੧. ਪਠਮਸਾਰਣੀਯਸੁਤ੍ਤਵਣ੍ਣਨਾ

੧੧. ਦੁਤਿਯਸ੍ਸ ਪਠਮੇ ਸਰਿਤਬ੍ਬਯੁਤ੍ਤਕਾਤਿ ਅਨੁਸ੍ਸਰਣਾਰਹਾ. ਮਿਜ੍ਜਤਿ ਸਿਨਿਯ੍ਹਤਿ ਏਤਾਯਾਤਿ ਮੇਤ੍ਤਾ, ਮਿਤ੍ਤਭਾਵੋ. ਮੇਤ੍ਤਾ ਏਤਸ੍ਸ ਅਤ੍ਥੀਤਿ ਮੇਤ੍ਤਂ, ਕਾਯਕਮ੍ਮਂ. ਤਂ ਪਨ ਯਸ੍ਮਾ ਮੇਤ੍ਤਾਸਹਗਤਚਿਤ੍ਤਸਮੁਟ੍ਠਾਨਂ, ਤਸ੍ਮਾ ਵੁਤ੍ਤਂ ‘‘ਮੇਤ੍ਤੇਨ ਚਿਤ੍ਤੇਨ ਕਾਤਬ੍ਬਂ ਕਾਯਕਮ੍ਮ’’ਨ੍ਤਿ. ਏਸ ਨਯੋ ਸੇਸਦ੍ਵਯੇਪਿ. ਇਮਾਨੀਤਿ ਮੇਤ੍ਤਕਾਯਕਮ੍ਮਾਦੀਨਿ. ਭਿਕ੍ਖੂਨਂ ਵਸੇਨ ਆਗਤਾਨਿ ਤੇਸਂ ਸੇਟ੍ਠਪਰਿਸਭਾਵਤੋ. ਯਥਾ ਪਨ ਭਿਕ੍ਖੁਨੀਸੁਪਿ ਲਬ੍ਭਨ੍ਤਿ, ਏਵਂ ਗਿਹੀਸੁਪਿ ਲਬ੍ਭਨ੍ਤਿ ਚਤੁਪਰਿਸਸਾਧਾਰਣਤ੍ਤਾਤਿ ਤਂ ਦਸ੍ਸੇਨ੍ਤੋ ‘‘ਭਿਕ੍ਖੂਨਞ੍ਹੀ’’ਤਿਆਦਿਮਾਹ. ਭਿਕ੍ਖੁਨੋ ਸਬ੍ਬਮ੍ਪਿ ਅਨਵਜ੍ਜਕਾਯਕਮ੍ਮਂ ਆਭਿਸਮਾਚਾਰਿਕਕਮ੍ਮਨ੍ਤੋਗਧਮੇਵਾਤਿ ਆਹ ‘‘ਮੇਤ੍ਤੇਨ ਚਿਤ੍ਤੇਨ…ਪੇ… ਕਾਯਕਮ੍ਮਂ ਨਾਮਾ’’ਤਿ. ਭਤ੍ਤਿਵਸੇਨ ਪਵਤ੍ਤਿਯਮਾਨਾ ਚੇਤਿਯਬੋਧੀਨਂ ਵਨ੍ਦਨਾ ਮੇਤ੍ਤਾਸਿਦ੍ਧਾਤਿ ਕਤ੍ਵਾ ਤਦਤ੍ਥਾਯ ਗਮਨਂ ‘‘ਮੇਤ੍ਤਂ ਕਾਯਕਮ੍ਮ’’ਨ੍ਤਿ ਵੁਤ੍ਤਂ. ਆਦਿ-ਸਦ੍ਦੇਨ ਚੇਤਿਯਬੋਧਿਭਿਕ੍ਖੂਸੁ ਵੁਤ੍ਤਾਵਸੇਸਾਪਚਾਯਨਾਦਿਵਸੇਨ ਪਵਤ੍ਤਮੇਤ੍ਤਾਵਸੇਨ ਪਵਤ੍ਤਂ ਕਾਯਿਕਂ ਕਿਰਿਯਂ ਸਙ੍ਗਣ੍ਹਾਤਿ.

ਤੇਪਿਟਕਮ੍ਪਿ ਬੁਦ੍ਧਵਚਨਂ ਕਥਿਯਮਾਨਨ੍ਤਿ ਅਧਿਪ੍ਪਾਯੋ. ਤੇਪਿਟਕਮ੍ਪਿ ਬੁਦ੍ਧਵਚਨਂ ਪਰਿਪੁਚ੍ਛਨਅਤ੍ਥਕਥਨਵਸੇਨ ਪਵਤ੍ਤਿਯਮਾਨਮੇਵ ਮੇਤ੍ਤਂ ਵਚੀਕਮ੍ਮਂ ਨਾਮ ਹਿਤਜ੍ਝਾਸਯੇਨ ਪਵਤ੍ਤਿਤਬ੍ਬਤੋ. ਤੀਣਿ ਸੁਚਰਿਤਾਨੀਤਿ ਕਾਯਵਚੀਮਨੋਸੁਚਰਿਤਾਨਿ. ਚਿਨ੍ਤਨਨ੍ਤਿ ਏਵਂ ਚਿਨ੍ਤਨਮਤ੍ਤਮ੍ਪਿ ਮਨੋਕਮ੍ਮਂ, ਪਗੇਵ ਪਟਿਪਨ੍ਨਾ ਭਾਵਨਾਤਿ ਦਸ੍ਸੇਤਿ.

ਆਵੀਤਿ ਪਕਾਸਂ. ਪਕਾਸਭਾਵੋ ਚੇਤ੍ਥ ਯਂ ਉਦ੍ਦਿਸ੍ਸ ਤਂ ਕਾਯਕਮ੍ਮਂ ਕਰੀਯਤਿ, ਤਸ੍ਸ ਸਮ੍ਮੁਖਭਾਵਤੋਤਿ ਆਹ ‘‘ਸਮ੍ਮੁਖਾ’’ਤਿ. ਰਹੋਤਿ ਅਪ੍ਪਕਾਸਂ. ਅਪ੍ਪਕਾਸਤਾ ਚ ਯਂ ਉਦ੍ਦਿਸ੍ਸ ਤਂ ਕਾਯਕਮ੍ਮਂ ਕਰੀਯਤਿ, ਤਸ੍ਸ ਅਪਚ੍ਚਕ੍ਖਭਾਵਤੋਤਿ ਆਹ ‘‘ਪਰਮ੍ਮੁਖਾ’’ਤਿ. ਸਹਾਯਭਾਵਗਮਨਂ ਤੇਸਂ ਪੁਰਤੋ. ਤੇਸੁ ਕਰੋਨ੍ਤੇਸੁਯੇਵ ਹਿ ਸਹਾਯਭਾਵਗਮਨਂ ਸਮ੍ਮੁਖਾ ਕਾਯਕਮ੍ਮਂ ਨਾਮ ਹੋਤਿ. ਉਭਯੇਹੀਤਿ ਨਵਕੇਹਿ ਥੇਰੇਹਿ ਚ. ਪਗ੍ਗਯ੍ਹਾਤਿ ਪਗ੍ਗਣ੍ਹਿਤ੍ਵਾ ਉਦ੍ਧਂ ਕਤ੍ਵਾ ਕੇਵਲਂ ‘‘ਦੇਵੋ’’ਤਿ ਅਵਤ੍ਵਾ ਗੁਣੇਹਿ ਥਿਰਭਾਵਜੋਤਨਂ ‘‘ਦੇਵਤ੍ਥੇਰੋ’’ਤਿ ਵਚਨਂ ਪਗ੍ਗਯ੍ਹ ਵਚਨਂ. ਮਮਤ੍ਤਬੋਧਨਂ ਵਚਨਂ ਮਮਾਯਨਵਚਨਂ. ਏਕਨ੍ਤਪਰਮ੍ਮੁਖਸ੍ਸ ਮਨੋਕਮ੍ਮਸ੍ਸ ਸਮ੍ਮੁਖਤਾ ਨਾਮ ਵਿਞ੍ਞਤ੍ਤਿਸਮੁਟ੍ਠਾਪਨਵਸੇਨ ਹੋਤਿ, ਤਞ੍ਚ ਖੋ ਲੋਕੇ ਕਾਯਕਮ੍ਮਨ੍ਤਿ ਪਾਕਟਂ ਪਞ੍ਞਾਤਂ. ਹਤ੍ਥਵਿਕਾਰਾਦੀਨਿ ਅਨਾਮਸਿਤ੍ਵਾ ਏਵ ਦਸ੍ਸੇਨ੍ਤੋ ‘‘ਨਯਨਾਨਿ ਉਮ੍ਮੀਲੇਤ੍ਵਾ’’ਤਿਆਦਿਮਾਹ. ਕਾਮਂ ਮੇਤ੍ਤਾਸਿਨੇਹਸਿਨਿਦ੍ਧਾਨਂ ਨਯਨਾਨਂ ਉਮ੍ਮੀਲਨਾ ਪਸਨ੍ਨੇਨ ਮੁਖੇਨ ਓਲੋਕਨਞ੍ਚ ਮੇਤ੍ਤਂ ਕਾਯਕਮ੍ਮਮੇਵ, ਯਸ੍ਸ ਪਨ ਚਿਤ੍ਤਸ੍ਸ ਵਸੇਨ ਨਯਨਾਨਂ ਮੇਤ੍ਤਾਸਿਨੇਹਸਿਨਿਦ੍ਧਤਾ ਮੁਖਸ੍ਸ ਚ ਪਸਨ੍ਨਤਾ, ਤਂ ਸਨ੍ਧਾਯ ਵੁਤ੍ਤਂ ‘‘ਮੇਤ੍ਤਂ ਮਨੋਕਮ੍ਮਂ ਨਾਮਾ’’ਤਿ.

ਲਾਭ-ਸਦ੍ਦੋ ਕਮ੍ਮਸਾਧਨੋ ‘‘ਲਾਭਾ ਵਤ, ਭੋ, ਲਦ੍ਧੋ’’ਤਿਆਦੀਸੁ ਵਿਯ. ਸੋ ਚੇਤ੍ਥ ‘‘ਧਮ੍ਮਲਦ੍ਧਾ’’ਤਿ ਵਚਨਤੋ ਅਤੀਤਕਾਲਿਕੋਤਿ ਆਹ ‘‘ਚੀਵਰਾਦਯੋ ਲਦ੍ਧਪਚ੍ਚਯਾ’’ਤਿ. ਧਮ੍ਮਤੋ ਆਗਤਾਤਿ ਧਮ੍ਮਿਕਾ, ਪਰਿਸੁਦ੍ਧਗਮਨਾ ਪਚ੍ਚਯਾ. ਤੇਨਾਹ ‘‘ਧਮ੍ਮਲਦ੍ਧਾ’’ਤਿ. ਇਮਮੇਵ ਹਿ ਅਤ੍ਥਂ ਦਸ੍ਸੇਤੁਂ ‘‘ਕੁਹਨਾਦੀ’’ਤਿਆਦਿ ਵੁਤ੍ਤਂ. ਨ ਸਮ੍ਮਾ ਗਯ੍ਹਮਾਨਾ ਹਿ ਧਮ੍ਮਲਦ੍ਧਾ ਨਾਮ ਨ ਹੋਨ੍ਤੀਤਿ ਤਪ੍ਪਟਿਸੇਧਨਤ੍ਥਂ ਪਾਲ਼ਿਯਂ ‘‘ਧਮ੍ਮਲਦ੍ਧਾ’’ਤਿ ਵੁਤ੍ਤਂ. ਦੇਯ੍ਯਂ ਦਕ੍ਖਿਣੇਯ੍ਯਞ੍ਚ ਅਪ੍ਪਟਿਵਿਭਤ੍ਤਂ ਕਤ੍ਵਾ ਭੁਞ੍ਜਤੀਤਿ ਅਪ੍ਪਟਿਵਿਭਤ੍ਤਭੋਗੀ ਨਾਮ ਹੋਤਿ. ਤੇਨਾਹ ‘‘ਦ੍ਵੇ ਪਟਿਵਿਭਤ੍ਤਾਨਿ ਨਾਮਾ’’ਤਿਆਦਿ. ਚਿਤ੍ਤੇਨ ਵਿਭਜਨਨ੍ਤਿ ਏਤੇਨ ਚਿਤ੍ਤੁਪ੍ਪਾਦਮਤ੍ਤੇਨਪਿ ਵਿਭਜਨਂ ਪਟਿਵਿਭਤ੍ਤਂ ਨਾਮ, ਪਗੇਵ ਪਯੋਗਤੋਤਿ ਦਸ੍ਸੇਤਿ. ਚਿਤ੍ਤੇਨ ਵਿਭਜਨਪੁਬ੍ਬਕਂ ਵਾ ਕਾਯੇਨ ਵਿਭਜਨਨ੍ਤਿ ਮੂਲਮੇਵ ਦਸ੍ਸੇਤੁਂ ‘‘ਏਵਂ ਚਿਤ੍ਤੇਨ ਵਿਭਜਨ’’ਨ੍ਤਿ ਵੁਤ੍ਤਂ. ਤੇਨ ਚਿਤ੍ਤੁਪ੍ਪਾਦਮਤ੍ਤੇਨ ਪਟਿਵਿਭਾਗੋ ਕਾਤਬ੍ਬੋਤਿ ਦਸ੍ਸੇਤਿ. ਅਪ੍ਪਟਿਵਿਭਤ੍ਤਨ੍ਤਿ ਭਾਵਨਪੁਂਸਕਨਿਦ੍ਦੇਸੋ, ਅਪ੍ਪਟਿਵਿਭਤ੍ਤਂ ਲਾਭਂ ਭੁਞ੍ਜਤੀਤਿ ਕਮ੍ਮਨਿਦ੍ਦੇਸੋ ਵਾ. ਤਂ ਨੇਵ ਗਿਹੀਨਂ ਦੇਤਿ ਅਤ੍ਤਨੋ ਆਜੀਵਸੋਧਨਤ੍ਥਂ. ਨ ਅਤ੍ਤਨਾ ਪਰਿਭੁਞ੍ਜਤਿ ‘‘ਮਯ੍ਹਂ ਅਸਾਧਾਰਣਭੋਗਿਤਾ ਮਾ ਹੋਤੂ’’ਤਿ. ਪਟਿਗ੍ਗਣ੍ਹਨ੍ਤੋ ਚ…ਪੇ… ਪਸ੍ਸਤੀਤਿ ਇਮਿਨਾ ਆਗਮਨਤੋ ਪਟ੍ਠਾਯ ਸਾਧਾਰਣਬੁਦ੍ਧਿਂ ਉਪਟ੍ਠਾਪੇਤਿ. ਏਵਂ ਹਿਸ੍ਸ ਸਾਧਾਰਣਭੋਗਿਤਾ ਸੁਕਰਾ, ਸਾਰਣੀਯਧਮ੍ਮੋ ਚਸ੍ਸ ਪੂਰੋ ਹੋਤਿ.

ਅਥ ਵਾ ਪਟਿਗ੍ਗਣ੍ਹਨ੍ਤੋ ਚ…ਪੇ… ਪਸ੍ਸਤੀਤਿ ਇਮਿਨਾ ਤਸ੍ਸ ਲਾਭਸ੍ਸ ਤੀਸੁ ਕਾਲੇਸੁ ਸਾਧਾਰਣਤੋ ਠਪਨਂ ਦਸ੍ਸਿਤਂ. ਪਟਿਗ੍ਗਣ੍ਹਨ੍ਤੋ ਚ ਸਙ੍ਘੇਨ ਸਾਧਾਰਣਂ ਹੋਤੂਤਿ ਇਮਿਨਾ ਪਟਿਗ੍ਗਹਣਕਾਲੋ ਦਸ੍ਸਿਤੋ. ਗਹੇਤ੍ਵਾ…ਪੇ… ਪਸ੍ਸਤੀਤਿ ਇਮਿਨਾ ਪਟਿਗ੍ਗਹਿਤਕਾਲੋ. ਤਦੁਭਯਂ ਪਨ ਤਾਦਿਸੇਨ ਪੁਬ੍ਬਭਾਗੇਨ ਵਿਨਾ ਨ ਹੋਤੀਤਿ ਅਤ੍ਥਸਿਦ੍ਧੋ ਪੁਰਿਮਕਾਲੋ. ਤਯਿਦਂ ਪਟਿਗ੍ਗਹਣਤੋ ਪੁਬ੍ਬੇਵਸ੍ਸ ਹੋਤਿ ‘‘ਸਙ੍ਘੇਨ ਸਾਧਾਰਣਂ ਹੋਤੂਤਿ ਪਟਿਗ੍ਗਣ੍ਹਿਸ੍ਸਾਮੀ’’ਤਿ, ਪਟਿਗ੍ਗਣ੍ਹਨ੍ਤਸ੍ਸ ਹੋਤਿ ‘‘ਸਙ੍ਘੇਨ ਸਾਧਾਰਣਂ ਹੋਤੂਤਿ ਪਟਿਗ੍ਗਣ੍ਹਾਮੀ’’ਤਿ, ਪਟਿਗ੍ਗਹੇਤ੍ਵਾ ਹੋਤਿ ‘‘ਸਙ੍ਘੇਨ ਸਾਧਾਰਣਂ ਹੋਤੂਤਿ ਹਿ ਪਟਿਗ੍ਗਹਿਤਂ ਮਯਾ’’ਤਿ. ਏਵਂ ਤਿਲਕ੍ਖਣਸਮ੍ਪਨ੍ਨਂ ਕਤ੍ਵਾ ਲਦ੍ਧਂ ਲਾਭਂ ਓਸਾਰਣਲਕ੍ਖਣਂ ਅਵਿਕੋਪੇਤ੍ਵਾ ਪਰਿਭੁਞ੍ਜਨ੍ਤੋ ਸਾਧਾਰਣਭੋਗੀ ਅਪ੍ਪਟਿਵਿਭਤ੍ਤਭੋਗੀ ਚ ਹੋਤਿ.

ਇਮਂ ਪਨ ਸਾਰਣੀਯਧਮ੍ਮਨ੍ਤਿ ਇਮਂ ਚਤੁਤ੍ਥਂ ਸਰਿਤਬ੍ਬਯੁਤ੍ਤਧਮਂ. ਨ ਹਿ…ਪੇ… ਗਣ੍ਹਨ੍ਤਿ, ਤਸ੍ਮਾ ਸਾਧਾਰਣਭੋਗਿਤਾ ਦੁਸ੍ਸੀਲਸ੍ਸ ਨਤ੍ਥੀਤਿ ਆਰਮ੍ਭੋਪਿ ਤਾਵ ਨ ਸਮ੍ਭਵਤਿ, ਕੁਤੋ ਪੂਰਣਨ੍ਤਿ ਅਧਿਪ੍ਪਾਯੋ. ਪਰਿਸੁਦ੍ਧਸੀਲੋਤਿ ਇਮਿਨਾ ਲਾਭਸ੍ਸ ਧਮ੍ਮਿਕਭਾਵਂ ਦਸ੍ਸੇਤਿ. ਵਤ੍ਤਂ ਅਖਣ੍ਡੇਨ੍ਤੋਤਿ ਇਮਿਨਾ ਅਪ੍ਪਟਿਵਿਭਤ੍ਤਭੋਗਿਤਂ ਸਾਧਾਰਣਭੋਗਿਤਞ੍ਚ ਦਸ੍ਸੇਤਿ. ਸਤਿ ਪਨ ਤਦੁਭਯੇ ਸਾਰਣੀਯਧਮ੍ਮੋ ਪੂਰਿਤੋ ਏਵ ਹੋਤੀਤਿ ਆਹ ‘‘ਪੂਰੇਤੀ’’ਤਿ. ਓਦਿਸ੍ਸਕਂ ਕਤ੍ਵਾਤਿ ਏਤੇਨ ਅਨੋਦਿਸ੍ਸਕਂ ਕਤ੍ਵਾ ਪਿਤੁਨੋ, ਆਚਰਿਯੁਪਜ੍ਝਾਯਾਦੀਨਂ ਵਾ ਥੇਰਾਸਨਤੋ ਪਟ੍ਠਾਯ ਦੇਨ੍ਤਸ੍ਸ ਸਾਰਣੀਯਧਮ੍ਮੋਯੇਵ ਹੋਤੀਤਿ ਦਸ੍ਸੇਤਿ. ਦਾਤਬ੍ਬਨ੍ਤਿ ਅਵਸ੍ਸਂ ਦਾਤਬ੍ਬਂ. ਸਾਰਣੀਯਧਮ੍ਮੋ ਪਨਸ੍ਸ ਨ ਹੋਤਿ ਪਟਿਜਗ੍ਗਟ੍ਠਾਨੇ ਓਦਿਸ੍ਸਕਂ ਕਤ੍ਵਾ ਦਿਨ੍ਨਤ੍ਤਾ. ਤੇਨਾਹ ‘‘ਪਲਿਬੋਧਜਗ੍ਗਨਂ ਨਾਮ ਹੋਤੀ’’ਤਿ. ਮੁਤ੍ਤਪਲਿਬੋਧਸ੍ਸ ਵਟ੍ਟਤਿ ਅਮੁਤ੍ਤਪਲਿਬੋਧਸ੍ਸ ਪੂਰੇਤੁਂ ਅਸਕ੍ਕੁਣੇਯ੍ਯਤ੍ਤਾ. ਯਦਿ ਏਵਂ ਸਬ੍ਬੇਨ ਸਬ੍ਬਂ ਸਾਰਣੀਯਧਮ੍ਮਂ ਪੂਰੇਨ੍ਤਸ੍ਸ ਓਦਿਸ੍ਸਕਦਾਨਂ ਵਟ੍ਟਤਿ, ਨ ਵਟ੍ਟਤੀਤਿ? ਨੋ ਨ ਵਟ੍ਟਤਿ ਯੁਤ੍ਤਟ੍ਠਾਨੇਤਿ ਦਸ੍ਸੇਨ੍ਤੋ ‘‘ਤੇਨ ਪਨਾ’’ਤਿਆਦਿਮਾਹ. ਇਮਿਨਾ ਓਦਿਸ੍ਸਕਦਾਨਂ ਪਨਸ੍ਸ ਨ ਸਬ੍ਬਤ੍ਥ ਵਾਰਿਤਨ੍ਤਿ ਦਸ੍ਸੇਤਿ. ਗਿਲਾਨਾਦੀਨਞ੍ਹਿ ਓਦਿਸ੍ਸਕਂ ਕਤ੍ਵਾ ਦਾਨਂ ਅਪ੍ਪਟਿਵਿਭਾਗਪਕ੍ਖਿਕਂ ‘‘ਅਸੁਕਸ੍ਸ ਨ ਦਸ੍ਸਾਮੀ’’ਤਿ ਪਟਿਕ੍ਖੇਪਸ੍ਸ ਅਭਾਵਤੋ. ਬ੍ਯਤਿਰੇਕਪ੍ਪਧਾਨੋ ਹਿ ਪਟਿਭਾਗੋ. ਤੇਨਾਹ ‘‘ਅਵਸੇਸ’’ਨ੍ਤਿਆਦਿ. ਅਦਾਤੁਮ੍ਪੀਤਿ ਪਿ-ਸਦ੍ਦੇਨ ਦਾਤੁਮ੍ਪਿ ਵਟ੍ਟਤੀਤਿ ਦਸ੍ਸੇਤਿ. ਤਞ੍ਚ ਖੋ ਕਰੁਣਾਯਨਵਸੇਨ, ਨ ਵਤ੍ਤਪਰਿਪੂਰਣਵਸੇਨ, ਤਸ੍ਮਾ ਦੁਸ੍ਸੀਲਸ੍ਸਪਿ ਅਤ੍ਥਿਕਸ੍ਸ ਸਤਿ ਸਮ੍ਭਵੇ ਦਾਤਬ੍ਬਂ. ਦਾਨਞ੍ਹਿ ਨਾਮ ਨ ਕਸ੍ਸਚਿ ਨਿਵਾਰਿਤਂ.

ਸੁਸਿਕ੍ਖਿਤਾਯਾਤਿ ਸਾਰਣੀਯਪੂਰਣਵਿਧਿਮ੍ਹਿ ਸੁਸਿਕ੍ਖਿਤਾਯ, ਸੁਕੁਸਲਾਯਾਤਿ ਅਤ੍ਥੋ. ਇਦਾਨਿ ਤਸ੍ਸ ਕੋਸਲ੍ਲਂ ਦਸ੍ਸੇਤੁਂ ‘‘ਸੁਸਿਕ੍ਖਿਤਾਯ ਹੀ’’ਤਿਆਦਿ ਵੁਤ੍ਤਂ. ਦ੍ਵਾਦਸਹਿ ਵਸ੍ਸੇਹਿ ਪੂਰੇਹਿ, ਨ ਤਤੋ ਓਰਨ੍ਤਿ ਇਮਿਨਾ ਤਸ੍ਸ ਦੁਪ੍ਪੂਰਤਂ ਦਸ੍ਸੇਤਿ. ਤਥਾ ਹਿ ਸੋ ਮਹਪ੍ਫਲੋ ਮਹਾਨਿਸਂਸੋ ਦਿਟ੍ਠਧਮ੍ਮਿਕੇਹਿਪਿ ਤਾਵਗਰੁਤਰੇਹਿ ਫਲਾਨਿਸਂਸੇਹਿ ਅਨੁਗਤੋਤਿ ਤਂਸਮਙ੍ਗੀ ਚ ਪੁਗ੍ਗਲੋ ਵਿਸੇਸਲਾਭੀ ਅਰਿਯਪੁਗ੍ਗਲੋ ਵਿਯ ਲੋਕੇ ਅਚ੍ਛਰਿਯਬ੍ਭੁਤਧਮ੍ਮਸਮਨ੍ਨਾਗਤੋ ਹੋਤਿ. ਤਥਾ ਹਿ ਸੋ ਦੁਪ੍ਪਜਹਦਾਨਮਯਸ੍ਸ ਸੀਲਮਯਸ੍ਸ ਪੁਞ੍ਞਸ੍ਸ ਪਟਿਪਕ੍ਖਧਮ੍ਮਂ ਸੁਦੂਰੇ ਵਿਕ੍ਖਮ੍ਭਿਤਂ ਕਤ੍ਵਾ ਵਿਸੁਦ੍ਧੇਨ ਚੇਤਸਾ ਲੋਕੇ ਪਾਕਟੋ ਪਞ੍ਞਾਤੋ ਹੁਤ੍ਵਾ ਵਿਹਰਤਿ. ਤਸ੍ਸਿਮਮਤ੍ਥਂ ਬ੍ਯਤਿਰੇਕਤੋ ਅਨ੍ਵਯਤੋ ਚ ਵਿਭਾਵੇਤੁਂ ‘‘ਸਚੇ ਹੀ’’ਤਿਆਦਿ ਵੁਤ੍ਤਂ. ਤਂ ਸੁਵਿਞ੍ਞੇਯ੍ਯਮੇਵ.

ਇਦਾਨਿਸ੍ਸ ਸਮ੍ਪਰਾਯਿਕੇ ਦਿਟ੍ਠਧਮ੍ਮਿਕੇ ਚ ਆਨਿਸਂਸੇ ਦਸ੍ਸੇਤੁਂ ‘‘ਏਵਂ ਪੂਰਿਤਸਾਰਣੀਯਧਮ੍ਮਸ੍ਸਾ’’ਤਿਆਦਿ ਵੁਤ੍ਤਂ. ਨੇਵ ਇਸ੍ਸਾ ਨ ਮਚ੍ਛਰਿਯਂ ਹੋਤਿ ਚਿਰਕਾਲਭਾਵਨਾਯ ਵਿਧੁਤਭਾਵਤੋ. ਮਨੁਸ੍ਸਾਨਂ ਪਿਯੋ ਹੋਤਿ ਪਰਿਚ੍ਚਾਗਸੀਲਤਾਯ ਵਿਸ੍ਸੁਤਤ੍ਤਾ. ਤੇਨਾਹ ‘‘ਦਦਂ ਪਿਯੋ ਹੋਤਿ ਭਜਨ੍ਤਿ ਨਂ ਬਹੂ’’ਤਿਆਦਿ (ਅ. ਨਿ. ੫.੩੪). ਸੁਲਭਪਚ੍ਚਯੋ ਹੋਤਿ ਦਾਨਵਸੇਨ ਉਲ਼ਾਰਜ੍ਝਾਸਯਾਨਂ ਪਚ੍ਚਯਲਾਭਸ੍ਸ ਇਧਾਨਿਸਂਸਸਭਾਵਤੋ ਦਾਨਸ੍ਸ. ਪਤ੍ਤਗਤਮਸ੍ਸ ਦਿਯ੍ਯਮਾਨਂ ਨ ਖੀਯਤਿ ਪਤ੍ਤਗਤਸ੍ਸੇਵ ਦ੍ਵਾਦਸਵਸ੍ਸਿਕਸ੍ਸ ਮਹਾਵਤ੍ਤਸ੍ਸ ਅਵਿਚ੍ਛੇਦੇਨ ਪੂਰਿਤਤ੍ਤਾ. ਅਗ੍ਗਭਣ੍ਡਂ ਲਭਤਿ ਦੇਵਸਿਕਂ ਦਕ੍ਖਿਣੇਯ੍ਯਾਨਂ ਅਗ੍ਗਤੋ ਪਟ੍ਠਾਯ ਦਾਨਸ੍ਸ ਦਿਨ੍ਨਤ੍ਤਾ. ਭਯੇ ਵਾ…ਪੇ… ਆਪਜ੍ਜਨ੍ਤਿ ਦੇਯ੍ਯਪ੍ਪਟਿਗ੍ਗਾਹਕਵਿਕਪ੍ਪਂ ਅਕਤ੍ਵਾ ਅਤ੍ਤਨਿ ਨਿਰਪੇਕ੍ਖਚਿਤ੍ਤੇਨ ਚਿਰਕਾਲਂ ਦਾਨਸ੍ਸ ਪੂਰਿਤਤਾਯ ਪਸਾਰਿਤਚਿਤ੍ਤਤ੍ਤਾ.

ਤਤ੍ਰਾਤਿ ਤੇਸੁ ਆਨਿਸਂਸੇਸੁ ਵਿਭਾਵੇਤਬ੍ਬੇਸੁ. ਇਮਾਨਿ ਫਲਾਨਿ ਵਤ੍ਥੂਨਿ ਕਾਰਣਾਨਿ. ਮਹਾਗਿਰਿਗਾਮੋ ਨਾਮ ਨਾਗਦੀਪਪਸ੍ਸੇ ਏਕੋ ਗਾਮੋਵ. ਅਲਭਨ੍ਤਾਪੀਤਿ ਅਪ੍ਪਪੁਞ੍ਞਤਾਯ ਅਲਾਭਿਨੋ ਸਮਾਨਾਪਿ. ਭਿਕ੍ਖਾਚਾਰਮਗ੍ਗਸਭਾਗਨ੍ਤਿ ਸਭਾਗਂ ਤਬ੍ਭਾਗਿਯਂ ਭਿਕ੍ਖਾਚਾਰਮਗ੍ਗਂ ਜਾਨਨ੍ਤਿ. ਅਨੁਤ੍ਤਰਿਮਨੁਸ੍ਸਧਮ੍ਮਤ੍ਤਾ ਥੇਰਾਨਂ ਸਂਸਯਵਿਨੋਦਨਤ੍ਥਞ੍ਚ ‘‘ਸਾਰਣੀਯਧਮ੍ਮੋ ਮੇ, ਭਨ੍ਤੇ, ਪੂਰਿਤੋ’’ਤਿ ਆਹ. ਤਥਾ ਹਿ ਦੁਤਿਯਵਤ੍ਥੁਸ੍ਮਿਮ੍ਪਿ ਥੇਰੇਨ ਅਤ੍ਤਾ ਪਕਾਸਿਤੋ. ਦਹਰਕਾਲੇ ਏਵਂ ਕਿਰ ਸਾਰਣੀਯਧਮ੍ਮਪੂਰਕੋ ਅਹੋਸਿ. ਮਨੁਸ੍ਸਾਨਂ ਪਿਯਤਾਯ ਸੁਲਭਪਚ੍ਚਯਤਾਯਪਿ ਇਦਂ ਵਤ੍ਥੁਮੇਵ. ਪਤ੍ਤਗਤਾਖੀਯਨਸ੍ਸ ਪਨ ਵਿਸੇਸਂ ਵਿਭਾਵਨਤੋ ‘‘ਇਦਂ ਤਾਵ…ਪੇ… ਏਤ੍ਥ ਵਤ੍ਥੂ’’ਤਿ ਵੁਤ੍ਤਂ.

ਗਿਰਿਭਣ੍ਡਮਹਾਪੂਜਾਯਾਤਿ ਚੇਤਿਯਗਿਰਿਮ੍ਹਿ ਸਕਲਲਙ੍ਕਾਦੀਪੇ ਯੋਜਨਪ੍ਪਮਾਣੇ ਸਮੁਦ੍ਦੇ ਚ ਨਾਵਾਸਙ੍ਘਾਟਾਦਿਕੇ ਠਪੇਤ੍ਵਾ ਦੀਪਪੁਪ੍ਫਗਨ੍ਧਾਦੀਹਿ ਕਰਿਯਮਾਨਾਯ ਮਹਾਪੂਜਾਯ. ਤਸ੍ਸਾ ਚ ਪਟਿਪਤ੍ਤਿਯਾ ਅਵਞ੍ਝਭਾਵਵਿਭਾਵਨਤ੍ਥਂ ‘‘ਏਤੇ ਮਯ੍ਹਂ ਪਾਪੁਣਿਸ੍ਸਨ੍ਤੀ’’ਤਿ ਆਹ. ਪਰਿਯਾਯੇਨਪਿ ਲੇਸੇਨਪਿ. ਅਨੁਚ੍ਛਵਿਕਨ੍ਤਿ ‘‘ਸਾਰਣੀਯਧਮ੍ਮਪੂਰਕੋ’’ਤਿ ਯਥਾਭੂਤਪਵੇਦਨਂ ਤੁਮ੍ਹਾਕਂ ਅਨੁਚ੍ਛਵਿਕਨ੍ਤਿ ਅਤ੍ਥੋ.

ਅਨਾਰੋਚੇਤ੍ਵਾਵ ਪਲਾਯਿਂਸੁ ਚੋਰਭਯੇਨ. ‘‘ਅਤ੍ਤਨੋ ਦੁਜ੍ਜੀਵਿਕਾਯਾ’’ਤਿਪਿ ਵਦਨ੍ਤਿ. ਅਹਂ ਸਾਰਣੀਯਧਮ੍ਮਪੂਰਿਕਾ, ਮਮ ਪਤ੍ਤਪਰਿਯਾਪਨ੍ਨੇਨਪਿ ਸਬ੍ਬਾਪਿਮਾ ਭਿਕ੍ਖੁਨਿਯੋ ਯਾਪੇਸ੍ਸਨ੍ਤੀਤਿ ਆਹ ‘‘ਮਾ ਤੁਮ੍ਹੇ ਤੇਸਂ ਗਤਭਾਵਂ ਚਿਨ੍ਤਯਿਤ੍ਥਾ’’ਤਿ. ਵਟ੍ਟਿਸ੍ਸਤੀਤਿ ਕਪ੍ਪਿਸ੍ਸਤਿ. ਥੇਰੀ ਸਾਰਣੀਯਧਮ੍ਮਪੂਰਿਕਾ ਅਹੋਸਿ, ਥੇਰਸ੍ਸ ਪਨ ਸੀਲਤੇਜੇਨੇਵ ਦੇਵਤਾ ਉਸ੍ਸੁਕ੍ਕਂ ਆਪਜ੍ਜਿ.

ਨਤ੍ਥਿ ਏਤੇਸਂ ਖਣ੍ਡਨ੍ਤਿ ਅਖਣ੍ਡਾਨਿ. ਤਂ ਪਨ ਨੇਸਂ ਖਣ੍ਡਂ ਦਸ੍ਸੇਤੁਂ ‘‘ਯਸ੍ਸਾ’’ਤਿਆਦਿ ਵੁਤ੍ਤਂ. ਤਤ੍ਥ ਉਪਸਮ੍ਪਨ੍ਨਸੀਲਾਨਂ ਉਦ੍ਦੇਸਕ੍ਕਮੇਨ ਆਦਿਅਨ੍ਤਾ ਵੇਦਿਤਬ੍ਬਾ. ਤੇਨਾਹ ‘‘ਸਤ੍ਤਸੂ’’ਤਿਆਦਿ. ਨ ਹਿ ਅਞ੍ਞੋ ਕੋਚਿ ਆਪਤ੍ਤਿਕ੍ਖਨ੍ਧਾਨਂ ਅਨੁਕ੍ਕਮੋ ਅਤ੍ਥਿ, ਅਨੁਪਸਮ੍ਪਨ੍ਨਸੀਲਾਨਂ ਸਮਾਦਾਨਕ੍ਕਮੇਨਪਿ ਆਦਿਅਨ੍ਤਾ ਲਬ੍ਭਨ੍ਤਿ. ਪਰਿਯਨ੍ਤੇ ਛਿਨ੍ਨਸਾਟਕੋ ਵਿਯਾਤਿ ਤਤ੍ਰਨ੍ਤੇ ਦਸਨ੍ਤੇ ਵਾ ਛਿਨ੍ਨਵਤ੍ਥਂ ਵਿਯ. ਵਿਸਦਿਸੁਦਾਹਰਣਞ੍ਚੇਤਂ ‘‘ਅਖਣ੍ਡਾਨੀ’’ਤਿ ਇਮਸ੍ਸ ਅਧਿਕਤਤ੍ਤਾ. ਏਵਂ ਸੇਸਾਨਮ੍ਪਿ ਉਦਾਹਰਣਾਨਿ. ਖਣ੍ਡਿਕਤਾ ਭਿਨ੍ਨਤਾ ਖਣ੍ਡਂ, ਤਂ ਏਤਸ੍ਸ ਅਤ੍ਥੀਤਿ ਖਣ੍ਡਂ, ਸੀਲਂ. ਛਿਦ੍ਦਨ੍ਤਿਆਦੀਸੁਪਿ ਏਸੇਵ ਨਯੋ. ਵੇਮਜ੍ਝੇ ਭਿਨ੍ਨਂ ਵਿਨਿਵਿਜ੍ਝਨਵਸੇਨ. ਵਿਸਭਾਗਵਣ੍ਣੇਨ ਗਾਵੀ ਵਿਯਾਤਿ ਸਮ੍ਬਨ੍ਧੋ. ਵਿਸਭਾਗਵਣ੍ਣੇਨ ਉਪਡ੍ਢਂ ਤਤਿਯਭਾਗਗਤਂ ਸਮ੍ਭਿਨ੍ਨਵਣ੍ਣਂ ਸਬਲਂ, ਵਿਸਭਾਗਵਣ੍ਣੇਹੇਵ ਬਿਨ੍ਦੂਹਿ ਅਨ੍ਤਰਨ੍ਤਰਾਹਿ ਵਿਮਿਸ੍ਸਂ ਕਮ੍ਮਾਸਂ. ਅਯਂ ਇਮੇਸਂ ਵਿਸੇਸੋ. ਸਬਲਰਹਿਤਾਨਿ ਅਸਬਲਾਨਿ, ਤਥਾ ਅਕਮ੍ਮਾਸਾਨਿ. ਸੀਲਸ੍ਸ ਤਣ੍ਹਾਦਾਸਬ੍ਯਤੋ ਮੋਚਨਂ ਵਿਵਟ੍ਟੂਪਨਿਸ੍ਸਯਭਾਵਾਪਾਦਨਂ, ਤਸ੍ਮਾ ਤਣ੍ਹਾਦਾਸਬ੍ਯਤੋ ਮੋਚਨਵਚਨੇਨ ਤੇਸਂ ਸੀਲਾਨਂ ਵਿਵਟ੍ਟੂਪਨਿਸ੍ਸਯਤਮਾਹ. ਭੁਜਿਸ੍ਸਭਾਵਕਰਣਤੋਤਿ ਇਮਿਨਾ ਭੁਜਿਸ੍ਸਕਰਾਨਿ ਭੁਜਿਸ੍ਸਾਨੀਤਿ ਉਤ੍ਤਰਪਦਲੋਪੇਨਾਯਂ ਨਿਦ੍ਦੇਸੋਤਿ ਦਸ੍ਸੇਤਿ. ਯਸ੍ਮਾ ਵਾ ਤਂਸਮਙ੍ਗਿਪੁਗ੍ਗਲੋ ਸੇਰੀ ਸਯਂਵਸੀ ਭੁਜਿਸ੍ਸੋ ਨਾਮ ਹੋਤਿ, ਤਸ੍ਮਾਪਿ ਭੁਜਿਸ੍ਸਾਨਿ. ਅਵਿਞ੍ਞੂਨਂ ਅਪ੍ਪਮਾਣਤਾਯ ‘‘ਵਿਞ੍ਞੁਪ੍ਪਸਤ੍ਥਾਨੀ’’ਤਿ ਵੁਤ੍ਤਂ. ਸੁਪਰਿਸੁਦ੍ਧਭਾਵੇਨ ਵਾ ਸਮ੍ਪਨ੍ਨਤ੍ਤਾ ਵਿਞ੍ਞੂਹਿ ਪਸਤ੍ਥਾਨੀਤਿ ਵਿਞ੍ਞੁਪ੍ਪਸਤ੍ਥਾਨਿ.

ਤਣ੍ਹਾਦਿਟ੍ਠੀਹਿ ਅਪਰਾਮਟ੍ਠਤ੍ਤਾਤਿ ‘‘ਇਮਿਨਾਹਂ ਸੀਲੇਨ ਦੇਵੋ ਵਾ ਭਵਿਸ੍ਸਾਮਿ ਦੇਵਞ੍ਞਤਰੋ ਵਾ’’ਤਿ ਤਣ੍ਹਾਪਰਾਮਾਸੇਨ, ‘‘ਇਮਿਨਾਹਂ ਸੀਲੇਨ ਦੇਵੋ ਹੁਤ੍ਵਾ ਤਤ੍ਥ ਨਿਚ੍ਚੋ ਧੁਵੋ ਸਸ੍ਸਤੋ ਭਵਿਸ੍ਸਾਮੀ’’ਤਿ ਦਿਟ੍ਠਿਪਰਾਮਾਸੇਨ ਚ ਅਪਰਾਮਟ੍ਠਤ੍ਤਾ. ਪਰਾਮਟ੍ਠੁਨ੍ਤਿ ‘‘ਅਯਂ ਤੇ ਸੀਲੇਸੁ ਦੋਸੋ’’ਤਿ ਚਤੂਸੁ ਵਿਪਤ੍ਤੀਸੁ ਯਾਯ ਕਾਯਚਿ ਵਿਪਤ੍ਤਿਯਾ ਦਸ੍ਸਨੇਨ ਪਰਾਮਟ੍ਠੁਂ, ਅਨੁਦ੍ਧਂਸੇਤੁਂ ਚੋਦੇਤੁਨ੍ਤਿ ਅਤ੍ਥੋ. ਸੀਲਂ ਨਾਮ ਅਵਿਪ੍ਪਟਿਸਾਰਾਦਿਪਾਰਮ੍ਪਰਿਯੇਨ ਯਾਵਦੇਵ ਸਮਾਧਿਸਮ੍ਪਾਦਨਤ੍ਥਨ੍ਤਿ ਆਹ ‘‘ਸਮਾਧਿਸਂਵਤ੍ਤਨਿਕਾਨੀ’’ਤਿ. ਸਮਾਧਿਸਂਵਤ੍ਤਨਪ੍ਪਯੋਜਨਾਨਿ ਸਮਾਧਿਸਂਵਤ੍ਤਨਿਕਾਨਿ.

ਸਮਾਨਭਾਵੋ ਸਾਮਞ੍ਞਂ, ਪਰਿਪੁਣ੍ਣਚਤੁਪਾਰਿਸੁਦ੍ਧਿਭਾਵੇਨ ਮਜ੍ਝੇ ਭਿਨ੍ਨਸੁਵਣ੍ਣਸ੍ਸ ਵਿਯ ਭੇਦਾਭਾਵਤੋ ਸੀਲੇਨ ਸਾਮਞ੍ਞਂ ਸੀਲਸਾਮਞ੍ਞਂ, ਤਂ ਗਤੋ ਉਪਗਤੋਤਿ ਸੀਲਸਾਮਞ੍ਞਗਤੋ. ਤੇਨਾਹ ‘‘ਸਮਾਨਭਾਵੂਪਗਤਸੀਲੋ’’ਤਿ, ਸੀਲਸਮ੍ਪਤ੍ਤਿਯਾ ਸਮਾਨਭਾਵਂ ਉਪਗਤਸੀਲੋ ਸਭਾਗਵੁਤ੍ਤਿਕੋਤਿ ਅਤ੍ਥੋ. ਕਾਮਂ ਪੁਥੁਜ੍ਜਨਾਨਮ੍ਪਿ ਚਤੁਪਾਰਿਸੁਦ੍ਧਿਸੀਲੇ ਨਾਨਤ੍ਤਂ ਨ ਸਿਯਾ, ਤਂ ਪਨ ਨ ਏਕਨ੍ਤਿਕਂ, ਇਦਂ ਏਕਨ੍ਤਿਕਂ ਨਿਯਤਭਾਵਤੋਤਿ ਆਹ ‘‘ਨਤ੍ਥਿ ਮਗ੍ਗਸੀਲੇ ਨਾਨਤ੍ਤ’’ਨ੍ਤਿ. ਤਂ ਸਨ੍ਧਾਯੇਤਂ ਵੁਤ੍ਤਨ੍ਤਿ ਮਗ੍ਗਸੀਲਂ ਸਨ੍ਧਾਯ ਤਂ ‘‘ਯਾਨਿ ਤਾਨਿ ਸੀਲਾਨੀ’’ਤਿਆਦਿ ਵੁਤ੍ਤਂ.

ਯਾਯਨ੍ਤਿ ਯਾ ਅਯਂ ਮਯ੍ਹਞ੍ਚੇਵ ਤੁਮ੍ਹਾਕਞ੍ਚ ਪਚ੍ਚਕ੍ਖਭੂਤਾ. ਦਿਟ੍ਠੀਤਿ ਮਗ੍ਗਸਮ੍ਮਾਦਿਟ੍ਠਿ. ਨਿਦ੍ਦੋਸਾਤਿ ਨਿਦ੍ਧੁਤਦੋਸਾ, ਸਮੁਚ੍ਛਿਨ੍ਨਰਾਗਾਦਿਪਾਪਧਮ੍ਮਾਤਿ ਅਤ੍ਥੋ. ਨਿਯ੍ਯਾਤੀਤਿ ਵਟ੍ਟਦੁਕ੍ਖਤੋ ਨਿਸ੍ਸਰਤਿ ਨਿਗ੍ਗਚ੍ਛਤਿ. ਸਯਂ ਨਿਯ੍ਯਨ੍ਤੀਯੇਵ ਹਿ ਤਂਸਮਙ੍ਗਿਪੁਗ੍ਗਲਂ ਵਟ੍ਟਦੁਕ੍ਖਤੋ ਨਿਯ੍ਯਾਪੇਤੀਤਿ ਵੁਚ੍ਚਤਿ. ਯਾ ਸਤ੍ਥੁ ਅਨੁਸਿਟ੍ਠਿ, ਤਂ ਕਰੋਤੀਤਿ ਤਕ੍ਕਰੋ, ਤਸ੍ਸ, ਯਥਾਨੁਸਿਟ੍ਠਂ ਪਟਿਪਜ੍ਜਨ੍ਤਸ੍ਸਾਤਿ ਅਤ੍ਥੋ. ਸਮਾਨਦਿਟ੍ਠਿਭਾਵਨ੍ਤਿ ਸਦਿਸਦਿਟ੍ਠਿਭਾਵਂ ਸਚ੍ਚਸਮ੍ਪਟਿਵੇਧੇਨ ਅਭਿਨ੍ਨਦਿਟ੍ਠਿਭਾਵਂ.

ਪਠਮਸਾਰਣੀਯਸੁਤ੍ਤਵਣ੍ਣਨਾ ਨਿਟ੍ਠਿਤਾ.