(੨.) ਆਯੁਪ੍ਪਮਾਣਵਣ੍ਣਨਾ

੧੦੨੪. ਤਯੋਪਿ ਜਨਾਤਿ ਤਯੋ ਜਨਸਮੂਹਾਤਿ ਅਧਿਪ੍ਪਾਯੋ.

੧੦੨੫. ਆਭਾਤਿ ਸੋਭਨਾ ਪਭਾ.

੧੦੨੬. ਕਞ੍ਚਨਪਿਣ੍ਡੋ ਵਿਯ ਸਸ੍ਸਿਰਿਕਾ ਕਞ੍ਚਨਪਿਣ੍ਡਸਸ੍ਸਿਰਿਕਾ. ਤਤ੍ਥ ਪਨ ਸੋਭਨਪਭਾਯ ਕਿਣ੍ਣਾ ਸੁਭਾਕਿਣ੍ਣਾਤਿ ਵਤ੍ਤਬ੍ਬੇ ਆ-ਕਾਰਸ੍ਸ ਰਸ੍ਸਤ੍ਤਂ ਅਨ੍ਤਿਮਣ-ਕਾਰਸ੍ਸ ਹ-ਕਾਰਞ੍ਚ ਕਤ੍ਵਾ ‘‘ਸੁਭਕਿਣ੍ਹਾ’’ਤਿ ਵੁਤ੍ਤਾ, ਅਥ ਪਨ ਸੁਭੇਨ ਕਿਣ੍ਣਾ ਸੁਭਕਿਣ੍ਣਾ. ਪੁਰਿਮਪਦੇਸੁਪਿ ਪਰਿਤ੍ਤਂ ਸੁਭਂ ਏਤੇਸਨ੍ਤਿ ਪਰਿਤ੍ਤਸੁਭਾ, ਅਪ੍ਪਮਾਣਂ ਸੁਭਂ ਏਤੇਸਨ੍ਤਿ ਅਪ੍ਪਮਾਣਸੁਭਾਤਿ ਸੁਭ-ਸਦ੍ਦੇਨ ਸਮਾਸੋ ਯੋਜੇਤਬ੍ਬੋ ਹੋਤਿ.

੧੦੨੭. ਆਰਮ੍ਮਣਮਨਸਿਕਾਰਾ ਪੁਬ੍ਬਭਾਗੇਨ ਕਥਿਤਾਤਿ ਝਾਨਕ੍ਖਣੇ ਤਤੋ ਪਚ੍ਛਾ ਵਾ ਪਰਿਤ੍ਤਾਦਿਕਸਿਣਾਰਮ੍ਮਣਭਾਵਨਾਯ ਆਵਜ੍ਜਨੇਨ ਚ ਝਾਨਸ੍ਸ ਆਰਮ੍ਮਣਮਨਸਿਕਾਰਨਾਨਤ੍ਤਤਾ ਨ ਹੋਤਿ, ਪੁਬ੍ਬਭਾਗਭਾਵਨਾਯ ਪਨ ਪੁਬ੍ਬਭਾਗਾਵਜ੍ਜਨੇਨ ਚ ਹੋਤੀਤਿ ਅਤ੍ਥੋ. ਪੁਬ੍ਬਭਾਗਭਾਵਨਾਯ ਵਸੇਨ ਹਿ ਝਾਨਂ ਪਰਿਤ੍ਤਪਥਵੀਕਸਿਣਾਦੀਸੁ ਤਂਤਦਾਰਮ੍ਮਣਂ ਹੋਤਿ, ਪੁਬ੍ਬਭਾਗੇਨ ਤਂਤਂਕਸਿਣਾਵਜ੍ਜਨੇਨ ਤਂਤਂਮਨਸਿਕਾਰਨ੍ਤਿ. ਛਨ੍ਦਾਦਯੋ ਪਨ ਅਪ੍ਪਨਾਕ੍ਖਣੇਪਿ ਵਿਜ੍ਜਨ੍ਤਿ. ਤਤ੍ਥ ਪਣਿਧੀਤਿ ਨ ਤਣ੍ਹਾਪਤ੍ਥਨਾ, ਅਥ ਖੋ ਛਨ੍ਦਪਤ੍ਥਨਾਵ ਦਟ੍ਠਬ੍ਬਾ. ਅਧਿਮੋਕ੍ਖੋ ਨਿਚ੍ਛਯੋ. ਅਭਿਨੀਹਾਰੋ ਚਿਤ੍ਤਪ੍ਪਵਤ੍ਤਿਯੇਵ. ਯਦਿ ਪਨ ਭਵਛਨ੍ਦਭਵਪਤ੍ਥਨਾਦਯੋ ਤਂਤਂਭਵਵਿਸੇਸਨਿਯਾਮਕਾ ਅਧਿਪ੍ਪੇਤਾ. ‘‘ਅਪ੍ਪਨਾਯਪਿ ਵਟ੍ਟਨ੍ਤੀ’’ਤਿ ਏਤਸ੍ਸ ਅਪ੍ਪਨਾਯ ਪਵਤ੍ਤਾਯ ਤਤੋ ਪਚ੍ਛਾਪਿ ਵਟ੍ਟਨ੍ਤੀਤਿ ਅਤ੍ਥੋ ਦਟ੍ਠਬ੍ਬੋ. ਸਞ੍ਞਾਵਿਰਾਗਾਦੀਹਿ ਪਨ ਵਿਸੇਸਿਯਮਾਨਂ ਆਰਮ੍ਮਣਂ ਤਥਾ ਤਥਾ ਤਤ੍ਥ ਪਵਤ੍ਤੋ ਮਨਸਿਕਾਰੋ ਚ ਭਵਵਿਸੇਸਨਿਯਾਮਕੋ ਪੁਬ੍ਬਭਾਗੋਵ ਵਟ੍ਟਤੀਤਿ ‘‘ਆਰਮ੍ਮਣਮਨਸਿਕਾਰਾ ਪੁਬ੍ਬਭਾਗੇਨ ਕਥਿਤਾ’’ਤਿ ਵੁਤ੍ਤਂ.

ਵਿਪੁਲਾ ਫਲਾਤਿ ਵਿਪੁਲਸਨ੍ਤਸੁਖਾਯੁਵਣ੍ਣਾਦਿਫਲਾ. ਸੁਟ੍ਠੁ ਪਸ੍ਸਨ੍ਤਿ ਪਞ੍ਞਾਚਕ੍ਖੁਨਾ ਮਂਸਦਿਬ੍ਬਚਕ੍ਖੂਹਿ ਚ.

੧੦੨੮. ‘‘ਯਾਵ ਨ ਤਂ ਪਾਪਕਮ੍ਮਂ ਬ੍ਯਨ੍ਤੀ ਹੋਤੀ’’ਤਿ (ਮ. ਨਿ. ੩.੨੫੦) ਵਚਨਤੋ ‘‘ਕਮ੍ਮਮੇਵ ਪਮਾਣ’’ਨ੍ਤਿ ਆਹ, ਅਬ੍ਬੁਦਾਦਿਆਯੁਪ੍ਪਮਾਣਪਰਿਚ੍ਛੇਦੋ ਪਨ ਕਮ੍ਮਵਸੇਨੇਵ ਕਤੋਤਿ ਅਧਿਪ੍ਪਾਯੋ.

ਨਿਲੀਯਨੋਕਾਸਸ੍ਸ ਅਭਾਵਾਤਿ ਸਮਾਨਜਾਤਿਕੇਨ ਅਚ੍ਛਰਾਗਣੇਨ ਸਬ੍ਬਦਾ ਪਰਿਵਾਰਿਯਮਾਨਸ੍ਸ ਕਾਮਗੁਣਾਕਿਣ੍ਣਸ੍ਸ ਤਬ੍ਬਿਰਹਿਤਟ੍ਠਾਨਸ੍ਸ ਅਭਾਵਾਤਿ ਅਤ੍ਥੋ.

ਕਿਂ ਨਿਯਮੇਤੀਤਿ ਕਿਂ ਝਾਨਂ ਉਪਪਤ੍ਤਿਂ ਨਿਯਮੇਤੀਤਿ ਅਤ੍ਥੋ. ਨਵ ਬ੍ਰਹ੍ਮਲੋਕੇਤਿ ਬ੍ਰਹ੍ਮਪਾਰਿਸਜ੍ਜਾਦਯੋ ਨਵਪਿ ਸੋਧੇਤ੍ਵਾ. ਮਤ੍ਥਕੇਤਿ ਵੇਹਪ੍ਫਲੇਸੂਤਿ ਅਤ੍ਥੋ. ਸੇਟ੍ਠਭਵਾ ਨਾਮਾਤਿ ਤਤੋ ਪਰਂ ਅਗਮਨਤੋ ਉਤ੍ਤਮਭਵਾਤਿ ਅਧਿਪ੍ਪਾਯੋ. ਤੇਨੇਵ ਭਵਸੀਸਾਨੀਤਿ ਗਹਿਤਾ. ਇਮੇਸੁ ਤੀਸੁ ਠਾਨੇਸੂਤਿ ਵੇਹਪ੍ਫਲਾਦਿਟ੍ਠਾਨਾਨਿ ਏਵ ਸਨ੍ਧਾਯ ਵੁਤ੍ਤਂ. ਵੇਹਪ੍ਫਲਤੋ ਪਨ ਪੁਰਿਮੇਸੁ ਨਵਸੁ ਨਿਬ੍ਬਤ੍ਤਅਨਾਗਾਮੀ ਅਰੂਪਧਾਤੁਂ ਉਪਪਜ੍ਜਤੀਤਿ ਕਤ੍ਵਾ ‘‘ਰੂਪਧਾਤੁਯਾ ਚੁਤਸ੍ਸ ਅਰੂਪਧਾਤੁਂ ਉਪਪਜ੍ਜਨ੍ਤਸ੍ਸ ਕਸ੍ਸਚਿ ਸਤ੍ਤ ਅਨੁਸਯਾ ਅਨੁਸੇਨ੍ਤਿ, ਕਸ੍ਸਚਿ ਪਞ੍ਚ, ਕਸ੍ਸਚਿ ਤਯੋ ਅਨੁਸੇਨ੍ਤੀ’’ਤਿ (ਯਮ. ੨.ਅਨੁਸਯਯਮਕ.੩੧੧) ਇਦਂ ਵੁਤ੍ਤਂ, ਨ ਵੇਹਪ੍ਫਲਾਦੀਸੁ ਉਪਪਨ੍ਨਂ ਸਨ੍ਧਾਯਾਤਿ ਅਯਮੇਤ੍ਥ ਅਧਿਪ੍ਪਾਯੋ ਸਿਯਾ. ਯਂ ਪਨ ਵੁਤ੍ਤਂ ‘‘ਨਵਸੁ ਬ੍ਰਹ੍ਮਲੋਕੇਸੁ ਨਿਬ੍ਬਤ੍ਤਅਰਿਯਸਾਵਕਾਨਂ ਤਤ੍ਰੂਪਪਤ੍ਤਿਯੇਵ ਹੋਤਿ, ਨ ਹੇਟ੍ਠੂਪਪਤ੍ਤੀ’’ਤਿ, ਏਤੇਨ ਹੇਟ੍ਠੂਪਪਤ੍ਤਿ ਏਵ ਨਿਵਾਰਿਤਾ, ਨ ਤੇਸ੍ਵੇਵ ਉਪਰੂਪਰਿ ਵੇਹਪ੍ਫਲੇ ਚ ਉਪਪਤ੍ਤਿ ਅਰੂਪਧਾਤੂਪਪਤ੍ਤਿ ਚ. ‘‘ਪਠਮਜ੍ਝਾਨਭੂਮਿਯਂ ਨਿਬ੍ਬਤ੍ਤੋ ਅਨਾਗਾਮੀ ਨਵ ਬ੍ਰਹ੍ਮਲੋਕੇ ਸੋਧੇਤ੍ਵਾ ਮਤ੍ਥਕੇ ਠਿਤੋ ਪਰਿਨਿਬ੍ਬਾਤੀ’’ਤਿ ਇਦਮ੍ਪਿ ਅਨੁਪੁਬ੍ਬੇਨ ਆਰੋਹਨ੍ਤਂ ਸਨ੍ਧਾਯ ਵੁਤ੍ਤਨ੍ਤਿ ਨ ਤੇਨ ਤਸ੍ਸ ਮਤ੍ਥਕਂ ਅਪ੍ਪਤ੍ਤਸ੍ਸ ਅਰੂਪਧਾਤੁਂ ਉਪਪਤ੍ਤਿ ਨਿਵਾਰਿਤਾਤਿ ਦਟ੍ਠਬ੍ਬਾ.

ਯੋ ਵਾ ਅਞ੍ਞਤ੍ਥ ਤਤ੍ਥ ਵਾ ਮਗ੍ਗਂ ਭਾਵੇਤ੍ਵਾ ਚਵਿਤ੍ਵਾ ਤਤ੍ਥ ਉਪਪਨ੍ਨੋ ਅਵਿਕ੍ਖਮ੍ਭਿਤਰੂਪਰਾਗੋ ਅਰਿਯਸਾਵਕੋ, ਤਂ ਸਨ੍ਧਾਯ ਅਯਂ ਅਟ੍ਠਕਥਾ ਵੁਤ੍ਤਾ. ਤੇਨੇਵ ‘‘ਨਵਸੁ ਬ੍ਰਹ੍ਮਲੋਕੇਸੁ ਨਿਬ੍ਬਤ੍ਤਅਰਿਯਸਾਵਕਾਨ’’ਨ੍ਤਿ, ‘‘ਪਠਮਜ੍ਝਾਨਭੂਮਿਯਂ ਨਿਬ੍ਬਤ੍ਤੋ ਅਨਾਗਾਮੀ’’ਤਿ, ‘‘ਇਮੇਸੁ ਤੀਸੁ ਠਾਨੇਸੁ ਨਿਬ੍ਬਤ੍ਤਅਨਾਗਾਮਿਨੋ’’ਤਿ ਚ ਸਬ੍ਬਤ੍ਥ ਨਿਬ੍ਬਤ੍ਤਗ੍ਗਹਣਂ ਕਤਂ. ਤਸ੍ਸ ਪਨ ਯੇਨ ਤਤ੍ਥ ਉਪਪਨ੍ਨੋ, ਤਸ੍ਮਿਂ ਰੂਪਰਾਗੇ ਵਿਕ੍ਖਮ੍ਭਿਤੇ ਪੁਨ ਭਵਾਭਿਲਾਸੋ ਨ ਭਵਿਸ੍ਸਤੀਤਿ ਅਰੂਪਰਾਗੁਪਚ੍ਛੇਦੋ ਚ ਭਵਿਸ੍ਸਤਿਯੇਵ. ਯੋ ਪਨ ਪੁਥੁਜ੍ਜਨੋ ਤਤ੍ਥ ਨਿਬ੍ਬਤ੍ਤੋ ਅਰਿਯਮਗ੍ਗਂ ਭਾਵੇਤ੍ਵਾ ਅਰੂਪੇਹਿ ਵਿਕ੍ਖਮ੍ਭਿਤਰੂਪਰਾਗੋ ਉਪ੍ਪਨ੍ਨੇ ਮਗ੍ਗੇ ਨਿਬ੍ਬਤ੍ਤਭਵਾਦੀਨਵਦਸ੍ਸਨਵਸੇਨ ਅਨਿਵਤ੍ਤਿਤਭਵਾਭਿਲਾਸੋ, ਤਸ੍ਸ ਵਸੇਨ ਯਮਕਪਾਲ਼ਿ ਪਵਤ੍ਤਾਤਿ ਵਾ ਅਯਮਤ੍ਥੋ ਅਧਿਪ੍ਪੇਤੋ ਸਿਯਾ.

ਆਯੁਪ੍ਪਮਾਣਵਣ੍ਣਨਾ ਨਿਟ੍ਠਿਤਾ.