ਖੁਦ੍ਦਕਵਤ੍ਥੁਵਿਭਙ੍ਗੋ

ਏਕਕਂ

ਜਾਤਿਮਦੋ (ਵਿਭ. ੮੩੨), ਗੋਤ੍ਤਮਦੋ, ਆਰੋਗ੍ਯਮਦੋ, ਯੋਬ੍ਬਨਮਦੋ, ਜੀਵਿਤਮਦੋ, ਲਾਭਮਦੋ, ਸਕ੍ਕਾਰਮਦੋ, ਗਰੁਕਾਰਮਦੋ, ਪੁਰੇਕ੍ਖਾਰਮਦੋ, ਪਰਿਵਾਰਮਦੋ, ਭੋਗਮਦੋ, ਵਣ੍ਣਮਦੋ, ਸੁਤਮਦੋ, ਪਟਿਭਾਨਮਦੋ, ਰਤ੍ਤਞ੍ਞੁਮਦੋ, ਪਿਣ੍ਡਪਾਤਿਕਮਦੋ, ਅਨਵਞ੍ਞਾਤਮਦੋ, ਇਰਿਯਾਪਥਮਦੋ, ਇਦ੍ਧਿਮਦੋ, ਯਸਮਦੋ, ਸੀਲਮਦੋ, ਝਾਨਮਦੋ, ਸਿਪ੍ਪਮਦੋ, ਆਰੋਹਮਦੋ, ਪਰਿਣਾਹਮਦੋ, ਸਣ੍ਠਾਨਮਦੋ, ਪਾਰਿਪੂਰਿਮਦੋ, ਮਦੋ, ਪਮਾਦੋ, ਥਮ੍ਭੋ, ਸਾਰਮ੍ਭੋ, ਅਤ੍ਰਿਚ੍ਛਤਾ, ਮਹਿਚ੍ਛਤਾ, ਪਾਪਿਚ੍ਛਤਾ, ਸਿਙ੍ਗਂ, ਤਿਨ੍ਤਿਣਂ, ਚਾਪਲ੍ਯਂ, ਅਸਭਾਗਵੁਤ੍ਤਿ, ਅਰਤਿ, ਤਨ੍ਦੀ, ਵਿਜਮ੍ਭਿਤਾ, ਭਤ੍ਤਸਮ੍ਮਦੋ, ਚੇਤਸੋ ਚ ਲੀਨਤ੍ਤਂ, ਕੁਹਨਾ, ਲਪਨਾ, ਨੇਮਿਤ੍ਤਿਕਤਾ, ਨਿਪ੍ਪੇਸਿਕਤਾ, ਲਾਭੇਨ ਲਾਭਂ ਨਿਜਿਗੀਸਨਤਾ, ‘‘ਸੇਯ੍ਯੋਹਮਸ੍ਮੀ’’ਤਿ ਮਾਨੋ, ‘‘ਸਦਿਸੋਹਮਸ੍ਮੀ’’ਤਿ ਮਾਨੋ, ‘‘ਹੀਨੋਹਮਸ੍ਮੀ’’ਤਿ ਮਾਨੋ. ਸੇਯ੍ਯਸ੍ਸ ‘‘ਸੇਯ੍ਯੋਹਮਸ੍ਮੀ’’ਤਿ ਮਾਨੋ, ਸੇਯ੍ਯਸ੍ਸ ‘‘ਸਦਿਸੋਹਮਸ੍ਮੀ’’ਤਿ ਮਾਨੋ, ਸੇਯ੍ਯਸ੍ਸ ‘‘ਹੀਨੋਹਮਸ੍ਮੀ’’ਤਿ ਮਾਨੋ, ਸਦਿਸਸ੍ਸ ‘‘ਸੇਯ੍ਯੋਹਮਸ੍ਮੀ’’ਤਿ ਮਾਨੋ, ਸਦਿਸਸ੍ਸ ‘‘ਸਦਿਸੋਹਮਸ੍ਮੀ’’ਤਿ ਮਾਨੋ, ਸਦਿਸਸ੍ਸ ‘‘ਹੀਨੋਹਮਸ੍ਮੀ’’ਤਿ ਮਾਨੋ, ਹੀਨਸ੍ਸ ‘‘ਸੇਯ੍ਯੋਹਮਸ੍ਮੀ’’ਤਿ ਮਾਨੋ, ਹੀਨਸ੍ਸ ‘‘ਸਦਿਸੋਹਮਸ੍ਮੀ’’ਤਿ ਮਾਨੋ, ਹੀਨਸ੍ਸ ‘‘ਹੀਨੋਹਮਸ੍ਮੀ’’ਤਿ ਮਾਨੋ, ਮਾਨੋ, ਅਤਿਮਾਨੋ, ਮਾਨਾਤਿਮਾਨੋ, ਓਮਾਨੋ, ਅਧਿਮਾਨੋ, ਅਸ੍ਮਿਮਾਨੋ, ਮਿਚ੍ਛਾਮਾਨੋ, ਞਾਤਿਵਿਤਕ੍ਕੋ, ਜਨਪਦਵਿਤਕ੍ਕੋ, ਅਮਰਵਿਤਕ੍ਕੋ, ਪਰਾਨੁਦ੍ਦਯਤਾਪਟਿਸਂਯੁਤ੍ਤੋ ਵਿਤਕ੍ਕੋ, ਲਾਭਸਕ੍ਕਾਰਸਿਲੋਕਪਟਿਸਂਯੁਤ੍ਤੋ ਵਿਤਕ੍ਕੋ, ਅਨਵਞ੍ਞਤ੍ਤਿਪਟਿਸਂਯੁਤ੍ਤੋ ਵਿਤਕ੍ਕੋ (ਵਿਭ. ੮੩੨). ਏਕਕਂ.

ਦੁਕਂ

ਕੋਧੋ ਚ ਉਪਨਾਹੋ ਚ, ਮਕ੍ਖੋ ਚ ਪਲ਼ਾਸੋ ਚ, ਇਸ੍ਸਾ ਚ ਮਚ੍ਛਰਿਯਞ੍ਚ, ਮਾਯਾ ਚ ਸਾਠੇਯ੍ਯਞ੍ਚ, ਅਵਿਜ੍ਜਾ ਚ ਭਵਤਣ੍ਹਾ ਚ, ਭਵਦਿਟ੍ਠਿ ਚ ਵਿਭਵਦਿਟ੍ਠਿ ਚ, ਸਸ੍ਸਤਦਿਟ੍ਠਿ ਚ ਉਚ੍ਛੇਦਦਿਟ੍ਠਿ ਚ, ਅਨ੍ਤਵਾਦਿਟ੍ਠਿ ਚ ਅਨਨ੍ਤਵਾਦਿਟ੍ਠਿ ਚ, ਪੁਬ੍ਬਨ੍ਤਾਨੁਦਿਟ੍ਠਿ ਚ ਅਪਰਨ੍ਤਾਨੁਦਿਟ੍ਠਿ ਚ, ਅਹਿਰਿਕਞ੍ਚ ਅਨੋਤ੍ਤਪ੍ਪਞ੍ਚ, ਦੋਵਚਸ੍ਸਤਾ ਚ ਪਾਪਮਿਤ੍ਤਤਾ ਚ, ਅਨਜ੍ਜਵੋ ਚ ਅਮਦ੍ਦਵੋ ਚ, ਅਕ੍ਖਨ੍ਤਿ ਚ ਅਸੋਰਚ੍ਚਞ੍ਚ, ਅਸਾਖਲ੍ਯਞ੍ਚ ਅਪ੍ਪਟਿਸਨ੍ਥਾਰੋ ਚ, ਇਨ੍ਦ੍ਰਿਯੇਸੁ ਅਗੁਤ੍ਤਦ੍ਵਾਰਤਾ ਚ ਭੋਜਨੇ ਅਮਤ੍ਤਞ੍ਞੁਤਾ ਚ, ਮੁਟ੍ਠਸ੍ਸਚ੍ਚਞ੍ਚ ਅਸਮ੍ਪਜਞ੍ਞਞ੍ਚ, ਸੀਲਵਿਪਤ੍ਤਿ ਚ ਦਿਟ੍ਠਿਵਿਪਤ੍ਤਿ ਚ, ਅਜ੍ਝਤ੍ਤਸਂਯੋਜਨਞ੍ਚ ਬਹਿਦ੍ਧਾਸਂਯੋਜਨਞ੍ਚ. ਦੁਕਂ.

ਤਿਕਂ

ਤੀਣਿ ਅਕੁਸਲਮੂਲਾਨਿ, ਤਯੋ ਅਕੁਸਲਵਿਤਕ੍ਕਾ, ਤਿਸ੍ਸੋ ਅਕੁਸਲਸਞ੍ਞਾ, ਤਿਸ੍ਸੋ ਅਕੁਸਲਧਾਤੁਯੋ, ਤੀਣਿ ਦੁਚ੍ਚਰਿਤਾਨਿ, ਤਯੋ ਆਸਵਾ, ਤੀਣਿ ਸਂਯੋਜਨਾਨਿ, ਤਿਸ੍ਸੋ ਤਣ੍ਹਾ, ਅਪਰਾਪਿ ਤਿਸ੍ਸੋ ਤਣ੍ਹਾ, ਅਪਰਾਪਿ ਤਿਸ੍ਸੋ ਤਣ੍ਹਾ, ਤਿਸ੍ਸੋ ਏਸਨਾ, ਤਿਸ੍ਸੋ ਵਿਧਾ, ਤੀਣਿ ਭਯਾਨਿ, ਤੀਣਿ ਤਮਾਨਿ, ਤੀਣਿ ਤਿਤ੍ਥਾਯਤਨਾਨਿ, ਤਯੋ ਕਿਞ੍ਚਨਾ, ਤੀਣਿ ਅਙ੍ਗਣਾਨਿ, ਤੀਣਿ ਮਲਾਨਿ, ਤੀਣਿ ਵਿਸਮਾਨਿ, ਅਪਰਾਨਿਪਿ ਤੀਣਿ ਵਿਸਮਾਨਿ, ਤਯੋ ਅਗ੍ਗੀ, ਤਯੋ ਕਸਾਵਾ, ਅਪਰੇਪਿ ਤਯੋ ਕਸਾਵਾ.

ਅਸ੍ਸਾਦਦਿਟ੍ਠਿ ਅਤ੍ਤਾਨੁਦਿਟ੍ਠਿ ਮਿਚ੍ਛਾਦਿਟ੍ਠਿ, ਅਰਤਿ ਵਿਹੇਸਾ ਅਧਮ੍ਮਚਰਿਯਾ, ਦੋਵਚਸ੍ਸਤਾ ਪਾਪਮਿਤ੍ਤਤਾ ਨਾਨਤ੍ਤਸਞ੍ਞਾ, ਉਦ੍ਧਚ੍ਚਂ ਕੋਸਜ੍ਜਂ ਪਮਾਦੋ, ਅਸਨ੍ਤੁਟ੍ਠਿਤਾ ਅਸਮ੍ਪਜਞ੍ਞਤਾ ਮਹਿਚ੍ਛਤਾ, ਅਹਿਰਿਕਂ ਅਨੋਤ੍ਤਪ੍ਪਂ ਪਮਾਦੋ, ਅਨਾਦਰਿਯਂ ਦੋਵਚਸ੍ਸਤਾ ਪਾਪਮਿਤ੍ਤਤਾ, ਅਸ੍ਸਦ੍ਧਿਯਂ ਅਵਦਞ੍ਞੁਤਾ ਕੋਸਜ੍ਜਂ, ਉਦ੍ਧਚ੍ਚਂ ਅਸਂਵਰੋ ਦੁਸ੍ਸੀਲ੍ਯਂ, ਅਰਿਯਾਨਂ ਅਦਸ੍ਸਨਕਮ੍ਯਤਾ ਸਦ੍ਧਮ੍ਮਂ ਅਸੋਤੁਕਮ੍ਯਤਾ ਉਪਾਰਮ੍ਭਚਿਤ੍ਤਤਾ, ਮੁਟ੍ਠਸ੍ਸਚ੍ਚਂ ਅਸਮ੍ਪਜਞ੍ਞਂ ਚੇਤਸੋ ਵਿਕ੍ਖੇਪੋ, ਅਯੋਨਿਸੋ ਮਨਸਿਕਾਰੋ ਕੁਮ੍ਮਗ੍ਗਸੇਵਨਾ ਚੇਤਸੋ ਚ ਲੀਨਤ੍ਤਂ. ਤਿਕਂ.

ਚਤੁਕ੍ਕਂ

ਚਤ੍ਤਾਰੋ ਆਸਵਾ, ਚਤ੍ਤਾਰੋ ਗਨ੍ਥਾ, ਚਤ੍ਤਾਰੋ ਓਘਾ, ਚਤ੍ਤਾਰੋ ਯੋਗਾ, ਚਤ੍ਤਾਰਿ ਉਪਾਦਾਨਾਨਿ, ਚਤ੍ਤਾਰੋ ਤਣ੍ਹੁਪ੍ਪਾਦਾ, ਚਤ੍ਤਾਰਿ ਅਗਤਿਗਮਨਾਨਿ, ਚਤ੍ਤਾਰੋ ਵਿਪਰਿਯਾਸਾ, ਚਤ੍ਤਾਰੋ ਅਨਰਿਯਵੋਹਾਰਾ, ਅਪਰੇਪਿ ਚਤ੍ਤਾਰੋ ਅਨਰਿਯਵੋਹਾਰਾ, ਚਤ੍ਤਾਰਿ ਦੁਚ੍ਚਰਿਤਾਨਿ, ਅਪਰਾਪਿ ਚਤ੍ਤਾਰਿ ਦੁਚ੍ਚਰਿਤਾਨਿ, ਚਤ੍ਤਾਰਿ ਭਯਾਨਿ, (ਅਪਰਾਨਿਪਿ ਚਤ੍ਤਾਰਿ ਭਯਾਨਿ,) ਚਤਸ੍ਸੋ ਦਿਟ੍ਠਿਯੋ. ਚਤੁਕ੍ਕਂ.

ਪਞ੍ਚਕਂ

ਪਞ੍ਚੋਰਮ੍ਭਾਗਿਯਾਨਿ ਸਂਯੋਜਨਾਨਿ, ਪਞ੍ਚੁਦ੍ਧਮ੍ਭਾਗਿਯਾਨਿ ਸਂਯੋਜਨਾਨਿ, ਪਞ੍ਚ ਮਚ੍ਛਰਿਯਾਨਿ, ਪਞ੍ਚ ਸਙ੍ਗਾ, ਪਞ੍ਚ ਸਲ੍ਲਾ, ਪਞ੍ਚ ਚੇਤੋਖਿਲਾ, ਪਞ੍ਚ ਚੇਤਸੋਵਿਨਿਬਨ੍ਧਾ, ਪਞ੍ਚ ਨੀਵਰਣਾਨਿ, ਪਞ੍ਚ ਕਮ੍ਮਾਨਿ ਆਨਨ੍ਤਰਿਕਾਨਿ, ਪਞ੍ਚ ਦਿਟ੍ਠਿਯੋ, ਪਞ੍ਚ ਵੇਰਾ, ਪਞ੍ਚ ਬ੍ਯਸਨਾ, ਪਞ੍ਚ ਅਕ੍ਖਨ੍ਤਿਯਾ ਆਦੀਨਵਾ, ਪਞ੍ਚ ਭਯਾਨਿ, ਪਞ੍ਚ ਦਿਟ੍ਠਧਮ੍ਮਨਿਬ੍ਬਾਨਵਾਦਾ. ਪਞ੍ਚਕਂ.

ਛਕ੍ਕਂ

ਛ ਵਿਵਾਦਮੂਲਾਨਿ, ਛ ਛਨ੍ਦਰਾਗਾ ਧਮ੍ਮਾ, ਛ ਵਿਰੋਧਵਤ੍ਥੂਨਿ, ਛ ਤਣ੍ਹਾਕਾਯਾ, ਛ ਅਗਾਰਵਾ, ਛ ਪਰਿਹਾਨਿਯਾ ਧਮ੍ਮਾ, ਅਪਰੇਪਿ ਛ ਪਰਿਹਾਨਿਯਾ ਧਮ੍ਮਾ, ਛ ਸੋਮਨਸ੍ਸੁਪਵਿਚਾਰਾ, ਛ ਦੋਮਨਸ੍ਸੁਪਵਿਚਾਰਾ, ਛ ਉਪੇਕ੍ਖੁਪਵਿਚਾਰਾ, ਛ ਗੇਹਸਿਤਾਨਿ ਸੋਮਨਸ੍ਸਾਨਿ, ਛ ਗੇਹਸਿਤਾਨਿ ਦੋਮਨਸ੍ਸਾਨਿ, ਛ ਗੇਹਸਿਤਾ ਉਪੇਕ੍ਖਾ, ਛ ਦਿਟ੍ਠਿਯੋ. ਛਕ੍ਕਂ.

ਸਤ੍ਤਕਂ

ਸਤ੍ਤ ਅਨੁਸਯਾ, ਸਤ੍ਤ ਸਂਯੋਜਨਾਨਿ, ਸਤ੍ਤ ਪਰਿਯੁਟ੍ਠਾਨਾਨਿ, ਸਤ੍ਤ ਅਸਦ੍ਧਮ੍ਮਾ, ਸਤ੍ਤ ਦੁਚ੍ਚਰਿਤਾਨਿ, ਸਤ੍ਤ ਮਾਨਾ, ਸਤ੍ਤ ਦਿਟ੍ਠਿਯੋ. ਸਤ੍ਤਕਂ.

ਅਟ੍ਠਕਂ

ਅਟ੍ਠ ਕਿਲੇਸਵਤ੍ਥੂਨਿ, ਅਟ੍ਠ ਕੁਸੀਤਵਤ੍ਥੂਨਿ, ਅਟ੍ਠਸੁ ਲੋਕਧਮ੍ਮੇਸੁ ਚਿਤ੍ਤਸ੍ਸ ਪਟਿਘਾਤੋ, ਅਟ੍ਠ ਅਨਰਿਯਵੋਹਾਰਾ, ਅਟ੍ਠ ਮਿਚ੍ਛਤ੍ਤਾ, ਅਟ੍ਠ ਪੁਰਿਸਦੋਸਾ, ਅਟ੍ਠ ਅਸਞ੍ਞਿਵਾਦਾ, ਅਟ੍ਠ ਨੇਵਸਞ੍ਞਿਨਾਸਞ੍ਞਿਵਾਦਾ. ਅਟ੍ਠਕਂ.

ਨਵਕਂ

ਨਵ ਆਘਾਤਵਤ੍ਥੂਨਿ, ਨਵ ਪੁਰਿਸਮਲਾਨਿ, ਨਵਵਿਧਾ ਮਾਨਾ, ਨਵ ਤਣ੍ਹਾਮੂਲਕਾ ਧਮ੍ਮਾ, ਨਵ ਇਞ੍ਜਿਤਾਨਿ, ਨਵ ਮਞ੍ਞਿਤਾਨਿ, ਨਵ ਫਨ੍ਦਿਤਾਨਿ, ਨਵ ਪਪਞ੍ਚਿਤਾਨਿ, ਨਵ ਸਙ੍ਖਤਾਨਿ. ਨਵਕਂ.

ਦਸਕਂ

ਦਸ ਕਿਲੇਸਵਤ੍ਥੂਨਿ, ਦਸ ਆਘਾਤਵਤ੍ਥੂਨਿ, ਦਸ ਅਕੁਸਲਕਮ੍ਮਪਥਾ, ਦਸ ਸਂਯੋਜਨਾਨਿ, ਦਸ ਮਿਚ੍ਛਤ੍ਤਾ, ਦਸਵਤ੍ਥੁਕਾ ਮਿਚ੍ਛਾਦਿਟ੍ਠਿ, ਦਸਵਤ੍ਥੁਕਾ ਅਨ੍ਤਗ੍ਗਾਹਿਕਾ ਦਿਟ੍ਠਿ. ਦਸਕਂ.

ਅਟ੍ਠਾਰਸ ਤਣ੍ਹਾਵਿਚਰਿਤਾਨਿ ਅਜ੍ਝਤ੍ਤਿਕਸ੍ਸ ਉਪਾਦਾਯ, ਅਟ੍ਠਾਰਸ ਤਣ੍ਹਾਵਿਚਰਿਤਾਨਿ ਬਾਹਿਰਸ੍ਸ ਉਪਾਦਾਯ, ਤਦੇਕਜ੍ਝਂ ਅਭਿਸਞ੍ਞੁਹਿਤ੍ਵਾ ਅਭਿਸਙ੍ਖਿਪਿਤ੍ਵਾ ਛਤ੍ਤਿਂਸ ਤਣ੍ਹਾਵਿਚਰਿਤਾਨਿ ਹੋਨ੍ਤਿ, ਇਤਿ ਅਤੀਤਾਨਿ ਛਤ੍ਤਿਂਸ ਤਣ੍ਹਾਵਿਚਰਿਤਾਨਿ, ਅਨਾਗਤਾਨਿ ਛਤ੍ਤਿਂਸ ਤਣ੍ਹਾਵਿਚਰਿਤਾਨਿ, ਪਚ੍ਚੁਪ੍ਪਨ੍ਨਾਨਿ ਛਤ੍ਤਿਂਸ ਤਣ੍ਹਾਵਿਚਰਿਤਾਨਿ, ਤਦੇਕਜ੍ਝਂ ਅਭਿਸਞ੍ਞੁਹਿਤ੍ਵਾ ਅਭਿਸਙ੍ਖਿਪਿਤ੍ਵਾ ਅਟ੍ਠ ਤਣ੍ਹਾਵਿਚਰਿਤਸਤਂ ਹੋਤਿ, ਯਾਨਿ ਚ ਦ੍ਵਾਸਟ੍ਠਿ ਦਿਟ੍ਠਿਗਤਾਨਿ ਬ੍ਰਹ੍ਮਜਾਲੇ ਵੇਯ੍ਯਾਕਰਣੇ ਵੁਤ੍ਤਾਨਿ ਭਗਵਤਾ.

ਖੁਦ੍ਦਕਵਤ੍ਥੁਵਿਭਙ੍ਗਂ.

ਧਮ੍ਮਹਦਯਵਿਭਙ੍ਗੋ

ਕਤਿ ਖਨ੍ਧਾ, ਕਤਿ ਆਯਤਨਾਨਿ, ਕਤਿ ਧਾਤੁਯੋ, ਕਤਿ ਸਚ੍ਚਾਨਿ, ਕਤਿ ਇਨ੍ਦ੍ਰਿਯਾਨਿ, ਕਤਿ ਹੇਤੂ, ਕਤਿ ਆਹਾਰਾ, ਕਤਿ ਫਸ੍ਸਾ, ਕਤਿ ਵੇਦਨਾ, ਕਤਿ ਸਞ੍ਞਾ, ਕਤਿ ਚੇਤਨਾ, ਕਤਿ ਚਿਤ੍ਤਾਨਿ (ਵਿਭ. ੯੭੮)?

ਪਞ੍ਚਕ੍ਖਨ੍ਧਾ, ਦ੍ਵਾਦਸਾਯਤਨਾਨਿ, ਅਟ੍ਠਾਰਸ ਧਾਤੁਯੋ, ਚਤ੍ਤਾਰਿ ਸਚ੍ਚਾਨਿ, ਬਾਵੀਸਤਿਨ੍ਦ੍ਰਿਯਾਨਿ, ਨਵ ਹੇਤੂ, ਚਤ੍ਤਾਰੋ ਆਹਾਰਾ, ਸਤ੍ਤ ਫਸ੍ਸਾ, ਸਤ੍ਤ ਵੇਦਨਾ, ਸਤ੍ਤ ਸਞ੍ਞਾ, ਸਤ੍ਤ ਚੇਤਨਾ, ਸਤ੍ਤ ਚਿਤ੍ਤਾਨਿ (ਵਿਭ. ੯੭੮).

ਧਮ੍ਮਹਦਯਵਿਭਙ੍ਗਂ.

ਵਿਭਙ੍ਗਮਾਤਿਕਾ ਨਿਟ੍ਠਿਤਾ.