੩. ਨਿਸ੍ਸਾਰਣੀਯਸੁਤ੍ਤਵਣ੍ਣਨਾ

੧੩. ਤਤਿਯੇ ਵਡ੍ਢਿਤਾਤਿ ਭਾਵਨਾਪਾਰਿਪੂਰਿਵਸੇਨ ਪਰਿਬ੍ਰੂਹਿਤਾ. ਪੁਨਪ੍ਪੁਨਂ ਕਤਾਤਿ ਭਾਵਨਾਯ ਬਹੁਲੀਕਰਣੇਨ ਅਪਰਾਪਰਂ ਪਵਤ੍ਤਿਤਾ. ਯੁਤ੍ਤਯਾਨਸਦਿਸਾ ਕਤਾਤਿ ਯਥਾ ਯੁਤ੍ਤਮਾਜਞ੍ਞਯਾਨਂ ਛੇਕੇਨ ਸਾਰਥਿਨਾ ਅਧਿਟ੍ਠਿਤਂ ਯਥਾਰੁਚਿ ਪਵਤ੍ਤਤਿ, ਏਵਂ ਯਥਾਰੁਚਿ ਪਵਤ੍ਤਿਰਹਂ ਗਹਿਤਾ. ਵਤ੍ਥੁਕਤਾਤਿ ਵਾ ਅਧਿਟ੍ਠਾਨਟ੍ਠੇਨ ਵਤ੍ਥੁ ਵਿਯ ਕਤਾ, ਸਬ੍ਬਸੋ ਉਪਕ੍ਕਿਲੇਸਵਿਸੋਧਨੇਨ ਇਦ੍ਧਿਵਿਸੇਸਤਾਯ ਪਵਤ੍ਤਿਟ੍ਠਾਨਭਾਵਤੋ ਸੁਵਿਸੋਧਿਤਪਰਿਸ੍ਸਯਵਤ੍ਥੁ ਵਿਯ ਕਤਾਤਿ ਵੁਤ੍ਤਂ ਹੋਤਿ. ਅਧਿਟ੍ਠਿਤਾਤਿ ਪਟਿਪਕ੍ਖਦੂਰੀਭਾਵਤੋ ਸੁਭਾਵਿਤਭਾਵੇਨ ਤਂਤਂਅਧਿਟ੍ਠਾਨਯੋਗ੍ਯਤਾਯ ਠਪਿਤਾ. ਸਮਨ੍ਤਤੋ ਚਿਤਾਤਿ ਸਬ੍ਬਭਾਗੇਨ ਭਾਵਨੂਪਚਯਂ ਗਮਿਤਾ. ਤੇਨਾਹ ‘‘ਉਪਚਿਤਾ’ਤਿ. ਸੁਟ੍ਠੁ ਸਮਾਰਦ੍ਧਾਤਿ ਇਦ੍ਧਿਭਾਵਨਾਸਿਖਾਪ੍ਪਤ੍ਤਿਯਾ ਸਮ੍ਮਦੇਵ ਸਮ੍ਭਾਵਿਤਾ. ਅਭੂਤਬ੍ਯਾਕਰਣਂ ਬ੍ਯਾਕਰੋਤੀਤਿ ‘‘ਮੇਤ੍ਤਾ ਹਿ ਖੋ ਮੇ ਚੇਤੋਵਿਮੁਤ੍ਤਿ ਭਾਵਿਤਾ’’ਤਿਆਦਿਨਾ ਅਤ੍ਤਨਿ ਅਵਿਜ੍ਜਮਾਨਗੁਣਾਭਿਬ੍ਯਾਹਾਰਂ ਬ੍ਯਾਹਰਤਿ. ਚੇਤੋਵਿਮੁਤ੍ਤਿਸਦ੍ਦਂ ਅਪੇਕ੍ਖਿਤ੍ਵਾ ‘‘ਨਿਸ੍ਸਟਾ’’ਤਿ ਵੁਤ੍ਤਂ. ਪੁਨ ਬ੍ਯਾਪਾਦੋ ਨਤ੍ਥੀਤਿ ਇਦਾਨਿ ਮਮ ਬ੍ਯਾਪਾਦੋ ਨਾਮ ਸਬ੍ਬਸੋ ਨਤ੍ਥੀਤਿ ਞਤ੍ਵਾ.

ਬਲਵਵਿਪਸ੍ਸਨਾਤਿ ਭਯਤੁਪਟ੍ਠਾਨੇ ਞਾਣਂ, ਆਦੀਨਵਾਨੁਪਸ੍ਸਨੇ ਞਾਣਂ ਮੁਚ੍ਚਿਤੁਕਮ੍ਯਤਾਞਾਣਂ, ਭਙ੍ਗਞਾਣਨ੍ਤਿ ਚਤੁਨ੍ਨਂ ਞਾਣਾਨਂ ਅਧਿਵਚਨਂ. ਯੇਸਂ ਨਿਮਿਤ੍ਤਾਨਂ ਅਭਾਵੇਨ ਅਰਹਤ੍ਤਫਲਸਮਾਪਤ੍ਤਿਯਾ ਅਨਿਮਿਤ੍ਤਤਾ, ਤਂ ਦਸ੍ਸੇਤੁਂ ‘‘ਸਾ ਹੀ’’ਤਿਆਦਿ ਵੁਤ੍ਤਂ. ਤਤ੍ਥ ਰਾਗਸ੍ਸ ਨਿਮਿਤ੍ਤਂ, ਰਾਗੋ ਏਵ ਵਾ ਨਿਮਿਤ੍ਤਂ ਰਾਗਨਿਮਿਤ੍ਤਂ. ਆਦਿ-ਸਦ੍ਦੇਨ ਦੋਸਨਿਮਿਤ੍ਤਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਰੂਪਵੇਦਨਾਦਿਸਙ੍ਖਾਰਨਿਮਿਤ੍ਤਂ ਰੂਪਨਿਮਿਤ੍ਤਾਦਿ. ਤੇਸਂਯੇਵ ਨਿਚ੍ਚਾਦਿਵਸੇਨ ਉਪਟ੍ਠਾਨਂ ਨਿਚ੍ਚਨਿਮਿਤ੍ਤਾਦਿ. ਤਯਿਦਂ ਨਿਮਿਤ੍ਤਂ ਯਸ੍ਮਾ ਸਬ੍ਬੇਨ ਸਬ੍ਬਂ ਅਰਹਤ੍ਤਫਲੇ ਨਤ੍ਥਿ, ਤਸ੍ਮਾ ਵੁਤ੍ਤਂ ‘‘ਸਾ ਹਿ…ਪੇ… ਅਨਿਮਿਤ੍ਤਾ’’ਤਿ. ਨਿਮਿਤ੍ਤਂ ਅਨੁਸ੍ਸਰਤਿ ਅਨੁਗਚ੍ਛਤਿ ਆਰਬ੍ਭ ਪਵਤ੍ਤਤਿ ਸੀਲੇਨਾਤਿ ਨਿਮਿਤ੍ਤਾਨੁਸਾਰੀ. ਤੇਨਾਹ ‘‘ਵੁਤ੍ਤਪ੍ਪਭੇਦਂ ਨਿਮਿਤ੍ਤਂ ਅਨੁਸਰਣਸਭਾਵ’’ਨ੍ਤਿ.

ਅਸ੍ਮਿਮਾਨੋਤਿ ‘‘ਅਸ੍ਮੀ’’ਤਿ ਪਵਤ੍ਤੋ ਅਤ੍ਤਵਿਸਯੋ ਮਾਨੋ. ਅਯਂ ਨਾਮ ਅਹਮਸ੍ਮੀਤਿ ਰੂਪਲਕ੍ਖਣੋ ਵੇਦਨਾਦੀਸੁ ਵਾ ਅਞ੍ਞਤਰਲਕ੍ਖਣੋ ਅਯਂ ਨਾਮ ਅਤ੍ਤਾ ਅਹਂ ਅਸ੍ਮੀਤਿ. ਅਸ੍ਮਿਮਾਨੋ ਸਮੁਗ੍ਘਾਤੀਯਤਿ ਏਤੇਨਾਤਿ ਅਸ੍ਮਿਮਾਨਸਮੁਗ੍ਘਾਤੋ, ਅਰਹਤ੍ਤਮਗ੍ਗੋ. ਪੁਨ ਅਸ੍ਮਿਮਾਨੋ ਨਤ੍ਥੀਤਿ ਤਸ੍ਸ ਅਨੁਪ੍ਪਤ੍ਤਿਧਮ੍ਮਤਾਪਾਦਨਂ ਕਿਤ੍ਤੇਨ੍ਤੋ ਸਮੁਗ੍ਘਾਤਤ੍ਤਮੇਵ ਵਿਭਾਵੇਤਿ.

ਨਿਸ੍ਸਾਰਣੀਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.