੨. ਚੇਤਸਿਕਪਰਿਚ੍ਛੇਦੋ
ਸਮ੍ਪਯੋਗਲਕ੍ਖਣਂ
੧. ਏਕੁਪ੍ਪਾਦਨਿਰੋਧਾ ਚ, ਏਕਾਲਮ੍ਬਣਵਤ੍ਥੁਕਾ.
ਚੇਤੋਯੁਤ੍ਤਾ ਦ੍ਵਿਪਞ੍ਞਾਸ, ਧਮ੍ਮਾ ਚੇਤਸਿਕਾ ਮਤਾ.
ਅਞ੍ਞਸਮਾਨਚੇਤਸਿਕਂ
੨. ਕਥਂ? ਫਸ੍ਸੋ ਵੇਦਨਾ ਸਞ੍ਞਾ ਚੇਤਨਾ ਏਕਗ੍ਗਤਾ ਜੀਵਿਤਿਨ੍ਦ੍ਰਿਯਂ ਮਨਸਿਕਾਰੋ ਚੇਤਿ ਸਤ੍ਤਿਮੇ ਚੇਤਸਿਕਾ ਸਬ੍ਬਚਿਤ੍ਤਸਾਧਾਰਣਾ ਨਾਮ.
੩. ਵਿਤਕ੍ਕੋ ਵਿਚਾਰੋ ਅਧਿਮੋਕ੍ਖੋ ਵੀਰਿਯਂ ਪੀਤਿ ਛਨ੍ਦੋ ਚਾਤਿ ਛ ਇਮੇ ਚੇਤਸਿਕਾ ਪਕਿਣ੍ਣਕਾ ਨਾਮ.
੪. ਏਵਮੇਤੇ ਤੇਰਸ ਚੇਤਸਿਕਾ ਅਞ੍ਞਸਮਾਨਾਤਿ ਵੇਦਿਤਬ੍ਬਾ.
ਅਕੁਸਲਚੇਤਸਿਕਂ
੫. ਮੋਹੋ ਅਹਿਰਿਕਂ ਅਨੋਤ੍ਤਪ੍ਪਂ ਉਦ੍ਧਚ੍ਚਂ ਲੋਭੋ ਦਿਟ੍ਠਿ ਮਾਨੋ ਦੋਸੋ ਇਸ੍ਸਾ ਮਚ੍ਛਰਿਯਂ ਕੁਕ੍ਕੁਚ੍ਚਂ ਥਿਨਂ ਮਿਦ੍ਧਂ ਵਿਚਿਕਿਚ੍ਛਾ ਚੇਤਿ ਚੁਦ੍ਦਸਿਮੇ ਚੇਤਸਿਕਾ ਅਕੁਸਲਾ ਨਾਮ.
ਸੋਭਨਚੇਤਸਿਕਂ
੬. ਸਦ੍ਧਾ ਸਤਿ ਹਿਰੀ ਓਤ੍ਤਪ੍ਪਂ ਅਲੋਭੋ ਅਦੋਸੋ ਤਤ੍ਰਮਜ੍ਝਤ੍ਤਤਾ ਕਾਯਪਸ੍ਸਦ੍ਧਿ ਚਿਤ੍ਤਪਸ੍ਸਦ੍ਧਿ ਕਾਯਲਹੁਤਾ ਚਿਤ੍ਤਲਹੁਤਾ ਕਾਯਮੁਦੁਤਾ ਚਿਤ੍ਤਮੁਦੁਤਾ ਕਾਯਕਮ੍ਮਞ੍ਞਤਾ ਚਿਤ੍ਤਕਮ੍ਮਞ੍ਞਤਾ ਕਾਯਪਾਗੁਞ੍ਞਤਾ ਚਿਤ੍ਤਪਾਗੁਞ੍ਞਤਾ ਕਾਯੁਜੁਕਤਾ ਚਿਤ੍ਤੁਜੁਕਤਾ ਚੇਤਿ ਏਕੂਨਵੀਸਤਿਮੇ ਚੇਤਸਿਕਾ ਸੋਭਨਸਾਧਾਰਣਾ ਨਾਮ.
੭. ਸਮ੍ਮਾਵਾਚਾ ਸਮ੍ਮਾਕਮ੍ਮਨ੍ਤੋ ਸਮ੍ਮਾਆਜੀਵੋ ਚੇਤਿ ਤਿਸ੍ਸੋ ਵਿਰਤਿਯੋ ਨਾਮ.
੮. ਕਰੁਣਾ ਮੁਦਿਤਾ ਅਪ੍ਪਮਞ੍ਞਾਯੋ ਨਾਮਾਤਿ ਸਬ੍ਬਥਾਪਿ ਪਞ੍ਞਿਨ੍ਦ੍ਰਿਯੇਨ ਸਦ੍ਧਿਂ ਪਞ੍ਚਵੀਸਤਿਮੇ ਚੇਤਸਿਕਾ ਸੋਭਨਾਤਿ ਵੇਦਿਤਬ੍ਬਾ.
੯. ਏਤ੍ਤਾਵਤਾ ਚ –
ਤੇਰਸਞ੍ਞਸਮਾਨਾ ਚ, ਚੁਦ੍ਦਸਾਕੁਸਲਾ ਤਥਾ;
ਸੋਭਨਾ ਪਞ੍ਚਵੀਸਾਤਿ, ਦ੍ਵਿਪਞ੍ਞਾਸ ਪਵੁਚ੍ਚਰੇ.
ਸਮ੍ਪਯੋਗਨਯੋ
੧੦. ਤੇਸਂ ਚਿਤ੍ਤਾਵਿਯੁਤ੍ਤਾਨਂ, ਯਥਾਯੋਗਮਿਤੋ ਪਰਂ.
ਚਿਤ੍ਤੁਪ੍ਪਾਦੇਸੁ ਪਚ੍ਚੇਕਂ, ਸਮ੍ਪਯੋਗੋ ਪਵੁਚ੍ਚਤਿ.
੧੧. ਸਤ੍ਤ ਸਬ੍ਬਤ੍ਥ ਯੁਜ੍ਜਨ੍ਤਿ, ਯਥਾਯੋਗਂ ਪਕਿਣ੍ਣਕਾ.
ਚੁਦ੍ਦਸਾਕੁਸਲੇਸ੍ਵੇਵ, ਸੋਭਨੇਸ੍ਵੇਵ ਸੋਭਨਾ.
ਅਞ੍ਞਸਮਾਨਚੇਤਸਿਕਸਮ੍ਪਯੋਗਨਯੋ
੧੨. ਕਥਂ? ਸਬ੍ਬਚਿਤ੍ਤਸਾਧਾਰਣਾ ਤਾਵ ਸਤ੍ਤਿਮੇ ਚੇਤਸਿਕਾ ਸਬ੍ਬੇਸੁਪਿ ਏਕੂਨਨਵੁਤਿਚਿਤ੍ਤੁਪ੍ਪਾਦੇਸੁ ਲਬ੍ਭਨ੍ਤਿ.
੧੩. ਪਕਿਣ੍ਣਕੇਸੁ ਪਨ ਵਿਤਕ੍ਕੋ ਤਾਵ ਦ੍ਵਿਪਞ੍ਚਵਿਞ੍ਞਾਣਵਜ੍ਜਿਤਕਾਮਾਵਚਰਚਿਤ੍ਤੇਸੁ ਚੇਵ ਏਕਾਦਸਸੁ ਪਠਮਜ੍ਝਾਨਚਿਤ੍ਤੇਸੁ ਚੇਤਿ ਪਞ੍ਚਪਞ੍ਞਾਸਚਿਤ੍ਤੇਸੁ ਉਪ੍ਪਜ੍ਜਤਿ.
੧੪. ਵਿਚਾਰੋ ਪਨ ਤੇਸੁ ਚੇਵ ਏਕਾਦਸਸੁ ਦੁਤਿਯਜ੍ਝਾਨਚਿਤ੍ਤੇਸੁ ਚਾਤਿ ਛਸਟ੍ਠਿਚਿਤ੍ਤੇਸੁ.
੧੫. ਅਧਿਮੋਕ੍ਖੋ ਦ੍ਵਿਪਞ੍ਚਵਿਞ੍ਞਾਣਵਿਚਿਕਿਚ੍ਛਾਸਹਗਤਵਜ੍ਜਿਤਚਿਤ੍ਤੇਸੁ.
੧੬. ਵੀਰਿਯਂ ਪਞ੍ਚਦ੍ਵਾਰਾਵਜ੍ਜਨਦ੍ਵਿਪਞ੍ਚਵਿਞ੍ਞਾਣਸਮ੍ਪਟਿਚ੍ਛਨਸਨ੍ਤੀਰਣਵਜ੍ਜਿਤਚਿਤ੍ਤੇਸੁ.
੧੭. ਪੀਤਿ ਦੋਮਨਸ੍ਸੁਪੇਕ੍ਖਾਸਹਗਤਕਾਯਵਿਞ੍ਞਾਣਚਤੁਤ੍ਥਜ੍ਝਾਨਵਜ੍ਜਿਤਚਿਤ੍ਤੇਸੁ.
੧੮. ਛਨ੍ਦੋ ਅਹੇਤੁਕਮੋਮੂਹਵਜ੍ਜਿਤਚਿਤ੍ਤੇਸੂਤਿ.
੧੯. ਤੇ ਪਨ ਚਿਤ੍ਤੁਪ੍ਪਾਦਾ ਯਥਾਕ੍ਕਮਂ –
ਛਸਟ੍ਠਿ ਪਞ੍ਚਪਞ੍ਞਾਸ, ਏਕਾਦਸ ਚ ਸੋਲ਼ਸ;
ਸਤ੍ਤਤਿ ਵੀਸਤਿ ਚੇਵ, ਪਕਿਣ੍ਣਕਵਿਵਜ੍ਜਿਤਾ.
ਪਞ੍ਚਪਞ੍ਞਾਸ ਛਸਟ੍ਠਿਟ੍ਠਸਤ੍ਤਤਿ ਤਿਸਤ੍ਤਤਿ;
ਏਕਪਞ੍ਞਾਸ ਚੇਕੂਨਸਤ੍ਤਤਿ ਸਪਕਿਣ੍ਣਕਾ.
ਅਕੁਸਲਚੇਤਸਿਕਸਮ੍ਪਯੋਗਨਯੋ
੨੦. ਅਕੁਸਲੇਸੁ ਪਨ ਮੋਹੋ ਅਹਿਰਿਕਂ ਅਨੋਤ੍ਤਪ੍ਪਂ ਉਦ੍ਧਚ੍ਚਞ੍ਚਾਤਿ ਚਤ੍ਤਾਰੋਮੇ ਚੇਤਸਿਕਾ ਸਬ੍ਬਾਕੁਸਲਸਾਧਾਰਣਾ ਨਾਮ, ਸਬ੍ਬੇਸੁਪਿ ਦ੍ਵਾਦਸਾ ਕੁਸਲੇਸੁ ਲਬ੍ਭਨ੍ਤਿ.
੨੧. ਲੋਭੋ ਅਟ੍ਠਸੁ ਲੋਭਸਹਗਤਚਿਤ੍ਤੇਸ੍ਵੇਵ ਲਬ੍ਭਤਿ.
੨੨. ਦਿਟ੍ਠਿ ਚਤੂਸੁ ਦਿਟ੍ਠਿਗਤਸਮ੍ਪਯੁਤ੍ਤੇਸੁ.
੨੩. ਮਾਨੋ ਚਤੂਸੁ ਦਿਟ੍ਠਿਗਤਵਿਪ੍ਪਯੁਤ੍ਤੇਸੁ.
੨੪. ਦੋਸੋ ਇਸ੍ਸਾ ਮਚ੍ਛਰਿਯਂ ਕੁਕ੍ਕੁਚ੍ਚਞ੍ਚਾਤਿ ਦ੍ਵੀਸੁ ਪਟਿਘਸਮ੍ਪਯੁਤ੍ਤਚਿਤ੍ਤੇਸੁ.
੨੫. ਥਿਨਮਿਦ੍ਧਂ ਪਞ੍ਚਸੁ ਸਸਙ੍ਖਾਰਿਕਚਿਤ੍ਤੇਸੁ.
੨੬. ਵਿਚਿਕਿਚ੍ਛਾ ਵਿਚਿਕਿਚ੍ਛਾਸਹਗਤਚਿਤ੍ਤੇਯੇਵਾਤਿ.
੨੭. ਸਬ੍ਬਾਪੁਞ੍ਞੇਸੁ ਚਤ੍ਤਾਰੋ,
ਲੋਭਮੂਲੇ ਤਯੋ ਗਤਾ;
ਦੋਸਮੂਲੇਸੁ ਚਤ੍ਤਾਰੋ,
ਸਸਙ੍ਖਾਰੇ ਦ੍ਵਯਂ ਤਥਾ.
ਵਿਚਿਕਿਚ੍ਛਾ ਵਿਚਿਕਿਚ੍ਛਾ-ਚਿਤ੍ਤੇ ਚਾਤਿ ਚਤੁਦ੍ਦਸ;
ਦ੍ਵਾਦਸਾਕੁਲੇਸ੍ਵੇਵ, ਸਮ੍ਪਯੁਜ੍ਜਨ੍ਤਿ ਪਞ੍ਚਧਾ.
ਸੋਭਨਚੇਤਸਿਕਸਮ੍ਪਯੋਗਨਯੋ
੨੮. ਸੋਭਨੇਸੁ ਪਨ ਸੋਭਨਸਾਧਾਰਣਾ ਤਾਵ ਏਕੂਨਵੀਸਤਿਮੇ ਚੇਤਸਿਕਾ ਸਬ੍ਬੇਸੁਪਿ ਏਕੂਨਸਟ੍ਠਿਸੋਭਨਚਿਤ੍ਤੇਸੁ ਸਂਵਿਜ੍ਜਨ੍ਤਿ.
੨੯. ਵਿਰਤਿਯੋ ਪਨ ਤਿਸ੍ਸੋਪਿ ਲੋਕੁਤ੍ਤਰਚਿਤ੍ਤੇਸੁ ਸਬ੍ਬਥਾਪਿ ਨਿਯਤਾ ਏਕਤੋਵ ਲਬ੍ਭਨ੍ਤਿ, ਲੋਕਿਯੇਸੁ ਪਨ ਕਾਮਾਵਚਰਕੁਸਲੇਸ੍ਵੇਵ ਕਦਾਚਿ ਸਨ੍ਦਿਸ੍ਸਨ੍ਤਿ ਵਿਸੁਂ ਵਿਸੁਂ.
੩੦. ਅਪ੍ਪਮਞ੍ਞਾਯੋ ਪਨ ਦ੍ਵਾਦਸਸੁ ਪਞ੍ਚਮਜ੍ਝਾਨਵਜ੍ਜਿਤਮਹਗ੍ਗਤਚਿਤ੍ਤੇਸੁ ਚੇਵ ਕਾਮਾਵਚਰਕੁਸਲੇਸੁ ਚ ਸਹੇਤੁਕਕਾਮਾਵਚਰਕਿਰਿਯਚਿਤ੍ਤੇਸੁ ਚਾਤਿ ਅਟ੍ਠਵੀਸਤਿਚਿਤ੍ਤੇਸ੍ਵੇਵ ਕਦਾਚਿ ਨਾਨਾ ਹੁਤ੍ਵਾ ਜਾਯਨ੍ਤਿ, ਉਪੇਕ੍ਖਾਸਹਗਤੇਸੁ ਪਨੇਤ੍ਥ ਕਰੁਣਾਮੁਦਿਤਾ ਨ ਸਨ੍ਤੀਤਿ ਕੇਚਿ ਵਦਨ੍ਤਿ.
੩੧. ਪਞ੍ਞਾ ਪਨ ਦ੍ਵਾਦਸਸੁ ਞਾਣਸਮ੍ਪਯੁਤ੍ਤਕਾਮਾਵਚਰਚਿਤ੍ਤੇਸੁ ਚੇਵ ਸਬ੍ਬੇਸੁਪਿ ਪਞ੍ਚਤਿਂਸਮਹਗ੍ਗਤਲੋਕੁਤ੍ਤਰਚਿਤ੍ਤੇਸੁ ਚਾਤਿ ਸਤ੍ਤਚਤ੍ਤਾਲੀਸਚਿਤ੍ਤੇਸੁ ਸਮ੍ਪਯੋਗਂ ਗਚ੍ਛਤੀਤਿ.
੩੨. ਏਕੂਨਵੀਸਤਿ ਧਮ੍ਮਾ, ਜਾਯਨ੍ਤੇਕੂਨਸਟ੍ਠਿਸੁ.
ਤਯੋ ਸੋਲ਼ਸਚਿਤ੍ਤੇਸੁ, ਅਟ੍ਠਵੀਸਤਿਯਂ ਦ੍ਵਯਂ.
ਪਞ੍ਞਾ ਪਕਾਸਿਤਾ, ਸਤ੍ਤਚਤ੍ਤਾਲੀਸਵਿਧੇਸੁਪਿ;
ਸਮ੍ਪਯੁਤ੍ਤਾ ਚਤੁਧੇਵਂ, ਸੋਭਨੇਸ੍ਵੇਵ ਸੋਭਨਾ.
੩੩. ਇਸ੍ਸਾਮਚ੍ਛੇਰਕੁਕ੍ਕੁਚ੍ਚ-ਵਿਰਤਿਕਰੁਣਾਦਯੋ.
ਨਾਨਾ ਕਦਾਚਿ ਮਾਨੋ ਚ, ਥਿਨ ਮਿਦ੍ਧਂ ਤਥਾ ਸਹ.
੩੪. ਯਥਾਵੁਤ੍ਤਾਨੁਸਾਰੇਨ, ਸੇਸਾ ਨਿਯਤਯੋਗਿਨੋ.
ਸਙ੍ਗਹਞ੍ਚ ਪਵਕ੍ਖਾਮਿ, ਤੇਸਂ ਦਾਨਿ ਯਥਾਰਹਂ.
ਸਙ੍ਗਹਨਯੋ
੩੫. ਛਤ੍ਤਿਂਸਾਨੁਤ੍ਤਰੇ ਧਮ੍ਮਾ, ਪਞ੍ਚਤਿਂਸ ਮਹਗ੍ਗਤੇ.
ਅਟ੍ਠਤਿਂਸਾਪਿ ਲਬ੍ਭਨ੍ਤਿ, ਕਾਮਾਵਚਰਸੋਭਨੇ.
ਸਤ੍ਤਵੀਸਤਿਪੁਞ੍ਞਮ੍ਹਿ, ਦ੍ਵਾਦਸਾਹੇਤੁਕੇਤਿ ਚ;
ਯਥਾਸਮ੍ਭਵਯੋਗੇਨ, ਪਞ੍ਚਧਾ ਤਤ੍ਥ ਸਙ੍ਗਹੋ.
ਲੋਕੁਤ੍ਤਰਚਿਤ੍ਤਸਙ੍ਗਹਨਯੋ
੩੬. ਕਥਂ? ਲੋਕੁਤ੍ਤਰੇਸੁ ਤਾਵ ਅਟ੍ਠਸੁ ਪਠਮਜ੍ਝਾਨਿਕਚਿਤ੍ਤੇਸੁ ਅਞ੍ਞਸਮਾਨਾ ਤੇਰਸ ਚੇਤਸਿਕਾ, ਅਪ੍ਪਮਞ੍ਞਾਵਜ੍ਜਿਤਾ ਤੇਵੀਸਤਿ ਸੋਭਨਚੇਤਸਿਕਾ ਚੇਤਿ ਛਤ੍ਤਿਂਸ ਧਮ੍ਮਾ ਸਙ੍ਗਹਂ ਗਚ੍ਛਨ੍ਤਿ, ਤਥਾ ਦੁਤਿਯਜ੍ਝਾਨਿਕਚਿਤ੍ਤੇਸੁ ਵਿਤਕ੍ਕਵਜ੍ਜਾ, ਤਤਿਯਜ੍ਝਾਨਿਕਚਿਤ੍ਤੇਸੁ ਵਿਤਕ੍ਕਵਿਚਾਰਵਜ੍ਜਾ, ਚਤੁਤ੍ਥਜ੍ਝਾਨਿਕਚਿਤ੍ਤੇਸੁ ਵਿਤਕ੍ਕਵਿਚਾਰਪੀਤਿਵਜ੍ਜਾ, ਪਞ੍ਚਮਜ੍ਝਾਨਿਕਚਿਤ੍ਤੇਸੁਪਿ ਉਪੇਕ੍ਖਾਸਹਗਤਾ ਤੇ ਏਵ ਸਙ੍ਗਯ੍ਹਨ੍ਤੀਤਿ ਸਬ੍ਬਥਾਪਿ ਅਟ੍ਠਸੁ ਲੋਕੁਤ੍ਤਰਚਿਤ੍ਤੇਸੁ ਪਞ੍ਚਕਜ੍ਝਾਨਵਸੇਨ ਪਞ੍ਚਧਾਵ ਸਙ੍ਗਹੋ ਹੋਤੀਤਿ.
੩੭. ਛਤ੍ਤਿਂਸ ਪਞ੍ਚਤਿਂਸ ਚ, ਚਤੁਤ੍ਤਿਂਸ ਯਥਾਕ੍ਕਮਂ.
ਤੇਤ੍ਤਿਂਸਦ੍ਵਯਮਿਚ੍ਚੇਵਂ, ਪਞ੍ਚਧਾਨੁਤ੍ਤਰੇ ਠਿਤਾ.
ਮਹਗ੍ਗਤਚਿਤ੍ਤਸਙ੍ਗਹਨਯੋ
੩੮. ਮਹਗ੍ਗਤੇਸੁ ਪਨ ਤੀਸੁ ਪਠਮਜ੍ਝਾਨਿਕਚਿਤ੍ਤੇਸੁ ਤਾਵ ਅਞ੍ਞਸਮਾਨਾ ਤੇਰਸ ਚੇਤਸਿਕਾ, ਵਿਰਤਿਤ੍ਤਯਵਜ੍ਜਿਤਾ ਦ੍ਵਾਵੀਸਤਿ ਸੋਭਨਚੇਤਸਿਕਾ ਚੇਤਿ ਪਞ੍ਚਤਿਂਸ ਧਮ੍ਮਾ ਸਙ੍ਗਹਂ ਗਚ੍ਛਨ੍ਤਿ, ਕਰੁਣਾਮੁਦਿਤਾ ਪਨੇਤ੍ਥ ਪਚ੍ਚੇਕਮੇਵ ਯੋਜੇਤਬ੍ਬਾ, ਤਥਾ ਦੁਤਿਯਜ੍ਝਾਨਿਕਚਿਤ੍ਤੇਸੁ ਵਿਤਕ੍ਕਵਜ੍ਜਾ, ਤਤਿਯਜ੍ਝਾਨਿਕਚਿਤ੍ਤੇਸੁ ਵਿਤਕ੍ਕਵਿਚਾਰਵਜ੍ਜਾ, ਚਤੁਤ੍ਥਜ੍ਝਾਨਿਕਚਿਤ੍ਤੇਸੁ ਵਿਤਕ੍ਕਵਿਚਾਰਪੀਤਿਵਜ੍ਜਾ, ਪਞ੍ਚਮਜ੍ਝਾਨਿਕਚਿਤ੍ਤੇਸੁ ਪਨ ਪਨ੍ਨਰਸਸੁ ਅਪ੍ਪਮਞ੍ਞਾਯੋ ਨ ਲਬ੍ਭਨ੍ਤੀਤਿ ਸਬ੍ਬਥਾਪਿ ਸਤ੍ਤਵੀਸਤਿਮਹਗ੍ਗਤਚਿਤ੍ਤੇਸੁ ਪਞ੍ਚਕਜ੍ਝਾਨਵਸੇਨ ਪਞ੍ਚਧਾਵ ਸਙ੍ਗਹੋ ਹੋਤੀਤਿ.
੩੯. ਪਞ੍ਚਤਿਂਸ ਚਤੁਤ੍ਤਿਂਸ, ਤੇਤ੍ਤਿਂਸ ਚ ਯਥਾਕ੍ਕਮਂ.
ਬਾਤ੍ਤਿਂਸ ਚੇਵ ਤਿਂਸੇਤਿ, ਪਞ੍ਚਧਾਵ ਮਹਗ੍ਗਤੇ.
ਕਾਮਾਵਚਰਸੋਭਨਚਿਤ੍ਤਸਙ੍ਗਹਨਯੋ
੪੦. ਕਾਮਾਵਚਰਸੋਭਨੇਸੁ ਪਨ ਕੁਸਲੇਸੁ ਤਾਵ ਪਠਮਦ੍ਵਯੇ ਅਞ੍ਞਸਮਾਨਾ ਤੇਰਸ ਚੇਤਸਿਕਾ, ਪਞ੍ਚਵੀਸਤਿ ਸੋਭਨਚੇਤਸਿਕਾ ਚੇਤਿ ਅਟ੍ਠਤਿਂਸ ਧਮ੍ਮਾ ਸਙ੍ਗਹਂ ਗਚ੍ਛਨ੍ਤਿ, ਅਪ੍ਪਮਞ੍ਞਾਵਿਰਤਿਯੋ ਪਨੇਤ੍ਥ ਪਞ੍ਚਪਿ ਪਚ੍ਚੇਕਮੇਵ ਯੋਜੇਤਬ੍ਬਾ, ਤਥਾ ਦੁਤਿਯਦ੍ਵਯੇ ਞਾਣਵਜ੍ਜਿਤਾ, ਤਤਿਯਦ੍ਵਯੇ ਞਾਣਸਮ੍ਪਯੁਤ੍ਤਾ ਪੀਤਿਵਜ੍ਜਿਤਾ, ਚਤੁਤ੍ਥਦ੍ਵਯੇ ਞਾਣਪੀਤਿਵਜ੍ਜਿਤਾ ਤੇ ਏਵ ਸਙ੍ਗਯ੍ਹਨ੍ਤਿ. ਕਿਰਿਯਚਿਤ੍ਤੇਸੁਪਿ ਵਿਰਤਿਵਜ੍ਜਿਤਾ ਤਥੇਵ ਚਤੂਸੁਪਿ ਦੁਕੇਸੁ ਚਤੁਧਾਵ ਸਙ੍ਗਯ੍ਹਨ੍ਤਿ. ਤਥਾ ਵਿਪਾਕੇਸੁ ਚ ਅਪ੍ਪਮਞ੍ਞਾਵਿਰਤਿਵਜ੍ਜਿਤਾ ਤੇ ਏਵ ਸਙ੍ਗਯ੍ਹਨ੍ਤੀਤਿ ਸਬ੍ਬਥਾਪਿ ਚਤੁਵੀਸਤਿਕਾਮਾਵਚਰਸੋਭਨਚਿਤ੍ਤੇਸੁ ਦੁਕਵਸੇਨ ਦ੍ਵਾਦਸਧਾਵ ਸਙ੍ਗਹੋ ਹੋਤੀਤਿ.
੪੧. ਅਟ੍ਠਤਿਂਸ ਸਤ੍ਤਤਿਂਸ, ਦ੍ਵਯਂ ਛਤ੍ਤਿਂਸਕਂ ਸੁਭੇ.
ਪਞ੍ਚਤਿਂਸ ਚਤੁਤ੍ਤਿਂਸ, ਦ੍ਵਯਂ ਤੇਤ੍ਤਿਂਸਕਂ ਕ੍ਰਿਯੇ;
ਤੇਤ੍ਤਿਂਸ ਪਾਕੇ ਬਾਤ੍ਤਿਂਸ, ਦ੍ਵਯੇਕਤਿਂਸਕਂ ਭਵੇ;
ਸਹੇਤੁਕਾਮਾਵਚਰਪੁਞ੍ਞ-ਪਾਕਕ੍ਰਿਯਾਮਨੇ.
੪੨. ਨਵਿਜ੍ਜਨ੍ਤੇਤ੍ਥ ਵਿਰਤੀ, ਕ੍ਰਿਯੇਸੁ ਚ ਮਹਗ੍ਗਤੇ.
ਅਨੁਤ੍ਤਰੇ ਅਪ੍ਪਮਞ੍ਞਾ, ਕਾਮਪਾਕੇ ਦ੍ਵਯਂ ਤਥਾ;
ਅਨੁਤ੍ਤਰੇ ਝਾਨਧਮ੍ਮਾ, ਅਪ੍ਪਮਞ੍ਞਾ ਚ ਮਜ੍ਝਿਮੇ;
ਵਿਰਤੀ ਞਾਣਪੀਤੀ ਚ, ਪਰਿਤ੍ਤੇਸੁ ਵਿਸੇਸਕਾ.
ਅਕੁਸਲਚਿਤ੍ਤਸਙ੍ਗਹਨਯੋ
੪੩. ਅਕੁਸਲੇਸੁ ਪਨ ਲੋਭਮੂਲੇਸੁ ਤਾਵ ਪਠਮੇ ਅਸਙ੍ਖਾਰਿਕੇ ਅਞ੍ਞਸਮਾਨਾ ਤੇਰਸ ਚੇਤਸਿਕਾ, ਅਕੁਸਲਸਾਧਾਰਣਾ ਚਤ੍ਤਾਰੋ ਚਾਤਿ ਸਤ੍ਤਰਸ ਲੋਭਦਿਟ੍ਠੀਹਿ ਸਦ੍ਧਿਂ ਏਕੂਨਵੀਸਤਿ ਧਮ੍ਮਾ ਸਙ੍ਗਹਂ ਗਚ੍ਛਨ੍ਤਿ.
੪੪. ਤਥੇਵ ਦੁਤਿਯੇ ਅਸਙ੍ਖਾਰਿਕੇ ਲੋਭਮਾਨੇਨ.
੪੫. ਤਤਿਯੇ ਤਥੇਵ ਪੀਤਿਵਜ੍ਜਿਤਾ ਲੋਭਦਿਟ੍ਠੀਹਿ ਸਹ ਅਟ੍ਠਾਰਸ.
੪੬. ਚਤੁਤ੍ਥੇ ਤਥੇਵ ਲੋਭਮਾਨੇਨ.
੪੭. ਪਞ੍ਚਮੇ ਪਨ ਪਟਿਘਸਮ੍ਪਯੁਤ੍ਤੇ ਅਸਙ੍ਖਾਰਿਕੇ ਦੋਸੋ ਇਸ੍ਸਾ ਮਚ੍ਛਰਿਯਂ ਕੁਕ੍ਕੁਚ੍ਚਞ੍ਚਾਤਿ ਚਤੂਹਿ ਸਦ੍ਧਿਂ ਪੀਤਿਵਜ੍ਜਿਤਾ ਤੇ ਏਵ ਵੀਸਤਿ ਧਮ੍ਮਾ ਸਙ੍ਗਯ੍ਹਨ੍ਤਿ, ਇਸ੍ਸਾਮਚ੍ਛਰਿਯਕੁਕ੍ਕੁਚ੍ਚਾਨਿ ਪਨੇਤ੍ਥ ਪਚ੍ਚੇਕਮੇਵ ਯੋਜੇਤਬ੍ਬਾਨਿ.
੪੮. ਸਸਙ੍ਖਾਰਿਕਪਞ੍ਚਕੇਪਿ ਤਥੇਵ ਥਿਨਮਿਦ੍ਧੇਨ ਵਿਸੇਸੇਤ੍ਵਾ ਯੋਜੇਤਬ੍ਬਾ.
੪੯. ਛਨ੍ਦਪੀਤਿਵਜ੍ਜਿਤਾ ਪਨ ਅਞ੍ਞਸਮਾਨਾ ਏਕਾਦਸ, ਅਕੁਸਲਸਾਧਾਰਣਾ ਚਤ੍ਤਾਰੋ ਚਾਤਿ ਪਨ੍ਨਰਸ ਧਮ੍ਮਾ ਉਦ੍ਧਚ੍ਚਸਹਗਤੇ ਸਮ੍ਪਯੁਜ੍ਜਨ੍ਤਿ.
੫੦. ਵਿਚਿਕਿਚ੍ਛਾਸਹਗਤਚਿਤ੍ਤੇ ਚ ਅਧਿਮੋਕ੍ਖਵਿਰਹਿਤਾ ਵਿਚਿਕਿਚ੍ਛਾਸਹਗਤਾ ਤਥੇਵ ਪਨ੍ਨਰਸ ਧਮ੍ਮਾ ਸਮੁਪਲਬ੍ਭਨ੍ਤੀਤਿ ਸਬ੍ਬਥਾਪਿ ਦ੍ਵਾਦਸਾਕੁਸਲਚਿਤ੍ਤੁਪ੍ਪਾਦੇਸੁ ਪਚ੍ਚੇਕਂ ਯੋਜਿਯਮਾਨਾਪਿ ਗਣਨਵਸੇਨ ਸਤ੍ਤਧਾਵ ਸਙ੍ਗਹਿਤਾ ਭਵਨ੍ਤੀਤਿ.
੫੧. ਏਕੂਨਵੀਸਾਟ੍ਠਾਰਸ, ਵੀਸੇਕਵੀਸ ਵੀਸਤਿ.
ਦ੍ਵਾਵੀਸ ਪਨ੍ਨਰਸੇਤਿ, ਸਤ੍ਤਧਾ ਕੁਸਲੇਠਿਤਾ.
੫੨. ਸਾਧਾਰਣਾ ਚ ਚਤ੍ਤਾਰੋ, ਸਮਾਨਾ ਚ ਦਸਾਪਰੇ.
ਚੁਦ੍ਦਸੇਤੇ ਪਵੁਚ੍ਚਨ੍ਤਿ, ਸਬ੍ਬਾਕੁਸਲਯੋਗਿਨੋ.
ਅਹੇਤੁਕਚਿਤ੍ਤਸਙ੍ਗਹਨਯੋ
੫੩. ਅਹੇਤੁਕੇਸੁ ਪਨ ਹਸਨਚਿਤ੍ਤੇ ਤਾਵ ਛਨ੍ਦਵਜ੍ਜਿਤਾ ਅਞ੍ਞਸਮਾਨਾ ਦ੍ਵਾਦਸ ਧਮ੍ਮਾ ਸਙ੍ਗਹਂ ਗਚ੍ਛਨ੍ਤਿ.
੫੪. ਤਥਾ ਵੋਟ੍ਠਬ੍ਬਨੇ ਛਨ੍ਦਪੀਤਿਵਜ੍ਜਿਤਾ.
੫੫. ਸੁਖਸਨ੍ਤੀਰਣੇ ਛਨ੍ਦਵੀਰਿਯਵਜ੍ਜਿਤਾ.
੫੬. ਮਨੋਧਾਤੁਤ੍ਤਿਕਾਹੇਤੁਕਪਟਿਸਨ੍ਧਿਯੁਗਲ਼ੇ ਛਨ੍ਦਪੀਤਿਵੀਰਿਯਵਜ੍ਜਿਤਾ.
੫੭. ਦ੍ਵਿਪਞ੍ਚਵਿਞ੍ਞਾਣੇ ਪਕਿਣ੍ਣਕਵਜ੍ਜਿਤਾ ਤੇਯੇਵ ਸਙ੍ਗਯ੍ਹਨ੍ਤੀਤਿ ਸਬ੍ਬਥਾਪਿ ਅਟ੍ਠਾਰਸਸੁ ਅਹੇਤੁਕੇਸੁ ਗਣਨਵਸੇਨ ਚਤੁਧਾਵ ਸਙ੍ਗਹੋ ਹੋਤੀਤਿ.
੫੮. ਦ੍ਵਾਦਸੇਕਾਦਸ ਦਸ, ਸਤ੍ਤ ਚਾਤਿ ਚਤੁਬ੍ਬਿਧੋ.
ਅਟ੍ਠਾਰਸਾਹੇਤੁਕੇਸੁ, ਚਿਤ੍ਤੁਪ੍ਪਾਦੇਸੁ ਸਙ੍ਗਹੋ.
੫੯. ਅਹੇਤੁਕੇਸੁ ਸਬ੍ਬਤ੍ਥ, ਸਤ੍ਤ ਸੇਸਾ ਯਥਾਰਹਂ.
ਇਤਿ ਵਿਤ੍ਥਾਰਤੋ ਵੁਤ੍ਤੋ, ਤੇਤ੍ਤਿਂਸਵਿਧਸਙ੍ਗਹੋ.
੬੦. ਇਤ੍ਥਂ ਚਿਤ੍ਤਾਵਿਯੁਤ੍ਤਾਨਂ, ਸਮ੍ਪਯੋਗਞ੍ਚ ਸਙ੍ਗਹਂ.
ਞਤ੍ਵਾ ਭੇਦਂ ਯਥਾਯੋਗਂ, ਚਿਤ੍ਤੇਨ ਸਮਮੁਦ੍ਦਿਸੇ.
ਇਤਿ ਅਭਿਧਮ੍ਮਤ੍ਥਸਙ੍ਗਹੇ ਚੇਤਸਿਕਸਙ੍ਗਹਵਿਭਾਗੋ ਨਾਮ
ਦੁਤਿਯੋ ਪਰਿਚ੍ਛੇਦੋ.