੮. ਪਚ੍ਚਯਪਰਿਚ੍ਛੇਦੋ
੧. ਯੇਸਂ ਸਙ੍ਖਤਧਮ੍ਮਾਨਂ, ਯੇ ਧਮ੍ਮਾ ਪਚ੍ਚਯਾ ਯਥਾ.
ਤਂ ਵਿਭਾਗਮਿਹੇਦਾਨਿ, ਪਵਕ੍ਖਾਮਿ ਯਥਾਰਹਂ.
੨. ਪਟਿਚ੍ਚਸਮੁਪ੍ਪਾਦਨਯੋ ਪਟ੍ਠਾਨਨਯੋ ਚੇਤਿ ਪਚ੍ਚਯਸਙ੍ਗਹੋ ਦੁਵਿਧੋ ਵੇਦਿਤਬ੍ਬੋ.
੩. ਤਤ੍ਥ ਤਬ੍ਭਾਵਭਾਵੀਭਾਵਾਕਾਰਮਤ੍ਤੋਪਲਕ੍ਖਿਤੋ ਪਟਿਚ੍ਚਸਮੁਪ੍ਪਾਦਨਯੋ, ਪਟ੍ਠਾਨਨਯੋ ਪਨ ਆਹਚ੍ਚਪਚ੍ਚਯਟ੍ਠਿਤਿਮਾਰਬ੍ਭ ਪਵੁਚ੍ਚਤਿ, ਉਭਯਂ ਪਨ ਵੋਮਿਸ੍ਸੇਤ੍ਵਾ ਪਪਞ੍ਚੇਨ੍ਤਿ ਆਚਰਿਯਾ.
ਪਟਿਚ੍ਚਸਮੁਪ੍ਪਾਦਨਯੋ
੪. ਤਤ੍ਥ ਅਵਿਜ੍ਜਾਪਚ੍ਚਯਾ ਸਙ੍ਖਾਰਾ, ਸਙ੍ਖਾਰਪਚ੍ਚਯਾ ਵਿਞ੍ਞਾਣਂ, ਵਿਞ੍ਞਾਣਪਚ੍ਚਯਾ ਨਾਮਰੂਪਂ, ਨਾਮਰੂਪਪਚ੍ਚਯਾ ਸਲ਼ਾਯਤਨਂ, ਸਲ਼ਾਯਤਨਪਚ੍ਚਯਾ ਫਸ੍ਸੋ, ਫਸ੍ਸਪਚ੍ਚਯਾ ਵੇਦਨਾ, ਵੇਦਨਾਪਚ੍ਚਯਾ ਤਣ੍ਹਾ, ਤਣ੍ਹਾਪਚ੍ਚਯਾ ਉਪਾਦਾਨਂ, ਉਪਾਦਾਨਪਚ੍ਚਯਾ ਭਵੋ, ਭਵਪਚ੍ਚਯਾ ਜਾਤਿ, ਜਾਤਿਪਚ੍ਚਯਾ ਜਰਾਮਰਣਂ ਸੋਕਪਰਿਦੇਵਦੁਕ੍ਖਦੋਮਨਸ੍ਸੁਪਾਯਾਸਾ ਸਮ੍ਭਵਨ੍ਤਿ. ਏਵਮੇਤਸ੍ਸ ਕੇਵਲਸ੍ਸ ਦੁਕ੍ਖਕ੍ਖਨ੍ਧਸ੍ਸ ਸਮੁਦਯੋ ਹੋਤੀਤਿ ਅਯਮੇਤ੍ਥ ਪਟਿਚ੍ਚਸਮੁਪ੍ਪਾਦਨਯੋ.
੫. ਤਤ੍ਥ ਤਯੋ ਅਦ੍ਧਾ ਦ੍ਵਾਦਸਙ੍ਗਾਨਿ ਵੀਸਤਾਕਾਰਾ ਤਿਸਨ੍ਧਿ ਚਤੁਸਙ੍ਖੇਪਾ ਤੀਣਿ ਵਟ੍ਟਾਨਿ ਦ੍ਵੇ ਮੂਲਾਨਿ ਚ ਵੇਦਿਤਬ੍ਬਾਨਿ.
੬. ਕਥਂ? ਅਵਿਜ੍ਜਾਸਙ੍ਖਾਰਾ ਅਤੀਤੋ ਅਦ੍ਧਾ, ਜਾਤਿਜਰਾਮਰਣਂ ਅਨਾਗਤੋ ਅਦ੍ਧਾ, ਮਜ੍ਝੇ ਅਟ੍ਠ ਪਚ੍ਚੁਪ੍ਪਨ੍ਨੋ ਅਦ੍ਧਾਤਿ ਤਯੋ ਅਦ੍ਧਾ.
੭. ਅਵਿਜ੍ਜਾ ਸਙ੍ਖਾਰਾ ਵਿਞ੍ਞਾਣਂ ਨਾਮਰੂਪਂ ਸਲ਼ਾਯਤਨਂ ਫਸ੍ਸੋ ਵੇਦਨਾ ਤਣ੍ਹਾ ਉਪਾਦਾਨਂ ਭਵੋ ਜਾਤਿ ਜਰਾਮਰਣਨ੍ਤਿ ਦ੍ਵਾਦਸਙ੍ਗਾਨਿ.
੮. ਸੋਕਾਦਿਵਚਨਂ ਪਨੇਤ੍ਥ ਨਿਸ੍ਸਨ੍ਦਫਲਨਿਦਸ੍ਸਨਂ.
੯. ਅਵਿਜ੍ਜਾਸਙ੍ਖਾਰਗ੍ਗਹਣੇਨ ਪਨੇਤ੍ਥ ਤਣ੍ਹੁਪਾਦਾਨਭਵਾਪਿ ਗਹਿਤਾ ਭਵਨ੍ਤਿ, ਤਥਾ ਤਣ੍ਹੁਪਾਦਾਨਭਵਗ੍ਗਹਣੇਨ ਚ ਅਵਿਜ੍ਜਾਸਙ੍ਖਾਰਾ, ਜਾਤਿਜਰਾਮਰਣਗ੍ਗਹਣੇਨ ਚ ਵਿਞ੍ਞਾਣਾਦਿਫਲਪਞ੍ਚਕਮੇਵ ਗਹਿਤਨ੍ਤਿ ਕਤ੍ਵਾ –
੧੦. ਅਤੀਤੇ ਹੇਤਵੋ ਪਞ੍ਚ, ਇਦਾਨਿ ਫਲਪਞ੍ਚਕਂ.
ਇਦਾਨਿ ਹੇਤਵੋ ਪਞ੍ਚ, ਆਯਤਿਂ ਫਲਪਞ੍ਚਕਨ੍ਤਿ;
ਵੀਸਤਾਕਾਰਾ ਤਿਸਨ੍ਧਿ, ਚਤੁਸਙ੍ਖੇਪਾ ਚ ਭਵਨ੍ਤਿ.
੧੧. ਅਵਿਜ੍ਜਾਤਣ੍ਹੁਪਾਦਾਨਾ ਚ ਕਿਲੇਸਵਟ੍ਟਂ, ਕਮ੍ਮਭਵਸਙ੍ਖਾਤੋ ਭਵੇਕਦੇਸੋ ਸਙ੍ਖਾਰਾ ਚ ਕਮ੍ਮਵਟ੍ਟਂ, ਉਪਪਤ੍ਤਿਭਵਸਙ੍ਖਾਤੋ ਭਵੇਕਦੇਸੋ ਅਵਸੇਸਾ ਚ ਵਿਪਾਕਵਟ੍ਟਨ੍ਤਿ ਤੀਣਿ ਵਟ੍ਟਾਨਿ.
੧੨. ਅਵਿਜ੍ਜਾਤਣ੍ਹਾਵਸੇਨ ਦ੍ਵੇ ਮੂਲਾਨਿ ਚ ਵੇਦਿਤਬ੍ਬਾਨਿ.
੧੩. ਤੇਸਮੇਵ ਚ ਮੂਲਾਨਂ, ਨਿਰੋਧੇਨ ਨਿਰੁਜ੍ਝਤਿ.
ਜਰਾਮਰਣਮੁਚ੍ਛਾਯ, ਪੀਲ਼ਿਤਾਨਮਭਿਣ੍ਹਸੋ;
ਆਸਵਾਨਂ ਸਮੁਪ੍ਪਾਦਾ, ਅਵਿਜ੍ਜਾ ਚ ਪਵਤ੍ਤਤਿ.
ਵਟ੍ਟਮਾਬਨ੍ਧਮਿਚ੍ਚੇਵਂ, ਤੇਭੂਮਕਮਨਾਦਿਕਂ;
ਪਟਿਚ੍ਚਸਮੁਪ੍ਪਾਦੋਤਿ, ਪਟ੍ਠਪੇਸਿ ਮਹਾਮੁਨਿ.
ਪਟ੍ਠਾਨਨਯੋ
੧੪. ਹੇਤੁਪਚ੍ਚਯੋ ਆਰਮ੍ਮਣਪਚ੍ਚਯੋ ਅਧਿਪਤਿਪਚ੍ਚਯੋ ਅਨਨ੍ਤਰਪਚ੍ਚਯੋ ਸਮਨਨ੍ਤਰਪਚ੍ਚਯੋ ਸਹਜਾਤਪਚ੍ਚਯੋ ਅਞ੍ਞਮਞ੍ਞਪਚ੍ਚਯੋ ਨਿਸ੍ਸਯਪਚ੍ਚਯੋ ਉਪਨਿਸ੍ਸਯਪਚ੍ਚਯੋ ਪੁਰੇਜਾਤਪਚ੍ਚਯੋ ਪਚ੍ਛਾਜਾਤਪਚ੍ਚਯੋ ਆਸੇਵਨਪਚ੍ਚਯੋ ਕਮ੍ਮਪਚ੍ਚਯੋ ਵਿਪਾਕਪਚ੍ਚਯੋ ਆਹਾਰਪਚ੍ਚਯੋ ਇਨ੍ਦ੍ਰਿਯਪਚ੍ਚਯੋ ਝਾਨਪਚ੍ਚਯੋ ਮਗ੍ਗਪਚ੍ਚਯੋ ਸਮ੍ਪਯੁਤ੍ਤਪਚ੍ਚਯੋ ਵਿਪ੍ਪਯੁਤ੍ਤਪਚ੍ਚਯੋ ਅਤ੍ਥਿਪਚ੍ਚਯੋ ਨਤ੍ਥਿਪਚ੍ਚਯੋ ਵਿਗਤਪਚ੍ਚਯੋ ਅਵਿਗਤਪਚ੍ਚਯੋਤਿ ਅਯਮੇਤ੍ਥ ਪਟ੍ਠਾਨਨਯੋ.
੧੫. ਛਧਾ ਨਾਮਂ ਤੁ ਨਾਮਸ੍ਸ, ਪਞ੍ਚਧਾ ਨਾਮਰੂਪਿਨਂ.
ਏਕਧਾ ਪੁਨ ਰੂਪਸ੍ਸ, ਰੂਪਂ ਨਾਮਸ੍ਸ ਚੇਕਧਾ.
ਪਞ੍ਞਤ੍ਤਿਨਾਮਰੂਪਾਨਿ, ਨਾਮਸ੍ਸ ਦੁਵਿਧਾ ਦ੍ਵਯਂ;
ਦ੍ਵਯਸ੍ਸ ਨਵਧਾ ਚੇਤਿ, ਛਬ੍ਬਿਧਾ ਪਚ੍ਚਯਾ ਕਥਂ.
੧੬. ਅਨਨ੍ਤਰਨਿਰੁਦ੍ਧਾ ਚਿਤ੍ਤਚੇਤਸਿਕਾ ਧਮ੍ਮਾ ਪਟੁਪ੍ਪਨ੍ਨਾਨਂ ਚਿਤ੍ਤਚੇਤਸਿਕਾਨਂ ਧਮ੍ਮਾਨਂ ਅਨਨ੍ਤਰਸਮਨਨ੍ਤਰਨਤ੍ਥਿਵਿਗਤਵਸੇਨ, ਪੁਰਿਮਾਨਿ ਜਵਨਾਨਿ ਪਚ੍ਛਿਮਾਨਂ ਜਵਨਾਨਂ ਆਸੇਵਨਵਸੇਨ, ਸਹਜਾਤਾ ਚਿਤ੍ਤਚੇਤਸਿਕਾ ਧਮ੍ਮਾ ਅਞ੍ਞਮਞ੍ਞਂ ਸਮ੍ਪਯੁਤ੍ਤਵਸੇਨੇਤਿ ਚ ਛਧਾ ਨਾਮਂ ਨਾਮਸ੍ਸ ਪਚ੍ਚਯੋ ਹੋਤਿ.
੧੭. ਹੇਤੁਝਾਨਙ੍ਗਮਗ੍ਗਙ੍ਗਾਨਿ ਸਹਜਾਤਾਨਂ ਨਾਮਰੂਪਾਨਂ ਹੇਤਾਦਿਵਸੇਨ, ਸਹਜਾਤਾ ਚੇਤਨਾ ਸਹਜਾਤਾਨਂ ਨਾਮਰੂਪਾਨਂ, ਨਾਨਾਕ੍ਖਣਿਕਾ ਚੇਤਨਾ ਕਮ੍ਮਾਭਿਨਿਬ੍ਬਤ੍ਤਾਨਂ ਨਾਮਰੂਪਾਨਂ ਕਮ੍ਮਵਸੇਨ, ਵਿਪਾਕਕ੍ਖਨ੍ਧਾ ਅਞ੍ਞਮਞ੍ਞਂ ਸਹਜਾਤਾਨਂ ਰੂਪਾਨਂ ਵਿਪਾਕਵਸੇਨੇਤਿ ਚ ਪਞ੍ਚਧਾ ਨਾਮਂ ਨਾਮਰੂਪਾਨਂ ਪਚ੍ਚਯੋ ਹੋਤਿ.
੧੮. ਪਚ੍ਛਾਜਾਤਾ ਚਿਤ੍ਤਚੇਤਸਿਕਾ ਧਮ੍ਮਾ ਪੁਰੇਜਾਤਸ੍ਸ ਇਮਸ੍ਸ ਕਾਯਸ੍ਸ ਪਚ੍ਛਾਜਾਤਵਸੇਨੇਤਿ ਏਕਧਾਵ ਨਾਮਂ ਰੂਪਸ੍ਸ ਪਚ੍ਚਯੋ ਹੋਤਿ.
੧੯. ਛ ਵਤ੍ਥੂਨਿ ਪਵਤ੍ਤਿਯਂ ਸਤ੍ਤਨ੍ਨਂ ਵਿਞ੍ਞਾਣਧਾਤੂਨਂ ਪਞ੍ਚਾਰਮ੍ਮਣਾਨਿ ਚ ਪਞ੍ਚਵਿਞ੍ਞਾਣਵੀਥਿਯਾ ਪੁਰੇਜਾਤਵਸੇਨੇਤਿ ਏਕਧਾਵ ਰੂਪਂ ਨਾਮਸ੍ਸ ਪਚ੍ਚਯੋ ਹੋਤਿ.
੨੦. ਆਰਮ੍ਮਣਵਸੇਨ ਉਪਨਿਸ੍ਸਯਵਸੇਨੇਤਿ ਚ ਦੁਵਿਧਾ ਪਞ੍ਞਤ੍ਤਿਨਾਮਰੂਪਾਨਿ ਨਾਮਸ੍ਸੇਵ ਪਚ੍ਚਯਾ ਹੋਨ੍ਤਿ.
੨੧. ਤਤ੍ਥ ਰੂਪਾਦਿਵਸੇਨ ਛਬ੍ਬਿਧਂ ਹੋਤਿ ਆਰਮ੍ਮਣਂ.
੨੨. ਉਪਨਿਸ੍ਸਯੋ ਪਨ ਤਿਵਿਧੋ ਹੋਤਿ – ਆਰਮ੍ਮਣੂਪਨਿਸ੍ਸਯੋ ਅਨਨ੍ਤਰੂਪਨਿਸ੍ਸਯੋ ਪਕਤੂਪਨਿਸ੍ਸਯੋ ਚੇਤਿ.
੨੩. ਤਤ੍ਥ ਆਰਮ੍ਮਣਮੇਵ ਗਰੁਕਤਂ ਆਰਮ੍ਮਣੂਪਨਿਸ੍ਸਯੋ.
੨੪. ਅਨਨ੍ਤਰਨਿਰੁਦ੍ਧਾ ਚਿਤ੍ਤਚੇਤਸਿਕਾ ਧਮ੍ਮਾ ਅਨਨ੍ਤਰੂਪਨਿਸ੍ਸਯੋ.
੨੫. ਰਾਗਾਦਯੋ ਪਨ ਧਮ੍ਮਾ ਸਦ੍ਧਾਦਯੋ ਚ ਸੁਖਂ ਦੁਕ੍ਖਂ ਪੁਗ੍ਗਲੋ ਭੋਜਨਂ ਉਤੁਸੇਨਾਸਨਞ੍ਚ ਯਥਾਰਹਂ ਅਜ੍ਝਤ੍ਤਞ੍ਚ ਬਹਿਦ੍ਧਾ ਚ ਕੁਸਲਾਦਿਧਮ੍ਮਾਨਂ, ਕਮ੍ਮਂ ਵਿਪਾਕਾਨਨ੍ਤਿ ਚ ਬਹੁਧਾ ਹੋਤਿ ਪਕਤੂਪਨਿਸ੍ਸਯੋ.
੨੬. ਅਧਿਪਤਿਸਹਜਾਤਅਞ੍ਞਮਞ੍ਞਨਿਸ੍ਸਯਆਹਾਰਇਨ੍ਦ੍ਰਿਯਵਿਪ੍ਪਯੁਤ੍ਤਅਤ੍ਥਿਅਵਿਗਤਵਸੇਨੇਤਿ ਯਥਾਰਹਂ ਨਵਧਾ ਨਾਮਰੂਪਾਨਿ ਨਾਮਰੂਪਾਨਂ ਪਚ੍ਚਯਾ ਭਵਨ੍ਤਿ.
੨੭. ਤਤ੍ਥ ਗਰੁਕਤਮਾਰਮ੍ਮਣਂ ਆਰਮ੍ਮਣਾਧਿਪਤਿਵਸੇਨ ਨਾਮਾਨਂ, ਸਹਜਾਤਾਧਿਪਤਿ ਚਤੁਬ੍ਬਿਧੋਪਿ ਸਹਜਾਤਵਸੇਨ ਸਹਜਾਤਾਨਂ ਨਾਮਰੂਪਾਨਨ੍ਤਿ ਚ ਦੁਵਿਧੋ ਹੋਤਿ ਅਧਿਪਤਿਪਚ੍ਚਯੋ.
੨੮. ਚਿਤ੍ਤਚੇਤਸਿਕਾ ਧਮ੍ਮਾ ਅਞ੍ਞਮਞ੍ਞਂ ਸਹਜਾਤਰੂਪਾਨਞ੍ਚ, ਮਹਾਭੂਤਾ ਅਞ੍ਞਮਞ੍ਞਂ ਉਪਾਦਾਰੂਪਾਨਞ੍ਚ, ਪਟਿਸਨ੍ਧਿਕ੍ਖਣੇ ਵਤ੍ਥੁਵਿਪਾਕਾ ਅਞ੍ਞਮਞ੍ਞਨ੍ਤਿ ਚ ਤਿਵਿਧੋ ਹੋਤਿ ਸਹਜਾਤਪਚ੍ਚਯੋ.
੨੯. ਚਿਤ੍ਤਚੇਤਸਿਕਾ ਧਮ੍ਮਾ ਅਞ੍ਞਮਞ੍ਞਂ, ਮਹਾਭੂਤਾ ਅਞ੍ਞਮਞ੍ਞਂ, ਪਟਿਸਨ੍ਧਿਕ੍ਖਣੇ ਵਤ੍ਥੁਵਿਪਾਕਾ ਅਞ੍ਞਮਞ੍ਞਨ੍ਤਿ ਚ ਤਿਵਿਧੋ ਹੋਤਿ ਅਞ੍ਞਮਞ੍ਞਪਚ੍ਚਯੋ.
੩੦. ਚਿਤ੍ਤਚੇਤਸਿਕਾ ਧਮ੍ਮਾ ਅਞ੍ਞਮਞ੍ਞਂ ਸਹਜਾਤਰੂਪਾਨਞ੍ਚ, ਮਹਾਭੂਤਾ ਅਞ੍ਞਮਞ੍ਞਂ ਉਪਾਦਾਰੂਪਾਨਞ੍ਚ, ਛ ਵਤ੍ਥੂਨਿ ਸਤ੍ਤਨ੍ਨਂ ਵਿਞ੍ਞਾਣਧਾਤੂਨਨ੍ਤਿ ਚ ਤਿਵਿਧੋ ਹੋਤਿ ਨਿਸ੍ਸਯਪਚ੍ਚਯੋ.
੩੧. ਕਬਲ਼ੀਕਾਰੋ ਆਹਾਰੋ ਇਮਸ੍ਸ ਕਾਯਸ੍ਸ, ਅਰੂਪਿਨੋ ਆਹਾਰਾ ਸਹਜਾਤਾਨਂ ਨਾਮਰੂਪਾਨਨ੍ਤਿ ਚ ਦੁਵਿਧੋ ਹੋਤਿ ਆਹਾਰਪਚ੍ਚਯੋ.
੩੨. ਪਞ੍ਚ ਪਸਾਦਾ ਪਞ੍ਚਨ੍ਨਂ ਵਿਞ੍ਞਾਣਾਨਂ, ਰੂਪਜੀਵਿਤਿਨ੍ਦ੍ਰਿਯਂ ਉਪਾਦਿਨ੍ਨਰੂਪਾਨਂ, ਅਰੂਪਿਨੋ ਇਨ੍ਦ੍ਰਿਯਾ ਸਹਜਾਤਾਨਂ ਨਾਮਰੂਪਾਨਨ੍ਤਿ ਚ ਤਿਵਿਧੋ ਹੋਤਿ ਇਨ੍ਦ੍ਰਿਯਪਚ੍ਚਯੋ.
੩੩. ਓਕ੍ਕਨ੍ਤਿਕ੍ਖਣੇ ਵਤ੍ਥੁ ਵਿਪਾਕਾਨਂ, ਚਿਤ੍ਤਚੇਤਸਿਕਾ ਧਮ੍ਮਾ ਸਹਜਾਤਰੂਪਾਨਂ ਸਹਜਾਤਵਸੇਨ, ਪਚ੍ਛਾਜਾਤਾ ਚਿਤ੍ਤਚੇਤਸਿਕਾ ਧਮ੍ਮਾ ਪੁਰੇਜਾਤਸ੍ਸ ਇਮਸ੍ਸ ਕਾਯਸ੍ਸ ਪਚ੍ਛਾਜਾਤਵਸੇਨ ਛ ਵਤ੍ਥੂਨਿ ਪਵਤ੍ਤਿਯਂ ਸਤ੍ਤਨ੍ਨਂ ਵਿਞ੍ਞਾਣਧਾਤੂਨਂ ਪੁਰੇਜਾਤਵਸੇਨੇਤਿ ਚ ਤਿਵਿਧੋ ਹੋਤਿ ਵਿਪ੍ਪਯੁਤ੍ਤਪਚ੍ਚਯੋ.
੩੪. ਸਹਜਾਤਂ ਪੁਰੇਜਾਤਂ, ਪਚ੍ਛਾਜਾਤਞ੍ਚ ਸਬ੍ਬਥਾ.
ਕਬਲ਼ੀਕਾਰੋ ਆਹਾਰੋ, ਰੂਪਜੀਵਿਤਮਿਚ੍ਚਯਨ੍ਤਿ. –
ਪਞ੍ਚਵਿਧੋ ਹੋਤਿ ਅਤ੍ਥਿਪਚ੍ਚਯੋ ਅਵਿਗਤਪਚ੍ਚਯੋ ਚ.
੩੫. ਆਰਮ੍ਮਣੂਪਨਿਸ੍ਸਯਕਮ੍ਮਤ੍ਥਿਪਚ੍ਚਯੇਸੁ ਚ ਸਬ੍ਬੇਪਿ ਪਚ੍ਚਯਾ ਸਮੋਧਾਨਂ ਗਚ੍ਛਨ੍ਤਿ.
੩੬. ਸਹਜਾਤਰੂਪਨ੍ਤਿ ਪਨੇਤ੍ਥ ਸਬ੍ਬਤ੍ਥਾਪਿ ਪਵਤ੍ਤੇ ਚਿਤ੍ਤਸਮੁਟ੍ਠਾਨਾਨਂ, ਪਟਿਸਨ੍ਧਿਯਂ ਕਟਤ੍ਤਾਰੂਪਾਨਞ੍ਚ ਵਸੇਨ ਦੁਵਿਧਂ ਹੋਤੀਤਿ ਵੇਦਿਤਬ੍ਬਂ.
੩੭. ਇਤਿ ਤੇਕਾਲਿਕਾ ਧਮ੍ਮਾ, ਕਾਲਮੁਤ੍ਤਾ ਚ ਸਮ੍ਭਵਾ.
ਅਜ੍ਝਤ੍ਤਞ੍ਚ ਬਹਿਦ੍ਧਾ ਚ, ਸਙ੍ਖਤਾਸਙ੍ਖਤਾ ਤਥਾ;
ਪਞ੍ਞਤ੍ਤਿਨਾਮਰੂਪਾਨਂ, ਵਸੇਨ ਤਿਵਿਧਾ ਠਿਤਾ;
ਪਚ੍ਚਯਾ ਨਾਮ ਪਟ੍ਠਾਨੇ, ਚਤੁਵੀਸਤਿ ਸਬ੍ਬਥਾ.
੩੮. ਤਤ੍ਥ ਰੂਪਧਮ੍ਮਾ ਰੂਪਕ੍ਖਨ੍ਧੋਵ, ਚਿਤ੍ਤਚੇਤਸਿਕਸਙ੍ਖਾਤਾ ਚਤ੍ਤਾਰੋ ਅਰੂਪਿਨੋ ਖਨ੍ਧਾ, ਨਿਬ੍ਬਾਨਞ੍ਚੇਤਿ ਪਞ੍ਚਵਿਧਮ੍ਪਿ ਅਰੂਪਨ੍ਤਿ ਚ ਨਾਮਨ੍ਤਿ ਚ ਪਵੁਚ੍ਚਤਿ.
ਪਞ੍ਞਤ੍ਤਿਭੇਦੋ
੩੯. ਤਤੋ ਅਵਸੇਸਾ ਪਞ੍ਞਤ੍ਤਿ ਪਨ ਪਞ੍ਞਾਪਿਯਤ੍ਤਾ ਪਞ੍ਞਤ੍ਤਿ, ਪਞ੍ਞਾਪਨਤੋ ਪਞ੍ਞਤ੍ਤੀਤਿ ਚ ਦੁਵਿਧਾ ਹੋਤਿ.
੪੦. ਕਥਂ? ਤਂਤਂਭੂਤਵਿਪਰਿਣਾਮਾਕਾਰਮੁਪਾਦਾਯ ਤਥਾ ਤਥਾ ਪਞ੍ਞਤ੍ਤਾ ਭੂਮਿਪਬ੍ਬਤਾਦਿਕਾ, ਸਮ੍ਭਾਰਸਨ੍ਨਿਵੇਸਾਕਾਰਮੁਪਾਦਾਯ ਗੇਹਰਥਸਕਟਾਦਿਕਾ, ਖਨ੍ਧਪਞ੍ਚਕਮੁਪਾਦਾਯ ਪੁਰਿਸਪੁਗ੍ਗਲਾਦਿਕਾ, ਚਨ੍ਦਾਵਟ੍ਟਨਾਦਿਕਮੁਪਾਦਾਯ ਦਿਸਾਕਾਲਾਦਿਕਾ, ਅਸਮ੍ਫੁਟ੍ਠਾਕਾਰਮੁਪਾਦਾਯ ਕੂਪਗੁਹਾਦਿਕਾ, ਤਂਤਂਭੂਤਨਿਮਿਤ੍ਤਂ ਭਾਵਨਾਵਿਸੇਸਞ੍ਚ ਉਪਾਦਾਯ ਕਸਿਣਨਿਮਿਤ੍ਤਾਦਿਕਾ ਚੇਤਿ ਏਵਮਾਦਿਪ੍ਪਭੇਦਾ ਪਨ ਪਰਮਤ੍ਥਤੋ ਅਵਿਜ੍ਜਮਾਨਾਪਿ ਅਤ੍ਥਚ੍ਛਾਯਾਕਾਰੇਨ ਚਿਤ੍ਤੁਪ੍ਪਾਦਾਨਮਾਰਮ੍ਮਣਭੂਤਾ ਤਂ ਤਂ ਉਪਾਦਾਯ ਉਪਨਿਧਾਯ ਕਾਰਣਂ ਕਤ੍ਵਾ ਤਥਾ ਤਥਾ ਪਰਿਕਪ੍ਪਿਯਮਾਨਾ ਸਙ੍ਖਾਯਤਿ ਸਮਞ੍ਞਾਯਤਿ ਵੋਹਰੀਯਤਿ ਪਞ੍ਞਾਪੀਯਤੀਤਿ ਪਞ੍ਞਤ੍ਤੀਤਿ ਪਵੁਚ੍ਚਤਿ. ਅਯਂ ਪਞ੍ਞਤ੍ਤਿ ਪਞ੍ਞਾਪਿਯਤ੍ਤਾ ਪਞ੍ਞਤ੍ਤਿ ਨਾਮ.
੪੧. ਪਞ੍ਞਾਪਨਤੋ ਪਞ੍ਞਤ੍ਤਿ ਪਨ ਨਾਮਨਾਮਕਮ੍ਮਾਦਿਨਾਮੇਨ ਪਰਿਦੀਪਿਤਾ, ਸਾ ਵਿਜ੍ਜਮਾਨਪਞ੍ਞਤ੍ਤਿ ਅਵਿਜ੍ਜਮਾਨਪਞ੍ਞਤ੍ਤਿ, ਵਿਜ੍ਜਮਾਨੇਨ ਅਵਿਜ੍ਜਮਾਨਪਞ੍ਞਤ੍ਤਿ, ਅਵਿਜ੍ਜਮਾਨੇਨ ਵਿਜ੍ਜਮਾਨਪਞ੍ਞਤ੍ਤਿ, ਵਿਜ੍ਜਮਾਨੇਨ ਵਿਜ੍ਜਮਾਨਪਞ੍ਞਤ੍ਤਿ, ਅਵਿਜ੍ਜਮਾਨੇਨ ਅਵਿਜ੍ਜਮਾਨਪਞ੍ਞਤ੍ਤਿ ਚੇਤਿ ਛਬ੍ਬਿਧਾ ਹੋਤਿ.
੪੨. ਤਤ੍ਥ ਯਦਾ ਪਨ ਪਰਮਤ੍ਥਤੋ ਵਿਜ੍ਜਮਾਨਂ ਰੂਪਵੇਦਨਾਦਿਂ ਏਤਾਯ ਪਞ੍ਞਾਪੇਨ੍ਤਿ, ਤਦਾਯਂ ਵਿਜ੍ਜਮਾਨਪਞ੍ਞਤ੍ਤਿ. ਯਦਾ ਪਨ ਪਰਮਤ੍ਥਤੋ ਅਵਿਜ੍ਜਮਾਨਂ ਭੂਮਿਪਬ੍ਬਤਾਦਿਂ ਏਤਾਯ ਪਞ੍ਞਾਪੇਨ੍ਤਿ, ਤਦਾਯਂ ਅਵਿਜ੍ਜਮਾਨਪਞ੍ਞਤ੍ਤੀਤਿ ਪਵੁਚ੍ਚਤਿ. ਉਭਿਨ੍ਨਂ ਪਨ ਵੋਮਿਸ੍ਸਕਵਸੇਨ ਸੇਸਾ ਯਥਾਕ੍ਕਮਂ ਛਲ਼ਭਿਞ੍ਞੋ, ਇਤ੍ਥਿਸਦ੍ਦੋ, ਚਕ੍ਖੁਵਿਞ੍ਞਾਣਂ, ਰਾਜਪੁਤ੍ਤੋਤਿ ਚ ਵੇਦਿਤਬ੍ਬਾ.
੪੩. ਵਚੀਘੋਸਾਨੁਸਾਰੇਨ, ਸੋਤਵਿਞ੍ਞਾਣਵੀਥਿਯਾ.
ਪਵਤ੍ਥਾਨਨ੍ਤਰੁਪ੍ਪਨ੍ਨ-ਮਨੋਦ੍ਵਾਰਸ੍ਸ ਗੋਚਰਾ.
ਅਤ੍ਥਾ ਯਸ੍ਸਾਨੁਸਾਰੇਨ, ਵਿਞ੍ਞਾਯਨ੍ਤਿ ਤਤੋ ਪਰਂ;
ਸਾਯਂ ਪਞ੍ਞਤ੍ਤਿ ਵਿਞ੍ਞੇਯ੍ਯਾ, ਲੋਕਸਙ੍ਕੇਤਨਿਮ੍ਮਿਤਾ.
ਇਤਿ ਅਭਿਧਮ੍ਮਤ੍ਥਸਙ੍ਗਹੇ ਪਚ੍ਚਯਸਙ੍ਗਹਵਿਭਾਗੋ ਨਾਮ
ਅਟ੍ਠਮੋ ਪਰਿਚ੍ਛੇਦੋ.