(੧੧) ੧. ਸਮਣਸਞ੍ਞਾਵਗ੍ਗੋ

੧-੧੨. ਸਮਣਸਞ੍ਞਾਸੁਤ੍ਤਾਦਿਵਣ੍ਣਨਾ

੧੦੧-੧੧੨. ਤਤਿਯਸ੍ਸ ਪਠਮਾਦੀਨਿ ਉਤ੍ਤਾਨਾਨਿ. ਛਟ੍ਠੇ ਨਿਜ੍ਜਰਕਾਰਣਾਨੀਤਿ ਪਜਹਨਕਾਰਣਾਨਿ. ਇਮਸ੍ਮਿਂ ਮਗ੍ਗੋ ਕਥੀਯਤੀਤਿ ਕਤ੍ਵਾ ‘‘ਅਯਂ ਹੇਟ੍ਠਾ…ਪੇ… ਪੁਨ ਗਹਿਤਾ’’ਤਿ ਵੁਤ੍ਤਂ. ਕਿਞ੍ਚਾਪਿ ਨਿਜ੍ਜਿਣ੍ਣਾ ਮਿਚ੍ਛਾਦਿਟ੍ਠੀਤਿ ਆਨੇਤ੍ਵਾ ਸਮ੍ਬਨ੍ਧਿਤਬ੍ਬਂ. ਯਥਾ ਮਿਚ੍ਛਾਦਿਟ੍ਠਿ ਵਿਪਸ੍ਸਨਾਯ ਨਿਜ੍ਜਿਣ੍ਣਾਪਿ ਨ ਸਮੁਚ੍ਛਿਨ੍ਨਾਤਿ ਸਮੁਚ੍ਛੇਦਪ੍ਪਹਾਨਦਸ੍ਸਨਤ੍ਥਂ ਪੁਨ ਗਹਿਤਾ, ਏਵਂ ਮਿਚ੍ਛਾਸਙ੍ਕਪ੍ਪਾਦਯੋਪਿ ਵਿਪਸ੍ਸਨਾਯ ਪਹੀਨਾਪਿ ਅਸਮੁਚ੍ਛਿਨ੍ਨਤਾਯ ਇਧ ਪੁਨ ਗਹਿਤਾਤਿ ਅਯਮਤ੍ਥੋ ‘‘ਮਿਚ੍ਛਾਸਙ੍ਕਪ੍ਪਸ੍ਸਾ’’ਤਿਆਦੀਸੁ ਸਬ੍ਬਪਦੇਸੁ ਵਤ੍ਤਬ੍ਬੋਤਿ ਦਸ੍ਸੇਤਿ ‘‘ਏਵਂ ਸਬ੍ਬਪਦੇਸੁ ਯੋਜੇਤਬ੍ਬੋ’’ਤਿ ਇਮਿਨਾ. ਏਤ੍ਥ ਚਾਤਿ ‘‘ਸਮ੍ਮਾਵਿਮੁਤ੍ਤਿਪਚ੍ਚਯਾ ਚ ਅਨੇਕੇ ਕੁਸਲਾ ਧਮ੍ਮਾ ਭਾਵਨਾਪਾਰਿਪੂਰਿਂ ਗਚ੍ਛਨ੍ਤੀ’’ਤਿ ਏਤਸ੍ਮਿਂ ਪਾਲ਼ਿਪਦੇ. ਏਤ੍ਥ ਚ ਸਮੁਚ੍ਛੇਦਵਸੇਨ ਚ ਪਟਿਪ੍ਪਸ੍ਸਦ੍ਧਿਵਸੇਨ ਚ ਪਟਿਪਕ੍ਖਧਮ੍ਮਾਨਂ ਸਮ੍ਮਦੇਵ ਵਿਮੁਚ੍ਚਨਂ ਸਮ੍ਮਾਵਿਮੁਤ੍ਤਿ. ਤਪ੍ਪਚ੍ਚਯਾ ਚ ਮਗ੍ਗਫਲੇਸੁ ਅਟ੍ਠ ਇਨ੍ਦ੍ਰਿਯਾਨਿ ਭਾਵਨਾਪਾਰਿਪੂਰਿਂ ਉਪਗਚ੍ਛਨ੍ਤੀਤਿ ਮਗ੍ਗਸਮ੍ਪਯੁਤ੍ਤਾਨਿਪਿ ਸਦ੍ਧਾਦੀਨਿ ਇਨ੍ਦ੍ਰਿਯਾਨਿ ਉਦ੍ਧਟਾਨਿ. ਮਗ੍ਗਵਸੇਨ ਹਿ ਫਲੇਸੁ ਭਾਵਨਾਪਾਰਿਪੂਰੀ ਨਾਮਾਤਿ. ਅਭਿਨਨ੍ਦਨਟ੍ਠੇਨਾਤਿ ਅਤਿਵਿਯ ਸਿਨੇਹਨਟ੍ਠੇਨ. ਇਦਞ੍ਹਿ ਸੋਮਨਸ੍ਸਿਨ੍ਦ੍ਰਿਯਂ ਉਕ੍ਕਂਸਗਤਸਾਤਸਭਾਵਤੋ ਸਮ੍ਪਯੁਤ੍ਤਧਮ੍ਮੇ ਸਿਨੇਹਨ੍ਤਂ ਤੇਮੇਨ੍ਤਂ ਵਿਯ ਪਵਤ੍ਤਤਿ. ਪਵਤ੍ਤਸਨ੍ਤਤਿਆਧਿਪਤੇਯ੍ਯਟ੍ਠੇਨਾਤਿ ਵਿਪਾਕਸਨ੍ਤਾਨਸ੍ਸ ਜੀਵਨੇ ਅਧਿਪਤਿਭਾਵੇਨ. ਏਵਨ੍ਤਿਆਦਿ ਵੁਤ੍ਤਸ੍ਸੇਵ ਅਤ੍ਥਸ੍ਸ ਨਿਗਮਨਂ. ਸਤ੍ਤਮਾਦੀਨਿ ਉਤ੍ਤਾਨਤ੍ਥਾਨਿ.

ਸਮਣਸਞ੍ਞਾਸੁਤ੍ਤਾਦਿਵਣ੍ਣਨਾ ਨਿਟ੍ਠਿਤਾ.

ਸਮਣਸਞ੍ਞਾਵਗ੍ਗਵਣ੍ਣਨਾ ਨਿਟ੍ਠਿਤਾ.