੩. ਅਕਮ੍ਮਨਿਯਵਗ੍ਗਵਣ੍ਣਨਾ

੨੧. ਤਤਿਯਸ੍ਸ ਪਠਮੇ ਅਭਾਵਿਤਨ੍ਤਿ ਸਮਥਵਿਪਸ੍ਸਨਾਭਾਵਨਾਵਸੇਨ ਨ ਭਾਵਿਤਂ ਤਥਾ ਅਭਾਵਿਤਤ੍ਤਾ. ਤਞ੍ਹਿ ‘‘ਅਵਡ੍ਢਿਤ’’ਨ੍ਤਿ ਵੁਚ੍ਚਤਿ ਪਟਿਪਕ੍ਖਾਭਿਭਵੇਨ ਪਰਿਬ੍ਰੂਹਨਾਭਾਵਤੋ. ਤੇਨਾਹ ਭਗਵਾ – ‘‘ਅਕਮ੍ਮਨਿਯਂ ਹੋਤੀ’’ਤਿ.

੨੨. ਦੁਤਿਯੇ ਵੁਤ੍ਤਵਿਪਰਿਯਾਯੇਨ ਅਤ੍ਥੋ ਵੇਦਿਤਬ੍ਬੋ. ਪਠਮੇਤਿ ਤਤਿਯਵਗ੍ਗਸ੍ਸ ਪਠਮਸੁਤ੍ਤੇ. ਵਟ੍ਟਵਸੇਨਾਤਿ ਵਿਪਾਕਵਟ੍ਟਵਸੇਨ. ਤੇਭੂਮਕਵਟ੍ਟਨ੍ਤਿ ਤੇਭੂਮਕਵਿਪਾਕਵਟ੍ਟਂ. ਵਟ੍ਟਪਟਿਲਾਭਾਯ ਕਮ੍ਮਨ੍ਤਿ ਵਿਪਾਕਵਟ੍ਟਸ੍ਸ ਪਟਿਲਾਭਾਯ ਉਪਨਿਸ੍ਸਯਭੂਤਂ ਕਮ੍ਮਂ, ਤਸ੍ਸ ਸਹਾਯਭੂਤਂ ਕਿਲੇਸਵਟ੍ਟਮ੍ਪਿ ਕਮ੍ਮਗ੍ਗਹਣੇਨੇਵ ਸਙ੍ਗਹਿਤਨ੍ਤਿ ਦਟ੍ਠਬ੍ਬਂ. ਵਿਵਟ੍ਟਪਟਿਲਾਭਾਯ ਕਮ੍ਮਨ੍ਤਿ ਵਿਵਟ੍ਟਾਧਿਗਮਸ੍ਸ ਉਪਨਿਸ੍ਸਯਭੂਤਂ ਕਮ੍ਮਂ. ਯਂ ਪਨ ਚਰਿਮਭਵਨਿਬ੍ਬਤ੍ਤਕਂ ਕਮ੍ਮਂ, ਤਂ ਵਿਵਟ੍ਟਪ੍ਪਟਿਲਾਭਾਯ ਕਮ੍ਮਂ ਹੋਤਿ, ਨ ਹੋਤੀਤਿ? ਨ ਹੋਤਿ ਵਟ੍ਟਪਾਦਕਭਾਵਤੋ. ਚਰਿਮਭਵਪਟਿਸਨ੍ਧਿ ਵਿਯ ਪਨ ਵਿਵਟ੍ਟੂਪਨਿਸ੍ਸਯੋਤਿ ਸਕ੍ਕਾ ਵਿਞ੍ਞਾਤੁਂ. ਨ ਹਿ ਕਦਾਚਿ ਤਿਹੇਤੁਕਪਟਿਸਨ੍ਧਿਯਾ ਵਿਨਾ ਵਿਸੇਸਾਧਿਗਮੋ ਸਮ੍ਭਵਤਿ. ਇਮੇਸੁ ਸੁਤ੍ਤੇਸੂਤਿ ਇਮੇਸੁ ਪਨ ਪਠਮਦੁਤਿਯਸੁਤ੍ਤੇਸੁ ਯਥਾਕ੍ਕਮਂ ਵਟ੍ਟਵਿਵਟ੍ਟਮੇਵ ਕਥਿਤਂ.

੨੩. ਤਤਿਯੇ ਅਭਾਵਿਤਨ੍ਤਿ ਏਤ੍ਥ ਭਾਵਨਾ ਨਾਮ ਸਮਾਧਿਭਾਵਨਾ. ਸਾ ਯਤ੍ਥ ਆਸਙ੍ਕਿਤਬ੍ਬਾ, ਤਂ ਕਾਮਾਵਚਰਪਠਮਮਹਾਕੁਸਲਚਿਤ੍ਤਾਦਿਅਭਾਵਿਤਨ੍ਤਿ ਅਧਿਪ੍ਪੇਤਨ੍ਤਿ ਆਹ – ‘‘ਦੇਵਮਨੁਸ੍ਸਸਮ੍ਪਤ੍ਤਿਯੋ’’ਤਿਆਦਿ.

੨੪. ਚਤੁਤ੍ਥੇ ਯਸ੍ਮਾ ਚਿਤ੍ਤਨ੍ਤਿ ਵਿਵਟ੍ਟਵਸੇਨੇਵ ਉਪ੍ਪਨ੍ਨਚਿਤ੍ਤਂ ਅਧਿਪ੍ਪੇਤਂ, ਤਸ੍ਮਾ ਜਾਤਿਜਰਾਬ੍ਯਾਧਿਮਰਣਸੋਕਾਦਿਦੁਕ੍ਖਸ੍ਸ ਅਨਿਬ੍ਬਤ੍ਤਨਤੋ ਮਹਤੋ ਅਤ੍ਥਾਯ ਸਂਵਤ੍ਤਤੀਤਿ ਯੋਜਨਾ ਵੇਦਿਤਬ੍ਬਾ.

੨੫-੨੬. ਪਞ੍ਚਮਛਟ੍ਠੇਸੁ ਉਪ੍ਪਨ੍ਨਨ੍ਤਿ ਅਵਿਗਤੁਪ੍ਪਾਦਾਦਿਖਣਤ੍ਤਯਮ੍ਪਿ ਅਭਾਵਿਤਂ ਭਾਵਨਾਰਹਿਤਂ ਅਪਾਤੁਭੂਤਮੇਵ ਪਣ੍ਡਿਤਸਮ੍ਮਤਸ੍ਸ ਉਪ੍ਪਨ੍ਨਕਿਚ੍ਚਸ੍ਸ ਅਸਾਧਨਤੋ ਯਥਾ ‘‘ਅਪੁਤ੍ਤੋ’’ਤਿ. ਸੋ ਹਿ ਸਮਤ੍ਥੋ ਹੁਤ੍ਵਾ ਪਿਤੁ ਪੁਤ੍ਤਕਿਚ੍ਚਂ ਅਸਾਧੇਨ੍ਤੋ ਅਪੁਤ੍ਤੋਤਿ ਲੋਕੇ ਵੁਚ੍ਚਤਿ, ਏਵਂ ਸਮ੍ਪਦਮਿਦਂ. ਤੇਨਾਹ – ‘‘ਕਸ੍ਮਾ’’ਤਿਆਦਿ. ਤੇਸੁ ਧਮ੍ਮੇਸੂਤਿ ਲੋਕੁਤ੍ਤਰਪਾਦਕਜ੍ਝਾਨਾਦੀਸੁ. ਥੇਰੋ ਪਨ ਮਤ੍ਥਕਪ੍ਪਤ੍ਤਮੇਵ ਭਾਵਿਤਂ ਚਿਤ੍ਤਂ ਦਸ੍ਸੇਨ੍ਤੋ ‘‘ਮਗ੍ਗਚਿਤ੍ਤਮੇਵਾ’’ਤਿ ਆਹ.

੨੭-੨੮. ਸਤ੍ਤਮਟ੍ਠਮੇਸੁ ਪੁਨਪ੍ਪੁਨਂ ਅਕਤਨ੍ਤਿ ਭਾਵਨਾਬਹੁਲੀਕਾਰਵਸੇਨ ਪੁਨਪ੍ਪੁਨਂ ਨ ਕਤਂ. ਇਮਾਨਿਪਿ ਦ੍ਵੇਤਿ ਇਮੇਸੁ ਦ੍ਵੀਸੁ ਸੁਤ੍ਤੇਸੁ ਆਗਤਾਨਿ ਇਮਾਨਿਪਿ ਦ੍ਵੇ ਚਿਤ੍ਤਾਨਿ.

੨੯-੩੦. ਨਵਮੇ ਅਧਿਵਹਤੀਤਿ ਆਨੇਤਿ. ਦੁਕ੍ਖੇਨਾਤਿ ਕਿਚ੍ਛੇਨ. ਦੁਪ੍ਪੇਸਨਤੋਤਿ ਦੁਕ੍ਖੇਨ ਪੇਸੇਤਬ੍ਬਤੋ. ਮਤ੍ਥਕਪ੍ਪਤ੍ਤਂ ਵਿਪਸ੍ਸਨਾਸੁਖਂ ਪਾਕਤਿਕਜ੍ਝਾਨਸੁਖਤੋ ਸਨ੍ਤਤਰਪਣੀਤਤਰਮੇਵਾਤਿ ਆਹ – ‘‘ਝਾਨਸੁਖਤੋ ਵਿਪਸ੍ਸਨਾਸੁਖ’’ਨ੍ਤਿ. ਤੇਨਾਹ ਭਗਵਾ –

‘‘ਸੁਞ੍ਞਾਗਾਰਂ ਪਵਿਟ੍ਠਸ੍ਸ, ਸਨ੍ਤਚਿਤ੍ਤਸ੍ਸ ਭਿਕ੍ਖੁਨੋ;

ਅਮਾਨੁਸੀ ਰਤਿ ਹੋਤਿ, ਸਮ੍ਮਾ ਧਮ੍ਮਂ ਵਿਪਸ੍ਸਤੋ.

‘‘ਯਤੋ ਯਤੋ ਸਮ੍ਮਸਤਿ, ਖਨ੍ਧਾਨਂ ਉਦਯਬ੍ਬਯਂ;

ਲਭਤੀ ਪੀਤਿਪਾਮੋਜ੍ਜਂ, ਅਮਤਂ ਤਂ ਵਿਜਾਨਤ’’ਨ੍ਤਿ. (ਧ. ਪ. ੩੭੪);

ਤਞ੍ਹਿ ਚਿਤ੍ਤਂ ਵਿਸ੍ਸਟ੍ਠਇਨ੍ਦਵਜਿਰਸਦਿਸਂ ਅਮੋਘਭਾਵਤੋ.

ਅਕਮ੍ਮਨਿਯਵਗ੍ਗਵਣ੍ਣਨਾ ਨਿਟ੍ਠਿਤਾ.