੧. ਸੀਹਨਾਦਸੁਤ੍ਤਵਣ੍ਣਨਾ

੧੧. ਦੁਤਿਯਸ੍ਸ ਪਠਮੇ ਅਵਾਪੁਰੇਨ੍ਤਿ ਵਿਵਰਨ੍ਤਿ ਦ੍ਵਾਰਂ ਏਤੇਨਾਤਿ ਅਵਾਪੁਰਣਂ. ਰਜਂ ਹਰਨ੍ਤਿ ਏਤੇਨਾਤਿ ਰਜੋਹਰਣਂ. ਕਲ਼ੋਪਿਹਤ੍ਥੋਤਿ ਵਿਲੀਵਮਯਭਾਜਨਹਤ੍ਥੋ, ‘‘ਚਮ੍ਮਮਯਭਾਜਨਹਤ੍ਥੋ’’ਤਿ ਚ ਵਦਨ੍ਤਿ. ਛਿਨ੍ਨਾਨਿ ਵਿਸਾਣਾਨਿ ਏਤਸ੍ਸਾਤਿ ਛਿਨ੍ਨਵਿਸਾਣੋ, ਉਸਭੋ ਚ ਸੋ ਛਿਨ੍ਨਵਿਸਾਣੋ ਚਾਤਿ ਉਸਭਛਿਨ੍ਨਵਿਸਾਣੋ. ਵਿਸੇਸਨਪਰੋਯਂ ਸਮਾਸੋ. ਅਹਿਕੁਣਪੇਨ ਵਾਤਿਆਦਿ ਅਤਿਜੇਗੁਚ੍ਛਪ੍ਪਟਿਕੂਲਕੁਣਪਦਸ੍ਸਨਤ੍ਥਂ ਵੁਤ੍ਤਂ. ਕਣ੍ਠੇ ਆਸਤ੍ਤੇਨਾਤਿ ਕੇਨਚਿਦੇਵ ਪਚ੍ਚਤ੍ਥਿਕੇਨ ਆਨੇਤ੍ਵਾ ਕਣ੍ਠੇ ਬਦ੍ਧੇਨ, ਓਮੁਕ੍ਕੇਨਾਤਿ ਅਤ੍ਥੋ. ਅਟ੍ਟੋ ਆਤੁਰੋ ਦੁਗ੍ਗਨ੍ਧਪੀਲ਼ਾਯ ਪੀਲ਼ਿਤੋ. ਅਚ੍ਚਯਸ੍ਸ ਪਟਿਗ੍ਗਣ੍ਹਨਂ ਵਾ ਅਧਿਵਾਸਨਂ. ਏਵਞ੍ਹਿ ਸੋ ਕਾਰਣੇ ਦੇਸਿਯਮਾਨੇ ਤਤੋ ਵਿਗਤੋ ਨਾਮ ਹੋਤਿ. ਤੇਨਾਹ ‘‘ਪਟਿਗ੍ਗਣ੍ਹਤੂਤਿ ਖਮਤੂ’’ਤਿ. ਸੇਸਮੇਤ੍ਥ ਸੁਵਿਞ੍ਞੇਯ੍ਯਮੇਵ.

ਸੀਹਨਾਦਸੁਤ੍ਤਵਣ੍ਣਨਾ ਨਿਟ੍ਠਿਤਾ.