੯-੧੦. ਪਠਮਕਥਾਵਤ੍ਥੁਸੁਤ੍ਤਾਦਿਵਣ੍ਣਨਾ

੬੯-੭੦. ਨਵਮੇ (ਦੀ. ਨਿ. ਟੀ. ੧.੧੭; ਦੀ. ਨਿ. ਅਭਿ. ਟੀ. ੧.੧੭; ਸਂ. ਨਿ. ਟੀ. ੨.੫.੧੦੮੦) ਦੁਗ੍ਗਤਿਤੋ ਸਂਸਾਰਤੋ ਚ ਨਿਯ੍ਯਾਤਿ ਏਤੇਨਾਤਿ ਨਿਯ੍ਯਾਨਂ, ਸਗ੍ਗਮਗ੍ਗੋ, ਮੋਕ੍ਖਮਗ੍ਗੋ ਚ. ਤਂ ਨਿਯ੍ਯਾਨਂ ਅਰਹਤਿ, ਨਿਯ੍ਯਾਨੇ ਵਾ ਨਿਯੁਤ੍ਤਾ, ਨਿਯ੍ਯਾਨਂ ਵਾ ਫਲਭੂਤਂ ਏਤਿਸ੍ਸਾ ਅਤ੍ਥੀਤਿ ਨਿਯ੍ਯਾਨਿਕਾ. ਵਚੀਦੁਚ੍ਚਰਿਤਸਂਕਿਲੇਸਤੋ ਨਿਯ੍ਯਾਤੀਤਿ ਵਾ ਈਕਾਰਸ੍ਸ ਰਸ੍ਸਤ੍ਤਂ, ਯਕਾਰਸ੍ਸ ਚ ਕਕਾਰਂ ਕਤ੍ਵਾ ਨਿਯ੍ਯਾਨਿਕਾ, ਚੇਤਨਾਯ ਸਦ੍ਧਿਂ ਸਮ੍ਫਪ੍ਪਲਾਪਾ ਵੇਰਮਣਿ. ਤਪ੍ਪਟਿਪਕ੍ਖਤੋ ਅਨਿਯ੍ਯਾਨਿਕਾ, ਤਸ੍ਸਾ ਭਾਵੋ ਅਨਿਯ੍ਯਾਨਿਕਤ੍ਤਂ, ਤਸ੍ਮਾ ਅਨਿਯ੍ਯਾਨਿਕਤ੍ਤਾ. ਤਿਰਚ੍ਛਾਨਭੂਤਨ੍ਤਿ ਤਿਰੋਕਰਣਭੂਤਂ. ਗੇਹਸ੍ਸਿਤਕਥਾਤਿ ਗੇਹਪ੍ਪਟਿਸਂਯੁਤ੍ਤਾ. ਕਮ੍ਮਟ੍ਠਾਨਭਾਵੇਤਿ ਅਨਿਚ੍ਚਤਾਪਟਿਸਂਯੁਤ੍ਤਚਤੁਸਚ੍ਚਕਮ੍ਮਟ੍ਠਾਨਭਾਵੇ.

ਸਹ ਅਤ੍ਥੇਨਾਤਿ ਸਾਤ੍ਥਕਂ, ਹਿਤਪ੍ਪਟਿਸਂਯੁਤ੍ਤਨ੍ਤਿ ਅਤ੍ਥੋ. ‘‘ਸੁਰਾਕਥਾ’’ਤਿਪਿ ਪਾਠੋਤਿ ਆਹ ‘‘ਸੁਰਾਕਥਨ੍ਤਿ ਪਾਲ਼ਿਯਂ ਪਨਾ’’ਤਿ. ਸਾ ਪਨੇਸਾ ਕਥਾ ‘‘ਏਵਰੂਪਾ ਨਵਸੁਰਾ ਪੀਤਾ ਰਤਿਜਨਨੀ ਹੋਤੀ’’ਤਿ ਅਸ੍ਸਾਦਵਸੇਨ ਨ ਵਟ੍ਟਤਿ, ਆਦੀਨਵਵਸੇਨ ਪਨ ‘‘ਉਮ੍ਮਤ੍ਤਕਸਂਵਤ੍ਤਨਿਕਾ’’ਤਿਆਦਿਨਾ ਨਯੇਨ ਵਟ੍ਟਤਿ. ਤੇਨਾਹ ‘‘ਅਨੇਕਵਿਧਂ…ਪੇ… ਆਦੀਨਵਵਸੇਨ ਵਟ੍ਟਤੀ’’ਤਿ. ਵਿਸਿਖਾਤਿ ਘਰਸਨ੍ਨਿਵੇਸੋ. ਵਿਸਿਖਾਗਹਣੇਨ ਚ ਤਨ੍ਨਿਵਾਸਿਨੋ ਗਹਿਤਾ ‘‘ਗਾਮੋ ਆਗਤੋ’’ਤਿਆਦੀਸੁ ਵਿਯ. ਤੇਨੇਵਾਹ ‘‘ਸੂਰਾ ਸਮਤ੍ਥਾ’’ਤਿ ਚ ‘‘ਸਦ੍ਧਾ ਪਸਨ੍ਨਾ’’ਤਿ ਚ. ਕੁਮ੍ਭਟ੍ਠਾਨਪ੍ਪਦੇਸੇਨ ਕੁਮ੍ਭਦਾਸਿਯੋ ਵੁਤ੍ਤਾਤਿ ਆਹ ‘‘ਕੁਮ੍ਭਦਾਸਿਕਥਾ ਵਾ’’ਤਿ.

ਰਾਜਕਥਾਦਿਪੁਰਿਮਕਥਾਯ, ਲੋਕਕ੍ਖਾਯਿਕਾਦਿਪਚ੍ਛਿਮਕਥਾਯ ਵਾ ਵਿਨਿਮੁਤ੍ਤਾ ਪੁਰਿਮਪਚ੍ਛਿਮਕਥਾ ਵਿਮੁਤ੍ਤਾ. ਉਪ੍ਪਤ੍ਤਿਠਿਤਿਸਂਹਾਰਾਦਿਵਸੇਨ ਲੋਕਂ ਅਕ੍ਖਾਯਤੀਤਿ ਲੋਕਕ੍ਖਾਯਿਕਾ. ਅਸੁਕੇਨ ਨਾਮਾਤਿ ਪਜਾਪਤਿਨਾ ਬ੍ਰਹ੍ਮੁਨਾ, ਇਸ੍ਸਰੇਨ ਵਾ. ਵਿਤਣ੍ਡਸਲ੍ਲਾਪਕਥਾਤਿ ‘‘ਅਟ੍ਠੀਨਂ ਸੇਤਤ੍ਤਾ ਸੇਤੋਤਿ ਨ ਵਤ੍ਤਬ੍ਬੋ, ਪਤ੍ਤਾਨਂ ਕਾਲ਼ਤ੍ਤਾ ਕਾਲ਼ੋਤਿ ਪਨ ਵਤ੍ਤਬ੍ਬੋ’’ਤਿ ਏਵਮਾਦਿਕਾ. ਆਦਿ-ਸਦ੍ਦੇਨ ‘‘ਸੇਲਪੁਪ੍ਫਲਕਾਨਿ ਵਿਯ ਜੀਵਿਦਾਵਿਰਪਾਰਯਤ੍ਤਿਵਿਸਾਲਾ ਨਤ੍ਥਿ, ਯਂ ਯੋ ਕੋਚਿ ਤਿਰਿਯਾਮਾਨਾ ਕਤਤ੍ਤਾ’’ਤਿ ਏਵਮਾਦੀਨਂ ਸਙ੍ਗਹੋ ਦਟ੍ਠਬ੍ਬੋ. ਸਾਗਰਦੇਵੇਨਾਤਿ ਸਾਗਰਪੁਤ੍ਤਰਾਜੂਹਿ. ਖਤੋਤਿ ਏਤਂ ਏਕਵਚਨਂ ਤੇਹਿ ਪਚ੍ਚੇਕਂ ਖਤਤ੍ਤਾ ‘‘ਸਾਗਰਦੇਵੇਨ ਖਤਤ੍ਤਾ’’ਤਿ ਵੁਤ੍ਤਂ. ਸਹਮੁਦ੍ਦਾ ਸਮੁਦ੍ਦੋਤਿ ਵੁਤ੍ਤੋ. ਭਵਤਿ ਵਦ੍ਧਤਿ ਏਤੇਨਾਤਿ ਭਵੋ. ਭਵਾਭਵਾ ਹੋਨ੍ਤੀਤਿ ਇਤਿਭਵਾਭਵਕਥਾ. ਏਤ੍ਥ ਚ ਭਵੋਤਿ ਸਸ੍ਸਤਂ, ਅਭਵੋਤਿ ਉਚ੍ਛੇਦਂ. ਭਵੋਤਿ ਵੁਦ੍ਧਿ, ਅਭਵੋਤਿ ਹਾਨਿ. ਭਵੋਤਿ ਕਾਮਸੁਖਂ, ਅਭਵੋਤਿ ਅਤ੍ਤਕਿਲਮਥੋਤਿ ਇਤਿ ਇਮਾਯ ਛਬ੍ਬਿਧਾਯ ਇਤਿਭਵਾਭਵਕਥਾਯ ਸਦ੍ਧਿਂ ਬਾਤ੍ਤਿਂਸ ਤਿਰਚ੍ਛਾਨਕਥਾ ਨਾਮ ਹੋਨ੍ਤਿ. ਅਥ ਵਾ ਪਾਲ਼ਿਯਂ ਸਰੂਪਤੋ ਅਨਾਗਤਾਪਿ ਅਰਞ੍ਞਪਬ੍ਬਤਨਦੀਦੀਪਕਥਾ ਇਤਿਸਦ੍ਦੇਨ ਸਙ੍ਗਣ੍ਹਿਤ੍ਵਾ ਬਾਤ੍ਤਿਂਸ ਤਿਰਚ੍ਛਾਨਕਥਾ ਵੁਤ੍ਤਾ. ਦਸਮੇ ਨਤ੍ਥਿ ਵਤ੍ਤਬ੍ਬਂ.

ਪਠਮਕਥਾਵਤ੍ਥੁਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਯਮਕਵਗ੍ਗਵਣ੍ਣਨਾ ਨਿਟ੍ਠਿਤਾ.