੪. ਮਹਾਵਗ੍ਗੋ
੧. ਅਨੁਪੁਬ੍ਬਵਿਹਾਰਸੁਤ੍ਤਵਣ੍ਣਨਾ
੩੨. ਚਤੁਤ੍ਥਸ੍ਸ ਪਠਮੇ ਅਨੁਪੁਬ੍ਬਤੋ ਵਿਹਰਿਤਬ੍ਬਾਤਿ ਅਨੁਪੁਬ੍ਬਵਿਹਾਰਾ. ਅਨੁਪਟਿਪਾਟਿਯਾਤਿ ਅਨੁਕ੍ਕਮੇਨ. ਸਮਾਪਜ੍ਜਿਤਬ੍ਬਵਿਹਾਰਾਤਿ ਸਮਾਪਜ੍ਜਿਤ੍ਵਾ ਸਮਙ੍ਗਿਨੋ ਹੁਤ੍ਵਾ ਵਿਹਰਿਤਬ੍ਬਵਿਹਾਰਾ.
ਅਨੁਪੁਬ੍ਬਵਿਹਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੨-੩. ਅਨੁਪੁਬ੍ਬਵਿਹਾਰਸਮਾਪਤ੍ਤਿਸੁਤ੍ਤਾਦਿਵਣ੍ਣਨਾ
੩੩-੩੪. ਦੁਤਿਯੇ ਛਾਤਂ ਵੁਚ੍ਚਤਿ ਤਣ੍ਹਾਦਿਟ੍ਠਿਯੋ ਕਾਮਾਨਂ ਪਾਤਬ੍ਬਤੋ ਤਾਸਂ ਵਸੇਨ ਵਤ੍ਤਨਤੋ, ਤਨ੍ਨਿਨ੍ਨਤ੍ਤਾ ਨਤ੍ਥਿ ਏਤੇਸੁ ਛਾਤਨ੍ਤਿ ਨਿਚ੍ਛਾਤਾ. ਤੇਨਾਹ ‘‘ਤਣ੍ਹਾਦਿਟ੍ਠਿਚ੍ਛਾਤਾਨ’’ਨ੍ਤਿਆਦਿ. ਤਤਿਯੇ ਨਤ੍ਥਿ ਵਤ੍ਤਬ੍ਬਂ.
ਅਨੁਪੁਬ੍ਬਵਿਹਾਰਸਮਾਪਤ੍ਤਿਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੪. ਗਾਵੀਉਪਮਾਸੁਤ੍ਤਵਣ੍ਣਨਾ
੩੫. ਚਤੁਤ੍ਥੇ ਪਬ੍ਬਤਚਾਰਿਨੀਤਿ ਪਕਤਿਯਾ ਪਬ੍ਬਤੇ ਬਹੁਲਚਾਰਿਨੀ. ਅਖੇਤ੍ਤਞ੍ਞੂਤਿ (ਵਿਸੁਦ੍ਧਿ. ਮਹਾਟੀ. ੧.੭੭) ਅਗੋਚਰਞ੍ਞੂ. ਸਮਾਧਿਪਰਿਪਨ੍ਤਾਨਂ ਵਿਸੋਧਨਾਨਭਿਞ੍ਞਤਾਯ ਬਾਲੋ. ਝਾਨਸ੍ਸ ਪਗੁਣਭਾਵਾਪਾਦਨਵੇਯ੍ਯਤ੍ਤਿਯਸ੍ਸ ਅਭਾਵੇਨ ਅਬ੍ਯਤ੍ਤੋ. ਉਪਰਿਝਾਨਸ੍ਸ ਪਦਟ੍ਠਾਨਭਾਵਾਨਵਬੋਧੇਨ ਅਖੇਤ੍ਤਞ੍ਞੂ. ਸਬ੍ਬਥਾਪਿ ਸਮਾਪਤ੍ਤਿਕੋਸਲ੍ਲਾਭਾਵੇਨ ਅਕੁਸਲੋ. ਸਮਾਧਿਨਿਮਿਤ੍ਤਸ੍ਸ ਵਾ ਅਨਾਸੇਵਨਾਯ ਬਾਲੋ. ਅਭਾਵਨਾਯ ਅਬ੍ਯਤ੍ਤੋ. ਅਬਹੁਲੀਕਾਰੇਨ ਅਖੇਤ੍ਤਞ੍ਞੂ. ਸਮ੍ਮਦੇਵ ਅਨਧਿਟ੍ਠਾਨਤੋ ਅਕੁਸਲੋਤਿ ਯੋਜੇਤਬ੍ਬਂ. ਉਭਤੋ ਭਟ੍ਠੋਤਿ ਉਭਯਤੋ ਝਾਨਤੋ ਭਟ੍ਠੋ. ਸੋ ਹਿ ਅਪ੍ਪਗੁਣਤਾਯ ਨ ਸੁਪ੍ਪਤਿਟ੍ਠਿਤਤਾਯ ਸਉਸ੍ਸਾਹੋਪਿ ਵਿਨਾਸਤੋ ਅਸਾਮਤ੍ਥਿਯਤੋ ਚ ਝਾਨਦ੍ਵਯਤੋ ਪਰਿਹੀਨੋ.
ਗਾਵੀਉਪਮਾਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਝਾਨਸੁਤ੍ਤਵਣ੍ਣਨਾ
੩੬. ਪਞ੍ਚਮੇ ਅਨਿਚ੍ਚਤੋਤਿ ਇਮਿਨਾ ਨਿਚ੍ਚਪ੍ਪਟਿਕ੍ਖੇਪਤੋ ਤੇਸਂ ਅਨਿਚ੍ਚਤਮਾਹ. ਤਤੋ ਏਵ ਉਦਯਵਯਵਨ੍ਤਤੋ ਵਿਪਰਿਣਾਮਤੋ ਤਾਵਕਾਲਿਕਤੋ ਚ ਤੇ ਅਨਿਚ੍ਚਾਤਿ ਜੋਤਿਤਂ ਹੋਤਿ. ਯਞ੍ਹਿ ਨਿਚ੍ਚਂ ਨ ਹੋਤਿ, ਤਂ ਉਦਯਵਯਪਰਿਚ੍ਛਿਨ੍ਨਜਰਾਯ ਮਰਣੇਨ ਚਾਤਿ ਦ੍ਵੇਧਾ ਵਿਪਰਿਣਤਂ ਇਤ੍ਤਰਕ੍ਖਣਮੇਵ ਚ ਹੋਤਿ. ਦੁਕ੍ਖਤੋਤਿ ਨ ਸੁਖਤੋ. ਇਮਿਨਾ ਸੁਖਪ੍ਪਟਿਕ੍ਖੇਪਤੋ ਤੇਸਂ ਦੁਕ੍ਖਤਮਾਹ. ਤਤੋ ਏਵ ਚ ਅਭਿਣ੍ਹਪ੍ਪਟਿਪੀਲ਼ਨਤੋ ਦੁਕ੍ਖਵਤ੍ਥੁਤੋ ਚ ਤੇ ਦੁਕ੍ਖਾਤਿ ਜੋਤਿਤਂ ਹੋਤਿ. ਉਦਯਵਯਵਨ੍ਤਤਾਯ ਹਿ ਤੇ ਅਭਿਣ੍ਹਪ੍ਪਟਿਪੀਲ਼ਨਤੋ ਨਿਰਨ੍ਤਰਦੁਕ੍ਖਤਾਯ ਦੁਕ੍ਖਸ੍ਸੇਵ ਚ ਅਧਿਟ੍ਠਾਨਭੂਤੋ. ਪਚ੍ਚਯਯਾਪਨੀਯਤਾਯ ਰੋਗਮੂਲਤਾਯ ਚ ਰੋਗਤੋ. ਦੁਕ੍ਖਤਾਸੂਲਯੋਗਤੋ ਕਿਲੇਸਾਸੁਚਿਪਗ੍ਘਰਤੋ ਉਪ੍ਪਾਦਜਰਾਭਙ੍ਗੇਹਿ ਉਦ੍ਧੁਮਾਤਪਕ੍ਕਭਿਜ੍ਜਨਤੋ ਚ ਗਣ੍ਡਤੋ. ਪੀਲ਼ਾਜਨਨਤੋ ਅਨ੍ਤੋਤੁਦਨਤੋ ਦੁਨ੍ਨੀਹਰਣਤੋ ਚ ਸਲ੍ਲਤੋ. ਅਵਡ੍ਢਿਆਵਹਨਤੋ ਅਘਵਤ੍ਥੁਤੋ ਚ ਅਘਤੋ. ਅਸੇਰਿਭਾਵਜਨਨਤੋ ਆਬਾਧਪ੍ਪਤਿਟ੍ਠਾਨਤਾਯ ਚ ਆਬਾਧਤੋ. ਅਵਸਵਤ੍ਤਨਤੋ ਅਵਿਧੇਯ੍ਯਤਾਯ ਚ ਪਰਤੋ. ਬ੍ਯਾਧਿਜਰਾਮਰਣੇਹਿ ਪਲੁਜ੍ਜਨੀਯਤਾਯ ਪਲੋਕਤੋ. ਸਾਮਿਨਿਵਾਸੀਕਾਰਕਵੇਦਕਅਧਿਟ੍ਠਾਯਕਵਿਰਹਤੋ ਸੁਞ੍ਞਤੋ. ਅਤ੍ਤਪ੍ਪਟਿਕ੍ਖੇਪਟ੍ਠੇਨ ਅਨਤ੍ਤਤੋ. ਰੂਪਾਦਿਧਮ੍ਮਾਪਿ ਯਥਾ ਨ ਏਤ੍ਥ ਅਤ੍ਤਾ ਅਤ੍ਥੀਤਿ ਅਨਤ੍ਤਾ, ਏਵਂ ਸਯਮ੍ਪਿ ਅਤ੍ਤਾ ਨ ਹੋਨ੍ਤੀਤਿ ਅਨਤ੍ਤਾ. ਤੇਨ ਅਬ੍ਯਾਪਾਰਤੋ ਨਿਰੀਹਤੋ ਤੁਚ੍ਛਤੋ ਅਨਤ੍ਤਾਤਿ ਦੀਪਿਤਂ ਹੋਤਿ.
ਲਕ੍ਖਣਤ੍ਤਯਮੇਵ ਸੁਖਾਵਬੋਧਨਤ੍ਥਂ ਏਕਾਦਸਹਿ ਪਦੇਹਿ ਵਿਭਜਿਤ੍ਵਾ ਗਹਿਤਨ੍ਤਿ ਦਸ੍ਸੇਤੁਂ ‘‘ਯਸ੍ਮਾ ਅਨਿਚ੍ਚਤੋ’’ਤਿਆਦਿ ਵੁਤ੍ਤਂ. ਅਨ੍ਤੋਸਮਾਪਤ੍ਤਿਯਨ੍ਤਿ ਸਮਾਪਤ੍ਤੀਨਂ ਸਹਜਾਤਤਾਯ ਸਮਾਪਤ੍ਤੀਨਂ ਅਬ੍ਭਨ੍ਤਰੇ ਚਿਤ੍ਤਂ ਪਟਿਸਂਹਰਤੀਤਿ ਤਪ੍ਪਟਿਬਦ੍ਧਛਨ੍ਦਰਾਗਾਦਿਕਿਲੇਸਵਿਕ੍ਖਮ੍ਭਨੇਨ ਵਿਪਸ੍ਸਨਾਚਿਤ੍ਤਂ ਪਟਿਸਂਹਰਤਿ. ਤੇਨਾਹ ‘‘ਮੋਚੇਤਿ ਅਪਨੇਤੀ’’ਤਿ. ਸਵਨਵਸੇਨਾਤਿ ‘‘ਸਬ੍ਬਸਙ੍ਖਾਰਸਮਥੋ’’ਤਿਆਦਿਨਾ ਸਵਨਵਸੇਨ. ਥੁਤਿਵਸੇਨਾਤਿ ਤਥੇਵ ਥੋਮਨਾਵਸੇਨ ਗੁਣਤੋ ਸਂਕਿਤ੍ਤਨਵਸੇਨ. ਪਰਿਯਤ੍ਤਿਵਸੇਨਾਤਿ ਤਸ੍ਸ ਧਮ੍ਮਸ੍ਸ ਪਰਿਯਾਪੁਣਨਵਸੇਨ. ਪਞ੍ਞਤ੍ਤਿਵਸੇਨਾਤਿ ਤਦਤ੍ਥਸ੍ਸ ਪਞ੍ਞਾਪਨਵਸੇਨ. ਆਰਮ੍ਮਣਕਰਣਵਸੇਨੇਵ ਉਪਸਂਹਰਤਿ ਮਗ੍ਗਚਿਤ੍ਤਂ, ‘‘ਏਤਂ ਸਨ੍ਤ’’ਨ੍ਤਿਆਦਿ ਪਨ ਅਵਧਾਰਣਨਿਵਤ੍ਤਿਤਤ੍ਥਦਸ੍ਸਨਂ. ਯਥਾ ਵਿਪਸ੍ਸਨਾ ‘‘ਏਤਂ ਸਨ੍ਤਂ ਏਤਂ ਪਣੀਤ’’ਨ੍ਤਿਆਦਿਨਾ ਅਸਙ੍ਖਤਾਯ ਧਾਤੁਯਾ ਚਿਤ੍ਤਂ ਉਪਸਂਹਰਤਿ, ਏਵਂ ਮਗ੍ਗੋ ਨਿਬ੍ਬਾਨਂ ਸਚ੍ਛਿਕਿਰਿਯਾਭਿਸਮਯਵਸੇਨ ਅਭਿਸਮੇਨ੍ਤੋ ਤਤ੍ਥ ਲਬ੍ਭਮਾਨੇ ਸਬ੍ਬੇਪਿ ਵਿਸੇਸੇ ਅਸਮ੍ਮੋਹਤੋ ਪਟਿਵਿਜ੍ਝਨ੍ਤੋ ਤਤ੍ਥ ਚਿਤ੍ਤਂ ਉਪਸਂਹਰਤਿ. ਤੇਨਾਹ ‘‘ਇਮਿਨਾ ਪਨ ਆਕਾਰੇਨਾ’’ਤਿਆਦਿ.
ਸੋ ਤਤ੍ਥ ਠਿਤੋਤਿ ਸੋ ਅਦਨ੍ਧਵਿਪਸ੍ਸਕੋ ਯੋਗੀ ਤਤ੍ਥ ਤਾਯ ਅਨਿਚ੍ਚਾਦਿਲਕ੍ਖਣਤ੍ਤਯਾਰਮ੍ਮਣਾਯ ਵਿਪਸ੍ਸਨਾਯ ਠਿਤੋ. ਸਬ੍ਬਸੋਤਿ ਸਬ੍ਬਤ੍ਥ ਤਸ੍ਸ ਤਸ੍ਸ ਮਗ੍ਗਸ੍ਸ ਅਧਿਗਮਾਯ ਨਿਬ੍ਬਤ੍ਤਿਤਸਮਥਵਿਪਸ੍ਸਨਾਸੁ. ਅਸਕ੍ਕੋਨ੍ਤੋ ਅਨਾਗਾਮੀ ਹੋਤੀਤਿ ਹੇਟ੍ਠਿਮਮਗ੍ਗਾਵਹਾਸੁ ਏਵ ਸਮਥਵਿਪਸ੍ਸਨਾਯ ਛਨ੍ਦਰਾਗਂ ਪਹਾਯ ਅਗ੍ਗਮਗ੍ਗਾਵਹਾਸੁ ਨਿਕਨ੍ਤਿਂ ਪਰਿਯਾਦਾਤੁਂ ਅਸਕ੍ਕੋਨ੍ਤੋ ਅਨਾਗਾਮਿਤਾਯਮੇਵ ਸਣ੍ਠਾਤਿ.
ਸਮਤਿਕ੍ਕਨ੍ਤਤ੍ਤਾਤਿ ਸਮਥਵਸੇਨ ਵਿਪਸ੍ਸਨਾਵਸੇਨ ਚਾਤਿ ਸਬ੍ਬਥਾਪਿ ਰੂਪਸ੍ਸ ਸਮਤਿਕ੍ਕਨ੍ਤਤ੍ਤਾ. ਤੇਨਾਹ ‘‘ਅਯਂ ਹੀ’’ਤਿਆਦਿ. ਅਨੇਨਾਤਿ ਯੋਗਿਨਾ. ਤਂ ਅਤਿਕ੍ਕਮ੍ਮਾਤਿ ਇਦਂ ਯੋ ਪਠਮਂ ਪਞ੍ਚਵੋਕਾਰਏਕਵੋਕਾਰਪਰਿਯਾਪਨ੍ਨੇ ਧਮ੍ਮੇ ਸਮ੍ਮਦੇਵ ਸਮ੍ਮਸਿਤ੍ਵਾ ਤੇ ਵਿਸ੍ਸਜ੍ਜੇਤ੍ਵਾ ਤਤੋ ਅਰੂਪਸਮਾਪਤ੍ਤਿਂ ਸਮਾਪਜ੍ਜਿਤ੍ਵਾ ਅਰੂਪਧਮ੍ਮੇ ਸਮ੍ਮਸਤਿ, ਤਂ ਸਨ੍ਧਾਯ ਵੁਤ੍ਤਂ. ਤੇਨਾਹ ‘‘ਇਦਾਨਿ ਅਰੂਪਂ ਸਮ੍ਮਸਤੀ’’ਤਿ.
ਝਾਨਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬. ਆਨਨ੍ਦਸੁਤ੍ਤਵਣ੍ਣਨਾ
੩੭. ਛਟ੍ਠੇ ਓਕਾਸਂ ਅਵਸਰਂ ਅਧਿਗਚ੍ਛਤਿ ਏਤੇਨਾਤਿ ਓਕਾਸਾਧਿਗਮੋ, ਮਗ੍ਗਫਲਸੁਖਾਧਿਗਮਾਯ ਓਕਾਸਭਾਵਤੋ ਵਾ ਓਕਾਸੋ, ਤਸ੍ਸ ਅਧਿਗਮੋ ਓਕਾਸਾਧਿਗਮੋ. ਏਤ੍ਥ ਚ ਦੀਘਨਿਕਾਯੇਨੇਵ (ਦੀ. ਨਿ. ੨.੨੮੮) ਪਨ ਸੁਤ੍ਤਨ੍ਤਦੇਸਨਾਯਂ ਪਠਮਜ੍ਝਾਨਂ, ਚਤੁਤ੍ਥਜ੍ਝਾਨਂ, ਅਰਹਤ੍ਤਮਗ੍ਗੋਤਿ ਤਯੋ ਓਕਾਸਾਧਿਗਮਾ ਆਗਤਾ. ਤਤ੍ਥ (ਦੀ. ਨਿ. ਅਟ੍ਠ. ੨.੨੮੮) ਪਠਮਂ ਝਾਨਂ ਪਞ੍ਚ ਨੀਵਰਣਾਨਿ ਵਿਕ੍ਖਮ੍ਭੇਤ੍ਵਾ ਅਤ੍ਤਨੋ ਓਕਾਸਂ ਗਹੇਤ੍ਵਾ ਤਿਟ੍ਠਤੀਤਿ ‘‘ਪਠਮੋ ਓਕਾਸਾਧਿਗਮੋ’’ਤਿ ਵੁਤ੍ਤਂ. ਚਤੁਤ੍ਥਜ੍ਝਾਨਂ ਪਨ ਸੁਖਦੁਕ੍ਖਂ ਵਿਕ੍ਖਮ੍ਭੇਤ੍ਵਾ ਅਤ੍ਤਨੋ ਓਕਾਸਂ ਗਹੇਤ੍ਵਾ ਤਿਟ੍ਠਤੀਤਿ ਦੁਤਿਯੋ ਓਕਾਸਾਧਿਗਮੋ. ਅਰਹਤ੍ਤਮਗ੍ਗੋ ਸਬ੍ਬਕਿਲੇਸੇ ਵਿਕ੍ਖਮ੍ਭੇਤ੍ਵਾ ਅਤ੍ਤਨੋ ਓਕਾਸਂ ਗਹੇਤ੍ਵਾ ਤਿਟ੍ਠਤੀਤਿ ‘‘ਤਤਿਯੋ ਓਕਾਸਾਧਿਗਮੋ’’ਤਿ ਵੁਤ੍ਤੋ. ਇਧ ਪਨ ਵਕ੍ਖਮਾਨਾਨਿ ਤੀਣਿ ਅਰੂਪਜ੍ਝਾਨਾਨਿ ਸਨ੍ਧਾਯ ‘‘ਓਕਾਸਾਧਿਗਮੋ’’ਤਿ ਵੁਤ੍ਤਂ. ਤੇਸਂਯੇਵ ਚ ਗਹਣੇ ਕਾਰਣਂ ਸਯਮੇਵ ਵਕ੍ਖਤਿ.
ਸਤ੍ਤਾਨਂ ਵਿਸੁਦ੍ਧਿਂ ਪਾਪਨਤ੍ਥਾਯਾਤਿ ਰਾਗਾਦੀਹਿ ਮਲੇਹਿ ਅਭਿਜ੍ਝਾਵਿਸਮਲੋਭਾਦੀਹਿ ਚ ਉਪਕ੍ਕਿਲੇਸੇਹਿ ਕਿਲਿਟ੍ਠਚਿਤ੍ਤਾਨਂ ਸਤ੍ਤਾਨਂ ਵਿਸੁਦ੍ਧਿਪਾਪਨਤ੍ਥਾਯ ਸਮਤਿਕ੍ਕਮਨਤ੍ਥਾਯ. ਆਯਤਿਂ ਅਨੁਪ੍ਪਜ੍ਜਨਞ੍ਹਿ ਇਧ ‘‘ਸਮਤਿਕ੍ਕਮੋ’’ਤਿ ਵੁਤ੍ਤਂ. ਅਤ੍ਥਂ ਗਮਨਤ੍ਥਾਯਾਤਿ ਕਾਯਿਕਦੁਕ੍ਖਸ੍ਸ ਚ ਚੇਤਸਿਕਦੋਮਨਸ੍ਸਸ੍ਸ ਚਾਤਿ ਇਮੇਸਂ ਦ੍ਵਿਨ੍ਨਂ ਅਤ੍ਥਙ੍ਗਮਾਯ, ਨਿਰੋਧਾਯਾਤਿ ਅਤ੍ਥੋ. ਞਾਯਤਿ ਨਿਚ੍ਛਯੇਨ ਕਮਤਿ ਨਿਬ੍ਬਾਨਂ, ਤਂ ਵਾ ਞਾਯਤਿ ਪਟਿਵਿਜ੍ਝੀਯਤਿ ਏਤੇਨਾਤਿ ਞਾਯੋ, ਸਮੁਚ੍ਛੇਦਭਾਵੋ ਅਰਿਯਮਗ੍ਗੋਤਿ ਆਹ ‘‘ਸਹਵਿਪਸ੍ਸਨਕਸ੍ਸ ਮਗ੍ਗਸ੍ਸਾ’’ਤਿ. ਪਚ੍ਚਕ੍ਖਕਰਣਤ੍ਥਾਯਾਤਿ ਅਤ੍ਤਪਚ੍ਚਕ੍ਖਤਾਯ. ਪਰਪਚ੍ਚਯੇਨ ਵਿਨਾ ਪਚ੍ਚਕ੍ਖਕਰਣਞ੍ਹਿ ‘‘ਸਚ੍ਛਿਕਿਰਿਯਾ’’ਤਿ ਵੁਚ੍ਚਤਿ. ਅਸਮ੍ਭਿਨ੍ਨਨ੍ਤਿ ਪਿਤ੍ਤਸੇਮ੍ਹਾਦੀਹਿ ਅਪਲਿਬੁਦ੍ਧਂ ਅਨੁਪਹਤਂ.
ਰਾਗਾਨੁਗਤੋ ਸਮਾਧਿ ਅਭਿਨਤੋ ਨਾਮ ਹੋਤਿ ਆਰਮ੍ਮਣੇ ਅਭਿਮੁਖਾਭਾਵੇਨ ਪਵਤ੍ਤਿਯਾ, ਦੋਸਾਨੁਗਤੋ ਪਨ ਅਪਨਤੋ ਅਪਗਮਨਵਸੇਨ ਪਵਤ੍ਤਿਯਾ, ਤਦੁਭਯਪ੍ਪਟਿਕ੍ਖੇਪੇਨ ‘‘ਨ ਚਾਭਿਨਤੋ ਨ ਚਾਪਨਤੋ’’ਤਿ ਵੁਤ੍ਤਨ੍ਤਿ ਆਹ ‘‘ਰਾਗਵਸੇਨਾ’’ਤਿਆਦਿ. ਨ ਸਸਙ੍ਖਾਰਨਿਗ੍ਗਯ੍ਹਵਾਰਿਤਗਤੋਤਿ ਲੋਕਿਯਜ੍ਝਾਨਚਿਤ੍ਤਾਨਿ ਵਿਯ ਨ ਸਸਙ੍ਖਾਰੇਨ ਸਪ੍ਪਯੋਗੇਨ ਤਦਙ੍ਗਪ੍ਪਹਾਨਵਿਕ੍ਖਮ੍ਭਨਪ੍ਪਹਾਨਵਸੇਨ ਚ ਨਿਗ੍ਗਹੇਤ੍ਵਾ ਵਾਰੇਤ੍ਵਾ ਠਿਤੋ. ਕਿਞ੍ਚਰਹਿ ਕਿਲੇਸਾਨਂ ਛਿਨ੍ਨਨ੍ਤੇ ਉਪ੍ਪਨ੍ਨੋ. ਤਥਾਭੂਤਂ ਫਲਸਮਾਧਿਂ ਸਨ੍ਧਾਯੇਤਂ ਵੁਤ੍ਤਂ. ਤੇਨਾਹ ‘‘ਨ ਸਸਙ੍ਖਾਰੇਨ…ਪੇ… ਛਿਨ੍ਨਨ੍ਤੇ ਉਪ੍ਪਨ੍ਨੋ’’ਤਿ.
ਆਨਨ੍ਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੭. ਲੋਕਾਯਤਿਕਸੁਤ੍ਤਵਣ੍ਣਨਾ
੩੮. ਸਤ੍ਤਮੇ ਲੋਕਾਯਤਵਾਦਕਾਤਿ ਆਯਤਿਂ ਹਿਤਂ ਲੋਕੋ ਨ ਯਤਤਿ ਨ ਵਿਰੁਹਤਿ ਏਤੇਨਾਤਿ ਲੋਕਾਯਤਂ, ਵਿਤਣ੍ਡਸਤ੍ਥਂ. ਤਞ੍ਹਿ ਗਨ੍ਥਂ ਨਿਸ੍ਸਾਯ ਸਤ੍ਤਾ ਪੁਞ੍ਞਕਿਰਿਯਾਯ ਚਿਤ੍ਤਮ੍ਪਿ ਨ ਉਪ੍ਪਾਦੇਨ੍ਤਿ, ਤਂ ਵਦਨ੍ਤੀਤਿ ਲੋਕਾਯਤਵਾਦਕਾ.
ਦਲ਼੍ਹਂ ਥਿਰਂ ਧਨੁ ਏਤਸ੍ਸਾਤਿ ਦਲ਼੍ਹਧਨ੍ਵਾ (ਅ. ਨਿ. ਟੀ. ੨.੪.੪੫-੪੬; ਸਂ. ਨਿ. ਟੀ. ੧.੧.੧੦੭), ਸੋ ਏਵ ‘‘ਦਲ਼੍ਹਧਮ੍ਮਾ’’ਤਿ ਵੁਤ੍ਤੋ. ਪਟਿਸਤ੍ਤੁਵਿਧਮਨਤ੍ਥਂ ਧਨੁਂ ਗਣ੍ਹਾਤੀਤਿ ਧਨੁਗ੍ਗਹੋ. ਸੋ ਏਵ ਉਸੁਂ ਸਰਂ ਅਸਤਿ ਖਿਪਤੀਤਿ ਇਸ੍ਸਾਸੋ. ਦ੍ਵਿਸਹਸ੍ਸਥਾਮਨ੍ਤਿ ਲੋਹਾਦਿਭਾਰਂ ਵਹਿਤੁਂ ਸਮਤ੍ਥਂ ਦ੍ਵਿਸਹਸ੍ਸਥਾਮਂ. ਤੇਨਾਹ ‘‘ਦ੍ਵਿਸਹਸ੍ਸਥਾਮਂ ਨਾਮਾ’’ਤਿਆਦਿ. ਦਣ੍ਡੇਤਿ ਧਨੁਦਣ੍ਡੇ. ਯਾਵ ਕਣ੍ਡਪ੍ਪਮਾਣਾਤਿ ਦੀਘਤੋ ਯਤ੍ਤਕਂ ਕਣ੍ਡਸ੍ਸ ਪਮਾਣਂ, ਤਤ੍ਤਕੇ ਧਨੁਦਣ੍ਡੇ ਉਕ੍ਖਿਤ੍ਤਮਤ੍ਤੇ ਆਰੋਪਿਤੇਸੁਯੇਵ ਜਿਯਾਦਣ੍ਡੇਸੁ ਸੋ ਚੇ ਭਾਰੋ ਪਥਵਿਤੋ ਮੁਚ੍ਚਤਿ, ਏਵਂ ਇਦਂ ਦ੍ਵਿਸਹਸ੍ਸਥਾਮਂ ਨਾਮ ਧਨੂਤਿ ਦਟ੍ਠਬ੍ਬਂ. ਉਗ੍ਗਹਿਤਸਿਪ੍ਪੋਤਿ ਉਗ੍ਗਹਿਤਧਨੁਸਿਪ੍ਪੋ. ਕਤਹਤ੍ਥੋਤਿ ਥਿਰਤਰਂ ਲਕ੍ਖੇਸੁ ਅਵਿਰਜ੍ਝਨਸਰਕ੍ਖੇਪੋ. ਈਦਿਸੋ ਪਨ ਤਤ੍ਥ ਵਸਿਭੂਤੋ ਕਤਹਤ੍ਥੋ ਨਾਮ ਹੋਤੀਤਿ ਆਹ ‘‘ਚਿਣ੍ਣਵਸਿਭਾਵੋ’’ਤਿ. ਕਤਂ ਰਾਜਕੁਲਾਦੀਸੁ ਉਪੇਚ੍ਚ ਅਸਨਂ ਏਤੇਨ ਸੋ ਕਤੂਪਾਸਨੋਤਿ ਆਹ ‘‘ਰਾਜਕੁਲਾਦੀਸੁ ਦਸ੍ਸਿਤਸਿਪ੍ਪੋ’’ਤਿ. ਏਵਂ ਕਤਨ੍ਤਿ ਏਵਂ ਅਨ੍ਤੋਸੁਸਿਰਕਰਣਾਦਿਨਾ ਸਲ੍ਲਹੁਕਂ ਕਤਂ.
ਲੋਕਾਯਤਿਕਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੮-੯. ਦੇਵਾਸੁਰਸਙ੍ਗਾਮਸੁਤ੍ਤਾਦਿਵਣ੍ਣਨਾ
੩੯-੪੦. ਅਟ੍ਠਮੇ ਅਭਿਯਿਂਸੂਤਿ ਕਦਾ ਅਭਿਯਿਂਸੁ? ਯਦਾ ਬਲਵਨ੍ਤੋ ਅਹੇਸੁਂ, ਤਦਾ. ਤਤ੍ਰਾਯਮਨੁਪੁਬ੍ਬਿਕਥਾ (ਸਂ. ਨਿ. ਅਟ੍ਠ. ੧.੧.੨੪੭; ਸਾਰਤ੍ਥ. ਟੀ. ੧.ਵੇਰਞ੍ਜਕਣ੍ਡਵਣ੍ਣਨਾ) – ਸਕ੍ਕੋ ਕਿਰ ਮਗਧਰਟ੍ਠੇ ਮਚਲਗਾਮਕੇ ਮਘੋ ਨਾਮ ਮਾਣਵੋ ਹੁਤ੍ਵਾ ਤੇਤ੍ਤਿਂਸ ਪੁਰਿਸੇ ਗਹੇਤ੍ਵਾ ਕਲ੍ਯਾਣਕਮ੍ਮਂ ਕਰੋਨ੍ਤੋ ਸਤ੍ਤ ਵਤਪਦਾਨਿ ਪੂਰੇਤ੍ਵਾ ਤਤ੍ਥ ਕਾਲਙ੍ਕਤੋ ਦੇਵਲੋਕੇ ਨਿਬ੍ਬਤ੍ਤਿ. ਤਂ ਬਲਵਕਮ੍ਮਾਨੁਭਾਵੇਨ ਸਪਰਿਸਂ ਸੇਸਦੇਵਤਾ ਦਸਹਿ ਠਾਨੇਹਿ ਅਧਿਗਣ੍ਹਨ੍ਤਂ ਦਿਸ੍ਵਾ ‘‘ਆਗਨ੍ਤੁਕਦੇਵਪੁਤ੍ਤਾ ਆਗਤਾ’’ਤਿ ਨੇਵਾਸਿਕਾ ਗਨ੍ਧਪਾਨਂ ਸਜ੍ਜਯਿਂਸੁ. ਸਕ੍ਕੋ ਸਕਪਰਿਸਾਯ ਸਞ੍ਞਂ ਅਦਾਸਿ ‘‘ਮਾਰਿਸਾ ਮਾ ਗਨ੍ਧਪਾਨਂ ਪਿਵਿਤ੍ਥ, ਪਿਵਨਾਕਾਰਮਤ੍ਤਮੇਵ ਦਸ੍ਸੇਥਾ’’ਤਿ. ਤੇ ਤਥਾ ਅਕਂਸੁ. ਨੇਵਾਸਿਕਦੇਵਤਾ ਸੁਵਣ੍ਣਸਰਕੇਹਿ ਉਪਨੀਤਂ ਗਨ੍ਧਪਾਨਂ ਯਾਵਦਤ੍ਥਂ ਪਿਵਿਤ੍ਵਾ ਮਤ੍ਤਾ ਤਤ੍ਥ ਤਤ੍ਥ ਸੁਵਣ੍ਣਪਥਵਿਯਂ ਪਤਿਤ੍ਵਾ ਸਯਿਂਸੁ. ਸਕ੍ਕੋ ‘‘ਗਣ੍ਹਥ ਪੁਤ੍ਤਹਤਾਯ ਪੁਤ੍ਤੇ’’ਤਿ ਤੇ ਪਾਦੇਸੁ ਗਹੇਤ੍ਵਾ ਸਿਨੇਰੁਪਾਦੇ ਖਿਪਾਪੇਸਿ. ਸਕ੍ਕਸ੍ਸ ਪੁਞ੍ਞਤੇਜੇਨ ਤਦਨੁਵਤ੍ਤਕਾਪਿ ਸਬ੍ਬੇ ਤਤ੍ਥੇਵ ਪਤਿਂਸੁ. ਤੇ ਸਿਨੇਰੁਵੇਮਜ੍ਝਕਾਲੇ ਸਞ੍ਞਂ ਲਭਿਤ੍ਵਾ, ‘‘ਤਾਤਾ, ਸੁਰਂ ਨ ਪਿਵਿਮ੍ਹ, ਸੁਰਂ ਨ ਪਿਵਿਮ੍ਹਾ’’ਤਿ ਆਹਂਸੁ. ਤਤੋ ਪਟ੍ਠਾਯ ਅਸੁਰਾ ਨਾਮ ਜਾਤਾ. ਅਥ ਨੇਸਂ ਕਮ੍ਮਪਚ੍ਚਯਉਤੁਸਮੁਟ੍ਠਾਨਂ ਸਿਨੇਰੁਸ੍ਸ ਹੇਟ੍ਠਿਮਤਲੇ ਦਸਯੋਜਨਸਹਸ੍ਸਂ ਅਸੁਰਭਵਨਂ ਨਿਬ੍ਬਤ੍ਤਿ. ਸਕ੍ਕੋ ਤੇਸਂ ਨਿਵਤ੍ਤਿਤ੍ਵਾ ਅਨਾਗਮਨਤ੍ਥਾਯ ਆਰਕ੍ਖਂ ਠਪੇਸਿ. ਯਂ ਸਨ੍ਧਾਯ ਵੁਤ੍ਤਂ –
‘‘ਅਨ੍ਤਰਾ ਦ੍ਵਿਨ੍ਨਂ ਅਯੁਜ੍ਝਪੁਰਾਨਂ,
ਪਞ੍ਚਵਿਧਾ ਠਪਿਤਾ ਅਭਿਰਕ੍ਖਾ;
ਉਰਗ-ਕਰੋਟਿ-ਪਯਸ੍ਸ ਚ ਹਾਰੀ,
ਮਦਨਯੁਤਾ ਚਤੁਰੋ ਚ ਮਹਤ੍ਥਾ’’ਤਿ. (ਸਂ. ਨਿ. ਅਟ੍ਠ. ੧.੧.੨੪੭; ਸਾਰਤ੍ਥ. ਟੀ. ੧.੧ ਵੇਰਞ੍ਜਕਣ੍ਡਵਣ੍ਣਨਾ);
ਦ੍ਵੇ ਨਗਰਾਨਿ ਹਿ ਯੁਦ੍ਧੇਨ ਗਹੇਤੁਂ ਅਸਕ੍ਕੁਣੇਯ੍ਯਤਾਯ ਅਯੁਜ੍ਝਪੁਰਾਨਿ ਨਾਮ ਜਾਤਾਨਿ ਦੇਵਨਗਰਞ੍ਚ ਅਸੁਰਨਗਰਞ੍ਚ. ਯਦਾ ਹਿ ਅਸੁਰਾ ਬਲਵਨ੍ਤੋ ਹੋਨ੍ਤਿ, ਅਥ ਦੇਵੇਹਿ ਪਲਾਯਿਤ੍ਵਾ ਦੇਵਨਗਰਂ ਪਵਿਸਿਤ੍ਵਾ ਦ੍ਵਾਰੇ ਪਿਦਹਿਤੇ ਅਸੁਰਾਨਂ ਸਤਸਹਸ੍ਸਮ੍ਪਿ ਕਿਞ੍ਚਿ ਕਾਤੁਂ ਨ ਸਕ੍ਕੋਤਿ. ਯਦਾ ਦੇਵਾ ਬਲਵਨ੍ਤੋ ਹੋਨ੍ਤਿ, ਅਥਾਸੁਰੇਹਿ ਪਲਾਯਿਤ੍ਵਾ ਅਸੁਰਨਗਰਸ੍ਸ ਦ੍ਵਾਰੇ ਪਿਦਹਿਤੇ ਸਕ੍ਕਾਨਂ ਸਤਸਹਸ੍ਸਮ੍ਪਿ ਕਿਞ੍ਚਿ ਕਾਤੁਂ ਨ ਸਕ੍ਕੋਤਿ. ਇਤਿ ਇਮਾਨਿ ਦ੍ਵੇ ਨਗਰਾਨਿ ਅਯੁਜ੍ਝਪੁਰਾਨਿ ਨਾਮ. ਤੇਸਂ ਅਨ੍ਤਰਾ ਏਤੇਸੁ ਉਰਗਾਦੀਸੁ ਪਞ੍ਚਸੁ ਠਾਨੇਸੁ ਸਕ੍ਕੇਨ ਆਰਕ੍ਖਾ ਠਪਿਤਾ. ਤਤ੍ਥ ਉਰਗਸਦ੍ਦੇਨ ਨਾਗਾ ਗਹਿਤਾ. ਤੇ ਹਿ ਉਦਕੇ ਬਲਵਨ੍ਤੋ ਹੋਨ੍ਤਿ, ਤਸ੍ਮਾ ਸਿਨੇਰੁਸ੍ਸ ਪਠਮਾਲਿਨ੍ਦੇ ਏਤੇਸਂ ਆਰਕ੍ਖਾ. ਕਰੋਟਿਸਦ੍ਦੇਨ ਸੁਪਣ੍ਣਾ ਗਹਿਤਾ. ਤੇਸਂ ਕਿਰ ਕਰੋਟਿ ਨਾਮ ਪਾਨਭੋਜਨਂ, ਤੇਨ ਤਂ ਨਾਮਂ ਲਭਿਂਸੁ, ਦੁਤਿਯਾਲਿਨ੍ਦੇ ਤੇਸਂ ਆਰਕ੍ਖਾ. ਪਯਸ੍ਸਹਾਰਿਸਦ੍ਦੇਨ ਕੁਮ੍ਭਣ੍ਡਾ ਗਹਿਤਾ, ਦਾਨਵਰਕ੍ਖਸਾ ਕਿਰ ਤੇ, ਤਤਿਯਾਲਿਨ੍ਦੇ ਤੇਸਂ ਆਰਕ੍ਖਾ. ਮਦਨਯੁਤਸਦ੍ਦੇਨ ਯਕ੍ਖਾ ਗਹਿਤਾ. ਵਿਸਮਚਾਰਿਨੋ ਕਿਰ ਤੇ ਯੁਜ੍ਝਸੋਣ੍ਡਾ, ਚਤੁਤ੍ਥਾਲਿਨ੍ਦੇ ਤੇਸਂ ਆਰਕ੍ਖਾ. ਚਤੁਰੋ ਚ ਮਹਤ੍ਤਾਤਿ ਚਤ੍ਤਾਰੋ ਮਹਾਰਾਜਾਨੋ ਵੁਤ੍ਤਾ, ਪਞ੍ਚਮਾਲਿਨ੍ਦੇ ਤੇਸਂ ਆਰਕ੍ਖਾ, ਤਸ੍ਮਾ ਯਦਿ ਅਸੁਰਾ ਕੁਪਿਤਾਵਿਲਚਿਤ੍ਤਾ ਦੇਵਪੁਰਂ ਉਪਯਨ੍ਤਿ ਯੁਜ੍ਝਿਤੁਂ. ਯਂ ਗਿਰਿਨੋ ਪਠਮਂ ਪਰਿਭਣ੍ਡਂ, ਤਂ ਉਰਗਾ ਪਟਿਬਾਹਯਨ੍ਤਿ. ਏਵਂ ਸੇਸੇਸੁ ਸੇਸਾ.
ਤੇ ਪਨ ਅਸੁਰਾ ਆਯੁਵਣ੍ਣਯਸਇਸ੍ਸਰਿਯਸਮ੍ਪਤ੍ਤੀਹਿ ਤਾਵਤਿਂਸਸਦਿਸਾਵ, ਤਸ੍ਮਾ ਅਨ੍ਤਰਾ ਅਤ੍ਤਾਨਂ ਅਜਾਨਿਤ੍ਵਾ ਪਾਟਲਿਯਾ ਪੁਪ੍ਫਿਤਾਯ ‘‘ਨ ਇਦਂ ਦੇਵਨਗਰਂ, ਤਤ੍ਥ ਪਾਰਿਚ੍ਛਤ੍ਤਕੋ ਪੁਪ੍ਫਤਿ, ਇਧ ਪਨ ਚਿਤ੍ਤਪਾਟਲੀ, ਜਰਸਕ੍ਕੇਨਾਮ੍ਹਾਕਂ ਸੁਰਂ ਪਾਯੇਤ੍ਵਾ ਵਞ੍ਚਿਤਾ, ਦੇਵਨਗਰਞ੍ਚ ਨੋ ਗਹਿਤਂ, ਗਚ੍ਛਾਮ, ਤੇਨ ਸਦ੍ਧਿਂ ਯੁਜ੍ਝਿਸ੍ਸਾਮਾ’’ਤਿ ਹਤ੍ਥਿਅਸ੍ਸਰਥੇ ਆਰੁਯ੍ਹ ਸੁਵਣ੍ਣਰਜਤਮਣਿਫਲਕਾਨਿ ਗਹੇਤ੍ਵਾ ਯੁਦ੍ਧਸਜ੍ਜਾ ਹੁਤ੍ਵਾ ਅਸੁਰਭੇਰਿਯੋ ਵਾਦੇਨ੍ਤਾ ਮਹਾਸਮੁਦ੍ਦੇ ਉਦਕਂ ਦ੍ਵਿਧਾ ਭੇਤ੍ਵਾ ਉਟ੍ਠਹਨ੍ਤਿ. ਤੇ ਦੇਵੇ ਵੁਟ੍ਠੇ ਵਮ੍ਮਿਕਮਕ੍ਖਿਕਾ ਵਮ੍ਮਿਕਂ ਵਿਯ ਸਿਨੇਰੁਂ ਆਰੁਹਿਤੁਂ ਆਰਭਨ੍ਤਿ. ਅਥ ਨੇਸਂ ਪਠਮਂ ਨਾਗੇਹਿ ਸਦ੍ਧਿਂ ਯੁਦ੍ਧਂ ਹੋਤਿ. ਤਸ੍ਮਿਂ ਖੋ ਪਨ ਯੁਦ੍ਧੇ ਨ ਕਸ੍ਸਚਿ ਛਵਿ ਵਾ ਚਮ੍ਮਂ ਵਾ ਛਿਜ੍ਜਤਿ, ਨ ਲੋਹਿਤਂ ਉਪ੍ਪਜ੍ਜਤਿ, ਕੇਵਲਂ ਕੁਮਾਰਕਾਨਂ ਦਾਰੁਮੇਣ੍ਡਕਯੁਦ੍ਧਂ ਵਿਯ ਅਞ੍ਞਮਞ੍ਞਸਨ੍ਤਾਸਨਮਤ੍ਤਮੇਵ ਹੋਤਿ. ਕੋਟਿਸਤਾਪਿ ਕੋਟਿਸਹਸ੍ਸਾਪਿ ਨਾਗਾ ਤੇਹਿ ਸਦ੍ਧਿਂ ਯੁਜ੍ਝਿਤ੍ਵਾ ਤੇ ਅਸੁਰਪੁਰਂਯੇਵ ਪਵੇਸੇਤ੍ਵਾ ਨਿਵਤ੍ਤਨ੍ਤਿ. ਯਦਾ ਪਨ ਅਸੁਰਾ ਬਲਵਨ੍ਤੋ ਹੋਨ੍ਤਿ, ਅਥ ਨਾਗਾ ਓਸਕ੍ਕਿਤ੍ਵਾ ਦੁਤਿਯੇ ਆਲਿਨ੍ਦੇ ਸੁਪਣ੍ਣੇਹਿ ਸਦ੍ਧਿਂ ਏਕਤੋਵ ਹੁਤ੍ਵਾ ਯੁਜ੍ਝਨ੍ਤਿ. ਏਸ ਨਯੋ ਸੁਪਣ੍ਣਾਦੀਸੁਪਿ. ਯਦਾ ਪਨ ਤਾਨਿ ਪਞ੍ਚਪਿ ਠਾਨਾਨਿ ਅਸੁਰਾ ਮਦ੍ਦਨ੍ਤਿ, ਤਦਾ ਏਕਤੋ ਸਮ੍ਪਿਣ੍ਡਿਤਾਨਿਪਿ ਤਾਨਿ ਪਞ੍ਚ ਬਲਾਨਿ ਓਸਕ੍ਕਨ੍ਤਿ. ਅਥ ਚਤ੍ਤਾਰੋ ਮਹਾਰਾਜਾਨੋ ਗਨ੍ਤ੍ਵਾ ਸਕ੍ਕਸ੍ਸ ਤਂ ਪਵਤ੍ਤਿਂ ਆਰੋਚੇਨ੍ਤਿ. ਸਕ੍ਕੋ ਤੇਸਂ ਵਚਨਂ ਸੁਤ੍ਵਾ ਦਿਯਡ੍ਢਯੋਜਨਸਤਿਕਂ ਵੇਜਯਨ੍ਤਰਥਂ ਆਰੁਯ੍ਹ ਸਯਂ ਵਾ ਨਿਕ੍ਖਮਤਿ, ਏਕਂ ਪੁਤ੍ਤਂ ਵਾ ਪੇਸੇਤਿ. ਯਦਾ ਦੇਵਾ ਪੁਨ ਅਪਚ੍ਚਾਗਮਨਾਯ ਅਸੁਰੇ ਜਿਨਿਂਸੁ, ਤਦਾ ਸਕ੍ਕੋ ਅਸੁਰੇ ਪਲਾਪੇਤ੍ਵਾ ਪਞ੍ਚਸੁ ਠਾਨੇਸੁ ਆਰਕ੍ਖਂ ਦਤ੍ਵਾ ਵੇਦਿਯਪਾਦੇ ਵਜਿਰਹਤ੍ਥਾ ਇਨ੍ਦਪਟਿਮਾਯੋ ਠਪੇਸਿ. ਅਸੁਰਾ ਕਾਲੇਨ ਕਾਲਂ ਉਟ੍ਠਹਿਤ੍ਵਾ ਪਟਿਮਾਯੋ ਦਿਸ੍ਵਾ ‘‘ਸਕ੍ਕੋ ਅਪ੍ਪਮਤ੍ਤੋ ਤਿਟ੍ਠਤੀ’’ਤਿ ਤਤੋਵ ਨਿਵਤ੍ਤਨ੍ਤਿ. ਇਧ ਪਨ ਯਦਾ ਅਸੁਰਾਨਂ ਜਯੋ ਅਹੋਸਿ, ਦੇਵਾਨਂ ਪਰਾਜਯੋ, ਤਂ ਸਨ੍ਧਾਯੇਤਂ ਵੁਤ੍ਤਂ – ‘‘ਪਰਾਜਿਤਾ ਚ, ਭਿਕ੍ਖਵੇ, ਦੇਵਾ ਅਪਯਿਂਸੁਯੇਵ ਉਤ੍ਤਰੇਨਾਭਿਮੁਖਾ, ਅਭਿਯਿਂਸੁ ਅਸੁਰਾ’’ਤਿ.
ਦਕ੍ਖਿਣਾਭਿਮੁਖਾ ਹੁਤ੍ਵਾਤਿ ਚਕ੍ਕਵਾਲ਼ਪਬ੍ਬਤਾਭਿਮੁਖਾ ਹੁਤ੍ਵਾ. ਅਸੁਰਾ ਕਿਰ ਦੇਵੇਹਿ ਪਰਾਜਿਤਾ ਪਲਾਯਨ੍ਤਾ ਚਕ੍ਕਵਾਲ਼ਪਬ੍ਬਤਾਭਿਮੁਖਂ ਗਨ੍ਤ੍ਵਾ ਚਕ੍ਕਵਾਲ਼ਮਹਾਸਮੁਦ੍ਦਪਿਟ੍ਠਿਯਂ ਰਜਤਪਟ੍ਟਵਣ੍ਣੇ ਵਾਲਿਕਾਪੁਲਿਨੇ ਯਤ੍ਥ ਪਣ੍ਣਕੁਟਿਯੋ ਮਾਪੇਤ੍ਵਾ ਇਸਯੋ ਵਸਨ੍ਤਿ, ਤਤ੍ਥ ਗਨ੍ਤ੍ਵਾ ਇਸੀਨਂ ਅਸ੍ਸਮਪਦੇਨ ਗਚ੍ਛਨ੍ਤਾ ‘‘ਸਕ੍ਕੋ ਇਮੇਹਿ ਸਦ੍ਧਿਂ ਮਨ੍ਤੇਤ੍ਵਾ ਅਮ੍ਹੇ ਨਾਸੇਤਿ, ਗਣ੍ਹਥ ਪੁਤ੍ਤਹਤਾਯ ਪੁਤ੍ਤੇ’’ਤਿ ਕੁਪਿਤਾ ਅਸ੍ਸਮਪਦੇ ਪਾਨੀਯਘਟਚਙ੍ਕਮਨਪਣ੍ਣਸਾਲਾਦੀਨਿ ਵਿਦ੍ਧਂਸੇਨ੍ਤਿ. ਇਸਯੋ ਅਰਞ੍ਞਤੋ ਫਲਾਫਲਂ ਆਦਾਯ ਆਗਤਾ ਦਿਸ੍ਵਾ ਪੁਨ ਦੁਕ੍ਖੇਨ ਪਟਿਪਾਕਤਿਕਂ ਕਰੋਨ੍ਤਿ, ਤੇਪਿ ਪੁਨਪ੍ਪੁਨਂ ਤਥੇਵ ਪਰਾਜਿਤਾ ਗਨ੍ਤ੍ਵਾ ਵਿਨਾਸੇਨ੍ਤਿ. ਤੇਨ ਵੁਤ੍ਤਂ – ‘‘ਪਰਾਜਿਤਾ ਚ ਖੋ, ਭਿਕ੍ਖਵੇ, ਅਸੁਰਾ ਅਪਯਿਂਸੁਯੇਵ ਦਕ੍ਖਿਣੇਨਾਭਿਮੁਖਾ’’ਤਿ. ਨਵਮਂ ਉਤ੍ਤਾਨਤ੍ਥਮੇਵ.
ਦੇਵਾਸੁਰਸਙ੍ਗਾਮਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੧੦. ਤਪੁਸ੍ਸਸੁਤ੍ਤਵਣ੍ਣਨਾ
੪੧. ਦਸਮੇ ਪਕ੍ਖਨ੍ਦਤੀਤਿ ਪਵਿਸਤਿ. ਪਸੀਦਤੀਤਿ ਪਸਾਦਂ ਅਭਿਰੁਚਿਂ ਆਪਜ੍ਜਤਿ, ਪਤਿਟ੍ਠਾਤਿ ਵਿਮੁਚ੍ਚਤੀਤਿ ਅਤ੍ਥੋ. ਕਥਾਪਾਭਤਨ੍ਤਿ ਕਥਾਯ ਮੂਲਂ. ਮੂਲਞ੍ਹਿ ‘‘ਪਾਭਤ’’ਨ੍ਤਿ ਵੁਚ੍ਚਤਿ. ਯਥਾਹ –
‘‘ਅਪ੍ਪਕੇਨਪਿ ਮੇਧਾਵੀ, ਪਾਭਤੇਨ ਵਿਚਕ੍ਖਣੋ;
ਸਮੁਟ੍ਠਾਪੇਤਿ ਅਤ੍ਤਾਨਂ, ਅਣੁਂ ਅਗ੍ਗਿਂਵ ਸਨ੍ਧਮ’’ਨ੍ਤਿ. (ਜਾ. ੧.੧.੪);
ਤੇਨੇਵਾਹ ‘‘ਕਥਾਪਾਭਤਨ੍ਤਿ ਕਥਾਮੂਲ’’ਨ੍ਤਿ. ਵਿਤਕ੍ਕਗ੍ਗਹਣੇਨੇਵ ਤਂਸਹਚਰਿਤੋ ਵਿਚਾਰੋਪਿ ਗਹਿਤੋ. ਤੇਨੇਵੇਤ੍ਥ ਬਹੁਵਚਨਨਿਦ੍ਦੇਸੋ ਕਤੋਤਿ ਆਹ ‘‘ਵਿਤਕ੍ਕੇਸੂਤਿ ਵਿਤਕ੍ਕਵਿਚਾਰੇਸੂ’’ਤਿ.
ਤਪੁਸ੍ਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.
ਮਹਾਵਗ੍ਗਵਣ੍ਣਨਾ ਨਿਟ੍ਠਿਤਾ.