੧੭. ਖੁਦ੍ਦਕਵਤ੍ਥੁਵਿਭਙ੍ਗੋ
੧. ਏਕਕਮਾਤਿਕਾਦਿਵਣ੍ਣਨਾ
੮੩੨. ‘‘ਤੇਤ੍ਤਿਂਸਤਿ ਤਿਕਾ’’ਤਿ ਵੁਤ੍ਤਂ, ਤੇ ਪਨ ਪਞ੍ਚਤਿਂਸ. ਤਥਾ ‘‘ਪੁਰਿਸਮਲਾਦਯੋ ਅਟ੍ਠ ਨਵਕਾ’’ਤਿ ਵੁਤ੍ਤਂ, ਤੇ ਪਨ ਆਘਾਤਵਤ੍ਥੁਆਦਯੋ ਨਵ. ਯੇ ‘‘ਦ੍ਵੇ ਅਟ੍ਠਾਰਸਕਾ’’ਤਿਆਦਿਮ੍ਹਿ ਵੁਤ੍ਤਾ, ਤੇ ਏਵ ‘‘ਇਤਿ ਅਤੀਤਾਨਿ ਛਤ੍ਤਿਂਸਾ’’ਤਿਆਦਿਨਾ ਤਯੋ ਛਤ੍ਤਿਂਸਕਾ ਕਤਾਤਿ ਆਹ ‘‘ਛ ਅਟ੍ਠਾਰਸਕਾ’’ਤਿ, ਦ੍ਵਾਸਟ੍ਠਿ ਪਨ ਦਿਟ੍ਠਿਗਤਾਨਿ ਅਞ੍ਞਤ੍ਥ ਵੁਤ੍ਤਭਾਵੇਨੇਵ ਇਧ ਨਿਕ੍ਖਿਤ੍ਤਾਨੀਤਿ ਨ ਗਹਿਤਾਨੀਤਿ ਦਟ੍ਠਬ੍ਬਾਨਿ.
ਏਕਕਮਾਤਿਕਾਦਿਵਣ੍ਣਨਾ ਨਿਟ੍ਠਿਤਾ.
(੧.) ਏਕਕਨਿਦ੍ਦੇਸਵਣ੍ਣਨਾ
੮੪੩-੮੪੪. ਅਤ੍ਥਿ ਪਟਿਚ੍ਚਂ ਨਾਮਾਤਿ ਯਥਾ ‘‘ਚਕ੍ਖੁਞ੍ਚ ਪਟਿਚ੍ਚਾ’’ਤਿਆਦੀਸੁ ਨਿਸ੍ਸਯਾਦਿਪਚ੍ਚਯਭਾਵੇਨ ਪਟਿਚ੍ਚਾਤਿ ਵੁਤ੍ਤਂ, ਨ ਤਥਾ ਇਧ ਖਤ੍ਤਿਯਾਦਿਜਾਤੀਨਂ ਪਰਮਤ੍ਥਤੋ ਅਵਿਜ੍ਜਮਾਨਾਨਂ ਨਿਸ੍ਸਯਾਦਿਪਚ੍ਚਯਤ੍ਤਸ੍ਸ ਅਭਾਵਾ. ਯੇਸੁ ਪਨ ਖਨ੍ਧੇਸੁ ਸਨ੍ਤੇਸੁ ਖਤ੍ਤਿਯਾਦਿਸਮ੍ਮੁਤਿ ਹੋਤਿ, ਤੇਸਂ ਅਬ੍ਬੋਚ੍ਛਿਨ੍ਨਤਾਵ ਖਤ੍ਤਿਯਾਦਿਜਾਤਿਯਾ ਅਤ੍ਥਿਤਾ, ਸਾ ਇਧ ਪਟਿਚ੍ਚ-ਸਦ੍ਦੇਨ ਵਿਭਾਵਿਤਾਤਿ ਅਤ੍ਥੋ. ਏਕਿਸ੍ਸਾ ਸੇਣਿਯਾਤਿ ਅਸਮ੍ਭਿਨ੍ਨਾਯਾਤਿ ਅਤ੍ਥੋ.
ਪਞ੍ਹਵਿਸ੍ਸਜ੍ਜਨਾਦਿਕਿਰਿਯਾਸੁ ਪੁਰਤੋ ਕਰਣਂ ਪੁਰੇਕ੍ਖਾਰੋ. ਨਿਕ੍ਖੇਪਰਾਸੀਤਿ ਨਿਧਾਨਰਾਸਿ. ਪਤ੍ਥਟਾਕਿਤ੍ਤਿਨੋਤਿ ਵਿਤ੍ਥਿਣ੍ਣਾਕਿਤ੍ਤਿਨੋ. ਰਤ੍ਤਞ੍ਞੁਮਦੋਤਿ ਪੁਰਾਣਞ੍ਞੁਤਾਮਦੋਤਿ ਵਦਨ੍ਤਿ. ਚਿਰਰਤ੍ਤਿਜਾਤੇਨ, ਚਿਰਰਤ੍ਤਿਪਬ੍ਬਜਿਤੇਨ ਵਾ ਜਾਨਿਤਬ੍ਬਸ੍ਸ, ਰਤ੍ਤੀਨਮੇਵ ਵਾ ਜਾਨਨਮਦੋ. ਉਪਟ੍ਠਾਪਕਮਾਨੋਤਿ ਆਣਾਕਰਣਮਾਨੋ. ਆਣਾਕਰਣਞ੍ਹਿ ਵਿਚਾਰਣਂ ਇਧ ‘‘ਯਸੋ’’ਤਿ ਵੁਤ੍ਤਨ੍ਤਿ. ਪਰਿਮਣ੍ਡਲਤ੍ਤਭਾਵਨਿਸ੍ਸਿਤੋ ਮਾਨੋ ਪਰਿਣਾਹਮਦੋ. ਸਰੀਰਸਮ੍ਪਤ੍ਤਿਪਾਰਿਪੂਰਿਯਾ ਮਦੋ ਪਾਰਿਪੂਰਿਮਦੋ.
੮੪੫. ਵਤ੍ਥੁਨਾ ਵਿਨਾਪਿ ਵਤ੍ਤਬ੍ਬਤਾਯ ਅਵਤ੍ਥੁਕਂ, ਨ ਵਤ੍ਥੁਨੋ ਅਭਾਵਾ.
੮੪੬. ਚਿਤ੍ਤਸ੍ਸ ਵੋਸ੍ਸਜ੍ਜਨਨ੍ਤਿ ਚਿਤ੍ਤਸ੍ਸ ਸਤਿਤੋ ਮੁਚ੍ਚਨਂ, ਕਾਯਦੁਚ੍ਚਰਿਤਾਦੀਸੁ ਪਕ੍ਖਨ੍ਦਨਂ ਵਾ ਵੋਸ੍ਸਗ੍ਗੋ. ਪਤਿਟ੍ਠਾਭਾਵੋਤਿ ਕੁਸਲਕਰਣੇ ਅਟ੍ਠਾਨਂ, ਅਨੁਟ੍ਠਾਨਨ੍ਤਿ ਅਤ੍ਥੋ. ਪਮਾਦਸਙ੍ਖਾਤਸ੍ਸ ਅਤ੍ਥਸ੍ਸ ਕਾਯਦੁਚ੍ਚਰਿਤੇ ਚਿਤ੍ਤਸ੍ਸ ਵੋਸ੍ਸਗ੍ਗੋ ਪਾਣਾਤਿਪਾਤੇ ਮਿਚ੍ਛਾਦਿਟ੍ਠਿਯਂ ਕੋਧੇ ਉਪਨਾਹੇਤਿ ਏਵਮਾਦਿਕੋ ਪਰਿਯਾਯੋ ਅਪਰਿਯਨ੍ਤੋ, ਤਦਤ੍ਥਤਪ੍ਪਰਿਯਾਯਪ੍ਪਕਾਸਕੋ ਵੋਸ੍ਸਗ੍ਗਨਿਸ੍ਸਗ੍ਗਾਦਿਕੋ ਬ੍ਯਞ੍ਜਨਪਰਿਯਾਯੋ ਚਾਤਿ ਸਬ੍ਬਂ ਤਂ ਸਙ੍ਖਿਪਿਤ੍ਵਾ ਏਵਰੂਪੋਤਿ ਇਦਂ ਆਕਾਰਨਿਦਸ੍ਸਨਂ ਸਬ੍ਬਪਰਿਯਾਯਸ੍ਸ ਵਤ੍ਤੁਂ ਅਸਕ੍ਕੁਣੇਯ੍ਯਤ੍ਤਾ ਕਤਨ੍ਤਿ ਦਸ੍ਸੇਨ੍ਤੋ ਆਹ ‘‘ਪਰਿਯਨ੍ਤਾਭਾਵਤੋ’’ਤਿ. ਵਿਸ੍ਸਟ੍ਠਾਕਾਰੋਤਿ ਸਤਿਯਾ ਪਚ੍ਚਨੀਕਭੂਤੇ ਚਤ੍ਤਾਰੋ ਖਨ੍ਧੇ ਦਸ੍ਸੇਤਿ.
੮੪੭. ਚਿਤ੍ਤਸ੍ਸ ਥਦ੍ਧਤਾ ਤਥਾਪਵਤ੍ਤਚਿਤ੍ਤਮੇਵਾਤਿ ਵਦਨ੍ਤਿ, ਮਾਨਵਿਸੇਸੋ ਵਾ ਦਟ੍ਠਬ੍ਬੋ. ਉਪਸਙ੍ਕਮਨੇ ਵਨ੍ਦਿਤਬ੍ਬਂ ਹੋਤੀਤਿ ਪਰਿਯਨ੍ਤੇਨੇਵ ਚਰਤਿ.
੮੪੮. ‘‘ਆਪਤ੍ਤਿਂ ਆਪਨ੍ਨੋਸੀ’’ਤਿ ਵੁਤ੍ਤੇ ‘‘ਆਵੁਸੋ, ਤ੍ਵਂ ਆਪਨ੍ਨੋਸੀ’’ਤਿਆਦਿਨਾ ਤੇਨ ਵੁਤ੍ਤਂ ਤਸ੍ਸੇਵ ਉਪਰਿ ਖਿਪਨਵਸੇਨ ‘‘ਪਟਿਪ੍ਫਰਿਤ੍ਵਾ’’ਤਿ ਵਦਨ੍ਤਿ. ‘‘ਤਸ੍ਮਿਂ ਨਾਮ ਦਲਿਦ੍ਦੇ, ਅਕੁਸਲੇ ਵਾ ਇਦਂ ਕਰੋਨ੍ਤੇ ਅਹਂ ਕਸ੍ਮਾ ਨ ਕਰੋਮੀ’’ਤਿ ਏਵਂ ਇਧ ਪਟਿਪ੍ਫਰਣਂ ਯੁਤ੍ਤਂ. ਕਰਣਸ੍ਸ ਉਤ੍ਤਰਕਿਰਿਯਾ ਕਰਣੁਤ੍ਤਰਿਯਂ. ਅਕੁਸਲਪਕ੍ਖੋ ਏਸਾਤਿ ਸਾਰਮ੍ਭੋਤਿ ਅਧਿਪ੍ਪਾਯੋ.
੮੪੯. ਅਤਿਚ੍ਚ ਇਚ੍ਛਤੀਤਿ ਅਤਿਚ੍ਚਿਚ੍ਛੋ, ਤਸ੍ਸ ਭਾਵੋ ਅਤਿਚ੍ਚਿਚ੍ਛਤਾਤਿ ਵਤ੍ਤਬ੍ਬੇ ਚ੍ਚਿ-ਕਾਰਲੋਪਂ ਕਤ੍ਵਾ ‘‘ਅਤਿਚ੍ਛਤਾ’’ਤਿ ਵੁਤ੍ਤਂ. ਅਤ੍ਰਿਚ੍ਛਤਾਤਿ ਚ ਸਾ ਏਵ ਵੁਚ੍ਚਤੀਤਿ. ਤਤ੍ਰਾਪਿ ਨੇਰੁਤ੍ਤਿਕਵਿਧਾਨੇਨ ਪਦਸਿਦ੍ਧਿ ਵੇਦਿਤਬ੍ਬਾ. ਯਥਾਲਦ੍ਧਂ ਵਾ ਅਤਿਕ੍ਕਮਿਤ੍ਵਾ ਅਤ੍ਰ ਅਤ੍ਰ ਇਚ੍ਛਨਂ ਅਤ੍ਰਿਚ੍ਛਤਾ, ਸਾ ਏਵ ਰ-ਕਾਰਸ੍ਸ ਤ-ਕਾਰਂ ਕਤ੍ਵਾ ‘‘ਅਤਿਚ੍ਛਤਾ’’ਤਿ ਵੁਤ੍ਤਾ.
ਅਤ੍ਰਿਚ੍ਛਨ੍ਤਿ ਅਤਿਚ੍ਛਂ, ਅਤ੍ਰ ਵਾ ਇਚ੍ਛਨ੍ਤੋ. ਕੇਨ? ਅਤਿਲੋਭੇਨ ਅਤਿਲੋਭਮਿਚ੍ਛਾਸਙ੍ਖਾਤੇਨ ਅਤਿਲੋਭਮਦੇਨ ਚ. ਅਤ੍ਤਨੋ ਹਿਤਂ ਅਤ੍ਤਾਤਿ ਵੁਤ੍ਤਂ. ਹਾਯਤਿ ਜੀਰਤਿ, ਆਦਿਣ੍ਣੋ ਵਾ ਅਤ੍ਤਾ, ਪਤ੍ਤੋ ਵਾ ਅਤ੍ਤਾ, ਨਂ ਜੀਰਤਿ ਚਨ੍ਦਕਿਨ੍ਨਰਿਂ ਪਤ੍ਥਯਿਤ੍ਵਾ ਅਸਿਤਾਭੂਦੇਵਿਯਾ ਵਿਹੀਨੋ ਵਿਯ.
ਇਚ੍ਛਾਹਤਸ੍ਸਾਤਿ ਇਚ੍ਛਾਯ ਉਪਦ੍ਦੁਤਸ੍ਸ, ਮੁਦ੍ਦਿਤਸ੍ਸ ਵਾ.
ਅਤਿਹੀਲ਼ਯਾਨੋਤਿ ਅਵਮਞ੍ਞਮਾਨੋ. ਮਲਕਨ੍ਤਿ ਏਵਂਨਾਮਕਂ ਜਨਪਦਂ, ਅਬ੍ਭੋਕਾਸਂ ਵਾ. ਕੋਦਣ੍ਡਕੇਨਾਤਿ ਕੁਦਣ੍ਡਕੇਨ ਰਸ੍ਸਦਣ੍ਡਕੇਨ. ਗਦ੍ਦੁਲੇਨਾਤਿ ਚ ਵਦਨ੍ਤਿ. ਰੁਹਿਰਮਕ੍ਖਿਤਙ੍ਗੋਤਿ ਰੁਹਿਰਸਿਨ੍ਨਗਤ੍ਤੋ.
੮੫੦. ਜਾਨਨ੍ਤਸ੍ਸੇਵ ਭਿਯ੍ਯੋ ਭਿਯ੍ਯੋ ਚੋਦੇਨ੍ਤੋ ਵਿਯ ਸਮ੍ਭਾਵੇਤੁਕਾਮੋ ਹੋਤਿ. ਪਚ੍ਚਯੇਤਿ ਉਪਾਦਾਨਾਦਿਪਚ੍ਚਯੇ.
੮੫੧. ਯੇ ਪਤਿਰੂਪੇਨ ਵਞ੍ਚੇਨ੍ਤਿ, ਤੇ ਗਣ੍ਠਿਕਾ, ਦੁਰਾਚਾਰੇਨ ਵਾ ਗਣ੍ਠਿਭੂਤਾ. ਗਣ੍ਠਿਕਪੁਤ੍ਤਾ ਨਾਮ ਗਣ੍ਠਿਕਾ ਏਵ ਹੋਨ੍ਤਿ, ਤੇਨ ਸਦ੍ਧਿਵਿਹਾਰਿਕਾ ਗਣ੍ਠਿਕਭਾਵੇਨ ‘‘ਥੇਰੋ…ਪੇ… ਦੀਘਚਙ੍ਕਮੇ ਵਿਹਰਤੀ’’ਤਿ ਵਦਨ੍ਤਿ.
ਵਟ੍ਟਤਿ ਭਨ੍ਤੇਤਿ ਅਯਮ੍ਪਿ ਏਕੋ ਪਕਾਰੋ, ਲਾਭਿਨਾ ਏਵ ਪਨ ਸਕ੍ਕਾ ਞਾਤੁਨ੍ਤਿ ਅਤ੍ਤਨੋ ਸਮਾਪਤ੍ਤਿਲਾਭਿਤਂ ਸੂਚੇਤੀਤਿ ਅਤ੍ਥੋ. ਪਞ੍ਚਤ੍ਤਯਂ ਨਾਮ ਉਪਰਿਪਣ੍ਣਾਸਕੇ ਦੁਤਿਯਸੁਤ੍ਤਂ (ਮ. ਨਿ. ੩.੨੧ ਆਦਯੋ). ਤਸ੍ਸ ਗਮ੍ਭੀਰਤ੍ਤਾ ਵਦਤਿ ‘‘ਪਞ੍ਚਤ੍ਤਯਂ ਓਲੋਕੇਨ੍ਤਸ੍ਸਾ’’ਤਿ.
੮੫੨. ਸਿਙ੍ਗਨ੍ਤਿ ਸਿਙ੍ਗਾਰਂ. ਤਞ੍ਹਿ ਕੁਸਲਸ੍ਸ ਵਿਜ੍ਝਨਤੋ ਸਮਾਸੇਵਿਤਤਾਯ ਸੀਸੇ ਪਰਿਕ੍ਖਤਂ ਸੁਨਿਖਤਂ ਵਿਸਾਣਂ ਵਿਯ, ਥਿਰਤ੍ਤਾ ਚ ਸਿਙ੍ਗਂ ਵਿਯਾਤਿ ਸਿਙ੍ਗਂ, ਤਂ ਪਨਤ੍ਥਤੋ ਰਾਗੋ.
੮੫੩. ਤੇਮਨਕਰਣਤ੍ਥੇ ਤਿਨ੍ਤਿਣ-ਸਦ੍ਦੋ ਦਟ੍ਠਬ੍ਬੋ. ਖੀਯਨਨ੍ਤਿ ਚ ਯੇਨ ਲੋਭੇਨ ਪਰਂ ਮਮਨ੍ਤਿ ਵਦਨ੍ਤਂ ਖੀਯਤਿ, ਸੋ ਵੁਤ੍ਤੋ. ਖੀਯਨਂ ਭਣ੍ਡਨਨ੍ਤਿ ਚ ਵਦਨ੍ਤਿ. ਤਿਨ੍ਤਿਣਨ੍ਤਿ ਵਾ ਲੋਲੁਪ੍ਪਮਿਚ੍ਚੇਵ ਵੁਤ੍ਤਂ ਹੋਤਿ. ਸਞ੍ਞਾ-ਸਦ੍ਦੋ ਹਿ ਏਸੋ ਲੋਲੁਪ੍ਪਵਾਚਕੋਤਿ.
੮੫੪. ਊਰੁਪ੍ਪਮਾਣਾਪੀਤਿ ਏਤੇਨ ਮਹਨ੍ਤਘਨਭਾਵੇਨ ਅਪੂਤਿਤਂ ਦਸ੍ਸੇਤਿ. ਅਥਵਾਤਿਆਦਿਨਾ ਚੀਵਰਮਣ੍ਡਨਾਦੀਨਂ ਵਿਸੇਸਨਾਨਿ ‘‘ਇਮਸ੍ਸ ਵਾ ਪੂਤਿਕਾਯਸ੍ਸ ਬਾਹਿਰਾਨਂ ਵਾ ਪਰਿਕ੍ਖਾਰਾਨਂ ਮਣ੍ਡਨਾ’’ਤਿਆਦੀਨੀਤਿ ਦਸ੍ਸੇਤਿ. ਚੀਵਰੇਨ ਹਿ ਮਣ੍ਡਨਾ ਚੀਵਰਮਣ੍ਡਨਾ, ਚੀਵਰਸ੍ਸ ਵਾ ਮਣ੍ਡਨਾ ਚੀਵਰਮਣ੍ਡਨਾ, ਏਵਂ ਪਤ੍ਤਮਣ੍ਡਨਾ ਸੇਨਾਸਨਮਣ੍ਡਨਾ ਚਾਤਿ ਅਧਿਪ੍ਪਾਯੋ. ਊਨਟ੍ਠਾਨਪੂਰਣਂ ਛਵਿਰਾਗਸੁਸਣ੍ਠਾਨਾਦਿਕਰਣਞ੍ਚ ਚੀਵਰਾਦੀਸੁ ਕਾਯੇ ਚ ਯਥਾਯੋਗਂ ਯੋਜੇਤਬ੍ਬਂ. ਤਦਹੁਜਾਤਦਾਰਕੋ ਵਿਯ ਹੋਤੀਤਿ ਦਾਰਕਚਾਪਲ੍ਯਂ ਨ ਮੁਞ੍ਚਤੀਤਿ ਅਤ੍ਥੋ.
੮੫੫. ਸਦਿਸਾ ਅਨੁਰੂਪਾ ਭਤ੍ਤਿ ਸਭਾਗੋ, ਨ ਸਭਾਗੋ ਅਸਭਾਗੋ, ਮਾਨਥਦ੍ਧਤਾ, ਵਿਰੋਧੋ ਵਾ. ਤੇਨਸ੍ਸ ਮਾਤਾਦੀਸੁ ਵਤ੍ਤਨਂ ਅਸਭਾਗਵੁਤ੍ਤਿਤਾ. ਏਵਂਵਿਧਾਨਂ ਮਾਨਾਧਿਕਾਨਂ ਅਕੁਸਲਾਨਮਿਦਂ ਨਾਮਂ.
੮੫੬. ਪਰਿਤਸ੍ਸਿਤਾਤਿ ਸਙ੍ਕਮ੍ਪਨਾ, ਉਕ੍ਕਣ੍ਠਿਤਸ੍ਸ ਵਾ ਤਸ੍ਸ ਤਸ੍ਸ ਤਣ੍ਹਾਯਨਾ.
੮੫੭. ਕੁਸਲਕਰਣੇ ਕਾਯਸ੍ਸ ਅਵਿਪ੍ਫਾਰਿਕਤਾ ਲੀਨਤਾ ਜਾਤਿਆਲਸ੍ਯਂ, ਨ ਰੋਗਉਤੁਭੋਜਨਾਦੀਹਿ ਕਾਯਗੇਲਞ੍ਞਂ ਤਨ੍ਦੀ ਨਾਮ, ਅਥ ਖੋ ਪਕਤਿਆਲਸ੍ਯਨ੍ਤਿ ਅਤ੍ਥੋ. ਕਾਯਾਲਸਿਯਨ੍ਤਿ ਨਾਮਕਾਯਸ੍ਸ ਆਲਸਿਯਂ, ਤਦੇਵ ਰੂਪਕਾਯਸ੍ਸਾਪੀਤਿ ਦਟ੍ਠਬ੍ਬਂ.
੮੫੮. ਅਚ੍ਚਸਨਾਦੀਹਿ ਉਪ੍ਪਨ੍ਨਧਾਤੁਕ੍ਖੋਭਨਿਮਿਤ੍ਤਂ ਆਲਸਿਯਂ ਵਿਜਮ੍ਭਿਤਾ.
੮੫੯. ਭਤ੍ਤਨਿਮਿਤ੍ਤੇਨ ਉਪ੍ਪਨ੍ਨਂ ਆਲਸ੍ਯਂ ਭਤ੍ਤਸਮ੍ਮਦੋ.
੮੬੦. ਇਮੇਹਿ ਪਨਾਤਿ ਚਿਤ੍ਤਸ੍ਸ ਅਕਲ੍ਯਤਾਦੀਹਿ. ਸਬ੍ਬਤ੍ਥ ਕਿਲੇਸਵਸੇਨਾਤਿ ਥਿਨਮਿਦ੍ਧਕਾਰਣਾਨਂ ਰਾਗਾਦੀਨਂ ਵਸੇਨਾਤਿ ਦਟ੍ਠਬ੍ਬਂ.
੮੬੧. ਸਮ੍ਮਾਆਜੀਵਤੋ ਅਪੇਤੋ ਕਤੋਤਿ ਅਪਕਤੋ. ਸੋ ਆਜੀਵੁਪਦ੍ਦਵੇਨ ਉਪਦ੍ਦੁਤੋਤਿ ਕਤ੍ਵਾ ਆਹ ‘‘ਉਪਦ੍ਦੁਤਸ੍ਸਾਤਿ ਅਤ੍ਥੋ’’ਤਿ.
ਤਿਵਿਧਮ੍ਪਿ ਤਂ ਤਤ੍ਥ ਆਗਤਂ ਤਸ੍ਸ ਨਿਸ੍ਸਯਭੂਤਾਯ ਇਮਾਯ ਪਾਲ਼ਿਯਾ ਦਸ੍ਸੇਤੁਨ੍ਤਿ ਏਵਮਤ੍ਥੋ ਦਟ੍ਠਬ੍ਬੋ.
ਪਾਪਣਿਕਾਨੀਤਿ ਆਪਣਤੋ ਛਡ੍ਡਿਤਾਨਿ. ਨਨ੍ਤਕਾਨੀਤਿ ਅਨ੍ਤਰਹਿਤਾਨਿ, ਚੀਰਾਨਿ ਵਾ. ਗਿਲਾਨਸ੍ਸ ਪਚ੍ਚਯਭੂਤਾ ਭੇਸਜ੍ਜਸਙ੍ਖਾਤਾ ਜੀਵਿਤਪਰਿਕ੍ਖਾਰਾ ਗਿਲਾਨਪਚ੍ਚਯਭੇਸਜ੍ਜਪਰਿਕ੍ਖਾਰਾ. ਪੂਤਿਮੁਤ੍ਤਨ੍ਤਿ ਪੁਰਾਣਸ੍ਸ ਅਪੁਰਾਣਸ੍ਸ ਚ ਸਬ੍ਬਸ੍ਸ ਗੋਮੁਤ੍ਤਸ੍ਸੇਤਂ ਨਾਮਂ. ਪੂਤਿਭਾਵੇਨ ਛਡ੍ਡਿਤੋਸਧਨ੍ਤਿਪਿ ਕੇਚਿ.
ਅਗਬ੍ਭਿਕਾ ਏਕਦ੍ਵਾਰਾ ਦੀਘਸਾਲਾ ਕਿਰ ਉਦ੍ਦਣ੍ਡੋ. ਕੁਚ੍ਛਿਤਰਜਭੂਤਾਯ ਪਾਪਿਚ੍ਛਤਾਯ ਨਿਰਤ੍ਥਕਕਾਯਵਚੀਵਿਪ੍ਫਨ੍ਦਨਿਗ੍ਗਹਣਂ ਕੋਰਜਂ, ਤਂ ਏਤਸ੍ਸ ਅਤ੍ਥੀਤਿ ਕੋਰਜਿਕੋ, ਅਤਿਵਿਯ ਕੋਰਜਿਕੋ ਕੋਰਜਿਕਕੋਰਜਿਕੋ. ਅਤਿਪਰਿਸਙ੍ਕਿਤੋਤਿ ਕੇਚਿ. ਮੁਖਸਮ੍ਭਾਵਿਤੋਤਿ ਕੋਰਜਿਕਕੋਰਜਿਕਾਦਿਭਾਵੇਨ ਪਵਤ੍ਤਵਚਨੇਹਿ ਅਤ੍ਤਨੋ ਮੁਖਮਤ੍ਤੇਨ ਅਞ੍ਞੇਹਿ ਸਮ੍ਭਾਵਿਤੋ. ਸੋ ਏਵਰੂਪੋ ਏਵਰੂਪਤਾਯ ਏਵ ਅਤ੍ਤਾਨਂ ਪਰਂ ਵਿਯ ਕਤ੍ਵਾ ‘‘ਅਯਂ ਸਮਣੋ’’ਤਿਆਦਿਂ ਕਥੇਤਿ.
ਪਣਿਧਾਯਾਤਿ ‘‘ਅਰਹਾਤਿ ਮਂ ਜਾਨਨ੍ਤੂ’’ਤਿ ਚਿਤ੍ਤਂ ਠਪੇਤ੍ਵਾ, ਪਤ੍ਥੇਤ੍ਵਾ ਵਾ. ਆਪਾਥਕਜ੍ਝਾਯੀਤਿ ਮਨੁਸ੍ਸਾਨਂ ਆਪਾਥਟ੍ਠਾਨੇ ਸਮਾਧਿਂ ਸਮਾਪਨ੍ਨੋ ਵਿਯ ਨਿਸੀਦਨ੍ਤੋ ਆਪਾਥਕੇ ਜਨਸ੍ਸ ਪਾਕਟਟ੍ਠਾਨੇ ਝਾਯੀ.
ਅਞ੍ਞਂ ਵਿਯ ਕਤ੍ਵਾ ਅਤ੍ਤਨੋ ਸਮੀਪੇ ਭਣਨਂ ਸਾਮਨ੍ਤਜਪ੍ਪਿਤਂ. ਆਕਾਰਸ੍ਸ ਰਸ੍ਸਤ੍ਤਂ ਕਤ੍ਵਾ ‘‘ਅਠਪਨਾ’’ਤਿ ਵੁਤ੍ਤਂ. ਕੁਹਨਂ ਕੁਹੋ, ਤਸ੍ਸ ਅਯਨਾ ਪਵਤ੍ਤਿ ਕੁਹਾਯਨਾ, ਕੁਹਸ੍ਸ ਵਾ ਪੁਗ੍ਗਲਸ੍ਸ ਅਯਨਾ ਗਤਿਕਿਰਿਯਾ ਕੁਹਾਯਨਾ.
੮੬੨. ਪੁਟ੍ਠਸ੍ਸਾਤਿ ‘‘ਕੋ ਤਿਸ੍ਸੋ, ਕੋ ਰਾਜਪੂਜਿਤੋ’’ਤਿ ਪੁਟ੍ਠਸ੍ਸ. ਨਹਨਾਤਿ ਬਨ੍ਧਨਾ ਪਰਿਵੇਠਨਾ.
੮੬੩. ਨਿਮਿਤ੍ਤੇਨ ਚਰਨ੍ਤੋ ਜੀਵਨ੍ਤੋ ਨਿਮਿਤ੍ਤਕਾਰਕੋ ਨੇਮਿਤ੍ਤਿਕੋ, ਤਸ੍ਸ ਭਾਵੋ ਨੇਮਿਤ੍ਤਿਕਤਾ. ਅਤ੍ਤਨੋ ਇਚ੍ਛਾਯ ਪਕਾਸਨਂ ਓਭਾਸੋ. ਕੋ ਪਨ ਸੋਤਿ? ‘‘ਅਜ੍ਜ ਭਿਕ੍ਖੂਨਂ ਪਚ੍ਚਯਾ ਦੁਲ੍ਲਭਾ ਜਾਤਾ’’ਤਿਆਦਿਕਾ ਪਚ੍ਚਯਪਟਿਸਂਯੁਤ੍ਤਕਥਾ. ਇਚ੍ਛਿਤਵਤ੍ਥੁਸ੍ਸ ਸਮੀਪੇ ਕਥਨਂ ਸਾਮਨ੍ਤਜਪ੍ਪਾ.
੮੬੪. ਬਹਿ ਛਡ੍ਡਨਂ ਉਕ੍ਖੇਪਨਾ. ਪਰਪਿਟ੍ਠਿਮਂਸਖਾਦਨਸੀਲੋ ਪਰਪਿਟ੍ਠਿਮਂਸਿਕੋ, ਤਸ੍ਸ ਭਾਵੋ ਪਰਪਿਟ੍ਠਿਮਂਸਿਕਤਾ.
੮੬੫. ਨਿਕਤ੍ਤੁਂ ਅਪ੍ਪੇਨ ਲਾਭੇਨ ਬਹੁਕਂ ਵਞ੍ਚੇਤ੍ਵਾ ਗਹੇਤੁਂ ਇਚ੍ਛਨਂ ਨਿਜਿਗੀਸਨਂ, ਤਸ੍ਸ ਭਾਵੋ ਨਿਜਿਗੀਸਨਤਾ. ਤਸ੍ਸੇਵ ਇਚ੍ਛਨਸ੍ਸ ਪਵਤ੍ਤਿਆਕਾਰੋ, ਤਂਸਹਜਾਤਂ ਵਾ ਗਵੇਸਨਕਮ੍ਮਂ.
੮੬੬. ਵਣ੍ਣਸਮ੍ਪਨ੍ਨਂ ਪੋਕ੍ਖਰਂ ਵਣ੍ਣਪੋਕ੍ਖਰਨ੍ਤਿ ਉਤ੍ਤਰਪਦਲੋਪੋ ਪੁਬ੍ਬਪਦਸ੍ਸ ਦਟ੍ਠਬ੍ਬੋ, ਵਣ੍ਣਪਾਰਿਪੂਰੀ ਵਾ ਵਣ੍ਣਪੋਕ੍ਖਰਤਾ. ‘‘ਅਤ੍ਥਜਾਪਿਕਾ’’ਤਿ ਏਤ੍ਥ ਵਿਯ ਜਪ-ਸਦ੍ਦੋ ਉਪ੍ਪਤ੍ਤਿਵਾਚਕੋਤਿ ਆਹ ‘‘ਪਵਤ੍ਤੇਤੀ’’ਤਿ.
੮੬੭. ਸੇਯ੍ਯਸਦਿਸਮਾਨਾ ਉਨ੍ਨਤਿਵਸੇਨ ਪਵਤ੍ਤਾਤਿ ਉਭਯਤ੍ਥਾਪਿ ‘‘ਮਾਨਂ ਜਪ੍ਪੇਤੀ’’ਤਿ ਵੁਤ੍ਤਂ.
੮੬੮. ਹੀਨਮਾਨੋ ਪਨ ਓਨਤਿਵਸੇਨ ਪਵਤ੍ਤਿਤੋ ਕੇਵਲੇਨ ਮਾਨਸਦ੍ਦੇਨ ਨਿਦ੍ਦੇਸਂ ਨਾਰਹਤੀਤਿ ਤਂਨਿਦ੍ਦੇਸੇ ‘‘ਓਮਾਨਂ ਜਪ੍ਪੇਤੀ’’ਤਿ (ਵਿਭ. ੮੭੪) ਵੁਤ੍ਤਂ.
੮੭੨. ਰਾਜਭੋਗੇਨ ਰਟ੍ਠਭੁਞ੍ਜਨਕੋ ਰਾਜਨਿਸ੍ਸਿਤੋ ਰਟ੍ਠਿਯੋ.
੮੭੯. ਪੁਗ੍ਗਲਂ ਅਨਾਮਸਿਤ੍ਵਾਤਿ ਯਥਾ ਸੇਯ੍ਯਸ੍ਸ ਸੇਯ੍ਯਮਾਨਾਦਿਨਿਦ੍ਦੇਸੇਸੁ ‘‘ਪਰੇਹਿ ਸੇਯ੍ਯਂ ਅਤ੍ਤਾਨਂ ਦਹਤੀ’’ਤਿ ਸੇਯ੍ਯਾਦਿਪੁਗ੍ਗਲੋ ਮਾਨੁਪ੍ਪਾਦਕੋ ਆਮਟ੍ਠੋ, ਏਵਮੇਤਸ੍ਸ ਸੇਯ੍ਯਮਾਨਭਾਵੇਪਿ ਮਾਨੁਪ੍ਪਾਦਕਪੁਗ੍ਗਲਵਿਸੇਸਂ ਅਨਾਮਸਿਤ੍ਵਾ ‘‘ਪਰੇ ਅਤਿਮਞ੍ਞਤਿ’’ਚ੍ਚੇਵ ਵੁਤ੍ਤਨ੍ਤਿ ਅਤ੍ਥੋ. ਪਰੇ ਅਤਿਕ੍ਕਮਿਤ੍ਵਾ ਮਞ੍ਞਨਞ੍ਹਿ ਯਸ੍ਸ ਕਸ੍ਸਚਿ ਅਤਿਮਾਨੋਤਿ.
੮੮੦. ਪੁਰਿਮਮਾਨਸ੍ਸ ਉਪਰਿਮਾਨੋ ਮਾਨਾਤਿਮਾਨੋ, ਅਤਿ-ਸਦ੍ਦੋ ਉਪਰਿ-ਸਦ੍ਦਸ੍ਸ ਅਤ੍ਥਂ ਵਦਤੀਤਿ ਦਟ੍ਠਬ੍ਬੋ. ਪੁਰਿਮਮਾਨਂ ਵਾ ਅਤਿਕ੍ਕਨ੍ਤੋ ਮਾਨੋ ਮਾਨਾਤਿਮਾਨੋ.
੮੮੧. ਪਕ੍ਖਿਜਾਤੀਸੁ ਵਾਯਸੋ ਅਨ੍ਤੋ ਲਾਮਕੋਤਿ ਕਤ੍ਵਾ ‘‘ਕਾਕਜਾਤਿ ਵਿਯਾ’’ਤਿ ਵੁਤ੍ਤਂ.
੮੮੨. ਥੇਰੋ ਕਿਰ ਦੋਸਚਰਿਤੋ ਅਹੋਸਿ, ਤਸ੍ਮਾ ਆਦਿਤੋਵ ‘‘ਤੁਮ੍ਹੇ ਅਖੀਣਾਸਵਾ’’ਤਿ ਅਵਤ੍ਵਾ ਉਪਾਯੇਨ ਕਥੇਸੀਤਿ ਵਦਨ੍ਤਿ, ਦੋਸਚਰਿਤਤ੍ਤਾ ਵਾ ਖਿਪ੍ਪਂ ਤਤਿਯਪਦਵਾਰੇ ਵਿਰਾਗਂ ਉਪ੍ਪਾਦੇਸੀਤਿ ਅਧਿਪ੍ਪਾਯੋ.
੮੮੩. ਮਾਨਂ ਅਨੁਗਤਚ੍ਛਨ੍ਦੋਤਿ ਮਾਨਸਮ੍ਪਯੁਤ੍ਤਛਨ੍ਦੋ, ਮਾਨਸਭਾਵਂ ਅਨੁਗਤੋ ਮਾਨਚ੍ਛਨ੍ਦੋ ਵਾ.
੮੮੪. ‘‘ਵਿਲਮ੍ਬਨ’’ਨ੍ਤਿ ਚ ਇਤ੍ਥਿਪੁਰਿਸਸਮ੍ਮਾਨਨਾਦਿਕਿਰਿਯਾਦਿਵਿਲਮ੍ਬਨਪਟਿਸਂਯੁਤ੍ਤਂ ਕਤ੍ਤਬ੍ਬਂ ਦਟ੍ਠਬ੍ਬਂ. ਤਤ੍ਥ ਯੁਤ੍ਤਮੁਤ੍ਤਸਿਲਿਟ੍ਠਂ ਪਟਿਭਾਨਂ ਵਿਲਮ੍ਬਨਪਟਿਭਾਨਂ.
੮੮੭. ਅਮਰਵਾਦਪਟਿਸਂਯੁਤ੍ਤੋ ਵਿਤਕ੍ਕੋ, ਅਤ੍ਤਨੋ ਅਮਰਣਤ੍ਥਾਯ ਦੇਵਭਾਵਤ੍ਥਾਯ ਵਾ ਵਿਤਕ੍ਕੋ ਅਮਰਵਿਤਕ੍ਕੋ.
੮੮੮. ਪਰੇਸੁ ਅਨੁਦ੍ਦਯਾ ਰਾਗਵਸੇਨ ਅਨੁਦ੍ਦਯਕਰਣਂ ਏਤਸ੍ਸਾਤਿ ਪਰਾਨੁਦ੍ਦਯੋ, ਤਸ੍ਸ ਭਾਵੋ ਪਰਾਨੁਦ੍ਦਯਤਾ, ਪਰੇਸੁ ਵਾ ਅਨੁਦ੍ਦਯਸ੍ਸੇਵ ਸਹਨਨ੍ਦਿਤਾਦਿਕਸ੍ਸ ਭਾਵੋ ਪਰਾਨੁਦ੍ਦਯਤਾ, ਤਾਦਿਸੋ ਰਾਗੋ. ਤਤ੍ਥਾਤਿ ਪਰਾਨੁਦ੍ਦਯਤਾਯ ਸਂਸਟ੍ਠਵਿਹਾਰੇਨ ਦਸ੍ਸਿਤਾਯਾਤਿ ਅਤ੍ਥੋ ਯੁਜ੍ਜਤਿ.
੮੯੦. ਅਨਵਞ੍ਞਤ੍ਤਿਂ ਪਤ੍ਥੇਨ੍ਤੋ ਅਨਵਞ੍ਞਤ੍ਤਤ੍ਥਮੇਵ ਕਾਮਗੁਣੇ ਚ ਪਤ੍ਥੇਤੀਤਿ ਆਹ ‘‘ਪਞ੍ਚਕਾਮ…ਪੇ… ਨਿਸ੍ਸਿਤੋ ਹੁਤ੍ਵਾ’’ਤਿ.
ਏਕਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
(੨.) ਦੁਕਨਿਦ੍ਦੇਸਵਣ੍ਣਨਾ
੮੯੧. ਉਪਨਯ੍ਹਤੀਤਿ ਬਨ੍ਧਤਿ. ਅ-ਕਾਰੋ ਅਨਨ੍ਤਰਤ੍ਥਵਾਚਕੋ, ਮਰਿਯਾਦਵਾਚਕਸ੍ਸ ਵਾ ਆਕਾਰਸ੍ਸ ਰਸ੍ਸਤ੍ਤਂ ਕਤ੍ਵਾ ‘‘ਅਟ੍ਠਪਨਾ’’ਤਿ ਵੁਤ੍ਤਨ੍ਤਿ ‘‘ਅਨਨ੍ਤਰਟ੍ਠਪਨਾ’’ਤਿਆਦਿਮਾਹ. ਤਤ੍ਥ ਪਠਮੁਪ੍ਪਨ੍ਨਸ੍ਸ ਪਵਤ੍ਤਾਕਾਰੋ ਮਰਿਯਾਦਾ, ਤਂ ਅਨਤਿਕ੍ਕਮਿਤ੍ਵਾ ਤਸ੍ਸੇਵ ਦਲ਼੍ਹੀਕਰਣਵਸੇਨ ਠਪਨਾ ਮਰਿਯਾਦਟ੍ਠਪਨਾ. ਪਕਤਿਟ੍ਠਪਨਾਮਤ੍ਤਮੇਵ, ਵਿਸੇਸਨਰਹਿਤਾਤਿ ਅਤ੍ਥੋ.
੮੯੨. ਨਿਟ੍ਠੁਰਿਯਂ ਖੇਲ਼ਪਾਤਨਂ, ਨਿਟ੍ਠੁਰਿਯਂ ਵਿਯ ਨਿਟ੍ਠੁਰਿਯਂ. ਦਸ੍ਸੇਤ੍ਵਾਤਿ ਦਨ੍ਤੇਹਿ ਛਿਨ੍ਦਿਤ੍ਵਾ. ਤੇਨ ਪਨ ਦਸ੍ਸਨਂ ਪਲ਼ਾਸੋਤਿ ਦਸ੍ਸੇਤਿ. ਪਲ਼ਾਸਸ੍ਸ ਆਯਨਾਤਿ ਯੁਗਗ੍ਗਾਹਪ੍ਪਵਤ੍ਤਿ. ਸਮਭਾਵਦਹਨਂ ਜਯੋ, ਤਸ੍ਸ ਆਹਰਣਤੋ ਆਹਾਰੋ. ਧੁਰਂ ਨ ਦੇਤੀਤਿ ਪਾਮੋਕ੍ਖਂ ਨ ਦੇਤਿ.
੮੯੪. ਕਾਯੇਨ ਚੇਤਿਯਙ੍ਗਣਾਦਿਵਤ੍ਤਂ ਕਰੋਤਿ ‘‘ਏਵਂ ਵਤ੍ਤਸਮ੍ਪਨ੍ਨੋ ਸਦ੍ਧੋ ਕਥਂ ਕਾਯਦੁਚ੍ਚਰਿਤਾਦੀਨਿ ਕਰਿਸ੍ਸਤੀ’’ਤਿ ਪਰੇਸਂ ਞਾਪਨਤ੍ਥਂ. ਅਤਿਚ੍ਚਾਤਿ ਅਚ੍ਚਯਂ ਕਤ੍ਵਾ. ਆਸਰਨ੍ਤੀਤਿ ਆਗਚ੍ਛਨ੍ਤਿ, ਪੁਨ ਪਟਿਚ੍ਛਾਦਨੇ ਪਵਤ੍ਤਨ੍ਤੀਤਿ ਅਤ੍ਥੋ. ਕੋਨਾਮੇਵਂ ਕਰੋਤੀਤਿ ਵੋਚ੍ਛਿਨ੍ਦਨਚ੍ਛਾਦਨਾ ਵਾ ਵੋਚ੍ਛਾਦਨਾ.
ਨ ਸਮ੍ਮਾ ਭਾਸਿਤਾਤਿ ਯੋ ਨ ਸਮ੍ਮਾ ਭਾਸਤਿ, ਸੋ ਸਠੋਤਿ ਦਸ੍ਸੇਤਿ. ਕੁਚ੍ਛਿ ਵਾ ਪਿਟ੍ਠਿ ਵਾ ਜਾਨਿਤੁਂ ਨ ਸਕ੍ਕਾਤਿ ਅਸਨ੍ਤਗੁਣਸਮ੍ਭਾਵਨੇਨੇਵ ਚਿਤ੍ਤਾਨੁਰੂਪਕਿਰਿਯਾਵਿਰਹਤੋ ‘‘ਏਵਂਚਿਤ੍ਤੋ ਏਵਂਕਿਰਿਯੋ’’ਤਿ ਜਾਨਿਤੁਂ ਨ ਸਕ੍ਕਾਤਿ ਅਤ੍ਥੋ.
ਅਜੋ ਏਵ ਅਜਾਮਿਗੋ. ਨੇਲਕੋਤਿ ਤਰੁਣਵਚ੍ਛੋ. ਯਥਾ ਸੋ ਯਕ੍ਖੋ ਤਾਦਿਸਂ ਰੂਪਂ ਦਸ੍ਸੇਤ੍ਵਾ ‘‘ਅਜਾ’’ਤਿ ਸਞ੍ਞਾਯ ਆਗਤਾਗਤੇ ਖਾਦਤਿ, ਏਵਮਯਮ੍ਪਿ ਤਂਤਂਸਦਿਸਗੁਣਸਮ੍ਭਾਵਨੇਨ ਤੇ ਤੇ ਵਞ੍ਚੇਤਿ. ਤੇਨੇਤਂ ਸਾਠੇਯ੍ਯਂ ਮਾਯਾਤੋ ਬਲਵਤਰਾ ਵਞ੍ਚਨਾਤਿ ਦਟ੍ਠਬ੍ਬਂ. ਤੇਨੇਵ ‘‘ਪਰਿਕ੍ਖਤ੍ਤਤਾ’’ਤਿ ਵੁਤ੍ਤਂ.
੯੦੮. ਸਕ੍ਕਾਯਦਿਟ੍ਠਾਦੀਨਂ ਅਭਾਵੇਪਿ ਯਂ ਸਂਯੋਜਨਂ ਹੋਤਿ, ਤਂ ਬਹਿਦ੍ਧਾ ਸਂਯੋਜਨਤੋ ਬਹਿਦ੍ਧਾਸਂਯੋਜਨਸ੍ਸ ਪੁਗ੍ਗਲਸ੍ਸ ਵਿਸੇਸਨਭੂਤਂ ਬਹਿਦ੍ਧਾਸਂਯੋਜਨਂ ਨਾਮ.
ਦੁਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
(੩.) ਤਿਕਨਿਦ੍ਦੇਸਵਣ੍ਣਨਾ
੯੦੯. ਅਕੁਸਲਮੂਲਾਨੇਵ ਵਟ੍ਟਮੂਲਾਨੀਤਿ ਤੇਹਿ ਕਥਿਤੇਹਿ ਵਟ੍ਟਮੂਲਸਮੁਦਾਚਾਰੋ ਕਥਿਤੋ ਹੋਤੀਤਿ ਆਹ ‘‘ਤੀਹਿ…ਪੇ… ਕਥਿਤੋ’’ਤਿ.
੯੧੯. ਸਸ੍ਸਤੋ ਲੋਕੋਤਿਆਦਿਦਸ੍ਸਨਮੇਵ ਬ੍ਰਹ੍ਮਚਰਿਯਂ ਮੋਕ੍ਖਸਮ੍ਪਾਪਕਂ ਉਤ੍ਤਮਚਰਿਯਨ੍ਤਿ ਦਿਟ੍ਠਿਗਤਿਕੇਹਿ ਸਮ੍ਮਤਨ੍ਤਿ ਆਹ ‘‘ਦਿਟ੍ਠਿਗਤਿਕਸਮ੍ਮਤਸ੍ਸਾ’’ਤਿ. ਰੂਪਾਰੂਪਾਵਚਰਵਿਪਾਕੇਸੁ ਸਾਤਿਸਯੋ ਭਵਰਾਗੋਤਿ ਅਧਿਪ੍ਪਾਯੇਨ ਵੁਤ੍ਤਂ ‘‘ਮਹਾਬ੍ਰਹ੍ਮਾਨ’’ਨ੍ਤਿ.
੯੨੦. ਕਥਂਵਿਧਨ੍ਤਿ ਕੇਨਾਕਾਰੇਨ ਸਣ੍ਠਿਤਨ੍ਤਿ ਅਤ੍ਥੋਤਿ ਕਤ੍ਵਾ ਆਹ ‘‘ਆਕਾਰਸਣ੍ਠਾਨ’’ਨ੍ਤਿ. ਮਾਨਠਪਨਾਤਿ ਸੇਯ੍ਯਾਦਿਵਸੇਨ ਮਾਨੇਨ ਠਪਨਾ, ਮਾਨਸਙ੍ਖਾਤਾ ਵਾ ਠਪਨਾ.
੯੨੧. ਚੇਤਸੋ ਉਤ੍ਰਾਸੋ ਦੋਮਨਸ੍ਸਂ, ਦੋਸੋ ਵਾ, ਤਂਸਮ੍ਪਯੁਤ੍ਤਾ ਵਾ ਚੇਤਨਾਦਯੋ.
੯੨੨. ਦੇਸਨਾਸੁਖਤਾਯਾਤਿ ਤਿਣ੍ਣਂ ਅਦ੍ਧਾਨਂ ਵਸੇਨ ਵਿਚਿਕਿਚ੍ਛਾਯ ਦੇਸਨਾ ਸੁਖਾ ‘‘ਕਙ੍ਖਤਿ ਵਿਚਿਕਿਚ੍ਛਤੀ’’ਤਿ, ਨ ਪਨ ਤਥਾ ਮੋਹੇਨਾਤਿ ਅਧਿਪ੍ਪਾਯੋ. ਵਣ੍ਣਾਦਿਭੇਦਂ ਸੁਤ੍ਵਾਤਿ ਕੇਚਿ ਕਿਰ ਵਦਨ੍ਤਿ ‘‘ਖਤ੍ਤਿਯਜੀਵੋ ਪਣ੍ਡੁਵਣ੍ਣੋ. ਕਸ੍ਮਾ? ਸੋ ਹਿ ਪੁਬ੍ਬਣ੍ਹੇ ਰਮਤਿ, ਪੁਬ੍ਬਣ੍ਹੇ ਚ ਛਾਯਾ ਪਣ੍ਡੁਵਣ੍ਣਾ. ਬ੍ਰਾਹ੍ਮਣਵੇਸ੍ਸਸੁਦ੍ਦਜੀਵਾ ਓਦਾਤਪੀਤਕਾਲ਼ਵਣ੍ਣਾ. ਤੇ ਹਿ ਮਜ੍ਝਨ੍ਹਸਾਯਨ੍ਹਰਤ੍ਤੀਸੁ ਓਦਾਤਪੀਤਕਾਲ਼ਛਾਯਾ ਕਾਲ਼ਤਮਕਾਲੇਸੁ ਰਮਨ੍ਤੀ’’ਤਿ ਤੇਸਂ ਵਣ੍ਣਭੇਦਂ, ‘‘ਬ੍ਯਾਪੀ ਪਰਿਮਣ੍ਡਲੋ’’ਤਿਆਦਿਨਾ ਕਥੇਨ੍ਤਾਨਂ ਸਣ੍ਠਾਨਭੇਦਞ੍ਚ ਸੁਤ੍ਵਾ.
੯੨੩. ਪੁਰਿਸਪੁਗ੍ਗਲੋਤਿ ਪਦਦ੍ਵਯਂ ਏਕਪਦਂ ਕਤ੍ਵਾ ਜਾਨਨ੍ਤਾਨਂ ਵਸੇਨਾਯਂ ਸਮ੍ਮੁਤਿਕਥਾ ਪਵਤ੍ਤਾ, ਪਦਨ੍ਤਰਮੇਵ ਵਾ ਇਦਂ ਪੁਗ੍ਗਲਵਾਚਕਨ੍ਤਿ ਦਸ੍ਸੇਨ੍ਤੋ ‘‘ਅਯਂ ਪਨਾ’’ਤਿਆਦਿਮਾਹ. ਅਥ ਵਾ ਪੁਰਿਸੋਤਿ ਵੁਤ੍ਤੋ ਚ ਪੁਗ੍ਗਲੋ ਏਵ, ਨ ਪੁਰਿਸਿਨ੍ਦ੍ਰਿਯਯੁਤ੍ਤੋਵਾਤਿ ਦਸ੍ਸਨਤ੍ਥਮ੍ਪਿ ‘‘ਪੁਰਿਸਪੁਗ੍ਗਲੋ’’ਤਿ ਵੁਤ੍ਤਨ੍ਤਿ ਵੇਦਿਤਬ੍ਬਂ. ਅਟ੍ਠਸੁ ਆਬਾਧੇਸੂਤਿ ਪਿਤ੍ਤਸੇਮ੍ਹਵਾਤਸਮੁਟ੍ਠਾਨਉਤੁਵਿਪਰਿਣਾਮਜਓਪਕ੍ਕਮਿਕਵਿਸਮਪਰਿਹਾਰਜਸਨ੍ਨਿਪਾਤਜਕਮ੍ਮਸਮੁਟ੍ਠਾਨੇਸੁ. ਪੁਬ੍ਬੇ ਕਤਨ੍ਤਿ ਪੁਰਾਣਤਰਕਮ੍ਮਂ ਇਚ੍ਛਨ੍ਤੀਤਿ ਉਪਪਜ੍ਜਵੇਦਨੀਯਞ੍ਚ ਕਿਰ ਪਟਿਕ੍ਖਿਪਨ੍ਤਿ. ਆਣਤ੍ਤਿਮੂਲਕੇਨ ਵਾਤਿ ਯੋਪਿ ਆਣਾਪੇਤ੍ਵਾ ਵਧਬਨ੍ਧਾਦਿਦੁਕ੍ਖਂ ਉਪ੍ਪਾਦੇਤਿ, ਤਮ੍ਪਿ ਤਂਮੂਲਕਂ ਨ ਹੋਤਿ, ਇਸ੍ਸਰਨਿਮ੍ਮਾਨਮੂਲਮੇਵਾਤਿ ਅਧਿਪ੍ਪਾਯੋ.
੯੨੪. ਮੋਹਸ੍ਸ ਅਨੁਦਹਨਂ ਦਾਹਕਾਰਣਤਾਯ ਵੁਤ੍ਤਂ, ਸਭਾਵਤੋਪਿ ਪਨ ਅਸਮ੍ਪਟਿਵੇਧੋ ਸਮ੍ਪਟਿਵੇਧਸੁਖਸ੍ਸ ਪਚ੍ਚਨੀਕਭੂਤੋ ਦੁਕ੍ਖੋ ਏਵਾਤਿ ਅਨੁਦਹਨਤਾ ਵੇਦਿਤਬ੍ਬਾ. ਏਵਞ੍ਚ ਕਤ੍ਵਾ ‘‘ਉਪੇਕ੍ਖਾ ਵੇਦਨਾ ਞਾਣਸੁਖਾ ਅਞ੍ਞਾਣਦੁਕ੍ਖਾ’’ਤਿ (ਮ. ਨਿ. ੧.੪੬੫) ਵੁਤ੍ਤਾ.
੯੨੬. ਪੁਥੁਨਿਮਿਤ੍ਤਾਰਮ੍ਮਣੇਸੂਤਿ ਸੁਭਨਿਮਿਤ੍ਤਾਦਿਵਸੇਨ ਪੁਥੁਨਿਮਿਤ੍ਤਸਭਾਵੇਸੁ ਆਰਮ੍ਮਣੇਸੁ, ਪੁਥੁਸਭਾਵੇਸੁ ਵਾ ਸੁਭਨਿਮਿਤ੍ਤਾਦਿਆਰਮ੍ਮਣੇਸੁ. ਕੋਸਜ੍ਜਪਮਾਦਨਿਦ੍ਦੇਸਾਨਂ ਸਮਾਨਤ੍ਤੇਪਿ ਅਵਿਪ੍ਫਾਰਿਕਤਾਸਙ੍ਖਾਤਾ ਲੀਨਵੁਤ੍ਤਿਤਾ ਕੋਸਜ੍ਜਂ, ਸਤਿਵੋਸ੍ਸਗ੍ਗਸਙ੍ਖਾਤਂ ਪਮਜ੍ਜਨਂ ਪਮਾਦੋਤਿ ਅਯਂ ਵਿਸੇਸੋਤਿ.
੯੩੧. ਸਗਰੁਵਾਸਨ੍ਤਿ ਸਓਤ੍ਤਪ੍ਪਵਾਸਮਾਹ, ਸਜੇਟ੍ਠਕਵਾਸਨ੍ਤਿ ਸਹਿਰਿਵਾਸਂ. ਅਨਾਦਿਯਨਾ ਅਨਦ੍ਦਾ ਓਵਾਦਅਗ੍ਗਹਣਂ, ਅਚਿਤ੍ਤੀਕਾਰੋਤਿ ਅਤ੍ਥੋ. ਸੁਕ੍ਖਕਟ੍ਠਸ੍ਸ ਵਿਯ ਅਨਲ੍ਲਤਾ, ਅਮੁਦੁਤਾ ਵਾ ਅਨਦ੍ਦਾ. ਅਸੀਲ੍ਯਨ੍ਤਿ ਅਸੁਖਸੀਲਤਾ ਅਮੁਦੁਤਾ ਏਵ.
੯੩੪. ਉਪਾਰਮ੍ਭੋ ਦੋਸਸਮ੍ਪਯੁਤ੍ਤਚਿਤ੍ਤੁਪ੍ਪਾਦੋ ਸਿਯਾ.
੯੩੬. ‘‘ਇਧ ਪਾਸਾਣਂ ਕਰੋਤੀ’’ਤਿਆਦਿਨਾ ਠਪਨਤ੍ਥੇਪਿ ਕਰੋਤਿ-ਸਦ੍ਦੋ ਯੁਜ੍ਜਤੀਤਿ ਆਹ ‘‘ਕਰੋਤੀਤਿ ਠਪੇਤੀ’’ਤਿ. ਏਤ੍ਥ ਚਾਯਂ ਆਵਜ੍ਜਨਾ ਅਕੁਸਲਾਨਂ ਆਸਨ੍ਨਕਾਰਣਤ੍ਤਾ ਖੁਦ੍ਦਕਵਤ੍ਥੂਸੁ ਵੁਤ੍ਤਾਤਿ ਵੇਦਿਤਬ੍ਬਾ, ਤਦਨੁਕੂਲਕਿਚ੍ਚਤ੍ਤਾ ਵਾ.
ਤਿਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
(੪.) ਚਤੁਕ੍ਕਨਿਦ੍ਦੇਸਵਣ੍ਣਨਾ
੯੩੯. ਇਤੀਤਿ ਨਿਦਸ੍ਸਨੇ ਨਿਪਾਤੋਤਿ ਏਵਂ-ਸਦ੍ਦੇਨ ਸਮਾਨਤ੍ਥੋਤਿ ਦਸ੍ਸੇਤਿ. ਭਵਾਭਵਹੇਤੂਤਿਪੀਤਿ ਏਤ੍ਥ ਭਵਨ੍ਤਿ ਜਾਯਨ੍ਤਿ ਏਤੇਨਾਤਿ ਭਵੋ, ਸਪ੍ਪਿਆਦਿਭੇਸਜ੍ਜਂ. ਭਵੋ ਏਵ ਪਣੀਤਤਰੋ ਅਭਿਵੁਦ੍ਧੋ ਅਭਵੋ. ਭਾਵਨਾਰਾਮਤਾਅਰਿਯਵਂਸਪ੍ਪਹੇਯ੍ਯਤ੍ਤਾ ਵਾ ਪੁਰਿਮਤਣ੍ਹਾਤ੍ਤਯਵਜ੍ਜਾ ਸਬ੍ਬਾ ਤਣ੍ਹਾ ‘‘ਭਵਾਭਵਹੇਤੁ ਉਪ੍ਪਜ੍ਜਤੀ’’ਤਿ ਵੁਤ੍ਤਾਤਿ ਵੇਦਿਤਬ੍ਬਾ.
ਏਤਾਯਾਤਿ ਛਨ੍ਦਾਦਿਅਗਤਿਯਾ. ਨ ਗਚ੍ਛਨ੍ਤੀਤਿ ਨ ਪਵਤ੍ਤਨ੍ਤਿ, ਤਂ ਤਂ ਕਿਰਿਯਂ ਨ ਕਰੋਨ੍ਤੀਤਿ ਅਤ੍ਥੋ. ਇਮਿਨਾਤਿ ਛਨ੍ਦਾਦਿਨਾ ਅਗਤਿਗਮਨੇਨ. ਛਨ੍ਦਾਦੀਸੁ ਯੇਨ ਨਿਨ੍ਨੋ, ਤੇਨ ਗਮਨਂ ਯਥਾਨਿਨ੍ਨਗਮਨਂ.
‘‘ਰਾਜਾ’’ਤਿਆਦਿਨਾ ਰਾਜਾਦਿਨਿਮਿਤ੍ਤੋ ਵਿਯ ਊਮਿਆਦਿਨਿਮਿਤ੍ਤੋ ਚਿਤ੍ਤੁਤ੍ਰਾਸੋ ਊਮਿਆਦਿਭਯਂ, ‘‘ਊਮਿਭਯਨ੍ਤਿ ਖੋ, ਭਿਕ੍ਖਵੇ, ਕੋਧੁਪਾਯਾਸਸ੍ਸੇਤਂ ਅਧਿਵਚਨ’’ਨ੍ਤਿਆਦਿਵਚਨਤੋ (ਮ. ਨਿ. ੨.੧੬੨; ਅ. ਨਿ. ੪.੧੨੨; ਇਤਿਵੁ. ੧੦੯) ਕੋਧੁਪਾਯਾਸਓਦਰਿਕਤ੍ਤਪਞ੍ਚਕਾਮਗੁਣਮਾਤੁਗਾਮਾ ਵਾ. ਤਤ੍ਥ ਪਞ੍ਚਕਾਮਗੁਣਮਾਤੁਗਾਮਗ੍ਗਹਣੇਨ ਤਨ੍ਨਿਸ੍ਸਿਤਛਨ੍ਦਰਾਗਗ੍ਗਹਣਂ ਵੇਦਿਤਬ੍ਬਂ, ਓਦਰਿਕਤ੍ਤਞ੍ਚ ਲੋਭੋਵ. ਉਕ੍ਖੇਪਨੀਯਾਦਿਕਮ੍ਮਂ ਵਿਨਯਦਣ੍ਡਂ.
‘‘ਅਥ ਖੋ ਤਿਮ੍ਬਰੁਕੋ ਪਰਿਬ੍ਬਾਜਕੋ ਯੇਨ ਭਗਵਾ…ਪੇ… ਏਤਦਵੋਚ ‘ਕਿਂ ਨੁ ਖੋ, ਭੋ ਗੋਤਮ, ਸਯਂਕਤਂ ਸੁਖਦੁਕ੍ਖ’ਨ੍ਤਿ? ਮਾ ਹੇਵਂ ਤਿਮ੍ਬਰੁਕਾਤਿ ਭਗਵਾ ਅਵੋਚਾ’’ਤਿਆਦਿਨਾ ਨਿਦਾਨਵਗ੍ਗੇ (ਸਂ. ਨਿ. ੨.੧੮) ਆਗਤਤ੍ਤਾ ‘‘ਤਿਮ੍ਬਰੁਕਦਿਟ੍ਠੀ’’ਤਿ ਵੁਤ੍ਤਾ.
ਚਤੁਕ੍ਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
(੫.) ਪਞ੍ਚਕਨਿਦ੍ਦੇਸਵਣ੍ਣਨਾ
੯੪੦. ਆਗਨ੍ਤੁਂ ਪਨ ਨ ਦੇਨ੍ਤੀਤਿ ਆਗਮਨਸ੍ਸ ਪਚ੍ਚਯਾ ਨ ਹੋਨ੍ਤੀਤਿ ਅਤ੍ਥੋ ਦਟ੍ਠਬ੍ਬੋ.
੯੪੧. ਅਵਦੇਹਨਤੋਤਿ ਪੂਰਣੇਨ ਮਂਸੂਪਚਯਹੇਤੁਤਾਯ ਚ ਉਪਚਯਨਤੋ. ਗਿਮ੍ਹਕਾਲੇ ਭੁਞ੍ਜਿਤ੍ਵਾ ਸਯਨ੍ਤਸ੍ਸ ਸੁਖਂ ਹੋਤੀਤਿ ਤਂ ਉਤੁਸੁਖਂ ‘‘ਸੇਯ੍ਯਸੁਖ’’ਨ੍ਤਿ ਵੁਤ੍ਤਂ, ਸਯਨਿਰਿਯਾਪਥਸੁਖਨ੍ਤਿ ਅਤ੍ਥੋ. ਵਤਨ੍ਤਿ ਧੁਤਙ੍ਗਾਨਿ. ਤਪੋਤਿ ਖਨ੍ਧਕਵਤ੍ਤਾਨਿ, ਵੀਰਿਯਂ ਵਾ. ਸੀਲਗ੍ਗਹਣੇਨ ਖਨ੍ਧਕਵਤ੍ਤਮੇਥੁਨਵਿਰਤੀਨਂ ਗਹਿਤਤ੍ਤਾ ਤਪਬ੍ਰਹ੍ਮਚਰਿਯਗ੍ਗਹਣਂ ਨ ਕਤ੍ਤਬ੍ਬਨ੍ਤਿ ਚੇ? ਨ, ਅਞ੍ਞਸੀਲਤੋ ਵਿਸੇਸੇਤ੍ਵਾ ਤਪਬ੍ਰਹ੍ਮਚਰਿਯਾਨਂ ਦੇਵਤ੍ਤਕਾਰਣਤ੍ਤਗ੍ਗਹਣਸ੍ਸ ਦਸ੍ਸਨਤੋ, ਬਾਹਿਰਾਨਞ੍ਚਸ੍ਸ ਵਿਨਿਬਨ੍ਧਸ੍ਸ ਪਵਤ੍ਤਿਦਸ੍ਸਨਤੋ ਵਾ. ਤੇਸਞ੍ਹਿ ਅਵਿਹਿਂਸਾਦਿਗੋਵਤਾਦਿਦੁਕ੍ਕਰਕਾਰਿਕਾਮੇਥੁਨਵਿਰਤਿਯੋ ਯਥਾਕ੍ਕਮਂ ਸੀਲਾਦੀਨਿ, ਤਾਨਿ ਚ ਤੇ ਦੇਵਨਿਕਾਯਂ ਪਣਿਧਾਯ ਚਰਨ੍ਤੀਤਿ. ਅਞ੍ਞਥਾ ਚ ਸਦ੍ਧਾਰੁਚਿਆਦੀਹਿ ‘‘ਯਤੋ ਖੋ ਭੋ ਅਯਂ ਅਤ੍ਤਾ ਰੂਪੀ ਚਾਤੁਮਹਾਭੂਤਿਕੋ ਮਾਤਾਪੇਤ੍ਤਿਕਸਮ੍ਭਵੋ ਕਾਯਸ੍ਸ ਭੇਦਾ ਉਚ੍ਛਿਜ੍ਜਤੀ’’ਤਿਆਦਿਨਾ (ਦੀ. ਨਿ. ੧.੮੫) ਵਿਕਪ੍ਪੇਤ੍ਵਾ.
੯੪੨. ਬ੍ਯਸਨੇਸੁ ਞਾਤਿਭੋਗਰੋਗਬ੍ਯਸਨਗ੍ਗਹਣੇਨ ਤਂਨਿਮਿਤ੍ਤਾ ਸੋਕਾਦਯੋ ਗਹਿਤਾਤਿ ਦਟ੍ਠਬ੍ਬਾ. ਦਸ੍ਸਨਸਵਨੇਸੁ ਪਟਿਕੂਲਤਾ ਦਸ੍ਸਨਸਵਨਪਟਿਕੂਲਤਾ. ਏਤ੍ਥ ਚ ਆਦੀਨਵੇਹਿ ਪਞ੍ਚਹਿ ਤੇਸਂ ਕਾਰਣਭੂਤਾ ਅਕ੍ਖਨ੍ਤਿਯੇਵ ਭਿਨ੍ਦਿਤ੍ਵਾ ਕਥਿਤਾਤਿ ਵੇਦਿਤਬ੍ਬਾ, ਅਕ੍ਖਨ੍ਤਿਮੂਲਕਾ ਵਾ ਅਪ੍ਪਿਯਤਾਦਿਹੇਤੁਭੂਤਾ ਦੁਕ੍ਕਟਦੁਬ੍ਭਾਸਿਤਤਾਦਿਦੋਸਾ.
ਮਿਚ੍ਛਾਜੀਵਨਿਮਿਤ੍ਤਂ ਮਰਣਕਾਲੇ ਉਪ੍ਪਨ੍ਨਭਯਂ ‘‘ਆਜੀਵਕਭਯ’’ਨ੍ਤਿ ਵੁਤ੍ਤਂ. ‘‘ਆਜੀਵਿਕਾਭਯ’’ਨ੍ਤਿ ਪਨ ਪਾਠੇ ਪਚ੍ਚਯਾਨੁਪ੍ਪਤ੍ਤਿਂ ਪਸ੍ਸਤੋ ਆਜੀਵਿਕਨਿਮਿਤ੍ਤੋ ਚਿਤ੍ਤੁਤ੍ਰਾਸੋਤਿ ਅਤ੍ਥੋ ਦਟ੍ਠਬ੍ਬੋ. ਕਿਤ੍ਤਿਸਦ੍ਦੋ ਸਿਲੋਕਨ੍ਤਿ ਤਪ੍ਪਟਿਪਕ੍ਖਾ ਅਸਿਲੋਕਂ ਅਕਿਤ੍ਤਿ. ਤੇਨਾਹ ‘‘ਗਰਹਭਯ’’ਨ੍ਤਿ.
੯੪੩. ਉਪ੍ਪਿਲਾਵਿਤਨ੍ਤਿ ਉਦਗ੍ਗਤਾਸਙ੍ਖਾਤੋ ਅਵੂਪਸਮਭਾਵੋ, ਅਵੂਪਸਮਹੇਤੁਭੂਤੋ ਵਾ ਪੀਤਿਯਾ ਆਕਾਰੋ.
ਪਞ੍ਚਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
(੬.) ਛਕ੍ਕਨਿਦ੍ਦੇਸਵਣ੍ਣਨਾ
੯੪੪. ‘‘ਕੋਧਨੋ ਹੋਤਿ ਉਪਨਾਹੀ’’ਤਿਆਦਿਨਾ ਕੋਧਾਦਿਹੇਤੁਕਾ ਉਪਨਾਹਾਦਯੋ ਕੋਧਾਦੀਨਂ ਸਹਾਯਕਾਰਣਭਾਵੇਨ ਸੁਤ੍ਤਨ੍ਤੇ ਵੁਤ੍ਤਾਤਿ ਕੋਧਾਦਯੋ ਏਵ ਵਿਵਾਦਮੂਲਾਨਿ, ਤੇਨੇਤ੍ਥ ਤੇ ਏਵ ਵੁਤ੍ਤਾ. ਸਨ੍ਦਿਟ੍ਠਿਪਰਾਮਸਿਤਾ ਅਤ੍ਤਨੋ ਦਿਟ੍ਠਿਯਂ ਅਭਿਨਿਵਿਟ੍ਠਤਾ.
੯੪੫. ਅਪ੍ਪਤਿਸ੍ਸਯੋਤਿ ਪਤਿਸ੍ਸਯਭੂਤੇਹਿ ਗਰੂਹਿ ਵਿਰਹਿਤੋ. ਅਪ੍ਪਮਾਦਲਕ੍ਖਣਨ੍ਤਿ ਸਤਿਅਵਿਪ੍ਪਵਾਸਂ ਕੁਸਲਾਨੁਯੋਗਸਾਤਚ੍ਚਂ ਵਾ.
ਯੁਤ੍ਤਪਯੁਤ੍ਤਤਾਤਿ ਤਨ੍ਨਿਨ੍ਨਤਾਵਸੇਨ ਸੁਟ੍ਠੁ ਯੁਤ੍ਤਤਾ. ਗਣਸਙ੍ਗਣਿਕਾ ਕਿਲੇਸਵਸੇਨ ਪਵਤ੍ਤਾ ਸਙ੍ਗਣਿਕਾ. ਇਤ੍ਥਿਪਟਿਸਂਯੁਤ੍ਤਕਥਾਸਵਨੇ ਇਤ੍ਥਿਸਦ੍ਦਸਵਨੇ ਚ ਅਸ੍ਸਾਦੋ ਸਵਨਸਂਸਗ੍ਗੋ. ਇਤ੍ਥਿਯਾ ਕਸ੍ਸਚਿ ਦਾਨਗ੍ਗਹਣਸ੍ਸਾਦੋ ਪਰਿਭੋਗਸਂਸਗ੍ਗੋ.
੯੪੬. ਸੋਮਨਸ੍ਸੇਨ ਸਦ੍ਧਿਂ ਉਪਵਿਚਰਨ੍ਤੀਤਿ ਸੋਮਨਸ੍ਸੁਪਵਿਚਾਰਾਤਿ ਅਕੁਸਲਸੋਮਨਸ੍ਸਸਹਗਤਾ ਰੂਪਵਿਚਾਰਾਦਯੋ ਇਧਾਧਿਪ੍ਪੇਤਾਤਿ ਵੇਦਿਤਬ੍ਬਾ, ਤਥਾ ਉਪੇਕ੍ਖੁਪਵਿਚਾਰਾ ਚ. ਤਂਸਮ੍ਪਯੁਤ੍ਤੋ ਵਾਤਿ ਏਤੇਨ ਵਿਚਾਰਗ੍ਗਹਣੇਨ ਵਿਤਕ੍ਕੋਪਿ ਗਹਿਤੋਤਿ ਵਿਤਕ੍ਕਪ੍ਪਵਤ੍ਤਨੇਨ ‘‘ਉਪਵਿਤਕ੍ਕੇਤੀ’’ਤਿ ਇਦਮ੍ਪਿ ਵੁਤ੍ਤਂ ਹੋਤੀਤਿ ਦਸ੍ਸੇਤਿ.
੯੪੭. ਅਞ੍ਞਾਣਸਮ੍ਪਯੁਤ੍ਤਾਤਿ ਵਿਚਿਕਿਚ੍ਛੁਦ੍ਧਚ੍ਚਸਹਗਤਚਿਤ੍ਤੇਸੁ ਉਪੇਕ੍ਖਾ ਮੋਹੋਤਿ ਵਦਨ੍ਤਿ, ਲੋਭਸਮ੍ਪਯੁਤ੍ਤੁਪੇਕ੍ਖਾਪਿ ਪਨ ਗੇਹਸ੍ਸਿਤਾ ਨ ਨ ਹੋਤਿ.
੯੪੮. ਅਧਿਚ੍ਚਸਮੁਪ੍ਪਨ੍ਨਿਕੋ ‘‘ਅਧਿਚ੍ਚ ਸਮੁਪ੍ਪਨ੍ਨੋ ਅਤ੍ਤਾ ਉਪ੍ਪਨ੍ਨੋ ਭਵਿਸ੍ਸਤੀ’’ਤਿ ਗਣ੍ਹਨ੍ਤੋ ਸਸ੍ਸਤਦਿਟ੍ਠਿਕੋ ਹੋਤੀਤਿ ਏਵਰੂਪਸ੍ਸ ਦਿਟ੍ਠਿ ਵਿਯਾਤਿ ਦਸ੍ਸੇਨ੍ਤੋ ‘‘ਅਧਿਚ੍ਚਸਮੁਪ੍ਪਨ੍ਨਿਕਸ੍ਸੇਵਾ’’ਤਿ ਆਹ. ਨ ਸੋ ਜਾਤੋਤਿ ਏਤ੍ਥ ‘‘ਜਾਤੂ’’ਤਿ ਅਯਂ ਨਿਪਾਤੋ ਉ-ਕਾਰਸ੍ਸ ਓ-ਕਾਰਂ ਕਤ੍ਵਾ ਜਾਤੋਤਿ ਵੁਤ੍ਤੋ, ਤੇਨ ਵਾ ਸਮਾਨਤ੍ਥਂ ਨਿਪਾਤਨ੍ਤਰਂ ਏਤਂ ਦਟ੍ਠਬ੍ਬਂ. ਸਬ੍ਬਾਸਵਦਿਟ੍ਠੀਤਿ ਸਬ੍ਬਾਸਵਪਰਿਯਾਯੇਨ ਆਗਤਾ ਦਿਟ੍ਠਿ.
ਛਕ੍ਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
(੭.) ਸਤ੍ਤਕਨਿਦ੍ਦੇਸਵਣ੍ਣਨਾ
੯੫੧. ਦ੍ਵਾਸਟ੍ਠਿਯਾ ਦਿਟ੍ਠੀਸੁ ਸਤ੍ਤਕਸ੍ਸ ਅਞ੍ਞਸ੍ਸ ਅਭਾਵਾ ਸਤ੍ਤ ਉਚ੍ਛੇਦਵਾਦਾ ਏਵ ਇਧ ਤਥਾ ਅਵਤ੍ਵਾ ‘‘ਸਤ੍ਤ ਦਿਟ੍ਠੀ’’ਤਿ ਵੁਤ੍ਤਾ.
ਸਤ੍ਤਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
(੮.) ਅਟ੍ਠਕਨਿਦ੍ਦੇਸਵਣ੍ਣਨਾ
੯੫੨. ‘‘ਕਮ੍ਮਂ ਖੋ ਮੇ ਕਤ੍ਤਬ੍ਬਂ ਭਵਿਸ੍ਸਤੀ’’ਤਿਆਦਿਨਾ ਓਸੀਦਨਾਕਾਰੇਨ ਪਵਤ੍ਤਚਿਤ੍ਤੁਪ੍ਪਾਦਾ ਕੋਸਜ੍ਜਕਾਰਣਾਨਿ, ਕੋਸਜ੍ਜਮੇਵ ਵਾ ਕੋਸਜ੍ਜਨ੍ਤਰਕਾਰਣਤਾਯ ਕੋਸਜ੍ਜਕਾਰਣਾਨੀਤਿ ਦਟ੍ਠਬ੍ਬਾਨਿ. ਮਾਸਾਚਿਤਂ ਮਞ੍ਞੇਤਿ ਏਤ੍ਥ ਆਚਿਤ-ਸਦ੍ਦੋ ਤਿਨ੍ਤ-ਸਦ੍ਦਸ੍ਸ, ਮਞ੍ਞੇ-ਸਦ੍ਦੋ ਚ ਵਿਯ-ਸਦ੍ਦਸ੍ਸ ਅਤ੍ਥਂ ਵਦਤੀਤਿ ਅਧਿਪ੍ਪਾਯੇਨ ‘‘ਤਿਨ੍ਤਮਾਸੋ ਵਿਯਾ’’ਤਿ ਅਯਮਤ੍ਥੋ ਵਿਭਾਵਿਤੋ, ਮਾਸਚਯੋ ਵਿਯਾਤਿ ਵਾ ਅਤ੍ਥੋ.
੯੫੭. ਫਰਤੀਤਿ ਫੁਸਤਿ, ਘਟ੍ਟੇਤੀਤਿ ਅਤ੍ਥੋ. ਅਞ੍ਞੇਨ ਕਾਰਣੇਨਾਤਿ ‘‘ਅਜ੍ਜ ਤਯਾ ਵਿਕਾਲੇ ਭੁਤ੍ਤਂ, ਤੇਨ ਤ੍ਵਂ ਆਪਤ੍ਤਿਂ ਆਪਨ੍ਨੋਸੀ’’ਤਿ ਵੁਤ੍ਤੋ ‘‘ਹਿਯ੍ਯੋ ਮਯਾ ਕਾਲੇ ਭੁਤ੍ਤਂ, ਤੇਨਾਹਂ ਅਨਾਪਨ੍ਨੋ’’ਤਿਆਦਿਨਾ ਅਞ੍ਞੇਨ ਅਯੁਤ੍ਤੇਨ ਕਾਰਣੇਨ ਅਞ੍ਞਂ ਯੁਤ੍ਤਂ ਕਾਰਣਂ ਪਟਿਚ੍ਛਾਦੇਤੀਤਿ ਅਤ੍ਥੋ. ਪੁਚ੍ਛਿਤਤ੍ਥਤੋ ਬਹਿਦ੍ਧਾ ਯਥਾ ਤਂ ਨ ਅਲ੍ਲੀਯਤਿ, ਤਥਾ ਕਥਾਯ ਅਪਨਯਨਂ ਵਿਕ੍ਖਿਪਨਂ ਬਹਿਦ੍ਧਾ ਅਪਨਾਮਨਾ.
੯੫੮. ਅਸਞ੍ਞੀਵਾਦਾਤਿ ਪੁਗ੍ਗਲੇਹਿ ਦਿਟ੍ਠਿਯੋ ਦਸ੍ਸੇਤਿ. ਯੇਹਿ ਵਾ ਅਭਿਨਿਵੇਸੇਹਿ ਅਸਞ੍ਞੀ ਅਤ੍ਤਾਨਂ ਵਦਨ੍ਤਿ, ਤੇ ਅਸਞ੍ਞੀਵਾਦਾ. ਅਰੂਪਸਮਾਪਤ੍ਤਿਨਿਮਿਤ੍ਤਨ੍ਤਿ ਆਕਾਸਾਦਿਂ.
ਅਟ੍ਠਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
(੯.) ਨਵਕਨਿਦ੍ਦੇਸਵਣ੍ਣਨਾ
੯੬੦. ਦਸਮਸ੍ਸ ਅਵੁਤ੍ਤਤ੍ਤਾ ‘‘ਸਤ੍ਤੇਸੁ ਉਪ੍ਪਤ੍ਤਿਵਸੇਨੇਵ ਕਥਿਤਾਨੀ’’ਤਿ ਵੁਤ੍ਤਂ.
੯੬੩. ਸੁਖਵਿਨਿਚ੍ਛਯਨ੍ਤਿ ਸੇਵਿਤਬ੍ਬਾਸੇਵਿਤਬ੍ਬਸੁਖਸਨ੍ਨਿਟ੍ਠਾਨਨ੍ਤਿ ਅਤ੍ਥੋ. ਅਜ੍ਝਤ੍ਤਂ ਸੁਖਨ੍ਤਿ ਸੇਵਿਤਬ੍ਬਂ ਨੇਕ੍ਖਮ੍ਮਸੁਖਂ. ਵਿਨਿਚ੍ਛਯਾਤਿ ਦ੍ਵੇ ਵਿਨਿਚ੍ਛਯਾਤਿ ਇਦਂ –
‘‘ਸਾਤਂ ਅਸਾਤਨ੍ਤਿ ਯਮਾਹੁ ਲੋਕੇ,
ਤਮੂਪਨਿਸ੍ਸਾਯ ਪਹੋਤਿ ਛਨ੍ਦੋ;
ਰੂਪੇਸੁ ਦਿਸ੍ਵਾ ਵਿਭਵਂ ਭਵਞ੍ਚ,
ਵਿਨਿਚ੍ਛਯਂ ਕੁਬ੍ਬਤਿ ਜਨ੍ਤੁ ਲੋਕੇ’’ਤਿ. (ਸੁ. ਨਿ. ੮੭੩; ਮਹਾਨਿ. ੧੦੨) –
ਏਤਸ੍ਸ ਨਿਦ੍ਦੇਸੇ ਵੁਤ੍ਤਂ.
ਇਧ ਵਿਨਿਚ੍ਛਯੋਤਿ ਵੁਤ੍ਤੋਤਿ ਇਮਿਸ੍ਸਾ ਵਿਭਙ੍ਗਪਾਲ਼ਿਯਾ ਯੋ ਛਨ੍ਦਰਾਗਸ੍ਸ ਪਚ੍ਚਯਸਭਾਵੇਨ ਵਿਨਿਚ੍ਛਯ-ਸਦ੍ਦੇਨ ਵੁਤ੍ਤੋ, ਸਕ੍ਕਪਞ੍ਹੇਪਿ (ਦੀ. ਨਿ. ੨.੩੫੭) ਛਨ੍ਦਸ੍ਸ ਨਿਦਾਨਭਾਵੇਨ ਵਿਤਕ੍ਕ-ਸਦ੍ਦੇਨ ਸੋ ਏਵ ਆਗਤੋਤਿ ਏਵਂ ਵਿਤਕ੍ਕਸ੍ਸ ਵਿਨਿਚ੍ਛਯਭਾਵਂ ਤਸ੍ਸੇਵ ਇਧ ਗਹਿਤਤਞ੍ਚ ਦਸ੍ਸੇਤਿ. ਬਲਵਸਨ੍ਨਿਟ੍ਠਾਨਨ੍ਤਿ ਬਲਵਤਿਯਾ ਤਣ੍ਹਾਯ ਆਰਮ੍ਮਣਸ੍ਸ ਨਿਟ੍ਠਪੇਤ੍ਵਾ ਗਹਣਂ.
੯੬੪. ਸਤਿਪਿ ਅਞ੍ਞੇਸਞ੍ਚ ਸਙ੍ਖਤਭਾਵੇ ਅਹਨ੍ਤਿ ਅਸ੍ਮੀਤਿ ਚ ਸਾਤਿਸਯਾ ਮਾਨਸ੍ਸ ਸਙ੍ਖਤਤਾਤਿ ਕਤ੍ਵਾ ‘‘ਸਙ੍ਖਤ’’ਨ੍ਤਿ ਮਾਨੋ ਵੁਤ੍ਤੋ. ਸੇਯ੍ਯਾਦਿਵਸੇਨ ‘‘ਅਹਮਸ੍ਮੀ’’ਤਿ ਅਤ੍ਤਨੋ ਸਙ੍ਖਰਣਂ ਵਾ ਸਙ੍ਖਤਂ. ਏਤ੍ਥ ‘‘ਭਵਿਸ੍ਸਨ੍ਤੀ’’ਤਿਆਦਿਕਾ ਪਵਤ੍ਤਿ ਤਣ੍ਹਾਦਿਟ੍ਠੀਨਂ ਵਿਸੇਸਵਤੀਤਿ ਤਾਸਮ੍ਪਿ ਇਞ੍ਜਿਤਾਦਿਭਾਵੋ ਵੁਤ੍ਤੋ.
ਨਵਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
(੧੦.) ਦਸਕਨਿਦ੍ਦੇਸਵਣ੍ਣਨਾ
੯੭੦. ਜਾਲਕ੍ਖਿਪਸਂਵਿਧਾਨਾਦਿਕੁਸਲਤਾਸਙ੍ਕਪ੍ਪਨਂ ਉਪਾਯਚਿਨ੍ਤਾ, ਤਸ੍ਸਾ ਮਿਚ੍ਛਾਭਾਵਪਟਿਚ੍ਛਾਦਨਭਾਵੇਨ ਪਵਤ੍ਤੋ ਤਦਾਕਾਰੋ ਮੋਹੋ ਉਪਾਯਚਿਨ੍ਤਾਵਸੇਨ ਉਪ੍ਪਨ੍ਨੋਤਿ ਦਟ੍ਠਬ੍ਬੋ. ਯਥਾਕਤੇ ਪਨ ਪਾਪੇ ਅਨਾਦੀਨਵਦਸ੍ਸਨਵਸੇਨ ਪਵਤ੍ਤਾ ਸਞ੍ਞਾ, ਸਙ੍ਕਪ੍ਪੋ ਵਾ ਪਚ੍ਚਵੇਕ੍ਖਣਾ, ਤਸ੍ਸਾਪਿ ਮਿਚ੍ਛਾਭਾਵਪਟਿਚ੍ਛਾਦਕਂ ਤਦਾਕਾਰਂ, ਅਨਾਦੀਨਵਦਸ੍ਸਨਂ ਵਾ ਪਚ੍ਚਵੇਕ੍ਖਣਾਕਾਰੇਨ ਉਪ੍ਪਨ੍ਨੋ ਮੋਹੋਤਿ. ਵਿਮੁਤ੍ਤਸਞ੍ਞਿਤਾਤਿ ਅਧਿਮਾਨਸਮ੍ਪਯੁਤ੍ਤਂ, ਤਿਤ੍ਥਿਯਾਨਂ ਵਾ ਅਤ੍ਤਨੋ ਦਿਟ੍ਠਿਯਾ ਵਿਮੁਤ੍ਤਤਾਸਞ੍ਜਾਨਨਂ. ‘‘ਵਿਮੁਤ੍ਤੋਮ੍ਹੀ’’ਤਿ ਏਵਂ ਪਵਤ੍ਤੋ ਅਕੁਸਲਚਿਤ੍ਤੁਪ੍ਪਾਦੋ ਮਿਚ੍ਛਾਵਿਮੁਤ੍ਤੀਤਿ ਕੇਚਿ ਵਦਨ੍ਤਿ. ਫਲਂ ਵਿਯ ਵਿਮੁਤ੍ਤਨ੍ਤਿ ਗਹਿਤੇ ਪਨ ਦਿਟ੍ਠਿਸਮ੍ਪਯੁਤ੍ਤਚਿਤ੍ਤੇ ਦਿਟ੍ਠਿ ਮਿਚ੍ਛਾਞਾਣਂ, ਸਮਾਧਿ ਚ ਮਿਚ੍ਛਾਵਿਮੁਤ੍ਤੀਤਿ ਯੁਤ੍ਤਂ ਸਿਯਾ.
ਦਸਕਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
ਤਣ੍ਹਾਵਿਚਰਿਤਨਿਦ੍ਦੇਸਵਣ੍ਣਨਾ
੯੭੩. ਸਮੂਹਗਾਹਤੋਤਿ ਤਣ੍ਹਾਮਾਨਦਿਟ੍ਠੀਨਂ ਸਾਧਾਰਣਗ੍ਗਹਣਤੋਤਿ ਵਦਨ੍ਤਿ. ‘‘ਇਤ੍ਥਂ ਏਵਂ ਅਞ੍ਞਥਾ’’ਤਿ ਪਨ ਵਿਸੇਸਂ ਅਕਤ੍ਵਾ ਗਹਣਂ ਸਮੂਹਗਾਹੋਤਿ ਦਟ੍ਠਬ੍ਬੋ. ਅਞ੍ਞਂ ਆਕਾਰਨ੍ਤਿ ਪਰਸਨ੍ਤਾਨਗਤਂ ਆਕਾਰਂ. ਅਤ੍ਥੀਤਿ ਸਦਾ ਸਂਵਿਜ੍ਜਤੀਤਿ ਅਤ੍ਥੋ. ਸੀਦਤੀਤਿ ਵਿਨਸ੍ਸਤਿ. ਸਂਸਯਪਰਿਵਿਤਕ੍ਕਵਸੇਨਾਤਿ ‘‘ਕਿਂ ਨੁ ਖੋ ਅਹਂ ਸਿਯਂ, ਨ ਸਿਯ’’ਨ੍ਤਿ ਏਵਂ ਪਰਿਵਿਤਕ੍ਕਵਸੇਨ. ਪਤ੍ਥਨਾਕਪ੍ਪਨਵਸੇਨਾਤਿ ‘‘ਅਪਿ ਨਾਮ ਸਾਧੁ ਪਨਾਹਂ ਸਿਯ’’ਨ੍ਤਿ ਏਵਂ ਪਤ੍ਥਨਾਯ ਕਪ੍ਪਨਵਸੇਨ.
ਸੁਦ੍ਧਸੀਸਾਤਿ ਤਣ੍ਹਾਮਾਨਦਿਟ੍ਠੀਨਂ ਸਾਧਾਰਣਸੀਸਾ ਵਿਸੇਸਸ੍ਸ ਅਨਿਸ੍ਸਿਤਤ੍ਤਾ ‘‘ਸੁਦ੍ਧਸੀਸਾ’’ਤਿ ਵੁਤ੍ਤਾ. ਤਤ੍ਥ ਦਿਟ੍ਠਿਸੀਸੇਹਿ ਦਿਟ੍ਠਿਯਾ ਤਣ੍ਹਾ ਦਸ੍ਸਿਤਾ, ਸੀਸਸੀਸਮੂਲਕੇਹਿ ਮਾਨਦਿਟ੍ਠੀਹਿ ਸਯਮੇਵ ਚਾਤਿ ਆਹ ‘‘ਏਵਮੇਤੇ…ਪੇ… ਤਣ੍ਹਾ ਵਿਚਰਿਤਧਮ੍ਮਾ ਵੇਦਿਤਬ੍ਬਾ’’ਤਿ. ਦਿਟ੍ਠਿਮਾਨੇਸੁਪਿ ‘‘ਤਣ੍ਹਾਵਿਚਰਿਤਾਨੀ’’ਤਿ ਵਚਨਞ੍ਚ ਅਞ੍ਞਮਞ੍ਞਂ ਵਿਪ੍ਪਯੋਗੀਨਂ ਦਿਟ੍ਠਿਮਾਨਾਨਂ ਤਣ੍ਹਾਯ ਅਵਿਪ੍ਪਯੋਗੀਨਂ ਤਂਮੂਲਕਤ੍ਤਾਵ ਤਪ੍ਪਧਾਨਤਾਯ ਕਤਨ੍ਤਿ ਵੇਦਿਤਬ੍ਬਂ.
੯੭੪. ਅਵਕ੍ਕਰੀਤਿ ਨਿਪਾਤੋ ਨਾਨਾਭਾਵੇ ਵਤ੍ਤਤੀਤਿ ਅਨਾਨਾਕਰਣਂ ਅਨਵਕ੍ਕਰਿ, ਤਂ ਕਤ੍ਵਾ, ਅਵਕ੍ਕਰਿ ਵਾ ਅਕਤ੍ਵਾ ਅਨਵਕ੍ਕਰਿ ਕਤ੍ਵਾਤਿ ਏਵਂ ਦਸ੍ਸੇਨ੍ਤੋ ਆਹ ‘‘ਅਵਿਨਿਬ੍ਭੋਗਂ ਕਤ੍ਵਾ’’ਤਿ. ‘‘ਅਨਵਕਾਰਿਂ ਕਰਿਤ੍ਵਾ’’ਤਿ ਵਾ ਪਾਠੋ, ਤਤ੍ਥ ਅਵਕਿਰਣਂ ਵਿਕ੍ਖੇਪਨਂ ਸਮੂਹਸ੍ਸ ਏਕਦੇਸਾਨਂ ਵਿਨਿਬ੍ਭੁਜ੍ਜਨਂ ਅਵਕਾਰਿ, ਤਂ ਅਵਕਾਰਿਂ ਵਿਨਿਬ੍ਭੋਗਂ ਅਕਤ੍ਵਾ, ਪਞ੍ਚਪਿ ਖਨ੍ਧੇ ਸਮੂਹਤੋ ਏਕਤ੍ਤੇਨੇਵ ਗਹੇਤ੍ਵਾ ਅਤ੍ਤਤੋ ਅਵਿਨਿਬ੍ਭੁਜ੍ਜਿਤ੍ਵਾ ਅਸ੍ਮੀਤਿ ਛਨ੍ਦਮਾਨਦਿਟ੍ਠਿਯੋ ਪਟਿਲਭਤੀਤਿ ਅਤ੍ਥੋ. ਅਸਿਤਬ੍ਯਾਭਙ੍ਗਿਤਾਯਾਤਿ ਦਾਤ੍ਤੇਨ ਕਾਜੇਨ ਚਾਤਿ ਏਤੇਨ ਪਰਿਕ੍ਖਾਰੇਨ, ਅਸਿਤਬ੍ਯਾਭਙ੍ਗੀਹਿ ਲਵਨਵਹਨਕਿਰਿਯਾ ਵਾ ‘‘ਅਸਿਤਬ੍ਯਾਭਙ੍ਗੀ’’ਤਿ ਵੁਤ੍ਤਾ.
੯੭੬. ਅਵਕਾਰਿਂ ਕਰਿਤ੍ਵਾਤਿ ਰੂਪਾਦੀਨਿ ਅਤ੍ਤਤੋ ਵਿਨਿਬ੍ਭੁਜ੍ਜਿਤ੍ਵਾ ਇਮਿਨਾ ਰੂਪੇਨ…ਪੇ… ਇਮਿਨਾ ਵਿਞ੍ਞਾਣੇਨ ਅਸ੍ਮੀਤਿ ਛਨ੍ਦਂ ਪਟਿਲਭਤੀਤਿ ਏਵਂ ਸਬ੍ਬਤ੍ਥ ਇਮਿਨਾਤਿ ਏਤਸ੍ਸ ਅਤ੍ਤਤੋ ਅਵਿਨਿਬ੍ਭੁਤ੍ਤੇਨ ਰੂਪਾਦਿਨਾਤਿ ਅਤ੍ਥੋ ਦਟ੍ਠਬ੍ਬੋ. ਅਤ੍ਤਤੋ ਹਿ ਅਵਿਨਿਬ੍ਭੁਤ੍ਤਾਨਿ ਅਬਹਿਕਤਾਨਿ ਅਹਮਿਚ੍ਚੇਵ ਗਹਿਤਾਨਿ ਰੂਪਾਦੀਨਿ ਉਪਾਦਾਯ ਉਪਗਨ੍ਤ੍ਵਾ ਪਵਤ੍ਤਾ ਤਣ੍ਹਾ ‘‘ਅਜ੍ਝਤ੍ਤਿਕਸ੍ਸ ਉਪਾਦਾਯਾ’’ਤਿ ਵੁਤ੍ਤਾ, ਅਤ੍ਤਤੋ ਚ ਵਿਨਿਬ੍ਭੁਤ੍ਤਾਨਿ ਬਹਿਕਤਾਨਿ ਉਪਗਨ੍ਤ੍ਵਾ ਪਵਤ੍ਤਾ ‘‘ਬਾਹਿਰਸ੍ਸ ਉਪਾਦਾਯਾ’’ਤਿ. ਖਗ੍ਗੇਨ ਵਾ ਛਤ੍ਤੇਨ ਵਾ ਅਹਂ ਨਿਚ੍ਚੋਤਿ ਅਭਿਮਙ੍ਗਲਸਮ੍ਮਤੇਨ ਖਗ੍ਗਾਦਿਨਾ ਮਮ ਵਿਨਾਸੋ ਨਤ੍ਥੀਤਿ ਮਞ੍ਞਤੀਤਿ ਅਤ੍ਥੋ. ਏਕੇਕਸ੍ਸਾਤਿ ਇਦਂ ਅਨਾਦਿਮ੍ਹਿ ਅਨਨ੍ਤੇ ਚ ਸਂਸਾਰੇ ਏਕੇਕਸ੍ਸ ਅਤੀਤਾਨਾਗਤੇਸੁ ਛਤ੍ਤਿਂਸਾਯਪਿ ਸਮ੍ਭਵਦਸ੍ਸਨਤ੍ਥਂ ਵੁਤ੍ਤਂ, ਏਕੇਕਸ੍ਸ ਵਾ ਪੁਗ੍ਗਲਸ੍ਸ ਯਥਾਲਾਭਵਸੇਨਾਤਿ ਇਦਮ੍ਪਿ ਅਨਿਸ੍ਸਿਤਤਣ੍ਹਾਮਾਨਦਿਟ੍ਠਿਂ ਕਤ੍ਵਾ ਪੁਥੁਜ੍ਜਨਸ੍ਸ ਅਦ੍ਧਾਪਚ੍ਚੁਪ੍ਪਨ੍ਨੇ ਕਸ੍ਸਚਿ ਸਮ੍ਭਵਦਸ੍ਸਨਤ੍ਥਂ.
ਤਣ੍ਹਾਵਿਚਰਿਤਨਿਦ੍ਦੇਸਵਣ੍ਣਨਾ ਨਿਟ੍ਠਿਤਾ.
ਖੁਦ੍ਦਕਵਤ੍ਥੁਵਿਭਙ੍ਗਵਣ੍ਣਨਾ ਨਿਟ੍ਠਿਤਾ.