੧੩. ਤੇਰਸਮੋ ਪਰਿਚ੍ਛੇਦੋ

ਕਾਰਕਪਟਿਵੇਧਨਿਦ੍ਦੇਸੋ

ਏਤ੍ਥਾਹ – ਨਿਦ੍ਦਿਟ੍ਠਾ ਕੁਸਲਾਦਯੋ ਨਾਮ ਧਮ੍ਮਾ, ਨ ਪਨੇਤੇਸਂ ਕਾਰਕੋ ਅਤ੍ਤਾ ਨਿਦ੍ਦਿਟ੍ਠੋ. ਤਸ੍ਸ ਹਿ ਕਾਰਕਸ੍ਸ ਵੇਦਕਸ੍ਸ ਅਤ੍ਤਨੋ ਅਭਾਵੇ ਕੁਸਲਾਕੁਸਲਾਨਂ ਧਮ੍ਮਾਨਂ ਅਭਾਵੋ ਸਿਯਾ, ਤੇਸਮਭਾਵੇ ਤਦਾਯਤ੍ਤਵੁਤ੍ਤੀਨਂ ਤੇਸਂ ਵਿਪਾਕਾਨਮਭਾਵੋ ਹੋਤਿ, ਤਸ੍ਮਾ ਕੁਸਲਾਦੀਨਂ ਧਮ੍ਮਾਨਂ ਦੇਸਨਾ ਨਿਰਤ੍ਥਿਕਾਤਿ? ਅਤ੍ਰ ਵੁਚ੍ਚਤੇ – ਨਾਯਂ ਨਿਰਤ੍ਥਿਕਾ, ਸਾਤ੍ਥਿਕਾਵਾਯਂ ਦੇਸਨਾ. ਯਦਿ ਕਾਰਕਸ੍ਸਾਭਾਵਾ ਕੁਸਲਾਦੀਨਮਭਾਵੋ ਸਿਯਾ, ਤਸ੍ਸ ਪਰਿਕਪ੍ਪਿਤਸ੍ਸ ਅਤ੍ਤਨੋਪਿ ਅਭਾਵੋ ਸਿਯਾ. ਕਿਂ ਕਾਰਣਨ੍ਤਿ ਚੇ? ਤਸ੍ਸ ਅਤ੍ਤਨੋ ਅਞ੍ਞਸ੍ਸ ਕਾਰਕਸ੍ਸਾਭਾਵਤੋ. ਕਾਰਕਾਭਾਵੇਪਿ ਕਤ੍ਤਾ ਅਤ੍ਤਾ ਅਤ੍ਥੀਤਿ ਚੇ? ਤਥਾ ਕੁਸਲਾਦੀਨਮ੍ਪਿ ਅਸਤਿਪਿ ਕਤ੍ਤਰਿ ਅਤ੍ਥਿਤਾ ਉਪਗਨ੍ਤਬ੍ਬਾ, ਕੁਤੋਯਂ ਤਵ ਤਤ੍ਥਾਨੁਰੋਧੋ, ਇਧ ਵਿਰੋਧੋਤਿ. ਅਥਾਪਿ ਯਥਾ ਪਨ ਲੋਕੇ ਕਾਰਕਾਭਾਵੇਪਿ ਪਥਵੀਆਪਤੇਜਉਤੁਆਦਯੋ ਪਟਿਚ੍ਚ ਅਙ੍ਕੁਰਾਦੀਨਂ ਅਭਿਨਿਬ੍ਬਤ੍ਤਿ ਦਿਸ੍ਸਤਿ, ਤਥਾ ਏਤੇਸਮ੍ਪਿ ਕੁਸਲਾਦੀਨਂ ਧਮ੍ਮਾਨਂ ਹੇਤੁਪਚ੍ਚਯਸਾਮਗ੍ਗਿਯਾ ਅਭਿਨਿਬ੍ਬਤ੍ਤਿ ਹੋਤੀਤਿ ਵੇਦਿਤਬ੍ਬਾ.

ਅਥਾਪਿ ਚੇਤ੍ਥ ਤਸ੍ਸਾ ਪਞ੍ਞਾਯ ਪਰਿਕਪ੍ਪਿਤੋ ਨਿਚ੍ਚੋ ਧੁਵੋ ਕੁਸਲਾਦੀਨਂ ਕਤ੍ਤਾ ਅਤ੍ਤਾ ਪਰਮਤ੍ਥਤੋ ਅਤ੍ਥੀਤਿ ਚੇ? ਤਮੁਪਪਰਿਕ੍ਖਿਸ੍ਸਾਮ ਤਾਵ, ਸੋ ਪਨ ਤਾਵ ਅਤ੍ਤਾ ਕਾਰਕੋ ਵੇਦਕੋ ਕਿਂ ਸਚੇਤਨੋ ਵਾ, ਉਦਾਹੁ ਅਚੇਤਨੋ ਵਾਤਿ? ਕਿਞ੍ਚੇਤ੍ਥ – ਯਦਿ ਅਚੇਤਨੋ ਸਿਯਾ, ਪਾਕਾਰਤਰੁਪਾਸਾਣਸਦਿਸੋ ਸਿਯਾ. ਤਸ੍ਸ ਕਾਰਕਵੇਦਕਤ੍ਤਾਭਾਵੋ ਸਿਯਾ. ਯਦਿ ਸਚੇਤਨੋ, ਸੋ ਚੇਤਨਾਯ ਅਞ੍ਞੋ ਵਾ ਸਿਯਾ, ਅਨਞ੍ਞੋ ਵਾ. ਅਥਾਨਞ੍ਞੋ, ਚੇਤਨਾਯ ਨਾਸੇ ਅਤ੍ਤਨੋਪਿ ਨਾਸੋ ਸਿਯਾ. ਕਿਂ ਕਾਰਣਨ੍ਤਿ ਚੇ? ਚੇਤਨਾਯ ਅਨਞ੍ਞਤ੍ਤਾ.

ਅਥਾਪਿ ਭਵਤੋ ਅਧਿਪ੍ਪਾਯੋ ਏਵਂ ਸਿਯਾ, ਅਤ੍ਤਨੋ ਪਨ ਨਾਸੋ ਨ ਭਵਤਿ ਨਿਚ੍ਚਤ੍ਤਾ, ਚੇਤਨਾਯਯੇਵ ਨਾਸੋ ਭਵਤੀਤਿ? ਵੁਚ੍ਚਤੇ – ਅਤ੍ਤਨੋ ਅਨਾਸੇ ਸਤਿ ਚੇਤਨਾਯਪਿ ਨਾਸੋ ਨ ਭਵਤਿ. ਕਿਂ ਕਾਰਣਨ੍ਤਿ ਚੇ? ਚੇਤਨਾਯ ਅਨਞ੍ਞਤ੍ਤਾ. ਚੇਤਨਤ੍ਤਾਨਂ ਅਨਞ੍ਞਤ੍ਤੇ ਸਤਿ ਚੇਤਨਾਯਯੇਵ ਨਾਸੋ ਭਵਤਿ, ਨ ਅਤ੍ਤਨੋਤਿ ਅਯੁਤ੍ਤਮੇਤਂ. ਅਥ ਚੇਤਨਾਯਯੇਵ ਵਿਨਾਸੇ ਵਿਸੇਸਕਾਰਣਂ ਨਤ੍ਥਿ, ਅਤ੍ਤਾਵ ਨਸ੍ਸਤੁ, ਤਿਟ੍ਠਤੁ ਚੇਤਨਾ. ਅਥ ਚੇਤਨਾਯ ਨਾਸੇ ਅਤ੍ਤਨੋ ਨਾਸੋ ਨ ਭਵਤੀਤਿ ਚੇ? ਚੇਤਨਾਯ ਅਤ੍ਤਾ ਅਞ੍ਞੋ ਸਿਯਾ. ਅਥ ਅਞ੍ਞਸ੍ਸ ਅਤ੍ਤਸ੍ਸ ਨਾਸੇ ਸਤਿ ਸਯਂ ਨਾਸੋ ਨ ਭਵਤਿ, ਏਵਞ੍ਚ ਸਤਿ ‘‘ਚੇਤਨਾਯ ਅਨਞ੍ਞੋ ਅਤ੍ਤਾ’’ਤਿ ਤਵ ਪਟਿਞ੍ਞਾ ਹੀਨਾ. ਅਥਾਪਿ ਚੇਤਨਤ੍ਤਾਨਂ ਅਨਞ੍ਞਤ੍ਤੇ ਸਤਿ ਅਤ੍ਤਨੋ ਅਨਾਸੋ ਚੇਤਨਾਯਪਿ ਅਨਾਸੋ ਭਵਤੁ. ਅਥ ਨ ਭਵਤਿ, ਪਟਿਞ੍ਞਾ ਹੀਨਾ. ਅਥ ਵੁਤ੍ਤਪ੍ਪਕਾਰਤੋ ਵਿਪਰੀਤਂ ਵਾ ਸਿਯਾ, ਅਤ੍ਤਾ ਨਸ੍ਸਤੁ, ਚੇਤਨਾ ਤਿਟ੍ਠਤੁ. ਅਥ ਪਨ ਏਵਂ ਨ ਭਵਤੀਤਿ ਚੇ? ਅਨਞ੍ਞਤ੍ਤਪਕ੍ਖਂ ਪਰਿਚ੍ਚਜ. ਅਥ ਪਨ ਨ ਪਰਿਚ੍ਚਜਸਿ, ਪਟਿਞ੍ਞਾਹੀਨੋ ਭਵਸਿ.

ਅਥਾਯਂ ਭਵਤੋ ਅਧਿਪ੍ਪਾਯੋ ਸਿਯਾ ‘‘ਨਾਯਂ ਮਮ ਅਤ੍ਤਾ ਚੇਤਨਾਯ ਅਨਞ੍ਞੋ, ਅਞ੍ਞੋਯੇਵਾ’’ਤਿ? ਤਤ੍ਰ ਵੁਚ੍ਚਤੇ – ਇਧ ਪਨ ਅਞ੍ਞਤ੍ਤਂ ਦੁਵਿਧਂ ਹੋਤਿ ਲਕ੍ਖਣਕਤਮਞ੍ਞਤ੍ਤਞ੍ਚ ਦੇਸਨ੍ਤਰਕਤਮਞ੍ਞਤ੍ਤਞ੍ਚਾਤਿ. ਤਤ੍ਥ ਕਿਂ ਤ੍ਵਂ ਚੇਤਨਤ੍ਤਾਨਂ ਲਕ੍ਖਣਕਤਮਞ੍ਞਤ੍ਤਂ ਵਦੇਸਿ, ਉਦਾਹੁ ਦੇਸਨ੍ਤਰਕਤਮਞ੍ਞਤ੍ਤਨ੍ਤਿ? ਅਹਂ ਲਕ੍ਖਣਕਤਮਞ੍ਞਤ੍ਤਂ ਵਦਾਮੀਤਿ. ਯਥਾ ਹਿ ਰੂਪਰਸਗਨ੍ਧਾਦੀਨਮੇਕਦੇਸੇ ਵਤ੍ਤਮਾਨਾਨਮ੍ਪਿ ਲਕ੍ਖਣਤੋ ਅਞ੍ਞਤ੍ਤਂ ਹੋਤਿ, ਏਵਂ ਚੇਤਨਤ੍ਤਾਨਮੇਕਦੇਸੇ ਵਤ੍ਤਮਾਨਾਨਮ੍ਪਿ ਲਕ੍ਖਣਤੋ ਅਞ੍ਞਤ੍ਤਂ ਹੋਤਿ, ਤਸ੍ਮਾ ਲਕ੍ਖਣਕਤਮਞ੍ਞਤ੍ਤਂ ਵਦਾਮੀਤਿ. ਤਤ੍ਰ ਵੁਚ੍ਚਤੇ – ਯਥਾ ਹਿ ਜਾਤਵੇਦਸ੍ਸ ਡਯ੍ਹਮਾਨੇ ਆਮਕਸਙ੍ਘਟੇ ਆਮਕਵਣ੍ਣਵਿਨਾਸੇ ਰਸਾਦੀਨਂ ਵਿਨਾਸੋ ਭਵਤਿ, ਤਥੇਵ ਚੇਤਨਾਯ ਵਿਨਾਸੇ ਅਤ੍ਤਨੋਪਿ ਵਿਨਾਸੋ ਸਿਯਾ. ਕਿਂ ਕਾਰਣਨ੍ਤਿ ਚੇ? ਰੂਪਰਸਾਦੀਨਂ ਵਿਯ ਏਕਦੇਸਤ੍ਤਾਤਿ.

ਅਥੇਵਂ ਭਵਤੋ ਮਤਿ ਸਿਯਾ ‘‘ਏਕਦੇਸਤ੍ਤੇ ਸਤਿਪਿ ਅਤ੍ਤਨੋ ਪਨ ਨਾਸੋ ਨ ਭਵਤਿ, ਚੇਤਨਾਯਯੇਵ ਵਿਨਾਸੋ ਭਵਤੀ’’ਤਿ? ਅਤ੍ਰ ਵੁਚ੍ਚਤੇ – ਅਤ੍ਤਨੋ ਅਨਾਸੇ ਚੇਤਨਾਯਪਿ ਅਨਾਸੋਵ ਹੋਤਿ. ਕਿਂ ਕਾਰਣਨ੍ਤਿ ਚੇ? ਰੂਪਰਸਾਦੀਨਂ ਵਿਯ ਅਵਿਨਿਬ੍ਭੋਗਤੋ. ਅਥ ਸਮਾਨੇ ਏਕਦੇਸਤ੍ਤੇ ਅਵਿਨਿਬ੍ਭੋਗਭਾਵੇਪਿ ਕੇਨ ਹੇਤੁਨਾ ਚੇਤਨਾਯ ਏਵ ਨਾਸੋ ਭਵਤਿ, ਨ ਪਨ ਅਤ੍ਤਨੋ. ਅਥ ਵਿਸੇਸਕਾਰਣਂ ਨਤ੍ਥਿ, ਤਵ ਲਦ੍ਧਿਯਾ ਅਤ੍ਤਾਵ ਨਸ੍ਸਤੁ, ਤਿਟ੍ਠਤੁ ਚੇਤਨਾ. ਅਥ ਚੇਤਨਾਯ ਨਾਸੇ ਅਤ੍ਤਨੋ ਨਾਸੋ ਨ ਭਵਤਿ, ਉਭਿਨ੍ਨਂ ਏਕਦੇਸਤਾ ਨਤ੍ਥਿ. ਏਵਞ੍ਚ ਸਤਿ ਕੋ ਦੋਸੋਤਿ ਚੇ? ਯਂ ਪਨ ਤਯਾ ਵੁਤ੍ਤਂ, ਯਥਾ ਰੂਪਰਸਗਨ੍ਧਾਦੀਨਂ ਏਕਦੇਸੇ ਵਤ੍ਤਮਾਨਾਨਮ੍ਪਿ ਲਕ੍ਖਣਤੋ ਅਞ੍ਞਤ੍ਤਂ, ਤਥਾ ਚੇਤਨਤ੍ਤਾਨਮੇਕਦੇਸੇ ਵਤ੍ਤਮਾਨਾਨਮ੍ਪਿ ਲਕ੍ਖਣਤੋ ਅਞ੍ਞਤ੍ਤਨ੍ਤਿ? ਤਮਯੁਤ੍ਤਨ੍ਤਿ ਤਵ ਪਟਿਞ੍ਞਾ ਹੀਨਾ. ਅਥ ਰੂਪਰਸਾਦੀਨਂ ਵਿਯ ਸਮਾਨੇਪਿ ਏਕਦੇਸਤ੍ਤੇ ਯਦਿ ਅਤ੍ਤਨੋ ਅਨਾਸੇ ਚੇਤਨਾਯਪਿ ਅਨਾਸੋ ਨ ਭਵਤਿ, ਪਟਿਞ੍ਞਾਹੀਨੋ ਅਸਿ. ਅਥ ਵੁਤ੍ਤਪ੍ਪਕਾਰਤੋ ਵਿਪਰੀਤਂ ਵਾ ਸਿਯਾ, ਤਵ ਅਤ੍ਤਾ ਨਸ੍ਸਤੁ, ਚੇਤਨਾ ਤਿਟ੍ਠਤੁ. ਅਥੇਵਂ ਨ ਭਵਤੀਤਿ ਚੇ? ਏਕਦੇਸਤਾਵ ਨਤ੍ਥੀਤਿ.

ਅਥ ਦੇਸਨ੍ਤਰਕਤਮਞ੍ਞਤ੍ਤਂ ਵਦੇਸਿ, ਚੇਤਨਤ੍ਤਾਨਂ ਅਞ੍ਞਤ੍ਤੇ ਸਤਿ ਘਟਪਟਸਕਟਗੇਹਾਦੀਨਂ ਵਿਯ ਅਞ੍ਞਤ੍ਤਂ ਸਿਯਾ. ਚੇਤਨਾਯ ਵਿਨਾ ਅਨਞ੍ਞਤਾ ਤੇ ਅਤ੍ਤਾ ਨ ਘਟੇਨ ਵਿਨਾ ਪਟੋ ਵਿਯ ਅਞ੍ਞੋ ਸਿਯਾ. ਅਞ੍ਞੋ ਚ ਹਿ ਘਟੋ ਅਞ੍ਞੋ ਚ ਪਟੋਤਿ? ਨ, ਏਵਞ੍ਚ ਸਤਿ ਕੋ ਦੋਸੋਤਿ ਚੇ? ‘‘ਅਚੇਤਨੋ ਅਤ੍ਤਾ’’ਤਿ ਪੁਬ੍ਬੇ ਵੁਤ੍ਤਦੋਸਤੋ ਨ ਪਰਿਮੁਚ੍ਚਤੀਤਿ. ਤਸ੍ਮਾ ਪਰਮਤ੍ਥਤੋ ਨ ਕੋਚਿ ਕਤ੍ਤਾ ਵਾ ਵੇਦਕੋ ਵਾ ਅਤ੍ਤਾ ਅਤ੍ਥੀਤਿ ਦਟ੍ਠਬ੍ਬਨ੍ਤਿ.

ਯਦਿ ਏਵਂ ਅਥ ਕਸ੍ਮਾ ਭਗਵਤਾ –

੭੭੯. ‘‘ਅਸ੍ਮਾ ਲੋਕਾ ਪਰਂ ਲੋਕਂ,

ਸੋ ਚ ਸਨ੍ਧਾਵਤੀ ਨਰੋ;

ਸੋ ਚ ਕਰੋਤਿ ਵੇਦੇਤਿ,

ਸੁਖਦੁਕ੍ਖਂ ਸਯਂਕਤ’’ਨ੍ਤਿ ਚ.

੭੮੦. ‘‘ਸਤ੍ਤੋ ਸਂਸਾਰਮਾਪਨ੍ਨੋ,

ਦੁਕ੍ਖਮਸ੍ਸ ਮਹਬ੍ਭਯਂ;

ਅਤ੍ਥਿ ਮਾਤਾ ਅਤ੍ਥਿ ਪਿਤਾ,

ਅਤ੍ਥਿ ਸਤ੍ਤੋਪਪਾਤਿਕੋ’’ਤਿ ਚ.

੭੮੧. ‘‘ਭਾਰਾ ਹਵੇ ਪਞ੍ਚਕ੍ਖਨ੍ਧਾ,

ਭਾਰਹਾਰੋ ਚ ਪੁਗ੍ਗਲੋ;

ਭਾਰਾਦਾਨਂ ਦੁਕ੍ਖਂ ਲੋਕੇ,

ਭਾਰਨਿਕ੍ਖੇਪਨਂ ਸੁਖ’’ਨ੍ਤਿ ਚ.

੭੮੨. ‘‘ਯਞ੍ਹਿ ਕਰੋਤਿ ਪੁਰਿਸੋ,

ਕਾਯੇਨ ਵਾਚਾ ਉਦ ਚੇਤਸਾ;

ਤਞ੍ਹਿ ਤਸ੍ਸ ਸਕਂ ਹੋਤਿ,

ਤਞ੍ਚ ਆਦਾਯ ਗਚ੍ਛਤੀ’’ਤਿ ਚ.

੭੮੩. ‘‘ਏਕਸ੍ਸੇਕੇਨ ਕਪ੍ਪੇਨ,

ਪੁਗ੍ਗਲਸ੍ਸਟ੍ਠਿਸਞ੍ਚਯੋ;

ਸਿਯਾ ਪਬ੍ਬਤਸਮੋ ਰਾਸਿ,

ਇਤਿ ਵੁਤ੍ਤਂ ਮਹੇਸਿਨਾ’’ਤਿ ਚ.

੭੮੪. ‘‘ਅਸਦ੍ਧੋ ਅਕਤਞ੍ਞੂ ਚ,

ਸਨ੍ਧਿਚ੍ਛੇਦੋ ਚ ਯੋ ਨਰੋ;

ਹਤਾਵਕਾਸੋ ਵਨ੍ਤਾਸੋ,

ਸ ਵੇ ਉਤ੍ਤਮਪੋਰਿਸੋ’’ਤਿ ਚ. –

ਵੁਤ੍ਤਨ੍ਤਿ. ਸਚ੍ਚਂ ਏਵਂ ਵੁਤ੍ਤਂ ਭਗਵਤਾ, ਤਞ੍ਚ ਖੋ ਸਮ੍ਮੁਤਿਵਸੇਨ, ਨ ਪਰਮਤ੍ਥਤੋ. ਨਨੁ ਭਗਵਤਾ ਇਦਮ੍ਪਿ ਵੁਤ੍ਤਂ –

੭੮੫. ‘‘ਕਿਂ ਨੁ ਸਤ੍ਤੋਤਿ ਪਚ੍ਚੇਸਿ, ਮਾਰ ਦਿਟ੍ਠਿਗਤਂ ਨੁ ਤੇ;

ਸੁਦ੍ਧਸਙ੍ਖਾਰਪੁਞ੍ਜੋਯਂ, ਨਯਿਧ ਸਤ੍ਤੁਪਲਬ੍ਭਤੀ’’ਤਿ ਚ.

੭੮੬. ‘‘ਯਥਾਪਿ ਅਙ੍ਗਸਮ੍ਭਾਰਾ,

ਹੋਤਿ ਸਦ੍ਦੋ ਰਥੋ ਇਤਿ;

ਏਵਂ ਖਨ੍ਧੇਸੁ ਸਨ੍ਤੇਸੁ,

ਹੋਤਿ ਸਤ੍ਤੋਤਿ ਸਮ੍ਮੁਤੀ’’ਤਿ ਚ.

ਤਸ੍ਮਾ ਨ ਵਚਨਮਤ੍ਤਮੇਵਾਵਲਮ੍ਬਿਤਬ੍ਬਂ, ਨ ਚ ਦਲ਼੍ਹਮੂਲ਼੍ਹਗਾਹਿਨਾ ਚ ਭਵਿਤਬ੍ਬਂ, ਗਰੁਕੁਲਮੁਪਸੇਵਿਤ੍ਵਾ ਸੁਤ੍ਤਪਦਾਨਂ ਅਧਿਪ੍ਪਾਯੋ ਜਾਨਿਤਬ੍ਬੋ, ਸੁਤ੍ਤਪਦੇਸੁ ਅਭਿਯੋਗੋ ਕਾਤਬ੍ਬੋ. ਦ੍ਵੇ ਸਚ੍ਚਾਨਿ ਭਗਵਤਾ ਵੁਤ੍ਤਾਨਿ – ‘‘ਸਮ੍ਮੁਤਿਸਚ੍ਚਂ, ਪਰਮਤ੍ਥਸਚ੍ਚਞ੍ਚਾ’’ਤਿ. ਤਸ੍ਮਾ ਦ੍ਵੇਪਿ ਸਮ੍ਮੁਤਿਪਰਮਤ੍ਥਸਚ੍ਚਾਨਿ ਅਸਙ੍ਕਰਤੋ ਞਾਤਬ੍ਬਾਨਿ. ਏਵਂ ਅਸਙ੍ਕਰਤੋ ਞਤ੍ਵਾ ਕੋਚਿ ਕਾਰਕੋ ਵਾ ਵੇਦਕੋ ਵਾ ਨਿਚ੍ਚੋ ਧੁਵੋ ਅਤ੍ਤਾ ਪਰਮਤ੍ਥਤੋ ਨਤ੍ਥੀਤਿ ਉਪਪਰਿਕ੍ਖਿਤ੍ਵਾ ਪਚ੍ਚਯਸਾਮਗ੍ਗਿਯਾ ਧਮ੍ਮਾਨਂ ਪਵਤ੍ਤਿਂ ਸਲ੍ਲਕ੍ਖੇਤ੍ਵਾ ਪਣ੍ਡਿਤੇਨ ਕੁਲਪੁਤ੍ਤੇਨ ਅਤ੍ਥਕਾਮੇਨ ਦੁਕ੍ਖਸ੍ਸਨ੍ਤਕਿਰਿਯਾਯ ਪਟਿਪਜ੍ਜਿਤਬ੍ਬਨ੍ਤਿ.

੭੮੭. ਯੋ ਇਮਂ ਗਨ੍ਥਂ ਅਚ੍ਚਨ੍ਤਂ, ਚਿਨ੍ਤੇਤਿ ਸਤਤਮ੍ਪਿ ਸੋ;

ਕਮੇਨ ਪਰਮਾ ਪਞ੍ਞਾ, ਤਸ੍ਸ ਗਚ੍ਛਤਿ ਵੇਪੁਲਂ.

੭੮੮. ਅਤਿਮਤਿਕਰਮਾਧਿਨੀਹਰਂ,

ਵਿਮਤਿਵਿਨਾਸਕਰਂ ਪਿਯਕ੍ਕਰਂ;

ਪਠਤਿ ਸੁਣਤਿ ਯੋ ਸਦਾ ਇਮਂ,

ਵਿਕਸਤਿ ਤਸ੍ਸ ਮਤੀਧ ਭਿਕ੍ਖੁਨੋ.

ਇਤਿ ਅਭਿਧਮ੍ਮਾਵਤਾਰੇ ਕਾਰਕਪਟਿਵੇਧਨਿਦ੍ਦੇਸੋ ਨਾਮ

ਤੇਰਸਮੋ ਪਰਿਚ੍ਛੇਦੋ.