੬. ਪਾਣਸੁਤ੍ਤਂ

੧੧੦੬. ‘‘ਸੇਯ੍ਯਥਾਪਿ, ਭਿਕ੍ਖਵੇ, ਪੁਰਿਸੋ ਯਂ ਇਮਸ੍ਮਿਂ ਜਮ੍ਬੁਦੀਪੇ ਤਿਣਕਟ੍ਠਸਾਖਾਪਲਾਸਂ ਤਚ੍ਛੇਤ੍ਵਾ ਏਕਜ੍ਝਂ ਸਂਹਰੇਯ੍ਯ; ਏਕਜ੍ਝਂ ਸਂਹਰਿਤ੍ਵਾ ਸੂਲਂ ਕਰੇਯ੍ਯ. ਸੂਲਂ ਕਰਿਤ੍ਵਾ ਯੇ ਮਹਾਸਮੁਦ੍ਦੇ ਮਹਨ੍ਤਕਾ ਪਾਣਾ ਤੇ ਮਹਨ੍ਤਕੇਸੁ ਸੂਲੇਸੁ ਆਵੁਨੇਯ੍ਯ, ਯੇ ਮਹਾਸਮੁਦ੍ਦੇ ਮਜ੍ਝਿਮਕਾ ਪਾਣਾ ਤੇ ਮਜ੍ਝਿਮਕੇਸੁ ਸੂਲੇਸੁ ਆਵੁਨੇਯ੍ਯ, ਯੇ ਮਹਾਸਮੁਦ੍ਦੇ ਸੁਖੁਮਕਾ ਪਾਣਾ ਤੇ ਸੁਖੁਮਕੇਸੁ ਸੂਲੇਸੁ ਆਵੁਨੇਯ੍ਯ. ਅਪਰਿਯਾਦਿਨ੍ਨਾ ਚ, ਭਿਕ੍ਖਵੇ, ਮਹਾਸਮੁਦ੍ਦੇ ਓਲ਼ਾਰਿਕਾ ਪਾਣਾ ਅਸ੍ਸੁ.

‘‘ਅਥ ਇਮਸ੍ਮਿਂ ਜਮ੍ਬੁਦੀਪੇ ਤਿਣਕਟ੍ਠਸਾਖਾਪਲਾਸਂ ਪਰਿਕ੍ਖਯਂ ਪਰਿਯਾਦਾਨਂ ਗਚ੍ਛੇਯ੍ਯ. ਇਤੋ ਬਹੁਤਰਾ ਖੋ, ਭਿਕ੍ਖਵੇ, ਮਹਾਸਮੁਦ੍ਦੇ ਸੁਖੁਮਕਾ ਪਾਣਾ, ਯੇ ਨ ਸੁਕਰਾ ਸੂਲੇਸੁ ਆਵੁਨਿਤੁਂ. ਤਂ ਕਿਸ੍ਸ ਹੇਤੁ? ਸੁਖੁਮਤ੍ਤਾ, ਭਿਕ੍ਖਵੇ, ਅਤ੍ਤਭਾਵਸ੍ਸ. ਏਵਂ ਮਹਾ ਖੋ, ਭਿਕ੍ਖਵੇ, ਅਪਾਯੋ. ਏਵਂ ਮਹਨ੍ਤਸ੍ਮਾ ਖੋ, ਭਿਕ੍ਖਵੇ, ਅਪਾਯਸ੍ਮਾ ਪਰਿਮੁਤ੍ਤੋ ਦਿਟ੍ਠਿਸਮ੍ਪਨ੍ਨੋ ਪੁਗ੍ਗਲੋ ‘ਇਦਂ ਦੁਕ੍ਖ’ਨ੍ਤਿ ਯਥਾਭੂਤਂ ਪਜਾਨਾਤਿ…ਪੇ… ‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’ਤਿ ਯਥਾਭੂਤਂ ਪਜਾਨਾਤਿ.

‘‘ਤਸ੍ਮਾਤਿਹ, ਭਿਕ੍ਖਵੇ, ‘ਇਦਂ ਦੁਕ੍ਖ’ਨ੍ਤਿ ਯੋਗੋ ਕਰਣੀਯੋ…ਪੇ… ‘ਅਯਂ ਦੁਕ੍ਖਨਿਰੋਧਗਾਮਿਨੀ ਪਟਿਪਦਾ’ਤਿ ਯੋਗੋ ਕਰਣੀਯੋ’’ਤਿ. ਛਟ੍ਠਂ.