੮. ਅਰਹਤ੍ਤਵਗ੍ਗੋ
੧-੩. ਦੁਕ੍ਖਸੁਤ੍ਤਾਦਿਵਣ੍ਣਨਾ
੭੫-੭੭. ਅਟ੍ਠਮਸ੍ਸ ਪਠਮਾਦੀਸੁ ਨਤ੍ਥਿ ਵਤ੍ਤਬ੍ਬਂ. ਤਤਿਯੇ ਤਿਵਿਧਂ ਕੁਹਨਵਤ੍ਥੁਨ੍ਤਿ ਪਚ੍ਚਯਪ੍ਪਟਿਸੇਵਨਸਾਮਨ੍ਤਜਪ੍ਪਨਇਰਿਯਾਪਥਪ੍ਪਵਤ੍ਤਨਸਙ੍ਖਾਤਂ ਤਿਵਿਧਂ ਕੁਹਨਵਤ੍ਥੁਂ. ਉਕ੍ਖਿਪਿਤ੍ਵਾਤਿ ‘‘ਮਹਾਕੁਟੁਮ੍ਬਿਕੋ ਮਹਾਨਾਵਿਕੋ ਮਹਾਦਾਨਪਤੀ’’ਤਿਆਦਿਨਾ ਪਗ੍ਗਣ੍ਹਿਤ੍ਵਾ ਲਪਨਂ. ਅਵਕ੍ਖਿਪਿਤ੍ਵਾਤਿ ‘‘ਕਿਂ ਇਮਸ੍ਸ ਜੀਵਿਤਂ, ਬੀਜਭੋਜਨੋ ਨਾਮਾਯ’’ਨ੍ਤਿ ਹੀਲ਼ੇਤ੍ਵਾ ਲਪਨਂ.
ਦੁਕ੍ਖਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੪. ਸੁਖਸੋਮਨਸ੍ਸਸੁਤ੍ਤਵਣ੍ਣਨਾ
੭੮. ਚਤੁਤ੍ਥੇ ਯਥਾਵੁਤ੍ਤਧਮ੍ਮਾਦੀਸੁ ਤਸ੍ਸ ਕਿਲੇਸਨਿਮਿਤ੍ਤਂ ਦੁਕ੍ਖਂ ਅਨਵਸ੍ਸਨਨ੍ਤਿ ‘‘ਸੁਖਸੋਮਨਸ੍ਸਬਹੁਲੋ ਵਿਹਰਤੀ’’ਤਿ ਵੁਤ੍ਤਂ. ਕਾਯਿਕਸੁਖਞ੍ਚੇਵ ਚੇਤਸਿਕਸੋਮਨਸ੍ਸਞ੍ਚ ਬਹੁਲਂ ਅਸ੍ਸਾਤਿ ਸੁਖਸੋਮਨਸ੍ਸਬਹੁਲੋ. ਯਵਤਿ ਤੇਨ ਫਲਂ ਮਿਸ੍ਸਿਤਂ ਵਿਯ ਹੋਤੀਤਿ ਯੋਨਿ, ਏਕਨ੍ਤਿਕਂ ਕਾਰਣਂ. ਅਸ੍ਸਾਤਿ ਯਥਾਵੁਤ੍ਤਸ੍ਸ ਭਿਕ੍ਖੁਨੋ. ਪਰਿਪੁਣ੍ਣਨ੍ਤਿ ਅਵਿਕਲਂ ਅਨਵਸੇਸਂ.
ਸੁਖਸੋਮਨਸ੍ਸਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੫. ਅਧਿਗਮਸੁਤ੍ਤਵਣ੍ਣਨਾ
੭੯. ਪਞ੍ਚਮੇ ਆਗਚ੍ਛਨ੍ਤਿ ਏਤੇਨ ਕੁਸਲਾ ਵਾ ਅਕੁਸਲਾ ਵਾਤਿ ਆਗਮਨਂ, ਕੁਸਲਾਕੁਸਲਾਨਂ ਉਪ੍ਪਤ੍ਤਿਕਾਰਣਂ. ਤਤ੍ਥ ਕੁਸਲੋਤਿ ਆਗਮਨਕੁਸਲੋ. ਏਵਂ ਧਮ੍ਮੇ ਮਨਸਿਕਰੋਤੋ ਕੁਸਲਾ ਵਾ ਅਕੁਸਲਾ ਵਾ ਧਮ੍ਮਾ ਅਭਿਵਡ੍ਢਨ੍ਤੀਤਿ ਏਵਂ ਜਾਨਨ੍ਤੋ. ਅਪਗਚ੍ਛਨ੍ਤਿ ਕੁਸਲਾ ਵਾ ਅਕੁਸਲਾ ਵਾ ਏਤੇਨਾਤਿ ਅਪਗਮਨਂ. ਤੇਸਂ ਏਵ ਅਨੁਪ੍ਪਤ੍ਤਿਕਾਰਣਂ, ਤਤ੍ਥ ਕੁਸਲੋਤਿ ਅਪਗਮਨਕੁਸਲੋ. ਏਵਂ ਧਮ੍ਮੇ ਮਨਸਿਕਰੋਤੋ ਕੁਸਲਾ ਵਾ ਅਕੁਸਲਾ ਵਾ ਧਮ੍ਮਾ ਨਾਭਿਵਡ੍ਢਨ੍ਤੀਤਿ ਏਵਂ ਜਾਨਨ੍ਤੋ. ਉਪਾਯਕੁਸਲੋਤਿ ਠਾਨੁਪ੍ਪਤ੍ਤਿਕਪਞ੍ਞਾਸਮਨ੍ਨਾਗਤੋ. ਇਦਞ੍ਚ ਅਚ੍ਚਾਯਿਕਕਿਚ੍ਚੇ ਵਾ ਭਯੇ ਵਾ ਉਪ੍ਪਨ੍ਨੇ ਤਸ੍ਸ ਤਿਕਿਚ੍ਛਨਤ੍ਥਂ ਠਾਨੁਪ੍ਪਤ੍ਤਿਯਾ ਕਾਰਣਜਾਨਨਵਸੇਨ ਵੇਦਿਤਬ੍ਬਂ.
ਅਧਿਗਮਸੁਤ੍ਤਵਣ੍ਣਨਾ ਨਿਟ੍ਠਿਤਾ.
੬-੭. ਮਹਨ੍ਤਤ੍ਤਸੁਤ੍ਤਾਦਿਵਣ੍ਣਨਾ
੮੦-੮੧. ਛਟ੍ਠੇ ਸਮ੍ਪਤ੍ਤੇਤਿ ਕਿਲੇਸੇ ਸਮ੍ਪਤ੍ਤੇ. ਸਤ੍ਤਮਂ ਉਤ੍ਤਾਨਮੇਵ.
ਮਹਨ੍ਤਤ੍ਤਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
੮-੧੦. ਦੁਤਿਯਨਿਰਯਸੁਤ੍ਤਾਦਿਵਣ੍ਣਨਾ
੮੨-੮੪. ਅਟ੍ਠਮੇ ਕਾਯਪਾਗਬ੍ਭਿਯਾਦੀਹੀਤਿ ਆਦਿ-ਸਦ੍ਦੇਨ ਵਚੀਪਾਗਬ੍ਭਿਯਂ ਮਨੋਪਾਗਬ੍ਭਿਯਞ੍ਚ ਸਙ੍ਗਣ੍ਹਾਤਿ. ਨਵਮਾਦੀਨਿ ਉਤ੍ਤਾਨਤ੍ਥਾਨੇਵ.
ਦੁਤਿਯਨਿਰਯਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.
ਅਰਹਤ੍ਤਵਗ੍ਗਵਣ੍ਣਨਾ ਨਿਟ੍ਠਿਤਾ.