੨. ਵਸ੍ਸਕਾਰਸੁਤ੍ਤਵਣ੍ਣਨਾ

੨੨. ਦੁਤਿਯੇ ਅਭਿਯਾਤੁਕਾਮੋਤਿ ਏਤ੍ਥ ਅਭਿ-ਸਦ੍ਦੋ ਅਭਿਭਵਨਤ੍ਥੋ ‘‘ਅਨਭਿਵਿਦਿਤੁ’’ਨ੍ਤਿਆਦੀਸੁ ਵਿਯਾਤਿ ਆਹ ‘‘ਅਭਿਭਵਨਤ੍ਥਾਯ ਯਾਤੁਕਾਮੋ’’ਤਿ. ਵਜ੍ਜਿਰਾਜਾਨੋਤਿ ‘‘ਵਜ੍ਜੇਤਬ੍ਬਾ ਇਮੇ’’ਤਿ ਆਦਿਤੋ ਪਵਤ੍ਤਂ ਵਚਨਂ ਉਪਾਦਾਯ ਵਜ੍ਜੀਤਿ ਲਦ੍ਧਨਾਮਾ ਰਾਜਾਨੋ, ਵਜ੍ਜਿਰਟ੍ਠਸ੍ਸ ਵਾ ਰਾਜਾਨੋ ਵਜ੍ਜਿਰਾਜਾਨੋ. ਰਟ੍ਠਸ੍ਸ ਪਨ ਵਜ੍ਜਿਸਮਞ੍ਞਾ ਤਨ੍ਨਿਵਾਸਿਰਾਜਕੁਮਾਰਵਸੇਨ ਵੇਦਿਤਬ੍ਬਾ. ਰਾਜਿਦ੍ਧਿਯਾਤਿ ਰਾਜਭਾਵਾਨੁਗਤੇਨ ਪਭਾਵੇਨ. ਸੋ ਪਨ ਪਭਾਵੋ ਨੇਸਂ ਗਣਰਾਜਾਨਂ ਮਿਥੋ ਸਾਮਗ੍ਗਿਯਾ ਲੋਕੇ ਪਾਕਟੋ. ਚਿਰਟ੍ਠਾਯੀ ਚ ਅਹੋਸੀਤਿ ‘‘ਸਮਗ੍ਗਭਾਵਂ ਕਥੇਤੀ’’ਤਿ ਵੁਤ੍ਤਂ. ਅਨੁ ਅਨੁ ਤਂਸਮਙ੍ਗਿਨੋ ਭਾਵੇਤਿ ਵਡ੍ਢੇਤੀਤਿ ਅਨੁਭਾਵੋ, ਅਨੁਭਾਵੋ ਏਵ ਆਨੁਭਾਵੋ, ਪਤਾਪੋ. ਸੋ ਪਨ ਨੇਸਂ ਪਤਾਪੋ ਹਤ੍ਥਿਅਸ੍ਸਾਦਿਵਾਹਨਸਮ੍ਪਤ੍ਤਿਯਾ ਤਤ੍ਥ ਚ ਸੁਭਿਕ੍ਖਿਤਭਾਵੇਨ ਲੋਕੇ ਪਾਕਟੋ ਜਾਤੋਤਿ ‘‘ਏਤੇਨ…ਪੇ… ਕਥੇਤੀ’’ਤਿ ਵੁਤ੍ਤਂ. ਤਾਲ਼ਚ੍ਛਿਗ੍ਗਲ਼ੇਨਾਤਿ ਕੁਞ੍ਚਿਕਾਛਿਦ੍ਦੇਨ. ਅਸਨਨ੍ਤਿ ਸਰਂ. ਅਤਿਪਾਤਯਿਸ੍ਸਨ੍ਤੀਤਿ ਅਤਿਕ੍ਕਾਮੇਨ੍ਤਿ. ਪੋਙ੍ਖਾਨੁਪੋਙ੍ਖਨ੍ਤਿ ਪੋਙ੍ਖਸ੍ਸ ਅਨੁਪੋਙ੍ਖਂ, ਪੁਰਿਮਸਰਸ੍ਸ ਪੋਙ੍ਖਪਦਾਨੁਗਤਪੋਙ੍ਖਂ ਇਤਰਂ ਸਰਂ ਕਤ੍ਵਾਤਿ ਅਤ੍ਥੋ. ਅਵਿਰਾਧਿਤਨ੍ਤਿ ਅਵਿਰਜ੍ਝਿਤਂ. ਉਚ੍ਛਿਨ੍ਦਿਸ੍ਸਾਮੀਤਿ ਉਮ੍ਮੂਲਨਵਸੇਨ ਕੁਲਸਨ੍ਤਤਿਂ ਛਿਨ੍ਦਿਸ੍ਸਾਮਿ. ਅਯਨਂ ਵਡ੍ਢਨਂ ਅਯੋ, ਤਪ੍ਪਟਿਪਕ੍ਖੇਨ ਅਨਯੋਤਿ ਆਹ ‘‘ਅਵਡ੍ਢਿ’’ਨ੍ਤਿ. ਞਾਤੀਨਂ ਬ੍ਯਸਨਂ ਵਿਨਾਸੋ ਞਾਤਿਬ੍ਯਸਨਂ.

ਗਙ੍ਗਾਯਾਤਿ ਗਙ੍ਗਾਸਮੀਪੇ. ਪਟ੍ਟਨਗਾਮਨ੍ਤਿ ਸਕਟਪਟ੍ਟਨਗਾਮਂ. ਤਤ੍ਰਾਤਿ ਤਸ੍ਮਿਂ ਪਟ੍ਟਨੇ. ਬਲਵਾਘਾਤਜਾਤੋਤਿ ਉਪ੍ਪਨ੍ਨਬਲਵਕੋਧੋ. ਮੇਤਿ ਮਯ੍ਹਂ. ਗਤੇਨਾਤਿ ਗਮਨੇਨ. ਸੀਤਂ ਵਾ ਉਣ੍ਹਂ ਵਾ ਨਤ੍ਥਿ ਤਾਯ ਵੇਲਾਯ. ਅਭਿਮੁਖਂ ਯੁਦ੍ਧੇਨਾਤਿ ਅਭਿਮੁਖਂ ਉਜੁਕਮੇਵ ਸਙ੍ਗਾਮਕਰਣੇਨ. ਉਪਲਾਪਨਂ ਸਾਮਂ ਦਾਨਞ੍ਚਾਤਿ ਦਸ੍ਸੇਤੁਂ ‘‘ਅਲ’’ਨ੍ਤਿਆਦਿ ਵੁਤ੍ਤਂ. ਭੇਦੋਪਿ ਇਧ ਉਪਾਯੋ ਏਵਾਤਿ ਵੁਤ੍ਤਂ ‘‘ਅਞ੍ਞਤ੍ਰ ਮਿਥੁਭੇਦਾ’’ਤਿ. ਯੁਦ੍ਧਸ੍ਸ ਪਨ ਅਨੁਪਾਯਤਾ ਪਗੇਵ ਪਕਾਸਿਤਾ. ਇਦਨ੍ਤਿ ‘‘ਅਞ੍ਞਤ੍ਰ ਉਪਲਾਪਨਾਯ ਅਞ੍ਞਤ੍ਰ ਮਿਥੁਭੇਦਾ’’ਤਿ ਇਦਂ ਵਚਨਂ. ਕਥਾਯ ਨਯਂ ਲਭਿਤ੍ਵਾਤਿ ‘‘ਯਾਵਕੀਵਞ੍ਚ …ਪੇ… ਪਰਿਹਾਨੀ’’ਤਿ ਇਮਾਯ ਭਗਵਤੋ ਕਥਾਯ ਉਪਾਯਂ ਲਭਿਤ੍ਵਾ. ਅਨੁਕਮ੍ਪਾਯਾਤਿ ਵਜ੍ਜਿਰਾਜੇਸੁ ਅਨੁਗ੍ਗਹੇਨ.

ਰਾਜਾਪਿ ਤਮੇਵ ਪੇਸੇਤ੍ਵਾ ਸਬ੍ਬੇ…ਪੇ… ਪਾਪੇਸੀਤਿ ਰਾਜਾ ਤਂ ਅਤ੍ਤਨੋ ਸਨ੍ਤਿਕਂ ਆਗਤਂ ‘‘ਕਿਂ, ਆਚਰਿਯ, ਭਗਵਾ ਅਵਚਾ’’ਤਿ ਪੁਚ੍ਛਿ. ਸੋ ‘‘ਯਥਾ ਭੋ ਸਮਣਸ੍ਸ ਗੋਤਮਸ੍ਸ ਵਚਨਂ ਨ ਸਕ੍ਕਾ ਵਜ੍ਜੀ ਕੇਨਚਿ ਗਹੇਤੁਂ, ਅਪਿਚ ਉਪਲਾਪਨਾਯ ਵਾ ਮਿਥੁਭੇਦੇਨ ਵਾ ਸਕ੍ਕਾ’’ਤਿ ਆਹ. ਤਤੋ ਨਂ ਰਾਜਾ ‘‘ਉਪਲਾਪਨਾਯ ਅਮ੍ਹਾਕਂ ਹਤ੍ਥਿਅਸ੍ਸਾਦਯੋ ਨਸ੍ਸਿਸ੍ਸਨ੍ਤਿ, ਭੇਦੇਨੇਵ ਤੇ ਗਹੇਸ੍ਸਾਮਿ, ਕਿਂ ਕਰੋਮਾ’’ਤਿ ਪੁਚ੍ਛਿ. ਤੇਨ ਹਿ, ਮਹਾਰਾਜ, ਤੁਮ੍ਹੇ ਵਜ੍ਜੀ ਆਰਬ੍ਭ ਪਰਿਸਤਿ ਕਥਂ ਸਮੁਟ੍ਠਾਪੇਥ, ਤਤੋ ਅਹਂ ‘‘ਕਿਂ ਤੇ, ਮਹਾਰਾਜ, ਤੇਹਿ, ਅਤ੍ਤਨੋ ਸਨ੍ਤਕੇਨ ਕਸਿਵਣਿਜ੍ਜਾਦੀਨਿ ਕਤ੍ਵਾ ਜੀਵਨ੍ਤੁ ਏਤੇ ਰਾਜਾਨੋ’’ਤਿ ਵਤ੍ਵਾ ਪਕ੍ਕਮਿਸ੍ਸਾਮਿ. ਤਤੋ ਤੁਮ੍ਹੇ ‘‘ਕਿਂ ਨੁ, ਭੋ, ਏਸ ਬ੍ਰਾਹ੍ਮਣੋ ਵਜ੍ਜੀ ਆਰਬ੍ਭ ਪਵਤ੍ਤਂ ਕਥਂ ਪਟਿਬਾਹਤੀ’’ਤਿ ਵਦੇਯ੍ਯਾਥ. ਦਿਵਸਭਾਗੇ ਚਾਹਂ ਤੇਸਂ ਪਣ੍ਣਾਕਾਰਂ ਪੇਸੇਸ੍ਸਾਮਿ, ਤਮ੍ਪਿ ਗਾਹਾਪੇਤ੍ਵਾ ਤੁਮ੍ਹੇਪਿ ਮਮ ਦੋਸਂ ਆਰੋਪੇਤ੍ਵਾ ਬਨ੍ਧਨਤਾਲ਼ਨਾਦੀਨਿ ਅਕਤ੍ਵਾਵ ਕੇਵਲਂ ਖੁਰਮੁਣ੍ਡਂ ਮਂ ਕਤ੍ਵਾ ਨਗਰਾ ਨੀਹਰਾਪੇਥ, ਅਥਾਹਂ ‘‘ਮਯਾ ਤੇ ਨਗਰੇ ਪਾਕਾਰੋ ਪਰਿਖਾ ਚ ਕਾਰਿਤਾ, ਅਹਂ ਥਿਰਦੁਬ੍ਬਲਟ੍ਠਾਨਞ੍ਚ ਉਤ੍ਤਾਨਗਮ੍ਭੀਰਟ੍ਠਾਨਞ੍ਚ ਜਾਨਾਮਿ, ਨ ਚਿਰਸ੍ਸਂ ਦਾਨਿ ਤਂ ਉਜੁਂ ਕਰਿਸ੍ਸਾਮੀ’’ਤਿ ਵਕ੍ਖਾਮਿ. ਤਂ ਸੁਤ੍ਵਾ ਤੁਮ੍ਹੇ ‘‘ਗਚ੍ਛਤੂ’’ਤਿ ਵਦੇਯ੍ਯਾਥਾਤਿ. ਰਾਜਾ ਸਬ੍ਬਂ ਅਕਾਸਿ.

ਲਿਚ੍ਛਵੀ ਤਸ੍ਸ ਨਿਕ੍ਖਮਨਂ ਸੁਤ੍ਵਾ ‘‘ਸਠੋ ਬ੍ਰਾਹ੍ਮਣੋ, ਮਾ ਤਸ੍ਸ ਗਙ੍ਗਂ ਉਤ੍ਤਾਰੇਤੁਂ ਅਦਤ੍ਥਾ’’ਤਿ ਆਹਂਸੁ. ਤਤ੍ਰ ਏਕਚ੍ਚੇਹਿ ‘‘ਅਮ੍ਹੇ ਆਰਬ੍ਭ ਕਥਿਤਤ੍ਤਾ ਕਿਰ ਸੋ ਏਵਂ ਕਰੋਤੀ’’ਤਿ ਵੁਤ੍ਤੇ ‘‘ਤੇਨ ਹਿ ਭਣੇ ਏਤੂ’’ਤਿ ਵਦਿਂਸੁ. ਸੋ ਗਨ੍ਤ੍ਵਾ ਲਿਚ੍ਛਵੀ ਦਿਸ੍ਵਾ ‘‘ਕਿਮਾਗਤਤ੍ਥਾ’’ਤਿ ਪੁਚ੍ਛਿਤੋ ਤਂ ਪਵਤ੍ਤਿਂ ਆਰੋਚੇਸਿ. ਲਿਚ੍ਛਵਿਨੋ ‘‘ਅਪ੍ਪਮਤ੍ਤਕੇਨ ਨਾਮ ਏਵਂ ਗਰੁਂ ਦਣ੍ਡਂ ਕਾਤੁਂ ਨ ਯੁਤ੍ਤ’’ਨ੍ਤਿ ਵਤ੍ਵਾ ‘‘ਕਿਂ ਤੇ ਤਤ੍ਰ ਠਾਨਨ੍ਤਰ’’ਨ੍ਤਿ ਪੁਚ੍ਛਿਂਸੁ. ਵਿਨਿਚ੍ਛਯਮਹਾਮਚ੍ਚੋਹਮਸ੍ਮੀਤਿ. ਤਦੇਵ ਤੇ ਠਾਨਨ੍ਤਰਂ ਹੋਤੂਤਿ. ਸੋ ਸੁਟ੍ਠੁਤਰਂ ਵਿਨਿਚ੍ਛਯਂ ਕਰੋਤਿ. ਰਾਜਕੁਮਾਰਾ ਤਸ੍ਸ ਸਨ੍ਤਿਕੇ ਸਿਪ੍ਪਂ ਉਗ੍ਗਣ੍ਹਨ੍ਤਿ. ਸੋ ਪਤਿਟ੍ਠਿਤਗੁਣੋ ਹੁਤ੍ਵਾ ਏਕਦਿਵਸਂ ਏਕਂ ਲਿਚ੍ਛਵਿਂ ਗਹੇਤ੍ਵਾ ਏਕਮਨ੍ਤਂ ਗਨ੍ਤ੍ਵਾ ‘‘ਦਾਰਕਾ ਕਸਨ੍ਤੀ’’ਤਿ ਪੁਚ੍ਛਿ. ਆਮ, ਕਸਨ੍ਤਿ. ਦ੍ਵੇ ਗੋਣੇ ਯੋਜੇਤ੍ਵਾਤਿ. ਆਮ, ਦ੍ਵੇ ਗੋਣੇ ਯੋਜੇਤ੍ਵਾਤਿ. ਏਤ੍ਤਕਂ ਵਤ੍ਵਾ ਨਿਵਤ੍ਤੋ. ਤਤੋ ਤਮਞ੍ਞੋ ‘‘ਕਿਂ ਆਚਰਿਯੋ ਆਹਾ’’ਤਿ ਪੁਚ੍ਛਿਤ੍ਵਾ ਤੇਨ ਵੁਤ੍ਤਂ – ਅਸਦ੍ਦਹਨ੍ਤੋ ‘‘ਨ ਮੇਸੋ ਯਥਾਭੂਤਂ ਕਥੇਤੀ’’ਤਿ ਤੇਨ ਸਦ੍ਧਿਂ ਭਿਜ੍ਜਿ.

ਬ੍ਰਾਹ੍ਮਣੋ ਅਪਰਮ੍ਪਿ ਏਕਦਿਵਸਂ ਏਕਂ ਲਿਚ੍ਛਵਿਂ ਏਕਮਨ੍ਤਂ ਨੇਤ੍ਵਾ ‘‘ਕੇਨ ਬ੍ਯਞ੍ਜਨੇਨ ਭੁਤ੍ਤੋਸੀ’’ਤਿ ਪੁਚ੍ਛਿਤ੍ਵਾ ਨਿਵਤ੍ਤੋ. ਤਮ੍ਪਿ ਅਞ੍ਞੋ ਪੁਚ੍ਛਿਤ੍ਵਾ ਅਸਦ੍ਦਹਨ੍ਤੋ ਤਥੇਵ ਭਿਜ੍ਜਿ. ਬ੍ਰਾਹ੍ਮਣੋ ਅਪਰਮ੍ਪਿ ਦਿਵਸਂ ਏਕਂ ਲਿਚ੍ਛਵਿਂ ਏਕਮਨ੍ਤਂ ਨੇਤ੍ਵਾ ‘‘ਅਤਿਦੁਗ੍ਗਤੋਸਿ ਕਿਰਾ’’ਤਿ ਪੁਚ੍ਛਿ. ਕੋ ਏਵਮਾਹਾਤਿ. ਅਸੁਕੋ ਨਾਮ ਲਿਚ੍ਛਵੀਤਿ. ਅਪਰਮ੍ਪਿ ਏਕਮਨ੍ਤਂ ਨੇਤ੍ਵਾ ‘‘ਤ੍ਵਂ ਕਿਰ ਭੀਰੁਜਾਤਿਕੋ’’ਤਿ ਪੁਚ੍ਛਿ. ਕੋ ਏਵਮਾਹਾਤਿ? ਅਸੁਕੋ ਨਾਮ ਲਿਚ੍ਛਵੀਤਿ. ਏਵਂ ਅਞ੍ਞੇਨ ਅਕਥਿਤਮੇਵ ਅਞ੍ਞਸ੍ਸ ਕਥੇਨ੍ਤੋ ਤੀਹਿ ਸਂਵਚ੍ਛਰੇਹਿ ਤੇ ਰਾਜਾਨੋ ਅਞ੍ਞਮਞ੍ਞਂ ਭਿਨ੍ਦਿਤ੍ਵਾ ਯਥਾ ਦ੍ਵੇ ਏਕਮਗ੍ਗੇਨ ਨ ਗਚ੍ਛਨ੍ਤਿ, ਤਥਾ ਕਤ੍ਵਾ ਸਨ੍ਨਿਪਾਤਭੇਰਿਂ ਚਰਾਪੇਸਿ. ਲਿਚ੍ਛਵਿਨੋ ‘‘ਇਸ੍ਸਰਾ ਸਨ੍ਨਿਪਤਨ੍ਤੁ, ਸੂਰਾ ਸਨ੍ਨਿਪਤਨ੍ਤੂ’’ਤਿ ਵਤ੍ਵਾ ਨ ਸਨ੍ਨਿਪਤਿਂਸੁ. ਬ੍ਰਾਹ੍ਮਣੋ ‘‘ਅਯਂ ਦਾਨਿ ਕਾਲੋ, ਸੀਘਂ ਆਗਚ੍ਛਤੂ’’ਤਿ ਰਞ੍ਞੋ ਸਾਸਨਂ ਪੇਸੇਤਿ. ਰਾਜਾ ਸੁਤ੍ਵਾਵ ਬਲਭੇਰਿਂ ਚਰਾਪੇਤ੍ਵਾ ਨਿਕ੍ਖਮਿ. ਵੇਸਾਲਿਕਾ ਸੁਤ੍ਵਾ ‘‘ਰਞ੍ਞੋ ਗਙ੍ਗਂ ਉਤ੍ਤਰਿਤੁਂ ਨ ਦਸ੍ਸਾਮਾ’’ਤਿ ਭੇਰਿਂ ਚਰਾਪੇਸੁਂ. ਤੇ ਸੁਤ੍ਵਾ ‘‘ਗਚ੍ਛਨ੍ਤੁ ਸੂਰਰਾਜਾਨੋ’’ਤਿਆਦੀਨਿ ਵਤ੍ਵਾ ਨ ਸਨ੍ਨਿਪਤਿਂਸੁ. ‘‘ਨਗਰਪ੍ਪਵੇਸਨਂ ਨ ਦਸ੍ਸਾਮ, ਦ੍ਵਾਰਾਨਿ ਪਿਦਹਿਸ੍ਸਾਮਾ’’ਤਿ ਭੇਰਿਂ ਚਰਾਪੇਸੁਂ. ਏਕੋਪਿ ਨ ਸਨ੍ਨਿਪਤਿ. ਯਥਾਵਿਵਟੇਹਿ ਦ੍ਵਾਰੇਹਿ ਪਵਿਸਿਤ੍ਵਾ ਸਬ੍ਬੇ ਅਨਯਬ੍ਯਸਨਂ ਪਾਪੇਤ੍ਵਾ ਗਤੋ. ਤਂ ਸਨ੍ਧਾਯੇਤਂ ਵੁਤ੍ਤਂ – ‘‘ਰਾਜਾਪਿ ਤਮੇਵ ਪੇਸੇਤ੍ਵਾ ਸਬ੍ਬੇਪਿ ਭਿਨ੍ਦਿਤ੍ਵਾ ਗਨ੍ਤ੍ਵਾ ਅਨਯਬ੍ਯਸਨਂ ਪਾਪੇਸੀ’’ਤਿ.

ਵਸ੍ਸਕਾਰਸੁਤ੍ਤਵਣ੍ਣਨਾ ਨਿਟ੍ਠਿਤਾ.