਤਿਤਾਦਸ੍ਸਨਞ੍ਹੇਤਂ ਨਿਸ੍ਸਯਪਚ੍ਚਯਵਿਸੇਸਦਸ੍ਸਨਨ੍ਤਿ.

ਤੇਸਨ੍ਤਿ ਯੇਸਂ ਫਸ੍ਸਵਿਞ੍ਞਾਣਾਨਿ ਪਾਕਟਾਨਿ, ਤੇਸਂ. ਅਞ੍ਞੇਸਨ੍ਤਿ ਤਤੋ ਅਞ੍ਞੇਸਂ, ਯੇਸਂ ਫਸ੍ਸਵਿਞ੍ਞਾਣਾਨਿ ਨ ਪਾਕਟਾਨਿ. ਸੁਖਦੁਕ੍ਖਵੇਦਨਾਨਂ ਸੁਵਿਭੂਤਵੁਤ੍ਤਿਤਾਯ ਵੁਤ੍ਤਂ ‘‘ਸਬ੍ਬੇਸਂ ਵਿਨੇਯ੍ਯਾਨਂ ਵੇਦਨਾ ਪਾਕਟਾ’’ਤਿ. ਵਿਲਾਪੇਤ੍ਵਾ ਵਿਲਾਪੇਤ੍ਵਾਤਿ ਸੁਵਿਸੁਦ੍ਧਂ ਨਵਨੀਤਂ ਵਿਲਾਪੇਤ੍ਵਾ ਸੀਤਿਭੂਤਂ ਅਤਿਸੀਤਲੇ ਉਦਕੇ ਪਕ੍ਖਿਪਿਤ੍ਵਾ ਪਤ੍ਥਿਨ੍ਨਂ ਠਿਤਂ ਮਤ੍ਥੇਤ੍ਵਾ ਪਰਿਪਿਣ੍ਡੇਤ੍ਵਾ ਪੁਨ ਵਿਲਾਪੇਤ੍ਵਾਤਿ ਸਤਵਾਰਂ ਏਵਂ ਕਤ੍ਵਾ.

ਤਤ੍ਥਾਪੀਤਿ ਯਤ੍ਥ ਅਰੂਪਕਮ੍ਮਟ੍ਠਾਨਂ ਏਵ…ਪੇ… ਦਸ੍ਸਿਤਂ, ਤਤ੍ਥਾਪਿ. ਯੇਸੁ ਸੁਤ੍ਤੇਸੁ ਤਦਨ੍ਤੋਗਧਂ ਰੂਪਕਮ੍ਮਟ੍ਠਾਨਨ੍ਤਿ ਯੋਜਨਾ.

ਵੇਦਨਾਨੁਪਸ੍ਸਨਾਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਚਿਤ੍ਤਾਨੁਪਸ੍ਸਨਾਨਿਦ੍ਦੇਸਵਣ੍ਣਨਾ

੩੬੫. ਕਿਲੇਸਸਮ੍ਪਯੁਤ੍ਤਾਨਂ ਨ ਵਿਸੁਦ੍ਧਤਾ ਹੋਤੀਤਿ ਸਮ੍ਬਨ੍ਧੋ. ਇਤਰੇਹਿਪੀਤਿ ਅਤ੍ਤਨਾ ਸਮ੍ਪਯੁਤ੍ਤਕਿਲੇਸਤੋ ਇਤਰੇਹਿਪਿ ਅਸਮ੍ਪਯੁਤ੍ਤੇਹਿ. ਵਿਸੁਂ ਵਚਨਨ੍ਤਿ ਅਞ੍ਞਾਕੁਸਲਤੋ ਵਿਸੁਂ ਕਤ੍ਵਾ ਵਚਨਂ. ਵਿਸਿਟ੍ਠਗ੍ਗਹਣਨ੍ਤਿ ਵਿਸਿਟ੍ਠਤਾਗਹਣਂ, ਆਵੇਣਿਕਸਮੋਹਤਾਦਸ੍ਸਨਨ੍ਤਿ ਅਤ੍ਥੋ, ਯਤੋ ਤਦੁਭਯਂ ਮੋਮੂਹਚਿਤ੍ਤਨ੍ਤਿ ਵੁਚ੍ਚਤਿ.

ਚਿਤ੍ਤਾਨੁਪਸ੍ਸਨਾਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.

ਧਮ੍ਮਾਨੁਪਸ੍ਸਨਾਨਿਦ੍ਦੇਸੋ

ਕ. ਨੀਵਰਣਪਬ੍ਬਵਣ੍ਣਨਾ

੩੬੭. ਏਕਸ੍ਮਿਂ ਯੁਗੇ ਬਦ੍ਧਗੋਣਾਨਂ ਵਿਯ ਏਕਤੋ ਪਵਤ੍ਤਿ ਯੁਗਨਦ੍ਧਤਾ.

ਗਹਣਾਕਾਰੇਨਾਤਿ ਅਸੁਭੇਪਿ ਆਰਮ੍ਮਣੇ ‘‘ਸੁਭ’’ਨ੍ਤਿ ਗਹਣਾਕਾਰੇਨ. ਨਿਮਿਤ੍ਤਨ੍ਤਿ ਚਾਤਿ ਸੁਭਨਿਮਿਤ੍ਤਨ੍ਤਿ ਚ ਵੁਚ੍ਚਤੀਤਿ ਯੋਜਨਾ. ਏਕਂਸੇਨ ਸਤ੍ਤਾ ਅਤ੍ਤਨੋ ਅਤ੍ਤਨੋ ਹਿਤਸੁਖਮੇਵ ਆਸੀਸਨ੍ਤੀਤਿ ਕਤ੍ਵਾ ਵੁਤ੍ਤਂ ‘‘ਆਕਙ੍ਖਿਤਸ੍ਸ ਹਿਤਸੁਖਸ੍ਸਾ’’ਤਿ. ਅਨੁਪਾਯੋ ਏਵ ਚ ਹਿਤਵਿਸਿਟ੍ਠਸ੍ਸ ਸੁਖਸ੍ਸ ਅਯੋਨਿਸੋਮਨਸਿਕਾਰੋ, ਆਕਙ੍ਖਿਤਸ੍ਸ ਵਾ ਯਥਾਧਿਪ੍ਪੇਤਸ੍ਸ ਹਿਤਸੁਖਸ੍ਸ ਅਨੁਪਾਯਭੂਤੋ. ਅਵਿਜ੍ਜਨ੍ਧਾ ਹਿ ਤਾਦਿਸੇਪਿ ਪਵਤ੍ਤਨ੍ਤੀਤਿ. ਨਿਪ੍ਫਾਦੇਤਬ੍ਬੇਤਿ ਅਯੋਨਿਸੋਮਨਸਿਕਾਰੇਨ ਨਿਬ੍ਬਤ੍ਤੇਤਬ੍ਬੇ ਕਾਮਚ੍ਛਨ੍ਦੇਤਿ ਅਤ੍ਥੋ.

ਤਦਨੁਕੂਲਤ੍ਤਾਤਿ ਤੇਸਂ ਅਸੁਭੇ ‘‘ਸੁਭ’’ਨ੍ਤਿ, ‘‘ਅਸੁਭ’’ਨ੍ਤਿ ਚ ਪਵਤ੍ਤਾਨਂ ਅਯੋਨਿਸੋਮਨਸਿਕਾਰਯੋਨਿਸੋਮਨਸਿਕਾਰਾਨਂ ਅਨੁਕੂਲਤ੍ਤਾ. ਰੂਪਾਦੀਸੁ ਅਨਿਚ੍ਚਾਦਿਅਭਿਨਿਵੇਸਸ੍ਸ, ਅਨਿਚ੍ਚਸਞ੍ਞਾਦੀਨਞ੍ਚ ਯਥਾਵੁਤ੍ਤਮਨਸਿਕਾਰੂਪਨਿਸ੍ਸਯਤਾ ਤਦਨੁਕੂਲਤਾ.

ਆਹਾਰੇ ਪਟਿਕ੍ਕੂਲਸਞ੍ਞਂ ਸੋ ਉਪ੍ਪਾਦੇਤੀਤਿ ਸਮ੍ਬਨ੍ਧੋ. ਤਬ੍ਬਿਪਰਿਣਾਮਸ੍ਸਾਤਿ ਭੋਜਨਪਰਿਣਾਮਸ੍ਸ ਨਿਸ੍ਸਨ੍ਦਾਦਿਕਸ੍ਸ. ਤਦਾਧਾਰਸ੍ਸਾਤਿ ਉਦਰਸ੍ਸ, ਕਾਯਸ੍ਸੇਵ ਵਾ. ਸੋਤਿ ਭੋਜਨੇਮਤ੍ਤਞ੍ਞੂ. ਸੁਤ੍ਤਨ੍ਤਪਰਿਯਾਯੇਨ ਕਾਮਰਾਗੋ ‘‘ਕਾਮਚ੍ਛਨ੍ਦਨੀਵਰਣ’’ਨ੍ਤਿ ਵੁਚ੍ਚਤੀਤਿ ਆਹ ‘‘ਅਭਿਧਮ੍ਮਪਰਿਯਾਯੇਨਾ’’ਤਿ. ਅਭਿਧਮ੍ਮੇ ਹਿ ‘‘ਨੀਵਰਣਂ ਧਮ੍ਮਂ ਪਟਿਚ੍ਚ ਨੀਵਰਣੋ ਧਮ੍ਮੋ ਉਪ੍ਪਜ੍ਜਤਿ ਨਪੁਰੇਜਾਤਪਚ੍ਚਯਾ’’ਤਿ (ਪਟ੍ਠਾ. ੩.੮.੮) ਏਤਸ੍ਸ ਵਿਭਙ੍ਗੇ ‘‘ਅਰੂਪੇ ਕਾਮਚ੍ਛਨ੍ਦਨੀਵਰਣਂ ਪਟਿਚ੍ਚ ਥਿਨਮਿਦ੍ਧਨੀਵਰਣਂ ਉਦ੍ਧਚ੍ਚਨੀਵਰਣਂ ਅਵਿਜ੍ਜਾਨੀਵਰਣਂ ਉਪ੍ਪਜ੍ਜਤੀ’’ਤਿਆਦਿਵਚਨਤੋ ਭਵਰਾਗੋਪਿ ਕਾਮਚ੍ਛਨ੍ਦਨੀਵਰਣਂ ਵੁਤ੍ਤਨ੍ਤਿ ਵਿਞ੍ਞਾਯਤਿ. ਤੇਨਾਹ ‘‘ਸਬ੍ਬੋਪਿ ਲੋਭੋ ਕਾਮਚ੍ਛਨ੍ਦਨੀਵਰਣ’’ਨ੍ਤਿ.

ਸੀਮਾਭੇਦੇ ਕਤੇਤਿ ਅਤ੍ਤਾਦਿਮਰਿਯਾਦਾਯ ਭਿਨ੍ਨਾਯ, ਅਤ੍ਤਾਦੀਸੁ ਸਬ੍ਬਤ੍ਥ ਏਕਰੂਪਾਯ ਮੇਤ੍ਤਾਭਾਵਨਾਯਾਤਿ ਅਤ੍ਥੋ. ਵਿਹਾਰਾਦਿਉਦ੍ਦੇਸਰਹਿਤਨ੍ਤਿ ਵਿਹਾਰਾਦਿਪਦੇਸਪਰਿਚ੍ਛੇਦਰਹਿਤਂ. ਉਗ੍ਗਹਿਤਾਯ ਮੇਤ੍ਤਾਯ. ਅਟ੍ਠਵੀਸਤਿਵਿਧਾਤਿ ਇਤ੍ਥਿਆਦਿਵਸੇਨ ਸਤ੍ਤਵਿਧਾ ਪਚ੍ਚੇਕਂ ਅਵੇਰਾਦੀਹਿ ਯੋਜਨਾਵਸੇਨ ਅਟ੍ਠਵੀਸਤਿਵਿਧਾ. ਸਤ੍ਤਾਦਿਇਤ੍ਥਿਆਦਿਅਵੇਰਾਦਿਯੋਗੇਨਾਤਿ ਏਤ੍ਥ ਸਤ੍ਤਾਦਿਅਵੇਰਾਦਿਯੋਗੇਨ ਵੀਸਤਿ, ਇਤ੍ਥਿਆਦਿਅਵੇਰਾਦਿਯੋਗੇਨ ਅਟ੍ਠਵੀਸਤੀਤਿ ਅਟ੍ਠਚਤ੍ਤਾਰੀਸਂ ਏਕਿਸ੍ਸਾ ਦਿਸਾਯ. ਤਥਾ ਸੇਸਦਿਸਾਸੁਪੀਤਿ ਸਬ੍ਬਾ ਸਙ੍ਗਹੇਤ੍ਵਾ ਆਹ ‘‘ਅਸੀਤਾਧਿਕਚਤੁਸਤਪ੍ਪਭੇਦਾ’’ਤਿ.

ਕਤਾਕਤਾਨੁਸੋਚਨਞ੍ਚ ਨ ਹੋਤੀਤਿ ਯੋਜਨਾ. ‘‘ਬਹੁਕਂ ਸੁਤਂ ਹੋਤਿ ਸੁਤ੍ਤਂ ਗੇਯ੍ਯ’’ਨ੍ਤਿਆਦਿਵਚਨਤੋ (ਅ. ਨਿ. ੪.੬) ਬਹੁਸ੍ਸੁਤਤਾ ਨਵਙ੍ਗਸ੍ਸ ਸਾਸਨਸ੍ਸ ਵਸੇਨ ਵੇਦਿਤਬ੍ਬਾ, ਨ ਵਿਨਯਮਤ੍ਤਸ੍ਸੇਵਾਤਿ ਵੁਡ੍ਢਤਂ ਪਨ ਅਨਪੇਕ੍ਖਿਤ੍ਵਾ ਇਚ੍ਚੇਵ ਵੁਤ੍ਤਂ, ਨ ਬਹੁਸ੍ਸੁਤਤਞ੍ਚਾਤਿ.

ਤਿਟ੍ਠਤਿ ਅਨੁਪ੍ਪਨ੍ਨਾ ਵਿਚਿਕਿਚ੍ਛਾ ਏਤ੍ਥ ਏਤੇਸੁ ‘‘ਅਹੋਸਿਂ ਨੁ ਖੋ ਅਹਮਤੀਤਮਦ੍ਧਾਨ’’ਨ੍ਤਿਆਦਿਕਾਯ (ਮ. ਨਿ. ੧.੧੮; ਸ. ਨਿ. ੨.੨੦) ਪਵਤ੍ਤਿਯਾ ਅਨੇਕਭੇਦੇਸੁ ਪੁਰਿਮੁਪ੍ਪਨ੍ਨੇਸੁ ਵਿਚਿਕਿਚ੍ਛਾਧਮ੍ਮੇਸੂਤਿ ਤੇ ਠਾਨੀਯਾ ਵੁਤ੍ਤਾ.

ਅਟ੍ਠਵਤ੍ਥੁਕਾਪੀਤਿ ਨ ਕੇਵਲਂ ਸੋਲ਼ਸਵਤ੍ਥੁਕਾ, ਨਾਪਿ ਰਤਨਤ੍ਤਯਵਤ੍ਥੁਕਾ ਚ, ਅਥ ਖੋ ਅਟ੍ਠਵਤ੍ਥੁਕਾਪਿ. ਰਤਨਤ੍ਤਯੇ ਸਂਸਯਾਪਨ੍ਨਸ੍ਸ ਸਿਕ੍ਖਾਦੀਸੁ ਕਙ੍ਖਾਸਮ੍ਭਵਤੋ, ਤਤ੍ਥ ਨਿਬ੍ਬੇਮਤਿਕਸ੍ਸ ਤਦਭਾਵਤੋ ਚ ਸੇਸਵਿਚਿਕਿਚ੍ਛਾਨਂ ਰਤਨਤ੍ਤਯਵਿਚਿਕਿਚ੍ਛਾਮੂਲਿਕਤਾ ਦਟ੍ਠਬ੍ਬਾ. ਅਨੁਪਵਿਸਨਂ ‘‘ਏਵਮੇਤ’’ਨ੍ਤਿ ਸਦ੍ਦਹਨਵਸੇਨ ਆਰਮ੍ਮਣਸ੍ਸ ਪਕ੍ਖਨ੍ਦਨਂ.

ਨੀਵਰਣਪਬ੍ਬਵਣ੍ਣਨਾ ਨਿਟ੍ਠਿਤਾ.

ਖ. ਬੋਜ੍ਝਙ੍ਗਪਬ੍ਬਵਣ੍ਣਨਾ

ਤੇਨਾਤਿ ਅਤ੍ਥਸਨ੍ਨਿਸ੍ਸਿਤਗ੍ਗਹਣੇਨ.

ਪਚ੍ਚਯਵਸੇਨ ਦੁਬ੍ਬਲਭਾਵੋ ਮਨ੍ਦਤਾ.

ਪਬ੍ਬਤਪਦੇਸਵਨਗਹਨਨ੍ਤਰਿਤੋਪਿ ਗਾਮੋ ਨ ਦੂਰੇ, ਪਬ੍ਬਤਂ ਪਰਿਕ੍ਖਿਪਿਤ੍ਵਾ ਗਨ੍ਤਬ੍ਬਤਾਯ ਆਵਾਸੋ ਅਰਞ੍ਞਲਕ੍ਖਣੂਪੇਤੋ, ਤਸ੍ਮਾ ਮਂਸਸੋਤੇਨੇਵ ਅਸ੍ਸੋਸੀਤਿ ਵਦਨ੍ਤਿ.

ਸਮ੍ਪਤ੍ਤਿਹੇਤੁਤਾਯ ਪਸਾਦੋ ਸਿਨੇਹਪਰਿਯਾਯੇਨ ਵੁਤ੍ਤੋ.

ਇਨ੍ਦ੍ਰਿਯਾਨਂ ਤਿਕ੍ਖਭਾਵਾਪਾਦਨਂ ਤੇਜਨਂ. ਤੋਸਨਂ ਪਮੋਦਨਂ.

ਬੋਜ੍ਝਙ੍ਗਪਬ੍ਬਵਣ੍ਣਨਾ ਨਿਟ੍ਠਿਤਾ.

ਸਮਥਵਿਪਸ੍ਸਨਾਵਸੇਨ ਪਠਮਸ੍ਸ ਸਤਿਪਟ੍ਠਾਨਸ੍ਸ, ਸੁਦ੍ਧਵਿਪਸ੍ਸਨਾਵਸੇਨ ਇਤਰੇਸਂ. ਆਗਮਨਵਸੇਨ ਵੁਤ੍ਤਂ ਅਞ੍ਞਥਾ ਮਗ੍ਗਸਮ੍ਮਾਸਤਿਯਾ ਕਥਂ ਕਾਯਾਰਮ੍ਮਣਤਾ ਸਿਯਾਤਿ ਅਧਿਪ੍ਪਾਯੋ. ਕਾਯਾਨੁਪਸ੍ਸਿਆਦੀਨਂ ਚਤੁਬ੍ਬਿਧਾਨਂ ਪੁਗ੍ਗਲਾਨਂ ਵੁਤ੍ਤਾਨਂ. ਤੇਨਾਹ ‘‘ਨ ਹਿ ਸਕ੍ਕਾ ਏਕਸ੍ਸ…ਪੇ… ਵਤ੍ਤੁ’’ਨ੍ਤਿ. ਅਨੇਕਸਤਿਸਮ੍ਭਵਾਵਬੋਧਪਸਙ੍ਗਾਤਿ ਏਕਚਿਤ੍ਤੁਪ੍ਪਾਦੇਨ ਅਨੇਕਿਸ੍ਸਾ ਸਤਿਯਾ ਸਮ੍ਭਵਸ੍ਸ, ਸਤਿ ਚ ਤਸ੍ਮਿਂ ਅਨੇਕਾਵਬੋਧਸ੍ਸ ਚ ਆਪਜ੍ਜਨਤੋ. ਸਕਿਚ੍ਚਪਰਿਚ੍ਛਿਨ੍ਨੇਤਿ ਅਤ੍ਤਨੋ ਕਿਚ੍ਚਵਿਸੇਸਵਿਸਿਟ੍ਠੇ. ਧਮ੍ਮਭੇਦੇਨਾਤਿ ਆਰਮ੍ਮਣਭੇਦਵਿਸਿਟ੍ਠੇਨ ਧਮ੍ਮਵਿਸੇਸੇਨ. ਨ ਧਮ੍ਮਸ੍ਸ ਧਮ੍ਮੋ ਕਿਚ੍ਚਨ੍ਤਿ ਏਕਸ੍ਸ ਧਮ੍ਮਸ੍ਸ ਅਞ੍ਞਧਮ੍ਮੋ ਕਿਚ੍ਚਂ ਨਾਮ ਨ ਹੋਤਿ ਤਦਭਾਵਤੋ. ਧਮ੍ਮਭੇਦੇਨ ਧਮ੍ਮਸ੍ਸ ਵਿਭਾਗੇਨ. ਤਸ੍ਸ ਭੇਦੋਤਿ ਤਸ੍ਸ ਕਿਚ੍ਚਸ੍ਸ ਭੇਦੋ ਨਤ੍ਥਿ. ਤਸ੍ਮਾਤਿ ਯਸ੍ਮਾ ਨਯਿਧ ਧਮ੍ਮਸ੍ਸ ਵਿਭਾਗੇਨ ਕਿਚ੍ਚਭੇਦੋ ਇਚ੍ਛਿਤੋ, ਕਿਚ੍ਚਭੇਦੇਨ ਪਨ ਧਮ੍ਮਵਿਭਾਗੋ ਇਚ੍ਛਿਤੋ, ਤਸ੍ਮਾ. ਤੇਨ ਵੁਤ੍ਤਂ ‘‘ਏਕਾਵਾ’’ਤਿਆਦਿ.

ਸੁਤ੍ਤਨ੍ਤਭਾਜਨੀਯਵਣ੍ਣਨਾ ਨਿਟ੍ਠਿਤਾ.