੬. ਰੂਪਪਰਿਚ੍ਛੇਦੋ
੧. ਏਤ੍ਤਾਵਤਾ ਵਿਭਤ੍ਤਾ ਹਿ, ਸਪ੍ਪਭੇਦਪ੍ਪਵਤ੍ਤਿਕਾ.
ਚਿਤ੍ਤਚੇਤਸਿਕਾ ਧਮ੍ਮਾ, ਰੂਪਂ ਦਾਨਿ ਪਵੁਚ੍ਚਤਿ.
੨. ਸਮੁਦ੍ਦੇਸਾ ਵਿਭਾਗਾ ਚ, ਸਮੁਟ੍ਠਾਨਾ ਕਲਾਪਤੋ.
ਪਵਤ੍ਤਿਕ੍ਕਮਤੋ ਚੇਤਿ, ਪਞ੍ਚਧਾ ਤਤ੍ਥ ਸਙ੍ਗਹੋ.
ਰੂਪਸਮੁਦ੍ਦੇਸੋ
੩. ਚਤ੍ਤਾਰਿ ਮਹਾਭੂਤਾਨਿ, ਚਤੁਨ੍ਨਞ੍ਚ ਮਹਾਭੂਤਾਨਂ ਉਪਾਦਾਯਰੂਪਨ੍ਤਿ ਦੁਵਿਧਮ੍ਪੇਤਂ ਰੂਪਂ ਏਕਾਦਸਵਿਧੇਨ ਸਙ੍ਗਹਂ ਗਚ੍ਛਤਿ.
੪. ਕਥਂ? ਪਥਵੀਧਾਤੁ ਆਪੋਧਾਤੁ ਤੇਜੋਧਾਤੁ ਵਾਯੋਧਾਤੁ ਭੂਤਰੂਪਂ ਨਾਮ.
੫. ਚਕ੍ਖੁ ਸੋਤਂ ਘਾਨਂ ਜਿਵ੍ਹਾ ਕਾਯੋ ਪਸਾਦਰੂਪਂ ਨਾਮ.
੬. ਰੂਪਂ ਸਦ੍ਦੋ ਗਨ੍ਧੋ ਰਸੋ ਆਪੋਧਾਤੁਵਿਵਜ੍ਜਿਤਂ ਭੂਤਤ੍ਤਯਸਙ੍ਖਾਤਂ ਫੋਟ੍ਠਬ੍ਬਂ ਗੋਚਰਰੂਪਂ ਨਾਮ.
੭. ਇਤ੍ਥਤ੍ਤਂ ਪੁਰਿਸਤ੍ਤਂ ਭਾਵਰੂਪਂ ਨਾਮ.
੮. ਹਦਯਵਤ੍ਥੁ ਹਦਯਰੂਪਂ ਨਾਮ.
੯. ਜੀਵਿਤਿਨ੍ਦ੍ਰਿਯਂ ਜੀਵਿਤਰੂਪਂ ਨਾਮ.
੧੦. ਕਬਲ਼ੀਕਾਰੋ ਆਹਾਰੋ ਆਹਾਰਰੂਪਂ ਨਾਮ.
੧੧. ਇਤਿ ਚ ਅਟ੍ਠਾਰਸਵਿਧਮ੍ਪੇਤਂ ਰੂਪਂ ਸਭਾਵਰੂਪਂ ਸਲਕ੍ਖਣਰੂਪਂ ਨਿਪ੍ਫਨ੍ਨਰੂਪਂ ਰੂਪਰੂਪਂ ਸਮ੍ਮਸਨਰੂਪਨ੍ਤਿ ਚ ਸਙ੍ਗਹਂ ਗਚ੍ਛਤਿ.
੧੨. ਆਕਾਸਧਾਤੁ ਪਰਿਚ੍ਛੇਦਰੂਪਂ ਨਾਮ.
੧੩. ਕਾਯਵਿਞ੍ਞਤ੍ਤਿ ਵਚੀਵਿਞ੍ਞਤ੍ਤਿ ਵਿਞ੍ਞਤ੍ਤਿਰੂਪਂ ਨਾਮ.
੧੪. ਰੂਪਸ੍ਸ ਲਹੁਤਾ ਮੁਦੁਤਾ ਕਮ੍ਮਞ੍ਞਤਾ ਵਿਞ੍ਞਤ੍ਤਿਦ੍ਵਯਂ ਵਿਕਾਰਰੂਪਂ ਨਾਮ.
੧੫. ਰੂਪਸ੍ਸ ਉਪਚਯੋ ਸਨ੍ਤਤਿ ਜਰਤਾ ਅਨਿਚ੍ਚਤਾ ਲਕ੍ਖਣਰੂਪਂ ਨਾਮ.
੧੬. ਜਾਤਿਰੂਪਮੇਵ ਪਨੇਤ੍ਥ ਉਪਚਯਸਨ੍ਤਤਿਨਾਮੇਨ ਪਵੁਚ੍ਚਤੀਤਿ ਏਕਾਦਸਵਿਧਮ੍ਪੇਤਂ ਰੂਪਂ ਅਟ੍ਠਵੀਸਤਿਵਿਧਂ ਹੋਤਿ ਸਰੂਪਵਸੇਨ.
੧੭. ਕਥਂ –
ਭੂਤਪ੍ਪਸਾਦਵਿਸਯਾ, ਭਾਵੋ ਹਦਯਮਿਚ੍ਚਪਿ;
ਜੀਵਿਤਾਹਾਰਰੂਪੇਹਿ, ਅਟ੍ਠਾਰਸਵਿਧਂ ਤਥਾ.
ਪਰਿਚ੍ਛੇਦੋ ਚ ਵਿਞ੍ਞਤ੍ਤਿ, ਵਿਕਾਰੋ ਲਕ੍ਖਣਨ੍ਤਿ ਚ;
ਅਨਿਪ੍ਫਨ੍ਨਾ ਦਸ ਚੇਤਿ, ਅਟ੍ਠਵੀਸਵਿਧਂ ਭਵੇ.
ਅਯਮੇਤ੍ਥ ਰੂਪਸਮੁਦ੍ਦੇਸੋ.
ਰੂਪਵਿਭਾਗੋ
੧੮. ਸਬ੍ਬਞ੍ਚ ਪਨੇਤਂ ਰੂਪਂ ਅਹੇਤੁਕਂ ਸਪ੍ਪਚ੍ਚਯਂ ਸਾਸਵਂ ਸਙ੍ਖਤਂ ਲੋਕਿਯਂ ਕਾਮਾਵਚਰਂ ਅਨਾਰਮ੍ਮਣਂ ਅਪ੍ਪਹਾਤਬ੍ਬਮੇਵਾਤਿ ਏਕਵਿਧਮ੍ਪਿ ਅਜ੍ਝਤ੍ਤਿਕਬਾਹਿਰਾਦਿਵਸੇਨ ਬਹੁਧਾ ਭੇਦਂ ਗਚ੍ਛਤਿ.
੧੯. ਕਥਂ? ਪਸਾਦਸਙ੍ਖਾਤਂ ਪਞ੍ਚਵਿਧਮ੍ਪਿ ਅਜ੍ਝਤ੍ਤਿਕਰੂਪਂ ਨਾਮ, ਇਤਰਂ ਬਾਹਿਰਰੂਪਂ.
੨੦. ਪਸਾਦਹਦਯਸਙ੍ਖਾਤਂ ਛਬ੍ਬਿਧਮ੍ਪਿ ਵਤ੍ਥੁਰੂਪਂ ਨਾਮ, ਇਤਰਂ ਅਵਤ੍ਥੁਰੂਪਂ.
੨੧. ਪਸਾਦਵਿਞ੍ਞਤ੍ਤਿਸਙ੍ਖਾਤਂ ਸਤ੍ਤਵਿਧਮ੍ਪਿ ਦ੍ਵਾਰਰੂਪਂ ਨਾਮ, ਇਤਰਂ ਅਦ੍ਵਾਰਰੂਪਂ.
੨੨. ਪਸਾਦਭਾਵਜੀਵਿਤਸਙ੍ਖਾਤਂ ਅਟ੍ਠਵਿਧਮ੍ਪਿ ਇਨ੍ਦ੍ਰਿਯਰੂਪਂ ਨਾਮ, ਇਤਰਂ ਅਨਿਨ੍ਦ੍ਰਿਯਰੂਪਂ.
੨੩. ਪਸਾਦਵਿਸਯਸਙ੍ਖਾਤਂ ਦ੍ਵਾਦਸਵਿਧਮ੍ਪਿ ਓਲ਼ਾਰਿਕਰੂਪਂ ਸਨ੍ਤਿਕੇਰੂਪਂ, ਸਪ੍ਪਟਿਘਰੂਪਞ੍ਚ, ਇਤਰਂ ਸੁਖੁਮਰੂਪਂ ਦੂਰੇਰੂਪਂ ਅਪ੍ਪਟਿਘਰੂਪਞ੍ਚ.
੨੪. ਕਮ੍ਮਜਂ ਉਪਾਦਿਨ੍ਨਰੂਪਂ, ਇਤਰਂ ਅਨੁਪਾਦਿਨ੍ਨਰੂਪਂ.
੨੫. ਰੂਪਾਯਤਨਂ ਸਨਿਦਸ੍ਸਨਰੂਪਂ, ਇਤਰਂ ਅਨਿਦਸ੍ਸਨਰੂਪਂ.
੨੬. ਚਕ੍ਖਾਦਿਦ੍ਵਯਂ ਅਸਮ੍ਪਤ੍ਤਵਸੇਨ, ਘਾਨਾਦਿਤ੍ਤਯਂ ਸਮ੍ਪਤ੍ਤਵਸੇਨਾਤਿ ਪਞ੍ਚਵਿਧਮ੍ਪਿ ਗੋਚਰਗ੍ਗਾਹਿਕਰੂਪਂ, ਇਤਰਂ ਅਗੋਚਰਗ੍ਗਾਹਿਕਰੂਪਂ.
੨੭. ਵਣ੍ਣੋ ਗਨ੍ਧੋ ਰਸੋ ਓਜਾ ਭੂਤਚਤੁਕ੍ਕਞ੍ਚੇਤਿ ਅਟ੍ਠਵਿਧਮ੍ਪਿ ਅਵਿਨਿਬ੍ਭੋਗਰੂਪਂ, ਇਤਰਂ ਵਿਨਿਬ੍ਭੋਗਰੂਪਂ.
੨੮. ਇਚ੍ਚੇਵਮਟ੍ਠਵੀਸਤਿ-ਵਿਧਮ੍ਪਿ ਚ ਵਿਚਕ੍ਖਣਾ.
ਅਜ੍ਝਤ੍ਤਿਕਾਦਿਭੇਦੇਨ, ਵਿਭਜਨ੍ਤਿ ਯਥਾਰਹਂ.
ਅਯਮੇਤ੍ਥ ਰੂਪਵਿਭਾਗੋ.
ਰੂਪਸਮੁਟ੍ਠਾਨਨਯੋ
੨੯. ਕਮ੍ਮਂ ਚਿਤ੍ਤਂ ਉਤੁ ਆਹਾਰੋ ਚੇਤਿ ਚਤ੍ਤਾਰਿ ਰੂਪਸਮੁਟ੍ਠਾਨਾਨਿ ਨਾਮ.
੩੦. ਤਤ੍ਥ ਕਾਮਾਵਚਰਂ ਰੂਪਾਵਚਰਞ੍ਚੇਤਿ ਪਞ੍ਚਵੀਸਤਿਵਿਧਮ੍ਪਿ ਕੁਸਲਾਕੁਸਲਕਮ੍ਮਮਭਿਸਙ੍ਖਤਂ ਅਜ੍ਝਤ੍ਤਿਕਸਨ੍ਤਾਨੇ ਕਮ੍ਮਸਮੁਟ੍ਠਾਨਰੂਪਂ ਪਟਿਸਨ੍ਧਿਮੁਪਾਦਾਯ ਖਣੇ ਖਣੇ ਸਮੁਟ੍ਠਾਪੇਤਿ.
੩੧. ਅਰੂਪਵਿਪਾਕਦ੍ਵਿਪਞ੍ਚਵਿਞ੍ਞਾਣਵਜ੍ਜਿਤਂ ਪਞ੍ਚਸਤ੍ਤਤਿਵਿਧਮ੍ਪਿ ਚਿਤ੍ਤਂ ਚਿਤ੍ਤਸਮੁਟ੍ਠਾਨਰੂਪਂ ਪਠਮਭਵਙ੍ਗਮੁਪਾਦਾਯ ਜਾਯਨ੍ਤਮੇਵ ਸਮੁਟ੍ਠਾਪੇਤਿ.
੩੨. ਤਤ੍ਥ ਅਪ੍ਪਨਾਜਵਨਂ ਇਰਿਯਾਪਥਮ੍ਪਿ ਸਨ੍ਨਾਮੇਤਿ.
੩੩. ਵੋਟ੍ਠਬ੍ਬਨਕਾਮਾਵਚਰਜਵਨਾਭਿਞ੍ਞਾ ਪਨ ਵਿਞ੍ਞਤ੍ਤਿਮ੍ਪਿ ਸਮੁਟ੍ਠਾਪੇਨ੍ਤਿ.
੩੪. ਸੋਮਨਸ੍ਸਜਵਨਾਨਿ ਪਨੇਤ੍ਥ ਤੇਰਸ ਹਸਨਮ੍ਪਿ ਜਨੇਨ੍ਤਿ.
੩੫. ਸੀਤੁਣ੍ਹੋਤੁਸਮਞ੍ਞਾਤਾ ਤੇਜੋਧਾਤੁ ਠਿਤਿਪ੍ਪਤ੍ਤਾਵ ਉਤੁਸਮੁਟ੍ਠਾਨਰੂਪਂ ਅਜ੍ਝਤ੍ਤਞ੍ਚ ਬਹਿਦ੍ਧਾ ਚ ਯਥਾਰਹਂ ਸਮੁਟ੍ਠਾਪੇਤਿ.
੩੬. ਓਜਾਸਙ੍ਖਾਤੋ ਆਹਾਰੋ ਆਹਾਰਸਮੁਟ੍ਠਾਨਰੂਪਂ ਅਜ੍ਝੋਹਰਣਕਾਲੇ ਠਾਨਪ੍ਪਤ੍ਤੋਵ ਸਮੁਟ੍ਠਾਪੇਤਿ.
੩੭. ਤਤ੍ਥ ਹਦਯਇਨ੍ਦ੍ਰਿਯਰੂਪਾਨਿ ਕਮ੍ਮਜਾਨੇਵ.
੩੮. ਵਿਞ੍ਞਤ੍ਤਿਦ੍ਵਯਂ ਚਿਤ੍ਤਜਮੇਵ.
੩੯. ਸਦ੍ਦੋ ਚਿਤ੍ਤੋਤੁਜੋ.
੪੦. ਲਹੁਤਾਦਿਤ੍ਤਯਂ ਉਤੁਚਿਤ੍ਤਾਹਾਰੇਹਿ ਸਮ੍ਭੋਤਿ.
੪੧. ਅਵਿਨਿਬ੍ਭੋਗਰੂਪਾਨਿ ਚੇਵ ਆਕਾਸਧਾਤੁ ਚ. ਚਤੂਹਿ ਸਮ੍ਭੂਤਾਨਿ.
੪੨. ਲਕ੍ਖਣਰੂਪਾਨਿ ਨ ਕੁਤੋਚਿ ਜਾਯਨ੍ਤਿ.
੪੩. ਅਟ੍ਠਾਰਸ ਪਨ੍ਨਰਸ, ਤੇਰਸ ਦ੍ਵਾਦਸਾਤਿ ਚ.
ਕਮ੍ਮਚਿਤ੍ਤੋਤੁਕਾਹਾਰ-ਜਾਨਿ ਹੋਨ੍ਤਿ ਯਥਾਕ੍ਕਮਂ.
੪੪. ਜਾਯਮਾਨਾਦਿਰੂਪਾਨਂ, ਸਭਾਵਤ੍ਤਾ ਹਿ ਕੇਵਲਂ.
ਲਕ੍ਖਣਾਨਿ ਨ ਜਾਯਨ੍ਤਿ, ਕੇਹਿਚੀਤਿ ਪਕਾਸਿਤਂ.
ਅਯਮੇਤ੍ਥ ਰੂਪਸਮੁਟ੍ਠਾਨਨਯੋ.
ਕਲਾਪਯੋਜਨਾ
੪੫. ਏਕੁਪ੍ਪਾਦਾ ਏਕਨਿਰੋਧਾ ਏਕਨਿਸ੍ਸਯਾ ਸਹਵੁਤ੍ਤਿਨੋ ਏਕਵੀਸਤਿ ਰੂਪਕਲਾਪਾ ਨਾਮ.
੪੬. ਤਤ੍ਥ ਜੀਵਿਤਂ ਅਵਿਨਿਬ੍ਭੋਗਰੂਪਞ੍ਚ ਚਕ੍ਖੁਨਾ ਸਹ ਚਕ੍ਖੁਦਸਕਨ੍ਤਿ ਪਵੁਚ੍ਚਤਿ. ਤਥਾ ਸੋਤਾਦੀਹਿ ਸਦ੍ਧਿਂ ਸੋਤਦਸਕਂ ਘਾਨਦਸਕਂ ਜਿਵ੍ਹਾਦਸਕਂ ਕਾਯਦਸਕਂ ਇਤ੍ਥਿਭਾਵਦਸਕਂ ਪੁਮ੍ਭਾਵਦਸਕਂ ਵਤ੍ਥੁਦਸਕਞ੍ਚੇਤਿ ਯਥਾਕ੍ਕਮਂ ਯੋਜੇਤਬ੍ਬਂ. ਅਵਿਨਿਬ੍ਭੋਗਰੂਪਮੇਵ ਜੀਵਿਤੇਨ ਸਹ ਜੀਵਿਤਨਵਕਨ੍ਤਿ ਪਵੁਚ੍ਚਤਿ. ਇਮੇ ਨਵ ਕਮ੍ਮਸਮੁਟ੍ਠਾਨਕਲਾਪਾ.
੪੭. ਅਵਿਨਿਬ੍ਭੋਗਰੂਪਂ ਪਨ ਸੁਦ੍ਧਟ੍ਠਕਂ, ਤਦੇਵ ਕਾਯਵਿਞ੍ਞਤ੍ਤਿਯਾ ਸਹ ਕਾਯਵਿਞ੍ਞਤ੍ਤਿਨਵਕਂ, ਵਚੀਵਿਞ੍ਞਤ੍ਤਿਸਦ੍ਦੇਹਿ ਸਹ ਵਚੀਵਿਞ੍ਞਤ੍ਤਿਦਸਕਂ, ਲਹੁਤਾਦੀਹਿ ਸਦ੍ਧਿਂ ਲਹੁਤਾਦੇਕਾਦਸਕਂ, ਕਾਯਵਿਞ੍ਞਤ੍ਤਿਲਹੁਤਾਦਿਦ੍ਵਾਦਸਕਂ, ਵਚੀਵਿਞ੍ਞਤ੍ਤਿਸਦ੍ਦਲਹੁਤਾਦਿਤੇਰਸਕਞ੍ਚੇਤਿ ਛ ਚਿਤ੍ਤਸਮੁਟ੍ਠਾਨਕਲਾਪਾ.
੪੮. ਸੁਦ੍ਧਟ੍ਠਕਂ ਸਦ੍ਦਨਵਕਂ ਲਹੁਤਾਦੇਕਾਦਸਕਂ ਸਦ੍ਦਲਹੁਤਾਦਿਦ੍ਵਾਦਸਕਞ੍ਚੇਤਿ ਚਤ੍ਤਾਰੋ ਉਤੁਸਮੁਟ੍ਠਾਨਕਲਾਪਾ.
੪੯. ਸੁਦ੍ਧਟ੍ਠਕਂ ਲਹੁਤਾਦੇਕਾਦਸਕਞ੍ਚੇਤਿ ਦ੍ਵੇਆਹਾਰਸਮੁਟ੍ਠਾਨਕਲਾਪਾ.
੫੦. ਤਤ੍ਥ ਸੁਦ੍ਧਟ੍ਠਕਂ ਸਦ੍ਦਨਵਕਞ੍ਚੇਤਿ ਦ੍ਵੇ ਉਤੁਸਮੁਟ੍ਠਾਨਕਲਾਪਾ ਬਹਿਦ੍ਧਾਪਿ ਲਬ੍ਭਨ੍ਤਿ, ਅਵਸੇਸਾ ਪਨ ਸਬ੍ਬੇਪਿ ਅਜ੍ਝਤ੍ਤਿਕਮੇਵਾਤਿ.
੫੧. ਕਮ੍ਮਚਿਤ੍ਤੋਤੁਕਾਹਾਰ-ਸਮੁਟ੍ਠਾਨਾ ਯਥਾਕ੍ਕਮਂ.
ਨਵ ਛ ਚਤੁਰੋ ਦ੍ਵੇਤਿ, ਕਲਾਪਾ ਏਕਵੀਸਤਿ.
ਕਲਾਪਾਨਂ ਪਰਿਚ੍ਛੇਦ-ਲਕ੍ਖਣਤ੍ਤਾ ਵਿਚਕ੍ਖਣਾ;
ਨ ਕਲਾਪਙ੍ਗਮਿਚ੍ਚਾਹੁ, ਆਕਾਸਂ ਲਕ੍ਖਣਾਨਿ ਚ.
ਅਯਮੇਤ੍ਥ ਕਲਾਪਯੋਜਨਾ.
ਰੂਪਪਵਤ੍ਤਿਕ੍ਕਮੋ
੫੨. ਸਬ੍ਬਾਨਿਪਿ ਪਨੇਤਾਨਿ ਰੂਪਾਨਿ ਕਾਮਲੋਕੇ ਯਥਾਰਹਂ ਅਨੂਨਾਨਿ ਪਵਤ੍ਤਿਯਂ ਉਪਲਬ੍ਭਨ੍ਤਿ.
੫੩. ਪਟਿਸਨ੍ਧਿਯਂ ਪਨ ਸਂਸੇਦਜਾਨਞ੍ਚੇਵ ਓਪਪਾਤਿਕਾਨਞ੍ਚ ਚਕ੍ਖੁਸੋਤਘਾਨਜਿਵ੍ਹਾਕਾਯਭਾਵਵਤ੍ਥੁਦਸਕਸਙ੍ਖਾਤਾਨਿ ਸਤ੍ਤ ਦਸਕਾਨਿ ਪਾਤੁਭਵਨ੍ਤਿ ਉਕ੍ਕਟ੍ਠਵਸੇਨ, ਓਮਕਵਸੇਨ ਪਨ ਚਕ੍ਖੁਸੋਤਘਾਨਭਾਵਦਸਕਾਨਿ ਕਦਾਚਿਪਿ ਨ ਲਬ੍ਭਨ੍ਤਿ, ਤਸ੍ਮਾ ਤੇਸਂ ਵਸੇਨ ਕਲਾਪਹਾਨਿ ਵੇਦਿਤਬ੍ਬਾ.
੫੪. ਗਬ੍ਭਸੇਯ੍ਯਕਸਤ੍ਤਾਨਂ ਪਨ ਕਾਯਭਾਵਵਤ੍ਥੁਦਸਕਸਙ੍ਖਾਤਾਨਿ ਤੀਣਿ ਦਸਕਾਨਿ ਪਾਤੁਭਵਨ੍ਤਿ, ਤਤ੍ਥਾਪਿ ਭਾਵਦਸਕਂ ਕਦਾਚਿ ਨ ਲਬ੍ਭਤਿ, ਤਤੋ ਪਰਂ ਪਵਤ੍ਤਿਕਾਲੇ ਕਮੇਨ ਚਕ੍ਖੁਦਸਕਾਦੀਨਿ ਚ ਪਾਤੁਭਵਨ੍ਤਿ.
੫੫. ਇਚ੍ਚੇਵਂ ਪਟਿਸਨ੍ਧਿਮੁਪਾਦਾਯ ਕਮ੍ਮਸਮੁਟ੍ਠਾਨਾ, ਦੁਤਿਯਚਿਤ੍ਤਮੁਪਾਦਾਯ ਚਿਤ੍ਤਸਮੁਟ੍ਠਾਨਾ, ਠਿਤਿਕਾਲਮੁਪਾਦਾਯ ਉਤੁਸਮੁਟ੍ਠਾਨਾ, ਓਜਾਫਰਣਮੁਪਾਦਾਯ ਆਹਾਰਸਮੁਟ੍ਠਾਨਾ ਚੇਤਿ ਚਤੁਸਮੁਟ੍ਠਾਨਰੂਪਕਲਾਪਸਨ੍ਤਤਿ ਕਾਮਲੋਕੇ ਦੀਪਜਾਲਾ ਵਿਯ, ਨਦੀਸੋਤੋ ਵਿਯ ਚ ਯਾਵਤਾਯੁਕਮਬ੍ਬੋਚ੍ਛਿਨ੍ਨਾ ਪਵਤ੍ਤਤਿ.
੫੬. ਮਰਣਕਾਲੇ ਪਨ ਚੁਤਿਚਿਤ੍ਤੋਪਰਿਸਤ੍ਤਰਸਮਚਿਤ੍ਤਸ੍ਸ ਠਿਤਿਕਾਲਮੁਪਾਦਾਯ ਕਮ੍ਮਜਰੂਪਾਨਿ ਨ ਉਪ੍ਪਜ੍ਜਨ੍ਤਿ, ਪੁਰੇਤਰਮੁਪ੍ਪਨ੍ਨਾਨਿ ਚ ਕਮ੍ਮਜਰੂਪਾਨਿ ਚੁਤਿਚਿਤ੍ਤਸਮਕਾਲਮੇਵ ਪਵਤ੍ਤਿਤ੍ਵਾ ਨਿਰੁਜ੍ਝਨ੍ਤਿ, ਤਤੋ ਪਰਂ ਚਿਤ੍ਤਜਾਹਾਰਜਰੂਪਞ੍ਚ ਵੋਚ੍ਛਿਜ੍ਜਤਿ, ਤਤੋ ਪਰਂ ਉਤੁਸਮੁਟ੍ਠਾਨਰੂਪਪਰਮ੍ਪਰਾ ਯਾਵ ਮਤਕਲ਼ੇਵਰਸਙ੍ਖਾਤਾ ਪਵਤ੍ਤਨ੍ਤਿ.
੫੭. ਇਚ੍ਚੇਵਂ ਮਤਸਤ੍ਤਾਨਂ, ਪੁਨਦੇਵ ਭਵਨ੍ਤਰੇ.
ਪਟਿਸਨ੍ਧਿਮੁਪਾਦਾਯ, ਤਥਾ ਰੂਪਂ ਪਵਤ੍ਤਤਿ.
੫੮. ਰੂਪਲੋਕੇ ਪਨ ਘਾਨਜਿਵ੍ਹਾਕਾਯਭਾਵਦਸਕਾਨਿ ਚ ਆਹਾਰਜਕਲਾਪਾਨਿ ਚ ਨ ਲਬ੍ਭਨ੍ਤਿ, ਤਸ੍ਮਾ ਤੇਸਂ ਪਟਿਸਨ੍ਧਿਕਾਲੇ ਚਕ੍ਖੁਸੋਤਵਤ੍ਥੁਵਸੇਨ ਤੀਣਿ ਦਸਕਾਨਿ ਜੀਵਿਤਨਵਕਞ੍ਚੇਤਿ ਚਤ੍ਤਾਰੋ ਕਮ੍ਮਸਮੁਟ੍ਠਾਨਕਲਾਪਾ, ਪਵਤ੍ਤਿਯਂ ਚਿਤ੍ਤੋਤੁਸਮੁਟ੍ਠਾਨਾ ਚ ਲਬ੍ਭਨ੍ਤਿ.
੫੯. ਅਸਞ੍ਞਸਤ੍ਤਾਨਂ ਪਨ ਚਕ੍ਖੁਸੋਤਵਤ੍ਥੁਸਦ੍ਦਾਪਿ ਨ ਲਬ੍ਭਨ੍ਤਿ, ਤਥਾ ਸਬ੍ਬਾਨਿਪਿ ਚਿਤ੍ਤਜਰੂਪਾਨਿ, ਤਸ੍ਮਾ ਤੇਸਂ ਪਟਿਸਨ੍ਧਿਕਾਲੇ ਜੀਵਿਤਨਵਕਮੇਵ, ਪਵਤ੍ਤਿਯਞ੍ਚ ਸਦ੍ਦਵਜ੍ਜਿਤਂ ਉਤੁਸਮੁਟ੍ਠਾਨਰੂਪਂ ਅਤਿਰਿਚ੍ਛਤਿ.
੬੦. ਇਚ੍ਚੇਵਂ ਕਾਮਰੂਪਾਸਞ੍ਞੀਸਙ੍ਖਾਤੇਸੁ ਤੀਸੁ ਠਾਨੇਸੁ ਪਟਿਸਨ੍ਧਿਪਵਤ੍ਤਿਵਸੇਨ ਦੁਵਿਧਾ ਰੂਪਪ੍ਪਵਤ੍ਤਿ ਵੇਦਿਤਬ੍ਬਾ.
੬੧. ਅਟ੍ਠਵੀਸਤਿ ਕਾਮੇਸੁ, ਹੋਨ੍ਤਿ ਤੇਵੀਸ ਰੂਪਿਸੁ.
ਸਤ੍ਤਰਸੇਵ ਸਞ੍ਞੀਨਂ, ਅਰੂਪੇ ਨਤ੍ਥਿ ਕਿਞ੍ਚਿਪਿ.
ਸਦ੍ਦੋ ਵਿਕਾਰੋ ਜਰਤਾ, ਮਰਣਞ੍ਚੋਪਪਤ੍ਤਿਯਂ;
ਨ ਲਬ੍ਭਨ੍ਤਿ ਪਵਤ੍ਤੇ ਤੁ, ਨ ਕਿਞ੍ਚਿਪਿ ਨ ਲਬ੍ਭਤਿ.
ਅਯਮੇਤ੍ਥ ਰੂਪਪਵਤ੍ਤਿਕ੍ਕਮੋ.
ਨਿਬ੍ਬਾਨਭੇਦੋ
੬੨. ਨਿਬ੍ਬਾਨਂ ਪਨ ਲੋਕੁਤ੍ਤਰਸਙ੍ਖਾਤਂ ਚਤੁਮਗ੍ਗਞਾਣੇਨ ਸਚ੍ਛਿਕਾਤਬ੍ਬਂ ਮਗ੍ਗਫਲਾਨਮਾਰਮ੍ਮਣਭੂਤਂ ਵਾਨਸਙ੍ਖਾਤਾਯ ਤਣ੍ਹਾਯ ਨਿਕ੍ਖਨ੍ਤਤ੍ਤਾ ਨਿਬ੍ਬਾਨਨ੍ਤਿ ਪਵੁਚ੍ਚਤਿ.
੬੩. ਤਦੇਤਂ ਸਭਾਵਤੋ ਏਕਵਿਧਮ੍ਪਿ ਸਉਪਾਦਿਸੇਸਨਿਬ੍ਬਾਨਧਾਤੁ ਅਨੁਪਾਦਿਸੇਸਨਿਬ੍ਬਾਨਧਾਤੁ ਚੇਤਿ ਦੁਵਿਧਂ ਹੋਤਿ ਕਾਰਣਪਰਿਯਾਯੇਨ.
੬੪. ਤਥਾ ਸੁਞ੍ਞਤਂ ਅਨਿਮਿਤ੍ਤਂ ਅਪ੍ਪਣਿਹਿਤਞ੍ਚੇਤਿ ਤਿਵਿਧਂ ਹੋਤਿ ਆਕਾਰਭੇਦੇਨ.
੬੫. ਪਦਮਚ੍ਚੁਤਮਚ੍ਚਨ੍ਤਂ, ਅਸਙ੍ਖਤਮਨੁਤ੍ਤਰਂ.
ਨਿਬ੍ਬਾਨਮਿਤਿ ਭਾਸਨ੍ਤਿ, ਵਾਨਮੁਤ੍ਤਾ ਮਹੇਸਯੋ.
ਇਤਿ ਚਿਤ੍ਤਂ ਚੇਤਸਿਕਂ, ਰੂਪਂ ਨਿਬ੍ਬਾਨਮਿਚ੍ਚਪਿ;
ਪਰਮਤ੍ਥਂ ਪਕਾਸੇਨ੍ਤਿ, ਚਤੁਧਾਵ ਤਥਾਗਤਾ.
ਇਤਿ ਅਭਿਧਮ੍ਮਤ੍ਥਸਙ੍ਗਹੇ ਰੂਪਸਙ੍ਗਹਵਿਭਾਗੋ ਨਾਮ
ਛਟ੍ਠੋ ਪਰਿਚ੍ਛੇਦੋ.