੯. ਨਵਕਨਿਦ੍ਦੇਸਵਣ੍ਣਨਾ

੯੬੦-੯੬੩. ਦਸਮਸ੍ਸਾਤਿ ਅਟ੍ਠਾਨਘਾਤਸ੍ਸ.

ਅਜ੍ਝਤ੍ਤਨ੍ਤਿ ਗੋਚਰਜ੍ਝਤ੍ਤਂ ਅਧਿਪ੍ਪੇਤਂ. ਏਤਸ੍ਸ ਗਾਥਾਵਚਨਸ੍ਸ. ਨਿਟ੍ਠਪੇਤ੍ਵਾਤਿ ਅਭਿਨਿਵਿਸ੍ਸ.

੯੬੪. ਅਞ੍ਞੇਸਂ ਫਸ੍ਸਾਦੀਨਂ ਸਙ੍ਖਤਭਾਵੇ ਯਥਾਸਕਂਪਚ੍ਚਯੇਹਿ. ਯੇਨਾਕਾਰੇਨ ਮਾਨਸ੍ਸ ਸਾਤਿਸਯਾ ਪਵਤ੍ਤਿ, ਤਂ ਦਸ੍ਸੇਤੁਂ ‘‘ਅਹਨ੍ਤਿ, ਅਸ੍ਮੀਤਿ ਚਾ’’ਤਿ ਵੁਤ੍ਤਂ. ਅਤ੍ਤਨੋਤਿ ਦਿਟ੍ਠਿਗਤਪਰਿਕਪ੍ਪਿਤਸ੍ਸ ਅਤ੍ਤਨੋ. ਯਥਾ ਮਾਨਸ੍ਸ ਸਮ੍ਪਗ੍ਗਹਵਸੇਨ, ਏਵਂ ਤਣ੍ਹਾਯ ਮਮਤ੍ਤਵਸੇਨ, ਦਿਟ੍ਠਿਯਾ ਨਿਚ੍ਚਾਦਿਵਸੇਨ ਪਵਤ੍ਤਿ ਵਿਸੇਸਵਤੀ ਸਮਾਨੇਪਿ ਅਨਾਗਤਕਾਲਾਮਸਨੇਤਿ ਆਹ ‘‘ਭਵਿਸ੍ਸਨ੍ਤੀ…ਪੇ… ਵੁਤ੍ਤੋ’’ਤਿ. ‘‘ਅਹਮਸ੍ਮੀ’’ਤਿ ਪਨ ਪਵਤ੍ਤਮਾਨਸ੍ਸੇਵ ਭਵਤੀਤਿ ਸਬ੍ਬਪਦਸਾਧਾਰਣਸ੍ਸ ਮਾਨਸ੍ਸੇਵ ਵਸੇਨ ਇਞ੍ਜਿਤਾਦਿਤਾ ਅਟ੍ਠਕਥਾਯਂ ਵੁਤ੍ਤਾ.

ਨਵਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.